Kuo Vavé Ni ha Māmani ʻIkai ha ʻAmanaki-Tōnoa

ʻOKU hoko ʻo tupulaki ʻa e faifakakouna ʻa e moʻuí, pea ʻoku lahi ʻa e ngaahi ʻuhinga ki he ʻamanaki-tōnoá. ʻI he taimi ʻo e ongoʻi feifeitamakí, te tau ʻiloʻi nai ai ʻoku faingataʻa ke mapuleʻi ʻetau ngaahi ongó. Ko ē, naʻa mo e kakai ʻoku nau ʻofa ʻi he moʻuí ʻoku lava ke nau hoko ʻo loto-mamahi lahi! Fakakaukau angé ki ha ngaahi fakatātā.

ʻI he kuonga muʻá, naʻe hoko ai ʻa e palōfita ko Mōsesé ʻo loto-siʻi ʻaupito ʻo ne lea ai ki he ʻOtuá: “Peʻi tamateʻi muʻa au ke ʻosi, ʻo kapau moʻoni ʻoku ke ʻofa mai: koeʻuhi ke ʻoua naʻa ku sio ki he kovi ʻe hoko kiate au.” (Nomipa 11:15) ʻI he hola mei hono ngaahi filí, naʻe kalanga ai ʻa e palōfita ko ʻIlaisiaá: “Kuo lahi, E Jihova, too atu eni a eku moui.” (1 Tuʻi 19:​4, PM) Pea naʻe pehē ʻe he palōfita ko Sioná: “E Jihova oku ou kole kiate koe too a eku moui meiate au, he oku lelei lahi kiate au keu mate i he eku moui.” (Siona 4:​3, PM) Ka naʻe ʻikai ke taonakita ʻa Mōsese, ʻIlaisiā, pe ko Siona. Ko kinautolu kotoa naʻa nau ʻiloʻi ʻa e fekau ʻa e ʻOtuá: “ʻOua naʻa ke fakapō.” (Ekisoto 20:13) ʻI hono maʻu ʻa e tui mālohi ki he ʻOtuá, naʻa nau lāuʻilo ʻoku ʻikai ha tuʻunga ʻe taʻeʻiai ha ʻamanaki ki ai pea ko e moʻuí ko ha meʻaʻofa ia mei he ʻOtuá.

Fēfē ʻa e ngaahi palopalema ʻoku tau fehangahangai mo ia he taimi ní? ʻI he tānaki atu ki he mafasia fakaeongó pe ngaahi palopalema fakaesinó, kuo pau nai ke tau kātakiʻi ʻi ha taimi ʻe niʻihi ʻa e ngaohikovia mei he ngaahi mēmipa ʻo e fāmilí, ngaahi kaungāʻapí, pe kaungāngāué. ʻOku lau ʻa e Tohitapú ʻo fekauʻaki mo e kakai ʻoku fonu “ʻi he angahala kotoa pe, he angafitaʻa, he manumanu, he lotokovi; ko e kakai ʻoku pito ʻi he meheka, he fakapō, he fakakē, he fakahekeheke, he mahalo kovi; ko e kakai fakakovi, ko e kakai fasituʻu—ʻa kinautolu ʻoku fehiʻanekina  ʻe he ʻOtua—ko e kakai pauʻu, ko e kakai angafakataʻetokaʻi, ko e kakai fielahi, ko e kakai fakakaukau kovi foʻou, ko e kakai talangataʻa ki he matuʻa; ko e taʻeloto, ko e taʻe fai ki heʻenau fuakava, ko e tae-ʻofa-ki-hoʻota, ko e taʻefakamolemole.” (Loma 1:​28-31) ʻI hono ʻātakaiʻi ʻe he kakai pehē ʻi he ʻaho ki he ʻahó ʻokú ne ʻai nai ai ʻa e moʻuí ke hā ngali hangē ha kavengá. ʻE lava fēfē ke tau tokoniʻi ʻa e faʻahinga ko ia ʻoku nau fiemaʻu ha fakafiemālie mo ha fakanongá?

