Līpooti ʻa e Kau Fanongonongo ʻo e Puleʻangá

Naʻe Fakapaleʻi ʻEnau Tuí

KO E ʻapositolo ko Paulá ko ha tangata ʻo e tui tuʻu-ki-muʻa, pea naʻá ne fakaʻaiʻai ʻa e kaungātuí ke pehē ʻenau fakatupulekina ʻa e tuí. Naʻá ne pehē: “Ko ia ʻoku ʻunuʻunu ki he ʻOtua, kuo pau ʻoku ne tui ʻoku ʻi ai ia, pea te ne hanga ʻo totongi kiate kinautolu ʻoku kumi hākili kiate ia.” (Hepelu 11:6) ʻOku fakahaaʻi ʻe he ngaahi meʻa naʻe hokosia hoko hake mei Mosemipīkí ʻa e founga ʻoku fakapaleʻi ai ʻe Sihova ʻa e tui mālohí mo tali ʻa e ngaahi lotu loto-vēkeveké.

• Ko ha tuofefine uitou mei he feituʻu fakatokelau ʻo Niassa naʻá ne hohaʻa fekauʻaki mo e founga te ne maʻu ai mo ʻene fānau ʻe toko onó ʻa e Fakataha-Lahi Fakavahe “Founga ʻa e ʻOtuá ki he Moʻuí.” Ko ʻene maʻuʻanga paʻangá pē ko ʻene fakatau atu ʻene ngaahi koloá ʻi ha māketi fakalotofonua, ka ʻi he taimi naʻe ofi mai ai ʻa e fakataha-lahí, naʻá ne maʻu ʻa e paʻanga feʻunga ki he totongi lēlue pē ʻo e ʻalu atú kiate ia pea mo hono fāmilí. Ka neongo ia, naʻá ne fakapapauʻi ke tuku ʻene falalá ki he ngaahi tokonaki ʻa Sihová pea naʻá ne hokohoko atu ʻene ngaahi palani ke ʻi he fakataha-lahí.

Naʻá ne heka ki he lēlué mo ʻene fānau ʻe toko onó. ʻI he lolotonga ʻa e fonongá naʻe fakalea atu ʻa e tokotaha talitotongí kiate ia ki heʻene tikité. ʻI hono fakatokangaʻi hono kaati fakaʻilongá, naʻá ne ʻeke ange pe ko e faʻahinga kaati fakaʻilonga hā ʻokú ne tuí. Naʻe tala ange ʻe he tuofefiné kiate ia ko hono fakaʻilongaʻi ia ko e taha ʻo e kau fakafofonga ʻo e fakataha-lahi fakavahe ʻa e Kau Fakamoʻoni ʻa Sihová. “ʻE fai ʻa e fakataha-lahi ko ʻení ʻi fē?” ko e ʻeke ange ia ʻe he tokotaha talitotongí. ʻI he hili ʻa hono ʻiloʻi ko e fakataha-lahí ʻe ʻi he feituʻu kaungāʻapi ʻo Nampula, ko e kilomita nai ʻe 300 hono mamaʻó, naʻe taʻeʻamanekina ʻa ʻene totongi vaeua pē ʻa e totongi tikite anga-mahení! Naʻá ne ʻoange leva kiate ia pea mo hono fāmilí ʻa e ngaahi tikite foki ki he vaeua ʻe taha kehe ʻo ʻene paʻanga totongí. Ko ha fiefia ē ka ko ia ʻi heʻene tuku ʻene falalá ʻia Sihová!—Sāme 121:​1, 2.

• ʻI he taʻu nai ʻe 25, ko ha fefine mātuʻaki lotu naʻá ne lotu ki he ʻOtuá ke fakahaaʻi ange kiate ia ʻa e founga totonu ke lotu ange ai kiate iá. Ko e siasi naʻá ne kau ki aí naʻa nau fakatahaʻi ʻa e ngaahi kātoanga fakalotú mo e ngaahi ouau talatukufakaholó, pea naʻá ne veiveiua ʻi he pehē naʻe fakahōifua ʻa e founga lotu ko ʻení ki he ʻOtuá.

Naʻá ne pehē: “Naʻá ku manatuʻi maʻu pē ʻa e ngaahi lea ʻa Sīsū ʻoku hiki ʻi he Mātiu 7:7: ‘Kole, pea ʻe foaki kiate kimoutolu: kumi, pea te mou ʻilo: tukituki, pea ʻe toʻo kiate kimoutolu.’ ʻI heʻeku fakakaukau ki he konga Tohitapu ko ʻení, naʻá ku lotu maʻu pē ki he ʻOtuá ke ne tataki au ki he moʻoní. ʻI he ʻaho ʻe taha ko e faifekau ʻi homau siasí naʻá ne kole ange ki he tokotaha kotoa pē ʻoku ngāue ʻi he māketi fakalotofonuá ke ʻoange kiate ia ha paʻanga lahi pau fakataha mo ha niʻihi ʻo ʻenau ngaahi koloá koeʻuhí ka ne malava ʻo foaki ha tāpuaki maʻanautolu. Naʻá ku fakakaukau ki he kole ko ʻení ʻoku taʻefakatohitapu, ko ia naʻe ʻikai ai te u ʻomai ha meʻa. ʻI he taimi naʻe sio mai ai ʻa e faifekaú naʻe ʻikai te u ʻoange ha ‘meʻaʻofá,’ naʻá ne kamata ke ngāhiʻi au ʻi he ʻao ʻo e kau mēmipa kotoa ʻo e siasí. ʻI he ʻaho ko iá naʻá ku ʻiloʻi ai naʻe ʻikai ko e founga ʻeni ʻoku fiemaʻu ʻe he ʻOtuá ke fai ange ʻaki ʻa e lotú, ko ia naʻá ku liʻaki ʻa e siasí. Lolotonga iá, naʻá ku hanganaki kītaki ʻi he lotú ke u ʻiloʻi ʻa e moʻoní.

“Faifai atu pē, naʻá ku loto-toʻa peá u fetuʻutaki ki ha kāinga ʻa ia ko e taha ʻo e Kau Fakamoʻoni ʻa Sihová. Naʻá ne tuʻuaki mai kiate au ha tuleki, pea ʻi heʻeku lau iá naʻá ku fakatokangaʻi leva naʻe tali ʻe he ʻOtuá ʻeku ngaahi lotú. ʻI he faai mai ʻa e taimí, naʻe toe kamata mo hoku kaumeʻá ke ne houngaʻia ʻi he ngaahi moʻoni ʻo e Tohitapú, pea naʻá ma lēsisita ʻema nofo malí. Kae kehe, ki mui mai, naʻe puke lahi hoku husepānití. Ka ʻi he faai mai ʻo aʻu ki heʻene maté, naʻá ne fakaʻaiʻai au ke u kītaki atu ʻi he founga ʻo e moʻoní koeʻuhí ke ma toe feʻiloaki ʻi he Palataisí.

“ʻOku ou fakamālō maʻu pē kia Sihova ʻi heʻene tali ʻeku ngaahi lotú pea fakahaaʻi mai kiate au ʻa e founga totonu ke lotu ai kiate iá. Kuo toe tali foki ʻeku ngaahi lotú ʻi heʻeku sio ki he kotoa ʻo e toko valu ʻo ʻeku fānaú ʻoku nau hoko ko e kau sevāniti fakatapui ʻa Sihova.”