Talanoa ki he Moʻuí

Manatuʻi Hotau Tokotaha-Fakatupú mei he Talavoú ʻo Faai Mai Ai

FAKAMATALA FAI ʻE DAVID Z. HIBSHMAN

“Kapau kuó u aʻu mai ki he ngataʻanga ʻo ʻeku moʻuí, ʻoku ou ʻamanaki moʻoni naʻá ku anga-tonu kia Sihova. ʻOku ou kōlenga kiate ia ke ne tokangaʻi ʻa ʻeku Tēvitá. ʻOku ou fakamālō atu kiate koe Sihova koeʻuhi ko ia, pea pehē ki heʻema nofo malí. ʻOku mātuʻaki fakaofo ia, ʻo mātuʻaki fakafiefia!”

FAKAʻUTA atu angé ki heʻeku ngaahi ongoʻi lotó ʻi he hili hono tanu ʻa hoku uaifí ʻi Maʻasi 1992, naʻá ku maʻu ai ʻa e lēkooti fakaʻosi ko ení ʻi heʻene tohi-noá. ʻI he māhina pē ʻe nima ki muʻa ange aí, naʻa mau kātoangaʻi ai ʻa e ʻaho fakamanatu ʻo e taʻu hono 60 ʻo Helen ʻi he ngāue fakafaifekau taimi-kakató.

ʻOku ou manatuʻi lelei ʻa e ʻaho ʻi he 1931 ʻi heʻeku tangutu fakataha mo Helen ʻi he fakataha-lahi ʻi Columbus, Ohio, U.S.A. Ne teʻeki ai ke kakato ʻa e taʻu 14 ʻo Helen, ka naʻá ne houngaʻia lahi ange ʻi he mahuʻinga ʻo e meʻa ko iá ʻiate au. Ko e loto-māfana ʻa Helen ki he ngāue fakafaifekaú naʻe fakahaaʻi ia ʻi he taimi nounou pē hili ʻa ʻene hoko mo ʻene faʻē uitoú ko ha ongo tāimuʻá, hangē ko ia ʻoku uiʻaki ʻa e kau ʻevangeliō taimi-kakato ʻi he lotolotonga ʻo e Kau Fakamoʻoni ʻa Sihová. Naʻá na tukuange hona ʻapi nongá kae malanga ʻi he ngaahi feituʻu ʻuta ʻo e fakatonga ʻo e ʻIunaite Seteté.

Ko Hoku Tofiʻa Faka-Kalisitiané

ʻI he 1910 naʻe hiki ai ʻa ʻeku ongo mātuʻá mo ʻena ongo tamaiki īkí mei he fakahahake ʻo Pennsylvania ki Grove City, ʻi he konga fakahihifo ʻo e vahefonuá. Naʻá na totongi tipōsiti ai ha nofoʻanga feʻunga peá na hoko ko ha ongo mēmipa longomoʻui ʻo e Siasi Fakafoʻoú. Taimi nounou mei ai naʻe ʻaʻahi kiate kinaua ʻa William Evans, ko ha tokotaha Ako Tohitapu, ʻo hangē ko ia ne uiʻaki ʻa e Kau Fakamoʻoni ʻa Sihová ʻi he taimi ko iá. Ko e tangataʻeikí, ʻa ia ʻi he taimi ko iá naʻá ne ʻi he vaeuaʻanga pē ʻo hono taʻu 20 tupú, pea ko e fineʻeikí, ʻa ia naʻá ne siʻi hifo ʻaki ʻa e taʻu ʻe nima, naʻá na fanongo ki he tangata Uēlesi anga-fakakaumeʻa ko ení pea fakaafeʻi  mai ia ki ha houa kai. Naʻe vave ʻa ʻena tukulotoʻi ʻa e ngaahi moʻoni ʻo e Tohitapú ʻa ia naʻá na akó.

Ke toe ofi ange ki he fakatahaʻangá, naʻe fetukutuku ai ʻe he tangataʻeikí ʻa e fāmilí ʻi he kilomita nai ʻe 40 ki he kolo ko Sharon. ʻI ha ngaahi māhina ki mui ai, ʻi he 1911 pe 1912, naʻe papitaiso ai ʻa e tangataʻeikí mo e fineʻeikí. Ko Charles Taze Russell, ʻa e ʻuluaki Palesiteni ʻo e Sōsaieti Taua Leʻó, naʻá ne fai ʻa e malanga papitaisó. Naʻe fāʻeleʻi au ʻi Tīsema 4, 1916, ʻi he ʻosi ʻi ai ʻa e fānau ʻe toko fā ʻa ʻeku ongo mātuʻá. ʻI he taimi ʻo hoku fāʻeleʻí, naʻe fakahaaʻi ai: “Ko ha toe tokoua eni ke ʻofaʻi.” Ko ia ko hoku hingoá, ʻa e David, ko hono ʻuhingá ko e “ʻOfaʻanga.”