Loto-Lelei ke Fanongo

Ko e ngaahi fakafilí mo e faingataʻá ʻoku lava ke ne fakatupunga ha tokotaha ke mole ai ʻa ʻene mafamafatatau fakaefakakaukaú. Naʻe pehē ʻe he potó: “Ko e fakamalohia ʻoku meʻa mo sesele ai ʻa e tangata poto.” (Koheleti 7:7 [Tagata Malaga, PM]) Ko ia, ko ha tokotaha ʻoku talanoa fekauʻaki mo e taonakitá ʻoku totonu ke fai ha fakakaukau fakamātoato ki ai. Ko e ngaahi palopalema ʻokú ne maʻú, tatau ai pē pe ʻoku fakaeongo, fakaesino, fakaefakakaukau, pe fakalaumālie, ʻe fiemaʻu nai ki ai ha tokanga fakavavevave. Ko e moʻoni, ʻoku kehekehe ʻa e ngaahi meʻa ke fakaleleiʻiʻakí mo e ngaahi faitoʻo fakapalōfesinalé, pea kuo pau ke fai ha fili fakafoʻituitui ʻo fekauʻaki mo e ngaahi faʻahinga ʻo e faitoʻó.​—Kaletia 6:5.

Pe ko e hā ʻa e ʻuhinga ki he ngaahi ongoʻi holi ke taonakitá, ko hono maʻu ha tokotaha ʻiloʻilo, kaungāongoʻi, mo anga-kātaki ke falala ki aí ʻe hoko nai ai ha liliu mahuʻinga. Ko e ngaahi mēmipa ʻo e fāmilí mo e ngaahi kaumeʻa ʻoku nau loto-lelei ke fanongó ʻe malava nai ke nau tokoni. ʻI he tānaki atu ki he ongoʻi femahinoʻakí mo e anga-ʻofá, ko e ngaahi fakakaukau fakatupu langa hake mei he Folofola ʻa e ʻOtuá ʻe lava ke mātuʻaki ʻaonga ia ki he faʻahinga ko ia kuo mole ʻenau ʻamanakí.

Tokoni Fakalaumālie ki he Loto-Mafasiá

Te ke ʻohovale nai ke ʻilo ʻa e anga ʻo e fakalototoʻa ʻa e lau Tohitapú. Neongo ʻoku ʻikai ko ha tohi ia ki he moʻuilelei fakaeʻatamaí, ʻoku lava ʻe he Tohitapú ke ne tokoniʻi kitautolu ke tau fakamahuʻingaʻi ʻa e moʻuí. Naʻe pehē ʻe Tuʻi Solomone: “Kuo u ʻilo ʻoku ʻikai ha lelei ʻi he nofo, ka ke te fiefia mo fai lelei lolotonga ʻete moʻui. Ka ko eni foki, ko e kai mo inu ʻa e tangata kotoa pe, mo ʻene ʻilo lelei ʻi heʻene ngaahi ngaue kehekehe, ko e meʻa foaki ia ʻa e ʻOtua.” (Koheleti 3:​12, 13) Tuku kehe ʻa e ngāue fakafiemālie ʻokú ne ʻomai ʻa e ʻuhinga ki he moʻuí, ko e fanga kiʻi meʻa iiki​—hangē ko e ʻea leleí, maama mei he laʻaá, ngaahi matalaʻiʻakaú, ʻuluʻakaú, mo e fanga manupuná​—ko e ngaahi meʻaʻofa ia naʻe foaki mai ʻe he ʻOtuá ʻe lava ke tau fiefia ai.

Ko e meʻa ʻoku toe lelei angé ko e fakapapauʻi ʻe he Tohitapú ko Sihova ko e ʻOtuá mo hono ʻAló, ʻa Sīsū Kalaisi, ʻokú na tokanga mai fekauʻaki mo kitautolu. (Sione 3:​16; 1 Pita 5:​6, 7) ʻOku feʻungamālie ʻa e pehē ʻe he tokotaha-tohi-sāmé: “Ke monūʻia ʻa Sihova, ʻa ia ʻokú ne fua fakaʻaho ʻa e kavengá maʻatautolu, ʻa e ʻOtua moʻoni ʻo hotau fakamoʻuí.” (Sāme 68:​19, NW) Neongo ʻoku tau ongoʻi taʻemahuʻinga nai mo taʻetaau, ʻoku fakaafeʻi mai kitautolu ʻe he ʻOtuá ke tau lotu ange kiate ia. Mātuʻaki fakapapauʻi ʻe ʻikai ke taʻetokaʻi ha taha ʻoku kole anga-fakatōkilalo mo loto-moʻoni ki heʻene tokoní.

