Tauhi Hoʻomou “Amanaki . . . ki he Fakamoui” ke Pau!

“Tatā aki ae amanaki . . . ki he fakamoui.”—1 TESALONAIKA 5:​8, PM.

1. ʻOku anga-fēfē ʻa e tokoni ʻa e “amanaki . . . ki he fakamoui” ki he kātakí?

 KO E ʻamanaki ke hoko ʻo fakamoʻuí ʻoku lava ke ne tokoniʻi ha tokotaha ke kei tuʻumaʻu naʻa mo e ʻi he ngaahi tuʻunga faingataʻa tahá. Ko ha taha naʻe maʻukovia ʻe ha vaka ngoto ʻoku tētē ʻi ha kiʻi vaka fakahaofi moʻui ʻoku lava ke ne kātaki ʻo toe fuoloa ange kapau ʻokú ne ʻiloʻi ʻoku ofi mai ʻa e tokoní. ʻI he tuʻunga meimei tatau, ʻi he laui afeʻi taʻu, ko e ʻamanaki ki he “fakamoʻui ʻa Sihova” kuó ne tokoniʻi ʻa e kau tangata mo e kau fefine ʻo e tuí ʻi he ngaahi taimi ʻo e faingataʻá, pea kuo ʻikai ke iku ʻa e ʻamanaki ko ení ki ha fakalotomamahi. (Ekisoto 14:13; Sāme 3:8; Loma 5:5; 9:​33) Naʻe fakatatau ʻe he ʻapositolo ko Paulá ʻa e “amanaki . . . ki he fakamoui” ki he “tatātau” ʻo e teunga tau fakalaumālie ʻo ha Kalisitiane. (1 Tesalonaika 5:8, PM; Efeso 6:​17) ʻIo, ko ʻetau hoko ʻo tuipau ʻe fakamoʻui kitautolu ʻe he ʻOtuá ʻokú ne maluʻi ʻetau ngaahi mafai fakaefakakaukaú, ʻo tokoniʻi kitautolu ke tau ʻāʻā neongo ʻa e fakafilí, fakafepakí, mo e ʻahiʻahí.

2. ʻI he ngaahi founga fē ʻoku hoko ai ʻa e “amanaki . . . ki he fakamoui” ko e makatuʻunga ia ki he lotu moʻoní?

² “Ko e ʻamanaki fekauʻaki mo e kahaʻú naʻe ʻikai ko ha anga ia ʻo e māmani panganí,” ʻa e māmani naʻá ne takatakaiʻi ʻa e kau Kalisitiane ʻi he ʻuluaki senitulí, ko e fakamatala ia ʻa e The International Standard Bible Encyclopedia. (Efeso 2:​12; 1 Tesalonaika 4:​13) Ka, ko e “amanaki . . . ki he fakamoui” ko ha ʻelemēniti tefito ia ʻo e lotu moʻoní. ʻO  anga-fēfē? ʻUluakí, ko e fakamoʻui ʻo e kau sevāniti ʻa Sihová ʻoku fehokotaki ia mo hono huafá tonu. Naʻe lotu ʻa e tokotaha-tohi-sāme ko ʻĒsafé: “Tokoni mai, ʻe homau ʻOtua fakamoʻuiʻanga, telia ʻa e ongoongo ʻo ho huafa: pea [haofaki] kimautolu.” (Sāme 79:9; Isikeli 20:9) ʻIkai ko ia pē, ko hono maʻu ʻa e tuipau ki he ngaahi tāpuaki naʻe talaʻofa ʻe Sihová ʻoku fiemaʻu ia ki hono maʻu ha vahaʻangatae lelei mo ia. ʻOku fakalea peheni ia ʻe Paula: “ʻO ka taʻekau ʻa e tui, ʻoku ʻikai momoʻi lava haʻate fakahōifua ia: he ko ia ʻoku ʻunuʻunu ki he ʻOtua, kuo pau ʻoku ne tui ʻoku ʻi ai ia, pea te ne hanga ʻo totongi kiate kinautolu ʻoku kumi hākili kiate ia.” (Hepelu 11:6) ʻIkai ngata aí, naʻe fakamatalaʻi ʻe Paula ko e fakamoʻui ʻo e faʻahinga fakatomalá ko ha ʻuhinga tefito ia ʻo e haʻu ʻa Sīsū ki he māmaní. Naʻá ne fakahaaʻi: “ʻOku moʻoni ʻa e lea, pea tāu ke tali ʻe he loto kotoa—‘Naʻe haʻu ʻa Kalaisi Sisu ki mamani ke fakamoʻui ʻa e kakai angahala.’ ” (1 Timote 1:15) Pea naʻe lave ʻa e ʻapositolo ko Pitá ki he fakamoʻuí ko e ‘gataaga [pe ikuʻanga fakaʻosi] o ʻetau tuí.’ (1 Pita 1:​9, PM) ʻOku hā mahino, ʻoku totonu ke ʻamanaki ki he fakamoʻuí. Ka ko e hā moʻoni ʻa e fakamoʻuí? Pea ko e hā ʻoku fiemaʻu kae maʻu iá?