ʻI hoku uike faá, naʻe ʻave ai au ki heʻeku ʻuluaki fakataha-lahí. ʻI he ngaahi muʻaki ʻaho ko iá, naʻe luelue ai ʻa ʻeku tamaí mo hoku fanga taʻoketé ʻi ha ngaahi kilomita ki he ngaahi fakataha ʻa e fakatahaʻangá lolotonga ia naʻe ʻave au mo hoku tuofefiné ʻe he fineʻeikí ʻi he meʻalele he halanga lēlué. Ko e ngaahi fakatahá naʻe kau ki ai ʻa e ngaahi konga ʻi he pongipongí mo e efiafí. ʻI ʻapi, naʻe faʻa fakatefito ʻa e fetalanoaʻakí ʻi he ngaahi kupu ʻi he Taua Leʻo mo e The Golden Age, ko ha hingoa ki muʻa ange ʻo e Awake!

Maʻu ʻAonga mei he Ngaahi Faʻifaʻitakiʻanga Lelei

Ko e kau pilikimi tokolahi, hangē ko hono ui ʻo e kau malanga fefonongaʻaki ʻi he taimi ko iá, naʻa nau ʻaʻahi mai ki heʻemau fakatahaʻangá. Naʻa nau faʻa fakamoleki ha ʻaho ʻe taha pe ua mo kimautolu. Ko ha tokotaha malanga ʻe taha ʻa ia ʻoku kei tuʻu ʻi heʻeku manatú ko Walter J. Thorn, ʻa ia naʻá ne manatu ki hono Tokotaha-Fakatupu Maʻongoʻongá ʻi ‘hono taimi talavoú.’ (Koheleti 12:1) ʻI heʻeku kei tamasiʻí, naʻá ku ʻalu fakataha ai mo ʻeku Tamaí ke fakahaaʻi ʻa e “Tulama-ʻAta ʻo e Fakatupú,” ko ha fakaʻaliʻali ʻata mo hiki konga fā ʻi he hisitōlia ʻo e faʻahinga ʻo e tangatá.

Neongo ko Tokoua Evans mo hono uaifí, ko Miriam, naʻe ʻikai haʻana fānau, naʻá na hoko ko e ongo mātuʻa mo e ongo kui fakalaumālie ki homau fāmilí. Naʻe lea fakahangatonu maʻu pē ʻa William ki he tangataʻeikí ko hono “Foha,” pea ko ia mo Miriam naʻá na fakahūhū ʻa e laumālie ʻo e ʻevangelioó ki homau fāmilí. ʻI he konga ki muʻa ʻo e senituli hono 20, naʻe fai ai ʻe Tokoua Evans ha ngaahi fononga ki Uēlesi ke ʻave ʻa e moʻoni ʻo e Tohitapú ki he feituʻu takatakai ʻi Swansea. Naʻe ʻiloa ia ai ko e tokotaha-malanga mei ʻAmelika.

ʻI he 1928, naʻe tukuange ai ʻe Tokoua Evans ʻa ʻene ngāué peá ne kamata malanga ʻi he ngaahi ʻotu moʻunga ʻo West Virginia. Ko hoku ongo tokoua lalahi angé, ko Clarence taʻu 21 mo Carl taʻu 19, naʻá na ō fakataha mo ia. Ko e kotoa ʻo kimautolu tamaiki tangata ʻe toko faá naʻa mau fakamoleki ʻa e ngaahi taʻu lahi ʻi he ngāue fakafaifekau taimi-kakató. Ko hono moʻoní, ko kimautolu kotoa naʻa mau ngāue ko e kau ʻovasia fefonongaʻaki ʻa e Kau Fakamoʻoni ʻa Sihová ʻi heʻemau kei talavoú. ʻIkai fuoloa atu ko e tokoua siʻisiʻi taha ʻo e fineʻeikí, ko Mary, ʻa ia ʻokú ne ʻi hono taʻu 90 tupú he taimí ni, naʻá ne tohi mai kiate au: “He fakamālō ē ko kitautolu kotoa ʻi he maʻu ʻe Tokoua Evans ʻa e faivelenga ki he ngāue fakafaifekaú peá ne ʻaʻahi ki Grove City!” Ko e tokoua ko ia ʻo ʻeku faʻeé ʻa Mary ko e toe tokotaha ia ʻa ia naʻá ne manatuʻi ʻa hono Tokotaha-Fakatupú talu mei heʻene kei siʻí.

