“Ngaahi Meʻa Manakoa” ʻOku Fakafonuʻaki ʻa e Fale ʻo Sihová

“Te u [Sihova] luluʻi ʻa e ngaahi puleʻanga kotoa pē, pea ʻe hū mai ʻa e ngaahi meʻa manakoa mei he puleʻanga kotoa pē; pea te u fakafonu ʻa e falé ni ʻaki ʻa e lāngilangi.”​—HAKEAI 2:​7, NW.

1. ʻI ha taimi ʻo e hoko ha meʻa fakafokifā, ko e hā ʻoku tau ʻuluaki fakakaukau ai ki he faʻahinga ʻoku tau ʻofa aí?

 KO E HĀ ʻa e ngaahi meʻa manakoa ʻoku fakafonuʻaki ho falé? ʻOkú ke maʻu ha nāunau fale mahuʻinga, ha komipiuta fakaeonopooni tahá, ha kā foʻou ʻi hoʻo fale kaá? Neongo kapau ʻokú ke maʻu ʻa e kotoa ʻo e ngaahi meʻá ni, ʻikai te ke loto-tatau ko e ngaahi meʻa mahuʻinga lahi taha ʻi ho ʻapí ko e kakaí​—ʻa e ngaahi mēmipa ʻo ho fāmilí? Fakakaukau atu ʻoku fakaʻaaki koe ʻe ha nanamu ʻo ha kohu ʻi ha pō ʻe taha. ʻOku vela ho falé, pea ko e ngaahi miniti siʻi pē kiate koe ke ke hola aí! Ko e hā te ke ʻuluaki tokanga ki aí? Ko hoʻo nāunau falé? Ko hoʻo komipiutá? Ko hoʻo kaá? ʻIkai te ke fakakaukau ki he faʻahinga ʻokú ke ʻofa aí? Ko hono moʻoní, te ke fai pehē, he ʻoku mahuʻinga ange ʻa e kakaí ʻi he ʻū meʻá.

2. Ko e hā ʻa e lahi ʻo e fakatupu ʻa Sihová, pea ko e hā ʻa e tafaʻaki ʻo ia naʻe ʻofa lahi taha ki ai ʻa Sīsuú?

² Fakakaukau ange he taimí ni kia Sihova ko e ʻOtuá mo hono ʻAló, ʻa Sīsū Kalaisi. Ko Sihova naʻá “Ne ngaohi ʻa e langi, mo e fonua, mo e tahi, mo e ngaahi meʻa kehekehe ʻoku ʻi ai.” (Ngāue 4:24) Ko hono ʻAló, ʻa e “tufunga lahi,” ʻa e fakafofonga ʻa ia fakafou ʻiate ia naʻe ngaohi ai ʻe Sihova ʻa e ngaahi meʻa kehe kotoa pē. (Palovepi 8:​30, 31 [Lea Fakatātā, PM]; Sione 1:3; Kolose 1:​15-​17) Ko hono moʻoní, ʻoku fakatou mahuʻingaʻia ʻa Sihova mo Sīsū ʻi he meʻa kotoa pē ko ia naʻe fakatupú. (Fakafehoanaki mo Senesi 1:31.) Ka ko fē ʻa e tafaʻaki ʻo e fakatupú ʻokú ke fakakaukau atu ʻoku mahuʻinga lahi taha kiate kinauá​—ko e ʻū meʻá pe ko e kakaí? ʻI he ngafa ko hono fakasino mai ʻo e potó, ʻoku pehē ʻe Sīsū: “Ko ʻeku neka naʻe ʻi he hako ʻo Atama,” pe hangē ko hono fakalea ʻe he liliu ʻa William F. Beck, ko Sīsuú naʻe “fiefia ʻi he faʻahinga ʻo e tangatá.”

3. Ko e hā ʻa e kikite naʻe folofolaʻaki ʻe Sihova ʻo fakafou ʻia Hakeaí?

³ ʻOku ʻikai toe fehuʻia ʻa hono fokotuʻu ʻe Sihova ʻa e mahuʻinga lahi ʻi he kakaí. Ko e taha ʻo hono fakahaaʻi ʻo e meʻá ni ʻoku maʻu ia ʻi he ngaahi lea fakaekikite naʻá ne folofolaʻaki ʻi he taʻu 520 K.M. ʻo fakafou ʻi heʻene palōfita ko Hakeaí. Naʻe talaki ai ʻe Sihova: “Te u luluʻi ʻa e ngaahi puleʻanga kotoa pē, pea ʻe hū mai ʻa e ngaahi meʻa manakoa mei he puleʻanga kotoa pē; pea te u fakafonu ʻa e falé ni ʻaki ʻa e lāngilangi. . . . ʻE lahi ange ʻa e lāngilangi ʻo e fale ko ʻeni ki muí ʻi he ʻuluakí.”​—Hakeai 2:​7, 9, NW.

