Ko e Ngaahi Kōsipelí—ʻOku Hokohoko Atu ʻa e Fakakikihi

ʻOku moʻoni ʻa e ngaahi fakamatala Kōsipeli fekauʻaki mo e ʻaloʻi ʻo Sīsū Kalaisí?

Naʻá ne fai ʻa e Malanga ʻi he Moʻungá?

Naʻe toetuʻu moʻoni ʻa Sīsū?

Naʻá ne lea moʻoni: “Ko au pe ko e Hala, pea mo e Moʻoni mo e Moʻui”?—SIONE 14:6.

KO E ngaahi meʻa peheni kuo fai ʻa e lāulea ki ai ʻa e kau mataotao ʻe toko 80 nai ʻi he Seminā ʻo Sīsū, ʻa ia kuo fai tuʻo ua he taʻu talu mei he 1985. Ko e kulupu ʻo e kau mataotao ko ení kuo nau tali ʻa e ngaahi fehuʻi peheé ʻi ha founga faikehe. Kuo fai ʻe he faʻahinga ʻoku kau ki he Seminaá ha ngaahi pāloti ʻi he lea taki taha naʻe tuku kia Sīsū ʻi he ngaahi Kōsipelí. Ko ha pāloti kulokula naʻe fakahaaʻi ai ʻa e foʻi fakakaukau ko e fakamatalá naʻe fai moʻoni ia ʻe Sīsū. Ko ha pāloti pingikī ʻoku ʻuhingá ʻoku tatau ha fakamatala mo ha meʻa naʻe leaʻaki nai ʻe Sīsū. Ko ha pāloti kulei ʻoku fakahaaʻi ai  ko e ngaahi fakakaukaú ʻoku ofi nai ki he ngaahi fakakaukau ko ia ʻa Sīsuú, ka ko e fakamatalá naʻe ʻikai ke tupu ia meiate ia. Ko ha pāloti ʻuliʻuli ʻoku taʻepau fakaʻaufuli ia, ʻo fakahaaʻi ai ko e fakamatalá naʻe toʻo ia mei ha talatukufakaholo ki mui mai.

ʻI he muimui ʻi he founga ko ení, kuo liʻaki ai ʻe he faʻahinga ʻoku kau ki he Seminā ʻo Sīsuú ʻa e ngaahi poini kotoa ʻe fā naʻe ʻohake ʻi he faʻunga fehuʻi ʻi he kamatá. Ko hono moʻoní, naʻa nau fai ha pāloti ʻuliʻuli ki he peseti ʻe 82 ʻo e ngaahi lea naʻe tuku kia Sīsū ʻi he ngaahi Kōsipelí. Fakatatau kiate kinautolú, ko e peseti pē ʻe 16 ʻo e ngaahi meʻa naʻe lave ki ai fekauʻaki mo Sīsū ʻi he ngaahi Kōsipelí mo e ngaahi tohi kehé ʻoku hā alafalalaʻangá.

Ko e fakaangaʻi pehē ʻo e ngaahi Kōsipelí ʻoku ʻikai ke foʻou ia. Naʻe hā hano ʻohofi ʻo e ngaahi Kōsipelí ʻi he 1774 ʻi he taimi naʻe pulusi ai ha maniusikilipi peesi ʻe 400 ʻa Hermann Reimarus, ko ha palōfesa ʻo e ngaahi lea Fakahahaké ʻi Hamburg, Siamane, ʻi he hili ʻa ʻene maté. Naʻe ʻomai ai ʻe Reimarus ʻa e ngaahi veiveiua lahi fekauʻaki mo e moʻoni fakahisitōlia ʻo e ngaahi Kōsipelí. Ko ʻene ngaahi fakamulitukú naʻe makatuʻunga ia ʻi he ʻanalaiso fekauʻaki mo e ngaahi leá mo e ngaahi fepakipaki hā ngali tākihalaʻi ʻoku maʻu ʻi he ngaahi fakamatala ʻi he faaʻi Kōsipelí fekauʻaki mo e moʻui ʻa Sīsuú. Talu mei ai, kuo faʻa fakahaaʻi ʻe he kau fakaangá ʻa e ngaahi veiveiua fekauʻaki mo e tuʻunga alafalalaʻanga ʻo e ngaahi Kōsipelí, ʻo aʻu ki ha tuʻunga ko hono fakavaivaiʻi ʻa e falala pau ʻa e kakaí ki he ngaahi tohí ni.

