ʻOku Lava Ke Tau Ako mei he ʻUluaki Ongo Meʻa Mali Fakaetangatá

NAʻE saveaʻi ʻe he ʻOtuá ʻa e palanite ko Māmaní. Naʻá ne teuʻi ia ke nofoʻi ʻe he tangatá. Naʻá ne ʻafio ki he meʻa kotoa naʻá ne ngaohí naʻe lelei. Ko hono moʻoní, ʻi he lava ʻa e ngāue ko ení, naʻá ne fakahaaʻi naʻe “lelei ʻaupito.” (Senesi 1:​12, 18, 21, 25, 31) Kae kehe, ki muʻa ke aʻu ki he fakamulituku haohaoa ko iá, naʻe folofola ʻa e ʻOtuá fekauʻaki mo e meʻa ʻa ia naʻe “ʻikai lelei.” Ko e moʻoni, naʻe ʻikai ke ngaohi ʻe he ʻOtuá ha meʻa ʻe taʻehaohaoa. Ko e meʻá pē naʻe teʻeki ai ke kakató ʻa ʻene fakatupú. “ʻOku ʻikai lelei ki he tangata ke toko taha,” ko e folofola ia ʻa Sihová. “Kau ngaohi maʻana ha tokoni ke ʻao mo [“fakakakato,” NW] ia.”—Senesi 2:18.

Ko e taumuʻa ia ʻa Sihová ke maʻu ʻe he sōsaieti fakaetangatá ʻa e moʻui taʻengata ʻi he moʻuilelei, fiefia, mo e tuʻumālie ʻi ha palataisi fakaemāmani. Ko e  tamai ʻa e faʻahinga kotoa ʻo e tangatá ko ʻĀtama. Ko hono uaifí, ʻa ʻIvi, naʻá ne hoko “ko e faʻe ia ʻa e kakai kotoa pe.” (Senesi 3:20) Neongo kuo fakafonu ʻa e māmaní he taimí ni ʻaki ʻa e laui piliona ʻo ʻena fānaú, ʻoku mamaʻo ʻaupito ʻa e tangatá mei he haohaoá.

ʻOku ʻiloa ʻa e talanoa kia ʻĀtama mo ʻIví. Ka ko e hā ʻa ʻene ʻaonga moʻoni kiate kitautolú? Ko e hā ʻoku lava ke tau ako mei he ngaahi meʻa naʻe hokosia ʻe he ʻuluaki ongo meʻa mali fakaetangatá?

“Naʻa Ne Fakatupu ʻAkinaua ko e Tangata mo e Fefine”

ʻI he taimi naʻe fakahingoa ai ʻe ʻĀtama ʻa e fanga manú, naʻá ne sio ai naʻe ʻi ai honau ngaahi hoa ka naʻe hala ia. Ko ia, ʻi he taimi naʻá ne sio ai ki he meʻamoʻui fakaʻofoʻofa naʻe faʻu ʻe Sihova mei hono vakavaká, naʻá ne fiefia. ʻI hono ʻiloʻi ko ha konga laulōtaha ia ʻoʻoná, naʻe kalanga ʻa ʻĀtama: “Ko e fai ko eni ko e hui mei hoto hui, mo e kakano mei hoto kakano: ʻe fakahingoa eni ko e Fefine, koeʻuhi naʻe toʻo ia mei he Tangata.”—Senesi 2:​18-23.

Naʻe fiemaʻu ʻe he tangatá “ha tokoni.” Naʻá ne maʻu eni ha taha ʻa ia naʻe feʻungamālie moʻoni. Naʻe feʻunga lelei ʻa ʻIvi ke hoko ko e fakakakato ʻo ʻĀtama​—ʻi hono tokangaʻi ʻa hona ʻapi ngoué pea mo e fanga manú, ʻi hono fakatupu ʻa e fānaú, pea ʻi hono tokonaki mai ʻa e fakaʻaiʻai fakaeʻatamai mo e poupou ʻa ha kaumeʻa moʻoni.​—Senesi 1:​26-​30.