ʻOku ʻikai ha taha ʻe lava ke ne ʻamanekina moʻoni ha moʻui ʻoku ʻatā mei he palopalemá he ʻahó ni. (Siope 14:1) Neongo ia, ko e moʻoni mei he Folofola ʻa e ʻOtuá kuó ne fakahaaʻi ki he kakai tokolahi ko e taonakitá ʻoku ʻikai ko e founga totonu ia ke solovaʻaki ʻenau ngaahi palopalemá. Fakakaukau angé ki he anga ʻo hono tokoniʻi ʻe he ʻapositolo ko Paulá ha tokotaha sela naʻe ʻikai haʻane ʻamanaki, ʻa ia “ʻi he ʻā leva . . . ʻo ne vakai kuo matangaki ʻa e ngaahi matapā ʻo e pilisone, naʻa ne unuhi ʻene heletā, ʻo ne fai ke tamateʻi ia, ko ʻene mahalo kuo feholaki ʻa e kau popula.” ʻI he taimi pē ko iá, naʻe fakaʻosi ʻaki ai ʻe he tokotaha selá naʻe lelei ange ke ne taonakita ʻi hano fakamaaʻi pea mo ha mate ʻe tuku tauhi mai nai ʻi heʻene taʻemalava ke fakahoko hono fatongiá. Naʻe kaila atu ʻa e ʻapositoló: “ʻOua te ke fai ha kovi kiate koe: he ʻoku mau kei katokatoa.” Naʻe ʻikai ke ngata pē ai ʻa e fakamatala ʻa Paulá. Ko hono moʻoní, ko ia mo Sailosi naʻá na fakafiemālieʻi ʻa e tokotaha selá pea tali ʻa ʻene fehuʻi: “Houʻeiki, ko e hā ʻeku meʻa ke fai ke u moʻui?” Naʻá na tali ange: “Tui falala ni ki he ʻEiki ko Sisū, pea te ke moʻui, ʻa koe mo ho fale.” Naʻá na lea leva kiate ia mo hono fāmilí ʻi he folofola ʻa Sihová, pea ko hono olá naʻá ne “papitaiso leva, ʻa ia mo kinautolu kotoa pē naʻe ʻiate ia.” Ko e tokotaha sela ko iá mo e kotoa ʻo hono fāmilí naʻa nau fiefia lahi pea nau maʻu ʻa e ʻuhinga foʻou ki he moʻuí.​—Ngāue 16:​27-35.

ʻI he ʻahó ni, ko ha fakanonga ē ke ʻiloʻi ʻoku ʻikai ke tupu mei he ʻOtuá ʻa e fulikivanú! ʻOku fakahaaʻi ʻe heʻene Folofolá ko ha laumālie fulikivanu, “ʻa e toko taha ʻoku ui ko e Tevolo mo Setane,” ko e tokotaha ia ʻokú ne “kākāʻi ʻa mamani kātoa.” Ka ʻoku toe siʻi pē ʻa hono taimí. (Fakahā 12:​9, 12) Kuo vavé ni ke ngata ʻa e loto-mafasia kotoa kuo ʻomai ʻe Sētane mo ʻene kau tēmenioó ki he kakai ʻoku nofo ʻi he māmaní, ʻaki ʻa e kau mai ki ai ʻa e ʻOtuá. ʻE toki fakahoko mai leva ʻe he  māmani foʻou māʻoniʻoni naʻe talaʻofaʻaki ʻe he ʻOtuá ha ngataʻanga tuʻuloa ki he ngaahi meʻa ʻokú ne fakatupunga ʻa e ʻikai ha ʻamanakí mo e taonakitá.​—2 Pita 3:​13.

