Fakatupulekina ʻa e Fekoekoeʻi mo Sihova

“ʻUNUʻUNU atu ki he ʻOtua, pea ʻe ʻunuʻunu mai ia kiate kimoutolu,” ko e tohi ia ʻa e ākonga ko Sēmisí. (Semisi 4:8) Pea naʻe hiva ʻa e tokotaha-tohi-sāme ko Tēvitá: “Ko e talanoa fufū [“fekoekoeʻi,” NW] mo Sihova ʻoku maʻa e kakai ʻoku ʻapasia kiate ia.” (Sāme 25:14) ʻOku hā mahino, ʻoku fiemaʻu ʻe Sihova ko e ʻOtuá ke tau maʻu ha vahaʻangatae fekoekoeʻi mo ia. Ka, ʻoku ʻikai ke ongoʻi ofi moʻoni kiate ia ʻa e tokotaha kotoa pē ʻoku lotu ki he ʻOtuá mo talangofua ki heʻene ngaahi laó.

Fēfē koe? ʻOkú ke maʻu ha vahaʻangatae fakafoʻituitui vāofi mo e ʻOtuá? ʻOku ʻikai ha veiveiua, ʻokú ke loto ke ʻunu ʻo ofi ange kiate ia. Te tau fakatupulekina fēfē ha fekoekoeʻi mo e ʻOtuá? Ko e hā ʻa e ʻuhinga ʻo e meʻá ni kiate kitautolú? Ko e vahe hono tolu ʻo e tohi Tohitapu ʻa Palovepí ʻokú ne tokonaki mai ʻa e ngaahi talí.

Fakahāhā ʻa e Anga-ʻOfa mo e Faimoʻoni

Ko Tuʻi Solomone ʻo ʻIsileli ʻo e kuonga muʻá ʻokú ne kamata ʻa e vahe hono tolu ʻo e Palovepí ʻaki ʻa e ngaahi lea: “Tama, ʻoua ʻe ngalo ʻeku akonaki [“laó,” NW]; kae tauhi ʻe ho loto ʻeku ngaahi tuʻutuʻuni: He fakalahi ai ki he meʻa ʻoku ke maʻu ʻaki ʻa e nofo fuoloa, mo e ngaahi taʻu moʻui, mo e tuʻumalie [“melino,” NW].” (Palovepi 3:​1, 2 [Lea Fakatātā, PM]) Koeʻuhi naʻe tohi ʻa Solomone ʻi he malumalu ʻo e fakamānavaʻi fakaʻotuá, ko e akonaki fakaetamai ko ení ʻoku haʻu moʻoni ia meia Sihova ko e ʻOtuá pea ʻoku fakahanga mai ia kiate kitautolu. ʻOku akonakiʻi kitautolu heni ke tau fononga ʻaki ʻa e ngaahi fakamanatu ʻa Sihová​—ʻa ʻene laó, pe akonakí, mo ʻene ngaahi tuʻutuʻuni—kuo hiki ʻi he Tohitapú. Kapau ʻoku tau fai eni, ʻe ‘fakalahi ai ki he meʻa ʻoku tau maʻú ʻaki ʻa e nofo fuoloa, mo e ngaahi taʻu moʻui, mo e melino.’ ʻIo, naʻa mo e taimí ni ʻoku lava ke tau fiefia ʻi ha moʻui melino pea lava ke fakaʻehiʻehi ai mei he ngaahi ngāue ʻa ia ʻoku fakaeʻa atu ai kitautolu ki he fakatuʻutāmaki ʻo e mate mutukia ko ia ʻoku faʻa hoko ki he kau faikoví. ʻIkai ko ia pē, ʻoku lava ke tau maʻu ai ʻa e ʻamanaki ʻo e moʻui taʻengata ʻi ha māmani foʻou melino.​—Palovepi 1:​24-​31; 2:​21, 22.

