ʻOku Tokonaki ʻe Sihova ha Mālōlōʻanga Maʻa Hono Kakaí
Līpooti ʻa e Kau Fanongonongo ʻo e Puleʻangá
ʻOku Tokonaki ʻe Sihova ha Mālōlōʻanga Maʻa Hono Kakaí
KO HA mālōlōʻanga malumalu ʻi ha kiʻi hala ʻi he moʻungá ko ha meʻa fakafiefia taha ia ki ha tokotaha fononga ongosia. ʻI Nepolo, ko e ngaahi mālōlōʻanga peheé ʻoku ui ia ko e chautara. Ko ha chautara anga-maheni ʻe tuʻu nai ia ʻo ofi ki ha fuʻu ʻovava lahi mo maʻuiʻui, ko ha feituʻu malumalu ke tangutu mo mālōlō ai. Ko hono tokonaki ha chautara ko ha ngāue anga-ʻofa ia, pea ko e tokolahi taha ʻo e kau tokoni ʻofá ʻoku ʻikai pē ke ʻiloʻi pe ko hai kinautolu.
Ko e ngaahi meʻa naʻe hoko mei Nepoló ʻokú ne fakahaaʻi ai ʻa e founga ʻoku hoko ai ʻa Sihova ko e ʻOtuá ko ha Matavai ʻo e fiefia mo e fakaivifoʻou fakalaumālie ki he tokolahi ʻo e “kau fononga” ongosia ʻi he fokotuʻutuʻu ko ʻeni ʻo e ngaahi meʻá.—Sāme 23:2.
• Ko Lil Kumari ʻokú ne nofo ʻi he fonua fakaʻofoʻofa ko Pokhara, ʻo sio lelei atu ai ki he ngaahi Moʻunga ʻo Himalaya ʻoku sinou honau tumutumú. Ka ʻi he hohaʻa fekauʻaki mo e tuʻunga fakapaʻanga ʻa e fāmilí, naʻe ongoʻi ai ʻe Lil Kumari ʻoku ʻikai loko ʻi ai ha ʻamanaki ia. ʻI he taimi naʻe ʻaʻahi atu ai kiate ia ha taha ʻo e Kau Fakamoʻoni ʻa Sihová, naʻe ueʻi ia ʻe he ʻamanaki fakafiefia ʻa e Tohitapú pea naʻá ne kole leva ki ha ako Tohitapu ʻi ʻapi.
Neongo naʻe fiefia ʻa Lil Kumari ʻi heʻene akó, naʻe ʻikai faingofua ke hokohoko atu koeʻuhí ko e fakafepaki mālohi fakafāmilí. Ka naʻe ʻikai te ne foʻi. Naʻá ne maʻu maʻu pē ʻa e ngaahi fakataha faka-Kalisitiané pea ngāueʻaki ʻa e meʻa naʻá ne akó, tautefito ki he meʻa fekauʻaki mo e anganofo fakaeuaifí. Ko hono olá, naʻe ʻiloʻi ʻe hono husepānití pea mo ʻene faʻeé ko e ako Tohitapu ʻa Lil Kumari naʻe ʻaonga ki he fāmilí fakakātoa.
Ko hono husepānití pea mo ha kāinga tokolahi kuo nau ako he taimí ni ʻa e Folofola ʻa e ʻOtuá. ʻI ha ʻasemipilī ki muí ni mai naʻe fai ʻi Pokhara, naʻe fiefia ai ʻa Lil Kumari ʻi he polokalamá fakataha mo e toko 15 ʻo hono ngaahi kāingá. ʻOkú ne pehē: “Kuo hoko ʻa hoku ʻapí ko ha mālōlōʻanga koeʻuhí he ʻoku fāʻūtaha homau fāmilí he taimí ni ʻi he lotu moʻoní, pea ʻoku ou maʻu ʻa e nonga moʻoni ʻo e ʻatamaí.”
• Neongo ko e fakafaikehekehe fakaekalasi fakafāmilí ʻoku taʻefakalao ʻi Nepolo, ʻoku kei ngāueʻaki pē ia ko ha tākiekina mālohi ʻi he founga moʻui ʻa e kakaí. Ko ia, ʻoku mahuʻingaʻia ʻa e tokolahi ʻi he meʻa kuo leaʻaki ʻe he Tohitapú fekauʻaki mo e tuʻunga-tataú pea mo e taʻefilifilimānakó. ʻI he ako “ʻoku ʻikai ke filifilimanako ʻa e ʻOtua” naʻe liliuʻi lahi ai ʻa e moʻui ʻa Surya Maya pea mo hono fāmilí.—Ngāue 10:34.
Naʻe loto-mamahi ʻa Surya Maya ʻi he fakamaau taʻetotonu ʻi he fakafaikehekehe fakaekalasi fakafāmilí pea mo e kavenga ʻo e ngaahi tōʻonga mo e ngaahi anga fakafonua kuo fokotuʻú. ʻI he hoko ko ha fefine faʻa lotú, naʻe kole ai ʻa Surya Maya ʻi ha ngaahi taʻu ki hono ngaahi ʻotua ʻaitolí ki ha tokoni. Ka naʻe ʻikai ke tali ʻa ʻene ngaahi lotú. ʻI he ʻaho ʻe taha ʻi heʻene tangi ki ha tokoní, naʻe fakaofiofi atu ai ʻa hono kiʻi mokopuna fefine taʻu ono ko Babita kiate ia ʻo ne ʻeke ange: “Ko e hā ʻokú ke tangi ai ki ha tokoni ʻi he ʻao ʻo e ngaahi ʻaitoli ʻoku ʻikai lava ke nau fai ha meʻá?”
Tā ko ē naʻe ako Tohitapu ʻa e faʻē ʻa Babita mo e taha ʻo e Kau Fakamoʻoni ʻa Sihová. Naʻe fakaafeʻi loto-māfana ʻe Babita ʻene kui-fefiné ki ha fakataha faka-Kalisitiane. ʻI he ʻalu ki ai ʻa Surya Maya, naʻá ne ʻohovale ʻi he sio ki he kakai ʻo e ngaahi kalasi fakafāmili kehekehe ʻoku nau feohi fiefia ʻo ʻikai ha tomuʻa fehiʻa. Naʻá ne kole leva ki ha ako Tohitapu ʻi ʻapi. Neongo naʻe iku ʻeni ki hano fakasītuʻaʻi ia ʻe hono ngaahi kaungāʻapí, naʻe ʻikai te ne loto-siʻi ai; pea naʻe ʻikai ke taʻofi ia ʻe he fakangatangata ʻo ʻene malava ke lautohi mo tohí mei hano fai ha fakalakalaka fakalaumālie.
Kuo maliu atu eni ha taʻu ʻe valu, pea ko e mēmipa ʻe toko ono ʻo hono fāmilí, ʻo kau ai ʻa hono husepānití mo e fānau ʻe toko tolu, kuo nau hoko ko e Kau Fakamoʻoni ʻa Sihova. Ko Surya Maya ko ha faifekau taimi-kakato ia he taimí ni, ko ha tāimuʻa tuʻumaʻu, ʻokú ne tokoniʻi fiefia ʻa e niʻihi kehé ke toʻo atu ʻenau ngaahi kavenga mamafá ʻi ha mālōlōʻanga moʻoni ʻa ia ko Sihova pē tokotaha ʻoku lava ke ne tokonaki maí.