4, 5. (a) Ko e hā ʻe taʻeʻuhinga ai ke fakaʻosiʻaki ʻo pehē ko e kupuʻi lea “ngaahi meʻa manakoa” ʻoku ʻuhinga ki he fisifisimuʻa fakamatelié? (e) ʻE anga-fēfē hoʻo fakamatalaʻi ʻa e “ngaahi meʻa manakoa,” pea ko e hā hono ʻuhingá?

⁴ Ko e hā ʻa e “ngaahi meʻa manakoa” ʻe fakafonuʻaki ʻa e fale ʻo Sihová pea ʻomai ai ʻa e lāngilangi taʻefakatatauá? Ko ha ngaahi nāunau fale hulu fau mo e ngaahi meʻa teuteu fale lahi? Ko e koula, siliva, mo e ngaahi maka mahuʻinga? ʻE ʻikai  ke hā ngali ʻuhinga lelei ʻeni. Manatuʻi, ko e temipale ki muʻá, naʻe fokotuʻu ʻi he meimei senituli ʻe nima ki muʻa atú, ko ha fale lahi molumalu, paʻanga ʻe laui piliona ia! a Ko hono moʻoní, naʻe ʻikai ke ʻamanekina ʻe Sihova ʻe lakasi ʻe he temipale naʻe langa ʻe he kiʻi kau Siu tokosiʻi naʻe toe fokí ʻa e temipale ʻo Solomoné ʻi he fisifisimuʻa fakamatelié!

⁵ Ko ia, ko e hā ʻa e “ngaahi meʻa manakoa” te ne fakafonu ʻa e fale ʻo Sihová? ʻOku hā mahino, kuo pau pē ko e kakaí. He ko hono moʻoní, ko e meʻa ʻokú ne ʻai ʻa e loto ʻo Sihová ke fiefiá ʻoku ʻikai ko e silivá mo e koulá ka ko e kakai ʻoku nau tauhi ia ʻi he ʻofá. (Palovepi 27:11; 1 Kolinito 10:26) ʻIo, ʻoku koloaʻaki ʻe Sihova ʻa e kotoa ʻo e kau tangata, kau fefine, mo e fānau ko ia ʻoku nau lotu fakahōifua kiate iá. (Sione 4:​23, 24) Ko ʻeni ia ʻa e “ngaahi meʻa manakoa,” pea ʻoku nau mahuʻinga mamaʻo ange kia Sihova ʻi he kotoa ʻo e ngaahi meʻa teuteu matamatalelei ko ia naʻe teuʻi ʻaki ʻa e temipale ʻo Solomoné.

6. Ko e hā ʻa e taumuʻa naʻe ngāue ki ai ʻa e temipale ʻo e ʻOtuá ʻi he kuonga muʻá?

⁶ Neongo ʻa e fakafepaki taʻefakavaivaí, naʻe kakato ʻa e temipalé ia ʻi he 515 K.M. ʻI he aʻu mai ki he taimi ʻo e feilaulau ʻa Sīsuú, naʻe kei hoko ʻa e temipale ʻi Selusalemá ko e senitā ia ʻo e lotu maʻá ki he “ngaahi meʻa manakoa” lahi, ʻa ia ko e kau Siu totonú ia mo e kau ului Senitailé. Ka naʻe fakafofongaʻi ʻe he temipalé ʻa e meʻa maʻongoʻonga mamaʻo ange, ʻo hangē ko ia te tau vakai ki aí.

Ko ha Fakahoko ʻi he ʻUluaki-Senitulí

7. (a) Ko e hā naʻe tomuʻa fakatātaaʻi ʻe he temipale ʻo e ʻOtuá ʻi he kuonga muʻá ʻi Selusalemá? (e) Fakamatalaʻi ʻa e ngaahi ngāue ʻa e taulaʻeiki lahí ʻi he ʻAho ʻo e Fakaleleí.

⁷ Naʻe tomuʻa fakatātaaʻi mai ʻe he temipale ʻi Selusalemá ha fokotuʻutuʻu lahi ange ki he lotú. Ko e temipale fakalaumālie ia ʻo e ʻOtuá, ʻa ia naʻe fokotuʻu ʻe Sihova ʻi he 29 T.S. fakataha mo Sīsū ko e Taulaʻeiki Lahí. (Hepelu 5:​4-10; 9:​11, 12) Fakakaukau atu ki ha faitatau ʻi he vahaʻa ʻo e ngaahi fatongia ʻo e taulaʻeiki lahi ʻo ʻIsilelí pea mo e ngaahi ngāue ʻa Sīsuú. Ko e taʻu taki taha ʻi he ʻAho ʻo e Fakaleleí, naʻe fakaofi atu ai ʻa e taulaʻeiki lahí ki he ʻōlita ʻi he lotoʻā ʻo e temipalé pea foaki atu ai ha pulu tangata ke fakamolemoleʻiʻaki ʻa e ngaahi angahala ʻa e kau taulaʻeikí. Ki mui ai, naʻá ne hū ki he temipalé mo e toto ʻo e pulu tangatá, ʻo ne paasi atu ʻi he ngaahi matapā naʻá ne vaheʻi ʻa e lotoʻaá mei he Potu Tapú pea hū atu leva ki he puipui naʻá ne vaheʻi ʻa e Potu Tapú mei he Potu Toputapú. ʻI heʻene ʻi he loto Potu Toputapú, naʻe afuhi ai ʻe he taulaʻeiki lahí ʻa e totó ki he puha ʻo e fuakavá. ʻI he hili iá, ʻi he muimui ʻi he founga tatau, naʻá ne foaki atu ha kosi ke fakamolemoleʻiʻaki ʻa e ngaahi matakali ʻe 12 ʻikai taulaʻeiki ʻo ʻIsilelí. (Livitiko 16:​5-15) ʻOku anga-fēfē ʻa e fekauʻaki ʻa e ouaú ni mo e temipale fakalaumālie ʻo e ʻOtuá?