Ko e Hā ʻa e Fakamoʻuí?

3. Ko e hā ʻa e faʻahinga fakamoʻui naʻe hokosia ʻe he kau sevāniti ʻa Sihova ʻi he kuonga muʻá?

³ ʻI he Ngaahi Konga Tohitapu Faka-Hepeluú, ʻoku faʻa ʻuhinga ʻa e “fakamoʻui” ko e fakahaofi pe haofaki mei he fakafeʻātungiá pe mei ha mate fakafokifā, mo mutukia. Hangē ko ení, ʻi hono ui ʻa Sihova “ko e Tokotaha-Tokonaki  ʻo e fakahaofí,” naʻe pehē ʻe Tēvita: “Ko hoku ʻOtuá ʻa hoku makatuʻú. . . . Ko hoku feituʻu ke hola ki ai, ko hoku Fakamoʻui; ʻokú ke fakamoʻui au mei he fakamālohí. Ko e Tokotaha ke fakahīkihikiʻí, ʻa Sihova, te u ui ki aí, pea ʻe fakamoʻui au mei hoku ngaahi filí.” (2 Samiuela 22:​2-4, NW) Naʻe ʻiloʻi ʻe Tēvita ʻoku fanongo mai ʻa Sihova ʻi he taimi ʻoku tangi hake ai ʻa ʻEne kau sevāniti anga-tonú ki ha tokoní.​—Sāme 31:​22, 23; 145:19.

4. Ko e hā ʻa e ʻamanaki ki he moʻui ʻi he kahaʻú naʻe tauhi maʻu ʻe he kau sevāniti ʻa Sihova ki muʻa ʻi he Kalisitiané?

⁴ Ko e kau sevāniti ʻa Sihova ki muʻa ʻi he Kalisitiané naʻa nau toe tauhi maʻu ʻa e ʻamanaki ki ha moʻui ʻi he kahaʻú. (Siope 14:​13-​15; Aisea 25:8 [Isaia, PM]; Taniela 12:13) Ko hono moʻoní, ko e lahi ʻo e ngaahi talaʻofa ʻo e fakahaofi ʻoku maʻu ʻi he ngaahi Konga Tohitapu Faka-Hepeluú ko ha kikite ia ki ha fakamoʻui lahi ange​—ko e taha ʻe taki atu ki he moʻui taʻengatá. (Aisea 49:​6, 8; Ngāue 13:47; 2 Kolinito 6:2) ʻI he ʻaho ʻo Sīsuú, naʻe ʻamanaki ai ʻa e kau Siu tokolahi ki he moʻui taʻengatá, ka naʻa nau fakafisi ke tali ʻa Sīsū ko e kī ia ki hono fakahoko ʻo ʻenau ʻamanakí. Naʻe tala ʻe Sīsū ki he kau taki lotu ʻo hono taimí: “ʻOku mou hakule ʻa e Tohitapu; koeʻuhi ʻoku mou mahalo ʻoku tuʻu ai hoʻomou maʻu ʻa e moʻui taʻengata: pea ko ia ia ʻoku fakamoʻoni kiate au.”—Sione 5:39.

