Ko e Hā ke Hoko Ai ʻo Feilaulauʻi-Kitá?

Ko Bill ko ha tangata maʻu fāmili ia ʻi hono taʻu 50 tupú ʻa ia ko ha faiako ia ʻi he tekinolosia langá. ʻI he kotoa ʻo e taʻú, ʻi ha fakamole pē ʻaʻana, ʻokú ne fakamoleki ai ha ngaahi uike lahi ʻi he tokoni ki he palani mo e langa ʻo e ngaahi Fale Fakatahaʻanga maʻá e ngaahi fakatahaʻanga ʻa e Kau Fakamoʻoni ʻa Sihová. Ko Emma ko ha tokotaha taʻemali taʻu 22 ia naʻe ako lelei pea ʻulungaanga lelei. ʻI he ʻikai ke tuli ʻataʻatā pē ki ha ngaahi taumuʻa mo e ngaahi mālie fakafoʻituituí, ʻokú ne fakamoleki ʻa e houa laka hake he 70 he māhina taki taha ʻi he tuʻunga ko ha faifekau, ʻi hono tokoniʻi ʻa e kakaí ke nau mahinoʻi ʻa e Tohitapú. Ko Maurice mo Betty kuó na mālōlō mei he ngāué. ʻI he ʻikai ke fakamāmālie hifo ʻi he taimi ní, kuó na hiki ki ha toe fonua ʻe taha ke tokoniʻi ʻa e kakai ʻi aí ke nau ako fekauʻaki mo e taumuʻa ʻa e ʻOtuá ki he māmaní.

KO E faʻahinga tāutaha ko ení ʻoku ʻikai ke nau fakakaukau kiate kinautolu tonu ʻoku nau makehe pe mahulu atu. Ko e kakai anga-maheni pē kinautolu ʻoku nau fai ʻa e meʻa ʻoku nau fakakaukau ko e meʻa totonu ia ke faí. Ko e hā ʻa e ʻuhinga ʻoku nau ngāueʻaki ai honau taimí, iví, ngaahi malavá, mo e ngaahi koloá ki he lelei ʻa e niʻihi kehé? Ko e meʻa ʻokú ne ueʻi kinautolú ko ha ʻofa loloto ki he ʻOtuá pea ki honau kaungāʻapí. Kuo fakatupu ʻe he ʻofa ko ení ʻi he tokotaha taki taha ʻo kinautolu ha laumālie feilaulauʻi-kita moʻoni.

Ko e hā ʻetau ʻuhinga ki ha laumālie feilaulauʻi-kitá? Sai, ke hoko ʻo feilaulauʻi-kita ʻoku ʻikai fiemaʻu ki ai ha moʻui anga-fefeka pe anga-momoko. ʻOku ʻikai fiemaʻu ia ke kau ki ai ha fakaʻikaiʻi-kita tōtuʻa ʻa ia te ne kaihaʻasia ai meiate kitautolu ʻa e fiefiá pe ko e fiemālié. Hangē ko hono fakalea ʻe he The Shorter Oxford English Dictionary, ʻoku ʻuhinga pē ʻa e feilaulauʻi-kitá “ko e foaki atu ʻa ʻete mahuʻingaʻiá, fiefiá, mo e ngaahi holí tonu, telia ʻa e fatongiá pe ko e lelei ʻa e niʻihi kehé.”

Sīsū Kalaisi​—Ko e Faʻifaʻitakiʻanga Lelei Tahá

Ko e ʻAlo-tofu-pē-taha-ne-fakatupu ʻo e ʻOtuá, ʻa Sīsū Kalaisi, ʻa e faʻifaʻitakiʻanga lelei taha ʻo e tokotaha mo ha laumālie feilaulauʻi-kitá. ʻI heʻene ʻi ai ki muʻa ke hoko ko ha tangatá, kuo pau pē naʻe fakaueʻiloto mo fakafiemālie ʻa ʻene moʻuí ʻo aʻu ki he tuʻunga māʻolunga tahá. Naʻá ne maʻu ʻa e feohi vāofi, mo fekoekoeʻi mo ʻene Tamaí pea mo e ngaahi meʻamoʻui laumālié. ʻIkai ngata aí, naʻe ngāueʻaki ʻe he ʻAlo ʻo e ʻOtuá ʻa ʻene ngaahi malavá ʻi he ngaahi ngāue pole mo fakalotomāfana ʻi he tuʻunga “ko e tufunga lahi.” (Palovepi 8:​30, 31 [Lea Fakatātā, PM]) Naʻá ne moʻui moʻoni ʻi he uhouhonga ʻo e ngaahi tuʻunga naʻe māʻolunga mamaʻo ange ia ʻi ha meʻa pē naʻe lava ke fiefia ai naʻa mo e tokotaha koloaʻia lahi taha ʻi he māmaní. ʻI he hoko hake kia Sihova ko e ʻOtuá, naʻá ne maʻu ʻa e tuʻunga hakeakiʻi mo ha monū ʻi hēvani.