Ko e tōʻonga maheni ʻi he lotolotonga ʻo e kau mataotao peheé ko ʻenau vakai ko ia ki he ngaahi fakamatala Kōsipelí ko e talanoa faʻu fakalotu naʻe tuku mai ʻe he faʻahinga tāutaha kehekehé. Ko e ngaahi fehuʻi anga-maheni naʻe langaʻi ʻe he kau mataotao veiveiuá ʻa eni: Naʻe fakatupunga nai ʻe heʻenau tuí ʻa e kau hiki-tohi ʻo e faaʻi Kōsipelí ke nau fakalahiʻi ʻa e foʻi moʻoni totonú? Naʻe fakatupunga ʻe he ngaahi meʻa fakapolitikale ʻo e feituʻu ʻo e muʻaki kau Kalisitiané ke nau fakaleleiʻi pe toe tānaki atu ki he talanoa ʻo Sīsuú? Ko fē ʻa e ngaahi konga ʻo e ngaahi Kōsipelí ʻoku ngali moʻoni ʻa ʻene fakamatalá kae ʻikai ko ha talanoa fanangá?

Ko e kakai naʻe ʻohake ʻi ha sōsaieti fakaʻikaiʻi-ʻOtua pe fakamāmaní ʻoku nau tui ko e Tohitapú​—ʻo kau ai ʻa e ngaahi Kōsipelí​—ko ha tohi ia ʻoku fonu ʻi he ngaahi talatupuʻa mo e ngaahi fananga. Lolotonga ia ʻoku ofo ʻa e niʻihi kehé ʻi he hisitōlia ʻo e lingitoto, fakafeʻātungia, taʻefāʻūtaha, mo e ʻulungaanga fakaʻotuamate ʻa Puleʻanga-Haʻa-Kalisitiané. ʻOku sio ʻa e faʻahinga tāutaha peheé ʻoku ʻikai ha ʻuhinga ia ke fai ai ha tokanga ki he ngaahi tohi ʻoku tauhi toputapu ʻi Puleʻanga-Haʻa-Kalisitiané. ʻOku nau ongoʻi ko e ngaahi ngāue ko ia kuó ne faʻu ha lotu mālualoí kuo pau pē ʻoku makatuʻunga ia ʻi he ngaahi fepale taʻeʻaonga.

Ko e hā hoʻo fakakaukaú? Te ke fakaʻatā ha kau mataotao ʻe niʻihi ʻa ia ʻoku nau fehuʻia ʻa e moʻoni fakahisitōlia ʻo e ngaahi Kōsipelí ke fakatupunga koe ke ke maʻu ha ngaahi veiveiua meimei tatau ʻi hoʻo fakakaukaú? ʻI he taimi ʻokú ke fanongo ai ki he ngaahi fakamatala fekauʻaki mo e taku ko e fananga ʻa e kau tohi Kōsipelí, te ke fakaʻatā ʻa e meʻá ni ke ne ueʻi ʻa hoʻo falala pau ki heʻenau ngaahi tohí? ʻOku totonu ke ʻai koe ʻe he lēkooti fakaʻotuamate ʻo Puleʻanga-Haʻa-Kalisitiané ke ke fehuʻia ʻa e alafalalaʻanga ʻa e ngaahi Kōsipelí? ʻOku mau fakaafeʻi koe ke ke sivisiviʻi ʻa e ngaahi foʻi moʻoni ʻe niʻihi.

[Fakatātā ʻi he peesi 4]

ʻOku ʻi he ngaahi Kōsipelí ʻa e ngaahi fepale pe ko e ngaahi foʻi moʻoni?

[Maʻuʻanga ʻo e Tā]

Ko e ʻAʻeva ʻa Sīsū ʻi he Fukahi Tahí/The Doré Bible Illustrations/Dover Publications

[Maʻuʻanga ʻo e Tā ʻi he peesi 3]

ʻĀtakai, peesi 3-5 mo e 8: Courtesy of the Freer Gallery of Art, Smithsonian Institution, Washington, D.C.