5. Ko e hā ʻa e ʻuhinga tefito ʻo e fakamoʻuí?

⁵ Fakafou ʻia Sīsū, naʻe fakaeʻa ai ʻe he ʻOtuá ʻa e tafaʻaki kakato ʻo e ʻuhinga ʻo e fakamoʻuí. ʻOku kau ki ai ʻa e tukuange mei he pule ʻa angahalá, mei he pōpula ki he lotu loí, mei he māmani ʻi he malumalu ʻo e pule ʻa Sētané, mei he manavahē tangatá, pea naʻa mo e manavahē ki he maté. (Sione 17:16; Loma 8:2; Kolose 1:​13; Fakahā 18:​2, 4) Ko e meʻa tefito ki he kau sevāniti anga-tonu ʻa e ʻOtuá, ko e fakamoʻui ʻe he ʻOtuá ʻoku ʻuhingá ʻoku ʻikai ko e haofakiʻi pē mei he fakafeʻātungiá mo e faingataʻá ka ko e toe faingamālie ke maʻu ʻa e moʻui taʻengatá. (Sione 6:​40; 17:3) Naʻe akoʻi ʻe Sīsū ko e fakamoʻui ki he “fanga sipi toko siʻi,” ʻoku ʻuhingá ko ʻenau toetuʻu ki he moʻui fakahēvaní ke kau mo Kalaisi ʻi he pule he Puleʻangá. (Luke 12:32) Ki he toenga ʻo e faʻahinga ʻo e tangatá, ʻoku ʻuhinga ʻa e fakamoʻuí ko ha toe fakafoki ki he moʻui haohaoá mo e vahaʻangatae mo e ʻOtuá naʻe fiefia ai ʻa ʻĀtama mo ʻIvi ʻi he ngoue ko ʻĪtení ki muʻa ke na faiangahalá. (Ngāue 3:​21; Efeso 1:​10) Ko e moʻui taʻengata ʻi he malumalu ʻo e ngaahi tuʻunga fakapalataisi peheé ʻa e muʻaki taumuʻa ʻa e ʻOtuá ki he faʻahinga ʻo e tangatá. (Senesi 1:​28; Maake 10:30) Ko ia ai, ʻe malava fēfē ʻa hono toe fakafoki ki he ngaahi tuʻunga peheé?

Ko e Makatuʻunga ki he Fakamoʻuí ​—Ko e Huhuʻí

6, 7. Ko e hā ʻa e ngafa ʻo Sīsū ʻi hotau fakamoʻuí?

⁶ ʻOku ala maʻu ʻa e fakamoʻui taʻengatá fakafou pē ʻi he feilaulau huhuʻi ʻa Kalaisí. Ko e hā hono ʻuhingá? ʻOku fakamatalaʻi ʻe he Tohitapú ʻi he taimi naʻe faiangahala ai ʻa ʻĀtamá, naʻá ne “fakatau” ia tonu mo e kotoa ʻo ʻene fānau ʻi he kahaʻú, ʻo kau ai kitautolu, ki he angahalá​—ʻo ʻai ai ke fiemaʻu ha huhuʻi kapau ʻoku fiemaʻu ke maʻu ʻe he faʻahinga ʻo e tangatá ha ʻamanaki lelei. (Loma 5:​14, 15; 7:14) Ko e tokonaki ko ia ʻe he ʻOtuá ha huhuʻi ki he kotoa ʻo e faʻahinga ʻo e tangatá naʻe tomuʻa fakatātaaʻi ia ʻe he ngaahi feilaulau monumanu ʻi he malumalu ʻo e Lao ʻa Mōsesé. (Hepelu 10:​1-​10; 1 Sione 2:2) Ko Sīsū ʻa e tokotaha ʻa ia naʻe fakahoko ʻe heʻene feilaulaú ʻa e ngaahi fakatātā fakaekikite ko iá. Naʻe fanongonongo ʻe he ʻāngelo ʻa Sihová ki muʻa ʻi hono ʻaloʻi ʻo Sīsuú: “Te ne fakamoʻui hono kakai mei heʻenau ngahi angahala.”—Mātiu 1:21; Hepelu 2:​10.

⁷ Naʻe ʻaloʻi fakaemana ʻa Sīsū ʻe he tāupoʻou ko Melé, pea ʻi he tuʻunga ko e ʻAlo ʻo e ʻOtuá, naʻe ʻikai te ne maʻu tukufakaholo ʻa e mate meia ʻĀtamá. Ko e moʻoniʻi meʻa ko ení fakataha mo hono ʻalunga anga-tonu haohaoá naʻá ne foaki ai ki heʻene moʻuí ʻa e mahuʻinga ko ia naʻe fiemaʻu ke toe fakatau mai ʻaki ʻa e faʻahinga ʻo e tangatá mei he angahalá mo e maté. (Sione 8:​36; 1 Kolinito 15:22) ʻI he ʻikai tatau mo e faʻahinga kehe kotoa ʻo e tangatá, naʻe ʻikai fakahalaiaʻi ʻa Sīsū ke mate koeʻuhi ko e angahalá. Naʻe fakataumuʻa ʻa ʻene haʻu ki māmaní “ke tuku ʻene moʻui ke huhuʻiʻaki ha tokolahi, heʻene fetongi kinautolu.” (Mātiu 20:28) ʻI hono fai iá, ko e Sīsū ko ia kuo toetuʻu mo fakanofo tuʻi he taimi ní ʻokú ne ʻi ha tuʻunga ke foaki ʻa e fakamoʻuí ki he faʻahinga kotoa ʻoku nau aʻusia ʻa e ngaahi fiemaʻu ʻa e ʻOtuá.​—Fakahā 12:10.

