Ko e Ngaahi Kōsipelí—Hisitōlia pe Talatupuʻa?

TAKATAKAI ʻi he māmaní ko e talanoa fekauʻaki mo Sīsū ʻo Nāsaletí​—ko ha talavou ʻa ia naʻá ne liliu ʻa e ʻalunga ʻo e hisitōlia fakaetangatá​—ʻoku hoko ia ko e uho ʻo e sōsaietí. Ko e konga ia ʻo e ako anga-maheni mo ʻikai anga-maheni ʻa e kakaí. ʻOku fakakaukau ʻa e tokolahi ki he ngaahi Kōsipelí ko e ngaahi fauniteni ia ʻo e ngaahi moʻoni mo e ngaahi lea fakatātā taʻengata, hangē ko e, “Ke pehe ni hoʻomou lea, ʻIo, ʻIo, ʻIkai, ʻIkai.” (Mātiu 5:​37, fakaʻītali ʻamautolu.) Ko e moʻoni, kuo hoko nai ʻa e ngaahi fakamatala Kōsipelí ko e makatuʻunga ia ki he ngaahi lēsoni kuo akoʻi kiate koe ʻe hoʻo ongo mātuʻá, tatau ai pē pe naʻá na Kalisitiane pe ʻikai.

Ki he laui miliona ʻo e kau muimui loto-moʻoni ʻo Kalaisí, kuo tokonaki mai ʻe he ngaahi Kōsipelí ʻa e fakamatala fekauʻaki mo e tangata ʻa ia naʻa nau loto-lelei ke faingataʻaʻia mo mate maʻaná. Kuo toe tokonaki mai ʻe he ngaahi Kōsipelí ʻa e makatuʻunga mo e tākiekina ki he loto-toʻá, kātakí, tuí, mo e ʻamanakí. ʻIkai te ke loto-tatau leva ai, ʻoku totonu ke ʻi ai ha fakamoʻoni taʻetoefakahalaʻi ke fakaʻatā ʻa e ngaahi fakamatalá ni mei hono pehē ko ha talanoa faʻu pē? ʻI he fakakaukau atu ki he tākiekina lahi fau kuo fai ʻe he ngaahi fakamatala Kōsipelí ki he fakakaukau mo e tōʻonga ʻa e tangatá, ʻikai te ke fiemaʻu ha fakamoʻoni fakatupu tuipau kapau naʻe loto ha taha ke ne ʻomai ha veiveiua ki heʻenau alafalalaʻangá?

ʻOku mau fakaafeʻi koe ke ke fakakaukau ki ha niʻihi ʻo e ngaahi fehuʻi fakatupu fakakaukau ʻo fekauʻaki mo e ngaahi Kōsipelí. Sio angé ʻiate koe ki he fakakaukau ʻa e kau ako pau ʻo e ngaahi Kōsipelí fekauʻaki mo e ngaahi ʻīsiu ko ení, neongo ia ʻoku ʻikai ke taku ʻe he niʻihi ʻo kinautolu ʻoku nau Kalisitiane. Te ke lava leva ke ke fai hoʻo ngaahi fakamulitukú ʻo makatuʻunga ʻi he fakamatala ko iá.

NGAAHI FEHUʻI KE FAKAKAUKAU KI AI

◆ ʻE lava ke hoko ʻa e ngaahi Kōsipelí ko ha ola ʻo ha foʻi fakakaukauloto pōtoʻi?

Ko Robert Funk, ʻa e tokotaha naʻá ne fokotuʻu ʻa e Seminā ʻo Sīsuú, ʻokú ne pehē: “Ko Mātiu, Maʻake, Luke, mo Sioné naʻa nau ‘fakahoko mai ʻa e Mīsaiá’ ke ʻai ia ke liliu ki he tokāteline faka-Kalisitiané ʻa ia naʻe tupu hake ʻi he hili ʻa e pekia ʻa Sīsuú.” Kae kehe, lolotonga hono tohi ʻa e ngaahi Kōsipelí, ko e tokolahi ko ia naʻa nau fanongo ki he ngaahi lea ʻa Sīsuú, naʻa nau sio heʻene ngaahi ngāué, mo sio kiate ia hili ʻene toetuʻú naʻa nau kei moʻui pē. Naʻe ʻikai te nau tukuakiʻi ha faʻahinga kākā ki he kau tohi Kōsipelí.

