“Kuo Teʻeki Hokosia Hono Houá”

“Naʻe ʻikai ala mālohi kiate ia ʻe ha taha, koeʻuhi kuo teʻeki hokosia hono houá.”​—SIONE 7:​30, NW.

1. Ko e hā ʻa e ongo meʻa tefito ʻe ua naʻá na puleʻi ʻa e ʻalunga ʻo e ngāue kotoa ʻa Sīsuú?

 “KO E Fanautama ʻa Tangata naʻe ʻikai te ne haʻu ke maʻu sevaniti, ka ke sevaniti pe ʻe ia, pea ke tuku ʻene moʻui ke huhuʻiʻaki ha tokolahi, heʻene fetongi kinautolu,” ko e tala ia ʻe Sīsū Kalaisi ki heʻene kau ʻapositoló. (Mātiu 20:28) Ki he kōvana Loma ko Ponitō Pailató, naʻá ne pehē: “Ko e meʻa ko ia naʻe fanauʻi ai au, pea ko e meʻa ko ia kuo u haʻu ai ki māmani, koeʻuhi ke u fakahāʻi ʻa e moʻoni.” (Sione 18:37) Naʻe ʻilo pau ʻe Sīsū ʻa e ʻuhinga ʻe pekia aí pea mo e ngāue naʻe fiemaʻu ke ne fai ki muʻa ʻi heʻene pekiá. Naʻá ne toe ʻiloʻi foki ʻa e lahi ʻo e taimi naʻá ne maʻu ke fakahoko ai ʻa ʻene ngāué. Ko ʻene ngāue fakafaifekau ʻi he māmaní ʻi he tuʻunga ko e Mīsaiá naʻe pau ke taʻu pē ʻe tolu mo e konga ʻa hono lōloá. Naʻe kamata ia ʻaki ʻene papitaiso ʻi he vai ʻi he Vaitafe Sioataní (ʻi he 29 T.S.) ʻi he kamata ʻo e uike hono 70 naʻe tomuʻa tala fakaefakatātaá pea ngata ʻi heʻene pekia ʻi ha ʻakau fakamamahí ʻi he vaeuaʻanga ʻo e uike ko iá (ʻi he 33 T.S.). (Taniela 9:​24-​27; Mātiu 3:​16, 17; 20:​17-​19) Mei hení, ko e ʻalunga ʻo e ngāue kotoa ʻa Sīsū ʻi he māmaní naʻe puleʻi taʻealatuku ia ʻe he ongo meʻa tefito ʻe ua: ko e taumuʻa ʻo ʻene haʻú mo ha ʻilo vēkeveke ʻo e taimi ʻe kamata aí.

2. ʻOku anga-fēfē hono fakamatalaʻi ʻo Sīsū Kalaisi ʻi he ngaahi Kōsipelí, pea naʻe anga-fēfē ʻene fakahaaʻi ʻa ʻene lāuʻilo ki heʻene ngāue kuo vaheʻi angé?

² Ko e ngaahi fakamatala Kōsipelí ʻoku fakamatalaʻi ai ʻa Sīsū Kalaisi ko ha tangata ngāue ʻa ia naʻe fāifononga holo ʻi he fonua kotoa ʻo Pālesitainé, ʻo talaki ʻa e ongoongo lelei ʻo e Puleʻanga ʻo e ʻOtuá mo fakahoko ʻa e ngaahi ngāue ʻiloa lahi. ʻI he lolotonga ʻo e konga ki muʻa ʻo e ngāue fakafaifekau longomoʻui ʻa Sīsuú, ʻoku pehē ai ʻo fekauʻaki mo ia: “Kuo teʻeki hokosia hono houá.” Naʻe fai ʻe Sīsū tonu ha fakamatala: “Kuo teʻeki kakato [ʻa e hoko mai] hoku taimi.” ʻI he ofi ki he ngataʻanga ʻo ʻene ngāue fakafaifekaú, naʻá ne  ngāueʻaki leva ʻa e kupuʻi lea “kuo hokosia ʻa e houá.” (Sione 7:​8, 30, NW; 12:23) Ko e lāuʻilo ʻa Sīsū fekauʻaki mo e houa, pe ko e taimi ki heʻene ngāue kuo vaheʻi maí, ʻo kau ai ʻene pekia fakaefeilaulaú, kuo pau pē naʻá ne uesia ʻa e meʻa naʻá ne leaʻaki mo faí. Ko hono mahinoʻi ení ʻe lava ke ʻomai ai kiate kitautolu ha vavanga ki hono angaʻitangatá pea mo e sīpinga ʻo ʻene fakakaukaú, ʻo tokoniʻi ai kitautolu “ke muimui ʻi hono ngaahi ʻalungá” ke toe ofi ange.​—1 Pita 2:​21, NW.

