Ko Kitauá ko e Haʻa Tui

Ko Hono Langa ʻa e Tuí ʻAki ʻa e Ako Tohitapu ʻi ʻInitia

MEI HE ngaahi Moʻunga Himaleia māʻolunga, mo kāpui ʻe he sinoú ʻi he tokelaú ki he ngaahi matātahi ʻafu ʻo e ʻŌseni ʻInitiá ki he tongá, ko ʻInitiá ko ha fonua ʻo e tuʻunga kehekehe, fakasiokālafi mo fakalotu. ʻI hono tokolahí ʻoku laka hake ʻi he taha milioná, ko e peseti nai ʻe 83 ko e kau Hinitū, peseti ʻe 11 ko e kau Mosilemi, pea ko e toengá ko e lahi tahá ʻoku faʻuʻaki ʻa e kau Kalisitiane lau pē, kau Sīki, kau Lotu-Puta, mo e kau Saini. ʻOku nau fiefia kotoa pē ʻi he tauʻatāina ʻo e lotú. “ʻOku fakahoko ʻe he lotú ha ngafa mātuʻaki mahuʻinga ʻi he founga moʻui ʻa e kau ʻInitiá,” ko e lau ia ʻa e The World Book Encyclopedia.

Ko e moʻui ʻo fakatatau ki heʻenau tui faka-Kalisitiané ʻoku fakamatalaʻi lelei ai ʻa e Kau Fakamoʻoni ʻa Sihová, ʻa ia ko honau tokolahí ʻoku laka hake he toko 21,200 ʻi ʻInitia. Hangē ko honau ngaahi takanga fakalaumālie ʻi he ngaahi konga kehe ʻo e māmaní, ko e Kau Fakamoʻoni ʻi ʻInitiá ʻoku nau vakai ki ai ko ha monū ia ke tokoniʻi honau ngaahi kaungāʻapí ke langa hake ha tui mālohi ki he Folofola ʻa e ʻOtuá, ʻa e Tohitapu Māʻoniʻoní. (2 Timote 3:​16, 17) Fakakaukau ki he founga naʻe hoko mai ai ʻa e fāmili ʻe taha ʻi Chennai ʻi he fakatonga ʻo ʻInitiá ʻo ʻilo ʻa e moʻoni ʻo e Tohitapú.

Ki muʻa ke nau fetuʻutaki mo e Kau Fakamoʻoni ʻa Sihová, ko e fāmili ko ʻení naʻa nau kau longomoʻui ki he ngaahi ngāue fakaefakamoʻui mahaki ʻa e Katoliká, ʻo taukaveʻi ʻoku nau sio ki he ngaahi vīsone, lea ʻi he ngaahi lea kehekehé, mo fakamoʻui ʻa e mahakí. Naʻa nau tuʻu-ki-muʻa ʻi he siasí mo e koló, ʻo aʻu ʻo lea ai ʻa e kakaí ki he mēmipa ʻe niʻihi ʻo e fāmilí ʻo ui ko e “swami,” ʻa ia ʻoku ʻuhingá ko e “ʻeiki.” Pea ʻi he ʻaho ʻe taha naʻe ʻaʻahi atu ai ki he fāmilí ha Fakamoʻoni peá ne fakahā ange kiate kinautolu mei he Tohitapú ko Sīsuú ko e ʻAlo ia ʻo e ʻOtuá, ʻo ʻikai ko e ʻOtua Mafimafi-Aoniú, ʻo hangē ko ia ʻoku ʻiloa ʻa e tui ki aí. Naʻe toe fakahā ange ʻe he Fakamoʻoní kiate kinautolu ko e huafa ʻo e ʻOtuá ko Sihova pea ko e taumuʻa ia ʻa Sihová ki he foʻi māmaní ke ʻai ko ha palataisi fakaʻofoʻofa.​—Sāme 83:18; Luke 23:43; Sione 3:16.