Ko e Hā ʻOku Fiemaʻu kae Maʻu ʻa e Fakamoʻuí?

8, 9. (a) Naʻe anga-fēfē ʻa e tali ʻa Sīsū ki ha fehuʻi ʻa ha talavou pule koloaʻia ʻo fekauʻaki mo e fakamoʻuí? (e) Naʻe anga-fēfē ʻa hono ngāueʻaki ʻe Sīsū ʻa e taimi ko ení ke akoʻi ai ʻa ʻene kau ākongá?

⁸ ʻI he taimi ʻe taha, naʻe ʻeke ai ʻe ha talavou pule ʻIsileli koloaʻia kia Sīsū: “Ko e ha te u fai, kae tō moʻoku ʻa e moʻui ta engata?” (Maake 10:17) Naʻe tapua  nai mei heʻene fehuʻí ʻa e fakakaukau faka-Siu naʻe anga-maheniʻaki ʻi hono taimí​—ʻo pehē ʻoku kounaʻi ʻe he ʻOtuá ʻa e ngaahi ngāue lelei pau pea ʻi hono fakahoko feʻunga ʻa e ngaahi ngāue ko iá, ʻe lava ke te maʻu ai ʻa e fakamoʻui mei he ʻOtuá. Ka ko e founga līʻoa fakaeangafakafonua ko iá ʻoku lava ke mapuna hake ia mei he ngaahi taumuʻa siokita. ʻOku ʻikai lava ʻa e ngaahi ngāue ko iá ke ne tokonaki mai ha ʻamanaki papau ki he fakamoʻuí, koeʻuhi he ʻoku ʻikai ha tangata taʻehaohaoa ʻe lava moʻoni ke ne faitatau mo e ngaahi tuʻunga ʻa e ʻOtuá.

⁹ ʻI he tali ki he fehuʻi ʻa e tangatá, naʻe fakamanatu pē ʻe Sīsū kiate ia ʻoku totonu ke ne talangofua ki he ngaahi tuʻutuʻuni ʻa e ʻOtuá. Naʻe fakapapauʻi vave ʻe he talavou pulé kia Sīsū kuó ne tauhi kinautolu mei heʻene kei siʻí ʻo faai mai ai. Naʻe ueʻi ʻe heʻene talí ke ongoʻi ʻofa ai ʻa Sīsū kiate ia. Naʻe tala ange ʻe Sīsū kiate ia: “Ko e meʻa pē taha ʻoku ke tōmui ai: mole pē ʻo fakatau atu ʻa e meʻa kotoa pē ʻoku ke maʻu, pea foaki hono paʻanga ki he masiva, pea ʻe ai ha koloa ʻe faʻoaki maʻau ʻi he langi: pea ke haʻu ʻo kau ʻi hoku lahi.” Kae kehe, ko e talavoú, naʻá ne ʻalu kuó ne loto-mamahi, “he ko e toko taha ia naʻe maʻu meʻa lahi.” Hili iá naʻe fakamamafaʻi ʻe Sīsū ki heʻene kau ākongá ko e pipiki tōtuʻa ki he ngaahi koloa ʻo e māmani ko ení ʻokú ne taʻofi ai ʻa hono maʻu ʻo e fakamoʻuí. Naʻá ne tānaki mai ki ai ʻe ʻikai lava ke maʻu ʻe ha taha ʻa e fakamoʻuí ʻi heʻene ngaahi feinga pē ʻaʻaná. Ka naʻe hoko atu ʻa Sīsū ke fakapapauʻi kiate kinautolu: “ʻI he vakai ʻa e tangata ʻe ʻikai lava, ka ʻoku ʻikai pehe ki he ʻOtua: he ʻoku malava ʻa e meʻa kotoa pe ki he ʻOtua.” (Maake 10:​18-27; Luke 18:​18-​23 ) ʻOku ala maʻu fēfē ʻa e fakamoʻuí?

