Ko ha Lahi Fau ʻo e Tāufehiʻá

“ʻOku ʻikai ʻaupito maheni ʻa e kakaí mo e kakai ʻoku nau tāufehiʻa ki aí.”—JAMES RUSSELL LOWELL, KO E TOKOTAHA-FAʻU ʻĒSEI MO HA FAKAFOFONGA FAKAPULEʻANGA.

ʻOKU hā ngali ʻoku takatakaiʻi kotoa kitautolu ʻi he ʻahó ni ʻe he tāufehiʻá. Ko e ngaahi hingoa ko ia hangē ko Tīmoa Hahaké, Kosovou, Laipīlia, Lītolotoni, mo Salievo​—pea pehē ki he poupou ʻo e Nasí, ʻulu pokó, mo e kau hinehina māʻolungá—kuo maongo ia ki hotau ʻatamaí fakataha mo e ngaahi fakakaukau ʻoku nofo ʻi hotau ʻatamaí fekauʻaki mo e ngaahi toetoenga malala ʻo ha maumau, ko e ngaahi malaʻe lalahi naʻe toki keli foʻou, pea mo e ngaahi ʻangaʻanga.

Ko ha ngaahi taumuʻa ki ha kahaʻu ʻatā mei he tāufehiʻá, vākoví, mo e fakamālohí kuo movete ia. Ko Danielle Mitterand, ko e uaifi ʻo e palesiteni Falanisē kuo mālōloó, naʻá ne manatu fekauʻaki mo ʻene kei finemuí: “Naʻe misi ʻa e kakaí fekauʻaki mo e nofo tauʻatāina ʻi ha sōsaieti fetokouaʻaki ʻe lava ke nau falala ki ai; ʻo nau nonga ʻi heʻenau nofo ʻi he lotolotonga ʻo e niʻihi kehé pea ʻi he fakataha mo kinautolú; naʻa nau misi fekauʻaki mo e nofo ʻi ha tuʻunga moʻui lelei, melino mo e moʻui ngeia ʻi ha māmani mālohi mo nima-homo ʻa ia ʻokú ne tokangaʻi kinautolu.” Ko e hā ne hoko ki he ngaahi fakakaukauloto ko iá? Naʻá ne fakahaaʻi mamahi: “ʻI ha vaeuaʻi senituli ki mui ai, ne ʻohofi moʻoni ai ʻemau ngaahi misí.”

Ko e toe fakaake lolotonga ʻa e tāufehiʻá heʻikai pē lava ke tukunoaʻi ia. ʻOku mafolalahia lahi ange ia, pea ʻoku hā ia ʻi he ngaahi tuʻunga tupulekina mataʻāʻā. Ko e ongoʻi ʻo e malu fakatāutaha ko ia ʻoku ʻamanaki ki ai ʻa e laui milioná kuo hōloa ia ʻi he mafola ʻo e ngaahi ngāue vale ʻo e tāufehiʻá, ʻo hā ngali fakalilifu ange ʻa e ngāue taki taha ʻi he ngāue ko ia ki muʻá. Neongo kapau ʻoku tau ʻatā mei he tāufehiʻá ʻi hotau ʻapí, pe ʻi hotau fonuá, ʻoku tatali mai ia kiate kitautolu ʻi ha feituʻu kehe. Ngalingali ʻoku tau sio ki he fakamoʻoni ki aí he ʻaho kotoa pē ʻi he ngaahi ongoongo he puha televīsoné mo e ngaahi fakamafola he ngaluʻeá ʻo e ngaahi meʻa ʻoku lolotonga hokó. Ko e niʻihi ai kuo aʻu ʻo mafola atu ia ki he ʻInitanetí. Vakai angé ki ha ngaahi fakatātā siʻi pē.

Kuo mamata ʻa e hongofuluʻi taʻu fakamuimuí ki ha malanga hake taʻehanotatau ki muʻa ʻo e mamahiʻi fonuá. Ko e “mamahiʻi fonuá,” ko e fakamatala ia ʻa Joseph S. Nye, Siʻi, ko e talēkita ʻo e Senitā Harvard ki he Ngaahi Meʻa Fakavahaʻapuleʻangá, “ʻoku hoko ia ʻo mālohi ange ʻi he konga lahi taha ʻo e māmaní, ʻo ʻikai vaivai ange. ʻI he ʻikai hoko ko ha kulupu fakalūkufua pē ʻe tahá ʻoku ʻi ai ʻa e ngaahi kulupu kehekehe takatakai ʻi he kolopé ʻoku nau feʻilongaki. Ko e meʻa ko iá, ʻoku hoko ai, ʻo fakalahi ʻa e ngaahi faingamālie ki he vākoví.”

