Founga ʻe Lava Ke Ke ʻAi Ai ha Kaumeʻa
Founga ʻe Lava Ke Ke ʻAi Ai ha Kaumeʻa
“KO HA KAUMEʻA ʻE TAHA ʻI HE MOʻUÍ ʻOKU LAHI; KO E UÁ ʻOKU FUʻU TOKOLAHI; KO E TOLÚ ʻOKU FAINGATAʻA KE ALA MAʻU.”—Henry Brooks Adams.
KO HA fakamatala pehē ʻoku fokotuʻu mai ai ʻoku tātātaha ke ʻi ai ha ngaahi kaumeʻa moʻoni. ʻOku faʻa fanongoa ʻa e ngaahi fakamatala hangē ko ení “ʻOku ʻikai ha taha ke u hanga ki ai,” “ʻOku ʻikai ke u falala au ki ha taha,” pe “Ko ʻeku kulií ʻa hoku kaumeʻa lelei tahá” mei he kakai mātuʻaki taʻelata ʻoku nau kumi ki ha kaumeʻá.
Ke ʻai pea tauhi maʻu ʻa e ngaahi kaumeʻa tuʻuloá ko ha pole ia. Ko ha savea ʻi he māketí naʻe fakahaaʻi ai ʻo pehē “ʻi he ʻIunaite Seteté ko e peseti ʻe 25 ʻo e tokolahi ʻo e kakai lalahí ʻoku nau fuesia ʻa e ‘taʻelatá ko e mahaki tauhi’ pea . . . ʻi Falanisē kuo hokosia ʻe he vaeua ʻo e kakaí ʻa e nofo mavahevahe lahi.” Ko e tupulekina ʻo e ngaahi kalapu faialeá mo e ngaahi loki talanoa fakakomipiutá pea mo e lahi fau ʻo e ngaahi tuʻuaki ʻi he nusipepá ʻa e faʻahinga ʻoku kumi ki ha ngaahi kaumeʻá ʻoku fakahaaʻi ai ʻoku holi ʻa e kakaí ki he fetuʻutaki fakaetangatá.
ʻOku uesia ʻe he taʻelatá ʻo ʻikai ngata pē ʻi he tuʻunga fakaʻatamai ʻo ha taha kae toe pehē foki ki heʻene moʻui-lelei fakaesinó, ko e lau ia ʻa Toketā David Weeks, ko ha faisaienisi ki he ʻatamaí. “ʻOku ou maʻu ha fakahoatatau māʻolunga ʻaupito ʻo e kau mahaki ʻoku nau manavahē ʻi he loto-hohaʻá mo e loto-mafasiá ʻa ia ʻoku lava ke fakamatalaʻi ia ko e taʻelata. ʻOku ʻi ai ʻa e ngaahi felāveʻi ʻi he vahaʻa ʻo e tuʻunga mafatukituki ʻo e loto-mafasiá pea mo e tuʻunga mafatukituki ʻo e taʻelatá.”
Ko e veté mo e movete ʻo e moʻui fakafāmilí ʻokú ne fakapapauʻi ʻa e tufakanga ʻo e kakai tokolahi ange ke nau nofo ʻi ha moʻui tokotaha. Naʻe fakaʻosiʻaki ʻe ha savea ʻi Pilitānia ʻo pehē ʻi he aʻu ki he kamataʻanga ʻo e senituli hono 21, ko e tokolahi ʻo e peseti ʻe 30 ʻo e kakai ʻo e puleʻanga ko iá te nau ʻi ha ngaahi fāmili tokotaha pē.
Naʻe tomuʻa tala ʻe he ngaahi Konga Tohitapu fakamānavaʻí ʻe mafolalahia ha laumālie ʻo e siokitá ʻi he “kuonga fakamui.” (2 Timote 3:1-5) ʻOku hā ʻoku mahuʻingaʻia ʻa e tokolahi ʻi he ngaahi koloa fakamatelié, hangē ko ha fale pe ko ha kā, pe ʻi heʻenau ngaahi ngāué ʻo lahi ange ia ʻi hono fakatupulekina ʻa e ngaahi vahaʻangatae mo e faʻahinga kehe ʻo e tangatá. ʻOku pehē ʻe he faʻu-tohi ko Anthony Storr: “ʻI he ʻikai ke fakahangataha ki he hoa malí mo e fānaú, ʻoku fakatefito ʻenau moʻuí ʻi honau ʻōfisi ngāué.”