ʻI he hoko atú, ʻoku pehē ʻe Solomone: “Ke ʻoua mahuʻi meiate koe ʻa e angaʻofa mo e fai moʻoni: Haʻi kinaua ki ho kia; tohi kinaua ki he tohiʻanga ʻo ho loto: Ko ia te ke maʻu ai ʻa e ʻofa mo e ongoongolelei ʻi he ʻao ʻo e ʻOtua mo e tangata.”​—Palovepi 3:3, 4.

Ko e foʻi lea ʻi he muʻaki leá ki he “angaʻofa” ʻoku faʻa fakalea ia ko e “ʻofa mateaki” pea ʻoku kau ki ai ʻa e loto-tōnunga, uouangataha, mo e mateaki. ʻOku tau fakapapauʻi ke hanganaki pipiki kia Sihova ʻo tatau ai pē pe ko e hā ʻe hokó? ʻOku tau fakahāhā ʻa e anga-ʻofa ʻi hotau ngaahi vahaʻangatae mo e kaungātuí? ʻOku tau ngāue ke vāofi ai pē mo kinautolu? ʻI he feangainga mo kinautolu ʻi he ʻaho ki he ʻahó, ʻoku tau tauhi ai ‘ʻa e lao ʻofá ʻi hotau funga ʻeleló’ naʻa mo e ʻi he ngaahi tuʻunga fakafiú?​—Palovepi 31:26.

ʻI he hulu ʻo ʻene anga-ʻofá, ʻoku “faʻa fakamolemole” ʻa Sihova. (Sāme 86:5) Kapau kuo tau fakatomala ʻi heʻetau ngaahi angahala ʻi he kuohilí pea ʻoku tau ʻai he taimí ni ha ngaahi hala hangatonu ki hotau vaʻé, ʻoku fakapapauʻi mai kiate kitautolu ʻe hoko mai ʻa e “ngaahi faʻahitaʻu ʻo e fakaivifoʻou” meia Sihova. (Ngāue 3:​19, NW) ʻIkai ʻoku totonu ke tau faʻifaʻitaki ki hotau ʻOtuá ʻaki hono fakamolemoleʻi ʻa e ngaahi faihala ʻa e niʻihi kehé?​—Mātiu 6:​14, 15.

Ko Sihova ʻa e “Otua oe mooni,” pea ʻokú ne fiemaʻu ʻa e “fai moʻoni” mei he faʻahinga ko ia ʻoku nau kumi ke fekoekoeʻi mo iá. (Sāme 31:5, PM) ʻOku lava ke tau ʻamanekina moʻoni ʻe hoko ʻa  Sihova ko hotau Kaumeʻa kapau ʻoku tau tataki ha moʻui lōua​—ʻo tōʻongaʻaki ha founga ʻe taha takatakai ʻi he ngaahi kaungāmeʻa Kalisitiané pea ʻi ha founga ʻe taha ʻi he ʻikai te nau sio maí​—ʻo hangē ko e “kau tangata taʻemoʻoni” ko ia ʻoku nau fufū ke ʻoua ʻe ʻilo pe ko e faʻahinga kakai fēfē kinautolú? (Sāme 26:​4, NW) He fakasesele ē ko ia, koeʻuhi “ʻoku telefua mo tokaimaʻananga ʻa e meʻa kotoa pe ki he fofonga” ʻo Sihová!​—Hepelu 4:​13.

Ko e anga-ʻofá mo e faimoʻoní ʻoku totonu ke fakamahuʻingaʻi ko ha kahoa mahuʻinga ʻo ‘haʻi kinaua ki ho kiá,’ he ʻokú na tokoniʻi kitautolu ke ‘maʻu ai ʻa e ʻofa ʻi he ʻao ʻo e ʻOtuá mo e tangatá.’ ʻOku fiemaʻu ke ʻikai ngata pē ʻi hono fakahāhā ki tuʻa ʻa e ongo ʻulungāngá ni kae pehē foki ke tongi kinaua ‘ki he tohiʻanga ʻo hotau lotó,’ ʻo ʻai kinaua ko ha konga moʻoni ʻo hotau ʻulungāngá.

