ʻOkú Ke Manatuʻi?

Kuó ke houngaʻia ʻi hono lau ʻa e ngaahi ʻīsiu fakamuimui ʻo e Taua Leʻo? Sai, sio angé pe ʻe lava ke ke tali ʻa e ngaahi fehuʻi hokó:

• Ko e hā ʻoku mahuʻinga ʻi heʻetau fakaleleiʻi ha faikehekehe mo ha taha?

ʻOku totonu ke tau ʻuluaki ʻiloʻi ʻoku tau tōngofua kotoa ki he ngaahi fakakaukau mo e ngaahi vakai ʻoku hala. Pea ʻoku totonu leva ke tau fakakaukau fakamātoato pe ko kitautolu ʻa e tupuʻanga ʻo e palopalemá kae ʻikai ko e tokotaha kehé.​—8/15, peesi 23.

• ʻE hoko ʻafē ʻa e “ngaahi taimi ʻo e toe fakafoki ʻo e ngaahi meʻa kotoa pē,” naʻe lave ki ai ʻi he Ngāue 3:​21?

ʻOku hoko mai ʻa e toe fakafokí ʻi he ongo tuʻunga ʻe ua. ʻUluakí, ʻoku ʻi ai ʻa e toe fakafoki ki ha palataisi fakalaumālie ʻa ia ʻoku lolotonga fakahoko talu mei he 1919. Ko ha toe fakafoki ʻe taha ʻe hoko mai ia ʻi he taimi ʻe toe fakafoki ai hotau foʻi māmaní ki ha palataisi fakamatelié.​—9/1, peesi 17, 18.

• ʻOku anga-fēfē ʻa e ʻikai ha angi ʻa e loó, ʻo hangē ko ia ʻoku fakahaaʻi ʻi he Palovepi 6:​6-8, pea neongo ia ʻokú ne tokonaki mai ha faʻifaʻitakiʻanga lelei kiate kitautolú?

ʻI he nofoʻanga loó, ʻoku ʻi ai ha kuini, ka ʻokú ne kuini pē ʻi he ʻuhinga ko ʻene fakatō fua pea hoko ko e faʻē ʻa e nofoʻangá. ʻOku ngāue mālohi ʻa e fanga loó, pea ʻoku totonu ke pehē pē mo kitautolu, ʻo tau feinga ke fakaleleiʻi ʻetau ngāué, neongo ai pē ʻo kapau ʻoku ʻikai ke siofi.​—9/15, peesi 26.

• Naʻe totonu ʻa e kikite ʻa Hūlitá, hangē ko ia ʻoku lēkooti ʻi he 2 Tuʻi 22:20 (PM), ʻe mate ʻa Siosaia “i he melino,” koeʻuhi he naʻe kafo lahi ia ʻi he taú?

ʻIo, naʻá ne mate ʻi he melino ʻi he ʻuhinga naʻá ne mate ki muʻa ʻi he fakatamaki ʻo e 609-​607 K.M., ʻi he taimi naʻe ʻākoloʻi ai ʻe he kau Pāpiloné ʻo fakaʻauha ʻa Selusalemá.​—9/15, peesi 30.

• Naʻe anga-fēfē ʻa e lelei kia Solomone ke fakamatalaʻi ha uaifi ko ha “hainite ʻofeina mo ha kosi fakaʻofoʻofa ʻo e moʻungá”? (Palovepi 5:​18, 19, NW)

Ko e kosi kaivao fefiné, pe kosi ʻo e moʻungá, ʻoku natula nonga ia mo hā matamatalelei. Neongo ia, ʻoku lava ke ne moʻui mo fanau ʻi he ngaahi feituʻu makamaka, ʻoku ʻikai lava ʻo aʻu ki ai ʻa ia ʻoku tāiʻi ai ʻa e meʻakaí.​—10/1, peesi 30, 31.

• Ko hai ʻa Henry Grew mo George Storrs?