10. Ko e hā ʻa e ngaahi tuʻunga kuo pau ke tau aʻusia ke maʻu ai ʻa e fakamoʻuí?

¹⁰ Ko e fakamoʻuí ko ha meʻaʻofa ia mei he ʻOtuá, ka ʻoku ʻikai ke hoko noa mai pē ia. (Loma 6:​23) ʻOku ʻi ai ʻa e ngaahi tuʻunga pau tefito kuo pau ke aʻusia ʻe he tokotaha tāutaha taki taha ke taau ai ki he meʻaʻofa ko iá. Naʻe pehē ʻe Sīsū: “Naʻe ʻofa pehe ʻa e ʻOtua ki māmāni, ko ia naʻa ne foaki hono ʻAlo tofu-pe-taha-ne-fakatupu, koeʻuhi ko ia kotoa pe ʻoku tui pikitai kiate ia ke ʻoua naʻa ʻauha, kae maʻu ʻa e moʻui taʻengata.” Pea naʻe tānaki mai ki ai ʻe he ʻapositolo ko Sioné: “Ko ia ʻoku ne tui pikitai ki he ʻAlo ʻoku ne maʻu ʻa e moʻui taʻengata: ka ko ia ʻoku ʻikai te ne talangofua ki he ʻAlo ʻe ʻikai te ne mamata ia ki he moʻui.” (Sione 3:​16, 36) ʻOku hā mahino, ʻoku fiemaʻu ʻe he ʻOtuá ʻa e tui mo e talangofua mei he tokotaha tāutaha taki taha ʻa ia ʻoku ʻamanaki ke ne maʻu ʻa e fakamoʻui taʻengatá. Ko e tokotaha taki taha kuo pau ke ne fai ʻa e fili ke tali ʻa e huhuʻí pea ke muimui ʻi he ngaahi topuvaʻe ʻo Sīsuú.

11. ʻOku lava fēfē ke maʻu ʻe ha tokotaha taʻehaohaoa ʻa e hōifua ʻa Sihová?

¹¹ Koeʻuhi ʻoku tau taʻehaohaoa, ʻoku ʻikai ko ʻetau hehema fakanatulá ia ke talangofua pea ʻoku faingataʻa kiate kitautolu ke talangofua haohaoa. Ko e ʻuhinga ia naʻe tokonaki mai ai ʻe Sihova ha huhuʻi ke ʻufiʻufi ʻaki ʻetau ngaahi angahalá. Ka neongo ia, kuo pau ke tau feinga hokohoko ke moʻui ʻo fakatatau ki he ngaahi founga ʻa e ʻOtuá. Hangē ko ia naʻe tala ʻe Sīsū ki he talavou pule koloaʻiá, kuo pau ke tau tauhi ʻa e ngaahi tuʻutuʻuni ʻa e ʻOtuá. Ko hono fai iá ʻoku ʻomai ai ʻo ʻikai ngata pē ʻi he hōifua ʻa e ʻOtuá kae toe pehē foki ki he fiefia lahi, he “ʻoku ʻikai ke fakamafasia ʻene ngaahi tuʻutuʻuni”; ko kinautolú “ko ha fakaivifoʻou.” (1 Sione 5:​3, 4; Palovepi 3:​1, 8, NW [Lea Fakatātā, PM]) Neongo ia, ʻoku ʻikai faingofua ke hokohoko atu ʻi he ʻamanaki ki he fakamoʻuí.

“Fai ha Faitau Mālohi ki he Tuí”

12. ʻOku anga-fēfē hono fakaivimālohiʻi ha Kalisitiane ʻe he ʻamanaki ki he fakamoʻuí ke talitekeʻiʻaki ʻa e ngaahi fakatauele fakaeʻulungaanga taʻetāú?

