Talanoa ki he Moʻuí

Tokoniʻi ke Ikuʻi ʻa ʻEku Maá

FAKAMATALA FAI ʻE RUTH L. ULRICH

Naʻe ʻikai ke u mapuleʻi au peá u tangi ʻi he sitepu ʻo e matapā tonu ʻo e faifekaú. Ko e toki ʻosi pē ia ʻene fakalau mai ha ngaahi ʻotu tukuakiʻi loi ʻo Charles T. Russell, ʻa ia naʻe ngāue ko e ʻuluaki palesiteni ʻo e Sōsaieti Taua Leʻo Tohitapu mo e Tulekí. Tuku ke u fakamatala ki he anga ʻo ʻeku fai ʻa e ngaahi ʻaʻahi pehē ki he kakaí, ʻi he tuʻunga ko ha kiʻi taʻahine kei siʻí.

NAʻE fāʻeleʻi au ki ha fāmili mātuʻaki lotu ʻi ha faama ʻi Nebraska, U.S.A., ʻi he 1910. Naʻe lau fakataha ʻe homau fāmilí ʻa e Tohitapú ʻi he pongipongi mo e efiafi kotoa pē ʻi he hili ʻa e ngaahi houa kaí. Ko e tangataʻeikí naʻe pule lautohi faka-Sāpate ʻi he siasi Metotisí ʻi he kiʻi kolo ko Winside, ko e kilomita nai ʻe 6 mei heʻemau fāmá. Naʻe ʻi ai ʻemau saliote toho ʻe ha hoosi naʻe puipui ʻa hono ngaahi matapā sioʻatá, ko ia ai, tatau ai pē pe naʻe fēfē ʻa e ʻeá, naʻe lava pē ke mau maʻu ʻa e lotú ʻi he pongipongi Sāpaté.

ʻI he taimi nai naʻá ku taʻu valu aí, naʻe puke ai ʻa hoku kiʻi tuongaʻane valevalé ʻi he poliō ʻa e kau pepeé, pea naʻe ʻave ia ʻe he fineʻeikí ki ha ʻapi ʻo e kau mahaki faingataʻaʻiá ʻi Iowa ke faitoʻo. Neongo ʻa ʻene tokanga līʻoá, naʻe mate ʻa hoku kiʻi tuongaʻané lolotonga ʻa ʻena ʻi aí. Kae kehe, ʻi he taimi ko iá, ʻi ai ʻi Iowa, naʻe fetaulaki ai ʻa e fineʻeikí mo ha Tokotaha Ako Tohitapu, ʻa ia ko hono ui ia ʻo e Kau Fakamoʻoni ʻa Sihová ʻi he taimi ko iá. Naʻe lahi ʻa ʻena ngaahi fetalanoaʻakí, pea naʻe aʻu ʻo ʻalu ʻa e fineʻeikí mo e fefiné ki ha ngaahi fakataha ʻa e Kau Ako Tohitapú.

ʻI he taimi naʻe foki mai ai ki ʻapi ʻa e fineʻeikí, naʻá ne haʻu ai mo ha ngaahi voliume ʻe niʻihi ʻo e Studies in the Scriptures, ʻa ia naʻe pulusi ʻe he Sōsaieti Taua Leʻó. Naʻe vave pē ʻa ʻene tuipau naʻe akoʻi ʻe he Kau Ako Tohitapú ʻa e moʻoní pea ko e ngaahi akonaki ko ia ʻo kau ki he taʻefaʻamate ʻa e soulu fakaetangatá pea mo e fakamamahi taʻengata ʻo e kau fulikivanú naʻe ʻikai ke moʻoni.​—Senesi 2:7; Koheleti 9:​5, 10 (Tagata Malaga, PM); Isikeli 18:4.

Kae kehe, ko e tangataʻeikí, naʻá ne loto-mamahi  ʻaupito, pea naʻá ne fakafepakiʻi ʻa e ngaahi feinga ʻa e fineʻeikí ke maʻu ʻa e ngaahi fakataha ʻa e Kau Ako Tohitapú. Naʻá ne hanganaki ʻave ʻe ia au mo hoku tuongaʻane lahi haké, ko Clarence, ki he lotú. Ka ʻi he taimi naʻe ʻikai ke ʻi ʻapi ai ʻa e tangataʻeikí, naʻe ako Tohitapu ʻa e fineʻeikí mo kimaua. Ko hono olá, ko kimaua fānaú naʻá ma maʻu ha faingamālie lelei ke fakahoa ʻa e ngaahi akonaki ʻa e Kau Ako Tohitapú mo e ngaahi akonaki ko ia ʻa ʻemau lotú.