Fakapapauʻi ke Fai ʻa e Finangalo ʻo e ʻOtuá

3, 4. (a) Ko e hā ʻoku hoko ʻi ha kātoanga mali ʻi Kena? (e) Ko e hā ʻoku taʻeloto ai ʻa e ʻAlo ʻo e ʻOtuá ki he fokotuʻu ange ʻe Mele ʻoku totonu ke ne fai ha meʻa fekauʻaki mo e nounou ʻa e uainé, pea ko e hā ʻoku lava ke tau ako mei he meʻá ni?

³ Ko e taʻú ko e 29 T.S. Ko ha ngaahi ʻaho siʻi pē ia kuo maliu atu talu mei hono fili fakafoʻituitui ʻe Sīsū ʻa ʻene ʻuluaki kau ākongá. Kuo nau haʻu kotoa eni ki he kolo ko Kená ʻi he vahefonua ʻo Kālelí ke kau ki ha kātoanga mali. Ko e faʻē ʻa Sīsuú, ʻa Mele, ʻoku toe ʻi ai foki mo ia. ʻOku nounou ʻa e uainé. ʻI he fokotuʻu atu ʻoku totonu ke ne fai ha meʻá, ʻoku tala ange ʻe Mele ki hono fohá: “ʻOku ʻikai haʻanau uaine.” Ka ʻoku tali ange ʻe Sīsū: “Fefine, ko ho ha au? kuo teʻeki hoko mai hoku [houá].”—Sione 1:​35-51; 2:​1-4.

⁴ Ko e tali ʻa Sīsū, “Fefine, ko ho ha au?” ko ha faʻunga motuʻa ia ʻo e fehuʻi ʻa ia ʻoku fakahaaʻi ai ha taʻeloto ki he meʻa ʻoku fokotuʻu atu pe ʻoatú. Ko e hā ʻoku taʻeloto ai ʻa Sīsū ki he ngaahi lea ʻa Melé? Sai, ʻokú ne taʻu 30 eni. ʻI ha ngaahi uike siʻi pē ki muʻa aí, naʻá ne papitaiso, ʻo pani ʻaki ʻa e laumālie māʻoniʻoní, pea fakahaaʻi ʻe Sione Papitaiso ko e “Lami ʻa e ʻOtua, ʻa ia ʻoku ne ʻave ʻa e angahala ʻa māmani.” (Sione 1:​29-34, Luke 3:​21-​23) Ko hono tataki he taimi ko ení kuo pau ke haʻu taʻealatuku ia mei he Mafai Taupotú ʻa ia naʻá ne fekauʻi mai iá. (1 Kolinito 11:3) ʻE ʻikai ha taha, naʻa mo ha mēmipa ofi ʻi he fāmilí, ʻe lava ke fakaʻatā ke ne kaunoa ʻi he ngāue naʻe haʻu ʻa Sīsū ki māmani ke faí. Ko ha fakapapauʻi moʻoni ē ke fai ʻa e finangalo ʻo ʻene Tamaí,ʻoku fakahāhaaʻi ʻi he tali ʻa Sīsū kia Melé! ʻOfa ke tau fakapapauʻi tatau ke fakahoko hotau “ngafa kakato” ki he ʻOtuá.​—Koheleti 12:13 (Tagata Malaga, PM), NW.

5. Ko e hā ʻa e mana ʻoku fakahoko ʻe Sīsū Kalaisi ʻi Kená, pea ko e hā ʻa e kaunga ʻo e meʻa ko iá ki he niʻihi kehé?

⁵ ʻI hono mahinoʻi ʻa e ʻuhinga ʻo e ngaahi lea ʻa hono fohá, ʻoku mavahe leva ʻa Mele ki he tafaʻakí ʻo fakahinohino ki he kau fakanofonofó: “Ko e hā ha meʻa te ne tala kiate kimoutolu, mou fai.” Pea ʻoku solova ʻe Sīsū ʻa e palopalemá. ʻOkú ne fekau ʻa e kau fakanofonofó ke nau fakafonu vai ʻa e ngaahi siaá, pea ʻokú ne liliu ai ʻa e vaí ki he uaine lelei tahá. ʻOku hoko ai ʻa e meʻá ni ko ha kamata ia ʻo e ngāue fakaemana mālohi ʻa Sīsuú, ʻo ʻomai ai ha fakaʻilonga ʻoku ʻiate ia ʻa e laumālie ʻo e ʻOtuá. ʻI he sio ʻa e kau ākonga foʻoú ki he mana ko ení, ʻoku mālohi ai ʻenau tuí.​—Sione 2:​5-​11.

Mamahiʻi ʻa e Fale ʻo Sihová

6. Ko e hā ʻoku ʻita lahi ai ʻa Sīsū ʻi he meʻa ʻokú ne sio ki ai ʻi he temipale ʻi Selusalemá, pea ko e hā ʻa e ngāue ʻokú ne faí?