Naʻe tokonaki mai ʻe Sihova ʻa e meʻa kotoa pē naʻe lava ʻi ha ʻuhinga lelei ke holi ki ai ʻa e ongo meʻá. ʻI hono ʻomi ʻa ʻIvi ki hono husepānití pea fakahoko ai hona fakatahaʻi ʻi he malí, naʻe fokotuʻu ai ʻe he ʻOtuá ʻa e ongo vahaʻangatae ʻo e nofo malí pea mo e fāmilí ʻa ia naʻe pau ke fokotuʻutuʻu maau ai ʻa e sōsaietí. ʻI he fakamatala ʻi he Senesí ʻoku pehē ai: “ʻE tukuange ʻe he tangata ʻene tamai mo ʻene faʻe, kae pikitai ki hono uaifi: pea te na hoko ko e kakano pe taha.” Pea ʻi he taimi naʻe tāpuakiʻi ai ʻe Sihova ʻa e ʻuluaki ongo meʻa malí peá ne tala ange kiate kinaua ke na fai ʻa e fakatupú, naʻá ne fakataumuʻa mahino ai ʻe fanauʻi ʻa e kiʻi tama kotoa pē ki ha fāmili tokanga, fakataha mo ha tamai pea mo ha faʻē ke ne tokangaʻi ia.​—Senesi 1:28; 2:24.

“ʻI he Imisi ʻo e ʻOtua”

Ko ʻĀtamá ko ha foha haohaoa ia ʻo e ʻOtuá, naʻe ngaohi ia ʻi Hono ‘ʻīmisí mo hono tataú.’ Ka koeʻuhí ko e “ʻOtua ko e laumālie” ko e tuʻunga tataú ʻe ʻikai lava ke hoko fakaesino ia. (Senesi 1:​26, NW; Sione 4:24) Ko e tataú ʻoku ʻi he ngaahi ʻulungaanga ʻa ia ʻokú ne hiki hake ʻa e tangatá ke māʻolunga mamaʻo ange ia ʻi he fanga manú. ʻIo, naʻe fakahū ki he tangatá mei he kamataʻangá ʻa e ngaahi ʻulungaanga ko e ʻofa, poto, mālohi, mo e fakamaau totonu. Naʻe ʻoange kiate ia ʻa e tauʻatāina ke fili mo ha fatongia ki he meʻa fakalaumālié. Ko ha ongoʻi fakaeʻulungaanga naʻe tupu mo ia, pe konisēnisí, naʻe ʻai ai ia ke ne lava ʻo fakafaikehekeheʻi ʻa e tonú mei he halá. Naʻe maʻu ʻe he tangatá ha malava fakaeʻatamai, ʻo ʻai ai ia ke ne malava ʻo fakalaulauloto ki he ʻuhinga ʻo e moʻui ʻa e tangatá, ke fakalahi ʻa e ʻilo fekauʻaki mo hono Tokotaha-Fakatupú, pea ke fakatupulekina ha fekoekoeʻi mo e Tokotaha ko iá. Ko ia ai, ʻi heʻene mateuteú ne maʻu leva ʻe ʻĀtama ʻa e meʻa kotoa naʻá ne fiemaʻu ke fakahoko ʻaki hono ngafa ʻi he tuʻunga ko e tokotaha ke ne fakalele ʻa e ngāue fakaemāmani ʻa e ʻOtuá.

Talangataʻa ʻa ʻIvi

ʻOku ʻikai ha veiveiua, naʻe fakahinohinoʻi vave ʻe ʻĀtama ʻa ʻIvi fekauʻaki mo e fakangatangata ʻe taha naʻe ʻomai ʻe Sihová: ʻE malava ke na maʻu ʻinasi mei he fuaʻiʻakau ʻi he ʻuluʻakau kotoa pē ʻi hona ʻapi ngoué tuku kehe pē ʻa e taha​—ko e ʻakau ʻo e ʻilo ʻo e leleí mo e koví. Naʻe pau ke ʻoua te na kai mei ai. Kapau naʻá na kai, te na mate ʻi he ʻaho pē ko iá.​—Senesi 2:​16, 17.