Fakakaukau angé ki he pekia mo e toetuʻu ʻa Kalaisí. ʻOku ʻikai ngata pē ʻa e ʻi he ngaahi Kōsipelí ʻa e ngaahi fakamatala alafalalaʻanga ʻo e pekia mo e toetuʻu ʻa Sīsuú kae toe pehē foki ki he ʻuluaki tohi ʻa Paula ʻoku kau ʻi he Tohitapú ki he kau Kalisitiane ʻi Kolinitō he kuonga muʻá. Naʻá ne tohi: “Ko e taha ʻo e ngaahi meʻa naʻa ku fuofua tuku atu, ʻa ia foki naʻa ku maʻu ʻe au, ʻa ʻeni, Naʻe pekia ʻa Kalaisi koeʻuhi ko ʻetau ngaahi angahala, ʻo fakatatau ki he Tohitapu; pea naʻe telio ia; pea naʻe fokotuʻu ia ʻi hono ʻaho tolu, ʻo fakatatau ki he Tohitapu; pea naʻa ne ha kia Kifasi, pea hili ia ki he kau Hongofulumaua, hili ia naʻa ne ha ki he kainga lotu ʻe toko nimangeau tupu, fakataha, ʻa ia ʻoku kei tolonga ni honau tokolahi, ka kuo mohe ha niʻihi: hili ia naʻa ne ha kia Semisi; hili ia ki he kau Aposetolo kotoa pe. Pea kimui ʻaupito, ʻo hange tofu pe ko e fanauʻi taʻe hoko kita, naʻa ne ha kiate au foki.” (1 Kolinito 15:​3-8) Ko e kau fakamoʻoni sio tonu peheé naʻa nau hoko ko e kau maluʻi ʻo e ngaahi moʻoni fakahisitōlia ʻo fekauʻaki mo e moʻui ʻa Sīsuú.

Ko e tuʻunga ʻilo naʻe pehē ʻe he kau fakaanga ʻi onopōní ʻoku moʻoní ʻoku ʻikai ke maʻu ia ʻi he  Ngaahi Konga Tohitapu Faka-Kalisi Kalisitiané. Ka, ʻoku hā ia ʻi he ngaahi tohi ʻo e senituli hono ua T.S. Ko ia ai, ko e ngaahi talanoa taʻefakatohitapu pau ʻo fekauʻaki mo Kalaisí naʻe faʻu ia ʻi he taimi naʻe tupu hake ai ha tafoki mei he lotu faka-Kalisitiane moʻoní ʻi he lotolotonga ʻo e ngaahi feituʻu naʻe mavahe mei he fakatahaʻanga fakaʻapositoló.​—Ngāue 20:​28-​30.

◆ ʻE lava ke pehē ko e ngaahi talatupuʻa ʻa e ngaahi Kōsipelí?

Ko e tokotaha faʻu-tohi mo fakaanga ko C. S. Lewis naʻá ne ʻiloʻi ʻa e faingataʻa ke vakai ki he ngaahi Kōsipelí ko e ngaahi talatupuʻa peé. “ʻI hoku tuʻunga ko ha faihisitōlia faʻu-tohí ʻoku ou mātuʻaki tuipau ko e hā pē ʻa e ngaahi Kōsipelí, ʻoku ʻikai ko ha ngaahi talatupuʻa kinautolu,” ko ʻene tohí ia. “ʻOku ʻikai te nau pōtoʻi feʻunga ke hoko ko e ngaahi talatupuʻa. . . . Ko e lahi taha ʻo e moʻui ʻa Sīsuú ʻoku ʻikai te tau ʻiloʻi, pea ʻoku ʻikai ha kakai te nau kamataʻi ha talatupuʻa te nau fakaʻatā ia ke pehē.” ʻOku toe mahuʻingá he neongo ko e faihisitōlia ʻiloa ko H. G. Wells naʻe ʻikai te ne taukaveʻi ko ha Kalisitiane ia, naʻá ne fakahaaʻi: “Ko e kotoa [ʻo e kau tohi Kōsipeli] ʻe toko faá ʻoku nau huʻufataha ʻi hono ʻomai kiate kitautolu ha fakatātā ʻo ha angaʻitangata mātuʻaki pau; ʻoku nau fakahaaʻi ʻa e . . . tuipau ki he moʻoní.”

