Ko Kitauá ko e Haʻa Tui

Ko Hono Malangaʻi ʻa e Puleʻangá ʻi he ʻAlatipalanó ʻi Pelū

ʻI HE vahaʻa ʻo e ngaahi ʻotu moʻunga ʻo e hahake mo e hihifo ʻo e ngaahi Moʻunga ʻEnitesi—ʻa ia ʻoku fetaulaki ai ʻa Polivia mo Peluú—ʻoku tokoto ai ʻa e ʻAlatipalanó. Ko hono hingoá ʻoku ʻuhingá ko e “tokalelei māʻolunga,” pe “konga fonua tokalelei.” Ko e konga lahi taha ʻo iá ʻoku ʻi Polivia.

Ko e ʻAlatipalanó ʻoku kilomita ʻe 100 hono fālahí pea laka hake ʻi he kilomita ʻe 1,000 hono lōloá, pea ko e ʻavalisi ʻo hono māʻolungá ʻoku mita nai ʻe 3,700 ki ʻolunga mei he lēvolo ʻo e tahí. ʻI he heka ʻi ha vakapuna ʻo puna ki ai mei he matāfonua ʻo e kolomuʻa ʻo Peluú, ʻa Lima, te ke kolosi atu ai ʻi he sinouʻia ʻo El Misti, ko ha moʻunga afi ʻoku aʻu ki he ngaahi ʻaó ʻi ha māʻolunga ko e mita ʻe 5,822. ʻOku kake hake mei he mamaʻó ʻa e ongo tumutumu sinou mita ʻe 6,000 ʻo Nevado Ampato mo Nevado Coropuna. ʻOku fakafokifā leva ʻa e hā mai ʻa ha fuʻu tokalelei māʻolunga—ko e ʻAlatipalano fakatonga ʻo Peluú ia.

Ko e kolomuʻa ʻo e ʻAlatipalano Peluú ko Puno, ʻoku tuʻu ʻi he ngataʻanga ʻo e tokelau hihifo ʻo e Anovai Titikaká, ʻa e anovai loloto ʻoku folaua taha ʻi he māmaní. Koeʻuhi ko e māʻolunga hake ʻaki ʻe he feituʻú ʻa e kilomita ʻe 3, ʻoku fiemaʻu ai ha kiʻi taimi ki he kau ʻaʻahí ke nau anga ki he ʻea manifí. ʻOku nofo ʻi he Anovai Titikaká ʻa e kau ʻInitia Kēsauā mo e kau ʻInitia ʻAimalá. ʻI he valaʻaki ʻa e kofu kulokula, lanu mata, pe pulū maamá, ʻoku lava ai ke sio kiate kinautolu ʻoku nau ngāue ʻi heʻenau ngaahi sākalasi, pe ngaahi faama īkí. Neongo ko e lea faka-Sipeiní ʻa e lea tefito ʻa Peluú, ko e kau Kēsauaá mo e kau ʻAimalá ʻoku nau toe lea ʻi he lea faka-ʻAlatipalanó.

Takimuʻa ʻi he Ngāue Fakamalangá

Ko e tokolahi ʻo e kakai anga-fakatōkilalo, mo ngāue mālohi ʻoku lea faka-Kēsauā mo faka-ʻAimalá kuo nau hoko ki muí ni mai ʻo ʻilo kanokano ʻa e moʻoni faka-Tohitapú. ʻOku ʻuhinga lahi ʻení koeʻuhí he ko e tāpuaki lahi ʻa Sihova ki he ngaahi feinga faivelenga ʻa e kau fanongonongo taimi-kakato ʻo e Puleʻangá ʻa ia ʻoku nau ngāue ko e kau tāimuʻa makehé.

