Līpooti ʻa e Kau Kanongonongo ʻo e Puleʻangá

Ko Hono Fuʻifuʻi ʻa e Ngaahi Tenga ʻo e Moʻoní ʻi Silí

ʻI HE toafa ʻo e fakatokelau ʻo Silí, ʻoku meimei ʻosi ai e ngaahi taʻu pea toki tō hifo ha ʻuha. Ka ʻi he taimi ʻoku hoko mai aí, ko e kelekele pakukā, mo makamaká ʻoku liliu ia ko ha kāpeti moʻonia ʻo e ngaahi matalaʻiʻakau lanu kehekehe. Ko e fakahāhā fakaholomamata ko ʻení ʻokú ne tohoakiʻi ʻa e kau folau ʻeveʻevá mei he kotoa ʻo e fonuá.

Kae kehe, ʻoku ʻi ai ha foʻi moʻoni ʻoku fakamānako lahi ange ia ʻi he lotolotonga ʻo e kakai ʻo Silí. Ko e vai ʻo e moʻoni faka-Tohitapú ʻoku tafe atu ia ki he tuliki kotoa pē ʻo e fonuá, pea ko e kakai loto-moʻoni tokolahi ʻoku nau “matala mai” ko e kau ākonga ʻa Sīsū Kalaisi. Ko e founga ʻe taha ʻoku ngāueʻaki ke fakamafola atu ai ʻa e ngaahi vai ko ʻeni ʻo e moʻoní ko e telefoní. Ko e ongo meʻa naʻe hokosia hoko haké ʻokú ne fakatātaaʻi ʻa e ngaahi ola lelei kuo aʻusia ʻi he founga ko ʻeni ʻo e faifakamoʻoní.

• Ko ha ʻevangeliō taimi-kakato ko Karina hono hingoá naʻe kole ange kiate ia ke ne fakahāhaaʻi ʻa e founga ʻo e faifakamoʻoni ʻi he telefoní ʻi he polokalama ʻo ha ʻasemipilī fakafeituʻu. Kae kehe, naʻe teʻeki ai ke kau ʻa Karina ia ʻi he tafaʻaki ko ia ʻo e ngāue fakaefakamoʻoní. Koeʻuhí ke fakalototoʻaʻi ia ke kau ʻi he polokalama ʻo e ʻasemipilií, naʻe fakamanatu ai ʻe ha tokotaha mātuʻa mo hono uaifí fakataha mo Karina ʻa e niʻihi ʻo e ngaahi poini ʻo e founga ke faifakamoʻoni ai ʻi he telefoní. Naʻá na toe fakaʻaiʻai ia ke lotu ki he tataki ʻa Sihová ʻi he meʻá ni. Naʻá ne fai pehē pea iku ki heʻene fakapapauʻi ke ʻahiʻahi fai ha telefoni.

Naʻe fili ʻe Karina ha fika telefoni mei ha kiʻi kolo ofi mai. Naʻe tali mai ia ʻe ha tokotaha tali telefoni, pea naʻe fakamatalaʻi leva ʻe Karina ʻa e taumuʻa ʻo e telefoní. Ko e tali ʻa e tokotaha tali telefoní naʻe lelei ia, pea naʻe fai leva ha ngaahi fokotuʻutuʻu ke toe fai ha pōtalanoa ʻi he hili ha ʻaho ʻe tolu. Ko e toe ʻaʻahi ko ʻeni fakafou ʻi he telefoní naʻe iku ia ki ha ako Tohitapu, ʻo ngāueʻaki ʻa e polosiua Ko e Hā ʻOku Fiemaʻu ʻe he ʻOtuá Meiate Kitautolú? Talu mei ai, kuó na fiefia ʻi ha ngaahi ako fakamānako mo longomoʻui, pea kuo ʻoatu ʻe Karina ha tohi ke tali ʻaki ʻa e ngaahi fehuʻi ʻa e fefiné.

• Ko Bernarda naʻá ne ʻuluaki fai ha fakamoʻoni ki ha tangata naʻe tā hala mai ki heʻene fika telefoní. ʻI he ʻikai te ne fakahaaʻi ha ʻitá, naʻe fakafeʻiloaki ange ʻe Bernarda ko iá ko e taha ʻo e Kau Fakamoʻoni ʻa Sihová peá ne fai ange ha tokoni. Naʻe hoko atu ai ha fetalanoaʻaki, pea naʻe fakafanongo ʻa e tangatá ʻi heʻene fakamatalaʻi ʻa e founga ʻe vavé ni ai ke hanga ʻe he Puleʻanga ʻo e ʻOtuá ʻo toʻo atu ʻa e fakamaau taʻetotonú. Naʻe ʻoange ʻe he tangatá kia Bernarda ʻa ʻene fika telefoní, pea naʻá ne fai ha ngaahi toe ʻaʻahi fakafou ʻi he telefoní. Lolotonga ʻa e taha ʻo ʻena ngaahi fetalanoaʻakí, naʻá ne lau ange kiate ia ha konga ʻo e tohi ʻIlo ʻA Ia ʻOku Taki Atu ki he Moʻui Taʻengatá. Naʻá ne ʻeke ange pe ʻe fēfē haʻane maʻu ha tatau, pea naʻe lī leva ʻe Bernarda ki ai ha tohi fakataha mo ha Tohitapu. Naʻe fai leva ʻa e ngaahi fokotuʻutuʻu kiate ia ke ʻaʻahi ki ai ha tokoua fakalotofonua, ʻa ia ʻokú ne kei hokohoko atu pē he taimí ni hono “fuʻifuʻi” ʻa e “fuʻu ʻakau” maʻuiʻui ko ʻení.

ʻIo, ʻi he kelekele kakā fakalaumālie ʻo e foʻi māmani ko ení, ko e fanga kiʻi tenga ʻoku ʻikai ʻasí ʻoku nau tatali ke talamuka mai ʻi he aʻu ki ai ʻa e vai foaki-moʻui ʻo e moʻoní. ʻOku laui afe ʻa e faʻahinga fieinua ʻoku nau hokohoko atu ke “tupu hake” pea “matala” ko e kau sevāniti anga-tonu ʻa e ʻOtua ko Sihová.—Aisea 44:​3, 4, NW (Isaia, PM).