ʻIkai fuoloa mei ai, ne ʻohake ai ha ʻīsiu fekauʻaki mo e fuaʻiʻakau naʻe tapuí. Naʻe fakaofiofi ʻo lea kia ʻIvi ha ngata, naʻe ngāueʻaki ko ha tokotaha-lea ʻe ha laumālie taʻehāmai. ʻI he hā ngali tonuhiá, naʻe ʻeke ange ʻe he ngatá: “ʻOku moʻoni koā kuo folofola ʻe he ʻOtua ke ʻoua te mo kai mei he ʻakau kehekehe ʻo e ngouetapu?” Naʻe tali ange ʻe ʻIvi naʻe ngofua ke na kai mei he fuaʻiʻakau ʻo e ʻakau kotoa pē tuku kehe pē ʻa e taha. Ka ʻi he taimi ko iá ne fakafepaki ai ʻa e ngatá ki he ʻOtuá, ʻi heʻene tala ange ki he fefiné: “ʻE ʻikai ʻaupito te mo mate: kae kehe, ʻoku meaʻi ʻe he ʻOtua ko e ʻaho te mo kai ai ʻe ʻa ai homo mata, pea te mo hoko ke hange ko e ʻOtua, hoʻomo ʻilo ʻa e lelei mo e kovi.” Naʻe kamata ke sio ʻa e fefiné ki he fuʻu ʻakau ne fakangatangatá ʻi ha tafaʻaki kehe. “Ko e ʻakau ia ʻoku lelei ki he kai, pea matamatalelei ki he mata.” ʻI hono kākaaʻi fakaʻaufulí, ne maumauʻi ai ʻe ʻIvi ʻa e lao ʻa e ʻOtuá.—Senesi 3:​1-6; 1 Timote 2:​14.

Naʻe taʻealakalofi ʻa e angahala ʻa ʻIví? Mole ke  mamaʻo! ʻAi ange koe tonu ʻi hono tuʻungá. Ko e taukaveʻi ʻa e ngatá naʻá ne mioʻi kakato ʻa e meʻa naʻe leaʻaki ʻe he ʻOtuá mo ʻĀtamá. ʻE fēfē hoʻo ongoʻí kapau ʻe hanga ʻe ha sola ʻo tukuakiʻi ʻoku taʻefaitotonu ha tokotaha ʻokú ke ʻofa mo falala ki ai? Naʻe totonu ke tali kehe ʻa ʻIvi, ʻo fakahaaʻi ʻa e fakaliliʻa mo e ʻita, naʻa mo ʻene fakafisi ke fanongo ki ai. Hili iá, ko hai ʻa e ngatá ke ne fehuʻia ʻa e māʻoniʻoni ʻa e ʻOtuá pea mo e lea ʻa hono husepānití? Tuʻunga ʻi he ʻapasia ki he tefitoʻi moʻoni ʻo e tuʻunga-ʻulú, ne totonu ke kumi ʻa ʻIvi ki ha faleʻi ki muʻa ke ne fai ha fili. Ko ia ʻoku totonu ke tau pehē kapau ʻe faifai pea tuku mai kiate kitautolu ha fakamatala ʻoku fepaki mo e ngaahi fakahinohino ʻoku ʻomai ʻe he ʻOtuá. Neongo ia, naʻe falala ʻa ʻIvi ia ki he ngaahi lea ʻa e Tokotaha-Fakatauelé, ʻo holi ke ne hoko pē ia ko e fakamaau kiate ia tonu ʻi he meʻa naʻe leleí mo ia naʻe koví. Ko e lahi ange ʻene tokanga ki he fakakaukau ko iá, ko e lahi ange ia ʻene fakamānako kiate iá. Ko ha fehālaaki ē naʻá ne faí ʻaki ʻene tauhi maʻu ha holi fehālaakí, ʻo ʻikai ke tukuange ia mei hono ʻatamaí pe fetalanoaʻaki ki he ngaahi meʻá mo e ʻulu ʻo hono fāmilí!​—1 Kolinito 11:3; Semisi 1:​14, 15.