8. (a) ʻI he ʻuhinga fē naʻe foaki atu ai ʻa Sīsū ʻo kamata ʻi he 29 T.S.? (e) Ko e hā ʻa e vahaʻangatae makehe naʻe fiefia ai ʻa Sīsū mo Sihova ʻi he kotoa ʻo e ʻalunga ʻo ʻene ngāue fakafaifekau ʻi he māmaní?

⁸ Ko hono moʻoní, naʻe foaki atu ʻa Sīsū ʻi he ʻōlita ʻo e finangalo ʻo e ʻOtuá ʻi he taimi naʻá ne papitaiso ai pea pani ʻaki ʻa e laumālie māʻoniʻoni ʻo e ʻOtuá ʻi he 29 T.S. (Luke 3:​21, 22) Ko e moʻoni, naʻe fakaʻilongaʻi ʻe he meʻá ni ʻa e kamataʻanga ʻo ha ʻalunga ʻo e moʻui fakaefeilaulau kia Sīsū ʻa ia naʻe feʻunga mo e taʻu ʻe tolu mo e konga. (Hepelu 10:​5-10) ʻI he lolotonga ʻa e vahaʻa taimi ko iá, naʻe fiefia ai ʻa Sīsū ʻi ha vahaʻangatae fanauʻi ʻe he laumālié mo e ʻOtuá. Ko e tuʻunga makehe ko ʻeni naʻe maʻu ʻe Sīsū mo ʻene Tamai fakahēvaní naʻe ʻikai malava ke makupusi kakato ia ʻe he faʻahinga kehe ʻo e tangatá. Naʻe hangē ia ha puipui naʻá ne taʻofi honau mata ʻo e ʻiloʻiló, ʻo hangē tofu pē ko ha puipui naʻá ne ʻufiʻufi ʻa e Potu Tapú mei he vakai ki ai ʻa e faʻahinga ʻi he lotoʻā ʻo e tāpanekalé.​—Ekisoto 40:28.

9. Ko e hā naʻe ʻikai malava ai ʻa Sīsū ke hū ki hēvani ʻi he tuʻunga ko ha tangatá, pea naʻe anga-fēfē ʻa hono fakaleleiʻi ʻa e tuʻunga ko ʻení?

⁹ Neongo ʻene hoko ko ha ʻAlo pani ʻe he laumālie ʻo e ʻOtuá, naʻe ʻikai malava ke aʻusia ʻe he tangata ko Sīsuú ʻa e moʻui ʻi hēvaní. Ko e hā naʻe ʻikai aí? Koeʻuhi ʻoku ʻikai malava ʻe he kakanó mo e totó ke ne hokosi ʻa e Puleʻanga fakahēvani ʻo e ʻOtuá. (1 Kolinito 15:​44, 50) Koeʻuhi naʻe hoko ʻa e kakano fakaetangata ʻo Sīsuú ko ha fakangatangataʻanga ia, naʻe fakatātaaʻi lelei ia ʻe he puipui naʻá ne vaheʻi ʻa e Potu Tapú mei he Potu Toputapu ʻi he temipale ʻo e ʻOtuá ʻi he kuonga muʻá. (Hepelu 10:20) Ka ʻi he hili ʻa e ʻaho ʻe tolu mei heʻene pekiá, naʻe fokotuʻu hake ʻa Sīsū ʻe he ʻOtuá ʻo  hoko ko ha laumālie. (1 Pita 3:18) Naʻá ne malava leva ai ke hū ki he loki ʻo e Potu Toputapu ʻo e temipale fakalaumālie ʻo e ʻOtuá​—ko hēvani tonu. Pea ko e meʻa tofu pē ʻeni naʻe hokó. ʻOku tohi ʻe Paula: “Talaʻehai kuo hu ʻa Kalaisi ki he Potu Toputapu ne ngaohi ʻe he nima, ko e fakatātā pe ʻo e moʻonia, ka ki he langi tonu, ke fakaha ni ia ki he fofonga ʻo e ʻOtua maʻatautolu.”​—Hepelu 9:24.