Fakakaukau ki ha tuʻunga ʻi he taimi naʻe hā ai ʻa Sīsū kuo toetuʻú ki heʻene kau ākongá. Ko ha tokotaha faʻu talatupuʻa lelei, ngalingali te ne ʻai ha tuʻunga fakaholomamata ʻo e foki mai ʻa Sīsuú, fakahoko ha lea mahuʻinga, pe kāpui ʻi he maama mo e ngingila. ʻI hono kehé, ʻoku fakamatalaʻi pē ia ʻe he kau tohi Kōsipelí ʻokú ne tuʻu ʻi muʻa ʻi heʻene kau ākongá. Naʻá ne ʻeke ange leva: “Tamaiki, ʻoku ai haʻamou kiki?” (Sione 21:5) ʻOku fakaʻosiʻaki ʻe he mataotao ko Gregg Easterbrook: “Ko e faʻahinga fakaikiiki eni ia ʻoku fokotuʻu mai ai ha fakamatala moʻoni, ʻo ʻikai ko ha faʻu fananga.”

Ko e tukuakiʻi ko ia ko e ngaahi talatupuʻa ʻa e ngaahi Kōsipelí ʻoku toe fakafaingataʻaʻiaʻi ai ʻa e tui ki he founga ʻo e faiako fefeka fakalāpai ko ia naʻe manakoa lolotonga ʻa e taimi ʻo hono tohi ʻo e ngaahi Kōsipelí. Ko e founga ko iá naʻe pipiki ofi ai ki he ako ʻaki ʻa e manatú​—ko ha founga ako maʻuloto ʻo ngāueʻaki ʻa e founga-tuʻumaʻu pe toutou leaʻaki. ʻOku poupouʻi ʻe he meʻá ni ʻa e fakahoko totonu mo tokanga ʻo e ngaahi lea mo e ngaahi ngāue ʻa Sīsuú ʻo fepaki ia mo e toki kamataʻi ʻo ha liliu fakalahi.

◆ Kapau ko e ngaahi talatupuʻa ʻa e ngaahi Kōsipelí, ʻe lava ke mātuʻaki vave hono fakatahaʻi kinautolu ʻi he hili ʻa e pekia ʻa Sīsuú?

Fakatatau ki he fakamoʻoni ʻoku ala maʻú, naʻe tohi ʻa e ngaahi Kōsipelí ʻi he vahaʻa ʻo e taʻu 41 mo e 98 T.S. Naʻe pekia ʻa Sīsū ʻi he taʻu 33 T.S. ʻOku ʻuhinga ení ko e ngaahi fakamatala fekauʻaki mo ʻene moʻuí naʻe fakatahaʻi ia ʻi ha kiʻi taimi nounou hili e ngata ʻa ʻene ngāue fakafaifekaú. ʻOku ʻomai ʻi he meʻá ni ha fakafaingataʻaʻiaʻanga lahi fakaʻulia ki he fakakikihi ko ia ko e ngaahi talanoa Kōsipelí ko e ngaahi talatupuʻa peé. ʻOku fiemaʻu ʻa e taimi ke faʻu ai ʻa e ngaahi talatupuʻá. Ko e fakatātaá, ko e Iliad mo e Odyssey ʻa e tokotaha faʻu-maau Kalisi ko Homer he kuonga muʻá. ʻOku fakakaukau ʻa e niʻihi ko e konga tohi ʻo e ongo heloʻi talatupuʻa ko iá naʻe faʻu ia pea hoko ʻo tuʻumaʻu ʻo laka hake he ngaahi taʻu ʻe laui ngeau. Fēfē ʻa e ngaahi Kōsipelí?

ʻI heʻene tohi ko e Caesar and Christ, ʻoku tohi ai ʻe he faihisitōlia ko Will Durant: “ʻI he ʻiloʻi ko ia ʻe ha kau tangata anga-fakatōkilalo tokosiʻi . . . ha angaʻitangata mātuʻaki mālohi mo fakamānakó, mātuʻaki māʻolunga mo ʻulungaanga taau pea mātuʻaki longomoʻui, ko ha vīsone ia ʻo e fetokouaʻaki fakaetangatá, ʻe hoko ia ko ha mana ʻoku faingataʻa mamaʻo ange ke tui ki ai ʻi ha meʻa pē kuo lēkooti ʻi he ngaahi Kōsipelí. Hili ʻa e senituli ʻe ua ʻo e Fakatotolo Fakatohitapú ko e ngaahi faʻunga tefito ʻo e moʻui, tōʻonga, mo e faiako ʻa Kalaisí, ʻoku kei māʻalaʻala lelei, pea fokotuʻu ai ʻa e tafaʻaki fakatoʻoaloto lahi taha ʻi he hisitōlia ʻo e tangata he Hihifó.”