⁶ ʻOku vave ʻa e hoko ʻa e faʻahitaʻu failau ʻo e 30 T.S., pea ʻoku fononga ʻa Sīsū mo hono ngaahi takangá ki Selusalema ke kātoangaʻi ʻa e Pāsová. Lolotonga ʻenau ʻi aí, ʻoku sio ai ʻene kau ākongá ki honau Takí ʻokú ne tōʻongaʻaki ha anga, mahalo naʻe teʻeki ke nau sio ʻi haʻane fai pehē ki muʻa. ʻOku fakatau atu ʻe he kau mēsianiti Siu mānumanú ʻa e fanga monumanu mo e fanga manupuna ki he ngaahi feilaulaú ʻi he loto temipalé tonu. Pea ʻoku nau tuku atu ki he kau lotu Siu anga-tonú ʻa e ngaahi totongi mātuʻaki māʻolunga. ʻI heʻene ʻita lahí, ʻoku fai ai ʻe Sīsū e meʻa. ʻOkú ne ngaohi ha uipi ko ha ngaahi maea ʻo seʻe ʻaki ʻa e kau fai fakataú. ʻI hono huaʻi ʻa e ngaahi koini ʻa e kau fetongi paʻangá, ʻokú ne fulihi ʻenau ngaahi tēpilé. “ʻAve ʻa e ngaahi meʻa na” ko ʻene fekau ia ki he faʻahinga ʻoku nau fakatau atu ʻa e fanga lupé. ʻI he sio ʻa e kau ākonga ʻa Sīsuú kiate ia ʻokú ne tōʻonga fuʻu māfana peheé, ʻoku nau manatuʻi ai ʻa e kikite ʻo fekauʻaki mo e ʻAlo ʻo e ʻOtuá: “Ko e mamahiʻi ʻo ho fale te ne kai ʻo ʻosi au.” (Sione 2:​13-17; Sāme 69:9) Ko kitautolu foki kuo pau ke tau mamahiʻi ʻo leʻohi hano fakaʻatā ʻa e ngaahi hehema fakamāmaní ke ne ʻuliʻi ʻetau lotú.

7. (a) Ko e hā ʻokú ne ueʻi ʻa Nikotīmasi ke ne ʻaʻahi ki he Mīsaiá? (e) Ko e hā ʻoku tau ako mei he faifakamoʻoni ʻa Sīsū ki ha fefine Samēliá?

⁷ Lolotonga ʻene ʻi Selusalemá, ʻoku fakahoko ai ʻe Sīsū ʻa e ngaahi fakaʻilonga fakaofo, pea ʻoku tui ai ʻa e kakai tokolahi kiate ia. Naʻa mo Nikotīmasi, ko ha mēmipa ʻo e Sanetalimí, pe ko e fakamaauʻanga māʻolunga faka-Siú, ʻoku maongo ki ai ʻa Sīsū pea ʻokú ne haʻu kiate ia ʻi he poʻulí ke ako lahi ange. ʻOku nofo leva ʻa Sīsū mo ʻene kau ākongá ʻi he “fonua ko Siutea” ʻo feʻunga nai mo e māhina ʻe valu, ʻi he malangá mo e ngaohi-ākongá. Kae kehe,  ʻi he hili e tuku pilīsone ʻo Sione Papitaisó, ʻoku nau mavahe ai mei Siutea ki Kāleli. ʻI heʻenau fononga ʻo fou atu he vahefonua ʻo Samēliá, ʻoku maʻu ai ʻe Sīsū ha faingamālie ke ne fai ai ha fakamoʻoni fakaʻāuliliki ki ha fefine Samēlia. ʻOku tofa ai ʻe he meʻá ni ha hala ki he kau Samēlia tokolahi ke nau hoko ai ko e kau tui. Tau fakasio foki mo kitautolu ki ha ngaahi faingamālie ke lea ai ʻo fekauʻaki mo e Puleʻangá.​—Sione 2:23; 3:​1-22; 4:​1-42; Maake 1:​14.