10. Ko e hā naʻe fai ʻe Sīsū ʻi heʻene foki ki hēvaní?

¹⁰ ʻI hēvani, naʻe hanga ʻe Sīsū ʻo ‘afuhi [ai] ʻa e taʻataʻa’ ʻo ʻene feilaulaú ʻaki hono ʻoatu ʻa e mahuʻinga fakaehuhuʻi ʻo hono taʻataʻa moʻuí kia Sihova. Ka, naʻe fai ʻe Sīsū ʻa e meʻa lahi ange. Ki muʻa siʻi peá ne pekiá, naʻá ne tala ange ki hono kau muimuí: “Ko ʻeku ʻalu ʻeni ke teuteu ha potu moʻomoutolu. Pea neongo te u ʻalu ʻo teuteu ha potu moʻomoutolu, ka ʻoku ou toe haʻu pe, pea te u maʻu kimoutolu kiate au; koeʻuhi ko e potu ʻoku ou ʻi ai, ke mou ʻi ai foki.” (Sione 14:​2, 3) Ko ia, ʻi hono maʻu ʻa e hūʻanga ki he Potu Toputapú, pe ki hēvaní, naʻe fakaava ai ʻe Sīsū ʻa e hala ki he niʻihi kehe ke nau muimui ai. (Hepelu 6:​19, 20) Ko e faʻahinga tāutaha ko ʻení, ʻa ia ʻe aʻu ki he toko 144,000, te nau ngāue ko e kau taulaʻeiki-tokoni ʻi he fokotuʻutuʻu temipale fakalaumālie ʻo e ʻOtuá. (Fakahā 7:4; 14:1; 20:6) Hangē pē ko hono ʻuluaki ʻave ʻe he taulaʻeiki lahi ʻo ʻIsilelí ʻa e toto ʻo e pulu tangatá ki he Potu Toputapú ke fakamolemoleʻiʻaki ʻa e ngaahi angahala ʻa e kau taulaʻeikí, ko e mahuʻinga ʻo e taʻataʻa ʻo Sīsū naʻe lilingí naʻe ʻuluaki ngāueʻaki ia ki he kau taulaʻeiki-tokoni ko ʻeni ʻe toko 144,000. b

“Ngaahi Meʻa Manakoa” ʻi Onopōní

11. Naʻe foaki atu ʻe he taulaʻeiki lahi ʻo ʻIsilelí ha kosi ki he lelei maʻa hai, pea ko e hā naʻe tomuʻa fakatātaaʻi ʻe he meʻá ni?

¹¹ ʻOku hā ngali ʻi he aʻu mai ki he 1935, naʻe kakato ai ʻa e fakatahatahaʻi fakalūkufua ʻo e kau paní. c Ka naʻe ʻikai ʻosi ai ʻa hono fakalāngilangiʻi ʻe Sihova ʻa hono falé. Naʻe teʻeki ai ke haʻu ki ai ʻa e “ngaahi meʻa manakoa.” Manatuʻi naʻe foaki ʻe he taulaʻeiki lahi ʻi ʻIsilelí ʻa e monumanu ʻe ua​—ko ha pulu tangata ki he ngaahi angahala ʻa e kau taulaʻeikí pea mo ha kosi maʻá e ngaahi angahala ʻa e ngaahi matakali ʻikai ke taulaʻeikí. Koeʻuhi naʻe fakatātaaʻi ʻe he kau taulaʻeikí ʻa e kau paní ʻa ia te nau fakataha mo Sīsū ʻi he Puleʻanga fakahēvaní, ko hai naʻe fakafofongaʻi ʻe he ngaahi matakali ʻikai taulaʻeikí? ʻOku maʻu ʻa e talí ʻi he ngaahi lea ʻa Sīsū ʻoku lēkooti ʻi he Sione 10:16: “ʻOku ai mo ʻeku fanga sipi kehe, ʻa ia ʻoku ʻikai kau ki he lotoʻā ko eni: kuo pau ke u taki ʻa e faʻahinga ko ia foki: pea te nau tokanga ki hoku leʻo; pea te nau hoko ko e takanga pe taha, pea taha pe ʻa e tauhi.” Ko ia ai, ʻoku ʻaonga ʻa e taʻataʻa ʻo Sīsū naʻe lilingí ki he kulupu ʻe ua ʻo e kakaí​—ʻuluakí, ko e kau Kalisitiane ko ia ʻoku nau ʻamanaki ke pule fakataha mo Sīsū ʻi hēvaní pea ko hono uá, ko e faʻahinga ko ia ʻoku nau fakatuʻotuʻa atu ki he moʻui taʻengata  ʻi ha māmani palataisí. ʻOku hā mahino, ko e kulupu hono ua ko ʻení ʻoku fakatātaaʻi ʻe he “ngaahi meʻa manakoa” ʻo e kikite ʻa Hakeaí.​—Maika 4:​1, 2; 1 Sione 2:​1, 2.