Ko e fakatātaá, ko e ongo tāimuʻa makehe ko Sose mo Silivia naʻe vaheʻi kinaua ki he kolo ko Putina, ko e kilomita ʻe 50 nai mei he Anovai Titikaká. ʻI loto ʻi he māhina ʻe ua, naʻe fai ai ʻe Silivia ʻa e ako Tohitapu ʻe 16, pea fai ʻe Sose ʻa e ako ʻe 14. ʻI he māhina pē ʻe ono, ko e tokolahi ʻo e kau malanga ʻa e fakatahaʻangá naʻe tupu ia mei he toko 23 ki he toko 41. Lolotonga iá, naʻe hiki hake ʻa e maʻu fakatahá mei he toko 48 ki ha tumutumu ko e toko 132.

“ʻI hono kamata ʻa e ngaahi fakataha ʻa e fakatahaʻangá ʻi he ngaahi feituʻu mavahe ko ʻení,” ko e lau ia ʻa Sose, “naʻa mau ʻiloʻi ai ʻoku ʻaonga ke kamata ʻaki ʻa e Fakataha Malanga Maʻá e Kakaí pea mo e Ako Tohi ʻa e Fakatahaʻangá. ʻOku ʻai ʻe he meʻá ni ke faingofua ai heni ki he faʻahinga mahuʻingaʻia foʻoú ke nau kamata ʻa hono maʻu ʻa e ngaahi fakatahá.”

Ko e ongo tuofefine ʻe toko ua—ko e tokotaha ko ha tāimuʻa—naʻá na ʻuluaki ʻomai ʻa e ongoongo leleí ki he feituʻu mavahe ko Muñani, ko e kilomita ʻe 20 nai mei Putina. ʻI aí naʻá na kamata ai ha ako Tohitapu mo ha tangata kui ko hono hingoá ko Lūsio. a Naʻá ne fakaafeʻi ʻa hono tokoua ko Mikaele, ko ha tokotaha misinale mo e pule kolo Katolika ia mei ha feituʻu ofi mai. ʻI he taimi naʻe ʻeke ai ʻe ha kaumeʻa kia Mikaele ʻa e ʻuhinga ʻokú ne ʻalu ai ki Muñani ʻi he uike kotoa peé, naʻá ne pehē koeʻuhí ke ne ako fekauʻaki mo Sihova pea mo ʻene Folofolá. Naʻe malanga hake leva ʻa e fehuʻi: “Ko e hā ʻoku ʻikai te tau ako ai pē ʻa e Tohitapú ʻi hení?” Koeʻuhi ko e mahuʻingaʻia naʻe fakahāhā ʻe he kakai ʻi he kolo ʻo Mikaele, naʻe vave leva hono fokotuʻutuʻu ʻe he Kau Fakamoʻoní ke fai ha ngaahi fakataha ʻi ai.

Naʻe kamata ʻa Mikaele ke ne vahevahe ʻa e meʻa naʻá ne akó ki he niʻihi kehé. Kae fēfē nai ʻa hono tuʻunga ʻa ia ko ha tokotaha misinale Katolika mo e kōvana leʻoleʻó? ʻI ha fakataha ʻi he holo fakafeituʻú, naʻá ne fanongonongo ai ʻa ʻene fakafisi mei he tuʻunga ko ha misinale Katoliká. ʻE toe fakanofo ha tokotaha kehe? Naʻe pehē ʻe ha taha ʻi he kau fanongó: “Ko e hā te mau toe fiemaʻu ai ha taha misinale ʻoku mau ako ʻa e moʻoní?” Ko ia ai, ko ha fakamatala ʻeni ki he ngaahi meʻa kuo akoʻi  ʻe he Kau Fakamoʻoni ʻa Sihová. Naʻe tānaki mai ʻe ha tokotaha: “ʻOku ʻikai te mau loto-tatau ki hoʻo fakafisi pē ʻaʻaú. Ko e hā ʻoku ʻikai te mau fakafisi kotoa aí?” Naʻe kaila fakataha leva ʻa e kau fanongó kotoa: “ʻOku mau fakafisi kotoa!”