Maʻu ʻa e Ngaahi Fakataha-Lahí

Ko e tangataʻeikí pē mo Clarence naʻá na malava ke maʻu ʻa e fakataha-lahi fakahisitōlia ʻi Cedar Point, Ohio, ʻi he 1922. Kae kehe, ʻi he aʻu mai ki he 1924, naʻa mau maʻu ha meʻalele, pea naʻe ō kotoa ai homau fāmilí ki he fakataha-lahi ʻi Columbus, Ohio. Naʻe ʻamanekina meiate kimautolu fānaú ke mau ngāueʻaki ʻemau paʻanga tātānaki pē ʻamautolú ki heʻemau meʻakai he lolotonga ʻa e fakataha-lahi ʻaho valú. Ko e fakakaukau ʻeku ongo mātuʻá ki he mēmipa kotoa ʻo e fāmilí kuo pau ke nau ako ke poupouʻi pē kinautolu. Ko ia naʻa mau tauhi ʻa e fanga  moa mo e fanga lāpisi pea tauhi mo e ngaahi taunga hone, pea ko kimautolu tamaiki tangatá naʻa mau tufa nusipepa kotoa.

ʻI he hoko mai ʻa e taimi ki he fakataha-lahi ʻi Toronto, Kānata, ʻi he 1927, naʻa mau maʻu ai ha tokoua ko e pēpē māhina ono, ko Paul. Naʻe vaheʻi au ke u nofo ʻi ʻapi ʻo tokangaʻi ʻa Paul fakataha mo e tokoni ʻa e tokoua ʻo ʻeku faʻeé ne ʻosi mali lolotonga ia naʻe ʻalu ʻa ʻeku ongo mātuʻá mo e fānau kehé ki Toronto. Naʻe fakapaleʻiʻaki au ʻa e tola ʻe hongofulu, ʻa ia naʻá ku ngāueʻaki ia ke fakatau mai haku suti foʻou. Naʻe akoʻi maʻu pē kimautolu ke mau teuteu lelei ki he ngaahi fakatahá pea ke tokangaʻi homau valá.

ʻI he aʻu mai ki he taimi ʻo e fakataha-lahi taau ke manatua ʻi he 1931 ʻi Columbus, Ohio, ne mali ai ʻa Clarence mo Carl peá na tāimuʻa mo hona ongo uaifí. Naʻá na nofo taki taha ʻi ha ʻapi kuo faʻu ʻi ha meʻalele. Naʻe mali ʻa Carl mo Claire Houston ʻo Wheeling, ʻi West Virginia, pea ko e ʻuhinga ia naʻá ku tangutu ai he tafaʻaki ʻo e tokoua siʻisiʻi ange ʻo Claire, ʻa Helen, ʻi he fakataha-lahi ʻi Columbus.

Ko e Ngāue Fakafaifekau Taimi-Kakató

Naʻá ku maʻu tohi fakamoʻoni ako mei he ako māʻolungá ʻi he 1932 ʻi hoku taʻu 15, pea ʻi he taʻu hoko maí naʻá ku ʻave ai ha kā ʻosi ngāueʻaki ki hoku tokoua ko Clarence, ʻa ia naʻá ne tāimuʻa ʻi South Carolina. Naʻá ku tohi kole ki he ngāue tāimuʻá peá u kamata ngāue fakataha mo Clarence mo hono uaifí. Naʻe tāimuʻa ʻi he taimi ko iá ʻa Helen ʻi Hopkinsville, Kentucky, pea naʻá ku ʻuluaki faitohi ai kiate ia. ʻI heʻene tali maí, naʻá ne ʻeke mai ai: “Ko ha tāimuʻa koe?”

ʻI heʻeku tohí​—naʻe tauhi ia ʻe Helen ʻo aʻu ki heʻene maté ʻi he meimei taʻu ʻe 60 ki mui aí​—naʻá ku tali ange ai: “ʻOku ou pehē, pea ʻoku ou ʻamanaki te u hoko maʻu pē ʻo pehē.” ʻI he tohi ko iá, naʻá ku talanoa ai kia Helen fekauʻaki mo hono tufa ʻa e kiʻi tohi ko e The Kingdom, the Hope of the World ki he kau faifekau pea ki he kau ʻōfisa fakamaau ʻi hoku vāhenga-ngāue fakamalangá.

ʻI he 1933, naʻe faʻu ai maʻaku ʻe he tangataʻeikí ha tēniti ʻoku ʻi ai hono ngaahi foʻi vaʻe​—ko ha taulani mita ʻe 2.4 lōloa, mita ʻe 2 fālahi ʻo holisi ʻaki ʻa e lā lausiʻi naʻe fusi hangatonu takatakai mo ha matapā sioʻata fakatouʻosi ʻi muʻa pea ʻi mui. Ko hoku kiʻi nofoʻanga māʻulaló ia ʻi he taʻu ʻe fā hoko mai ʻi he ngāue tāimuʻá.