 Ka, ko e ʻAlo ʻo e ʻOtuá “naʻa ne fakamasivesivaʻi ʻe ia ia, heʻene toʻo ʻa e anga ʻo e tamaioʻeiki, mo ʻene hoko ʻi he tatau ʻo e tangata.” (Filipai 2:7) Naʻá ne tukuange loto-lelei ʻa hono ngaahi tuʻunga fakafoʻituituí kotoa ʻaki ʻene hoko ko ha tangata peá ne foaki ʻa ʻene moʻuí ko ha huhuʻi koeʻuhi ke toʻo ʻaki ʻa e maumau naʻe fakatupunga ʻe Sētané. (Senesi 3:​1-7; Maake 10:45) Naʻe ʻuhinga iá ko ʻene haʻu ke nofo ʻi he haʻohaʻonga ʻo e faʻahinga angahalaʻia ʻo e tangatá ʻi ha māmani ʻoku tokoto ʻi he mālohi ʻo Sētane ko e Tēvoló. (1 Sione 5:​19) ʻOku toe ʻuhinga iá ko hono kātakiʻi ʻa e taʻefakafiemālie mo e faingatāmaki fakafoʻituituí. Kae kehe, ko e hā pē ʻa e mole kiate iá, naʻe fakapapauʻi ʻe Sīsū Kalaisi ke ne fai ʻa e finangalo ʻo ʻene Tamaí. (Mātiu 26:39; Sione 5:​30; 6:​38) Naʻe ʻahiʻahiʻi ʻe he meʻá ni ʻa e ʻofa mo e mateaki ʻa Sīsuú ʻo aʻu ki hono ngataʻangá. Ko e hā hono lahi ʻo ʻene loto-lelei ke fai feilaulaú? “Naa ne fakamoulaloaʻi ia,” ko e lau ia ʻa e ʻapositolo ko Paulá, “bea talagofua ki he mate, io, ae mate i he akau.”​—Filipai 2:​8, PM.

“Tauhi ʻIate Koe ʻa e Fakakaukau Fakaeʻatamai ko Ení”

ʻOku fakalototoʻaʻi kitautolu ke tau muimui ʻi he faʻifaʻitakiʻanga ʻa Sīsuú. “Tauhi ʻiate koe ʻa e fakakaukau fakaeʻatamai ko ení ʻa ia naʻe toe ʻia Kalaisi Sīsuú,” ko e enginaki ia ʻa Paulá. (Filipai 2:​5, NW) ʻE lava fēfē ke tau fai eni? Ko e founga ʻe taha ko e “ʻoua naʻa taki taha tokanga ki heʻene meʻa aʻana pe, ka ki he meʻa ʻa e kakai kehe foki.” (Filipai 2:4) Ko e ʻofa moʻoní “ʻoku ʻikai te ne kumi ʻene lelei [pē] aʻana.”​—1 Kolinito 13:5.

Ko e faʻahinga tāutaha ʻoku tokangá kuo nau faʻa fakahaaʻi ʻa e fakatapui taʻesiokita ki he ngāue ʻa e niʻihi kehé. Kae kehe, ʻi he ʻahó ni, ʻoku hehema ʻa e kakai tokolahi ke hoko ʻo siokita. ʻOku maʻu ʻe he māmaní ʻa e fakakaukau ke muʻomuʻa pē kitá. ʻOku fiemaʻu ke tau leʻohi kitautolu mei he laumālie ʻo e māmaní koeʻuhi kapau ʻe lavameʻa ia ʻi hono oʻi ʻetau vakaí mo e fakakaukaú, ngalingali te tau ʻai ai ʻetau ngaahi holí tonu ko e meʻa mahuʻinga taupotu tahá ia. Ko e meʻa kotoa leva te tau faí​—ʻa e anga ʻo ʻetau fakamoleki hotau taimí, hotau iví, ʻetau ngaahi koloá—ʻe puleʻi ia ʻe he ngaahi tokanga siokitá. Ko ia ai, ʻoku fiemaʻu ke tau fai ha faitau mālohi mo e tākiekina ko ení.