◆ Naʻe teuteuʻi ki mui ʻa e ngaahi Kōsipelí ke feʻunga mo e ngaahi fiemaʻu ʻa e feituʻu ʻo e muʻaki Kalisitiané?

ʻOku fakakikihi ʻa e kau fakaanga ʻe niʻihi naʻe fakatupunga ʻe he kau politiki ʻo e feituʻu ʻo e muʻaki Kalisitiané ʻa e kau tohi Kōsipelí ke fakaleleiʻi ʻa e talanoa fekauʻaki mo Sīsuú pea fakalahi atu ki ai. Kae kehe, ko ha ako ofi ʻo e ngaahi Kōsipelí ʻoku fakahaaʻi ai naʻe ʻikai fai ha ngāue taʻetotonu pehē. Kapau naʻe liliu ʻa e ngaahi fakamatala Kōsipeli ʻo fekauʻaki mo Sīsuú ko ha ola ia ʻo e kākā ʻa e Kalisitiane ʻi he ʻuluaki senitulí, ko e hā ʻoku kei hā ai ʻa e ngaahi fakamatala taʻepau fakatouʻosi ki he kau Siú mo e kau Senitailé ʻi he konga tohí?

Ko ha fakatātā ʻe taha ʻoku maʻu ia ʻi he Mātiu 6:​5-7, ʻa ia ʻoku lave ai ki he pehē ʻe Sīsū: “ʻOka mou ka lotu, ʻe ʻikai te mou hange ko e kau malualoi; he ʻoku nau manako ke tuʻu ʻi he falelotu mo e tuliki  ʻo e malaʻe ke fai ʻenau lotu, koeʻuhi ke nau ha ki he kakai. Ko au e, ʻoku ou tala atu, Ko hono ngata ia o ʻenau totongi kuo nau maʻu.” ʻOku hā mahino, ko ha fakahalaiaʻi eni ʻo e kau taki lotu Siú. Naʻe toe hoko atu ʻa Sīsū: “ʻI hoʻomou ngahi lotu, ʻoua te mou fakafanafana mo launoa, ʻo hange ko e hiteni [kau Senitailé]: he ʻoku nau mahalo ʻe ongo atu ʻenau meʻa ko e lahi o ʻenau lau.” ʻI he lave kia Sīsū ʻi he founga ko ení, naʻe ʻikai ke feinga ʻa e kau tohi Kōsipelí ke maʻu mai ha kau ului. Ko ʻenau hiki pē ia ʻo e ngaahi fakamatala naʻe fai moʻoni ʻe Sīsū Kalaisi.

Toe fakakaukau ki he ngaahi fakamatala Kōsipeli fekauʻaki mo e kau fefine ʻa ia naʻa nau ʻaʻahi ki he fonualoto ʻo Sīsuú ʻo sio ki ai ʻoku ʻikai ha tahá. (Maake 16:​1-8) Fakatatau kia Gregg Easterbrook, “ʻi he saienisi ʻo e sōsaieti ʻo e Hahake Lotolotó he kuonga muʻá, ko e fakamoʻoni naʻe fai ʻe he kakai fefiné naʻe vakai ki ai naʻe taʻealafalalaʻanga fakanatula: hangē ko ení, naʻe feʻunga pē ki ha ongo fakamoʻoni tangata ʻe toko ua ke na fakahalaiaʻi ha fefine ki ha tono, lolotonga ia naʻe ʻikai lava ke fakahalaiaʻi ha tangata ʻe ha fakamoʻoni ʻa ha fefine.” Ko e moʻoni, naʻe ʻikai ke tui ʻa e kau ākonga tonu ʻa Sisuú ki he kakai fefiné! (Luke 24:11) Ko ia ai, ko ha talanoa pehē ʻoku ʻikai ʻaupito ngalingali ko hano toki kamataʻi ʻosi fakakaukauʻi pē ia.

