Māmaní—Ko ha Feituʻu ʻAhiʻahi Pē Ia?

KO HA fakanonga ē! Kuó ne lava he siví. Ko e tokotaha ako ko ia ne fāinga ʻi ha sivi fakaongosia uike ʻe uá kuo faifai peá ne maʻu ha līpooti fakafiemālie. Kuo malava leva he taimí ni ke ne hoko atu ki he ngāue naʻá ne fakaʻamu maʻu pē ki aí.

Ko e kakai tokolahi ʻoku nau vakai ki he moʻui ʻi he foʻi māmaní ʻi ha founga meimei tatau. ʻOku nau fakakaukau ki ai ko ha tomuʻa sivi ia kuo pau ki he tokotaha kotoa ke ne fou ai. Ko e faʻahinga ʻoku “lavá” ʻoku nau ʻunu atu ki he meʻa ʻoku toe lelei angé ʻi ha faʻahinga tuʻunga ʻo e Moʻui-Ka-Hokó. Ko e moʻoni, ʻe hoko ʻo fakamamahi, kapau ko e moʻui lolotongá—ko ha kiʻi ʻi ai pē ki he tokolahi—ʻa ia ʻoku lava ke ʻamanekina ai ʻa e lelei tahá ʻe he tangatá. Neongo ʻene moʻuilelei mo lakalakaimonū ʻi he lahi taha ʻo ʻene moʻuí, ko e tokotaha ʻi he Tohitapú ko Siope naʻá ne pehē: “Ko e tangata kuo fanauʻi ʻe he fefine ʻoku fuonounou ʻene moʻui, pea ʻoku fonu ʻi he mamahi.”—Siope 14:1.

ʻI he vakai atu ki he fakakaukau ʻa e tokolahi, ʻoku pehē ʻe he New Catholic Encyclopedia: “Ko e lāngilangi fakahēvaní ko e tufakanga ia kuo fakataumuʻa ki ai ʻa e tangatá ʻe he ʻOtuá. . . . Ko e fiefia ʻa e tangatá kuo vakai ki ai ʻoku fakatuʻunga ia ʻi heʻene maʻu ʻa e fiefia kakato fakahēvaní.” Naʻe taukaveʻi ʻe ha savea ki muí ni ʻa e Siasi ʻo Kalaisí ʻi he ʻIunaite Seteté ko e peseti ʻe 87 ʻo e faʻahinga naʻe kau ki he fakaʻekeʻeké ʻoku nau tui ʻoku hangehangē te nau ō ki hēvani ʻi he hili ʻenau maté.

Ko e tokolahi ʻo e faʻahinga ʻikai ko e kau Kalisitiané ʻoku nau ʻamanaki foki ke mavahe mei he māmaní ki ha feituʻu lelei ange ʻi he hili ʻa e maté. Ko e fakatātaá, ko e kau Mosilemí ʻoku nau ʻamanaki ke ō ki ha palataisi fakahēvani. Ko e kau muimui ʻo e ngaahi lotu mavahe Fonua Maʻa ʻo e lotu-Putá ʻi Siaina mo Siapani ʻoku nau tui ko hono lau maʻuloto taʻetuku ʻo e “Amitabha,” ko e hingoa ia ʻo e Puta ki he Maama Taʻefakangatangatá, ʻe toe fanauʻi foʻou ai kinautolu ʻi he Fonua Maʻa, pe Palataisi ʻo e Hihifó, ʻa ia te nau nofo ai ʻi he fiefia taupotu tahá.

ʻOku fakatupu tokangá, ko e Tohitapú, ʻa e tohi māʻoniʻoni kuo liliu mo tufaki lahi taha ʻi he māmaní, ʻoku ʻikai te ne fakahaaʻi ko e foʻi māmaní ko ha feituʻu ke hola mei ai, ʻo meimei hangē ia ko ha maka lakaʻangá. Hangē ko ʻení, ʻokú ne fakahaaʻi: “Ko haʻa fai totonu te nau maʻu ʻa e fonua, pea te nau nofo ai ʻo tuputupuʻa.” (Sāme 37:29) ʻOku toe maʻu foki ʻi he Tohitapú ʻa e lea ʻiloa ʻa Sīsuú: “Monūʻiaā ka ko e angamaluú: he te nau maʻu ʻa e foʻi māmaní.”​—Mātiu 5:​5, King James Version.

Ko e vakai fakalūkufua ʻoku fakataimi pē hotau nofoʻanga fakaemāmaní ʻoku fakahuʻunga ai ko e maté ko ha hūʻanga ia ki ha fiefia kakato ʻi he moʻui hili ʻa e maté. Kapau ko ia, tā ko e maté leva ʻoku pau ko ha tāpuaki. Ka ʻoku pehē ʻa e vakai ʻa e kakaí fakalūkufua ki he maté, pe ʻoku nau feinga ke fakalōloaʻi ʻa e moʻui ko ʻení? ʻOku fakahaaʻi ʻe he meʻa kuo hokosiá ko e taimi ʻoku fiefia ai ʻa e kakaí ʻi he moʻuilelei mo e malu feʻungá, ʻoku ʻikai te nau fie mate.

Ka neongo ia, koeʻuhi ko e moʻui ʻi he foʻi māmaní ʻoku fonu ʻi he koví mo e mamahí, ʻoku kei vakai ai ʻa e tokolahi ki hēvani ko e feituʻu pē ia ke maʻu ai ʻa e melino mo e fiefia moʻoní. Ko hēvaní ko ha feituʻu pē ia ʻo e melino kakató, ʻo mātuʻaki hao mei he koví mo e moveuveú? Pea ko ha Moʻui-Ka-Hokó ʻe ʻi ha faʻahinga nofoʻanga fakahēvani pē ia? Te ke ʻohovale nai ʻi he ngaahi tali ʻa e Tohitapú. Kātaki ʻo hoko atu ʻa e laú.