‘ʻOku Nau Talanoa Fekauʻaki mo e Leleí pea mo e ʻOfá’

ʻI HE ngaahi taʻu ki mui ní, kuo hoko ai ʻa e Kau Fakamoʻoni ʻa Sihova ʻi Falaniseé ko e tāketi ʻo ha feingangāue lahi ʻo e lauʻikoviʻí. Ko e ngaahi fakamatala moʻoni fakakongá mo e fakamatalahalaʻí kuo ngāueʻaki ia ʻe honau kau fakafepakí ke fakafofongahalaʻi ʻaki kinautolu ʻi he ʻao ʻo e kakaí. ʻI he kamataʻanga ʻo e 1999, naʻe tufaki ai ʻe he kotoa ʻo e Kau Fakamoʻoni ʻa Sihova ʻi Falaniseé ʻa e ngaahi tatau ʻe 12 miliona ʻo ha tuleki naʻe fakakaveinga ko e People of France, You are Being Deceived! ʻI he tulekí ni, naʻa nau fakahaaʻi ai ʻa e loi ʻa e ngaahi fakamatala lauʻikovi naʻe fai kiate kinautolú.

Hili ha ngaahi ʻaho siʻi mei he feingangāué ni, naʻe ʻoatu ai ʻe Mr. Jean Bonhomme, ko ha toketā fakafaitoʻo mo ha mēmipa ki muʻa ʻo e Fale Aleá, ha tohi ki ha nusipepa fakalotofonua. Naʻá ne tohi: “ʻI he taimi ki he taimi, ʻoku haʻu ki hoku ʻapí ʻa e Kau Fakamoʻoni ʻa Sihová. ʻOku nau omi ke talanoa mai kiate au fekauʻaki mo e leleí pea mo e ʻofa ki he tokotaha kotoa pē. . . . ʻOku ʻikai te nau omi fakamālohi ʻo taʻepoaki. ʻOku nau fakamatalaʻi angavaivai kinautolu mo fanongo anga-ʻofa ki heʻeku fakakaukau veiveiuá.”

ʻI he lea fekauʻaki mo e vakai fakalaumālie ʻa e Kau Fakamoʻoni ʻa Sihová, naʻe pehē ʻe Mr. Bonhomme: “Ko e ʻikai taukei ʻi he founga fakaemāmaní, ʻi honau tuʻungá, ʻoku faingataʻa ke hoko ha faʻahinga maumau. ʻI he tafaʻaki ʻe tahá, ko e tuʻunga ʻo e ʻikai taukei ʻi he founga fakaemāmaní ʻa e niʻihi ʻo e kau politikí ko ha fakamanamana lahi ia ki he melino ʻa e kau tangataʻifonuá pea mo e uouangataha ʻa e sōsaietí.”