Naʻa mo e faleʻi taumuʻa leleí ʻoku lava ʻi he taimi ʻe niʻihi ke ne fakavaivaiʻi ʻa hotau laumālie feilaulauʻi-kitá. ʻI hono ʻiloʻi ʻa e meʻa ʻe iku ki ai ʻa e ʻalunga feilaulauʻi-kita ʻo Sīsuú, naʻe pehē ʻe he ʻapositolo ko Pitá: “Ke mamao ia iate koe, Eiki.” (Mātiu 16:​22, PM) ʻOku hā mahino naʻá ne ʻilo ʻa e faingataʻa ke tali ʻa e loto-lelei ʻa Sīsū ke ʻalu ʻo aʻu ki he maté koeʻuhi ko e tuʻunga-hau ʻo ʻene Tamaí pea mo e fakamoʻui ʻo e faʻahinga ʻo e tangatá. Ko ia, naʻá ne feinga ke fakatafokiʻi ʻa Sīsū mei heʻene tuli ki ha ʻalunga peheé.

‘Jiaki ʻa Koe Tonu’

Naʻe anga-fēfē ʻa e tali ʻa Sīsuú? ʻOku pehē ʻe he fakamatalá: “Kuo tafoki ia ki mui, o vakai ki he ene kau akoga, bea valokiʻi eia a Bita, o behe, Alu ki hoku tua, Setani: he oku ikai te ke leleiia i he gaahi mea ae Otua, ka i he gaahi mea ae tagata.” Naʻe toki ui leva ʻe Sīsū ʻa e fuʻu kakaí kiate ia pea mo ʻene kau ākongá peá ne pehē: “Ko ia ia oku loto ke muimui iate au, ke ne jiaki eia ia, kae too ene [“ʻakau fakamamahí,” NW], o muimui iate au.”—Maake 8:​33, 34, PM.

ʻI ha taʻu nai ʻe 30 hili ʻene fai ʻa e faleʻi ko eni kia Sīsuú, naʻe fakahaaʻi ai ʻe Pita kuó ne mahinoʻi he taimi ko iá ʻa e ʻuhinga ʻo e feilaulauʻi-kitá. Naʻe ʻikai te ne fakalototoʻaʻi ʻa e kaungātuí ke fakavaivai ʻenau ngāué pea nau anga-ʻofa kiate kinautolu. ʻI hono kehé, naʻe enginakiʻi kinautolu ʻe Pita ke teuteu honau ʻatamaí ki he ngāué pea liʻaki ʻa e hoko ʻo liliu ke fakatatau ki heʻenau ngaahi holi fakamāmani ki muʻá. Neongo ʻa e ngaahi ʻahiʻahí, naʻe pau ke nau ʻai ʻa hono fai ʻo e finangalo ʻo e ʻOtuá ko e meʻa muʻomuʻa ia ʻi heʻenau moʻuí.​—1 Pita 1:​6, 13, 14; 4:​1, 2.

Ko e ʻalunga fakafiemālie lahi taha ʻe lava ke tuli ki ai ha taha pē ʻo kitautolú ko hono ʻoatu ʻo kitautolu tonu kia Sihova, ʻo muimui anga-tonu kia Sīsū Kalaisi pea tuku ke tataki ʻe he ʻOtuá ʻetau ngaahi ngāué. Naʻe fokotuʻu ʻe Paula ha faʻifaʻitakiʻanga lelei ʻi he fekauʻaki mo e meʻá ni. Ko ʻene ongoʻi ʻa e fakavavevavé mo ʻene houngaʻia kia Sihová naʻe ueʻi ai ia ke ne tukuange ʻa e ngaahi  taumuʻa pe ngaahi ʻamanaki fakamāmaní ʻa ia ne mei lava ke ne taʻofi ia mei hono fai ʻo e finangalo ʻo e ʻOtuá. “Ka ko au,” ko ʻene leá ia, “ʻoku ou matuʻaki loto ke mahomo atu ʻeku meʻa, ʻio, ke ʻosi atu mo au” maʻá e lelei ʻa e niʻihi kehé. (2 Kolinito 12:15) Naʻe ngāueʻaki ʻe Paula ʻa ʻene ngaahi malavá ke fakalahi atu ai ʻa e ngaahi meʻa fakaʻotuá, ʻo ʻikai ko haʻaná.​—Ngāue 20:24; Filipai 3:8.