Faiako Lahi ʻi Kāleli

8. Ko e hā ʻa e ngāue ʻoku kamataʻi ʻe Sīsū ʻi Kālelí?

⁸ Ki muʻa ʻi he “houa” ʻo e pekia ʻa Sīsuú, ʻoku lahi ai ʻa ʻene meʻa ke fai ʻi he ngāue ʻa ʻene Tamai fakahēvaní. ʻI Kāleli, ʻoku kamataʻi ai ʻe Sīsū ha toe ngāue fakafaifekau lahi ange ʻi he meʻa ko ia naʻe hoko ʻi Siutea mo Selusalemá. ʻOkú ne ʻalu ki “he botu kotoabe o Kaleli, o akonaki i ho nau gaahi fale lotu, bea malaga aki ae ogoogolelei oe buleaga, o ne fakamoui ae mahaki kehekehe kotoabe, moe hagatamaki kotoabe nae i he kakai.” (Mātiu 4:​23, PM) Ko ʻene ngaahi lea fakamānakó: “Mou fakatomala, he kuo ofi ʻa e Puleʻanga ʻo Hevani,” ʻoku ongona ia ʻi he vahefonuá kotoa. (Mātiu 4:17) ʻI ha ngaahi māhina siʻi, ʻi he haʻu ha ongo ākonga ʻa Sione Papitaiso ke maʻu ha līpooti hangatonu fekauʻaki mo Sīsuú, ʻokú ne tala ange kiate kinaua: “Mo o, ʻo fakaha kia Sione ʻa e ngaahi meʻa ʻoku mo mamata mo fanongo ki ai; ʻoku ʻa ʻa e kui, ʻeveʻeva ʻa e heke, fakamaʻa ʻa e kilia, ongo ʻa e tuli, fokotuʻu ʻa e pekia, pea ʻoku malangaʻaki ʻa e ongoongolelei ki he masiva. Pea monuʻiaā ka ko ia ʻoku ʻikai tūkia ʻiate au.”—Luke 7:​22, 23.

9. Ko e hā ʻoku fakatahataha ai ʻa e fuʻu kakaí kia Kalaisi Sīsuú, pea ko e hā ʻa e lēsoni ʻoku lava ke tau maʻu nai mei he meʻá ni?

⁹ ‘Ko e talanoa lelei ʻo fekauʻaki mo Sīsuú ʻoku mafola atu ia ki he kotoa ʻo e ngaahi fonua takatakaí,’ pea ʻoku fakatahataha mai ha fuʻu kakai tokolahi kiate ia​—mei Kāleli, Tikapolusi, Selusalema, Siutea, pea mo e tafaʻaki ʻe taha ʻo e Vaitafe Sioataní. (Luke 4:​14, 15, NW; Mātiu 4:​24, 25) ʻOku nau haʻu kiate ia ʻo ʻikai koeʻuhi pē ko ʻene ngaahi fakamoʻui mahaki fakaemaná ka koeʻuhi foki ko ʻene ngaahi faiako fakaofó. Ko ʻene pōpoakí ʻoku fakamānako mo fakalototoʻa. (Mātiu 5:1–​7:​27) Ko e ngaahi lea ʻa Sīsuú ʻoku mālie mo manakoa. (Luke  4:​22) Ko e fuʻu kakaí ʻoku nau “ofo . . . i he ene akonaki,” he ʻokú ne lea mei he ngaahi Konga Tohitapú ʻaki ʻa e mafai. (Mātiu 7:​28, 29, PM; Luke 4:​32) Ko hai ia ʻe taʻetohoakiʻi ki ha tangata pehē? ʻOfa ke tau fakatupulekina ʻe kitautolu foki ʻa e pōtoʻi ʻi he faiakó koeʻuhi ke tohoakiʻi mai ai ʻa e faʻahinga tāutaha ʻoku loto-totonú ki he moʻoní.

10. Ko e hā ʻoku feinga ai ʻa e kakai ʻo e kolo ko Nasaletí ke tāmateʻi ʻa Sīsuú, pea ko e hā ʻoku ʻikai ai te nau lavá?

¹⁰ Kae kehe, ʻoku ʻikai ke ongongofua ʻa e kau fanongo kotoa pē kia Sīsuú. Naʻa mo e konga ki muʻa ʻo ʻene ngāue fakafaifekaú, ʻi he taimi ʻo ʻene faiako he sinakoke ʻi hono kolo tupuʻangá ʻi Nasaletí, ʻoku ʻi ai ha feinga ke tāmateʻi ia. Neongo ʻoku ofo ʻa e kakai ʻo e koló ʻi heʻene “ngaahi lea mālie,” ʻoku nau loto ke sio ki ha ngaahi mana. Kae kehe, ʻi he ʻikai ke ne fakahoko ai ha ngaahi ngāue fakaemana lahí, ʻoku fakaeʻa ai ʻe Sīsū ʻenau siokitá mo e ʻikai ha tuí. ʻI he ʻita lahí, ʻoku tuʻu hake ʻa e faʻahinga ʻi he sinakoké, ʻo puke ʻa Sīsū, pea ʻave fakavave atu ia ki ha veʻe moʻunga ke lī fakatūʻuluʻi hifo ʻi he lilifá. Ka ʻokú ne hola mei heʻenau puke iá ʻo moulu atu ʻo hao. Ko e “houa” ʻo ʻene pekiá ʻoku teʻeki ke hoko mai ia.​—Luke 4:​16-​30.

