ʻOkú Ke Manatuʻi?

Kuó ke houngaʻia ʻi hono lau ʻa e ngaahi ʻīsiu fakamuimui ʻo e Taua Leʻo? Sai, sio angé pe ʻe lava ke ke tali ʻa e ngaahi fehuʻi hoko haké:

• Ko e hā naʻá ne fakafaingofuaʻi ʻa hono ohi ʻo e Kilisimasí ʻi Kōleá?

Naʻe ʻi ai ha tui motuʻa ʻi Kōlea pea ʻi he ngaahi fonua kehe ʻe niʻihi ʻo fekauʻaki mo ha ʻotua ʻo e peitó ʻa ia naʻe pehē naʻá ne haʻu ʻo fou mai ʻi he siminií ʻo ʻomai ʻa e ngaahi meʻaʻofa ʻi Tīsema. Pehē foki, ʻi he hili ʻa e Tau II ʻa Māmaní, naʻe tufa ai ʻe he kau sōtia ʻAmeliká ʻa e ngaahi meʻaʻofa mo e tokoni ʻi he ngaahi siasi fakalotofonuá.​—12/15, peesi 4, 5.

• ʻI hono fakahoko ʻo e Aisea 21:​8, ko e hā ʻa e “tangata-leʻo” kuo maʻu ʻe he ʻOtuá ʻi hotau taimí?

Ko e kau Kalisitiane pani ʻe he laumālié, ʻoku nau ngāue ko ha kalasi tangata-leʻó, kuo nau fakaʻāki ʻa e kakaí ki he ʻuhinga ʻo e ngaahi meʻa ʻi he māmaní ʻa ia ʻoku fakahoko ai ʻa e kikite ʻi he Tohitapú. Kuo nau toe tokoniʻi ʻa e kau ako Tohitapú ke nau ʻiloʻi mo fakaʻehiʻehi mei he ngaahi tokāteline mo e ngaahi tōʻonga taʻefakatohitapú.​—1/1, peesi 8, 9.

• Ko hai ʻa e “Kāinga Pōlaní”?

Ko ha kiʻi kulupu lotu kinautolu ʻi he senituli hono 16 mo e 17 ʻi Pōlani ʻa ia naʻa nau fakalototoʻaʻi ʻa e pipiki ki he Tohitapú pea nau liʻaki ai ʻa e ngaahi tokāteline fakasiasi anga-mahení, hangē ko e Tolu-Tahaʻi-ʻOtuá, papitaiso valevalé, mo e afi ʻo helí. Naʻe fakatangaʻi kakaha kinautolu ʻi ha taimi, pea fakamālohiʻi ke nau movete ki he ngaahi fonua kehé.​—1/1, peesi 21-23.

• Ko e hā ke falala ai ki he ngaahi kikite ʻa e Tohitapú kae ʻikai ko e ngaahi meʻa naʻe tala ki muʻa ʻe he kau faifekumi ki he kahaʻú pe ko e kau ʻasitalolosiá?

Ko e kau palōfita lau pē fakaetangatá ʻoku fakamoʻoniʻi ʻenau taʻefalalaʻangá koeʻuhi ʻoku nau liʻaki ʻa Sihova pea mo e Tohitapú. Ko e ngaahi kikite pē ʻa e Tohitapú ʻe lava ke ne tokoniʻi koe ke ke ʻiloʻi ʻa e anga ʻo e feʻungamālie ʻa e ngaahi meʻa ʻoku hokó mo e taumuʻa ʻa e ʻOtuá, ʻo ke maʻu ʻaonga tuʻuloa ai mo ho fāmilí.​—1/15, peesi 3.

• Ko e hā ʻa e ngaahi fakamoʻoni ʻe niʻihi ʻoku fakamoʻoniʻi ai ʻoku tau moʻui ʻi he ngaahi ʻaho fakaʻosí?

ʻOku lava ke tau sio ki he ngaahi nunuʻa ʻo hono kapusi ʻo Sētane mei hēvaní. (Fakahā 12:9) ʻOku tau moʻui ʻi he taimi ʻo e “tuʻi” fakaʻosi naʻe lave ki ai ʻi he Fakahā 17:​9-11. Ko e tokolahi ʻo e kau Kalisitiane pani moʻoní ʻoku holo hifo, neongo ia ʻoku hā ngali ko e niʻihi ʻo kinautolu te nau kei ʻi he māmaní pē ʻi he taimi ʻe kamata ai ʻa e mamahi lahí.​—1/15, peesi 12, 13.

• Naʻe tohi ʻanefē ʻa e tohi ʻa Hapakuké, pea ko e hā ʻoku totonu ai ke tau mahuʻingaʻia aí?

Naʻe tohi ʻa e tohi faka-Tohitapu ko ʻení ʻi he 628 K.M. nai. ʻOku ʻi ai ʻa e fakamaau ʻa Sihova ki Siuta ʻo onoʻahó pea ki Pāpiloné. ʻOku toe lau ai ki he fakamaau fakaʻotua ʻoku vavé ni ke hoko mai ki he fokotuʻutuʻu fulikivanu lolotongá.​—2/1, peesi 9.