ʻE anga-fēfē nai haʻatau sivisiviʻi kitautolu ke sio pe ʻoku tau maʻu ha fakakaukau hangē ko ia ko e ʻapositolo ko Paulá? Te tau ʻeke hifo nai kiate kitautolu tonu ʻa e ngaahi fehuʻi hangē ko ení: ʻOku anga-fēfē ʻa ʻeku ngāueʻaki ʻa hoku taimí, ko hoku iví, ko ʻeku ngaahi malavá, mo ʻeku ngaahi koloá? ʻOku ou ngāueʻaki ʻa e ngaahi meʻá ni mo e ngaahi meʻaʻofa mahuʻinga kehé koeʻuhi pē ke fakalahi ʻaki ʻeku ngaahi meʻa pē ʻaʻakú, pe ʻoku ou ngāueʻaki kinautolu ke tokoniʻi ʻa e niʻihi kehé? Kuó u fakakaukau ke kau ke toe kakato ange ʻi he ngāue fakahaofi moʻui ko hono talaki ʻa e ongoongo leleí, ʻi he tuʻunga nai ko ha tokotaha-fanongonongo taimi-kakato ʻo e Puleʻangá? ʻE lava ke u kau kakato ange ʻi he ngaahi ngāue pehē hangē ko e langá pe ko hono tokangaʻi ʻo e ngaahi Fale Fakatahaʻangá? ʻOku ou ngāueʻaki ʻa e ngaahi faingamālié ke tokoniʻi ʻa e faʻahinga masivá? ʻOku ou foaki kia Sihova ʻa ʻeku lelei tahá?​—Palovepi 3:9.

“Fiefia Lahi Ange ʻi he Foaki Atú”

Ka, ʻoku fakapotopoto moʻoni ke hoko ʻo feilaulauʻi-kita? ʻOku pehē moʻoni ia! Naʻe ʻiloʻi ʻe Paula mei he meʻa naʻá ne hokosia fakafoʻituituí ʻoku ʻomai ʻe ha laumālie pehē ʻa e ngaahi pale lahi. Naʻe ʻomai ai kiate ia ʻa e fiefia lahi mo e fiemālie fakafoʻituitui lahi ʻaupito. Naʻá ne fakamatalaʻi eni ki he kau tangata taʻumotuʻa mei ʻEfesoó ʻi he taimi naʻá ne fetaulaki ai mo kinautolu ʻi Miletó. Naʻe pehē ʻe Paula: “Kuó u fakaʻaliʻali atu kiate kimoutolu ʻi he meʻa kotoa pē ʻa e ngāue [ʻi ha founga feilaulauʻi-kitá] kuo pau ke mou tokoniʻi ʻa e faʻahinga ko ia ʻoku nau vaivaí, pea kuo pau ke tauhi ʻi hoʻomou fakakaukaú ʻa e ngaahi lea ʻa e ʻEiki ko Sīsuú, ʻi heʻene pehē ʻe ia tonu, ‘ʻOku ʻi ai ʻa e fiefia lahi ange ʻi he foaki atú ʻi he maʻu maí.’” (Ngāue 20:35, NW) Kuo ʻiloʻi ʻe he kakai ʻe laui miliona ko hono fakahāhā ʻo e faʻahinga laumālie ko ení ʻoku ʻomai ai ʻa e fiefia lahi he taimí ni. Te ne toe ʻomai ʻi he kahaʻú ʻa e fiefia ʻi he taimi ʻe fakapaleʻi ai ʻe Sihova ʻa e faʻahinga ko ia ʻoku nau fakamuʻomuʻa ʻa ʻene ngaahi meʻá pea mo e ngaahi meʻa ʻa e niʻihi kehé ʻo muʻomuʻa ia ʻi haʻanautolú.​—1 Timote 4:​8-​10.