11. (a) Ko e hā ʻoku haʻu ai ʻa e niʻihi ʻo e kau taki lotú ke fanongo kia Sīsuú? (e) Ko e hā ʻoku tukuakiʻi ai ʻa Sīsū ki hono maumauʻi ʻo e Sāpaté?

¹¹ Ko e kau taki lotú​—ʻa e kau sikalaipé, kau Fālesí, kau Sātusí mo e niʻihi kehé​—ʻoku nau faʻa ʻi ai foki ʻi he feituʻu ʻoku malanga ai ʻa Sīsuú. Ko e tokolahi ʻo kinautolú ʻoku nau ʻi ai, ʻo ʻikai ke fanongo mo ako, ka ke maʻu ha fehālaaki mo feinga ke puke ia. (Mātiu 12:38; 16:1; Luke 5:​17; 6:​1, 2) Ko e fakatātaá, lolotonga ʻa e ʻaʻahi ki Selusalema ki he Pāsova ʻo e 31 T.S., ʻoku fakamoʻui ai ʻe Sīsū ha tangata ʻa ia naʻe puke ʻo feʻunga mo e taʻu ʻe 38. ʻOku tukuakiʻi ʻe he kau taki lotu Siú ʻa Sīsū ki hono maumauʻi ʻo e Sāpaté. ʻOkú ne tali: “Kuo ngāue ʻa ʻeku Tamai ʻo aʻu ki he taimi ni, pea ʻoku ou ngāue mo au foki.” ʻOku tukuakiʻi leva ia he taimi ko ení ʻe he kau Siú ki hono lauʻikoviʻi ʻa e ʻOtuá ʻi heʻene taukaveʻi ko e ʻAlo ia ʻo e ʻOtuá ʻaki hono ui ia ko ʻene Tamaí. ʻOku nau kumi ke tāmateʻi ʻa Sīsū, ka ko ia mo ʻene kau ākongá ʻoku nau mavahe mei Selusalema ki Kāleli. ʻI he tuʻunga meimei tatau, ʻoku fakapotopoto ke tau fakaʻehiʻehi mei ha ngaahi fakafepaki taʻetotonu mei he kau fakafepakí ʻi heʻetau līʻoa hotau iví ki he ngāue ko hono malangaʻi ʻo e Puleʻangá mo e ngaohi-ākongá.​—Sione 5:​1-18; 6:1.

12. Ko e hā hono lahi ʻo e fakatotofu ʻe Sīsū ʻa e feituʻu ʻi Kālelí?

¹² ʻI he taʻu ʻe taha mo e konga hono hokó pe ofi ki ai, ʻoku fakangatangata ai ʻe Sīsū ʻa e lahi taha ʻo ʻene ngāue fakafaifekaú ki Kāleli, ʻo toki ʻaʻahi pē ki Selusalema ke kau ki he ngaahi kātoanga fakataʻu ʻe tolu ʻa e kau Siú. Ko hono fakakātoá, kuó ne fai ha ʻaʻahi fakamalanga ʻe tolu ʻi Kāleli: ko e ʻuluakí mo e kau ākonga foʻou ʻe toko 4, ko hono uá mo e kau ʻapositolo ʻe toko 12, pea mo ha ʻaʻahi lahi ange fakataha mo hono fekauʻi atu ʻa e kau ʻapositolo kuo ʻosi akoʻí. Ko ha faifakamoʻoni lahi moʻoni ē ki he moʻoní ʻoku fai ʻi Kālelí!​—Mātiu 4:​18-​25; Luke 8:​1-3; 9:​1-6.

Faifakamoʻoni Loto-Toʻa ʻi Siutea mo Pēlea

13, 14. (a) Ko e taimi fē ʻoku kumi ai ʻa e kau Siú ke puke ʻa Sīsuú? (e) Ko e hā ʻoku ʻikai lava ai ʻe he kau ʻōfisá ke puke ʻa Sīsuú?

¹³ Ko e fakatōlau ia ʻo e 32 T.S., pea ko e “houa” ʻo Sīsuú ʻoku kei ʻi he kahaʻú ia. ʻOku ofi mai ʻa e Kātoanga ʻo e Ngaahi Fale Fehikitakí. ʻOku fakaʻaiʻai ʻe he fanga tokoua faʻē-taha ʻo Sīsuú ia: “Hiki mei heni, ʻo mole ki Siutea.” ʻOku nau loto ke fakahaaʻi ʻe Sīsū ʻa hono ngaahi mālohi fakaemaná ki he faʻahinga kotoa naʻe fakatahataha ʻi he kātoanga ʻi Selusalemá. Neongo ia, ʻoku lāuʻilo ʻa Sīsū ʻo fekauʻaki mo e fakatuʻutāmakí. Ko ia ʻokú ne pehē ki hono fanga tokouá: “ʻE ʻikai te u ʻalu leva ki he katoanga ni; koeʻuhi kuo teʻeki kakato [ʻa e hoko mai] hoku taimi.”—Sione 7:​1-8.