Ko Clarence mo au naʻá ma maʻu maʻu pē ʻa e lautohi faka-Sāpate ʻi he lotú, pea naʻá ne ʻeke ki he failautohí ʻa e ngaahi fehuʻi naʻe ʻikai lava ke ne tali. ʻI heʻema aʻu ki ʻapí, naʻá ma tala ia ki heʻema faʻeé, pea naʻe iku ia ki he ngaahi fetalanoaʻaki lōloa ʻi he ngaahi tuʻunga-lea ko iá. Faifai pē, naʻá ku mavahe mei he siasí pea kamata ke maʻu ʻa e ngaahi fakataha ʻa e Kau Ako Tohitapú fakataha mo e fineʻeikí, pea ʻikai fuoloa mei ai naʻe fai ʻe Clarence ʻa e meʻa tatau.

Fekuki mo e Maá

ʻI Sepitema 1922, naʻá ku maʻu ai mo e fineʻeikí ʻa e fakataha-lahi fakangalongataʻa ʻa e Kau Ako Tohitapú ʻi Cedar Point, Ohio. ʻOku ou kei lava pē ke sio atu ki hono folahi hake ʻo e fuʻu tupenú ʻi he hanga ko ia ʻe Joseph F. Rutherford, ko e palesiteni ʻo e Sōsaieti Taua Leʻó ʻi he taimi ko iá, ʻo uki ʻa e toko 18,000 tupu naʻa nau maʻu fakatahá, ʻaki ʻa e ngaahi lea ʻi he fuʻu tupenú: “Tuʻuaki ʻa e Tuʻí mo e Puleʻangá.” Naʻe ueʻi lahi ai au peá u ongoʻi ʻa e tuʻunga fakavavevave ke talanoa ki he niʻihi kehé fekauʻaki mo e ongoongo lelei ʻo e Puleʻanga ʻo e ʻOtuá.​—Mātiu 6:​9, 10; 24:14.

ʻI he ngaahi fakataha-lahi naʻe fai mei he 1922 ki he 1928, naʻe tali ai ha ngaahi fakapapau hokohoko, pea ko e ngaahi pōpoakí naʻe fakatahatahaʻi ia ki ha ngaahi tuleki ʻa ia naʻe tufaki ʻe he Kau Ako Tohitapú ʻa e laui hongofuluʻi miliona ki he kakai ʻi he māmaní kotoa. Naʻá ku tutue mo ualoa​—naʻa nau ui au ko e kulī pahau​—pea naʻá ku fakavave mei he fale ki he fale ʻi hono tufaki ʻo e ngaahi pōpoaki ko eni naʻe pulusí. Naʻá ku fiefia moʻoni ʻi he ngāue ko ení. Ka, ko e talanoa ʻi he ngaahi matapaá, ʻo talanoa fakafoʻituitui ki he niʻihi kehé fekauʻaki mo e Puleʻanga ʻo e ʻOtuá, ko e toe meʻa ia ʻe taha.

Ko hono moʻoní, naʻá ku fuʻu mā lahi he naʻe aʻu ʻou fakatuʻatamaki ʻi he taimi naʻe fakaafeʻi mai ai ʻe he fineʻeikí ha fuʻu kāinga tokolahi ʻi he taʻu taki taha. Naʻá ku pulia ki hoku loki mohé ʻo nofo ai. ʻI he taimi ʻe taha, naʻe loto ʻa e fineʻeikí ke faitaaʻi ʻa e kotoa ʻo e fāmilí, pea naʻá ne tala mai ke u hū mai ki tuʻa. ʻI he ʻikai ke u loto ke kau fakataha mo  kinautolú, naʻá ku kikī ʻi heʻene mātuʻaki toho atu au ki tuʻa mei hoku lokí.