Koeʻuhi naʻa nau tokaʻi ʻa e Folofola ʻa e ʻOtuá pea nau saiʻia ʻi he meʻa naʻa nau fanongo ki aí, naʻe loto-lelei ʻa e ngaahi mēmipa ʻo e fāmili ko ʻení ki ha ako Tohitapu tuʻumaʻu mo e Kau Fakamoʻoni ʻa Sihová. Naʻe ʻomai ai heni ʻa e manuki mei honau ngaahi maheni ʻi he siasí. Ka neongo ia, naʻe fakapapauʻi maʻu pē ʻe he fāmilí ke hokohoko atu ʻenau ako Tohitapú. ʻI he tupulaki ʻenau ʻiló pea tupu ʻo mālohi ange ʻenau tuí, naʻa nau liʻaki leva ʻa ʻenau ngaahi tōʻonga fakalotu loí. ʻI he ʻahó ni, ko e mēmipa ʻe toko tolu ʻo e fāmili ko ʻení ko e Kau Fakamoʻoni faivelenga, ʻosi papitaiso, pea ʻoku ngāue ʻa e faʻeé ko ha tāimuʻa tokoni ʻi he taimi ʻokú ne malava aí.

Tui ke Ikuʻiʻaki ʻa e Ngaahi Faingataʻaʻiá

Ko Sunder Lal, ko ha talavou ʻokú ne nofo ʻi ha kolo ʻi Punjab, naʻá ne fiemaʻu ha tui mo e loto-toʻa lahi koeʻuhí ke ne kau ai ki hono vahevahe atu ʻa e ongoongo lelei ʻo e Puleʻangá ki he niʻihi kehé. (Mātiu 24:14) Ko e ʻuhinga ʻe taha, he naʻá ne liʻaki atu ʻa e ngaahi tui ki he ʻotua tokolahi ʻa hono fāmilí mo e koló ka ne lotu ki he ʻOtua moʻoni, ko Sihová. Ko e ʻuhinga ʻe tahá, naʻe ʻikai ke ʻi ai ha ongo vaʻe ʻo Sunder Lal.

ʻI he aʻu mai ki he 1992, naʻe ʻi ha founga-tuʻumaʻu ʻa e moʻui ʻa Sunder Lal. Naʻá ne ngāue ko ha tokoni toketā pea kau fakataha mo hono fāmilí tonu ʻi he lotu ki he ngaahi ʻotua kehekehe ʻi he malumalu ʻo e tataki ʻo ʻenau faiako kuo ʻosi fili. Pea ʻi he pō ʻe taha, naʻá ne tō ai ʻi haʻane kolosi ʻi ha halanga lēlue. Naʻe malaki ia ʻe he lēlué ʻo motu fakatouʻosi ai ʻa hono ongo vaʻé ʻi he hui-alangá. Neongo naʻá ne moʻui, naʻe maumauʻi lahi ai ʻa e ʻalunga ʻo ʻene moʻuí. ʻOku mahinongofua, ʻa e hoko ʻa Sunder Lal ʻo loto-mamahi ʻaupito pea aʻu ʻo ne fakakaukau ke taonakita.  Naʻe poupouʻi ia ʻe hono fāmilí, ka ko hono kahaʻú naʻe ʻikai ha toe ʻamanaki.

Naʻe ʻaʻahi leva ha taha ʻo e Kau Fakamoʻoni ʻa Sihová kia Sunder Lal peá ne fakahā ange kiate ia mei he Tohitapú ʻo pehē kuo talaʻofa ʻe he ʻOtuá ke ʻai ʻa e foʻi māmaní ko ha palataisi fakafiefia peá ne ʻomai ʻa e moʻui haohaoa ki he kotoa ʻo e faʻahinga ʻoku ʻofa mo manavahē ange kiate iá. Naʻe loto ʻa Sunder Lal ki ha ako Tohitapu, pea naʻá ne ako fakamātoato ʻo feʻunga mo e taʻu ʻe taha. Naʻe fakaafeʻi ia ke ne maʻu ʻa e ngaahi fakataha faka-Kalisitiané pea faifai atu pē naʻá ne heka ʻi mui ʻi ha pasikala fakataha mo hano kaumeʻa. Neongo naʻe mamahi ʻaupito ʻa e heka pasikalá, naʻe lahi ʻa e palé. Ko e meʻa naʻá ne ako ʻi heʻene ako Tohitapu fakafoʻituituí naʻe fakapapauʻi ia ʻi heʻene feʻiloaki mo e niʻihi kehe ko ia ʻoku nau tui moʻoni ki he ngaahi talaʻofa ʻa e Folofola ʻa e ʻOtuá pea moʻui ʻo fehoanaki mo e ngaahi akonaki ʻa e Tohitapú.

