Fakamamaʻo mei he Feituʻu Fakatuʻutāmakí!

KO E fatongia ia ʻo e kau saienisi moʻunga-afí ke fai hano ngaahi vakaiʻi ʻo fakafuofuaʻi ʻa e fakamoʻoní pea fakatokanga leva ʻo fekauʻaki mo ha ngaahi puna ka hoko mai ʻa e afí ʻi he moʻunga-afí. (ʻI he puna pē ʻa e afí ʻi Moʻunga Fugen, naʻe pau ki he kau polisí ke nau taʻofi ʻa e kakaí mei he feituʻu fakatuʻutāmakí.) ʻI he tuʻunga meimei tatau, ʻoku vakaiʻi ʻe he kau ako Tohitapú ʻa e fakaʻilonga ʻo e “fakaʻosiʻosi ʻo e ngaahi meʻa ʻoku tuʻu ní” pea fakatokanga ki he niʻihi kehé ʻo kau ki he fakatuʻutāmaki ʻoku maluʻaki maí.​—Mātiu 24:​3, NW.

ʻI he vahe tatau pē ʻo e Tohitapú ʻa ia ʻoku fakatokanga mai ai ʻo fekauʻaki mo ha fakatuʻutāmaki fakaemāmani lahi ʻoku tuʻunuku maí, ʻoku malava ke tau lau ai ʻa e fakamatala ko ʻeni ʻo e ngaahi meʻa ʻe tomuʻa hoko: “ʻE tuʻu ha kakai ki ha kakai, mo ha puleʻanga ki ha puleʻanga: pea ʻe ai ha ngāhi honge mo ha ngāhi mofuike ʻi he ngāhi potu kehekehe . . . . Pea ʻe tokolahi ha kau palofita loi ʻe tupu hake, pea te nau taki hē ha tokolahi. Pea ko e meʻa ʻi he ope ʻo e maumau lao, ʻe fakaaʻau ʻo momoko ʻa e ʻofa ʻa e tokolahi . . . . Pea ʻe ʻoua ke fanongonongo ki mamani katoa ʻa e ongoongolelei ko eni ʻo e puleʻanga, ke ai ha fakamatala ki he ngāhi kakai kotoa pe, pea toki hoko ʻa e ngataʻanga.”—Mātiu 24:​7-14.

ʻOku ʻikai fiemaʻu ia ke tau hoko ko ha kau fakatotolo ongoongo ke ʻilo ai ki he fakahoko lolotonga ʻo e kikite ko ʻení. Kuo tau hokosia ia, tautefito talu mei he 1914. Kuo mātā ʻe he senitulí ni ʻa e ongo tau ʻe ua ʻa e māmaní, ko ha ngaahi tau fakapuleʻanga lahi, ngaahi tau fakalotofonua, mo e ngaahi fepaki fakamatakali mo fakalotu. Kuo faingataʻaʻia ʻa e faʻahinga ʻo e tangatá ʻi he ngaahi nounou fakameʻatokoní ko e tupu mei he ngaahi tau peheé, ʻi he tānaki atu ki he ngaahi fakahonge tupu mei he ngaahi fakatamaki fakanatulá. Kuo folofua ʻa e ngaahi moʻui lahi ʻe he ngaahi mofuiké. Kuo tupu hake ʻa e ngaahi lotu mavahe fakaeouaú fakataha mo e kau taki fakaʻalongaua mo e kau muimui loto-māfana tōtuʻa. “ʻI he ope ʻa e maumau lao” kuo tafoki ai ʻa e kakaí mei hono fakahāhā ʻa e ʻofá, pea ʻikai ke kei ʻulungaangaʻaki ʻa e anga-fakakaungāʻapí.