¹² Naʻe loto ʻa e ākonga ko Siutasí ke tohi ki he muʻaki kau Kalisitiané fekauʻaki mo e “fakamoʻui [naʻa nau maʻu] kotoá.” Kae kehe, ko e tuʻunga kovi fakaeʻulungaanga naʻe hoko lahí naʻá ne moʻuaʻaki ai ke akonaki ki hono fanga tokouá ke nau “fai ha faitau mālohi ki he tuí.” ʻIo, ke maʻu ʻa e fakamoʻuí ʻoku ʻikai feʻunga pē ke maʻu ʻa e tuí, ke pipiki ki he tui faka-Kalisitiane moʻoní, pea ke talangofua ʻi he taimi ʻoku lele lelei ai ʻa e meʻa kotoa pē. Ko ʻetau līʻoa kia Sihová kuo pau ke mālohi feʻunga ke ne tokoniʻi kitautolu ke tau talitekeʻi ʻa e ngaahi ʻahiʻahí mo e ngaahi tākiekina fakaeʻulungaanga taʻetāú. Neongo ia, ko e lahi ʻo e fehokotaki fakasinó mo e ngaahi mioʻi taʻetotonú, taʻefakaʻapaʻapa ki he tuʻunga mafaí, ngaahi māvahevahé, mo e ngaahi veiveiuá naʻa nau fakameleʻi ʻa e tuʻunga fakaeʻulungaanga ʻa e fakatahaʻanga ʻi he ʻuluaki senitulí. Ke tokoniʻi kinautolu ke faitau mo e ngaahi hehema peheé, naʻe enginaki ʻa Siutasi ki he kaungā Kalisitiané ke tauhi māʻalaʻala ʻi he fakakaukaú ʻa ʻenau taumuʻá: “Siʻi ngaahi ʻofaʻanga, ʻi hono langa hake kimoutolu ʻi hoʻomou tui mātuʻaki māʻoniʻoní, pea mo e lotu fakataha mo e laumālie māʻoniʻoní, tauhi kimoutolu ʻi he ʻofa ʻa e ʻOtuá, lolotonga hoʻomou  tatali ki he meesi ʻa hotau ʻEiki ko Sīsū Kalaisí fakataha mo e vakai atu ki he moʻui taʻengatá.” (Siutasi 3, 4, 8, 19-​21, NW) Ko e ʻamanaki ki hono maʻu ʻa e fakamoʻuí naʻe lava ke ne fakaivimālohiʻi kinautolu ʻi heʻenau faitau ke nau kei maʻa fakaeʻulungāngá.

13. ʻOku lava fēfē ke tau fakahaaʻi kuo ʻikai te tau liʻaki ʻa e taumuʻa ʻo e ʻofa maʻataʻatā ʻa e ʻOtuá?

¹³ ʻOku ʻamanekina ʻe Sihova ko e ʻOtuá ʻa e ʻulungaanga taau alafaʻifaʻitakiʻanga mei he tafaʻaki ʻa e faʻahinga ko ia te ne foaki ki ai ʻa e fakamoʻuí. (1 Kolinito 6:​9, 10) Kae kehe, ko e tuʻumaʻu ʻi he ngaahi tuʻunga fakaeʻulungaanga taau ʻa e ʻOtuá, ʻoku ʻikai ʻuhinga iá ko e hoko ʻo fakamāuʻi ʻa e niʻihi kehé. ʻOku ʻikai ko kitautolu ʻa e faʻahinga ke fakapapauʻi ʻa e ikuʻanga taʻengata ʻa hotau kaungā faʻahinga ʻo e tangatá. Ka, ʻe fai ia ʻe he ʻOtuá, hangē ko ia naʻe tala ʻe Paula ki he kau Kalisi ʻi ʻAtenisí: “Kuo ne kotofa ha ʻaho, ʻa ia ʻoku ne teu fakamāu ai ʻa māmani, ʻo ʻauʻautotonu, ʻo fakafai ʻi he tangata kuo ne poloʻi”​—ʻa Sīsū Kalaisi. (Ngāue 17:31; Sione 5:​22) Kapau ʻoku tau moʻui ʻi he tui ki he huhuʻi ʻa Sīsuú ʻoku ʻikai fiemaʻu ke tau manavahē ki ha ʻaho fakamaau ka hoko mai. (Hepelu 10:​38, 39) Ko e meʻa mahuʻingá kuo pau ke ʻoua ʻaupito te tau “tali ʻa e ʻofa maʻataʻatā ʻa e ʻOtuá [ʻa hotau fakalelei kiate ia fakafou ʻi he huhuʻí] pea liʻaki ʻa hono taumuʻá” ʻaki hono fakaʻatā kitautolu ke fakataueleʻi ki he fakakaukau mo e tōʻonga halá. (2 Kolinito 6:​1, NW) Tānaki atu ki ai, ʻi hono tokoniʻi ʻa e niʻihi kehé ke maʻu ʻa e fakamoʻuí, ʻoku tau fakahaaʻi ai kuo ʻikai te tau liʻaki ʻa e taumuʻa ʻo e meesi ʻa e ʻOtuá. ʻOku lava fēfē ke tau tokoniʻi kinautolu?

