Ko e kau tangata heka hoosi ʻe toko faá ʻoku nau hā ngali fakamisiteli mo fakalilifu nai, ka ʻoku ʻikai fiemaʻu ia ke pehē. Ko e hā hono ʻuhingá? Koeʻuhí he ko e Tohi Tapú mo e ngaahi meʻa ʻoku hoko ʻi he hisitōlia ʻi onopōní ʻokú na tokoniʻi kitautolu ke tau ʻiloʻi lelei ʻa e meʻa ʻoku fakatātaaʻi ʻe he tangata heka hoosi taki taha. Pea neongo ko ʻenau heká ʻoku fakahaaʻi ai ʻa e mala ki he māmaní, ʻe lava foki ke toe hoko ia ko e ongoongo lelei kiate koe mo ho fāmilí. ʻO anga-fēfē? ʻUluakí, tau kumi angé ke ʻiloʻi ʻa e tangata heka hoosi taki taha.

ʻOku peheni ʻa e kamata ʻo e vīsoné: “Naʻá ku mamata, pea vakai, tā ko ha hoosi hinehina, pea ko e tokotaha naʻe heka aí naʻá ne toʻo ha ngahau; pea naʻe ʻoange kiate ia ha kalauni, pea naʻá ne ʻalu atu ʻi he ikuna pea ke fakakakato ʻene ikuná.”—Fakahā 6:2.

Ko hai ʻa e tokotaha ʻoku heka ʻi he hoosi hinehiná? Ko e kī ki hono ʻiloʻí ʻoku maʻu ia ʻi he tohi tatau ʻi he Tohi Tapú, ʻa e Fakahaá, ʻa ia ʻoku fakahaaʻi ai ki mui ʻa e tokotaha ʻoku heka fakahēvani ko ení “Ko e Folofola ʻa e ʻOtuá.” (Fakahā 19:11-13) Ko e hingoa fakalakanga ko iá, Ko e Folofolá, ʻoku maʻu ia ʻe Sīsū Kalaisi, he ʻokú ne ngāue ko e tangata-lea ʻa e ʻOtuá. (Sione 1:1, 14) ʻIkai ko ia pē, ʻoku ui ia ko e “Tuʻi ʻo e ngaahi tuʻi mo e ʻEiki ʻo e ngaahi ʻeiki” pea ʻoku fakamatalaʻi ia ko “Faitōnunga mo Moʻoni.” (Fakahā 19:16) ʻOku hā mahino, ʻokú ne maʻu ʻa e mafai ke ngāue ko ha tuʻi pāteʻi tau, pea ʻoku ʻikai te ne ngāueʻaki hono mālohí ʻi ha founga kovi mo anga-fakamamahi. Neongo ia, ʻoku malanga hake ai ha ngaahi fehuʻi.

Ko hai ʻokú ne ʻoange kia Sīsū ʻa e mafai ke ne ikuná? (Fakahā 6:2) Naʻe mamata ʻa e palōfita ko Tanielá ki ha vīsone ʻa ia naʻe fakatatau ai ʻa e Mīsaiá ki ha “foha ʻo e tangatá,” naʻe ʻoange kiate ia ʻa e “tuʻunga-pule, mo e lāngilangi, mo ha puleʻanga” ʻo ʻikai ʻe ha toe taha kehe ka ko “Talumeimuʻa,” ʻa Sihova ko e ʻOtuá. * (Taniela 7:13, 14) Ko ia ai, ko e ʻOtua Māfimafi-Aoniú ʻokú ne ʻoange kia Sīsū ʻa e mafai mo e totonu ke ne pule mo fakahoko ʻa e fakamāú. Ko e hoosi hinehiná ko ha fakatātā feʻungamālie ia ki he faitau totonu ʻoku fakahoko ʻe he ʻAlo ʻo e ʻOtuá, he ʻoku faʻa ngāueʻaki ʻe he Folofolá ʻa e lanu hinehiná ke ne fakatātaaʻi ʻa e māʻoniʻoni.—Fakahā 3:4; 7:9, 13, 14