Fakatupulekina ʻa e Falala Taʻetoeveiveiua kia Sihova

ʻOku hoko atu ʻa e tuʻi potó: “Falala ki he ʻEiki [“Sihova,” NW] ʻaki ʻa e kotoa ʻo ho loto, ʻo ʻouae fāki ki ho poto oʻou: Ke ke fakaongo kiate ia ʻi ho hala kotoa pe, pea ʻe fakatonutonu ʻe ia ho ngaahi ʻalunga.”​—Palovepi 3:​5, 6.

ʻOku taau moʻoni ʻa Sihova mo ʻetau falala kakató. ʻI hono tuʻunga ko e Tokotaha-Fakatupú, ʻoku “longomoʻui ia ʻi he mālohi” pea ko e Matavai ia ʻo e “ivi mālohi fau.” (Aisea 40:​26, 29, NW [Isaia, PM]) ʻOkú ne malava ke fakahoko ʻa e meʻa kotoa kuó ne fakataumuʻa ke faí. Naʻa mo hono huafá tonu ko hono ʻuhinga moʻoní ko e “ʻOkú Ne ʻAi ke Hoko,” pea ʻoku langa hake ai ʻetau falala pau ki heʻene malava ke fakahoko ʻa e meʻa kuó ne talaʻofá! Ko e moʻoniʻi meʻa ko ia ʻa e “ʻikai ʻaupito lava ke loi ai ʻa e ʻOtua,” ʻokú ne ʻai ia ke hoko ko e fakasino tonu ʻo e moʻoní. (Hepelu 6:​18) Ko hono ʻulungaanga tuʻu-ki-muʻá ko e ʻofa. (1 Sione 4:8) ʻOkú Ne ‘fai totonu ʻi hono ʻalunga kotoa, pea ʻi heʻene ngaue kotoa pe ʻoku ne fai ʻofa [“mateaki,” NW].’ (Sāme 145:17) Kapau ʻoku ʻikai lava ke tau falala ki he ʻOtuá, ko hai ʻoku lava ke tau falala ki aí? Ko e moʻoni, ke fakatupulekina ʻa e falala kiate iá, ʻoku fiemaʻu ke tau “ʻahiʻahiʻi ʻo sio ʻoku lelei ʻa Sihova” ʻaki hono ngāueʻaki ʻa e meʻa ʻoku tau ako mei he Tohitapú ʻi heʻetau moʻui fakafoʻituituí pea ʻi he fakakaukauloto ki he lelei ʻoku fakatupu ʻe he meʻá ni.​—Sāme 34:8, NW.

ʻE anga-fēfē ʻetau ‘fakaongo kia Sihova ʻi hotau hala kotoa pe’? ʻOku pehē ʻe he tokotaha-tohi-sāme fakamānavaʻí: “Pea u fakakaukau ki hoʻo fai kotoa pe, ʻo fakalaulauloto ki hoʻo ngaahi ngaue.” (Sāme 77:12) Koeʻuhi ʻoku taʻehāmai ʻa e ʻOtuá, ko e fakalaulauloto ki heʻene ngaahi fuʻu ngāué pea ki heʻene ngaahi feangainga mo ʻene kakaí ʻoku mātuʻaki mahuʻinga ia ki hono fakatupulekina ʻa e fekoekoeʻi mo iá.