Kae kehe, naʻe hoko mai ʻa e ʻaho, ʻa ia naʻá ku fakapapauʻi ai ke faʻo ha ngaahi tohi faka-Tohitapu ʻi ha kato. Naʻá ku toutou pehē pē, “heʻikai lava ʻo fai ia,” ka ʻi he mōmeniti hokó naʻá ku pehē hifo kiate au, “kuo pau ke u fai ia.” Faifai pē, naʻá ku ʻalu ʻo malanga. Hili iá, naʻá ku fiefia ʻaupito ʻi he faifai pē peá u loto-toʻa ke ʻalú. Ko ʻeku fiefia lahi tahá naʻe ʻi hono fai ko ia ʻo lava ʻa e ngāué, kae ʻikai ko hono fai tonu iá. Meimei ko e taimi ia naʻá ku fetaulaki ai mo e faifekau naʻá ku lave ki ai ki muʻa angé peá u mavahe tangi mei aí. ʻI he faai mai ʻa e taimí, fakataha mo e tokoni ʻa Sihová naʻá ku malava ai ke talanoa ki he kakaí ʻi honau ngaahi matapaá, pea naʻe fakautuutu ai ʻa ʻeku fiefiá. ʻI he 1925 leva, naʻá ku fakahāhā ai ʻa ʻeku fakatapui kia Sihová ʻaki ʻa e papitaiso ʻi he vaí.

Kamata ʻi he Ngāue Fakafaifekau Taimi-Kakató

ʻI he taimi naʻá ku taʻu 18 aí, naʻá ku fakatau mai ai ha kā mei he paʻanga naʻá ku maʻu tukufakaholo mei hoku mehikitanga peá u kamata tāimuʻa, hangē ko ia ʻoku ui ʻaki ʻa e ngāue fakafaifekau taimi-kakató. ʻI he taʻu ʻe ua ki mui aí, ʻi he 1930, ko au mo ha hoa tāimuʻa naʻá ma tali ha vāhenga-ngāue fakamalanga. ʻI he taimi ko ení ne kamata tāimuʻa foki ai mo Clarence. Hili pē iá naʻá ne tali ha fakaafe ke ngāue ʻi Pēteli, ʻa e ʻuluʻiʻōfisi ʻo e Kau Fakamoʻoni ʻa Sihová ʻi he māmaní ʻi Brooklyn, Niu ʻIoke.

ʻI he taimi nai ko ení naʻe māvae ai ʻema ongo mātuʻá, ko ia ko e fineʻeikí mo au naʻe langa homa fale taulani peá ma kamata tāimuʻa fakataha. Naʻe hoko ia ʻi he taimi naʻe aʻu mai ai ʻa e Fuʻu Feʻamokaki Fakaʻikonōmiká ki he ʻIunaite Seteté. Ke hokohoko atu ʻi he ngāue tāimuʻá naʻe hoko ia ko ha pole lahi, ka naʻá ma fakapapauʻi ke ʻoua naʻa tuku. Naʻá ma fakafetongi ʻa e ngaahi tohi faka-Tohitapú ʻaki ʻa e fanga moa, fuaʻimoa, mo e fua ʻo e ngoué, pea pehē ki he ngaahi meʻa hangē ko e ngaahi foʻi maka kasa motuʻa mo e ʻalaminiume liʻakí. Ko e maka kasá mo e ʻalaminiumé naʻá ma fakatau atu ia ʻo maʻu ai ʻa e paʻanga ke fakatau mai ʻaki ʻa e penisini ki he kaá pea ke feauʻaki ʻa e ngaahi fakamole kehé. Naʻá ku toe ako ke fana ngako ʻa e kaá mo fetongi lolo ke hao ai ʻa e paʻangá. Naʻá ma sio ai, ki he fai moʻoni ʻa Sihova ki heʻene talaʻofá, ʻo fakaʻatā ʻa e halá ke tokoniʻi kimaua ke ma ikuʻi ʻa e ngaahi fakafaingataʻaʻiaʻangá.​—Mātiu 6:​33.