Ko e ngāue fakamalanga ʻi māmani lahí, ko e toe tafaʻaki ia ʻe taha ʻo e fakaʻilongá, ʻoku lolotonga fakahoko papau ia. Kiʻi foki angé ki he takafi ʻo e makasini ko ʻení, pea te ke fakatokangaʻi ai ʻa e ngaahi lea “ʻOku Fanongonongo Ai ʻa e Puleʻanga ʻo  Sihová” ko ha konga ʻo e kaveingá. Ko e Taua Leʻo, ʻoku pulusi ʻi he ngaahi lea ʻe 132 pea ʻoku tufaki ʻo laka hake ʻi he 22 miliona, ko ha meʻangāue lahi ia maʻá e faʻahinga ko ia ʻoku nau fanongonongo ʻa e “ongoongolelei ko eni ʻo e puleʻanga” ki he kotoa ʻo e māmaní ʻoku nofoʻí. Ko e ongoongo lelei ko iá ʻoku kau ai ʻa e pōpoaki ʻo pehē ko e Tokotaha-Fakatupu ʻo e ʻunivēsí, ʻa Sihova ko e ʻOtuá, kuó ne fokotuʻu ʻa e Puleʻanga fakahēvani ʻa ia te ne fakaʻauha ʻa e ngaahi meʻa ʻo e fokotuʻutuʻu fulikivanú pea ʻomai ha palataisi ki he māmaní. Ko e moʻoni, ko e fakaʻilonga ko ia ʻe vavé ni ke ngāue mai ʻa e ʻOtuá ʻoku malava ke fakatokangaʻi ia he taimí ni, ʻo fakahaaʻi ai ko e moʻui ʻa e kakai ʻi he ngaahi meʻa ʻo e fokotuʻutuʻu ko ʻení ʻoku ʻi he tuʻunga fakatuʻutāmaki.​—Fakafehoanaki mo e 2 Timote 3:​1-5; 2 Pita 3:​3, 4; Fakahā 6:​1-8.

Ko e ʻAho Fakalilifu ʻo Sihová

Ko e hā ʻe hoko ʻi he aʻu tonu ki he taimi kia Sihova ke fakahoko ai ʻa ʻene fakamāú? Fanongo angé ki heʻene fakamatala maeʻeeʻa lelei ʻo fekauʻaki mo e meʻa leva ʻe hokó: “Te u ʻai ʻa e ngaahi meʻa fakaofo ʻi he langi pea ʻi mamani, ko e toto, mo e afi, mo e ngaahi pou kohu. ʻE liliu ʻa e laʻa ʻo poʻuli, mo e mahina ʻo toto, ʻi he tei hoko ʻa e ʻAho ʻo Sihova, ʻa e ʻaho lahi mo fakalilifu.”—Sioeli 2:​30, 31.

Ko e ʻaho ko iá, ʻa ē ʻoku fakailifia mo fakaʻauha lahi ange ia ʻi ha faʻahinga moʻunga-afi pē ʻoku puna ai ʻa e afí ʻi ha feituʻu pe ko ha mofuike, ʻoku tuʻunuku mai ia. ʻOku pehē ʻe he palōfita ko Sēfanaiá: “ʻOku ofi ʻa e ʻAho ʻo e ʻEiki, ʻa e ʻaho lahi, ʻoku ofi, ʻio, ʻoku matuʻaki fakalili . . . . kae keina ʻa e fonua kotoa ʻe he afi o ʻene fuaʻa: he te ne fai ha fakaʻosi; ʻaua, ko e fakaʻosi fakafokifa ʻo e nofo kotoa ʻa e fonua.” Neongo “naʻa mo ʻenau siliva, naʻa mo ʻenau koula, . . . ʻe ʻikai lava ia ke fakahaofi kinautolu ʻi he ʻaho ʻo e huhua ʻa e houhau ʻo Sihova,” ʻoku ʻi ai ha founga ke hao ai ʻi he ʻaho fakalilifu ko iá.—Sefanaia 1:​14-18.

ʻI hono fakahāhaaʻi ʻa e foungá, ʻoku pehē ʻe Sēfanaia: “Teʻeki ke aʻu hifo kiate kimoutolu ʻa e kakaha ʻo e tuputamaki ʻa Sihova, teʻeki ke aʻu kiate kimoutolu ʻa e ʻaho ʻo e houhau ʻa Sihova . . . . Vivili ki he faitotonu, mou vivili ki he angavaivai: heiʻilo ʻe fufū kimoutolu ʻi he ʻaho ʻo e houhau ʻa Sihova.” (Sefanaia 2:​2, 3) ʻOku lava ke tau maʻu ʻa e hūfangaʻanga ʻi he ‘vivili kia Sihová, vivili ki he faitotonú, mo e vivili ki he angavaivaí.’ Ko hai he ʻahó ni ʻoku vivili kia Sihová?