Ko e ʻikai ʻi ai ha ngaahi pealapeli ʻi he ngaahi ʻipiselí pea ʻi he tohi ʻa Ngāué ko ha fakakikihi mālohi ia ko e ngaahi pealapeli ko ia ʻi he ngaahi Kōsipelí naʻe ʻikai ko e fakahū ia ki ai ʻe he muʻaki kau Kalisitiané ka naʻe leaʻaki ia ʻe Sīsū tonu. Tānaki atu ki ai, ko hano fakahoa fakalelei ʻo e ngaahi Kōsipelí mo e ngaahi ʻipiselí ʻoku fakahaaʻi ai naʻe ʻikai ha ngaahi lea ʻa Paula pe ko e faʻahinga ʻo e kau tohi kehe ʻo e Ngaahi Konga Tohitapu Faka-Kalisí naʻe toe fakalea pōtoʻi ia ʻo tuku kia Sīsū. Kapau naʻe fai ʻe he feituʻu ʻo e muʻaki Kalisitiané ha meʻa pehē, ʻoku totonu ke tau ʻamanekina ke maʻu ʻo ʻikai siʻi hifo ha niʻihi ʻo e fakamatala mei he ngaahi ʻipiselí ʻi he ngaahi fakamatala Kōsipelí. Koeʻuhi ʻoku ʻikai te tau maʻu, ʻoku lava ke tau fakaʻosiʻaki papau ko e fakamatala Kōsipelí ko e ʻuluakí pē ia pea ʻoku alafalalaʻanga.

◆ Fēfē ʻa e hā ngali ʻoku ʻi ai ʻa e ngaahi fepakipaki ʻi he ngaahi Kōsipelí?

Kuo fuoloa hono taukaveʻi ʻe he kau fakaangá ʻoku fonu ʻa e ngaahi Kōsipelí he ngaahi fepakipaki. Naʻe feinga ʻa e faihisitōlia ko Durant ke sivisiviʻi ʻa e ngaahi fakamatala Kōsipelí mei ha tuʻunga kakato moʻoni​—ko e ngaahi tohi fakahisitōlia. Neongo ʻokú ne pehē ʻoku hā ngali ʻoku ʻi ai ʻa e ngaahi fepakipaki ʻiate kinautolu, ʻokú ne fakaʻosiʻaki: “Ko e ngaahi fepakipakí ko e fanga kiʻi meʻa iiki [ko e ngaahi fakaikiiki taʻemahuʻinga], ʻo ʻikai ʻaonga; ʻi heʻene mātuʻaki mahuʻingá ko e ʻuluaki toluʻi kōsipelí ʻoku ʻiloa lelei ʻenau felotoí, pea faʻu ai ha fakatātā huʻufataha ʻo Kalaisi.”

Ko e hā ngali ʻi ai ʻa e ngaahi fepakipaki ʻi he ngaahi fakamatala Kōsipelí ʻoku faʻa faingofua hono fakapapauʻí. Ke fakatātaaʻi: ʻOku pehē ʻe he Mātiu 8:5 “naʻe haʻu kiate ia [Sīsū] ha senituliō, ʻo kole kiate ia” ke ne fakamoʻui ha sevāniti tangata. ʻI he Luke 7:3 (PM), ʻoku tau lau ai ko e ʻōfisá naʻá ne “fekau ae kau matua i he kakai Jiu, ke fakakolekole kiate ia [Sīsū] ke ne haʻu o fakamoui a ene tamaioeiki.” Naʻe fekau atu ʻe he ʻōfisá ʻa e kau mātuʻa ko ʻene kau fakafofonga. ʻOku pehē ʻe Mātiu ko e ʻōfisa fakakautaú tonu naʻá ne kole kia Sīsuú koeʻuhi he naʻe fai  ʻe he tangatá ʻa ʻene kolé fakafou ʻi he kau mātuʻá, ʻa ia naʻa nau ngāue ko ʻene kau tangata lea. Ko e fakatātā pē eni ʻe taha ʻoku fakahaaʻi ai ko e ngaahi kehekehe ʻoku taku ʻi he ngaahi Kōsipelí ʻoku lava ke fakapapauʻi.