Naʻe kamata ʻanefē ʻa e heka ʻa e kau tangata heka hōsí? Fakatokangaʻi ange ko e ʻuluaki tokotaha ʻoku heká, ʻa Sīsū, ʻoku kamata ʻene heká ʻi heʻene maʻu ha kalauní. (Fakahā 6:2) Naʻe fakakalauni ʻanefē ʻa Sīsū ko e Tuʻi ʻi hēvaní? Naʻe ʻikai hoko ia ʻi he taimi naʻá ne foki hake ai ki hēvani ʻi he hili ʻene pekiá. ʻOku fakahaaʻi ʻe he Tohi Tapú naʻe kamata ʻi he taimi ko iá ha vahaʻa taimi ʻo e tatali. (Hepelū 10:12, 13) Naʻe ʻoange ʻe Sīsū ki hono kau muimuí ha ngaahi fakaʻilonga ke ʻiloʻi ai ʻa e ngataʻanga ʻo e vahaʻa taimi tatalí mo e kamataʻanga ʻo ʻene pule ʻi hēvaní. Naʻá ne pehē ʻi he kamataʻanga ʻo ʻene pulé, ʻe maliu lahi ai ʻa e ngaahi tuʻunga ʻo e māmaní ki he kovi ange. ʻE ʻi ai ʻa e tau, nounou fakameʻatokoni, mo e ngaahi mahaki fakaʻauha. (Mātiu 24:3, 7; Luke 21:10, 11) ʻI he hili pē ʻa e Tau I ʻa Māmaní ʻi he 1914, naʻe hā mahino ai kuo hū ʻa e faʻahinga ʻo e tangatá ki he kuonga ko iá, ko ha taimi faingataʻa ʻi he māmaní ʻa ia ʻoku ui ʻe he Tohi Tapú ko e “ngaahi ʻaho fakaʻosí.”—2 Tīmote 3:1-5.

Ka ko e hā kuo tau sio ai ʻoku toe kovi ange ʻa e ngaahi tuʻungá, ʻo ʻikai lelei ange, he naʻe ʻosi maʻu ʻe Sīsū ʻa hono kalauní ʻi he 1914? Koeʻuhí ʻi he taimi ko iá, naʻe kamata pule ai ʻa Sīsū ʻi hēvani, ʻo ʻikai ʻi he māmaní. Naʻe hoko leva ai ha tau ʻi hēvani, pea ko e Tuʻi naʻe fakanofo foʻoú, ʻa Sīsū, ʻoku lave ki ai ko Maikelí, naʻá ne lī hifo ʻa Sētane mo ʻene fanga tēmenioó ki he māmaní. (Fakahā 12:7-9, 12) ʻI hono tuku pōpula hení, kuo ʻita lahi ai ʻa Sētane talu mei ai, ʻi heʻene ʻiloʻi ʻoku toe siʻi ʻa hono ngaahi ʻahó. Ko e moʻoni, ʻe ʻikai fuoloa pea fakahoko mai ʻe he ʻOtuá ʻa hono finangaló kia Sētane ki heni ʻi he māmaní. (Mātiu 6:10) Sai, tau sio angé ki he anga ʻa e tokoni ʻa e kau tangata heka hoosi ʻe toko tolu kehé ke fakapapauʻi, ko hono moʻoní, ʻoku tau moʻui ʻi he lolotonga ʻa e “ngaahi ʻaho fakaʻosi” faingataʻá. ʻI he ʻikai hangē ko e ʻuluaki tangata heka hōsí, ʻa ia ʻokú ne fakatātaaʻi mahino ha tokotaha pau, ko e toko tolu ʻoku hoko mai aí ʻoku nau  fakatātaaʻi ha ngaahi tuʻunga ʻi māmani lahi ʻa ia kuo mafola ʻi he sōsaieti ʻo e faʻahinga ʻo e tangatá.

“Naʻe haʻu ha hoosi ʻe taha, ko ha hoosi lanu kulokula mālohi, pea naʻe tuku ki he tokotaha naʻe heka aí ke ne ʻave ʻa e melinó mei he māmaní koeʻuhi ke nau fetāmateʻaki, pea naʻe ʻoange kiate ia ha fuʻu heletā lahi.”​—Fakahā 6:4.

Ko e tokotaha ko eni ʻoku heká ʻokú ne fakatātaaʻi ʻa e tau. Fakatokangaʻi ange ʻokú ne ʻave ʻa e melinó ʻo ʻikai mei ha ngaahi puleʻanga siʻi pē ka ko e māmaní kotoa. ʻI he 1914, ko e ʻuluaki taimi ia ʻi he hisitōliá, naʻe hoko ai ha tau ʻi māmani lahi. Naʻe hoko atu ai ha tau hono ua ʻa e māmaní, ʻa ia naʻe toe lahi ange ai ʻa e fakaʻauhá. Ko e fakafuofua ʻe niʻihi ʻoku ʻomai ai ʻa e tokolahi ʻo e kau mate tupu mei he ngaahi taú mo e ngaahi fepaki fakakautau talu mei he 1914 ko e toko 100 miliona tupu! ʻIkai ko ia pē, ko e fuʻu tokolahi kehe naʻa nau tofanga ʻi ha ngaahi lavea fakatupu mate.