ʻI hono ʻeke ʻa e ʻuhinga naʻá ne fakafitefitaʻa tonu ai ʻi hono tokoniʻi ʻo e niʻihi kehé ke langa ʻa e ngaahi Fale Fakatahaʻangá, naʻe pehē ʻe Bill: “Ko e tokoni ʻi he founga ko ení ʻi he meʻa ʻoku vakai lahi ki ai ko e fanga kiʻi fakatahaʻanga siʻisiʻi angé ʻoku  ʻomai ai kiate au ʻa e fiemālie fakafoʻituitui lahi. ʻOku ou fiefia ʻi hono ngāueʻaki ʻa e ngaahi pōtoʻi mo e taukei ʻoku ou maʻú maʻá e lelei ʻa e niʻihi kehé.” Ko e hā ne fili ai ʻe Emma ke līʻoa ʻa hono iví mo e ngaahi malavá ke tokoniʻi ʻa e niʻihi kehé ke nau ako ʻa e moʻoni Fakatohitapú? “ʻOku ʻikai lava ke u fakaʻuta atu ki hano fai ʻo ha meʻa kehe. Lolotonga ʻa ʻeku kei siʻi peá u malava ke fai iá, ʻoku ou loto pē ke fai ʻa e meʻa lahi ʻo fakatatau ki heʻeku malavá ke fakahōifuaʻi ai ʻa Sihova mo tokoniʻi ʻa e niʻihi kehé. Ko hono feilaulauʻi ʻa e niʻihi ʻo e ngaahi meʻa fakamatelié ʻoku ʻikai ko ha fuʻu meʻa lahi ia. ʻOku ou fai pē ʻa e meʻa naʻe tonu ke u faí ʻi he vakai atu ki he meʻa kuo fai ʻe Sihova maʻakú.”

ʻOku ʻikai ha fakaʻiseʻisa ʻa Maurice mo Betty ʻi he ʻikai ke na ʻulutukua ki ha moʻui fiemālié, kae hokohoko atu ʻi ha ngaahi taʻu ʻo e ngāue mālohi ʻi hono tauhi hake mo tokonaki ki hona fāmilí. ʻI he taimí ni heʻena mālōlō mei he ngāué, ʻokú na loto ke hokohoko atu ʻa hono fai ʻo e meʻa ʻaonga mo mohu ʻuhinga ʻaki ʻena moʻuí. “ʻOku ʻikai te ma loto pē ke tangutu hifo ʻo mālōlō he taimí ni,” ko ʻena leá ia. “Ko hono tokoniʻi ʻa e niʻihi kehé ke ako fekauʻaki mo Sihova ʻi ha fonua mulí ʻoku ʻomai ai kiate kimaua ʻa e faingamālie ke hokohoko atu ʻa hono fai ʻo e meʻa ʻoku mohu taumuʻá.”

ʻOkú ke fakapapauʻi ke hoko ʻo feilaulauʻi-kita? ʻE ʻikai ke faingofua ʻa e meʻá ni. ʻOku ʻi ai ha faitau hokohoko ʻi he vahaʻa ʻo ʻetau ngaahi holi taʻehaohaoa fakaetangatá mo ʻetau holi fakamātoato ke fakahōifuaʻi ʻa e ʻOtuá. (Loma 7:​21-​23) Ka ko ha faitau ia ʻe lava ke ikunaʻi kapau te tau tuku ke tataki ʻe Sihova ʻetau moʻuí. (Kaletia 5:​16, 17) Te ne manatuʻi moʻoni ʻetau ngāue feilaulauʻi-kita ʻi heʻene ngāué pea te ne tāpuakiʻi lahi kitautolu. Ko e moʻoni, ʻe hanga ʻe Sihova ko e ʻOtuá ʻo ‘tangaki maʻatautolu ʻa e ngaahi katupa ʻo e langí, ʻo vakili ʻa e tapuakí kiate kitautolu, kaeʻoua ke ʻikai hao.’—Malakai 3:10; Hepelu 6:​10.

[Fakatātā ʻi he peesi 23]

Naʻe maʻu ʻe Sīsū ha laumālie feilaulauʻi-kita. ʻOkú ke pehē?

[Fakatātā ʻi he peesi 24]

Naʻe fakahangataha ʻe Paula ʻa ʻene ngaahi feingá ki he ngāue malangaʻi ʻo e Puleʻangá