Ko e lotú ko ha toe founga mahuʻinga ia ʻo e fakaongo kia Sihová. Naʻe hanganaki ui ʻa Tuʻi Tēvita kia Sihova he “ʻaho kotoa.” (Sāme 86:3) Naʻe faʻa lotu ʻa Tēvita ʻi he poó kotoa, ʻi he taimi naʻe hola holo ai ʻi he toafá. (Sāme 63:​6, 7) “ʻI he faingamalie kotoa pe mou fai hoʻomou lotu ʻi he Laumalie,” ko e enginaki ia ʻa e ʻapositolo ko Paulá. (Efeso 6:​18) Ko e hā hono lahi ʻo ʻetau lotú? ʻOku tau fiefia ʻi hono maʻu ʻa e fetuʻutaki fakafoʻituitui ongoʻi loloto mo e ʻOtuá? ʻI he fehangahangai mo e ngaahi tuʻunga fakafiú, ʻoku tau kole kiate ia ki ha tokoni? ʻOku tau kumi ki heʻene tatakí ʻi he lotu ki muʻa ke fai ʻa e ngaahi fili mahuʻingá? Ko ʻetau ngaahi lotu loto-moʻoni kia Sihová ʻokú ne ʻofaʻi ai kitautolu. Pea ʻoku tau maʻu ʻa e fakapapau te ne fanongo mai ki heʻetau lotú pea ‘fakatonutonu hotau ngaahi halá.’

He fakasesele moʻoni ia ke ‘fāki ki he poto ʻo kitautolú’ pe ko e kakai ʻiloa ʻi he māmaní lolotonga ia ʻoku lava ke tuku ʻetau falala kakató kia Sihova! “ʻOua te ke lau ʻe koe ʻoku ke poto,” ko e lea ia ʻa Solomoné. ʻI hono kehé, ʻokú ne naʻinaʻi mai: “ʻApasia kia Sihova, pea afe mei he kovi: Ko e faitoʻo leva ia ki ho pito, mo e ngako ki ho ngaahi hui.” (Palovepi 3:​7, 8) Ko e manavahē lelei ki hono taʻefakahōifuaʻi ʻa e ʻOtuá ʻoku totonu ke ne puleʻi ʻa e kotoa ʻo ʻetau ngaahi ngāué, ngaahi fakakaukaú, mo e ngaahi ongo ʻo e lotó. Ko e manavahē fakaʻapaʻapa peheé ʻokú ne taʻofi kitautolu mei hono fai ʻa e meʻa ʻoku koví pea ʻoku fakamoʻui fakalaumālie ia mo fakaivifoʻou.

Foaki kia Sihova Hoʻo Lelei Tahá

Ko e hā ʻa e toe founga kehe ʻoku tau ʻunuʻunu ofi nai ai ki he ʻOtuá? “Fai ha fakaʻapaʻapa ki he ʻEiki [“Sihova,” NW] ʻaki hoʻo koloa, mo e meʻa mei he polopolo ʻo ho fua kotoa pe,” ko e fakahinohino ia ʻa e tuʻí. (Palovepi 3:9) Ke fakaʻapaʻapa kia Sihová ʻoku ʻuhingá ke fakahaaʻi kiate ia ʻa e tokanga māʻolunga pea ke hakeakiʻi ia ʻi he kakaí ʻaki ʻa e kau pea mo e poupou ki hono fanongonongo ki he kakaí ʻa hono huafá. Ko e ngaahi meʻa mahuʻinga ʻa ia ʻoku tau fakaʻapaʻapa ʻaki kia Sihová ko  hotau taimí, ko hotau ngaahi talēnití, hotau mālohí, mo ʻetau ngaahi koloa fakamatelié. Kuo pau ko e ngaahi polopoló eni​—ʻa ʻetau lelei tahá. ʻIkai ʻoku totonu ke tapua mei he founga ʻoku tau ngāueʻaki ʻetau ngaahi koloa fakafoʻituituí ʻa ʻetau fakapapau ke ‘kumi muʻa ki hono puleʻangá, mo e maʻoniʻoni ʻa e ʻOtuá’?​—Mātiu 6:​33.