Ko e ngaahi ʻaitolí mo e ngaahi kolosí naʻe fai ʻa e fetalanoaʻaki ki ai ʻi ha fakataha fakakolo nounou ʻi he hili iá. Naʻe kole ai ha tangata ʻe taha ki he kotoa naʻe ʻi aí ke nau lau ʻa e Teutalonome 7:​25, ʻa ia ʻoku pehē: “Ko e ngaahi tamapua ʻo honau ngaahi ʻotua te ke tutu ʻi he afi: ʻe ʻikai te ke manumanu ki he koula mo e siliva ʻoku teuʻaki, pe toʻo ia maʻau, naʻa tauheleʻi ai koe: he ko e meʻa fakalielia ia kia Sihova ko ho ʻOtua.”

Naʻe kole ange ai ʻe he tangatá ki he faʻahinga ʻoku nau loto ke tutu ʻa e kotoa ʻo e ngaahi ʻaitolí ke hiki hake honau ngaahi nimá. Naʻe vave ʻa e hiki kotoa hake ʻo e ngaahi nimá. (Ngāue 19:​19, 20) ʻI he taimí ni ko e fāmili ʻe 23 mei he ngaahi fāmili ʻe 25 ʻi he koló ʻoku nau ako ʻa e Folofola ʻa e ʻOtuá. Ko e toko ua ʻokú na ngāue ko e ongo malanga teʻeki papitaiso, pea ko e ngaahi hoa mali ʻe nima ʻoku nau fokotuʻutuʻu ke lēsisita ʻenau nofo malí koeʻuhí ke nau maʻu ha tuʻunga maʻa ʻi he ʻao ʻo Sihová.—Taitusi 3:1; Hepelu 13:4.

Faiako ʻAki ʻa e Ngaahi Kāsete ʻOsi Hikí

Koeʻuhi ko e tokolahi ʻoku ʻikai te nau lava ke lautohi mo tohi ʻi he lea faka-ʻAlatipalanó, ko e ngaahi vitiō mo e kāsete ʻosi hiki ʻa e Taua Leʻó ʻi he ngaahi lea fakalotofonuá ʻoku tokoni lahi—naʻa mo hono fai ʻo e ngaahi ako Tohitapu ʻi ʻapí. ʻI he tokoni ʻa ha kāsete, ko ha tāimuʻa makehe ko hono hingoá ko Tola naʻá ne fai ʻa e ngaahi ako ʻi he polosiua Ko e Hā ʻOku Fiemaʻu ʻe he ʻOtuá Meiate Kitautolú? ʻI hono tā tahataha ʻa e palakalafí, naʻá ne ʻeke ange ki he tokotaha ako Tohitapú ʻa e ngaahi fehuʻi ʻi he fakamatala kuó ne toki fanongo ki aí.

Ko ha fale fakamafola-lea fakalotofonua ʻoku nau fakamafola maʻu pē ʻa e ngaahi konga ʻo e polosiua Fiemaʻu ʻi he lea faka-Kēsauaá. ʻOkú ne fai ʻa e meʻa tatau ki he ngaahi konga ʻo e makasini Awake! ʻi he lea faka-Sipeiní. Ko ia ai, ʻoku tokolahi ʻa e kakai ʻoku nau ʻilo ki he pōpoaki ʻo e Puleʻangá pea ʻoku nau fiemaʻu ke ako lahi ange ʻi he taimi ʻoku ʻaʻahi atu ai ʻa e Kau Fakamoʻoni ʻa Sihová ki honau ngaahi ʻapí.

ʻOku taʻefakatokangaʻi ʻe he māmaní fakalūkufua ʻa e ʻAlatipalanó ka ʻoku ʻikai puli ia mei he ʻafio mai ʻa e ʻOtuá. Fakamālō ki he ʻofa ʻa Sihova ki he faʻahinga ʻo e tangatá, ko e kakai tokolahi ʻoku nau nofo he māʻolunga ʻi he ʻAlatipalano ʻEnitesi ʻoku nau hoko ko e konga ʻo e fuʻu kakai ʻoku nau fakalāngilangiʻi ʻa e fale molumalu ʻo e lotu moʻoní.—Hakeai 2:7.

[Fakamatala ʻi lalo]