Ko e ongo tangata ko eni ʻe toko uá naʻá na moʻui ʻi he 1800 tupú pea ko ha ongo ako loto-vēkeveke kinaua ʻo e Tohitapú. Naʻe ako ʻa Grew ʻoku taʻefakatohitapu ʻa e Tolu-Tahaʻi-ʻOtuá, ʻo hangē pē ko e ongo tokāteline ʻo e taʻefaʻamate ʻa e soulú pea mo e afi ʻo helí. Naʻe ʻiloʻilo ʻa Storrs ʻe maʻu ʻe he niʻihi ha moʻui taʻehanongataʻanga ʻi he māmaní. Naʻá na ʻi muʻa fakatouʻosi ʻia Charles Taze Russell, ʻa ia naʻá ne kamata pulusi ʻa e makasini ko ení ʻi he 1879.​—10/15, peesi 26-​30.

• ʻOku anga-fēfē ʻa e vakai ʻa e Kau Fakamoʻoni ʻa Sihová ki he ngaahi founga fakafaitoʻo ʻo hono ngāueʻaki hoto totó?

ʻI hono fakatuʻunga ʻenau ngaahi tuí ʻi he Tohitapú, ʻoku ʻikai te nau tuku tauhi honau totó tonu pea tali ia ki mui ʻi he tuʻunga ko ha huhu. ʻOku fili ʻa e Kalisitiane taki taha maʻana ki he founga ʻe ngāueʻaki ki ai ʻa hono totó ʻi he ʻalunga ʻo ha founga fakaetafa, sivi fakafaitoʻo, pe ko e faitoʻo lolotongá. ʻOku totonu ke ne fakakaukau ki he meʻa ʻoku leaʻaki ʻe he Tohitapú ʻo fekauʻaki mo e totó pea manatuʻi ʻokú ne fakatapui kakato ki he ʻOtuá.​—10/15, peesi 30, 31.

• Ko ha savea naʻe fai ki muʻa ʻi he taʻú ni naʻe fakahaaʻi ai ʻa e fiemaʻu mahuʻinga ki he hā ʻi he lotolotonga ʻo e Kau Fakamoʻoni ʻa Sihová takatakai ʻi he foʻi kolopé?

ʻOku ʻi ai ha fiemaʻu ki he ngaahi Fale Fakatahaʻanga laka hake ʻi he 11,000 ʻi he ngaahi fonua langalanga haké, ʻa ia ʻoku fakangatangata pē ai ʻa e paʻangá. ʻOku tataki ʻa e ngaahi tokoni mei he kau Kalisitiane ʻi he ngaahi fonua lahi ke tokoni ki hono langa ʻa e ngaahi feituʻu faiʻanga fakataha feʻunga.​—11/1, peesi 30.

• Ko e hā ʻa e niʻihi ʻo e ngaahi foʻi lea ʻi he muʻaki lea naʻe ngāueʻaki ʻi he Tohitapú ʻoku fekauʻaki mo e lotú?

Ko e taha ko e lei·tour·giʹa, ʻa ia ʻoku liliu ko e “ngāue maʻá e kakaí.” Ko e taha ko e la·treiʹa, ʻa ia ʻoku liliu ko e “ngāue toputapu.” (Hepelu 10:11; Luke 2:​36, 37)​—11/15, peesi 11, 12.

• Ko e hā ha lēsoni mahuʻinga ʻoku lava ke tau ako mei he fakamatala ʻa e Tohitapú fekauʻaki mo ʻĀtama mo ʻIví?

Ko ha faʻahinga fakangalingali pē ʻo e tauʻatāina meia Sihova ko e ʻOtuá ʻoku fakavalevale fakaʻaufuli ia.​—11/15, peesi 24-​27.

• Ko e hā ʻa e fakamoʻoni Fakatohitapu ʻoku fakaivia ʻe he ʻOtuá ʻa ʻene kau sevānití?

Ko Tēvita, Hapakuke, mo e ʻapositolo ko Paulá naʻa nau tokonaki kotoa mai ʻa e ngaahi fakamoʻoni fakafoʻituitui ki he moʻoniʻi meʻa ko ia ʻa hono fakaivimālohiʻi, pe fakaivia ʻe Sihova ko e ʻOtuá kinautolú. (Sāme 60:12; Hapakuke 3:​19; Filipai 4:​13) Ko ia ai, ʻoku lava ke tau falala pau ʻoku finangalo lelei ʻa e ʻOtuá peá ne malava ke fakaivimālohiʻi kitautolu.​—12/1, peesi 10, 11.