Ko e hā ʻa e tuʻunga ʻoku aʻu ki ai ʻa e taú ʻi he lolotonga ní? Ko e ʻuluaki taimi eni ʻi he hisitōliá ʻoku hā ai ʻoku maʻu ʻe he tangatá ʻa e malava ke fakaʻauha ʻosi ʻa e moʻui fakaetangatá kotoa. Naʻa mo e ngaahi kautaha ʻoku taku ʻoku nau tauhi ʻa e melinó, hangē ko e Ngaahi Puleʻanga Fakatahatahá, kuo ʻikai ke nau malava ʻo taʻofi ʻa e tokotaha ʻoku heka ʻi he hoosi kulokulá.

“Naʻá ku mamata, pea vakai, tā ko ha hoosi ʻuliʻuli, pea ko e tokotaha naʻe heka aí naʻá ne toʻo ha meʻafua fua mamafa ʻi hono nimá. Pea naʻá ku fanongo ki he meʻa naʻe ongo mai ʻo hangē ha leʻo ʻi he lotolotonga ʻo e meʻamoʻui ʻe faá ʻoku pehē: ‘Ko ha kuata uite ki ha tēnali ʻe taha, pea ko e kuata paʻale ʻe tolu ki ha tēnali ʻe taha; pea ʻoua naʻa maumauʻi ʻa e lolo ʻōlivé pea mo e uainé.’”—Fakahā 6:5, 6.

Ko e tokotaha ko eni ʻoku heká ʻokú ne fakatātaaʻi ʻa e honge. ʻOku tau maʻu heni ha fakatātā ʻo e ʻinasi meʻakai mātuʻaki siʻisiʻi ʻa ia ko ha kuata (Lita ʻe 1.08) ʻo e uité ko hono totongí ko e foʻi tēnali ʻe taha, ko ha vahe ʻo e ngāue ʻaho kakato ʻi he ʻuluaki senitulí! (Mātiu 20:2) Ko e foʻi koini tatau naʻe lava ke fakatau mai ʻaki ha kuata ʻe tolu (Lita ʻe 3.24) ʻo e paʻalé, naʻe vakai ki ai ko ha kalasi māʻulalo ange ʻo e uité. Ko e hā hono lōloa ʻa hono fafanga ʻaki ia ha fāmili tokolahi? ʻOku fakatokanga leva ai ki he kakaí ke nau levaʻi naʻa mo e meʻakai fakaʻahó, ʻoku fakatātaaʻi totonu ia ʻe he meʻakai tefito ko ia ʻo e taimi mo e anga fakafonua ko iá hangē ko e lolo ʻōlivé mo e uainé.

Kuo tau mamata talu mei he 1914 ʻi ha fakamoʻoni ko e tokotaha ko eni ʻoku heka ʻi he hoosi ʻuliʻulí kuó ne ngaʻunu atu? ʻIo! Ko e kakai nai ʻe toko 70 miliona kuo nau mate ʻi he ngaahi honge lolotonga ʻa e senituli hono 20. Naʻe fakafuofua ʻi ha maʻuʻanga fakamatala ʻe taha ko e “kakai ʻe toko 805 miliona—ko e toko taha nai ʻi he toko hiva ʻo e tokolahi ʻo e kakai ʻi he māmaní—naʻe siʻi ʻi ha tuʻunga hokohoko ʻa e meʻakai naʻa nau maʻú ʻi he 2012-14.” ʻOku pehē ʻe ha toe fakamatala ʻe taha: “Kuo tāmateʻi ʻe he fiekaiá ʻa e kakai tokolahi ange ʻi he taʻu kotoa pē ʻo laka ange ia ʻi hono fakatahaʻi ʻa e mate ʻi he ʻeitisí, malēliá mo e tīpií.” Neongo ʻa e ngaahi feinga tōtōivi lahi ke fafanga ʻa e fiekaiá, ʻoku hokohoko atu pē ʻa e lele ʻa e tokotaha ʻoku heka ʻi he hoosi ʻuliʻulí.

“Naʻá ku mamata, pea vakai, tā ko ha hoosi tea, pea ko e hingoa ʻo e tokotaha naʻe heka aí ko Mate. Pea naʻe muimui ofi mai ʻa Faʻitoka ʻiate ia. Pea naʻe ʻoange kiate kinaua ha mafai ki he vahe fā ʻe taha ʻo e māmaní, ke na tāmateʻi kinautolu ʻaki ha heletā lahi pea ʻaki ʻa e nounou fakameʻatokoni pea ʻaki ʻa e mahaki fakatupu mate pea ʻaki ʻa e fanga manu fekai ʻo e māmaní.”—Fakahā 6:8.