Mavahe ki he Ngaahi Vāhenga-Ngāue Fakamisinalé

ʻI he 1946, naʻe fakaafeʻi ai au ke kau ki he kalasi hono fitu ʻa e Akoʻanga Taua Leʻo Tohitapu ko Kiliatí, ʻa ia naʻe tuʻu ofi ki South Lansing, Niu ʻIoke. ʻI he aʻu mai ki he taimi ko ení kuó u tāimuʻa fakataha ai mo e fineʻeikí ʻo laka hake ʻi he taʻu ʻe 15, neongo ia naʻe ʻikai te ne loto ke taʻofi ʻa hoku faingamālie ke maʻu ʻa e ako ki he ngāue fakamisinalé. Ko ia, naʻá ne fakalototoʻaʻi au ke u tali ʻa e monū ke kau ki he Akoʻanga Kiliatí. Hili ʻeku maʻu tohi fakamoʻoni akó, naʻá ku hoko ai ʻo hoa mo Martha Hess ʻo Peoria, Illinois. Ko kimaua, fakataha mo e toko ua kehe, naʻe vaheʻi ki Cleveland, Ohio, ki he taʻu ʻe taha lolotonga ia ʻemau tatali ki ha vāhenga-ngāue ki muli.

Naʻe hoko mai ʻa e vāhenga-ngāue ko iá ʻi he 1947. Naʻe vaheʻi ai au mo Martha ki Hauaiʻi. Koeʻuhi naʻe faingofua ke ʻalu ki he ngaahi motu ko ení, naʻe haʻu ai ʻa e fineʻeikí ʻo nofo ofi mai kiate kimaua ʻi he kolo ko Honolulú. Naʻe faai hifo ki lalo ʻa ʻene tuʻunga moʻuí, ko ia ai, naʻá ku tokangaʻi ʻa ʻeku ngaahi ngāue fakamisinalé fakataha mo hono tokoniʻi ʻa e fineʻeikí. Naʻá ku malava ke tokangaʻi ia ʻo aʻu ki heʻene mālōlō ʻi Hauaiʻi ʻi he 1956, ʻi hono taʻu 77. ʻI he taimi naʻá ma aʻu atu aí, naʻe ʻi ai nai ʻa e Kau Fakamoʻoni ʻe toko 130 ʻi Hauaiʻi, ka ʻi he aʻu mai ki he taimi naʻe mate ai ʻa e fineʻeikí, naʻe laka hake ʻi he toko taha afé, pea naʻe ʻikai ke kei fiemaʻu ai ha kau misinale.

Naʻá ku maʻu leva ai mo Martha ha tohi mei he Sōsaieti Taua Leʻó ʻa ia naʻe tuʻuaki mai ai kiate kimaua ha vāhenga-ngāue ʻi Siapani. Ko e meʻa naʻá ma ʻuluaki tokanga ki aí pe ʻe lava ʻi homa taʻumotuʻá ke ako ʻa e lea faka-Siapaní. Naʻá ku taʻu 48 ʻi he taimi ko iá, pea naʻe siʻi hifo ʻaki pē ʻe Martha ʻa e taʻu ʻe fā. Ka naʻá ma tuku ʻa e meʻá ki he toʻukupu ʻo Sihová pea tali ʻa e vāhenga-ngāué.

Hili pē ʻa e fakataha-lahi fakavahaʻapuleʻanga ʻi he Yankee Stadium mo e Polo Grounds ʻi Kolo Niu ʻIoke  ʻi he 1958, naʻá ma mavahe ai ki Tōkiō ʻi ha vaka. Naʻe haha kimautolu ʻe ha afā lahi ʻi heʻemau fakaofiofi atu ki he taulanga ʻi Yokohama, ʻa ia naʻe fakafetaulaki mai ai kiate kimaua ʻa Don mo Mabel Haslett, Lloyd mo Melba Barry, pea mo e kau misinale kehe. ʻI he taimi ko iá, naʻe toko 1,124 pē ʻa e Kau Fakamoʻoni ʻi Siapaní.

Naʻá ma kamata leva ke ako ʻa e lea faka-Siapaní pea kau ʻi he ngāue fakafaifekau matapā-ki-he-matapaá. ʻI hono ngāueʻaki ʻa e ʻalafapeti faka-Pilitāniá, naʻá ma hiki ʻaki ia ʻa ʻema ngaahi tuʻuaki faka-Siapani, ʻa ia te ma laú. ʻI he tali ki aí ʻe pehē mai ʻa e faʻahinga ʻi he ʻapí, “Yoroshii desu” pe, “Kekko desu,” ʻa ia naʻá ma ako ʻoku ʻuhingá, “ʻOku lelei” pe, “ʻOku sai.” Ka naʻe ʻikai te ma ʻiloʻi maʻu pē pe naʻe mahuʻingaʻia ʻa e tokotaha-ʻapí pe ʻikai, koeʻuhi he naʻe toe ngāueʻaki pē ʻa e ngaahi foʻi lea ko iá ke fakahaaʻiʻaki ʻa e taʻetalí. Ko e ʻuhingá naʻe makatuʻunga ia ʻi he tō ʻo e leʻo naʻe ngāueʻakí pe ko e anga ʻo e fōtunga ʻo e tokotahá. Naʻe fiemaʻu ʻa e taimi kiate kimaua ke ma ako ai ke fakaʻuhingaʻi ʻa e ngaahi meʻá ni.