ʻOku pau pē ʻokú ke fakafekauʻaki ʻa e foʻi lea “Sihová” ki he Kau Fakamoʻoni ʻa Sihová koeʻuhi ko ʻenau ngāue fakamalangá. Mahalo kuó ke maʻu ʻa e makasini ko ʻení mei ha taha ʻo kinautolu. ʻOku nau ʻiloa ko e kau tangataʻifonua ʻulungaanga taau ʻa ia ʻoku taki ʻi he moʻui faitotonú. ʻOku nau feinga ke nau ʻai ʻa e “tangata foʻou,” ʻa ia ʻoku kau ai ʻa hono fakatupulekina ʻa e angavaivaí. (Kolose 3:​8-10) ʻOku nau tala moʻoni, ʻoku hoko ʻa e meʻá ni tupu mei hono akoʻi ʻe he kautaha hāmai ʻa Sihová, ʻi he kotoa ʻo e foʻi māmaní ʻa ia ʻoku fakafofongaʻi ʻe he ngaahi fakatahaʻanga fakalotofonua ʻa e Kau Fakamoʻoni ʻa Sihová. ʻIo, ʻe lava ke ke maʻu ʻa e hūfangaʻanga fakataha mo e ‘feohiʻanga fakakātoa ʻo e fanga tokouá’ ʻi he lotolotonga ʻo e Kau Fakamoʻoni ʻa Sihová ʻi māmani kātoa.​—1 Pita 5:​9, NW.

Maʻu ʻa e Hūfangaʻanga he Taimí Ni

Ke maʻu ʻa e hūfangaʻanga ʻi he vivili kia Sihová, kuo pau ke tau hoko ko hono ngaahi kaumeʻa. Ko e hā ʻoku kau ki aí? ʻOku tali mai ʻe he Tohitapú: “ʻIkai ʻoku mou ʻilo, ko e takaua [“kaumeʻa,” NW] mo mamani ko e fakafili ia ki he ʻOtua? ko ia ʻilonga ʻa ia ʻoku loto ke takaua mo mamani ʻoku ne nofo ai ko e fili ʻo e ʻOtua.” (Semisi 4:4) Ke hoko ko e ngaahi kaumeʻa ʻo e ʻOtuá, kuo pau ke tau liʻaki atu meiate kitautolu ha faʻahinga pīkinga fakaeongo pē ki he māmani fulikivanu lolotongá, ʻoku tōʻongaʻaki ai ha fakakaukau angatuʻu ki he ʻOtuá.

ʻOku enginaki mai ʻa e Tohitapú kiate kitautolu: “ʻOua te mou ʻofa ki mamani, ʻumaʻā ʻa e ngaahi meʻa ʻoku ʻi he mamani. Ka ʻofa ʻe ha taha ki mamani ʻoku ʻikai ʻiate ia ʻa e ʻofa ki he Tamai. He ko e meʻa katoa ʻoku ʻi mamani, ʻa e holi ʻo e kakano, mo e holi ʻo e mata, mo e ʻafungi ʻo e moʻui, ʻoku ʻikai mei he Tamai ia, ka ʻoku mei mamani. Pea ʻoku fakaʻaʻau ke mole ʻa mamani mo ʻene holi aʻana: ka ko ia ʻoku ne fai ʻa e finangalo ʻo e ʻOtua, ʻoku ne nofo maʻu ʻo taʻengata.” (1 Sione 2:​15-17) Ko e tokolahi taha ʻo e kakaí ʻi he ʻahó ni ʻoku ueʻi ʻe he ngaahi holi fakakakanó​—ko e holi taʻemapuleʻi fakaefehokotaki fakasinó, tuli mānumanu ki he paʻangá, mo e ngāuekoviʻaki ʻo e mafaí. Ka ke ʻi he tafaʻaki ʻa Sihová, kuo pau ke te ikuʻi ʻa e ngaahi holi peheé.—Kolose 3:​5-8.