12. ʻOku anga-fēfē hono tohoaki ʻa e “ngaahi meʻa manakoa” tokolahi ki he fale ʻo e ʻOtuá ʻi he ʻahó ni?

¹² Ko e “ngaahi meʻa manakoa” ko ʻení ʻoku nau kei fakafonu ʻa e fale ʻo Sihová. ʻI he ngaahi taʻu ki mui ní, kuo toʻo ai ʻa e ngaahi fakangatangata ʻi ʻIulope Hahaké, ngaahi konga ʻo ʻAfilika, pea mo e ngaahi fonua kehe, ʻo fakaʻatā ai ʻa e ongoongo lelei ʻo e Puleʻanga ʻo e ʻOtuá kuo fokotuʻú ke lakalakaimonū talu mei ai ʻo aʻu mai ki he ʻahó ni ʻi he ngaahi feituʻu naʻe ʻikai aʻu ki aí. ʻI he haʻu ʻa e faʻahinga manakoá ki he fokotuʻutuʻu temipale ʻa e ʻOtuá, ʻoku nau feinga leva ai ke ngaohi ha toe kau ākonga, ʻi he talangofua ki he fekau ʻa Sīsuú. (Mātiu 28:​19, 20) ʻI heʻenau fai peheé, ʻoku nau fetaulaki ai mo e faʻahinga tāutaha tokolahi, kei siʻi mo e taʻumotuʻa fakatouʻosi, ʻoku nau maʻu ʻa e malava ke hoko ko e “ngaahi meʻa manakoa” ʻa ia te nau fakalāngilangiʻi ʻa e fale ʻo Sihová. Fakakaukau ange ki ha ngaahi fakatātā pē ʻe niʻihi ʻo e anga ʻo e hoko ʻa e meʻá ni.

13. Naʻe anga-fēfē hono fakahāhaaʻi ʻe ha kiʻi taʻahine ʻi Polivia ʻa ʻene faivelenga ki hono fakamafola ʻa e pōpoaki ʻo e Puleʻangá?

¹³ ʻI Polivia, ko ha kiʻi taʻahine taʻu nima naʻe tauhi hake ʻe ha ongo mātuʻa Fakamoʻoni naʻá ne kole ki heʻene faiakó ha ngofua ke ne ʻatā ai mei he akó he lolotonga ʻa e uike ʻo e ʻaʻahi ʻa e ʻovasia fakafeituʻú. Ko e hā hono ʻuhingá? Naʻá ne fiemaʻu ke ne kau ʻi he ngāue fakafaifekaú he lolotonga ʻo e uike kakato makehe ko ʻeni ʻo e ngāué. Naʻe ʻohovale heni ʻa ʻene ongo mātuʻá, ka naʻá na fiefia ʻi heʻene maʻu ha fakakaukau lelei peheé. ʻOku fai he taimí ni ʻe he kiʻi taʻahiné ha ngaahi ako Tohitapu ʻe nima ʻi ʻapi, pea ko e niʻihi ʻo e kau ako ko ʻení ʻoku nau maʻu ʻa e ngaahi fakataha faka-Kalisitiané. Kuo aʻu ʻo ne ʻomai ʻa ʻene faiako ʻi he ʻapiakó ki he Fale Fakatahaʻangá. Mahalo ʻi he faai atu ʻa e taimí, ko e niʻihi ʻo ʻene kau ako Tohitapú te nau fakahaaʻi kinautolu ko e “ngaahi meʻa manakoa” ʻe fakalāngilangiʻi ai ʻa e fale ʻo Sihová.

14. ʻI Kōlea, naʻe anga-fēfē hono fakapaleʻi ʻa e kīvoi ʻa ha tuofefine ki ha tokotaha naʻe hā ngali taʻemahuʻingaʻia?

 ¹⁴ Lolotonga ʻa e talitali ʻi ha tauʻanga lēlue, naʻe fakaofi atu ai ha fefine Kalisitiane ʻi Kōlea ki ha tokotaha ako naʻá ne fanongo ki ha ngaahi fasi ʻi heʻene kiʻi ʻiafouní. “ʻOkú ke kau ki ha lotu?” ko ʻene ʻeké atu ia. “ʻOku ʻikai te u mahuʻingaʻia au ʻi ha lotu ʻe taha,” ko e tali mai ia ʻa e tokotaha akó. Naʻe ʻikai tuka ai ʻa e tuofefiné. “ʻI he faai atu ʻa e taimí,” ko ʻene hokó atu ia, “ʻe loto nai ha tokotaha ke ne fili ki ha lotu. Ka ʻo kapau ʻoku ʻikai haʻane ʻilo fekauʻaki mo e lotú, te ne fili nai ʻa e taha ʻoku halá.” Naʻe liliu ʻa e anga ʻo e fōtunga ʻo e tokotaha akó, pea kamata ke ne fanongo mahuʻingaʻia ki hotau tuofefiné. Naʻá ne ʻoange kiate ia ʻa e tohi Is There a Creator Who Cares About You? peá ne pehē ange ko e tohi ko ʻení ʻe tokoni lahi ʻi he taimi ʻe hoko mai ai kiate ia ke ne fili ki ha lotú. Naʻá ne tali loto-lelei ʻa e tohí. ʻI he uike hono hokó, naʻá ne kamata ai ke ne ako ʻa e Tohitapú mo e Kau Fakamoʻoni ʻa Sihová, pea ʻokú ne maʻu he taimí ni ʻa e kotoa ʻo e ngaahi fakataha ʻa e fakatahaʻangá.