Ko e fakaʻapaʻapa kia Sihova ʻaki ʻetau ngaahi meʻa mahuʻingá ʻe ʻikai ke taʻefakapaleʻi. “Ko ia ʻe fonu ai ho ngaahi feleoko ʻi he mahu,” ko e fakapapau mai ia ʻa Solomoné, “pea ʻe puna ʻa e uaine foʻou mei ho tataʻoʻanga.” (Palovepi 3:​10) Lolotonga ko e tuʻumālie fakalaumālié ʻiate ia pē ʻoku ʻikai ke iku atu ia ki he tuʻumālie fakamatelie, ko hono ngāueʻaki loto-fiefoaki ʻetau ngaahi koloá ke fakaʻapaʻapa ʻaki kia Sihová ʻokú ne ʻomai ʻa e ngaahi tāpuaki lahi. Ko hono fai ʻa e finangalo ʻo e ʻOtuá ko ha “meʻakai” fakatolonga moʻui ia kia Sīsū. (Sione 4:​34) ʻI he tuʻunga tatau, ko e kau ʻi he ngāue fakamalanga mo e ngaohi-ākonga ko ia ʻoku fakalāngilangiʻi ai ʻa Sihová ʻokú ne fafangaʻi kitautolu. Kapau ʻoku tau kīvoi ʻi he ngāue ko iá, ko ʻetau ngaahi feleoko ʻo e koloa fakalaumālié ʻe fakafonu lahi ia. Ko ʻetau fiefiá​—ʻoku fakatātāʻaki ʻa e uaine foʻoú​—ʻe fonu mahuohua.

ʻIkai ʻoku tau toe hanga kia Sihova pea lotu kiate ia ki ha meʻakai fakamatelie feʻunga ki he ʻaho taki taha? (Mātiu 6:​11) Ko hono moʻoní, ko e meʻa kotoa pē ʻoku tau maʻú, ko e haʻu ia mei heʻetau Tamai fakahēvani anga-ʻofá. ʻE toe lilingi mai ʻe Sihova ʻa e ngaahi tāpuaki ʻi ha tuʻunga ke tau ngāueʻaki ʻetau ngaahi meʻa mahuʻingá ki hono fakahīkihikiʻí.​—1 Kolinito 4:7.

Talitali Lelei ʻa e Akonaki ʻa Sihová

ʻI hono fakatokangaʻi ʻa e mahuʻinga ʻo e akonakí ki hono maʻu ʻa e fekoekoeʻi mo Sihová, ʻoku fakahinohino mai ʻa e tuʻi ʻo ʻIsilelí kiate kitautolu: “Tama, ʻoua te ke vaʻingaʻaki ho ako [“akonaki,” NW] ʻoku fai ʻe [Sihová]; pea ʻoua te ke kina ʻi ho tautea [“valoki,” NW] ʻe ia: He ko ia ʻoku ʻofa ki ai ʻa [Sihová] ʻa ia ʻoku ne [valoki]; ʻio, hange ko e fai ʻe ha tamai ki hono foha pele.”​—Palovepi 3:​11, 12.

Neongo ia, ʻe ʻikai nai ke faingofua kiate kitautolu ke tau tali ʻa e akonakí. “Pea ko eni, ka fai ha kinisi [“akonaki,” NW], talaʻehai ʻoku tau ongoʻi leva ko e meʻa fakafiefia ia, kaekehe, ko e meʻa fakamamahi,” ko e tohi ia ʻa e ʻapositolo ko Paulá, “ka ʻe faifai pea tupu ai kiate kinautolu kuo ʻosi ʻa ako ai, ha fua ʻoku hoa mo e melino, ko e koto maʻoniʻoni.” (Hepelu 12:11) Ko e valokí mo e akonakí ko ha konga tefito ia ʻo e ako ʻokú ne ʻomai kitautolu ke toe ofi ange ai ki he ʻOtuá. Ko e fakatonutonu meia Sihová​—pe ʻoku tau maʻu ia mei he  ngaahi mātuʻá, fakafou mai ʻi he fakatahaʻanga Kalisitiané, pe ʻi he fakalaulauloto ki he ngaahi Konga Tohitapú lolotonga ʻetau ako fakafoʻituituí—ko ha fakahāhā ia ʻo ʻene ʻofa kiate kitautolú. ʻOku tau fakapotopoto ke talitali lelei ia.