Fakafiemālie ki he Faʻahinga ʻOku Tangi ki ha Tokoní

Naʻa mo e taimí ni, ko e faʻahinga ko ia ʻoku mātuʻaki siva ʻenau ʻamanakí ʻoku lava ke nau maʻu ha fakafiemālie mei he ngaahi Konga Tohitapú. (Loma 15:4) Naʻe hiva ʻa e tokotaha-tohi-sāme ko Tēvitá: “Ko e loto lavea mo mafesifesi ʻe ʻikai taʻe tokaʻi ʻe he ʻAfiona.” (Sāme 51:17) Ko e moʻoni, ʻoku tau fetaulaki taʻealakalofi mo e ngaahi ʻahiʻahi ʻe niʻihi, pea ongoʻi ʻa e ngaahi nunuʻa ʻo e taʻehaohaoá. Ka ko hono maʻu ʻa e ʻilo totonu ki heʻetau Tamai fakahēvani anga-lelei, ʻofa, mo fakaʻatuʻí te ne ʻomai kiate kitautolu ʻa e fakatuipau ʻoku tau mahuʻinga ʻi heʻene ʻafio maí. ʻE lava ʻa e ʻOtuá ke hoko ko hotau Kaumeʻa mo hotau Tokotaha-Fakahinohino tuʻu-ki-muʻa. Kapau te tau fakatupulekina ha vahaʻangatae fekoekoeʻi mo Sihova ko e ʻOtuá, ʻe ʻikai ʻaupito te ne fakalotomamahiʻi kitautolu. “Ko au Sihova ko ho ʻOtua,” ko e folofola ia ʻa hotau Tokotaha-Fakatupú, “ʻoku ou ako koe ke fai meʻa ʻaonga, ʻoku ou tataki koe ʻi he hala ʻoku totonu ke ke fou ai.”—Aisea 48:17 (Isaia, PM).

Ko e falala ki he ʻOtuá kuó ne tokoniʻi ʻa e kakai tokolahi. Ke fakatātaaʻi: Ne ʻosi fakavaivaiʻi ʻa Mala ʻe ha loto-mafasia fuoloa ʻi he taimi naʻe mole ai ʻa hono foha pē tahá ʻi ha fakatuʻutāmaki ʻa ha meʻalele. a Naʻe tuʻungaʻa hake pē ʻa ʻene ilifiá peá ne feinga ke ne toʻo ʻa ʻene moʻuí tonu. Kae kehe, ʻi he taimi ní, ʻokú ne ʻā pongipongia ʻi he ʻaho kotoa pē ke tokangaʻi ʻa ʻene ngāue fakaʻapí. ʻOkú ne fiefia ʻi he fanongo fasí mo hono tokoniʻi ʻa e niʻihi kehé. Ko e ʻamanaki ki he “hoko ha toetuʻu ʻa e angatonu mo e angahala fakatouʻosi” kuó ne toʻo atu ʻa e niʻihi ʻo e mamahi tupu mei he mate fakamamahi ʻa hono foha ʻofeiná, pea kuó ne fakaivimālohiʻi ʻa ʻene tui ki he ʻOtuá. (Ngāue 24:15) Koeʻuhi naʻe ʻikai ʻaupito maʻu ʻe Mala ʻa e holi ke hoko ʻo hangē ko ha ʻāngelo ʻi hēvaní, ko e ngaahi lea ʻo e Sāme 37:11 naʻe maongo ia ki hono lotó: “ʻE maʻu ʻa e fonua ʻe he faʻa kataki; pea te nau fefiefiaʻi ʻi he melino lahi.”