15. ʻOku anga-fēfē hono kamata ʻe ha kiʻi taʻahine ʻi Siapani ha ngaahi ako Tohitapu, pea kuo anga-fēfē hono fakapaleʻi ʻa ʻene ngaahi feingá?

¹⁵ ʻI Siapani, ʻoku vakai ai ʻa Megumi taʻu 12 ki hono ʻapiakó ko ha malaʻe fua lelei ia ki he malangá mo e faiakó. Kuo aʻu ʻo ne malava ke kamata ha ngaahi ako Tohitapu lahi ai. ʻOku anga-fēfē hono fai ʻeni ʻe Megumi? Koeʻuhi ʻokú ne lau ʻa e Tohitapú pe teuteu ki he ngaahi fakatahá he lolotonga ʻa e mālōlō kai hoʻataá, ʻoku faʻa ʻeke ange ai ʻe hono kaungā kalasí pe ko e hā ʻokú ne faí. ʻOku ʻeke ʻe he niʻihi kia Megumi pe ko e hā ʻoku ʻikai te ne kau ai ʻi he ngaahi meʻa ʻe niʻihi ʻa e ʻapiakó. ʻOku tali ʻe Megumi ʻenau ngaahi fehuʻí mo tala ange kiate kinautolu ʻoku ʻi ai ha huafa ʻo e ʻOtuá. ʻOku faʻa langaʻi ʻe he meʻá ni ʻa e mahuʻingaʻia ʻa ʻene kau fanongó. ʻOkú ne tuʻuaki leva kiate kinautolu ha ako Tohitapu. ʻOku fai he taimí ni ʻe Megumi ha ngaahi ako ʻe 20​—ko e 18 ʻo kinautolu mo hono kaungā kalasí.

16. Naʻe anga-fēfē ʻa e malava ʻe ha tokoua ʻi Kameluni ke kamata ha ngaahi ako Tohitapu mo e niʻihi ʻi he lotolotonga ʻo ha kulupu ʻo e kau fakaʻalumá?

¹⁶ ʻI Kameluni, naʻe ui atu ai ha kulupu ko e kau tangata naʻa nau ngāue ʻi ha ngāueʻanga ki ha tokoua naʻá ne tuʻuaki tohi faka-Tohitapu ki he kau feʻaluʻakí. ʻI he loto ke lumaʻi ʻa e tokouá, naʻa nau ʻeke ange kiate ia pe ko e hā naʻe ʻikai te ne tui ai ki he Tolu-Tahaʻi-ʻOtuá, afi ʻo helí, pe ko e taʻefaʻamate ʻa e soulú. ʻI hono ngāueʻaki ʻa e Tohitapú, naʻe tali ai ʻe hotau tokouá ʻenau ngaahi fehuʻí. Ko hono olá, ko e toko tolu ʻo e kau tangatá naʻa nau tali ke fai ha ngaahi ako Tohitapu. Ko e taha ʻo kinautolu, ko Daniel, naʻe kamata ke ne maʻu ʻa e ngaahi fakatahá pea aʻu ʻo ne fakaʻauha ʻa e ngaahi meʻa kotoa naʻá ne maʻu ʻoku fekauʻaki mo e fakahaʻele faʻahikehé. (Fakahā 21:8) Siʻi hifo he taʻu ʻe taha, naʻá ne papitaiso.

17. Naʻe anga-fēfē hono ngāueʻaki ʻe ha fanga tokoua ʻe niʻihi ʻi ʻEli Salavatoa ʻa e pōtoʻí ke malanga ai ki ha tangata ʻa ia naʻe tomuʻa taʻeloto ia ke fanongo ki he pōpoaki ʻo e Puleʻangá?