Fanongo ʻa ʻĀtama ki he Leʻo ʻo Hono Uaifí

Naʻe vave ʻa hono fakalotoʻi ʻe ʻIvi ʻa ʻĀtama ke ne kau fakataha mo ia ʻi he angahalá. ʻE anga-fēfē haʻatau fakamatalaʻi ʻa ʻene tali loto-vaivaí? (Senesi 3:​6, 17) Naʻe fehangahangai ʻa ʻĀtama mo ha fāinga mo e ngaahi tuʻunga mateakí. Te ne talangofua ki hono Tokotaha-Fakatupú, ʻa ia naʻá ne foaki ange kiate ia ʻa e meʻa kotoa pē, ʻo kau ai hono hoa ʻofaʻangá, ʻa ʻIvi? ʻE kumi ʻa ʻĀtama ki he tataki ʻa e ʻOtuá ʻi he meʻa naʻe teu ke ne fai ʻi he taimi ko iá? Pe ʻe fili ʻa e tangatá ia ke ne kau mo hono uaifí ʻi heʻene angahalá? Naʻe ʻiloʻi lelei ʻaupito ʻe ʻĀtama ko e meʻa ko ia naʻá ne ʻamanaki ke maʻu ʻi hono kai ʻa e fuaʻiʻakau ne tapuí ko ha fakakaukau hala. Naʻe fakamānavaʻi ʻa e ʻapositolo ko Paulá ke ne tohi: “Nae ikai kākāia a Atama, ka koe fefine nae kākāia bea to ia ki he talagataa.” (1 Timote 2:​14, PM) Ko ia, naʻe fili ʻosi fakakaukauʻi pē ʻe ʻĀtama ke fakafetau kia Sihova. Ko ʻene manavahē ki hono fakamavaheʻi mei hono uaifí ne hā mahino naʻe lahi ange ia ʻi heʻene tui ki he malava ʻa e ʻOtuá ke fakaleleiʻi ʻa e tuʻungá.

Ko e ngāue taonakita ʻa ʻĀtamá. Ne toe iku ia ki hono fakapoongi ʻa e kotoa ʻo e hako ʻa ia naʻe fakaʻatā  ʻe Sihova ʻi heʻene mohu mēsí ke ne fakatupú, koeʻuhi ko e kotoa ʻo kinautolú naʻe fanauʻi ʻi he malumalu ʻo e fakahalaia ʻa e angahalá ki he maté. (Loma 5:​12) He lahi ē ko e totongi ʻo e talangataʻa siokitá!

Ngaahi Nunuʻa ʻo e Angahalá

Ko e nunuʻa hangatonu ʻo e angahalá ko e mā. ʻI he ʻikai ke lele fiefia ke talanoa kia Sihová, naʻe toitoi ʻa e ongo meʻá. (Senesi 3:8) Naʻe movete ʻa ʻena kaumeʻa mo e ʻOtuá. ʻI he fakafehuʻi fekauʻaki mo e meʻa naʻá na faí, naʻe ʻikai te na fakahā ha loto-lavea, neongo ko kinaua fakatouʻosi naʻá na lāuʻilo kuó na maumauʻi ʻa e lao ʻa e ʻOtuá. ʻI hono kai ʻa e ʻakau ne tapuí, naʻá na talitekeʻi ai ʻa e tuʻunga lelei fakaʻotuá.

Ko hono olá, naʻe fakahaaʻi ʻe he ʻOtuá ʻe lahi ʻa e langa ʻe hoko fakataha mo hono fanauʻi ʻo e fānaú. ʻE holi ʻa ʻIvi ki hono husepānití, pea ʻe puleʻi ia ʻe he husepānití. Ko ʻene feinga ke maʻu ʻa e faʻifaʻitelihá ne iku ai ki he tuʻunga fehangahangai tonu. ʻE kai he taimi ko ení ʻe ʻĀtama ʻa e fua ʻo e kelekelé ʻi he mamahi. ʻI he ʻikai ke fakalato ʻa ʻene fiekaiá ʻo taʻeʻiai ha fakaongosia ʻi ʻĪtení, ʻe pau ke ne fāinga ke maʻu ʻa e ngaahi fiemaʻu ki he moʻuí kae ʻoua ke ne foki ki he efú ʻa ia naʻe ngaohi ia mei aí.​—Senesi 3:​16-​19.