Fēfē ʻa e ngaahi taukaveʻi ʻa e kau fakaanga lahi ange ʻoku ʻikai ke maʻu ʻe he ngaahi Kōsipelí ʻa e tuʻunga ʻo e hisitōlia moʻoní? ʻOku hoko atu ʻa Durant: “ʻI he faivelenga ʻo ʻene ngaahi fakatotoló kuo ngāueʻaki ʻe he Fakatotolo Fakatohitapú ki he Fuakava Foʻoú ʻa e ngaahi sivi ʻo e tuʻunga alafalalaʻangá ʻo fuʻu fefeka he ʻiate kinautolu ko e kau tangata ʻiloa ʻe toko teau he kuonga muʻá​—ko e fakatātaá, ko Hamulapi, Tēvita, Sōkolotesi—te nau hoko ai ko e faʻahinga talatupuʻa. Neongo ʻa e ngaahi tomuʻa fehiʻa mo e ngaahi tomuʻa ʻilo fakateolosia ʻa e kau ʻevangelioó, ʻoku nau lēkooti ʻa e ngaahi meʻa lahi naʻe hoko ʻa ia ne mei fufū ia ʻe he kau faʻu meʻa foʻoú pē​—ko e feʻauhi ʻa e kau ʻapositoló ki he ngaahi tuʻunga māʻolunga ʻi he Puleʻangá, ko ʻenau hola hili hono puke ʻo Sīsuú, ko e fakafisingaʻi ʻe Pitá . . . ʻOku ʻikai ha taha te ne lau ʻa e ngaahi fakamatala ko ení ʻe lava ke ne veiveiua ʻi he moʻoni ʻa e tokotaha ʻoku tuʻu mei mui aí.”

◆ ʻOku fakafofongaʻi ʻe he lotu faka-Kalisitiane ʻi onopōní ʻa e Sīsū ʻo e ngaahi Kōsipelí?

Kuo talaki ʻi he Seminā ʻo Sīsuú ko ʻene fekumi ʻi he ngaahi Kōsipelí ʻoku “ʻikai fakangatangata ia ʻe he ngaahi lau ʻa e ngaahi kosilio ʻa e siasí.” Ka ʻoku ʻiloʻi ʻe faihisitōlia Wells ʻoku ʻi ai ha fuʻu ava ʻi he vahaʻa ʻo e ngaahi akonaki ʻa Sīsū hangē ko ia ʻoku ʻomai ʻi he ngaahi Kōsipelí pea mo e ngaahi akonaki ko ia ʻa Puleʻanga-Haʻa-Kalisitiané. Naʻá ne tohi: “ʻOku ʻikai ha fakamoʻoni naʻe teitei fanongo ʻa e kau ʻapositolo ʻa Sīsuú ʻi he Tolu-Tahaʻi-ʻOtuá​—ʻi ha tuʻunga pē meiate ia. . . . Pea naʻe ʻikai leaʻaki [ʻe Sīsū] ha foʻi lea fekauʻaki mo e lotu ki heʻene faʻē ko Melé, ʻi he tuʻunga ʻo ʻĪsisi, ko e Kuini ʻo hēvaní. Ko e ngaahi akonaki kotoa ko ia ʻa Puleʻanga-Haʻa-Kalisitiane ʻi he lotú mo hono ngāueʻakí, naʻá ne tukunoaʻi.” Ko ia ai, ʻe ʻikai lava ke fakamāuʻi ʻe ha taha ʻa e mahuʻinga ʻo e ngaahi Kōsipelí ʻo makatuʻunga ʻi he ngaahi akonaki ʻa Puleʻanga-Haʻa-Kalisitiané.

 KO E HĀ HOʻO FAKAMULITUKÚ?

Hili e lāulea ki he ngaahi poini ki muʻá, ko e hā hoʻo fakakaukaú? ʻOku ʻi ai ha fakamoʻoni moʻoni, mo fakatuipau ko e ngaahi Kōsipelí ko e fananga pē? ʻOku ʻiloʻi ʻe he tokolahi ko e ngaahi fehuʻi mo e ngaahi veiveiua naʻe langaʻi hake fekauʻaki mo e alafalalaʻanga ʻa e ngaahi Kōsipelí ʻoku taʻefalalaʻanga mo ʻikai fakatupu tuipau. Ke faʻu ha fakakaukau fakafoʻituitui, ʻoku fiemaʻu ke ke lau ʻa e ngaahi Kōsipelí mo ha fakakaukau ʻatā. (Ngāue 17:11) ʻI hoʻo vakai ki he huʻufataha, faitotonu, mo e totonu ʻa ia ʻoku ʻomai ʻaki ʻe he ngaahi Kōsipelí ʻa e angaʻitangata ʻo Sīsuú, te ke ʻiloʻi ai ko e ngaahi fakamatala ko ení ʻoku ʻikai moʻoni ko ha tātānaki ia ʻo ha ngaahi fepale. a

