‘Oku tui ‘a e kakai ‘e laui miliona ‘i he māmaní ko e talatukufakaholo ‘o e Kilisimasí ko e kātoanga ia ‘o e ‘aho ‘alo‘i ‘o Sīsū Kalaisí. Kae kehe, kuo faifai ange peá ke fakakaukau pe na‘e kātoanga‘i ‘e he kau Kalisitiane ‘o e ‘uluaki senitulí, ‘a e fa‘ahinga na‘a nau ofi taha kia Sīsuú, ‘a e Kilisimasí? Pea, ‘okú ke lāu‘ilo ki he me‘a ‘oku lea‘aki ‘e he Tohi Tapú fekau‘aki mo e ngaahi fai‘ahó? Ko hono ma‘u ‘a e tali ki he ongo fehu‘í ni ‘e tokoni ia ke tau fakapapau‘i pe ko e Kilisimasí ki he kau Kalisitiané.

‘Uluakí, ‘oku ‘ikai lave ‘a e Tohi Tapú ki ha ngaahi kātoanga fai‘aho mo‘o Sīsū pe ko ha tokotaha lotu kehe ki he ‘Otuá. ‘Oku lave ‘a e Tohi Tapú ki ha toko ua pē na‘e kātoanga‘i hona ‘aho fā‘ele‘í. Na‘e ‘ikai ha taha ‘o kinaua na‘e lotu kia Sihova, ko e ‘Otua ‘o e Tohi Tapú, pea ko hona ongo kātoanga fai‘ahó na‘e hoko ai ha me‘a na‘e kovi. (Sēnesi 40:20; Ma‘ake 6:21) Fakatatau ki he Encyclopædia Britannica, na‘e fakafepaki‘i ‘e he mu‘aki kau Kalisitiané ‘a e “talatukufakaholo fakapangani ‘o hono kātoanga‘i ‘a e ‘aho fā‘ele‘í.”

‘Oku ‘ikai tala mai ‘e he Tohi Tapú ‘a e taimi tonu ko ia na‘e ‘alo‘i ai ‘a Sīsuú. “Ko e ‘aho ‘alo‘i ‘o Kalaisí ‘oku ‘ikai lava ke fakapapau‘i ia mei he F[uakava] F[o‘oú], pe, ko hono mo‘oní, mei ha toe ma‘u‘anga fakamatala kehe,” ko e lau ia ‘a e Cyclopedia ‘a McClintock mo Strong. Ko hono mo‘oní, kapau na‘e fiema‘u ‘e Sīsū ke kātoanga‘i ‘e hono kau muimuí ‘a hono ‘aho ‘alo‘í, na‘á ne mei fakapapau‘i ne nau ‘ilo ki he ‘aho na‘e ‘alo‘i ai iá.

Uá, ‘oku ‘ikai ha lēkooti ‘i he Tohi Tapú na‘e kātoanga‘i ‘e Sīsū pe ko ha taha ‘o ‘ene kau ākongá ‘a e Kilisimasí. Fakatatau ki he New Catholic Encyclopedia, ko hono kātoanga‘i ‘o e Kilisimasí na‘e fuofua lave ki ai “‘i he Saati Tala-Taimi ‘a Philocalus, ko ha tohi māhina faka‘asitalōnoma faka-Loma ‘a ia ko ‘ene ma‘u‘anga fakamatalá ‘oku lava ke faka‘aho mei he 336 [T.S.].” ‘Oku hā mahino, ko e hili ia ‘a e kakato ‘a e Tohi Tapú pea mo e laui senituli hili ‘a e ‘i māmani ‘a Sīsuú. Ko ia, ‘oku lave ‘a McClintock mo Strong “ko e fakamanatu ‘o e Kilisimasí ‘oku ‘ikai ko ha fokotu‘u ia ‘e he ‘Otuá, pea ‘oku ‘ikai tupu ia mei he F[uakava] F[o‘oú].” *

‘I he tu‘unga ko e Faiako Lahí, na‘e ‘oange ‘e Sīsū ‘a e fakahinohino mahino ki he me‘a na‘á ne fiema‘u ke fai ‘e he‘ene kau muimuí, pea ‘oku lēkooti eni ‘i he Tohi Tapú. Kae kehe, ‘oku ‘ikai kau ai ‘a hono kātoanga‘i ‘o e Kilisimasí. Hangē pē ko e ‘ikai fiema‘u ‘e ha faiako ‘a ‘ene kau akó ke nau fakalaka atu ‘i he fakahinohino na‘á ne ‘oange kiate kinautolú, ‘oku fiema‘u ‘e Sīsū ‘ene kau muimuí ke nau ‘fai pē ki he ngaahi me‘a kuo tohi’ ‘i he Tohi Tapu Mā‘oni‘oní.​—1  Kolinitō 4:6.

‘I he tafa‘aki ‘e tahá, ko e me‘a mahu‘inga pē ‘e taha na‘e anga-maheni ‘aupito ki ai ‘a e mu‘aki kau Kalisitiané​—ko e kātoanga‘i pe Fakamanatu, ‘o e pekia ‘a Sīsuú. Na‘e tala ‘e Sīsū tonu ki he‘ene kau ākongá ‘a e taimi ke fai ai ‘a e kātoangá ni pea fakahaa‘i kiate kinautolu ‘a e founga ke fai ai iá. Ko e ngaahi fakahinohino pau ko ení, pea pehē ki he ‘aho ‘o ‘ene pekiá ‘i he tohimāhiná, ‘oku lēkooti ia ‘i he Tohi Tapú.​—Luke 22:19; 1 Kolinitō 11:25.

Hangē ko ia kuo tau sio ki aí, ko e Kilisimasí ko ha kātoanga ia ‘o ha ‘aho fā‘ele‘i, pea na‘e ‘ikai ke muimui ‘a e mu‘aki kau Kalisitiané ki he tō‘onga fakapangani ko iá. ‘Ikai ngata aí, ‘oku ‘ikai ha lave ‘a e Tohi Tapú na‘e kātoanga‘i ‘e Sīsū pe ko ha taha kehe ‘a e Kilisimasí. ‘I he mahino ‘oku ma‘u mei he ngaahi me‘á ni, kuo faka‘osi‘aki ai ‘e he kau Kalisitiane ‘e laui miliona ‘i he māmaní ko e Kilisimasí ‘oku ‘ikai kiate kinautolu ia.