¹⁴ ʻI he tolotoloi ʻi ha taimi ʻi Kālelí, ʻoku ʻalu ai ʻa Sīsū ki Selusalema ʻo “ʻikai fakaeʻa, kae hangē ha ʻalu fufū.” ʻOku kumi moʻoni ia ʻe he kau Siú ʻi he kātoangá, ʻo nau pehē: “Ko faʻā ʻa e siana ko ia?” ʻI he vaeua ʻosi ʻa e kātoangá, ʻoku ʻalu ai ʻa Sīsū ki he loto temipalé ʻo kamata ke faiako loto-toʻa ai. ʻOku nau kumi ke puke ia, mahalo ke tuku ia ki he pilīsoné pe ke tāmateʻi ia. Ka, ʻoku ʻikai te nau lavameʻa koeʻuhi ‘kuo teʻeki ke hoko mai ʻa hono houá.’ ʻOku tui ʻa e tokolahi he taimi ko ení kia Sīsū. Naʻa mo e kau ʻōfisa naʻe tuku atu ʻe he kau Fālesí ke nau puke iá naʻa nau foki halaʻatā mai, ʻo pehē: “Teʻeki ha tangata ʻe lea hange ko ia.”—Sione 7:​9-14, 30-46.

15. Ko e hā ʻoku tufi maka ai ʻa e kau Siú ke tolo ʻaki ʻa Sīsuú, pea ko e hā ʻa e feingangāue fakamalanga ʻokú ne hoko atu ki aí?

¹⁵ Ko e ngaahi fepaki ʻi he vahaʻa ʻo Sīsū mo hono kau fakafepaki Siú ʻoku hokohoko atu ia ʻi heʻene faiako ʻo fekauʻaki mo ʻene Tamaí ʻi he temipalé he lolotonga ʻa e kātoangá. ʻI he ʻaho fakaʻosi ʻo e kātoangá, ʻi he ʻita lahi ʻi he ngaahi fakamatala ʻa Sīsū ʻo fekauʻaki mo ʻene ʻi ai ki muʻa ke  hoko ko ha tangatá, ʻoku tufi hake ai ʻe he kau Siú ʻa e maká ke tolo ʻaki ia. Ka ʻokú ne toitoi pea hola ʻo ʻikai hoko ki ai ha meʻa. (Sione 8:​12-​59) ʻI he nofo ʻi tuʻa Selusalemá, ʻoku fai ai ʻe Sīsū ha feingangāue fakaefakamoʻoni lahi ʻi Siutea. ʻOkú ne fili ʻa e kau ākonga ʻe toko 70, pea ʻi he hili ʻene fakahinohinoʻi kinautolú, ʻokú ne fekau atu kinautolu ʻo tautau toko ua ke nau ngāueʻi ʻa e feituʻú. ʻOku nau ʻalu ki muʻa ki he feituʻu mo e kolo kotoa pē, ʻa ia ʻoku palani ʻa Sīsū, fakataha mo e kau ʻapositoló, ke nau ō ki aí.​—Luke 10:​1-​24.

16. Ko e hā ʻa e fakatuʻutāmaki ʻoku hola mei ai ʻa Sīsū ʻi he lolotonga ʻa e Kātoanga ʻo e Fakatapuí, pea ko e hā ʻa e ngāue ʻokú ne toe femoʻuekina ki aí?

¹⁶ ʻI he faʻahitaʻu momoko ʻo e 32 T.S., ʻoku ʻunu ofi mai ange ai ʻa e “houa” ʻo Sīsuú. ʻOkú ne haʻu ki Selusalema ki he Kātoanga ʻo e Fakatapuí. ʻOku kei kumi pē ʻa e kau Siú ke tāmateʻi ia. ʻI he lolotonga ʻa e luelue atu ʻa Sīsū ʻi he ʻotu pou ʻo e temipalé, ʻoku nau takatakaiʻi ia. ʻI hono toe tukuakiʻi ia ki he lauʻikoviʻi ʻa e ʻOtuá, ʻoku nau tufi hake ʻa e maká ke tāmateʻi ia. Kae hangē ko ia naʻá ne fai ʻi he ngaahi taimi ki muʻá, ʻoku hola ʻa Sīsū. Tuai-e-kemo ʻa ʻene ʻi he halá ʻo faiako ai, ko e taimi ko ení ʻi he kolo lahi ki he kolo lahi pea ʻi he kolo iiki ki he kolo iiki ʻi he vahefonua ʻo Pēleá, ʻi he tafaʻaki ʻe taha ʻo Sioatani mei Siuteá. Pea ʻoku tui ʻa e tokolahi kiate ia. Ka ko ha fekau fakavavevave fekauʻaki mo hono kaumeʻa ʻofeina ko Lasalosí ʻoku toe fiemaʻu ai ia ki Siutea.​—Luke 13:33; Sione 10:​20-​42.