• Ko fē ʻi he Tohitapú ʻoku lava ke tau maʻu ai ʻa e akonaki fakapotopoto ʻa ha faʻē ki he ngaahi uaifi lavameʻá?

Ko e vahe fakaʻosi ʻo e tohi ʻa Palovepí, vahe 31, ko ha matavai lelei ʻaupito ia ʻo e akonaki peheé.​—2/1, peesi 30, 31.

• Ko e hā ʻoku lava ai ke tau houngaʻia ʻi hono fakahaaʻi ʻe Sihova “ʻa e ʻatamai ʻo Kalaisí” kiate kitautolú? (1 Kolinito 2:​16, NW)

Fakafou ʻi he lēkooti ʻo e Kōsipelí, kuo ʻai ai ʻe Sihova ke tau malava ʻo ako ʻa e ngaahi fakakaukau, ngaahi ongoʻi, ngaahi ngāue, mo e ngaahi meʻa ʻa Sīsū naʻe fakamuʻomuʻá. ʻOku lava ke tokoniʻi kitautolu ʻe he meʻá ni ke tau hoko lahi ange ai ʻo tatau mo Sīsū, tautefito ʻi he fakamamafa ʻoku tau fai ki he ngāue fakahaofi-moʻuí.​—2/15, peesi 25.

• ʻOku tali ʻe he ʻOtuá ʻa e ngaahi lotu ʻi he ʻaho ní?

ʻIo. Neongo ʻoku fakahaaʻi ʻe he Tohitapú ʻoku ʻikai ke tali ʻe he ʻOtuá ʻa e ngaahi lotu kotoa pē, ʻoku fakamoʻoniʻi ʻe he ngaahi meʻa ʻoku hokosia ʻi onopōní ʻokú ne faʻa tali ʻa e kakai kuo nau lotu ki ha fakafiemālie mo ha tokoni ʻi he ngaahi meʻa hangē ko hono fakaleleiʻi ʻa e ngaahi palopalema fakaemalí.​—3/1, peesi 3-7.

• Ko e hā ʻoku lava ke tau fai ke ngāueʻaki ai ʻa e mālohi ʻo e ʻOtuá?

ʻOku lava ke tau kole ki ai ʻi he lotu, ngāueʻaki ʻa e Tohitapú ki ha mālohi fakalaumālie, pea fakaivimālohiʻi fakafou ʻi he feohi faka-Kalisitiané.​—3/1, peesi 15, 16.

• ʻOku lava fēfē ke tokoniʻi ʻe he ngaahi mātuʻá ʻenau fānaú ke nau maʻu ʻaonga lahi ange mei he ngaahi fakataha faka-Kalisitiané?

ʻOku lava ke nau tokoniʻi ʻenau fānaú ke hanganaki ʻāʻā, mahalo pē ʻi hano ʻai nai ke nau kiʻi mohe ki muʻa. ʻOku lava ke fakalototoʻaʻi ʻa e fānaú ke nau hiki ha “ngaahi nouti,” hangē ko hano fakaʻilongaʻi ʻi ha pepa ʻa e taimi taki taha ʻoku ngāueʻaki ai ha ngaahi foʻi lea pe ngaahi hingoa anga-mahení.​—3/15, peesi 17, 18.

• Ko e hā ʻa e ngaahi meʻa ʻe niʻihi ʻoku lava ke tau ako mei he faʻifaʻitakiʻanga ʻa Siopé?

Naʻe fakamuʻomuʻa ʻe Siope ʻa hono vahaʻangatae mo e ʻOtuá, naʻe taʻefilifilimānako ʻi heʻene feangai mo e kaungā faʻahinga ʻo e tangatá, ʻo feinga ke mateaki ki hono hoa malí, fakahaaʻi ʻa e tokanga ki he tuʻunga fakalaumālie ʻa hono fāmilí, pea kītaki anga-tonu ʻi he malumalu ʻo e ʻahiʻahí.​—3/15, peesi 25-​27.

• ʻOku maʻu ʻe he Tohitapú ha fakaʻilonga fufū ʻokú ne ʻomai ʻa e fakamaama ki he ngaahi pōpoaki kuo liliu ke fakaefakaʻilongá?

ʻIkai. Ko e ngaahi taukaveʻi ʻo fekauʻaki mo e fakamahalo ki ha fakaʻilonga fufuú ʻoku lava ke faitatau ia ʻo fekauʻaki mo e ngaahi tohi fakaemāmani pau. Ko e ngaahi fakaʻilonga fufū ʻoku mahaloʻi ʻoku ʻi he Tohitapú ʻe fakaʻuhingaʻi taʻeʻuhinga ia ʻi he ngaahi faikehekehe ʻi he sipelá ʻi he ngaahi maniusikilipi faka-Hepeluú.​—4/1, peesi 30, 31.