ʻOKU MAHUʻINGA TAʻEHANOTATAU ʻA E NGAAHI KAUMEʻA MOʻONÍ
Ko e anga ʻo hoʻo moʻuí ʻoku fakatuʻunga lahi ia ʻi he anga ʻo ho ngaahi kaumeʻá. ʻOku faʻa hoko ko e faʻahinga ko ia ʻoku nau moʻui pē kia kitá ʻoku ʻikai te nau fiefia koeʻuhi ʻoku ʻikai hanau kaumeʻa ke vahevahe mo ia ʻenau ngaahi meʻá pe ko ʻenau ngaahi fakakaukaú. ʻOku moʻoni ʻa e ngaahi lea ʻa Sīsū Kalaisí: “ʻOku te [fiefia] lahi ʻi he fai ha foaki atu, ʻi heʻete maʻu ha foaki mai.” (Ngāue 20:35) ʻI hono fakaongo atu ʻa e moʻoni ko ení, ko e faʻu-maau Pilitānia ko George Byron naʻá ne tohi: “Ko e faʻahinga kotoa ʻa ia ko e fiefiá te nau maʻú, kuo pau ke nau vahevahe atu ia.”
Ko e kaumeʻá ko ha hā ia? ʻOku fakaʻuhingaʻi ʻe ha tikisinale ʻa e kaumeʻá ko ha “taha ʻoku pipiki ki ha toe tokotaha ʻi he ʻofá pe ko e mahuʻingaʻiá.” ʻOku lava ke tokoni ha kaumeʻa moʻoni ʻi hono tataki hoʻo ngaahi fakakaukaú ki he ngaahi meʻa ʻoku leleí. ʻOku lava ke ne fakalototoʻaʻi mo langa hake koe ʻi he ngaahi taimi ʻoku fiemaʻu aí. ʻOku lava ke ne kaungāʻinasi mo koe ʻi hoʻo mamahí. Naʻe pehē ʻe Tuʻi Solomone: “Ko e kaumeʻa ʻoku ne ʻofa ʻi he taimi kotoa pe; pea ko hoto [tokoua] naʻe fanauʻi maʻa ha faingataʻa.” (Palovepi 17:17) Lolotonga ʻoku faʻa mole ʻa e mahuʻinga ʻo e ngaahi meʻa fakamatelié ʻi he faai mai ʻa e taimí, ko e kaumeʻa moʻoní ʻoku tupu ia pea longomoʻui ʻi he ʻalu ʻa e taimí.
ʻOku enginaki ʻa e ngaahi Konga Tohitapú ki he kau Kalisitiané ke nau “fano” atu ʻi heʻenau ʻofá. (2 Kolinito 6:13) ʻOku ʻi ai ʻa e poto ʻi he kakapa atu ki he niʻihi kehé. ʻI he Koheleti 11:1, 2, ʻoku tau lau ai: “Tuku atu hoʻo meʻa tokoni ʻi he funga ʻo e loloto: he hili ʻa e ʻaho lahi te ke ʻilo pe ki ai. Vahe fitu ʻa e tofiʻa, ʻisa, ke valu foki; he ʻoku ʻikai te ke ʻilo pe ko e ha ʻa e kovi ʻe hoko ki mamani.” ʻOku anga-fēfē ʻa e ngāueʻaki ʻo e tefitoʻi moʻoni ko ení ki he kaumeʻá? Kapau kuó ke fakatupulekina ha ngaahi kaumeʻa mo ha kakai tokolahi, ʻe hoko mai ha niʻihi ʻo kinautolu ʻo tokoniʻi koe ʻi he taimi ʻe malanga hake ai ʻa e ngaahi faingataʻá.