17. (a) Ko e hā ʻa e pōpoaki fakavavevave ʻoku maʻu ʻe Sīsū lolotonga ʻene malanga ʻi Pēleá? (e) Ko e hā ʻokú ne fakahaaʻi ʻoku lāuʻilo ʻa Sīsū fekauʻaki mo e taumuʻa ʻo e ngāue kuo pau ke ne faí pea mo e taimi ʻo e hoko ʻa e ngaahi meʻá?

¹⁷ Ko e pōpoaki fakavavevavé ko e haʻu ia meia Māʻata mo Mele, ko e ongo tuofāfine ʻo Lasalosí, ʻa ia ʻokú na nofo ʻi Pētani ʻo Siuteá. “ʻEiki, ke ke meaʻi ko e siana ʻoku ke ʻofa ai ʻoku puke,” ko e fakamatala ia ʻa e talafekaú. “Ko e mahaki koeni kuo ʻikai hoko mai ke ne pekia ai,” ko e tali ia ʻa Sīsuú, “ka ko hono ʻuhinga ko e langilangi ʻo e ʻOtua, koeʻuhi ke fakalangilangiʻi ai ʻa e ʻAlo ʻo e ʻOtua.” Ke lavaʻi ʻa e taumuʻa ko ení, ʻoku ʻosi fakakaukauʻi pē ʻa e nofo ia ʻa Sīsū ʻi he feituʻu ʻokú ne ʻi aí ʻo feʻunga mo e ʻaho ʻe ua. ʻOkú ne lea leva ki heʻene kau ākongá: “Tau toe ō ki Siutea.” ʻI he taʻeloto ki aí, ʻoku nau tali ange: “Lapai, naʻe toki feinga ʻe haʻa Siu ke tolongi koe; pea ko hoʻo toe ʻalu koā ki ai?” Ka ʻoku lāuʻilo ʻa Sīsū ko e toenga ʻo e “houa ʻi he ʻaho,” pe ko e taimi kuo tuku ʻe he ʻOtuá ki heʻene ngāue fakafaifekau ʻi he māmaní, ʻoku nounou. ʻOkú ne ʻiloʻi ʻa e meʻa tonu ko ia kuo pau ke ne faí pea mo hono ʻuhingá.​—Sione 11:​1-10.

Ko ha Mana ʻOku ʻIkai Lava ʻe ha Taha ke Fakaʻikaiʻi

18. ʻI he aʻu ʻa Sīsū ki Pētaní, ko e hā ʻa e tuʻunga ʻi aí, pea ko e hā ʻoku hoko hili ʻene aʻu ki aí?

¹⁸ ʻI Pētani, ko Māʻata ʻa e ʻuluaki tokotaha ke fakafetaulaki mai kia Sīsuú, ʻo ne pehē: “ʻEiki, ka ne ke ʻi heni pehē ne ʻikai pekia hoku tuongaʻane.” ʻOku hoko mai ai ʻa Mele mo e faʻahinga naʻe haʻu ki honau falé. ʻOku nau tangi kotoa. “Kuo mou telio ia ʻi fē?” ko e ʻeke ange ia ʻe Sīsuú. ʻOku nau tali mai: “ʻEiki, ke ke meʻa mai, ʻo meʻa ki ai.” ʻI heʻenau aʻu atu ki he fonualoto fakamanatú​—ko ha ʻana mo ha fuʻu maka ʻoku tokoto ʻi hono hūʻangá—ʻoku pehē atu ʻe Sīsū: “Toʻo ʻa e maka.” ʻI he ʻikai mahinoʻi ʻa e meʻa ʻoku fakahangahanga ʻa Sīsū ke ne faí, ʻoku fakafepaki ki ai ʻa Māʻata: “ʻEiki, kuo namuhāhā; he ko hono ʻaho fa mālō ʻeni.” Ka ʻoku ʻeke ange ʻe Sīsū: “ʻIkai naʻa ku tala atu, kapau te ke tui, te ke mamata ki he langilangi ʻo e ʻOtua?”—Sione 11:​17-40.

