Ko Kitauá ko e Haʻa Tui

ʻOatu ha Pōpoaki ʻo e Fakafiemālié ʻi ʻĪtali

KO SIHOVÁ ko e “Otua oe fiemalie kotoabe.” ʻI he ako ke faʻifaʻitaki kiate iá, ʻoku malava ai ʻa ʻene kau sevānití ʻo ‘fakafiemalieʻi ai ae faʻahinga i heʻenau mamahi kotoabe.’ (2 Kolinito 1:​3, 4, PM; Efeso 4:32e [5:1, PM]) Ko e taha eni ʻo e ngaahi taumuʻa tefito ʻo e ngāue fakamalanga naʻe fakahoko ʻe he Kau Fakamoʻoni ʻa Sihová.

Ko Hono Tokoniʻi ʻo ha Fefine Naʻe Faingataʻaʻia

Naʻe tautefito ki he ngaahi taʻu ki mui ní ʻa hono hanga ʻe he masivá, taú, pea mo e holi ke maʻu ha moʻui lelei angé ʻo ueʻi ʻa e tokolahi ke nau hiki ʻo nofo ʻi he ngaahi fonua tuʻumālie angé. Ka ʻoku ʻikai faingofua ke fengaʻunuʻaki ki he ngaahi ʻātakai foʻoú. Naʻe nofo ʻa Manjola mo hono ngaahi kaungā ʻAlipēniá ʻi Borgomanero. Koeʻuhi naʻá ne nofo taʻefakalao ʻi ʻĪtali, naʻá ne toumoua ke talanoa mo Wanda, ko e taha ʻo e Kau Fakamoʻoni ʻa Sihová. Ka neongo ia, naʻe faifai pē ʻo fokotuʻutuʻu ʻe Wanda ke fetaulaki mo Manjola, ʻa ia naʻe vave ʻa ʻene fakahāhā ʻa e mahuʻingaʻia ʻi hono ako ʻa e Folofola ʻa e ʻOtuá, neongo naʻe ʻai ʻe he fakangatangata ʻi he leá ke faingataʻa ʻa e meʻá ni. Kae kehe, hili ha ngaahi ʻaʻahi siʻi, naʻe ʻikai ke toe maʻu atu ʻe Wanda ia ha taha ʻi he ʻapí. Ko e hā ne hokó? Naʻe toki ʻiloʻi ʻe Wanda ko e kotoa ʻo e faʻahinga naʻe nofo ʻi he fale ko iá ne nau hola koeʻuhi he ko e tokotaha ʻo kinautolu​—ko e kaumeʻa-tangata ʻo Manjola​—naʻe kumi ia ke puke ʻi haʻane fakapō!

ʻI ha māhina ʻe fā ki mui ai, naʻe toe fetaulaki ai ʻa Wanda mo Manjola. “ʻI heʻene tea pea tutué, naʻá ne hangē mai ha taha naʻe faingataʻaʻia moʻoní,” ko e manatu ia ʻa Wanda. Naʻe fakamatala ʻa Manjola ko hono kaumeʻa-tangata ki muʻá naʻe ʻi he pilīsoné pea ko e ngaahi kaungāmeʻa ko ia naʻá ne hanga ki ai ki ha tokoní naʻa nau fakalotomamahiʻi lahi ia. ʻI he ongoʻi tuenoá, naʻá ne lotu ki he ʻOtuá ki ha tokoni. Naʻá ne manatuʻi leva ʻa Wanda, ʻa ia naʻe talanoa ʻo fekauʻaki mo e Tohitapú. He fiefia moʻoni ē ko Manjola ʻi heʻene toe sio kiate iá!

Naʻe toe fai ha ako Tohitapu, pea naʻe vave ʻa e kamata ke maʻu ʻe Manjola ʻa e ngaahi fakataha faka-Kalisitiané. Naʻá ne lavameʻa ʻi hono maʻu ha ngofua fakalao ke nofo ai pē ʻi ʻĪtali. Hili ʻa e taʻu ʻe taha, naʻe hoko ai ʻa Manjola ko ha Fakamoʻoni ʻosi papitaiso. ʻI hono fakafiemālieʻi ia ʻe he ngaahi talaʻofa fakaʻotuá, naʻá ne toe foki ki ʻAlipēnia ke vahevahe atu ʻa e pōpoaki fakafiemālie ʻa e Tohitapú ki hono kaungā tangataʻifonuá.

Faifakamoʻoni ʻi ha Feituʻu ʻApitanga ʻo e Kau Nofo Hili Atú

Kuo fai ʻe he ngaahi fakatahaʻanga ʻĪtali lahi ʻa e ngaahi fokotuʻutuʻu ke faifakamoʻoni ki he kau nofo hili atú ʻo hangē ko Manjola. Ko e fakatātaá, naʻe fai ʻe ha fakatahaʻanga ʻi Florence ha ngaahi fokotuʻutuʻu ke ʻaʻahi  tuʻumaʻu ki he feituʻu ʻapitanga ʻo e kau nofo hili atú. Ko e kau nofo ʻi he ʻapitangá​—ko e tokolahi ai mei ʻIulope Hahake, Masitōnia, mo Kosovou​—naʻa nau aʻusia ʻa e ngaahi faingataʻa kehekehe. Naʻe ʻi ai ʻa e ngaahi palopalema ʻa e niʻihi ʻi he faitoʻo kona tapú pe ʻolokaholó. Naʻe tokoniʻi ʻe he tokolahi ʻa kinautolu tonu ʻaki ʻa e fanga kiʻi kaihaʻa iiki.