Pikimaʻu ki he Potó mo e ʻIloʻiló

ʻI he hoko atú, ʻoku fakamamafaʻi ʻe Solomone ʻa e mahuʻinga ʻo e potó mo e ʻiloʻiló ʻi hono fakatupulekina ha vahaʻangatae vāofi mo e ʻOtuá. ʻOkú ne talaki: “Monuʻiaā ka ko e tangata kuo ne ʻilo ʻa poto, mo e tangata kuo ne maʻu mai ʻa e mafai-ke-ʻilo [“ʻiloʻiló,” NW]; he ʻoku leleiange ʻa e ʻalu holo hono fakatau ʻi he siliva, pea ko e fua ʻoku te maʻu ai, ʻi he koula moʻonia. . . . Ko e ʻakau-ʻo e-moʻui ia kiate kinautolu ʻoku puke ia: Pea ʻoku monuʻia ʻa kinautolu ʻoku kuku ki ai.”​—Palovepi 3:​13-​18.

ʻI hono fakamanatu kiate kitautolu ʻa hono fakahāhā ʻo e poto mo e ʻiloʻilo ki he ngaahi ngāue fakaofo ʻo e fakatupu ʻa Sihová, ʻoku fakamatala ʻa e tuʻí: “Ko poto naʻe langa ai ʻe Sihova ʻa e fonua; naʻa ne fokotuʻu ʻa e langi ʻaki ʻa e mafai-ke-sivi [“ʻiloʻiló,” NW]. . . . Tama, ʻoua naʻa puli kinaua mei ho mata; tauhi ʻa Tokoni mo Fakakaukau; ko e moʻui leva ia ki ho laumalie, mo e teunga ki ho kia.”​—Palovepi 3:​19-​22.

Ko e potó mo e ʻiloʻiló ko e ongo ʻulungaanga fakaʻotua ia. ʻOku fiemaʻu ke ʻikai ngata pē ʻi heʻetau fakatupulekina kinauá kae pehē foki ke puke maʻu kinaua ʻaki ʻa e ʻikai ke fakaliʻeliʻaki ʻi heʻetau ako tōtōivi ʻa e ngaahi Konga Tohitapú mo hono ngāueʻaki ʻa e meʻa ʻoku tau akó. “Te ke toki ʻalu nonga pe ʻi ho hala,” ko e hoko atu ia ʻa Solomoné, “pea ʻe ʻikai tukia ho vaʻe.” ʻOkú ne tānaki mai ki ai: “ʻOka ke ka tokoto, ʻe ikai te ke manavahe: ʻIo, te ke tokoto, pea holo hoʻo mohe.”​—Palovepi 3:​23, 24.

ʻIo, ʻoku lava ke tau ʻaʻeva ʻi he malu pea mohe ʻi he nonga ʻo e fakakaukaú ʻi heʻetau tatali ki he fakaofi mai hangē ha kaihaʻá ʻa e ʻaho ʻo e “fakaʻauha fakafokifā” ki he māmani fulikivanu ʻo Sētané. (1 Tesalonaika 5:​2, 3, NW; 1 Sione 5:​19) Naʻa mo e ʻi he lolotonga ʻo e mamahi lahi ʻoku tuʻunuku maí, ʻoku lava ke tau maʻu ʻa e fakapapaú ni: “ʻOua te ke manavahe ki ha hoko fokifa ha fakailifia, pe ʻi he to mai ha haʻahaaʻi matangi ʻa ha kau angahala: He ko Sihova leva ho falalaʻanga, pea te ne tauhi ho vaʻe ke ʻoua naʻa moʻua.”​—Palovepi 3:​25, 26; Mātiu 24:21.