¹⁷ ʻI ʻEli Salavatoa, naʻe haʻihaʻi ai ʻe ha tangata ʻa ʻene kulī fekaí ʻi muʻa ʻi he matapaá ʻi ha taimi pē naʻá ne sio ai ki he Kau Fakamoʻoni ʻa Sihová ʻoku nau ofi maí. Naʻe tatali ʻa e tangatá ke mavahe atu ʻa e Kau Fakamoʻoní, peá ne toki ʻomai leva ʻene kulií ki fale. Naʻe ʻikai ʻaupito ke malava ʻa e fanga tokouá ke lea ki he tangatá. Ko ia, ʻi he ʻaho ʻe taha naʻa nau fili ai ke ʻahiʻahi ha fakaofiofi kehe. ʻI hono ʻiloʻi naʻe malava ʻa e tangatá ke fanongo ki he meʻa naʻa nau leaʻakí, naʻa nau fili leva ke malanga ki he kulií. Naʻa nau haʻu ki he falé, ʻo fakalea ki he kulií, pea nau pehē he fiefia lahi ē ko kinautolu ʻi he faingamālie ke lea kiate iá. Naʻa nau talanoa ʻo fekauʻaki mo e taimi ʻe hoko mai ai ha palataisi ki he māmaní, ʻa ia ʻe ʻikai ai ha taha ʻe ʻita​—ʻio, ʻa e taimi naʻa mo e fanga manú te nau loto-melino. Pea nau leaʻaki leva ha lea nofo ā anga-fakaʻapaʻapa  ki he kulií pea hoko atu ʻenau fonongá. Naʻa nau ʻohovale lahi, ne hū mai ʻa e tangatá ki tuʻa mei hono falé pea kole fakamolemole ki he ʻikai ʻaupito ke ne ʻoange ki he Kau Fakamoʻoní ha faingamālie ke nau lea ange ai kiate iá. Naʻá ne tali ha ngaahi makasini, pea naʻe kamata ha ako Tohitapu. Ko e tangatá ni ko hotau tokoua ia he taimí ni​—ko e taha ia ʻo e “ngaahi meʻa manakoa”!

“ʻOua Te Mou Manavahe”

18. Ko e hā ʻa e ngaahi palopalema ʻoku fehangahangai mo e kau Kalisitiane tokolahi, ka ʻoku anga-fēfē ʻa e vakai mai ʻa Sihova ki heʻene kau lotú?

¹⁸ ʻOkú ke kau ki he ngāue mātuʻaki mahuʻinga ko e malangaʻi ʻo e Puleʻangá mo e ngaohi-ākongá? Kapau ʻoku pehē, ʻokú ke monūʻia moʻoni. Ko e moʻoni, ʻoku fakafou ʻi he ngāué ni ʻa hono tohoaki ʻe Sihova ʻa e “ngaahi meʻa manakoa” ki hono falé. (Sione 6:44) ʻOku moʻoni, ʻi he taimi ki he taimi ʻokú ke faʻa kiʻi helaʻia nai ai pe loto-siʻi. ʻI he taimi lahi, ko e niʻihi​—naʻa mo e ʻi he lotolotonga ʻo e kau sevāniti ʻa Sihová​—ʻoku nau fāinga mo e ngaahi ongoʻi ʻo e ʻikai hanau mahuʻingá. Kae ʻoua ʻe foʻi! ʻOku vakai mai ʻa Sihova ki he tokotaha taki taha ʻo ʻene kau lotú ʻoku manakoa, pea ʻokú ne mahuʻingaʻia loto-vēkeveke ke fakamoʻui koe.​—2 Pita 3:9.

19. Ko e hā ʻa e fakalototoʻa naʻe tokonaki mai ʻe Sihova ʻo fakafou mai ʻia Hakeaí, pea ʻoku malava fēfē ke hoko ʻa e ngaahi leá ni ko ha matavai ʻo e mālohi kiate kitautolu?

¹⁹ ʻI he taimi ʻoku tau ongoʻi loto-siʻi aí, tatau ai pē pe koeʻuhi ko e fakafepakí, pe ko ha ngaahi tuʻunga taʻefakafiemālie kehe, ko e ngaahi lea ʻa Sihova ki he kau Siu naʻe toe fokí ʻoku malava ke hoko ia ko ha matavai ʻo e mālohi. ʻI he Hakeai 2:​4-6, ʻoku tau lau ai: “Ka, ko eni, ke ke lototoʻa pe, siʻi Seluipepeli​—ko Sihova ia mei he Taʻehamai​—pea lototoʻa mo koe, siʻi Siosiua foha ʻo Siosateki, ʻa e taulaʻeiki lahi, pea mou lototoʻa kimoutolu, ʻa e kakai kotoa ʻo e fonua​—ko Sihova ia mei he Taʻehamai​—pea mou ngaue; he ʻoku ou ʻiate kimoutolu ʻe au​—ko Sihova Sapaoti ia mei he Taʻehamai. Ko e meʻa ki he lea ʻo ʻeku fuakava mo kimoutolu ʻi hoʻomou hu mai mei Isipite, ko ia mo hoku laumalie ʻoku kei tuʻu ʻi homou lotolotonga: ʻoua te mou manavahe. He ko e folofola eni ʻa Sihova Sapaoti: ʻOku toe tuʻo taha pe​—ko e taimi siʻi​—pea ʻe hoko ʻa ʻeku lulu ʻa e langi, mo mamani, ʻio ʻa e tahi, mo e momoa.” Fakatokangaʻi ʻoku ʻikai ngata pē ʻi he enginakiʻi kitautolu ʻe Sihova ke tau mālohí ka ʻokú ne toe tokonaki mai kiate kitautolu ʻa e ngaahi founga ke maʻu ai ʻa e mālohí. Anga-fēfē? Fakatokangaʻi ʻa e ngaahi lea fakapapauʻí: “ʻOku ou ʻiate kimoutolu ʻe au.” He fakatuimālohi ē ʻa hono ʻiloʻi ʻoku tatau ai pē pe ko e hā ha ngaahi faingataʻaʻiaʻanga ʻoku tau fehangahangai mo ia, ʻoku ʻiate kitautolu ʻa Sihova!​—Loma 8:31.