Mahalo pē kuó ke lau ʻa e pepá ni ʻi he taimi ki he taimi, pea ʻokú ke loto-tatau nai ki heʻene ngāueʻaki ʻa e ngaahi kikite ʻa e Tohitapú. Ka, ʻokú ke toumoua nai ke toe laka atu ʻo feohi mo e Kau Fakamoʻoni ʻa Sihová. Kae kehe, kapau ʻoku tau fehangahangai mo ha fakatamaki, ʻoku feʻunga pē ʻa e fanongo  ʻataʻatā pē ki he fakatokangá? Hangē ko ia ʻoku lava ke tau ʻilo mei he puna ʻa e afí ʻi Moʻunga Fugen, ʻoku fiemaʻu ke tau ngāue ki he fakatokangá. Manatuʻi, naʻe ʻikai toe siʻi hifo ʻi he kau faiongoongo mo e kau faitā ʻe toko 15 ne mole ʻenau moʻuí ʻi heʻenau nōfoʻi ai ke maʻu vave ha fakamatalá. Ko hono moʻoní, naʻe mate ʻa e tokotaha faitā ʻe taha ʻoku lolotonga ʻi he meʻa kamosi pē ʻo ʻene meʻafaitaá ʻa hono foʻi tuhú. Ko ha tokotaha saienisi moʻunga-afi ʻe taha—ʻa ia naʻá ne fakamatala, “Kapau ʻe ʻi ai ha ʻaho kuo pau ke u mate ai, ʻoku ou loto ke hoko ia ʻi he tafaʻaki ʻo ha moʻunga-afi”—naʻe mole ʻene moʻuí ʻo hangē pē ko ia naʻá ne fakaʻamuá. Naʻa nau tūkuingata kotoa ki heʻenau ngāué mo ʻenau ngaahi tulitāupaú. Kae kehe, naʻe mole ʻenau moʻuí—ko e totongi ʻo hono tukunoaʻi ʻa e fakatokangá.

ʻOku fanongo ʻa e tokolahi ʻi he ʻahó ni ki he pōpoaki fekauʻaki mo e fili ʻa e ʻOtuá ke fakaʻauha ʻa e ngaahi meʻa ʻo e fokotuʻutuʻu fulikivanu ko ʻení, pea ʻoku nau lāuʻilo ʻo aʻu ki ha tuʻunga, ki he mātuʻaki mahuʻinga ʻo e fakatokangá. ‘ʻE faai atu pē ʻo hoko mai ia,’ ko ʻenau fakaʻuhingá nai ia, ‘ka heʻikai ʻi he ʻahó ni.’ ʻOku nau toloi fakafeʻungmālie ʻa e ʻaho ʻo Sihová ki ha taimi ʻamui koeʻuhi ke ʻoua nai naʻa fakahohaʻasi kinautolu mei he meʻa ʻoku hā ngali mahuʻinga ange ki honau matá ʻi he mōmeniti ko ení.

Naʻe maʻu ʻe Paluki ha palopalema pehē. ʻI he hoko ko e sekelitali ki he palōfita ʻi he kuonga muʻá ko Selemaiá, naʻe fakatokanga loto-toʻa ai ʻa Paluki ki he kau ʻIsilelí ʻo fekauʻaki mo ha fakaʻauha naʻe maluʻaki mai ki Selusalema. Ka, ʻi he taimi ʻe taha, naʻá ne fiu ai ʻi he fekau naʻe ʻoange kiate iá. ʻI he meʻa ko iá, naʻe fakatonutonu ai ia ʻe Sihova: “ʻOku ke kumi koā maʻau ha ngaahi meʻa lalahi? ʻOua ʻe kumi.” Ke hoko ʻo koloaʻia, tuʻu-ki-muʻa, pe malu fakamatelie, naʻe ʻikai fiemaʻu ia kia Paluki ke ne ‘kumi ki ha ngaahi meʻa lalahi.’ Naʻe fiemaʻu ia ke ne mahuʻingaʻia ʻi he meʻa ʻe taha, ko hono fai ʻa e finangalo ʻo e ʻOtuá ke tokoni ki he kakaí ke nau tuʻu ʻi Heʻene tafaʻakí. Ko hono olá, te ne maʻu ai ‘ʻene moʻuí ko hano vete.’ (Selemaia 45:​1-5) Ko ia ai, ʻi he ʻikai ke ‘kumi ki ha ngaahi meʻa lalahi maʻatautolú,’ ʻoku totonu ke tau kumi kia Sihova, ʻa ia ʻoku malava ke taki atu ia ki hono fakahaofi ʻo ʻetau moʻuí tonu.

ʻI Moʻunga Fugen, naʻe laka hake he toko 12 ʻa e kau polisi mo e kau tāmate-afi ngāue pole naʻa nau ngāue ʻi he taimi naʻe tafe mai ai kiate kinautolu ʻa e vela lahi ʻa e moʻunga-afí. Naʻa nau feinga ke tokoniʻi mo maluʻi ʻa e kakai naʻe hoko ki ai ʻa e fakatuʻutāmakí. Naʻa nau hangē ko e kau tangata mo e kau fefine taumuʻa-lelei ʻa ia ʻoku nau kau ʻi hono ʻai ke lelei ange ʻa e māmani ko ʻení. Neongo ʻa e māʻolunga nai ʻa ʻenau ngaahi taumuʻá, “ko e meʻa ʻoku piko ʻoku ʻikai lava hano fakatotonu.” (Koheleti 1:15 [Tagata Malaga, PM]) Ko e ngaahi meʻa ʻo e fokotuʻutuʻu pikopikó heʻikai malava ke fakahangatonu. ʻOku ʻuhinga lelei ke te ʻai kita ‘ko ha kaumeʻa ʻo e māmaní’ ʻaki ʻa e feinga ke fakahaofi ha fokotuʻutuʻu fakaemāmani lahi ʻa ia ʻoku fakapapauʻi ʻe he ʻOtuá ke toʻo atu?