ʻI Maʻasi 1934, ko Clarence mo Carl, ko hona ongo uaifí, ko Helen mo ʻene faʻeé, ko e tuofefine ʻi he fono ʻo Clarence pea mo au​—ko e toko valu ko kimautolú​—naʻa mau huʻu ki he hihifó ke maʻu ʻa e fakataha-lahi ʻi Los Angeles, Kalefōnia. Naʻe heka mo mohe ʻa e niʻihi ʻi heʻeku taulaní. Naʻá ku mohe ʻi he kaá, lolotonga ia ʻa e totongi nofoʻanga ʻa e toengá. Koeʻuhi ko ʻemau ngaahi palopalema ʻi he kaá, naʻa mau aʻu atu ai ki Los Angeles ʻi he ʻaho hono ua ʻo e fakataha-lahi ʻaho onó. ʻI aí, ʻi Maʻasi 26, naʻe iku ʻou malava ai mo Helen ke fakahāhaaʻi ʻa ʻema fakatapui kia Sihová ʻaki ʻa e papitaiso ʻi he vaí.

ʻI he fakataha-lahí ko Joseph F. Rutherford, ko e Palesiteni ia ʻo e Sōsaieti Taua Leʻó ʻi he taimi ko iá, naʻá ne feʻiloaki fakafoʻituitui mo e kotoa ʻo e kau tāimuʻá. Naʻá ne fakalotolahiʻi kimautolu, ʻo pehē ko e kautau loto-toʻa kimautolu ki he moʻoni ʻo e Tohitapú. ʻI he meʻa ko iá, naʻe fai ai ʻa e tokonaki ke foaki ʻa e tokoni fakaepaʻanga ki he kau tāimuʻá koeʻuhi ke lava ʻo nau hokohoko atu ai ʻi heʻenau ngāue fakafaifekaú.

Ko ha Ako ki he Moʻuí

ʻI heʻemau foki mei he fakataha-lahi ʻi Los Angeles, naʻa mau vahevahe kotoa atu ʻa e pōpoaki ʻo e Puleʻangá ki he kakai ʻi he vahefonua kotoa ʻo South Carolina, Virginia, West Virginia, mo Kentucky. ʻI ha ngaahi taʻu ki mui ai naʻe tohi ai ʻa Helen fekauʻaki mo e taimi ko iá: “Naʻe ʻikai ha fakatahaʻanga ke falala ki ai, ʻikai ha ngaahi kaumeʻa ke tokoni, koeʻuhi he ko e kau muli moʻoni kimautolu ʻi ha fonua muli. Ka ʻoku ou ʻiloʻi he taimí ni naʻá ku maʻu ai ha ako. Naʻá ku hoko ai ʻo koloaʻia.”

Naʻá ne ʻeke: “Ko e hā ʻoku faiʻaki ʻe ha kiʻi taʻahine kei siʻi ʻa hono taimí ʻi heʻene mamaʻo mei hono ngaahi kaumeʻá mo hono tupuʻangá? Ko ia,  naʻe ʻikai ke fakataʻelata. ʻOku ʻikai lava ke u manatuʻi haʻaku pipikoʻia. Naʻá ku lautohi lahi. Naʻe ʻikai ʻaupito ke taʻelava ke tauhi ʻemau lau ʻemau tohi faka-Tohitapú mo e akó. Naʻá ku nofo ofi ki heʻeku faʻeé, ʻo ako ke tauhi ʻa e paʻanga naʻá ma maʻú, fai ʻa e fakataú, fetongi ʻa e ngaahi vaʻe naʻe moluú, feimeʻatokoni, tuitui, mo malanga. ʻOku ʻikai haʻaku fakaʻiseʻisa pea te u fiefia ke toe fai ia.”

Naʻe fiemālie ʻa Helen mo ʻene faʻeé ke na nofo ʻi ha kiʻi taulani siʻisiʻi ʻi he ngaahi taʻu ko iá, neongo naʻe maʻu ʻe heʻene faʻeé ha ʻapi lelei. Hili ʻa e fakataha-lahi ʻi Columbus, Ohio, ʻi he 1937, naʻe kovi ange ʻa e tuʻunga moʻui lelei ʻa e faʻē ʻa Helen, pea naʻe tuku falemahaki ia. Naʻá ne mate ʻi heʻene vāhenga-ngāue ʻi Philippi, West Virginia, ʻi Nōvema 1937.