Ngaahi Meʻa Naʻe Hokosia Naʻe Fakamāfana ki Hoku Lotó

ʻI he kei fāinga mo e leá, naʻá ku ʻaʻahi ai ʻi he ʻaho ʻe taha ki ha fale nofoʻanga ʻo ha Kautaha Mitsubishi ʻo fetaulaki ai mo ha fefine taʻu 20. Naʻá ne fakalakalaka lelei ʻi he ʻilo faka-Tohitapú pea naʻá ne papitaiso ʻi he 1966. ʻI ha taʻu ʻe taha ki mui ai naʻá ne kamata tāimuʻa ai pea ʻi he hili iá naʻe vave ʻa hono fakanofo ia ko ha tāimuʻa makehe. Kuó ne ngāue pehē talu mei ai. Kuo hoko maʻu pē ko ha tākiekina kiate au ke sio ki he founga ʻo ʻene ngāueʻaki ʻa hono taimí mo hono iví mei heʻene finemuí ʻo faai mai ai ʻi he ngāue fakafaifekau taimi-kakató.

Ko e tuʻu maʻá e moʻoni ʻo e Tohitapú ko ha pole ia ʻa ia ʻoku tautefito ʻa ʻene lahí ki he kakai ʻoku nau nofo ʻi ha sōsaieti ʻikai Kalisitiané. Neongo ia, kuo fekuki ʻa e laui afe tokolahi mo e pole ko ení, ʻo kau ai ha tokolahi ʻo e faʻahinga naʻá ku ako Tohitapu  mo kinautolú. Kuo nau hanga ʻo liʻaki ʻa e ngaahi ʻōlita totongi-mamafa lotu-Putá mo e ngaahi funga laupapa Sinitō ko ia ʻoku maʻu talatukufakaholo ʻi he ngaahi ʻapi faka-Siapaní. Koeʻuhi ʻoku fakaʻuhingahalaʻi ʻi he taimi ʻe niʻihi ʻe he ngaahi kāingá ʻa e ngaahi tōʻonga peheé ko e taʻefakaʻapaʻapa ki he fanga kui kuo maté, ʻoku fiemaʻu ai ʻa e loto-toʻa ki he faʻahinga foʻoú ke nau fai ʻa e meʻá ni. Ko ʻenau ngaahi tōʻonga loto-toʻá ʻoku fakamanatu mai ai ʻa e faʻahinga ʻo e muʻaki kau Kalisitiane ko ia naʻa nau hanga ʻo liʻaki ʻa e ngaahi meʻa naʻe fekauʻaki mo e lotu loí.​—Ngāue 19:​18-​20.

ʻOku ou manatuʻi ha tokotaha ako Tohitapu ʻe taha, ko ha uaifi tauhi ʻapi, ʻa ia naʻá ne palani ke ne mavahe mei Tōkiō mo hono fāmilí. Naʻá ne loto ke hiki ki ha ʻapi foʻou ʻa ia naʻe ʻatā mei he ngaahi meʻa naʻe kaunga ki he lotu fakapanganí. Ko ia, naʻá ne tala ange ai ki hono husepānití ʻa ʻene ngaahi fakaʻamú, pea naʻá ne kaungā loto-lelei ki ai. Naʻá ne talanoa fiefia mai kiate au fekauʻaki mo ia ka naʻá ne toki manatuʻi hake ai kuó ne faʻo ha fuʻu vaasi māpele totongi-mamafa ʻa ia naʻá ne fakatau mai koeʻuhi he naʻe ʻi ai ʻa e pehē ʻokú ne fakapapauʻi mai ʻa e fiefia ʻi he ʻapí. Koeʻuhi he naʻá ne huʻuhuʻu fekauʻaki mo ʻene ngaahi fekauʻaki mo e lotu loí, naʻá ne fahiʻaki ʻa e vāsí ha hamala pea liʻaki ia.