Ko e ngaahi kaumeʻa moʻoní ko ha maluʻi ia kiate koe ʻi ha toe founga ʻe taha. “Ko e ngaahi kafo mei hoto kaumeʻa ko e ʻofa moʻoni ia,” ko e lau ia ʻa e Palovepi 27:6. Neongo ʻe ʻoatu nai ʻe ha kakai tokolahi kiate koe ha ngaahi lea fakahīkihiki, ko e ngaahi kaumeʻa moʻoní pē te nau mahuʻingaʻia feʻunga ʻiate koe ke nau fakahaaʻi atu ha hala mafatukituki pea ʻoatu ha akonaki ʻaonga ʻi ha founga ʻofá.—Palovepi 28:23.
Ko e ngaahi kaumeʻa lelei, mo fekoekoeʻí ʻoku ʻi he lotolotonga ia ʻo e ngaahi meʻaʻofa hāhāmolofia ʻa ia ʻe lava ke ne fakatupu ha tākiekina pau ʻiate koe. ʻI he Ngāue vahe 10, ʻoku tau lau ai ki ha meʻa naʻe hoko ʻi he moʻui ʻa e ʻōfisa fakakautau Loma ko Koliniusí, ʻa ia naʻe fakahaaʻi ange ʻe ha ʻāngelo kuo fanongoa ʻa ʻene ngaahi lotú. ʻI heʻene ʻamanekina ʻa e ʻaʻahi mai ʻa e ʻapositolo ko Pitá, naʻe hanga ʻe Koliniusi ʻo “fakataha hono kainga, pea mo hono ngaahi kaumeʻa.” Ko e ngaahi kaumeʻa ofi ko ia ʻo Koliniusí naʻa nau ʻi he haʻohaʻonga ʻo e ʻuluaki kau Senitaile taʻekamu ke nau maʻu ʻa e ongoongo leleí pea hoko ʻo pani ʻaki ʻa e laumālie māʻoniʻoní, fakataha mo e ʻamanaki ke pule fakataha mo Kalaisi ʻi he Puleʻanga ʻo e ʻOtuá. Ko ha tāpuaki ē ki he ngaahi kaumeʻa fekoekoeʻi ʻo Koliniusí!—Ngāue 10:24, 44.
Ko ia, ʻe anga-fēfē leva haʻo ʻai ha ngaahi kaumeʻa? Ko e Tohitapú, ʻa ia ʻoku lahi ʻene meʻa ke leaʻaki fekauʻaki mo e kaumeʻá, ʻokú ne tali mai ʻaki ha fakahinohino ʻaonga. (Sio ki he puha ʻi laló.)
FEITUʻU ʻE LAVA KE KE ʻAI AI HA NGAAHI KAUMEʻA MOʻONÍ
Ko e feituʻu lelei taha ke ke ʻai ai ha ngaahi kaumeʻa moʻoní ʻoku felāveʻi ia mo e fakatahaʻanga Kalisitiané. ʻUluakí, ʻoku lava ke ke ngāueʻaki tonu ai ʻa e faingamālié ke ke kaumeʻa ai mo Sihova, ko ho Tokotaha-Fakatupú mo e Tamai fakahēvaní, pea mo Sīsū Kalaisi, ko ho Fakamoʻuí. “Talaʻehai ʻoku ai ha ʻofa ʻa ha taha ʻe lahi ʻi he ʻofa ko é, ke ne liʻaki ʻene moʻui koeʻuhi ko hono ngaahi kaumeʻa,” ko e lea ia ʻa Sīsuú, ʻa ia ʻokú ne fakaafeʻi koe ke ke hoko ko hono kaumeʻa. (Sione 15:13, 15) ʻI he kaumeʻa mo Sihova pea mo Sīsū Kalaisí, ʻoku lava ke ke fakapapauʻi ai te na ‘maʻu koe ki he gaahi nofoaga taegatá.’ ʻIo, ko e kaumeʻa mo Sihova pea mo Sīsuú ʻoku ʻuhinga iá ko e moʻui taʻengata.—Luke 16:9, PM; Sione 17:3.
ʻOku lava fēfē ke ke maʻu ʻena kaumeʻa māfaná? Ko e ngaahi fiemaʻu ki he hoko ko ha fakaafe ʻi he tēniti ʻo Sihová ʻi he hoko ko e taha ʻo hono ngaahi kaumeʻá ʻoku fokotuʻu mai ia ʻi he Sāme 15. Sio ki ai ʻi he Tohitapú, pea lau ʻa e veesi ʻe nima ʻo e sāme ko iá. Tānaki atu ki ai, naʻe pehē ʻe Sīsū Kalaisi: “Ko hoku ngaahi kaumeʻa ʻakimoutolu ʻo kapau ʻoku mou fai ʻa e ngaahi meʻa ʻoku ou tuʻutuʻuni atu.”—Sione 15:14.