Nofo Malí mo e Hokohoko Atu ʻi he Ngāué

ʻI Sune 10, 1938, naʻá ku mali ai mo Helen ʻi ha kiʻi kātoanga maʻamaʻa pē ʻi he ʻapi ʻa ia naʻe fāʻeleʻi ai iá ʻi Elm Grove, ofi ki Wheeling, West Virginia. Ko siʻomau Tokoua Evans, ʻa ia naʻá ne fakafeʻiloaki ʻa hoku fāmilí ki he moʻoní ʻi ha ngaahi taʻu ki muʻa ʻi hoku fāʻeleʻí, naʻá ne fai ʻa e malanga malí. Hili ʻa e malí, naʻá ku palani ai mo Helen ke foki ki he ngāue tāimuʻá ʻi he fakahahake ʻo Kentucky, ka naʻá ma ʻohovale lahi, naʻe fakaafeʻi kimaua ke ma fai ʻa e ngāue soné. Naʻe kau ki he ngāue ko ení ʻa e ʻaʻahi ki he ngaahi kulupu ʻa e Kau Fakamoʻoni ʻa Sihova ʻi he fakahihifo ʻo Kentucky mo e ngaahi konga ʻo Tennessee ke tokoniʻi kinautolu ʻi heʻenau ngāue fakafaifekaú. Naʻe toko 75 pē nai ʻi he taimi ko iá ʻa e kau fanongonongo ʻo e Puleʻangá ʻi he ngaahi feituʻu kotoa naʻá ma ʻaʻahi ki aí.

ʻI he taimi ko iá, naʻe hanga ʻe he mamahiʻi fonuá ʻo mioʻi ʻa e fakakaukau ʻa e tokolahi, pea naʻá ku ʻamanekina ʻe tukupōpula vave au koeʻuhi ko ʻeku tuʻu-ʻatā faka-Kalisitiané. (Aisea 2:4 [Isaia, PM]) Kae kehe, mālō mo e lēkooti ʻo ʻeku ngāue fakamalangá, naʻá ku maʻu ai ha fokotuʻutuʻu mei he poate siviliané ʻa ia naʻe fakaʻatā ai au ke u hokohoko atu ʻi he ngāue fakafaifekau taimi-kakató.

ʻI heʻema kamata ʻa e ngāue fakafaifekau fefonongaʻakí, ko e meimei tokotaha kotoa naʻa nau lave fekauʻaki mo ʻema kei ʻi he tuʻunga talavoú. ʻI Hopkinsville, Kentucky, naʻe fakafeʻiloaki ai ha tuofefine Kalisitiane kia Helen mo ha fuʻu fāʻofua peá ne ʻeke ange: “ʻOkú ke manatuʻi au?” ʻI he 1933, naʻe faifakamoʻoni ai ʻa Helen kiate ia ʻi he falekoloa ʻi he koló naʻe fakalele ʻe hono husepānití. Ko ha faiako lautohi faka-Sāpate ia, ka ʻi he hili hono lau ʻa e tohi naʻe tuku ange ʻe Helen kiate iá, naʻá ne tuʻu hake ki ʻolunga ʻi he lotolotonga ʻo ʻene kalasí ʻo kole fakamolemole ki hono akoʻi kiate kinautolu ʻa e ngaahi akonaki taʻefakatohitapú. Hili ʻene fakafisi mei he siasí, naʻá ne kamata fanongonongo ʻa e ngaahi moʻoni ʻo e Tohitapú ʻi hono feituʻú. Naʻá ku ngāue mo Helen ʻi he fakahihifo ʻo Kentucky ʻi he taʻu ʻe tolu, pea ko e tuofefine ko iá mo hono husepānití naʻá na ʻai ʻa hona ʻapí ko homa ʻapi ia.

ʻI he ngaahi ʻaho ko iá naʻe ʻi ai ʻemau fanga kiʻi ʻasemipilī fakalotofonua, pea naʻe tokangaʻi ai ʻe A. H. Macmillan ʻa e taha ʻo e ngaahi meʻá ni. Naʻá ne nofo ʻi he ʻapi ʻo e ongo mātuʻa ʻa Helen ʻi he kei siʻi ʻa Helen, ko ia ʻi he lolotonga ʻa e fakataha-lahí, naʻá ne fili ai ke nofo mo kimaua ʻi homa ʻapi meʻalele mita ʻe 5 hono lōloá, ʻa ia naʻe ʻi ai ha toe mohenga ai ʻe taha. Ko ia foki naʻá ne manatuʻi ʻa hono Tokotaha-Fakatupu Maʻongoʻongá ʻi he ngaahi ʻaho ʻo ʻene kei talavoú, ʻo ne fakatapui ʻa ʻene moʻuí kia Sihova ʻi he 1900, ʻi heʻene taʻu 23.