Naʻe kamata ke vahevahe atu ʻe Sunder Lal ʻa e ongoongo leleí ki hono ngaahi kaungāʻapí, pea ʻi he 1995 naʻá ne papitaiso ai. ʻI he ʻuluaki taimí, naʻá ne kau ai ki he ngāue fakafaifekaú ʻaki hono toho ia mei he matapā ki he matapā ʻi hono koló, ʻa ia ko e founga anga-maheni ia ʻo ʻene aʻu takai holó. Ka ʻi he taimi ní kuó ne maʻu ha meʻaʻofa mei hono ngaahi tokoua fakalaumālié​—ko ha veʻe-tolu ʻa ia ʻoku fakanaunau makehe ke ne “ʻaka” ʻaki hono nimá. Mālō mo ʻene veʻe-tolú, ʻokú ne tauʻatāina lahi ange he taimí ni pea ʻokú ne malava ʻiate ia pē ke fononga ʻi he kilomita ʻe 12 ke maʻu ʻa e ngaahi fakataha ʻa e fakatahaʻangá. ʻI he taimi ʻe niʻihi ʻokú ne heka atu ai ʻi he ngaahi matangi ʻuha lōvai; ʻi he ngaahi taimi kehe ʻi he vela ʻa e ʻeá ʻo laka hake ʻi he tikilī ʻe 43 Celsius.

ʻI he tānaki atu ki hono maʻu ʻa e ngaahi fakatahá, ʻoku fai ʻe Sunder Lal ʻa e ngaahi ako Tohitapu lahi mo ha niʻihi kehe ʻoku nau holi ki ha tokoni ke langa hake ʻa e tui mālohi ki he ʻOtua moʻoni, ko Sihová. Ko e moʻoni, ko e toko fitu ʻo ʻene kau ako Tohitapu ki muʻá kuo nau papitaiso he taimí ni, pehē ki he toko tolu kehe naʻa nau fetaulaki ka naʻa nau ako Tohitapu mo ha kaungā Fakamoʻoni.

Ko e “tuí,” fakatatau ki he Tohitapú, “oku ikai maʻu kotobe.” (2 Tesalonaika 3:​2, PM) Ka ki he faʻahinga ʻoku “hehema totonu ki he moʻui taʻengatá,” ko ha ako tuʻumaʻu ʻa e Folofola ʻa e ʻOtuá ʻoku malava ke ne langa hake ʻa e tui mālohi. (Ngāue 13:​48, NW) Ko ha faʻahinga ako pehē ʻokú ne ʻai ʻa e matá ke maama ange fakataha mo e ʻamanaki ki ha kahaʻu fakaofo​—ko ha meʻa ʻa ia ʻoku ngāueʻi ai ʻe ha fuʻu tokolahi fakautuutu ʻo e kakai ʻi ʻInitiá ʻa e tuí.

[Mape/Fakatātā ʻi he peesi 30]

(Ki he fakamatala kuo fokotuʻú, sio ki he tohi)

ʻAFIKĀNISITANI

PĀKISITANI

NEPOLO

PUTANI

SIAINA

PENGIKOLOTESI

MIENIMĀ

LĀOSI

TAILENI

VIETINEMI

KEMIPŌTIA

SULI LANGIKĀ

ʻINITIA

[Maʻuʻanga ʻo e Tā]

Mountain High Maps® Copyright © 1997 Digital Wisdom, Inc.