Vahevahe Atu ʻa e ʻAmanaki ki he Fakamoʻuí

14, 15. Ko hai naʻe vaheʻi ʻe Sīsū ke talaki ʻa e ongoongo lelei ʻo e fakamoʻuí?

¹⁴ ʻI he lave ki he palōfita ko Sioelí, naʻe tohi ʻe Paula: “ʻIlonga ʻa ia ʻe tautapa ki he huafa ʻo e ʻEiki ʻe fakamoʻui.” Naʻá ne tānaki mai leva ki ai: “Ka te nau lava fefe ke tautapa ki ha toko taha ʻoku teʻeki ke nau tui ki ai? pea te nau lava fefe ke tui ki ha toko taha kuo teʻeki ke nau fanongo ki ai? pea fefe haʻanau fanongo ʻoka ʻikai ha taha ke malanga?” ʻI he ngaahi veesi siʻi ki mui aí, naʻe fakahaaʻi ai ʻe Paula ʻoku ʻikai ke hoko fakanatula mai pē ʻa e tuí; ka, ʻoku “tupu ʻa e tui mei he fanongo,” ʻa ia, ko e “folofola ʻa Kalaisi.”—Loma 10:​13, 14, 17; Sioeli 2:​32.

¹⁵ Ko hai te ne ʻoatu ʻa e “folofola ʻa Kalaisi” ki he ngaahi puleʻangá? Naʻe vaheʻi ʻe Sīsū ʻa e ngāue ko iá ki heʻene kau ākongá​—ʻa e faʻahinga ko ia kuo ʻosi akoʻi ki ai ʻa e “folofola” ko iá. (Mātiu 24:14; 28:​19, 20; Sione 17:20) ʻI heʻetau kau ʻi he ngāue malangaʻi ʻo e Puleʻangá mo e ngaohi-ākongá, ko ʻetau fai ia ʻa e meʻa tofu pē ko ia naʻe tohi fekauʻaki mo ia ʻa e ʻapositolo ko Paulá, ʻo ne lave ai ʻi he taimi ko ení meia ʻAisea: “Hono ʻikai fakaʻofoʻofa siʻi vaʻe ʻo e kakai ʻoku ongoongo mai ha ngaahi meʻa lelei!” Neongo kapau ʻoku ʻikai tali ʻe he tokolahi ʻa e ongoongo lelei ʻoku tau ʻoatú, ʻoku kei “fakaʻofoʻofa” pē ʻa hotau vaʻé kia Sihova.—Loma 10:15; Aisea 52:7.

16, 17. Ko e hā ʻa e taumuʻa konga-ua ʻoku fakahoko ʻe heʻetau ngāue fakamalangá?

¹⁶ Ko hono fakahoko ʻa e ngāue ko ení ʻoku tokangaʻi ai ʻa e ongo taumuʻa mahuʻinga ʻe ua. ʻUluakí, ko e ongoongo leleí kuo pau ke malangaʻi ia koeʻuhi ke fakalāngilangiʻi ai ʻa e huafa ʻo e ʻOtuá pea ko e faʻahinga ko ia ʻoku nau fiemaʻu ʻa e fakamoʻuí te nau ʻilo ʻa e feituʻu ke nau hanga ki aí. Naʻe mahinoʻi ʻe Paula ʻa e tafaʻaki ko eni ʻo e ngāué. Naʻá ne fakamatala: “He ne pehē homau tuʻutuʻuni ʻe he ʻEiki, Kuo u fokotuʻu koe ko e Maama ʻo e Senitaile, ke ke hoko ko e Moʻuiʻanga ʻo aʻu ki he ngataʻanga ʻo māmani.” Ko ia ai, ʻi he tuʻunga ko e kau ākonga ʻa Kalaisí, ko kitautolu taki taha kuo pau ke tau kau ʻi hono ʻave ʻa e pōpoaki ʻo e fakamoʻuí ki he kakaí.—Ngāue 13:47; Aisea 49:6.