Faifai atu pē, naʻe kapusi ʻa ʻĀtama mo ʻIvi mei he ngoue ko ʻĪtení. Naʻe folofola ʻa Sihova: “Vakai, kuo hoko ʻa e tangata ke hange ko e toko taha ʻiate kitautolu, ke ne ʻilo ʻa e lelei mo e kovi: ʻe, naʻa ʻiloange te ne hanga ʻo toli foki mei he ʻAkau ʻo e Moʻui, ʻo ne kai, ʻo ne moʻui ʻo taʻengata . . .” “ʻOku ngata taʻekakato ʻa e sētesí,” ko e fakamatala ia ʻa e mataotao ko Gordon Wenham, pea ʻoku tuku mai ke tau ʻomai ʻa e toenga ʻo e fakakaukau ʻa e ʻOtuá​—mahalo pē ko eni, “tuku ke u kapusi ia mei he ngoué.” ʻI he tuʻunga lahi, ʻoku līpooti ʻe ha tokotaha tohi Tohitapu ʻa e fakakaukau kakato ʻa e ʻOtuá. Ka ʻi hení, ko e hoko atu ia ʻa Wenham, “ko hono liʻaki ʻo e fakamulitukú ʻoku fakahaaʻi ai ʻa e vave ʻo e ngāue ʻa e ʻOtuá. Ne ʻikai meimei ʻosi ʻene folofolá ki muʻa ʻi hono tuku ki tuʻa kinaua mei he ngoué.” (Senesi 3:​22, 23) ʻI he meʻa ko iá, ko e fetuʻutaki kotoa pē ʻi he vahaʻa ʻo Sihova mo e ʻuluaki ongo meʻa malí ngalingali naʻe ngata ai.

Naʻe ʻikai mate ʻa ʻĀtama mo ʻIvi ʻi he tuʻunga fakaesinó lolotonga ʻa e ʻaho houa ʻe 24 ko iá. Kae kehe, naʻá na maté ʻi ha ʻuhinga fakalaumālie. ʻI he mavahe ʻo ʻikai toe ala fakaleleiʻi mei he Matavai ʻo e moʻuí, naʻá na kamata ai ha holo māmālie ki he maté. Fakaʻuta atu ki he mamahi lahi kuo pau naʻe ʻi ai ʻi heʻena ʻuluaki fetaulaki mo e maté ʻi he taimi naʻe fakapoongi ai ʻa hona foha hono uá, ʻa ʻĒpeli, ʻe Keini, ko hona ʻuluaki fohá!​—Senesi 4:​1-​16.

Hili iá, ko e kiʻi meʻa siʻisiʻi pē ʻoku ʻiloʻi fekauʻaki mo e ʻuluaki ongo meʻa mali fakaetangatá. Ko hona foha hono tolú, ʻa Seti, naʻe fanauʻi ia ʻi he taimi naʻe taʻu 130 ai ʻa ʻĀtamá. Naʻe mate ʻa ʻĀtama ʻi he taʻu ʻe 800 ki mui ai, ʻi hono taʻu 930, hili ia ʻene fakatupu ʻa e “ngaahi foha mo ha ngaahi ʻofefine.”—Senesi 4:25; 5:​3-5.

