Ngaahi Fehuʻi mei he Kau Lautohí

ʻI he Loma 12:​19, naʻe fakahaaʻi ai ʻe he ʻapositolo ko Paulá ʻo pehē ʻoku ʻikai totonu ke ʻita ʻa e kau Kalisitiané ʻi heʻene pehē: “Siʻoku ʻofaʻanga, ʻoua te mou sauni hoʻomou ngaahi meʻa, kae tuku ia ki he houhau”?

Ke lea hangatonu, ʻoku ʻikai. Naʻe lave heni ʻa e ʻapositolo ia ko Paulá ki he houhau ʻa e ʻOtuá. Ko hono moʻoní, ʻoku ʻikai pehē ia heni ʻoku ʻikai ko ha fuʻu lokomeʻa ia kapau ʻe tō ʻa e kau Kalisitiané ʻo ʻita. ʻOku akonaki mahino mai ʻa e Tohitapú kiate kitautolu ʻo fekauʻaki mo e hoko ʻo ʻitá. Fakakaukau atu angé ki ha sīpinga ʻo e akonaki fakaʻotuá.

“Tukuage ae ita, bea liaki ae lili: oua naa ke fakamamahiʻi foki koe i ha mea ke fai kovi.” (Sāme 37:​8, PM) “ʻIlonga ʻa ia te ne ʻita ki hono kainga, ʻe fakamāumateaʻi he fakamauʻanga fakakolo.” (Mātiu 5:22) “ʻOku matuʻaki eʻa ʻa e ngaahi ngaue ʻa Kakano, ʻo pehe, Ko e feʻauaki, ko e angaʻuli, ko e pauʻu, ko e tauhi-aitoli, ko e fai tuki, ko e fetāufehiʻaʻaki, ko e fetuʻusi, ko e meheka, ko e feʻiteʻitani.” (Kaletia 5:​19, 20) “Ko e fakamahū kotoa pe mo e lili mo e ʻita mo e feʻiohoʻaki mo e lauʻikovi, tuku ke hiki ia meiate kimoutolu.” (Efeso 4:31) “Ke vave ʻa e tangata fuape he fanongo, kae fakatotoka ki he lea, pea fakatotoka ki he ʻita.” (Semisi 1:19) ʻIkai ko ia pē, ko e tohi ʻa Palovepí ʻoku toutou akonaki mai ai kiate kitautolu ʻo taʻofi ʻa e fakaʻatā ke hoko ʻo ʻitá pe hoko ʻo hehema ke ʻita ʻi he fanga kiʻi meʻa fakalotomamahi īkí mo e ngaahi fehālaaki fakaetangatá.—Palovepi 12:16; 14:​17, 29; 15:1; 16:32; 17:14; 19:​11, 19; 22:24; 25:28; 29:22 (Lea Fakatātā, PM).

Ko e potutohi ʻo e Loma 12:19 ʻoku fehoanaki ia mo e akonaki peheé. Naʻe fakahinohino mai ai ʻe Paula ko ʻetau ʻofá ke ʻoua ʻe mālualoi, ke tau tāpuakiʻi ʻa e faʻahinga ʻoku nau fakatangaʻi kitautolú, ke tau feinga ke fakakaukau lelei fekauʻaki mo e niʻihi kehé, ke ʻoua naʻa tau fetongiʻaki ʻa e kovi e kovi, pea ke tau feinga ke melino mo e faʻahinga kotoa. Naʻá ne naʻinaʻi mai leva: “Siʻoku ʻofaʻanga, ʻoua te mou sauni hoʻomou ngaahi meʻa, kae tuku ia ki he Houhau: he kuo tohi, ʻOku aʻaku ʻa e sauni; ko au te u ʻatu hono tuha—ko e folofola e ʻa e ʻEiki.”—Loma 12:​9, 14, 16-19.

ʻIo, ʻoku totonu ke ʻoua te tau fakaʻatā ʻa e ʻitá ke ne ueʻi kitautolu ke tau totongi ʻaki ʻa e ngaahi ngāue ʻo e faisāuní. Ko ʻetau ʻilo ki he ngaahi tuʻungá pea mo ʻetau ongoʻi ʻa e fakamaau totonú ʻoku taʻehaohaoa. Kapau te tau fakaʻatā ʻa e ʻitá ke ne ueʻi kitautolu ki he ngaahi ngāue ʻo e faisāuní, te tau faʻa faihala ai. ʻE fakahoko ai ʻa e ngaahi taumuʻa ia ʻa e Fili ʻo e ʻOtuá, ʻa e Tēvoló. Naʻe tohi ʻe Paula: “ʻIta pe, kae ʻoua ʻe angahala ai: ʻoua ʻe tuku ke to ʻa e laʻa ʻoku mou kei mamahi; kaeʻumaʻā, ʻoua naʻa tuku ha ava ki he Tevolo.”—Efeso 4:​26, 27.

Ko e ʻalunga lelei angé, ʻa e ʻalunga fakapotopoto angé, ko hono tuku ki he ʻOtuá ke ne fakapapauʻi ʻa e taimi pea mo e faʻahinga ke fai ki ai ʻa e sāuní. ʻOku malava ke ne fai ia ʻaki ʻa e ʻafioʻi kakato ʻo e ngaahi moʻoniʻi meʻá, pea ʻilonga ha ʻoatu tuha te ne fai, ʻe tapua mei ai ʻa ʻene fakamaau totonu haohaoá. ʻOku malava ke tau ʻilo ko e poini ia ʻa Paula ʻi he Loma 12:19 ʻi heʻetau fakatokangaʻi ʻa ʻene lave ki he Teutalonome 32:​35, 41, ʻa ia ʻoku kau ai ʻa e ngaahi leá ni: “ʻOku aʻaku ʻa e sauni, mo e ʻatu hono tuha.” (Fakafehoanaki mo Hepelu 10:30.) Ko ia, neongo ko e ongo foʻi lea ko e “ʻa e ʻOtua” ʻoku ʻikai maʻu ia ʻi he konga tohi faka-Kalisí, kuo hanga ʻe ha kau liliu lea ʻi onopooni ʻo fakahū kinaua ʻi he Loma 12:19. ʻOku taki atu ai ʻa e meʻá ni ki he ngaahi fakalea ʻo pehē “tuku ki he ʻOtuá ke ne fai ʻa e sāuní” (The Contemporary English Version); “tuku atu ia ki he houhau ʻa e ʻOtuá” (American Standard Version); “tuku ki he ʻOtuá ke ne tautea kapau te ne fai ia” (The New Testament in Modern English); “tuku atu ia ki he ʻatu tuha fakaʻotuá.”— The New English Bible.

Naʻa mo e taimi ʻoku leakoviʻi ai mo fakatangaʻi ʻe he ngaahi fili ʻo e moʻoní, ʻoku malava ke tau fakahāhaaʻi ʻa e falala ki he fakamatala fekauʻaki mo Sihova ko e ʻOtuá naʻe fanongo ki ai ʻa Mōsesé: “Ko Sihova, ʻa Sihova ʻOtua, ʻAloʻofa mo Anga lelei, Tuai ki he Houhau, pea Fonu ʻi he Kelesi mo e Moʻoni; ʻOku taʻofi mesi maʻa e ngaahi toko afe, ʻOku ne fakamolemole ʻa e kovi mo e talangataʻa mo e angahala, ka ʻe ʻikai ʻaupito te ne fakaʻatā ʻa e halaia.”—Ekisoto 34:​6, 7, fakaʻītali ʻamautolu.