ʻIo, ʻi hono ako tokanga mo ngāueʻaki ʻa e tataki mei he Folofola ʻa e ʻOtuá, ko e Tohitapú, ʻokú ke fakahaaʻi ai ʻokú ke loto ke ke hoko ko ha kaumeʻa ʻo Sihova mo Sīsū. Ke lavaʻi eni, kuo pau ke ke toe kau maʻu pē ki he ngaahi fakataha faka-Kalisitiané, ʻa ia ʻoku ʻomai ai ʻa e ʻiloʻi ʻo Sihova ko e ʻOtuá. Ngāueʻaki tōnunga koe ke ke fanongo kia Sihova, pea te ke ʻunuʻunu ʻo ofi ange ai kiate ia mo hono ʻAló.
ʻI he ngaahi fakatahá, te ke toe hoko ʻo maheni ai mo e faʻahinga tāutaha ʻoku nau ʻofa kia Sihova mo fakahāhā ʻa e ngaahi fua ʻo e laumālié—ko e ʻofa, fiefia, melino, kātaki-fuoloa, anga-ʻofa, anga-lelei, tui, anga-malū, mo e mapuleʻi-kita—ʻi heʻenau moʻuí. (Kaletia 5:22, 23, NW) Kapau ʻokú ke fakamātoato fekauʻaki mo hono ʻai ha ngaahi kaumeʻá pea toʻo atu ʻa e taʻelatá, maʻu ʻa e ngaahi fakataha faka-Kalisitiané ʻi he uike kotoa pē. Ko e fai peheé ʻoku ʻomi ai koe ki he feituʻu totonú ʻi he taimi totonu ke fakatupulekina ai ʻa e kaumeʻa tuʻuloa mo e kakai faitāpuekina ʻa e ʻOtuá.
NGAAHI KAUMEʻA TAʻENGATA
Ko e kaumeʻa moʻoní ko ha meʻaʻofa fakaofo ia meia Sihova ko e ʻOtuá. ʻOku tupu ia mei hono ʻulungāngá pea mo hono faʻungá tonu. Koeʻuhi ko hono laumālie ʻofa mo loto-fiefoakí, kuó ne fakafonu ʻa e māmaní ʻaki ʻa e ngaahi meʻamoʻui ʻatamai poto ʻa ia ʻoku lava ke ke fakatupu ai ha kaumeʻa. Feohi mo e kaungā Kalisitiané. Fakalototoʻaʻi kinautolu. Ngāue mo kinautolu ʻi he ngāue fakafaifekaú. Lotu tuʻumaʻu fakataha mo kinautolu pea maʻa kinautolu. Te ke faʻifaʻitaki leva ai kia Sihova mo hono ʻAló, ʻa Sīsū Kalaisi.
Ko e kaumeʻá ko ha meʻaʻofa ia ʻoku malava ʻe he tokotaha kotoa pē ke foaki pea ke maʻu. ʻI he kahaʻu ofi maí, te ke maʻu ai ʻa e faingamālie ke ʻai ke fano atu ʻa e siakale ʻo ho ngaahi kaumeʻá. ʻE lava ke ke kaumeʻa mo e laui miliona ʻoku nau lolotonga moʻuí, pea pehē ki he faʻahinga mei he ngaahi toʻutangata kuohilí ʻa ia ʻoku nau mohe ʻi he maté, ʻo tatali ki he toetuʻú ʻi he taimi “ʻe ʻikai toe ai ha mate.” (Fakahā 21:4; Sione 5:28, 29) Fai ha feinga he taimí ni ke anga-fakakaumeʻa, pea kaumeʻa mo e faʻahinga ʻoku nau ʻofa kia Sihová. Tuli ki he kaumeʻa mo Sihova ko e ʻOtuá pea mo Sīsū Kalaisí ʻaki ʻa e fanongo ki he Folofola fakamānavaʻi ʻa e ʻOtuá. ʻI he kotoa leva ʻo ʻitānití, ʻe ʻikai ʻaupito te ke toe taʻelata.