Kapau te ke sivisiviʻi tokanga ʻa e Tohitapú pea ngāueʻaki ʻa ʻene akonakí, te ke sio ai ki he anga ʻo ʻene liliu ki he lelei ange ʻa hoʻo moʻuí. (Sione 6:​68) ʻOku tautefito ʻa e moʻoni ʻo e meʻá ni ʻi he ngaahi lea ʻa Sīsū naʻe lēkooti ʻi he ngaahi Kōsipelí. Ko e toe meʻa lahi angé, ʻe lava ai ke ke ako fekauʻaki mo e kahaʻu fakaofo ʻoku tuku tauhi maʻá e faʻahinga talangofua ʻo e tangatá.​—Sione 3:​16; 17:​3, 17.

[Fakamatala ʻi lalo]

[Puha ʻi he peesi 7]

Fakamoʻoni ʻo e Fakamatala Alafalalaʻanga

ʻI HE ngaahi taʻu kuo maliu atú ko ha tokotaha hiki-tohi ʻAositelēlia mo e fakaanga ki muʻa ʻo e Tohitapú naʻá ne fakahaaʻi: “ʻI he ʻuluaki taimi ʻi heʻeku moʻuí naʻá ku fai ai ʻa e meʻa ʻa ia ko e ʻuluaki fatongia anga-maheni pē ia ʻo ha taha faiongoongó: naʻá ku siviʻi ʻa ʻeku ngaahi foʻi moʻoní. . . . Pea naʻá ku ʻohovale, koeʻuhi ko e meʻa ko ia naʻá ku lau [ʻi he ngaahi fakamatala Kōsipelí] naʻe ʻikai ko ha talatupuʻa pea naʻe ʻikai ko ha talanoa faʻu ngali ongo moʻoni. Ko ha fakamatala ia. Ko e fakamatala ʻuluaki ia mo hono ua ʻo e ngaahi meʻa makehe naʻe hokó . . . Ko ha fakamatala ʻoku ʻi ai hono fakaʻilonga makehe, pea ko e fakaʻilonga ko iá ʻoku ʻi he ngaahi Kōsipelí.”

ʻI he tuʻunga meimei tatau, ko E. M. Blaiklock, ko ha palōfesa ʻo e ngaahi tohi ʻi muʻa faka-Kalisi mo faka-Lomá ʻi he ʻUnivēsiti ʻAokalaní, naʻá ne fakaʻuhinga: “ʻOku ou taukaveʻi ko ha faihisitōlia au. Ko ʻeku founga tefito ki he Ngaahi Tohi ʻi Muʻa Faka-Kalisi mo Faka-Lomá ʻoku fakahisitōlia. Pea ʻoku lava ke u fakapapauʻi atu kiate koe ko e fakamoʻoni ko ia ki he moʻui, ko e pekia, pea mo e toetuʻu ʻa Kalaisí ʻoku alafalalaʻanga lelei ange ia ʻi he lahi taha ʻo e ngaahi foʻi moʻoni ʻo e hisitōlia he kuonga muʻá.”

[Mape/Fakatātā ʻi he peesi 8, 9]

(Ki he fakamatala kuo fokotuʻú, sio ki he tohi)

FINISIA

KĀLELI

Vaitafe Sioatani

SIUTEA

[Fakatātā]

“Ko e fakamoʻoni ki he moʻui, ko e pekia, pea mo e toetuʻu ʻa Kalaisí ʻoku alafalalaʻanga lelei ange ia ʻi he lahi taha ʻo e ngaahi moʻoniʻi meʻa ʻo e hisitōlia motuʻá.”—PALŌFESA E. M. BLAIKLOCK

[Maʻuʻanga ʻo e Tā]

Mape ʻo e ʻātakaí: Based on a map copyrighted by Pictorial Archive (Near Eastern History) Est. and Survey of Israel.