Ko ha toe fefine Pelēsila ʻe taha, ko Senitulā, naʻe ngāue mālohi ʻaupito ia ke ne hoko ko ha faʻē haohaoa ki heʻene fānau ʻe toko tolu. ʻOkú ne fakahaaʻi: “Naʻá ku femoʻuekina lahi pea ʻi he taimi naʻe mate fakafokifā ai ʻa ʻeku tamaí, ʻi he taimi tatau, naʻá ku ʻiloʻi ai naʻe ʻi ai ha faingāmeʻa ʻa hoku husepānití mo ha fefine ʻe taha, naʻe ʻikai ʻaupito te u fakakaukau fekauʻaki mo ha lotu ki he ʻOtuá ki ha tokoni.”  ʻI he ʻamanaki-tōnoá naʻe feinga ai ʻa Senitulā ke ne tāmateʻi pē ʻa ia tonu. Ko e hā naʻá ne tokoniʻi ia ke ne toe aké? Ko ʻene houngaʻia ʻi he ngaahi meʻa fakalaumālié. “ʻI he pō kotoa ki muʻa ke u mohé, ʻoku ou lau ʻa e Tohitapú, peá u feinga ke ʻai au ʻi he tuʻunga ʻo e kakai ʻoku ou lautohi fekauʻaki mo iá. ʻOku ou toe lau foki ʻa e ngaahi makasini Taua Leʻo mo e Awake!, pea ʻoku ou manako tautefito ʻi he ngaahi talanoa ki he moʻuí koeʻuhi he ʻoku nau tokoniʻi au ke u fiemālie pē ʻi heʻeku founga moʻuí.” ʻI hono ʻiloʻi ko Sihova ʻa hono kaumeʻa lelei tahá, kuó ne ako ai ke lea hangatonu ʻi heʻene ngaahi lotú.

Ko ha Kahaʻu ʻOku ʻIkai ha ʻAmanaki-Tōnoa

Ko ha fakafiemālie ē ke ʻiloʻi ʻoku fakataimi pē ʻa e faingataʻaʻia ʻa e faʻahinga ʻo e tangatá! ʻI he malumalu ʻo e pule ʻa e Puleʻanga ʻo e ʻOtuá, ko e fānau mo e kakai lalahi ko ia ʻoku nau hoko ʻo maʻukovia he taimí ni ʻe he faihiá, fakamaau taʻetotonú, pe ko e tomuʻa fehiʻá te nau fiefia. Hangē ko ia ne tomuʻa tala ʻi he sāme fakaekikité, ko e Tuʻi fakanofo ʻa Sihová, ʻa Sīsū Kalaisi, “ʻoku ne fakahaofi ʻa e masiva ʻo ka tangi; ko e vaivai foki mo ia ʻoku ʻikai hano tokoni.” ʻIkai ngata aí, “ko e tuʻutamaki mo e masiva ʻoku ne fakaʻatuʻi, pea ko e ngaahi laumalie ʻo e masiva ʻoku ne fakamoʻui.” Ko e moʻoni, “ʻoku ne huhuʻi honau laumalie mei he maumau mo e fakamalohi, pea ʻoku mahuʻinga honau toto ʻi heʻene vakai.”—Sāme 72:​12-14.

Ko e taimi ki hono fakahoko ʻo e ngaahi lea fakaekikite ko iá ʻoku ofi. ʻOku fakamānako kiate koe ʻa e fakakaukau ʻo e fiefia ʻi he moʻui taʻengata ʻi he māmaní ʻi he malumalu ʻo e ngaahi tuʻunga peheé? Kapau ko ia, ʻokú ke maʻu ʻa e ʻuhinga ke ke fiefia ai peá ke koloaʻaki ʻa e moʻuí ko ha meʻaʻofa ia mei he ʻOtuá. Pea kapau ʻokú ke vahevahe ʻa e ngaahi talaʻofa Fakatohitapu fakafiemālie ko ení ki he niʻihi kehé, ʻokú ke ʻoatu nai ai ʻa e fiefia lahi ki he moʻui ʻa e faʻahinga ko ia ʻoku tangi ki ha tokoni ʻi he māmani taʻeongoʻi, mo taʻeʻofa ko ení.

[Fakamatala ʻi lalo]

[Fakatātā ʻi he peesi 6]

ʻOku lahi ʻa e ngaahi tuʻunga ki he fiefiá ʻi he ʻahó ni

[Fakatātā ʻi he peesi 7]

ʻOkú ke hanga atu ki ha māmani ʻikai ha ʻamanaki-tōnoa?