19. Ko e hā ʻoku lotu fakahāhā ai ʻa Sīsū ki muʻa ke ne fokotuʻu hake ʻa Lasalosí?

¹⁹ ʻI hono toʻo ʻa e maka naʻá ne ʻufiʻufi ʻa e hūʻanga ki he fonualoto ʻo Lasalosí, ʻoku lotu leʻo-lahi ʻa Sīsū koeʻuhi ke ʻilo ʻe he kakaí ko e meʻa ʻoku teu ke ne faí ʻoku lavaʻi ia fakafou ʻi he mālohi ʻo e ʻOtuá. ʻOkú ne kalanga leʻo-lahi atu leva: “Lasalosi, tuʻu mai kituʻa.” ʻOku hū mai ki tuʻa ʻa Lasalosi ʻoku kei haʻi pē ʻa hono ongo nimá mo e vaʻé ʻaki  ʻa e ngaahi haʻi ʻi he tanú pea ʻoku ʻufiʻufi ʻaki hono matá ha konga tupenu. “Vete ia, pea tukuange ke ne ʻalu,” ko e lea ia ʻa Sīsuú.—Sione 11:​41-44.

20. ʻOku anga-fēfē ʻa e tali ʻa e faʻahinga ko ia ʻoku nau sio ki hono fokotuʻu hake ʻe Sīsū ʻa Lasalosí?

²⁰ ʻI he sio ki he mana ko ení, ko e tokolahi ʻo e kau Siu ko ia kuo nau haʻu ke fakafiemālieʻi ʻa Māʻata mo Melé ʻoku nau tui kia Sīsū. ʻOku ʻalu ʻa e niʻihi kehé ke tala ki he kau Fālesí ʻa e meʻa kuo hokó. Ko ʻenau talí? ʻI he taimi pē ko iá, ko kinautolu mo e kau taulaʻeiki lahí ʻoku nau ui ha fakataha fakavavevave ʻa e Sanetalimí. ʻI he ilifiá, ʻoku nau tangilāulau: “Ko e ha muʻa ʻoku tau fai? he ko e tangata ni ko e meʻa ngei ʻene fai mana. Kapau te tau tuku ia ke fai pehē ai pē, ʻe tui pikitai kiate ia ʻa e kakai kotoa pē, pea ʻe haʻu ʻa e kau Loma, ʻo ʻave hotau fonua mo hotau puleʻanga fakatouʻosi.” Ka ʻoku pehē ange ʻe he Taulaʻeiki Lahi ko Kaiafasí kiate kinautolu: “ʻOku ʻikai . . . te mou fakakaukau, ʻoku lelei muʻa kiate kimoutolu ke mate ha foʻi tangata ʻe toko taha koeʻuhi ko e faʻahinga tapu, pea ʻoua naʻa ʻauha ʻa e puleʻanga kotoa.” Ko ia ai, mei he ʻaho ko iá ʻo faai mai ai ʻoku nau alēlea ke tāmateʻi ʻa Sīsū.​—Sione 11:​45-53.

21. Ko e talateu ki he hā ʻa e mana ʻo hono fokotuʻu hake ʻo Lasalosí?

²¹ Ko ia ko hono toloiʻi ʻene aʻu ki Pētaní, ʻoku malava ai ʻa Sīsū ke fakahoko ha mana ʻoku ʻikai lava ʻe ha taha ke fakaʻikaiʻi. ʻI hono fakaivia ʻe he ʻOtuá, ʻoku fokotuʻu hake ai ʻe Sīsū ha tangata ʻa ia naʻá ne mate feʻunga mo e ʻaho ʻe fā. Naʻa mo e Sanetalimi ongoongoá ʻoku fakamālohiʻi ia ke ne fakatokangaʻi pea tuku atu ha tautea mate ki he Tokotaha-Ngāue Maná! ʻOku ngāue ai ʻa e maná ko ha talateu ia ki ha poini mahuʻinga ʻi he ngāue fakafaifekau ʻa Sīsuú​—ko ha liliu mei he vahaʻa taimi ʻa ia “kuo teʻeki hokosia hono houá” ki he taimi ʻa ia “kuo hokosia hono houá.”

ʻE Fēfē Haʻo Tali?

• Naʻe anga-fēfē hono fakahaaʻi ʻe Sīsū naʻá ne lāuʻilo ki heʻene ngāue kuo vaheʻi ange ʻe he ʻOtuá?

• Ko e hā ʻoku taʻeloto ai ʻa Sīsū ki he fokotuʻu ange ʻa ʻene faʻeé ʻo fekauʻaki mo e uainé?

• Ko e hā ʻoku lava ke tau ako mei he founga ʻo e faʻa feangainga ʻa Sīsū mo e kau fakafepakí?

• Ko e hā ʻoku tautoloi ai ʻa Sīsū ʻi hono fai ha tali ki he puke ʻa Lasalosí?

[Fehuʻi ki he Ako]

[Fakatātā ʻi he peesi 12]

Naʻe līʻoa ʻe Sīsū ʻa hono iví ki hono fatongia kuo vaheʻi ange ʻe he ʻOtuá