[Puha/Fakatātā ʻi he peesi 22, 23]
SITEPU ʻE ONO KI HA KAUMEʻA TUʻULOA
1. HOKO KO HA KAUMEʻA. Naʻe ui ʻa ʻĒpalahame ko e “kaumeʻa ʻo Sihova” koeʻuhi ko ʻene tui taʻeueʻiá. (Semisi 2:23, NW) Ka naʻe toe ʻi ai ha ʻuhinga lahi ange ai. ʻOku pehē ʻe he Tohitapú naʻe fakahāhā ʻe ʻĒpalahame ʻa ʻene ʻofa ki he ʻOtuá. (2 Kalonikali 20:7) Naʻá ne tamuʻomuʻa ʻo tuku ke ʻiloʻi ʻe Sihova ʻa ʻene ngaahi ongoʻí. (Senesi 18:20-33) ʻIo, ʻoku fiemaʻu ʻa e tamuʻomuʻa ke ʻoatu ʻa e fakamoʻoni ʻo hoʻo kaumeʻá. Naʻe pehē ʻe Sīsū: “Foaki, bea e foaki ia kiate kimoutolu.” (Luke 6:38, PM) Ko ha foʻi lea ʻo e fakalototoʻá pe ko ha tokoni ʻe hoko nai ia ko ha tupuʻanga ʻa ia ʻe tupulekina mei ai ha kaumeʻa lahi. Naʻe pehē ʻi ha taimi ʻe taha ʻe he faʻu-ʻēsei ʻAmelika ko Ralph Waldo Emerson: “Ko e founga pē taha ke maʻu ai ha kaumeʻá ko ʻete hoko ko ha kaumeʻa.”
2. ʻAI HA TAIMI KE FAKATUPULEKINA AI HA KAUMEʻA. ʻOku holi ʻa e kakai tokolahi ki he ngaahi ʻaonga ʻo e kaumeʻá. Ka, ʻoku nau fuʻu femoʻuekina ke ngāueʻaki ʻa e taimi ʻoku fiemaʻú. ʻOku fakalototoʻaʻi kitautolu ʻe he Loma 12:15, 16 (PM) ke kau ʻi he fiefia mo e lavameʻa, ko e ngaahi mamahi mo e ngaahi ʻamanaki tōnoa ʻa e niʻihi kehé. ʻOkú ne pehē: “Fiefia mo kinautolu oku fiefia, bea tagi mo kinautolu oku tagi. Ke felototahaaki akimoutolu.” Ko Sīsū Kalaisi, neongo ko ha tangata femoʻuekina ia, naʻá ne vaheʻi maʻu pē ha taimi maʻa hono ngaahi kaumeʻá. (Maake 6:31-34) Manatuʻi, ko e kaumeʻá, ʻi heʻene hangē ha fuʻu ʻakau matalá, ʻoku fiemaʻu ke fuʻifuʻi pea tokangaʻi ia kae matala—pea ʻoku fiemaʻu ki ai ʻa e taimi.
3. TOKANGA ʻI HE TAIMI ʻOKU TALANOA AI ʻA E NIʻIHI KEHÉ. Ko e kau fanongo lelei, mo tokangá ʻoku nau faʻa ʻiloʻi ʻoku faingofua ange ai ke maʻu ha ngaahi kaumeʻa. “Ke vave ʻa e tangata fuape he fanongo, kae fakatotoka ki he lea,” ko e lau ia ʻa e ākonga ko Sēmisí. (Semisi 1:19) ʻI he taimi ʻokú ke fetalanoaʻaki ai mo e niʻihi kehé, fakahaaʻi ʻa e mahuʻingaʻia fakafoʻituitui ʻi heʻenau ngaahi ongoʻí. Fakalototoʻaʻi kinautolu ke nau talanoa ʻo fekauʻaki mo kinautolu. Takimuʻa ʻi hono fakahāhā ʻa e fakaʻapaʻapa kiate kinautolú. (Loma 12:10) Te nau loto leva ai ke feohi mo koe. ʻI hono kehé, kapau ʻokú ke puleʻi ʻe koe ʻa e talanoa kotoa pē, pe toutou fakahanga kiate koe ʻa e tokangá, ʻe faingataʻa ke ke maʻu ha tokotaha ʻa ia ʻoku mateuteu ke fanongo pe tokanga atu ʻo fekauʻaki mo hoʻo ngaahi ongoʻí pea mo hoʻo ngaahi fiemaʻú.