ʻI Nōvema 1941 naʻe kiʻi tuku fakataimi ai ʻa e ngāue ʻa e fanga tokoua fefonongaʻakí, pea naʻe vaheʻi ai au ko ha tāimuʻa ʻi Hazard, Kentucky. Naʻa mau toe ngāue ai mo hoku tokoua ko Carl pea mo hono uaifí, ʻa Claire. ʻI hení, ko e ʻilamutu ʻo Helen ko Joseph Houston, naʻá ne haʻu ai mo kimaua peá ne kamata tāimuʻa. Naʻá ne hokohoko atu ʻi he ngāue fakafaifekau taimi-kakató ʻi he meimei taʻu ʻe 50, peá ne mate fakafokifā ʻi ha tuʻu e tā ʻo hono mafú ʻi he 1992 lolotonga ia ʻa ʻene ngāue anga-tonu ʻi he ʻuluʻiʻōfisi ʻo e Kau Fakamoʻoni ʻa Sihova ʻi he māmaní ʻi Brooklyn, Niu ʻIoke.

ʻI he 1943 naʻe vaheʻi ai kimaua ki Rockville, Connecticut. ʻI hení, hangē ko ia naʻe hokó, ko ha māmani kehe ia kia Helen mo au koeʻuhi he naʻá ma anga ki he malanga ʻi he tongá. ʻI Rockville, naʻe fai tuʻumaʻu ʻe Helen ʻa e ngaahi ako Tohitapu laka hake he 20 ʻi he uike. Faifai atu pē, naʻá ma totongi ha kiʻi loki taau ki ha Fale Fakatahaʻanga, pea naʻe fokotuʻu ai ha uho ʻo ha kiʻi fakatahaʻanga siʻisiʻi.

Lolotonga ʻa e ngāue ʻi Rockville, naʻe fakaafeʻi ai kimaua ke ma kau ʻi he kalasi hono nima ʻa e Akoʻanga Tohitapu Taua Leʻo ko Kiliatí ʻi South Lansing, Niu ʻIoke. ʻOku fakafiefiá, he naʻá ma ʻilo ko Aubrey mo Bertha Bivens, ko e ongo kaungāmeʻa ʻi homa taimi tāimuʻa ʻi Kentucky, te mau kalasi fakataha.

Akoʻangá mo Homa Vāhenga-Ngāue Foʻoú

Neongo naʻá ma kei siʻi pē, ko e tokolahi taha ʻo ʻemau kalasí naʻa nau toe kei siʻi ange. ʻIo, naʻa nau manatuʻi ʻa honau Tokotaha-Fakatupu Maʻongoʻongá ʻi heʻenau kei siʻí. Ko homau ʻaho foaki tohi fakamoʻoni akó naʻe ʻi Siulai 1945, ʻi he ofi pē  ko ia ke ʻosi ʻa e Tau II ʻa Māmaní. Lolotonga ʻa e tatali ki homau vāhenga-ngāue fakamisinalé, naʻa mau ngāue ai mo e Fakatahaʻanga Flatbush ʻi Brooklyn, Niu ʻIoké. Faifai atu pē, ʻi ʻOkatopa 21, 1946, fakataha mo e toko ono kehe ʻi he kalasí ʻo kau ai ʻa e ongo Bivens, naʻa mau puna ai ki homau ʻapi foʻou ʻi Kolo Kuatemala, ʻi Kuatemala. ʻI he taimi ko iá, naʻe tokosiʻi hifo ʻi he Kau Fakamoʻoni ʻa Sihova ʻe toko 50 ʻi he fonua ʻAmelika Lotoloto kotoa ko iá.

ʻI ʻEpeleli 1949 ko ha tokosiʻi ʻo kimautolu kau misinalé naʻa mau hiki ki Quetzaltenango, ko e kolo lahi hono ua mo mahuʻinga ia ʻi he fonuá. Ko e koló ni ʻoku tuʻu ia ʻo laka hake ʻi he mita ʻe 2,300 ʻi ʻolunga he fukahi tahí, pea ko e ʻea ʻo e moʻungá ʻoku foʻou ai mo maʻa. Naʻe fakamāʻopoʻopo ʻe Helen ʻemau ngāue hení, ʻo tohi: “Ko homau monū ia ke malanga ʻi he ngaahi kolo mo e ngaahi vīlisi lahi. Naʻa mau tuʻu hake ʻi he faá nai ʻi he pongipongí ʻo heka pasi (ʻa ia naʻe faʻa takatakai ai ʻa e lā ʻi hono fetongi ʻo e matapā sioʻatá) ki ha kolo mamaʻo. Naʻa mau malanga ai ʻi he houa nai ʻe valu ki muʻa ke mau foki ʻi he efiafí.” ʻI he ʻahó ni ʻoku ʻi ai ʻa e ngaahi fakatahaʻanga ʻi he ngaahi feituʻu lahi ko ení, ʻo kau ai ʻa e ono ʻi Quetzaltenango.

