Līpooti ʻa e Kau Kanongonongo ʻo e Puleʻangá

ʻOku Mahuʻinga kia Sihova ʻa e Faʻahinga ʻOku ʻOfa Kiate Iá

KUO ʻiloa ʻa Lepanoni ʻi hono ngaahi koloa fakanatulá talu mei he ngaahi taimi ʻo e Tohitapú. (Sāme 72:16; Aisea 60:13 [Isaia, PM]) Ko e meʻa naʻe tautefito ʻa ʻene mahuʻingá ko hono ngaahi sita fakaʻofoʻofá, ʻa ia naʻe fiemaʻu lahi ia ʻi heʻenau hoko ko ha naunau langa koeʻuhi ko honau fakaʻofoʻofá, namu leleí, mo tolongá. ʻI he ʻuluaki senitulí, naʻe hoko mai ai ha meʻa mahuʻinga ange mei Lepanoni. ʻOku līpooti ʻe he Kōsipeli ʻa Maʻaké ʻo pehē ʻi he feituʻu ki muʻa ʻo Lepanoní, mei Taia mo Saitoni, “ko e fuʻu kakai, naʻa nau ōmi kiate ia, heʻenau fanongo ki he ngāhi meʻa ʻoku ne [Sīsū] fai.”​—Maake 3:8.

ʻOku tatau pē ʻi he ʻahó ni, ʻoku hokohoko atu ʻa Lepanoni ke fakatupu ʻa e fua ʻa ia ʻoku mahuʻinga ʻaupito ia ʻi he ʻafio mai ʻa Sihová. ʻOku fakamatalaʻi mai ʻeni ʻe he ngaahi meʻa naʻe hokosia hoko haké.

• Ko ha talavou Fakamoʻoni ko hono hingoá ko Wissam naʻe kole ange ke ne fai ha lea miniti ʻe 30 ki heʻene kalasi ʻi he ʻapiakó. Naʻe fakakaukau ʻa Wissam ko ha faingamālie lelei ia ke fai ai ha fakamoʻoni. Ko ia, naʻá ne ngāueʻaki ʻa e tohi Life​—How Did It Get Here? By Evolution or by Creation? peá ne teuteu ha malanga ʻi he kaveinga ʻo e fakatupú. Kae kehe, ʻi he sio ki he fakamatalá, naʻe pehē ai ʻe he faiako ʻa Wissam koeʻuhi ko ha kaveinga mahuʻinga ia, ʻe malava ke fakalahi ai ʻe Wissam ʻene malangá ki he miniti ʻe 45.

ʻI he kamata ʻe Wissam ʻene malangá, naʻe taʻofi ia ʻe heʻene faiakó peá ne fekau ke haʻu ʻa e pule-akó. Naʻe vave ʻa e aʻu mai ʻa e pule-akó, pea naʻe kamata leva ʻa Wissam. ʻI heʻene fanongo ki he ngaahi fehuʻi naʻe fokotuʻu mai ʻe Wissam ʻi he talateu ʻo ʻene malangá, naʻe fiefia ʻa e pule-akó peá ne pehē ʻoku totonu ki he tokotaha ako kotoa pē ke ne maʻu ha fotokopi ʻo e malangá.

ʻI ha taimi siʻi mei ai ko ha faiako ʻe taha, ʻa ia naʻe fakalaka hake ai, ʻo ne fakatokangaʻi ʻa e fiefia ʻi he loki-akó peá ne fakaʻekeʻeke ʻa e meʻa naʻe hokó. ʻI he taimi naʻe fakahā ange ai kiate iá, naʻá ne ʻeke ange pe naʻe feinga ʻa Wissam ke fakamoʻoniʻi ʻa e fakatupú pe ko e tuputupumālié. “Fakatupú,” ko e talí mai ia. ʻI he ʻilo ko ia ko Wissam ko e taha ʻo e Kau Fakamoʻoni ʻa Sihová, naʻe tala ange ʻe he faiakó ki he kalasí: “Te mou sio ʻi heʻene malangá ʻoku poupouʻi ʻe he saienisí ʻa e fakatupú, kae ʻikai ko e tuputupumālié.”

Naʻe hā mahino naʻe maʻu ʻe he faiako ko ʻení ha tatau ʻo e tohi Creation pea naʻá ne ngāueʻaki ia ke fakahoko ʻaki ʻa e ngaahi lea ʻi he ʻunivēsití! Ki muʻa ke ne mavahé, naʻá ne kole ange pe ʻe lava ke ne toe foki mai ʻi he ʻaho hono hokó mo ʻene fānau akó koeʻuhí ke malanga ʻa Wissam ki heʻene kalasí. Naʻe iku atu ia ki ha toe faifakamoʻoni lelei ʻe taha kia Sihova.

• Ko Nina taʻu uoua naʻe fieinua ia ki he ngaahi vai ʻo e moʻoní. ʻI he ʻaho ʻe taha naʻe ʻoange ai kiate ia ʻe he tamasiʻi ʻokú ne tuongaʻaneʻaki ha Tohitapu peá ne fakafeʻiloaki ia ki he Siasi Penitekosí. Naʻe lau ʻe Nina ʻa e Tohitapú fakataha mo e fiefia peá ne ako mei he meʻa naʻá ne laú ko e kau Kalisitiané ʻoku totonu ke nau malanga, ko ia naʻá ne kamata lea ki hono ngaahi mahení. Ko e tokotaha kotoa pē naʻá ne lea ki aí naʻa nau ʻeke ange kiate ia: “Ko e taha koe ʻo e Kau Fakamoʻoni ʻa Sihová?” Naʻe fakapuputuʻuʻi ai ia.

ʻI he taʻu ʻe ono ki mui ai, naʻe ʻaʻahi atu ai ʻa e Kau Fakamoʻoni ʻa Sihová ki he ʻapi ʻo Niná pea talanoa ange kiate ia fekauʻaki mo e Puleʻanga ʻo e ʻOtuá. ʻI he ʻuluaki taimí naʻá ne feinga ke maʻu ha hala ʻi heʻenau ngaahi akonakí. Kae kehe, naʻá ne ʻilo ai ko e kotoa ʻo ʻenau ngaahi talí naʻe ʻuhinga lelei pea makatuʻunga ʻi he Tohitapú.

Ko e meʻa naʻe faai atu pē ʻo ako ʻe Nina​—ko e huafa ʻo e ʻOtuá, ko Sihova; ko e ngaahi tāpuaki ʻo e Puleʻangá; pea mo e hā fua​—ʻo fakatuipauʻi ai ia kuó ne maʻu ʻa e moʻoní. Naʻá ne fakatapui ʻene moʻuí ki he ʻOtuá pea papitaiso. ʻI he taʻu ʻe fitu kuo maliu atú, naʻe ngāue ʻa Nina ʻi ha tuʻunga ko ha tokotaha ʻevangeliō taimi-kakato. Ko e moʻoni, ʻoku tāpuakiʻi ʻe Sihova ʻa e faʻahinga ko ia ʻoku nau ʻofa moʻoni kiate iá.​—1 Kolinito 2:9.