ʻOku fakatātaaʻi ʻe he tokotaha heka hoosi hono faá ʻa e mate tupu mei he mahaki fakaʻauhá mo e ngaahi tupuʻanga kehe. ʻI he hili pē ʻa e 1914 naʻe tāmateʻi ʻe he fulū faka-Sipeiní ʻa e laui hongofulu miliona. Ngalingali ko e toko 500 miliona naʻe uesiá, ko e toko 1 nai mei he toko 3 kotoa pē naʻe moʻui ʻi he taimi ko iá!

Ka ko e fulū faka-Sipeiní ko e kamataʻangá pē ia. ʻOku fakafuofua ʻe he kau mataotaó ko e laui teau miliona naʻe mate ʻi he simolopōkisí lolotonga ʻa e senituli hono 20. ʻOku motuhi ʻo aʻu mai ki he ʻahó ni ʻa e moʻui ʻa e laui miliona ʻe he ʻeitisí, tīpií, mo e malēliá, neongo ʻa e lahi ʻo e fakatotolo fakafaitoʻó.

Ko e olá ʻoku kei tatau ai pē, ko e mate—tatau ai pē pe ko e tupu mei he taú, hongé, pe ko e mahaki fakaʻauhá. ʻOku tānaki taʻetuku ʻe he Faʻitoká ʻa e faʻahinga maʻukoviá, ʻo ʻikai ʻoange haʻanau ʻamanaki.

Ko e faingataʻa ʻo e lolotonga ní kuo vavé ni ke ngata. Manatuʻi ʻa e meʻá ni: Ko Sīsuú “naʻá ne ʻalu atu ʻi he ikuna” ʻi he 1914, ʻo ne tuku pōpula ʻa Sētane ʻi he māmaní, ka naʻe ʻikai ke fakakakato ʻe Sīsū ʻi he taimi ko iá ʻa ʻene ikuná. (Fakahā 6:2; 12:9, 12) Kuo vavé ni, lolotonga ʻi ʻĀmaketone, ke toʻo atu ai ʻe Sīsū ʻa e tākiekina ʻa Sētané pea te ne fakaʻauha ʻa e kau poupou fakaetangata ʻo e Tēvoló. (Fakahā 20:1-3) Heʻikai ngata pē ʻi hono fakangata ʻe Sīsū ʻa e heka ʻa e kau tangata heka hoosi ʻe toko tolu kehé ka te ne toe fakafoki ʻa e ngaahi nunuʻa ʻo ʻenau heka fakatupu ʻauhá. Anga-fēfē? Vakai angé ki he meʻa ʻoku talaʻofa mai ʻe he Tohi Tapú.

ʻI he ʻikai ha taú, ʻe pule ʻa e melinó. Ko Sihova “ʻokú ne fakangata ʻa e ngaahi taú ʻi he māmaní kotoa. ʻOkú ne fesiʻi ʻa e kaufaná, peá ne tutuʻu ʻa e taó.” (Saame 46:9) Ka ki he kakai ʻoku ʻofa ʻi he melinó, “te nau maʻu ʻa e fiefia lahi ʻi he melino hulu fau.”—Saame 37:11.

ʻI he ʻikai ha hongé, ʻe lahi ʻa e meʻakaí. “ʻE lahi fau ʻa e uité ʻi he māmaní; ʻe mahutafea ʻa e tumutumu ʻo e ngaahi moʻungá.”—Saame 72:16.

ʻI he ʻikai ha mahaki fakaʻauha mo e maté, ʻe ʻi ai ʻa e moʻui lelei haohaoa mo e moʻui taʻengata maʻá e tokotaha kotoa. Ko e ʻOtuá “te ne holoholo ʻa e loʻimata kotoa pē mei honau matá, pea ʻe ʻikai ke toe ʻi ai ha mate, pe ha mamahi pe ha tangi pe ha langa.”—Fakahā 21:4.

ʻI he taimi naʻe ʻi māmani ai ʻa Sīsuú, naʻá ne ʻomai ha tomuʻa vakai fakalotomāfana ki he ngaahi tuʻunga ʻi he kahaʻú ʻi he malumalu ʻo ʻene pulé. Naʻá ne pouaki ʻa e melinó, fafanga fakaemana ʻa e laui afe, fakamoʻui ʻa e mahakí, pea aʻu ʻo ne fokotuʻu hake ke toe moʻui ʻa e kau maté.—Mātiu 12:15; 14:19-21; 26:52; Sione 11:43, 44.

ʻE fiefia ʻa e Kau Fakamoʻoni ʻa Sihová ke fakahaaʻi atu kiate koe ʻi hoʻo Tohi Tapú ʻa e founga ʻe lava ai ke ke mateuteu ki he taimi ʻe ngata ai ʻa e lele ʻa e kau tangata heka hoosi ko iá. Te ke tali ha fakaafe ke ke ako ha meʻa lahi ange?