Ko Hoʻo Holá Pē, Nofo Mamaʻo Ai Pē

Ko e meʻa ia ʻe taha ʻa e hola mei he fokotuʻutuʻu fakatuʻutāmakí, ka ko e toe meʻa kehe ia ʻa e nofo maʻu ʻi he tokanga malu ʻa e “feohiʻanga fakakātoa ʻo e fanga tokouá.” (1 Pita 2:​17, NW) ʻOua naʻa ngalo ʻiate kitautolu ʻa e kau ngoue ko ia ʻa ia, hili ʻenau fetukutukú, naʻa nau toe foki mai ke vakaiʻi ʻenau ngaahi ngoue ofi ʻi Moʻunga Fugen. Mahalo pē naʻa nau hohaʻa ke nau toe foki ki he moʻui “anga-maheni” naʻa nau anga aí. Ka ʻokú ke ʻiloʻi ko ʻenau fili ke toe fokí naʻe taʻefakapotopoto. Mahalo naʻe ʻikai ko ʻenau fuofua feinga ia ke kolosi ai ʻi he ngataʻangá. Mahalo naʻa nau manga ki he feituʻu fakatuʻutāmakí ʻi ha kiʻi taimi siʻi pē pea naʻe ʻikai ha meʻa ia ʻe hoko. Ko e taimi hono hokó, naʻe lava nai ke nau nofo ai ʻo kiʻi fuoloa ange, pea kei ʻikai pē ke hoko ha meʻa ia. ʻOku ngalingali, naʻe vave ʻenau hoko ʻo anga ki he kolosi he laine maluʻí pea nau loto-lahi ai ke nofo hifo ʻi he feituʻu fakatuʻutāmakí.

Naʻe lave ʻa Sīsū Kalaisi ki ha tuʻunga meimei tatau ʻe hoko he lolotonga “ʻa e fakaʻosiʻosi ʻa e ngaahi meʻa ʻoku tuʻu ní.” Naʻá ne pehē: “He hange naʻe nofo ʻa e kakai ʻi he kuonga ʻo e Lomaki, ʻo nau kai mo inu, ʻo nau maʻu uaifi mo maʻu husepaniti, ʻo aʻu ki he ʻaho ko ia naʻe hu ai ʻa Noa ki he aake; pea naʻe ʻikai te nau ʻaloʻiloa kaeʻoua ke hoko mai ʻa e Lomaki, ʻo ʻave kinautolu fulipe: ʻe pehe foki ʻa e hoko mai ʻa e Fanautama ʻa Tangata.”—Mātiu 24:​3, 38, 39.

Fakatokangaʻi naʻe lave ʻa Sīsū ki he kai, inu, mo e mali. ʻOku ʻikai ha taha ia ʻo e ngaahi meʻa ko iá ʻe hala ʻiate kinautolu ʻi he vakai ʻa Sihová. Ko e hā leva naʻe halá? Ko e kakai ʻo e ʻaho ʻo Noá “naʻe ʻikai te nau ʻaloʻiloa,” ʻi hono taki atu ha moʻui naʻe fakatefito takatakai pē ʻi heʻenau founga tuʻumaʻú. ʻI ha taimi ʻo e fakatuʻutāmakí, ʻoku ʻikai lava ha taha ai ke moʻuiʻaki ha moʻui “anga-maheni.” ʻI hoʻo holá pē, pe fakamavaheʻi koe mei he māmani lolotonga ʻoku tuʻunuku ke ʻauhá, kuo pau ke ke tauʻi ha  faʻahinga fakaʻaiʻai pē ke toe foki ʻo fakaʻaongaʻi ha faʻahinga meʻa pē ʻe lava ke maʻu mei ai. (1 Kolinito 7:31) Te ke lava nai ke ʻalu atu mei he feituʻu malu fakalaumālié pea toe foki taʻeuesia mai ʻo ʻikai fakatokangaʻi ia ʻe taha. Kae kehe, ʻe hanga nai ʻe he meʻa ko iá ʻo fakalotolahiʻi koe mo taki atu ki hoʻo toe foki ki he māmaní, ʻo nofo hifo ai ʻo kiʻi fuoloa ange. Tuai e kemo kuo malava ke tupulaki ʻa e fakakaukau: “Heʻikai hoko mai ʻa e ngataʻangá ia he ʻahó ni.”