¹⁷ Ko hono uá, ko e malangaʻi ʻo e ongoongo leleí ʻoku fakatoka ai ʻa e makatuʻunga ki he fakamaau māʻoniʻoni ʻa e ʻOtuá. Fekauʻaki mo e fakamaau ko iá, naʻe pehē ʻe Sīsū: “ʻO ka ʻiloange ʻe hoko mai ʻa e Fanautama ʻa Tangata, kuo ne ʻai hono nāunau, pea haʻofia ia ʻe he kau angelo kotoa pe, te ne toki nofo ʻi hono taloni langilangiʻia: pea ʻe fakatahataha ki hono ʻao ʻa e ngāhi kakai kotoa pe; pea te ne vaheʻi kinautolu, ʻo hange ʻoku vaheʻi ʻe ha tauhisipi ʻa e fanga sipi mei he fanga kosi.” Neongo ko e  fakamāú mo e vahevahé ʻe fai ia ʻi he “hoko mai ʻa e Fanautama ʻa Tangata, kuo ne ʻai hono nāunau,” ko e ngāue fakamalangá ʻokú ne tokonaki ki he kakai ʻi he ʻaho ní ʻa e faingamālie ke ʻiloʻi ʻa e fanga tokoua fakalaumālie ʻo Kalaisí pea ke ngāue ai ʻi hono poupouʻi kinautolu ki honau fakamoʻui taʻengatá tonu.—Mātiu 25:​31-46.

Tauhi Maʻu ʻa e “Fakamaʻumaʻuluta Hoʻomou ʻAmanakí”

18. ʻOku lava fēfē ke tau tauhi ʻetau “amanaki . . . ki he fakamoui” ke paú?

¹⁸ Ko ʻetau kau longomoʻui ʻi he ngāue fakamalangá ko e toe founga ia ke tokoniʻi ai kitautolu ke tauhi ke pau ʻetau ʻamanakí. Naʻe tohi ʻe Paula: “ʻOku mau fakaʻamu ke ha ʻiate kimoutolu taki taha ha feinga hange ko ia, ke fakamaʻumaʻuluta hoʻomou [“ʻamanakí,” NW], ʻo aʻu ki he ngataʻanga.” (Hepelu 6:11) ʻOfa ke tau taki taha tui leva, ʻa e “tatā aki ae amanaki . . . ki he fakamoui,” ʻo manatuʻi ai “nae ikai tuutuuni akitautolu e he Otua ki he houhau, ka ke tau maʻu ae fakamoui i ho tau Eiki ko Jisu Kalaisi.” (1 Tesalonaika 5:​8, 9, PM) Tau toe tokanga foki ki he enginaki ʻa Pitá: “Teuteu homou ʻatamaí ki he ngāue, mou hanganaki ʻāʻā kakato; fokotuʻu hoʻomou ʻamanakí ʻi he ʻofa maʻataʻatā ko ia naʻe pau ke ʻoatu kiate kimoutolú.” (1 Pita 1:​13, NW) Ko e faʻahinga kotoa ʻoku nau fai iá te nau sio ki heʻenau “amanaki . . . ki he fakamoui” ʻi hono fakahoko kakató!

19. Ko e hā te tau lāulea ki ai ʻi he kupu hoko maí?

¹⁹ Lolotonga iá, ko e hā ʻoku totonu ke hoko ko ʻetau vakai ia ki he taimi ʻoku kei toe ki he fokotuʻutuʻu ko ení? ʻE lava fēfē ke tau ngāueʻaki ʻa e taimi ko iá ke maʻu ai ʻa e fakamoʻuí maʻatautolu mo e niʻihi kehé? Te tau lāulea ki he ongo fehuʻi ko iá ʻi he kupu hoko maí.

ʻE Lava Ke Ke Fakamatalaʻi?

• Ko e hā kuo pau ai ke tau tauhi ʻetau “amanaki . . . ki he fakamoui” ke paú?

• Ko e hā ʻoku kau ki he fakamoʻuí?

• Ko e hā kuo pau ke tau fai ke maʻu ai ʻa e meʻaʻofa ko e fakamoʻuí?

• Ko e hā ʻoku fakahoko ʻe heʻetau ngāue fakamalangá ʻo fakatatau ki he taumuʻa ʻa e ʻOtuá?

[Fehuʻi ki he Ako]

[Fakatātā ʻi he peesi 10]

ʻOku ʻuhinga lahi ange ʻa e fakamoʻuí ʻi he haofakiʻi pē mei he fakaʻauhá