20. ʻI he founga fē ʻoku fakafonu ai he taimí ni ʻa e fale ʻo Sihová ʻaki ʻa e lāngilangi taʻefakatatauá?

²⁰ Kuo fakamoʻoniʻi papau ʻe Sihova ʻokú ne ʻi heʻene kakaí. Ko e moʻoni, ʻoku hangē tofu pē ko ia naʻá ne fakahā fakafou ʻi he palōfita ko Hakeaí: “ʻE lahi ange ʻa e lāngilangi ʻo e fale ko ʻeni ki muí ʻi he ʻuluakí . . . Pea ʻi he potú ni te u ʻatu ʻa e melino.” (Hakeai 2:​9, NW) ʻOku moʻoni, ko e lāngilangi lahi taha he ʻaho ní ʻoku maʻu ia ʻi he temipale fakalaumālie ʻo Sihová. He ko ē, ʻoku ʻaukolo ʻa e laui kilu ki he lotu moʻoní ʻi he taʻu taki taha. ʻOku fafangaʻi lelei fakalaumālie ʻa e faʻahingá ni, pea naʻa mo e ʻi he māmani maveuveu ko ʻení, ʻoku nau fiefia ʻi ha melino ʻa ia ʻe toki lakasi pē ʻe he melino ko ia ʻe hokosia ʻi he māmani foʻou ʻa e ʻOtuá.​—Aisea 9:​6, 7 (Isaia 9:​5, 6, PM); Luke 12:42.

21. Ko e hā ʻoku totonu ko ʻetau fakapapaú ia?

²¹ ʻOku tuʻu mai pē mei muʻa ʻa hono luluʻi ʻe Sihova ʻa e ngaahi puleʻangá ʻi ʻĀmaketoné. (Fakahā 16:​14, 16) Ko ia ai, tau ngāueʻaki ʻa e taimi ʻoku kei toé ke tokoni ke fakahaofi ha ngaahi moʻui lahi ange. ʻOfa ke tau hoko ʻo mālohi pea maʻu ʻa e falala kakato kia Sihova. ʻAi ko ʻetau fakapapaú ia ke hokohoko atu ʻa e lotu ʻi hono temipale lahi fakalaumālié, ʻo fakafonu ia ʻaki ʻa e “ngaahi meʻa manakoa” lahi ange kae ʻoua kuo toki folofola mai ʻa Sihova ko ʻetau ngāué kuo kakato.

[Fakamatala ʻi lalo]

ʻOkú Ke Manatuʻi?

• Ko e hā ʻoku mahuʻinga ange ia kia Sihova ʻi he ngaahi meʻa fakamatelié?

• ʻOku ʻaonga ʻa e taʻataʻa ʻo Sīsū naʻe lilingí ki he ongo kulupu fē ʻo e kakaí?

• Ko hai ʻa e “ngaahi meʻa manakoa” te nau fakafonu ʻa e fale ʻo Sihová ʻaki ʻa e lāngilangí?

• Ko e hā ʻa e fakamoʻoni ʻoku tau maʻu ʻoku lolotonga fakahoko he ʻahó ni ʻa e kikite ʻa Hakeaí?

[Fehuʻi ki he Ako]

[Taiakalami ʻi he peesi 16]

(Sio ki he tohí)

ʻOkú ke ʻilo ʻa e ʻuhinga fakaefakatātā ʻo e temipale ʻo Sihova ʻi he kuonga muʻá?

Potu Toputapu

Puipui

Potu Tapu

Hūʻanga

ʻŌlita

Loto-ʻā

[Fakatātā ʻi he peesi 17]

Naʻe foaki atu ʻe he taulaʻeiki lahí ha pulu tangata maʻá e ngaahi angahala ʻa e kau taulaʻeikí pea ko ha kosi maʻá e ngaahi angahala ʻa e ngaahi matakali ʻikai taulaʻeikí

[Fakatātā ʻi he peesi 18]

ʻOku tohoaki ʻe he ngāue fakamalanga ʻo e Puleʻangá ʻi māmani lahí ʻa e fuʻu kakai tokolahi ki he fale ʻo Sihová