4. HOKO ʻO FAKAMOLEMOLE. Naʻe tala ange ʻi he taimi ʻe taha ʻe Sīsū kia Pita ke ne mateuteu ke fakamolemole ke “aʻu ki he tuʻo fitufitú.” (Mātiu 18:21, 22, NW) Ko ha kaumeʻa moʻoni ʻoku vave ia ke tukunoaʻi ʻa e fanga kiʻi fehālaaki īkí. Ke fakatātaaʻi: ʻOku ʻikai saiʻia ʻa e niʻihi ʻi he kai lasipelí koeʻuhi ko honau fanga kiʻi tenga valevalé. Kae kehe, ko e faʻahinga ko ē ʻoku nau saiʻia ʻi he fuaʻiʻakau ko ení, ʻoku ʻikai te nau fakatokangaʻi ʻa e fanga kiʻi tengá. ʻOku ʻofaʻi ʻa e ngaahi kaumeʻa moʻoní ʻi honau ngaahi ʻulungaanga leleí; ʻoku tukunoaʻi ʻa ʻenau fanga kiʻi fehālaaki īkí. ʻOku enginaki mai ʻa Paula kiate kitautolu: “Ke mou fekatakiʻaki pe mo fefakamolemoleʻaki.” (Kolose 3:13) Ko e faʻahinga ko ia ʻoku nau ako ke hoko ʻo fakamolemolé ʻoku nau tauhi honau ngaahi kaumeʻá.
5. TOKAʻI ʻA E TAIMI FAKAEKINAUTOLU ʻA E NIʻIHI KEHÉ. ʻOku fiemaʻu ʻe he tokotaha kotoa ha taimi fakaekinautolu, ʻo kau ai ho ngaahi kaumeʻá. ʻOku fakamatala fakapotopoto ʻa e Palovepi 25:17: “Fakasiʻisiʻi ki he tuʻu ho vaʻe ki he fale ʻo ho kaumeʻa; naʻa faifai pea ne pahia ʻiate koe, ʻo fehiʻa.” Ko ia ai, fakaʻatuʻi fekauʻaki mo e lahi pea mo e lōloa ʻo e ngaahi ʻaʻahi ki he ngaahi kaumeʻá. Fakaʻehiʻehi mei he holi ke ʻi ha tuʻunga pulé, ʻa ia ʻe lava ke iku ia ki he meheká. Ngāueʻaki ʻa e fakapotopotó ʻi he taimi ʻo hono fakahaaʻi ʻa hoʻo ngaahi saiʻia fakafoʻituituí mo hoʻo ngaahi fakakaukau ki he ngaahi meʻá. ʻOku tokoni eni ki ha kaumeʻa fakaivifoʻou mo fakafiefia.
6. HOKO ʻO LOTO-FIEFOAKI. ʻOku fakatupulekina ʻa e ngaahi kaumeʻá fakafou ʻi he loto-fiefoakí. Ko e akonaki ʻa e ʻapositolo ko Paulá ke “nimahomo ʻo ʻangafietokoni.” (1 Timote 6:18) Hangē ko ení, vahevahe atu ʻa e ngaahi lea fakalototoʻa ki he niʻihi kehé. (Palovepi 11:25) Tauʻatāina ʻi hono fai ʻa e fakaongoongolelei loto-moʻoni mo e lea fakatupu langa hake. ʻI he taimi ʻokú ke fakahaaʻi ai ʻa e mahuʻingaʻia moʻoni ʻi he lelei ʻa e niʻihi kehé, ʻoku tohoakiʻi mai ai kinautolu kiate koe. Fakakaukau ʻo fekauʻaki mo e meʻa ʻe lava ke ke fai maʻa kinautolú ʻo ʻikai ko e fakahangataha ki he meʻa ʻe lava ke nau fai maʻaú.