Ko e malanga ʻi he feituʻu ko ení ko ha pole ia. Kae kehe, naʻe faifai pē ʻo fetuʻutaki ha ʻevangeliō taimi-kakato ko Paola pea mo Jaklina, ko ha fefine Masitōnia. Hili ha ngaahi fetalanoaʻaki siʻi, naʻe fakalototoʻaʻi ʻe Jaklina ʻa hono kaumeʻa ko Susanna ke ne sivisiviʻi ʻa e Tohitapú. ʻI he tafaʻaki ʻe tahá, naʻe talanoa ʻa Susanna mo e ngaahi kāinga kehé. ʻIkai fuoloa, naʻe ako Tohitapu tuʻumaʻu ʻa e toko nima ʻo e fāmilí, ʻo nau maʻu ʻa e ngaahi fakataha faka-Kalisitiané, pea ngāueʻaki ʻa e ngaahi meʻa naʻa nau akó. Neongo ʻa e ngaahi palopalema naʻe pau ke nau fehangahangai mo iá, naʻa nau maʻu ʻa e fakafiemālie meia Sihova mo ʻene Folofolá.

Tali ʻe ha Tāupoʻou ʻa e Fakafiemālie Meia Sihová

ʻI he kolo ko Formia, naʻe talanoa ai ha ʻevangeliō taimi-kakato ko Assunta ki ha fefine ʻa ia naʻe faingataʻa ʻa ʻene ʻalú. Ko e fefiné ko ha tāupoʻou ia naʻe kau ki ha fokotuʻutuʻu fakalotu ʻa ia naʻe fai ai ʻa e tokoni ki he kau mahakí mo e kau vaivaí fakatouʻosi ʻi he ngaahi falemahakí pea mo e ngaahi ʻapi tāutahá.

Naʻe pehē ange ʻe Assunta ki he tāupoʻoú: “ʻOkú ke faingataʻaʻia mo koe foki, ʻikai ko ia? ʻOku fakamamahí, he ʻoku tau maʻu kotoa ʻa e palopalema ke fekuki mo ia.” ʻI he meʻa ko iá naʻe kamata ke fakatō loʻimata ʻa e tāupoʻoú peá ne fakamatala ange naʻá ne maʻu ha ngaahi palopalema fakaemoʻui mafatukituki. Naʻe fakalototoʻaʻi ia ʻe Assunta, ʻi heʻene tala ange ʻe lava ke fakafiemālieʻi ia ʻe he ʻOtua ʻo e Tohitapú. Naʻe tali ʻe he tāupoʻoú ʻa e ngaahi makasini makatuʻunga ʻi he Tohitapú naʻe ʻoange kiate ia ʻe Assunta.

Ko e tāupoʻoú, ʻi he lolotonga ʻa ʻena fetalanoaʻaki hono hokó, ʻa ia ko hono hingoá ko Palmira, naʻá ne fakahaaʻi ange naʻá ne faingataʻaʻia lahi ʻaupito. Naʻá ne nofo ʻi ha taimi fuoloa ʻi ha ʻapiako ʻoku fakalele ʻe he kau tāupoʻoú. ʻI he taimi naʻe pau ai ke ne mavahe fakataimi koeʻuhi ko e ngaahi ʻuhinga fakaemoʻui leleí, naʻe ʻikai fakaʻatā ia ke ne toe foki ange. Ka neongo ia, naʻe ongoʻi ʻe Palmira kuo haʻisia ia ki he ʻOtuá ʻe he ngaahi tukumoʻui naʻá ne fai ʻi he tuʻunga ko ha tāupoʻoú. Naʻá ne hanga ki he kau fakamoʻui mahakí ki ha “faitoʻo” ka naʻe fakamafasiaʻi fakaeʻatamai ia ʻi he meʻa naʻe hokó. Naʻe loto ʻa Palmira ke ako Tohitapu, pea naʻá ne maʻu ʻa e ngaahi fakataha faka-Kalisitiané ʻi he taʻu ʻe taha. Naʻá ne hiki leva ki ha feituʻu kehe, pea naʻe ʻikai toe lava ha fetuʻutaki mo ia ʻa e tokotaha Fakamoʻoní. Naʻe ʻosi mei ai ʻa e taʻu ʻe ua pea toe maʻu ia ʻe Assunta. Naʻe hokosia ʻe Palmira ʻa e fakafepaki lahi mei hono fāmilí pea mo e haʻa faifekaú. Ka neongo ia, naʻá ne toe ako Tohitapu, ʻo fai ʻa e fakalakalaka fakalaumālie, peá ne papitaiso ʻo hoko ko e taha ʻo e Kau Fakamoʻoni ʻa Sihová.

ʻIo, ʻoku fakalototoʻaʻi ʻa e tokolahi ʻe he pōpoaki ʻa e ‘Otua oe fiemalié.’ (Loma 15:​4, 5, PM) Ko ia ai, ko e Kau Fakamoʻoni ʻa Sihova ʻĪtalí ʻoku nau fakapapau ke hokohoko atu ʻa e faʻifaʻitaki ki he ʻOtuá ʻaki hono ʻoatu ki he niʻihi kehé ʻa ʻene pōpoaki fakaofo ʻo e fakafiemālié.