ʻI he sio ki he fefiné ni mo e niʻihi kehe ko ia naʻa nau loto-lelei ke liʻaki ʻa e ngaahi meʻa totongi-mamafa naʻe fekauʻaki mo e lotu loí pea kamata loto-toʻa ha moʻui foʻou ʻo e ngāue kia Sihová kuo hoko ia ko ha meʻa mātuʻaki mahuʻinga, mo fakafiemālie ia kiate au. ʻOku ou fakamālō maʻu pē kia Sihova ʻi heʻeku malava ke fiefia ʻi he ngaahi taʻu laka hake he 40 ʻi he ngāue fakamisinalé ʻi Siapani.

“Ngaahi Mana” ʻi Onopooni

ʻI heʻeku sio atu ki hoku ngaahi taʻu ʻe 70 tupu ʻi he ngāue fakafaifekau taimi-kakató, ʻoku ou ofo ʻi he meʻa ʻoku hā mai kiate au ko e ngaahi mana ʻi onopooni. ʻI he tuʻunga ko ha toʻutupu naʻe faingataʻaʻia ʻi he maá, naʻe ʻikai ʻaupito haʻaku fakakaukau ʻe lava ke u fakamoleki ʻa e kotoa ʻo ʻeku moʻuí ʻi he tamuʻomuʻa ke talanoa ki he kakaí fekauʻaki mo ha Puleʻanga ʻa ia naʻe ʻikai loto ʻa e tokolahi tahá ke fanongo ki ha meʻa pē fekauʻaki mo ia. Kae kehe, ʻoku ʻikai ngata pē ʻi heʻeku malava ke fai iá ka kuó u sio ki he lauingeau, kapau ʻoku ʻikai ko e laui afe, ʻo e  niʻihi kehe ʻoku nau fai ʻa e meʻa tatau. Pea kuo nau fai ia mo ha ola lelei he ko e laka siʻi hake ʻi he Kau Fakamoʻoni ʻe toko taha afe ʻa ia naʻa nau ʻi Siapani ʻi he taimi naʻá ku aʻu atu ai ʻi he 1958 kuo tupulaki ia ʻo laka hake he toko 222,000 ʻi he ʻahó ni!

ʻI he taimi naʻá ma ʻuluaki tūʻuta ai mo Martha ʻi Siapaní, naʻe vaheʻi kimaua ke ma nofo ʻi he ʻōfisi vaʻa ʻi Tōkioó. ʻI he 1963, naʻe langa ai ha fale fungavaka ono foʻou ʻo e vaʻá ʻi he tuʻuʻanga ko iá, pea kuó ma nofo ai talu mei ai. ʻI Nōvema 1963 naʻá ma kau ʻi he faʻahinga ko ia ʻe toko 163 naʻa nau ʻi ai ʻi he malanga fakatapui naʻe fai ʻe heʻemau ʻovasia vaʻá, ko Lloyd Barry. ʻI he aʻu mai ki he taimi ko ení ne mau aʻu ai ki he Kau Fakamoʻoni ʻe toko 3,000 ʻi Siapani.

Ko ha meʻa fakafiefia ia ke sio ki he tupu fakaofo ʻa e ngāue malangaʻi ʻo e Puleʻangá, ʻi heʻene aʻu ki he toko 14,000 tupu ʻi he 1972 ʻi he taimi naʻe kakato ai ha vaʻa foʻou naʻe fakalahi ʻi he kolo ko Numazu. Ka ʻi he aʻu mai ki he 1982 naʻe laka hake he toko 68,000 ʻa e kau fanongonongo ʻo e Puleʻangá ʻi Siapaní, pea naʻe langa ha ʻōfisi vaʻa lahi ʻaupito ange ʻi he kolo ko Ebina, ko e kilomita ia ʻe 80 mei Tōkiō.