Naʻe vave ʻa e ui ki ha kau misinale ke ngāue ʻi Puerto Barrios ʻi he Matāfonua Kalipiané, ko hono tolu ia ʻo e kolo lahi taha ʻi Kuatemalá. Ko siʻoma kaumeʻá ʻa e ongo Bivens, ʻa ia naʻa mau ngāue feʻunga mo e taʻu ʻe nima ʻi Kuatemalá, naʻá na kau ʻi he lotolotonga ʻo e faʻahinga ko ia naʻe hiki ki he vāhenga-ngāue foʻou ko ení. Naʻe fakamamahi moʻoni ʻa e māvae ko ení pea naʻá ne fakatupunga ha tuēnoa ʻi heʻema moʻuí. ʻI he toe pē ʻa Helen mo au ʻi he ʻapi misinalé, naʻá ma hiki ai ki ha kiʻi ʻapātimeni. ʻI he 1955, naʻá ku tali ai mo Helen ha vāhenga-ngāue foʻou ki he kolo fakatalopiki lahi ange ʻo Mazatenango. Ko hoku tokoua siʻisiʻi tahá, ʻa Paul, mo hono uaifí, ko Dolores, ʻa ia naʻá na maʻu tohi fakamoʻoni ako mei Kiliati ʻi he 1953, naʻá na ngāue taimi nounou pē ai ki muʻa ke ma aʻu atú.

ʻI he aʻu mai ki he 1958, naʻa mau maʻu ʻo laka hake ʻi he Kau Fakamoʻoni ʻe toko 700, fakatahaʻanga ʻe 20, mo e sēketi ʻe tolu ʻi Kuatemala. Ko Helen mo au naʻá ma toe kau ʻi he ngāue fefonongaʻakí, ʻo ʻaʻahi ki he fanga kiʻi kulupu iiki ʻo e Kau Fakamoʻoní mo e ngaahi fakatahaʻanga ʻe niʻihi, ʻo kau ai ʻa e taha ʻi Quetzaltenango. ʻI ʻAokosi leva ʻo e 1959, naʻe fakaafeʻi ai kimaua ke ma foki ki Kolo Kuatemala, ʻa ia naʻá ma nofo ai ʻi he ʻōfisi vaʻá. Naʻe vaheʻi ai au ke u ngāue ʻi he vaʻá, lolotonga ia ʻa e hokohoko atu ʻa Helen ʻi he ngāue fakamisinalé ʻi ha toe taʻu ʻe 16. Naʻá ne toe kamata ngāue leva ʻi he ʻōfisi vaʻá.

Ngaahi Tāpuaki Lahi Ange

ʻI he ngaahi taʻu kuohilí naʻe hā ngali ko au maʻu pē ʻa e siʻisiʻi taha ʻi he faʻahinga ko ia naʻa nau tauhi kia Sihová. ʻI he taimi ní ko au ʻoku ou faʻa motuʻa tahá, ʻa ia ko e tuʻunga ia naʻe ʻi ai ʻi heʻeku kau ki he ako ki he vaʻá ʻi Patterson, Niu ʻIoke, ʻi he 1996. Hangē tofu pē ko ʻeku maʻu ʻa e tokoni lahi ʻi heʻeku kei talavoú mei he faʻahinga taʻumotuʻa angé, ko hoku monū ia ʻi he ngaahi hongofuluʻi taʻu ki mui ní ke tokoniʻi ʻa e faʻahinga kei siʻi tokolahi ʻa ia ʻoku nau holi ke manatuʻi ʻa honau Tokotaha-Fakatupú ʻi heʻenau kei talavoú.

ʻOku hokohoko atu ʻa hono fakaʻuha mai ʻe Sihova ʻa e ngaahi tāpuaki ki heʻene kakai heni ʻi Kuatemalá. ʻI he 1999 naʻe laka hake he ngaahi fakatahaʻanga ʻe 60 ʻi Kolo Kuatemala. Pea ki he tokelaú, tongá, hahaké, mo e hihifó, ʻoku ʻi ai ʻa e ngaahi fakatahaʻanga lahi ange mo e kau fanongonongo ʻe laui afe ʻo e ongoongo lelei ʻo e Puleʻanga ʻo e ʻOtuá. Ko e tokosiʻi ange ʻi he kau fanongonongo ʻe toko 50 ʻo e Puleʻangá ʻi heʻemau aʻu mai ki he taʻu nai ʻe 53 kuohilí kuo tupulaki ia ʻo laka hake he toko 19,000!

