ʻOku nau talua mai, ʻoku haʻuhaʻulu honau topuvaʻé! Ko e fanga hoosi mālohi ʻe faá mo e kau heka aí ʻoku ʻomai ai ha fakatātā mātuʻaki maeʻeeʻa lelei ʻo meimei hā ʻoku nau mahiki mai mei he ngaahi peesi ʻo e Tohi Tapú! Ko e ʻuluaki hōsí ʻoku lanu hinehina—ko e tokotaha ʻoku heka aí ko ha tuʻi lāngilangiʻia, ne toki fakakalauni. ʻOku haʻu mei mui ai ha hoosi ʻoku lanu hangē ko e afí, ʻoku heka mai ai ha tokotaha ʻokú ne ʻave ʻa e melinó mei he kotoa ʻo e māmaní. ʻOku muimui mai ai ha hoosi hono tolu, ʻoku lanu ʻuliʻuli ʻo hangē ko e tuʻapoó, ʻoku heka mai ai ha tokotaha ʻokú ne toʻo ha meʻafua fua mamafa ko ha pōpoaki fakamamahi ʻoku talaki ai ha siʻi ʻo e meʻakai tefitó. Ko e hoosi hono faá ʻoku lanu tea mate, ko ha fakamelomelo ia ʻo e mahaki mo e ngaahi fakamanamana fakatupu mate kehe, ʻa ia ʻoku heka mai ai ʻa Mate tonu. Pea ko e Faʻitoká, ʻa e faʻitoka anga-maheni ʻo e faʻahinga ʻo e tangatá, ʻoku muimui ofi mai ai, ʻo ne utu ha utu-taʻu fakalilifu ʻo e ngaahi moʻui!​—Fakahā 6:1-8.

“Naʻá ku ilifia ʻi he ʻuluaki taimi naʻá ku lau ai fekauʻaki mo e kau tangata heka hoosi ʻe toko faá. Naʻá ku ongoʻi ʻoku hoko mai ʻa e ʻAho Fakamāú pea koeʻuhi ko e ʻikai te u mateuteú, heʻikai te u hao.”​—Crystal.

“Naʻe toʻoa hoku lotó ʻi he kau heka hoosi makehe ʻe toko fā ʻi he fanga hoosi lanu kehekehé. ʻI heʻeku mahinoʻi pē ʻa e ʻuhinga ʻo e vīsoné, naʻe ʻuhinga lelei kotoa ia.”​—Ed.

ʻOku lava ke ke ongoʻi tatau mo e ongoʻi ʻa Crystal fekauʻaki mo e kau tangata heka hoosi ʻe toko fā ʻo e Meʻa Fakahaá? Pe ʻokú ke ongoʻi tatau mo Ed? Ko e hā pē ʻa e tuʻungá, ko e heka fakaueʻiloto ʻa e kau tangata heka hoosi ko iá ʻoku ʻomi ai ha ngaahi ʻata ʻoku ʻiloʻi lelei ʻi he Fakahaá, ʻa e tohi fakamuimui ʻo e Tohi Tapú. Naʻá ke ʻiloʻi ʻoku lava ke ke maʻu ʻaonga fakafoʻituitui ʻi hono mahinoʻi ʻa e vīsone ko ení? Anga-fēfē? ʻOku talaʻofa mai ʻa e ʻOtuá ʻe lava ke ke maʻu ʻa e fiefia moʻoní ʻi hono lau, ako, pea moʻui ʻo fakatatau ki he ngaahi meʻa ʻoku hiki ʻi he tohi fakaekikite ko iá.—Fakahā 1:1-3.

Lolotonga ʻoku manavahē ʻa e niʻihi ʻi he vīsone fekauʻaki mo e kau tangata heka hoosi ʻe toko faá, ʻoku ʻikai ke fakataumuʻa iá ke ne fakailifiaʻi koe. Ko hono moʻoní, kuo ʻiloʻi ʻe he laui miliona ko e vīsone ko ení ʻokú ne fakaivimālohiʻi ʻenau tuí pea aʻu ʻo ne fakahaaʻi kiate kinautolu ʻa e ʻamanaki ki ha kahaʻu fisifisimuʻa. ʻOku lava ke hoko pehē pē kiate koe! Kātaki ʻo hokohoko atu hoʻo laú.