Ko ha Lēsoni Kiate Kitautolu

Tuku kehe ʻa hono fakaeʻa ʻa e tupuʻanga ʻo e tuʻunga ololalo ʻo e sōsaieti ʻo e faʻahinga ʻo e tangatá he ʻaho ní, ko e fakamatala ki he ʻuluaki ongo meʻa malí ʻoku akoʻi mai ai ha lēsoni mahuʻinga. Ko ha tōʻonga pē ʻo e faʻifaʻiteliha ʻo ʻatā meia Sihova ko e ʻOtuá ʻoku kovi fakaʻaufuli ia. Ko e faʻahinga ko ia ʻoku nau fakapotopoto moʻoní ʻoku nau ngāueʻi ʻa e tui kia Sihova mo ʻene Folofolá, ʻo ʻikai ʻi heʻenau ʻilo feʻunga fakaekita fakamahaló. ʻOku fakapapauʻi ʻe Sihova ʻa e leleí mo e koví, pea ko e uho ʻo hono fai ʻa e meʻa ʻoku tonú ko e talangofua kiate ia. Ko e faihalá ʻoku ʻuhingá ko e maumauʻi ʻa ʻene ngaahi laó mo tukunoaʻi ʻa ʻene ngaahi tefitoʻi moʻoní.

Naʻe foaki pea ʻoku kei foaki mai ʻe he ʻOtuá ʻa e meʻa kotoa ʻoku malava ke holi ki ai ʻa e faʻahinga ʻo e tangatá​—ko e moʻui taʻengata, tauʻatāina, fiemālie, fiefia, moʻuilelei, melino lakalakaimonū, mo e ʻiloʻi ʻo e ngaahi meʻa foʻou. Kae kehe, ko ʻetau fiefia ʻi he meʻa kotoa ko ení, ʻoku fiemaʻu ki ai ʻa hono ʻiloʻi ʻa ʻetau fakafalala kakato ki heʻetau Tamai fakahēvani, ko Sihová.​—Koheleti 3:​10-​13; Aisea 55:​6-​13.

[Puha/Fakatātā ʻi he peesi 26]

ʻĀtama mo ʻIvi—Ko ha Talatupuʻa Pē?

Ko e tui ki ha muʻaki palataisi ʻa ia naʻe mole koeʻuhi ko e angahalá naʻe mafolalahia ia ʻi he lotolotonga ʻo e kau Pāpiloné, kau ʻAsīliá, kau ʻIsipité, mo e niʻihi kehe ʻi he kuonga muʻá. ʻOku anga-maheni ʻaki ʻa e ngaahi fakamatala lahi ki ha fuʻu ʻakau ʻo e moʻuí ko hono fua ʻo iá ʻe ʻomai ai ʻa e moʻui taʻengata ki he faʻahinga te nau maʻu ʻinasi mei aí. Ko ia ai, ʻoku manatuʻi ʻe he faʻahinga ʻo e tangatá naʻe hoko ha meʻa fakamamahi ʻi ʻĪteni.

ʻI he ʻahó ni, ʻoku tukuange ʻe he tokolahi ʻa e fakamatala ʻa e Tohitapú fekauʻaki mo ʻĀtama mo ʻIví ko ha talatupuʻa pē. Neongo ia, ko e tokolahi taha ʻo e kau faisaienisí ʻoku nau fakahaaʻi ko e matakali ʻo e faʻahinga ʻo e tangatá ko ha fāmili pē ʻe taha mo ha tupuʻanga pē taha. ʻOku ʻilo ʻe he kau teolosia tokolahi ʻoku taʻemalava ke fakaʻikaiʻi ko e ngaahi nunuʻa ʻo e muʻaki angahala ko ia naʻe fai ʻe ha kui pē tahá naʻe tuku mai ia ki he faʻahinga ʻo e tangatá. Ko e tui ko ia naʻe tupu ʻa e tangatá mei he meʻa lahi ange ʻi he matavai pē tahá ʻe fakamoʻuaʻi ai kinautolu ke nau pehē naʻe fai ha muʻaki angahala ʻe ha ngaahi kui tokolahi. Ko hono hokó, ʻe ueʻi ai kinautolu ke nau fakaʻikaiʻi ko Kalaisi, “ʻa e Atama ki mui,” naʻá ne huhuʻi ʻa e faʻahinga ʻo e tangatá. Ka ko Sīsū mo ʻene kau ākongá naʻe ʻikai te nau fehangahangai mo ha palopalema pehē. Naʻa nau ʻiloʻi ko e fakamatala ʻi he Senesí ʻoku moʻoni.​—1 Kolinito 15:​22, 45; Senesi 1:​27; 2:​24; Mātiu 19:​4, 5; Loma 5:​12-​19.