Lolotonga ení, naʻe fakaleleiʻi ʻa e fale vaʻa ki muʻa ʻi loto Tōkioó. Naʻe faai mai pē, ʻo hoko ia ‘ko ha ʻapi misinale ki he kau misinale laka hake he toko 20 ʻa ia naʻa nau ngāue ʻi Siapani feʻunga mo e taʻu ʻe 40 pe 50 pe lōloa ange ai, ʻo kau ai au mo hoku hoa taimi fuoloá, ʻa Martha Hess. Ko ha toketā mo hono uaifí, ʻa ia ko ha neesi, ʻokú na nofo foki ʻi homau ʻapí. ʻOkú na tokangaʻi kimautolu, ʻo tokanga anga-ʻofa ki heʻemau ngaahi fiemaʻu fakaemoʻui leleí. Ki muí ni mai, naʻe toe tānaki mai ai ha neesi ʻe taha ki he kau ngāué, pea ʻoku haʻu ʻa e fanga tuofāfine Kalisitiane ko e kau neesi tokoni lolotonga ʻa e ʻahó. ʻOku haʻu ʻa e ongo mēmipa ʻe toko ua ʻo e fāmili Pēteli ʻi Ebina ʻi ha tuʻunga fetongitongi ke teuteu ʻa e ngaahi houa kaí mo fakamaʻa homau ʻapí. Ko e moʻoni, kuo anga-lelei mai ʻa Sihova kiate kimautolu.​—Sāme 34:​8, 10.

Ko ha meʻa mahuʻinga ʻi heʻeku moʻui fakamisinalé naʻe hoko ia ʻi Nōvema taʻu kuo ʻosí, ko e taʻu ia ʻe 36 hili hono fakatapui ʻo e fale ʻa ia ʻoku mau lolotonga nofo ai ʻa e tokolahi ʻo e kau misinale taimi fuoloá. ʻI Nōvema 13, 1999, naʻá ku kau ai ʻi he faʻahinga ʻe toko 4,486, ʻo kau ai ʻa e Kau Fakamoʻoni taimi fuoloa ʻe lauingeau mei he ngaahi fonua ʻe 37, naʻe kau ʻi he fakatapui ʻo e ngaahi fale fakalahi ʻi he vaʻa ʻi Siapani ʻo e Sōsaieti Taua Leʻo Tohitapu mo e Tuleki ʻi Ebina. ʻI he lolotonga ní, ʻoku ʻi ai ʻa e toko 650 nai ʻi he fāmili ʻo e vaʻa ko iá.

Lolotonga ʻa e meimei taʻu ʻe 80 talu mei heʻeku kamata ʻalu ilifia ʻi he fale ki he falé ʻo ʻoatu ʻa e ngaahi pōpoaki faka-Tohitapú, mo e hoko ʻa Sihova ko ha tokoni fakaivimālohi kiate au. Kuó ne tokoniʻi au ke ikuʻi ʻa ʻeku maá. ʻOku ou tui mālohi ʻe lava ke ngāueʻaki ʻe Sihova ha taha pē ʻoku tuku ange ʻa ʻene falalá kiate ia, naʻa mo e faʻahinga ʻa ia ʻoku nau mā lahi ʻo hangē ko aú. Pea ko ha moʻui fakafiemālie moʻoni ē kuó u maʻu ʻi he talanoa ki he kau solá fekauʻaki mo hotau ʻOtuá, ʻa Sihova!

[Fakatātā ʻi he peesi 21]

Mo e fineʻeikí pea mo Clarence, ʻa ia naʻe ʻaʻahi mai kiate kimaua mei Pēteli

[Fakatātā ʻi he peesi 23]

Kau mēmipa ʻo ʻemau kalasí ʻi he ako ʻi tuʻa he musié ʻi he Akoʻanga Kiliatí ofi ki South Lansing, Niu ʻIoke

[Fakatātā ʻi he peesi 23]

Toʻohema: Ko au, Martha Hess, mo e fineʻeikí, ʻi Hauaiʻi

[Fakatātā ʻi he peesi 24]

Toʻomataʻu: Kau mēmipa ʻo homau ʻapi misinale ʻi Tōkioó

[Fakatātā ʻi he peesi 24]

ʻI laló: Mo hoku hoa taimi fuoloá, ʻa Martha Hess

[Fakatātā ʻi he peesi 25]

Ko homau ngaahi fale vaʻa fakalahi ʻi Ebina naʻe fakatapui ʻi Nōvema taʻu kuo ʻosí