Ko e Meʻa Lahi ke Fakamālō Aí

ʻOku ʻikai ha taha ʻe fou ʻi he moʻuí ʻo taʻeʻiai ha ngaahi palopalema, ka ʻe lava ke tau lī maʻu pē ʻetau “kavenga kia Sihova.” (Sāme 55:22) ʻOkú ne faʻa tokoniʻi kitautolu fakafou ʻi he poupou ʻa e ngaahi kaungāmeʻa anga-ʻofa. Ko e fakatātaá, ʻi ha ngaahi taʻu siʻi ki muʻa ʻi heʻene maté, naʻe meʻaʻofaʻaki mai kiate au ʻe Helen ha kiʻi meʻateuteu kuo fakaʻesia naʻe tongi ai ʻa e konga Tohitapu ʻi he Hepelu 6:​10: “ʻOku ʻikai ke taʻefaitotonu ʻa e ʻOtuá koeʻuhi ke ne taʻetokanga ki hoʻomou ngāue mālohí pea mo e ʻofa ʻa ia kuo mou fakahāhā kiate Iá tonu ʻi hono fai ʻa e  ngaahi ngāue ki Heʻene kakaí pea ʻi hoʻomou kei fai kinautolú.”​—Weymouth.

Naʻe pehē ʻi he konga ʻo ʻene nouti naʻe fakapipiki ki aí: “ʻA ʻeku tokotaha ʻoku ou ʻofaʻí, ʻoku mātuʻaki siʻi ʻa e meʻa ʻoku lava ke u foaki atu maʻaú, tuku kehe pē ʻa e KOTOA ʻO ʻEKU ʻOFÁ . . . ʻOku mātuʻaki feʻungamālie ʻa e konga tohí ni kiate koe, pea ʻoku ou kole atu ke ke tuku ia ʻi ho tesí, ʻo ʻikai koeʻuhi ko ʻeku ʻoatu ia kiate koé, ka koeʻuhi ʻoku kaunga ia kiate koe ʻi he ngaahi taʻu lōloa ʻo hoʻo ngāué.” Aʻu mai ki he ʻahó ni, ʻoku kei hili pē ʻa e kiʻi meʻateuteú ʻi heʻeku tesi ʻi he ʻōfisí ʻi he vaʻa Kuatemalá.

Kuó u tauhi ʻa Sihova mei heʻeku talavoú, pea ʻi he taimí ni ʻi hoku ngaahi taʻu lahí, ʻoku ou fakamālō kia Sihova ʻi heʻeku moʻui leleí ʻa ia ʻokú ne fakaʻatā ai au ke u fakahoko ʻa hoku ngaahi fatongia kuo vaheʻi maí. ʻI heʻeku fai ʻeku lau Tohitapu tuʻumaʻú, ʻoku ou faʻa aʻu mai ai ki he ngaahi konga Tohitapu ʻa ia ʻoku ou fakakaukau naʻe mei laineʻi ʻe siʻeku Helen ʻi heʻene Tohitapú. Naʻe hoko ia kiate au ʻi heʻeku toe lau ʻa e Sāme 48:​14 (PM): “Koe Otua ni ko ho tau Otua o lauikuoga bea taegata: te ne tauhi akitautolu o aʻu ki he mate.”

ʻOku ou fiefia ke kau fakataha mo e niʻihi kehé ʻi he vīsone ki he ʻaho ʻo e toetuʻú ʻi he taimi ʻe talitali lelei ai ʻe he kakai ʻo e ngaahi puleʻanga kotoa pē ki muʻá ʻa e faʻahinga naʻa nau ʻofa aí mei he maté ki he māmani foʻoú. Ko ha ʻamanaki moʻoni ē! Ko ha ngaahi loʻimata ē ʻo e fiefia te tau fakatooki ʻi he taimi ko iá ʻi heʻetau manatuʻi ko Sihová ko e ʻOtua moʻoni ia “oku ne fakafiemalieʻi akinautolu kuo li ki lalo”!​—2 Kolinito 7:​6, PM.

[Fakatātā ʻi he peesi 25]

Takai fakatoʻomataʻu mei he toʻohema ʻi ʻolungá: Fineʻeikí, Tangataʻeikí, Eva ko e tokoua ʻo e fineʻeikí, mo e ongo taʻoketé ko Carl mo Clarence, 1910

[Fakatātā ʻi he peesi 26]

Fakataha mo Helen ʻi he 1947 pea ʻi he 1992