Pehē foki, fakakaukau atu ki he kau fakaʻuli ʻe toko tolu naʻe mole ʻenau moʻuí ʻi heʻenau tatali ki he kau faiongoongó mo e kau faitaá ʻi he taimi naʻe tafe takai hifo ai ʻa e vela ʻa e moʻunga-afí. ʻOku ʻi ai ha niʻihi ʻi he ʻahó ni ʻoku nau ō fakataha nai mo e faʻahinga kehe ko ia kuo nau fakatoʻotoʻa ke toe foki ki he māmaní. Pe ko e hā pē ʻa e ʻuhingá, ʻoku hā mahino ko e hoko ʻo tākiekina ke toe foki ki he feituʻu fakatuʻutāmakí ʻoku ʻikai ʻaonga ia ki he faingataʻá.

Ko e kotoa ʻo e kau maʻukovia ʻi he puna ʻa e afí ʻi Moʻunga Fugen naʻa nau kolosi ʻi he laine malú pea hū ki he feituʻu fakatuʻutāmakí. Neongo naʻa nau ʻamanekina ʻe ʻi ai ʻa e ʻaho ʻe puna ai ʻa e afi ʻi he moʻungá, naʻe ʻikai ha taha ʻe fakakaukau ʻe hoko ia ʻi he ʻaho ko iá. ʻI hono vakaiʻi ʻa e fakaʻilonga ʻo e fakaʻosiʻosi ʻo e ngaahi meʻa ʻoku tuʻu ní, ʻoku ʻamanekina ʻe he tokolahi ʻa e ʻaho ʻo Sihová ʻe hoko mai ʻi ha taimi ka ʻoku hangehangē ʻoku ʻikai vavé ni maí. ʻOku aʻu ʻo fakakaukau ʻa e niʻihi ʻe ʻikai ʻaupito pē lava ke hoko mai ʻa e ʻaho ko iá ʻi he “ʻahó ni.” Ko e moʻoni ʻoku fakatuʻutāmaki ʻa e faʻahinga fakakaukau peheé.

“ʻE hoko mai pe ʻa e ʻaho ʻo e ʻEiki [“Sihová,” NW] ʻo hange ha kaihaʻa,” ko e fakatokanga mai ia ʻa e ʻapositolo ko Pitá. ʻOku fiemaʻu ke tau tokanga, ʻo “nofoʻaki tali ki he hoko mai ʻa e ʻaho ʻo e ʻOtua mo . . . fakatoʻotoʻo mai ia,” ʻo fai ʻetau ‘fai feinga ke ʻiloa kitautolu kuo tau lelei, kuo tau taʻe ha ʻila, pea taʻe ha mele ʻi heʻene vakai ʻaʻaná.’ (2 Pita 3:​10-14) ʻI he hili hono fakaʻauha ʻa e ngaahi meʻa ʻo e fokotuʻutuʻu fulikivanu lolotongá, ʻoku fakatatali mai ha māmani palataisi ʻi he malumalu ʻo e Puleʻanga ʻo e ʻOtuá. ʻOfa ke ʻoua ʻaupito naʻa fakataueleʻi kitautolu ke hū ki he feituʻu fakatuʻutāmakí ʻo tatau ai pē pe ko e hā ha faʻahinga ʻuhinga ʻe ʻohake nai ʻe heʻetau fakakaukaú, koeʻuhi ko e ʻaho te tau kolosi ai ʻi he lainé ʻo foki ki he māmaní ʻe lava ke hoko ia ko e ʻaho ʻo Sihová.

Maʻu ʻa e hūfangaʻanga fakataha mo e kakai ʻa Sihová pea nofo fakataha mo kinautolu.

[Fakatātā ʻi he peesi 4

Maʻu ʻa e hūfangaʻanga fakataha mo e kakai ʻa Sihová pea nofo fakataha mo kinautolu.

[Maʻuʻanga ʻo e Tā ʻi he peesi 4]

Iwasa/Sipa Press