Fai ʻa e Meʻa ʻOku Leleí

“ʻOua te ke taʻofi ha lelei meiate kinautolu ʻoku ʻonautolu ia, ʻosi ʻoku mafai ʻe ho nima ke fai.” (Palovepi 3:​27) Ko e fai lelei ki he niʻihi kehé ʻoku kau ki ai ʻa hono ngāueʻaki loto-fiefoaki ʻetau ngaahi koloá ki he faʻahinga ko iá, pea ko e meʻá ni ʻoku ʻi ai hono ngaahi tafaʻaki kehekehe lahi. Kae ʻikai ko hono tokoniʻi ʻa e niʻihi kehé ke maʻu ha vahaʻangatae vāofi mo e ʻOtua moʻoní ʻa e meʻa lelei taha ʻoku lava ke tau fai maʻanautolu lolotonga ʻa e “taimi fakamui” ko ení? (Taniela 12:4) Ko e ngaahi ʻaho leva eni ki hono fakahaaʻi ʻo e faivelenga ʻi he ngāue malangaʻi ʻo e Puleʻangá pea mo e ngaohi-ākongá.​—Mātiu 28:​19, 20.

ʻOku toe fakahokohoko mai ʻe he tuʻi potó ʻa e ngaahi tōʻongafai ke liʻaki, ʻi heʻene pehē: “ʻOua te ke pehe kiate ia ʻoku mo alea, “ʻAlu, ka ke toki haʻu, pea apongipongi te u ʻatu;” ʻosi ʻoku ke lolotonga maʻu. ʻOua te ke fakakaukauʻi ha kovi ke fai ki ho kaungaʻapi, ʻosi ʻoku ne nofoʻaki koe. ʻOua te ke fakakikihi tuʻungaʻa pe mo ha tangata, ʻo kapau kuo ʻikai te ne fai ha kovi kiate koe. ʻOua te ke fakaʻamua ha tangata fai fakamalohi, pea ʻoua te ke fili ha taha ʻo hono ngaahi founga.”​—Palovepi 3:​28-​31.

ʻI hono fakatahaʻi ʻa e ʻuhinga ki heʻene akonakí, ʻoku pehē ʻe Solomone: “He ko e tangata angapiko ʻoku fakaliliʻa ki ai ʻa Sihova: Ka ko e kau angatonu ʻoku nau talanoa fafale [“fekoekoeʻi,” NW] mo ia. Ko e mala ʻa Sihova ʻoku ʻi he fale ʻo e kau angahala ka ʻoku ne tapuakiʻi ʻa e nofoʻanga ʻo e fai totonu. Ka fai mai ʻani kata kakae, ʻe kata kakae atu mo ia: Ka ko siʻi angavaivai ʻoku ne tali ʻofa ki ai. ʻE to ki he kau poto honau tofiʻa ko e ongoongo: Ka ko e kau vale ko honau ʻinasi muʻa ko e ma.”​—Palovepi 3:​32-​35.

Kapau ʻoku tau fiemaʻu ke fiefia ʻi he fekoekoeʻi mo Sihová, kuo pau ke ʻoua te tau fakakaukauʻi ha ngaahi faʻufaʻu kākā mo fakamamahi. (Palovepi 6:​16-19) Ko ʻetau fai pē ʻa e meʻa ʻoku totonu ʻi he fofonga ʻo Sihová te tau maʻu ai ʻa ʻene hōifuá mo e tāpuakí. Te tau toe maʻu mo e fakaʻapaʻapa naʻe ʻikai te tau kumi ki aí ʻi he sio mai ʻa e niʻihi kehé ʻoku tau ngāue ʻo fehoanaki mo e poto fakaʻotuá. Ko ia, tau talitekeʻi ʻa e ngaahi founga kākā ʻa e māmani fulikivanu mo fakamālohi ko ení. Ko e moʻoni, tau tuli ki ha ʻalunga faitotonu pea fakatupulekina ʻa e fekoekoeʻi mo Sihová!

[Fakatātā ʻi he peesi 25]

‘Fai ha fakaʻapaʻapa kia Sihova ʻaki hoʻo koloá’