ʻOku toe fakapulipuli ange ʻa e ngaahi founga ʻe niʻihi ʻo e tāufehiʻá, ʻo lilo ia ʻi loto ʻi he ngaahi kauʻā ʻo ha fonua pe naʻa mo ʻene ʻi loto ʻi he ngaahi fakangatangata ʻo ha kaungāʻapi. ʻI he taimi naʻe fakapoongi ai ʻe ha kau poko ʻe toko nima ha Siiki taʻumotuʻa ʻi Kānata, ko e meʻa ko eni ne hokó naʻe “fakaeʻa ai ʻa e meʻa naʻe sio ki ai ʻa e niʻihi ko hano toe fakaake ia ʻo e ngaahi faihia ʻo e tāufehiʻá ʻi ha fonua naʻe faʻa fakahīkihikiʻi ʻi heʻene fakaʻatā ʻa e ngaahi matakalí.” ʻI Siamane, hili ʻene hōloa tuʻumaʻu ai ʻa e ngaahi ʻoho fakamatakali ʻa e kau poupou fakapolitikalé ʻi he ngaahi taʻu ki muʻá, naʻe toe malanga hake ia ʻaki ʻa e peseti ʻe 27 ʻi he 1997. “Ko ha tupulaki fakalotosiʻi ia,” ko e fakamatala ia ʻa e Minisitā Fakalotofonuá ko Manfred Kanther.

ʻI ʻAlipēnia tokelau naʻe fakahaaʻi ai ʻi ha līpooti kuo laka hake ʻi he fānau ʻe toko 6,000 kuo nau meimei hoko ko e kau pōpula ʻi he ngaahi ʻapi pē ʻo kinautolú ʻi he manavahē ki hano fanaʻi ʻe he ngaahi fili ʻo honau ngaahi fāmilí. Ko e fānaú ni ko e faʻahinga maʻukovia kinautolu ʻo e ngaahi vāvākovi  fakafāmili, “ʻa ia kuó ne veuki ʻa e moʻuí ki ha ngaahi fāmili ʻe laui afe.” ʻI he ʻIunaite Seteté, fakatatau ki he Potungāue Fakatahataha ʻo e Fakatotoló (FBI), “ko e tomuʻa fehiʻa fakamatakalí kuó ne ueʻi ʻa e laka hake he vaeua ʻo e ngaahi faihia ʻo e tāufehiʻá ʻe 7,755 naʻe fai ʻi he 1998 ʻa ia naʻe līpooti ki he FBI.” Ko e niʻihi ʻo e ngaahi fakaueʻiloto ki he toenga ʻo e ngaahi faihia ʻi he tāufehiʻá naʻe kau ki ai ʻa e tomuʻa fehiʻa fekauʻaki mo e lotú, faʻahingá pe tupuʻanga fakafonuá, pea mo e ngaahi taʻemalavá.

ʻIkai ngata aí, ko e ngaahi ʻuluʻikaveinga ʻo e nusipepá ʻi he ʻaho taki taha ʻoku fakamatala ai ki ha lahi fau ʻo e fehiʻa ki he solá, ʻa ia ʻoku fakatefito fakahangatonu ia ki he kau kumi hūfangá, ʻa ia ko honau tokolahí he taimí ni ʻoku laka hake ia ʻi he kakai ʻe toko 21 miliona. ʻOku fakamamahi ke leaʻaki, ko e lahi taha ʻo e faʻahinga ko ia ʻoku nau fakahāhaaʻi ʻa e tāufehiʻa ki he kau mulí ko e toʻutupu, ʻoku fakaʻaiʻai kinautolu ʻe he faʻahinga ko e kau politikale taʻefuafatongia mo e niʻihi kehe ʻoku nau kumi ki ha faʻahinga ke tukuakiʻi. Ko e ngaahi fakaʻilonga ʻo e meʻa tatau ʻoku siʻi ʻene tekeutuá ʻoku kau ki ai ʻa e taʻefalalá, taʻemakātakí, mo hono liliuʻi fakamālohi ʻa e kakai ʻoku nau kehé.

Ko e hā ʻa e niʻihi ʻo e ngaahi ʻuhinga ki he lahi fau ko eni ʻo e tāufehiʻá? Pea ko e hā ʻe lava ʻo fai ke fakangataʻaki ʻa e tāufehiʻá? Ko e kupu hoko maí ʻe ngāue ia ki he ongo fehuʻi ko ení.

 [Maʻuʻanga ʻo e Tā ʻi he peesi 2]

Takafí, ʻi ʻolunga: UN PHOTO 186705/J. Isaac

[Maʻuʻanga ʻo e Tā ʻi he peesi 3]

Daud/Sipa Press