Ko e Hā ʻOkú Ke Tauhi Ai ki he ʻOtuá?

Naʻe ʻoange ʻi he taimi ʻe taha ʻe ha tuʻi manavahē-ʻOtua ʻa e faleʻi ko ení ki hono fohá: “Ke ke ʻilo ʻa e ʻOtua ʻo ho tupuʻanga; pea ke ke tauhi ki ai ʻaki ʻa e loto haohaoa mo e laumalie tonunga.” (1 Kalonikali 28:9) ʻOku hā mahino, ʻoku finangalo ʻa Sihova ki heʻene kau sevānití ke nau tauhi kiate ia ʻaki ʻa e ngaahi loto fakamālōʻia, mo houngaʻia.

ʻI HE tuʻunga ko e Kau Fakamoʻoni ʻa Sihová, ʻoku tau fakahaaʻi loto-lelei ko e taimi ko ē naʻe ʻuluaki fakamatalaʻi mai ai ʻa e ngaahi talaʻofa ʻi he Tohitapú, naʻe ueʻi hotau ngaahi lotó ʻe he fakamālōʻiá. ʻI he ʻaho kotoa pē, ʻoku tau ako ai ʻa e meʻa foʻou fekauʻaki mo e ngaahi taumuʻa ʻa e ʻOtuá. Ko e lahi ange ʻo ʻetau ako fekauʻaki mo Sihová, ko e hoko ia ʻo lahi ange ʻetau holi ke tauhi kiate ia “ʻaki ʻa e loto haohaoa mo e laumalie tonunga.”

Ko e tokolahi ʻoku nau hoko ko e Kau Fakamoʻoni ʻa Sihová ʻoku nau hokohoko atu ke tauhi kia Sihova ʻaki ʻa e fiefia lahi ʻi he kotoa ʻo ʻenau moʻuí. Kae kehe, ʻoku kamata lelei ʻa e kau Kalisitiane ʻe niʻihi, ka ʻi ha taimi, ʻoku mole ai mei heʻenau vakaí ʻa e ngaahi ʻuhinga mālohi ʻa ia ʻokú ne ueʻi kitautolu ke tauhi ai ki he ʻOtuá. Kuo hoko ia kiate koe? Kapau kuo pehē, ʻoua ʻe siva ai ʻa e ʻamanakí. ʻOku lava pē ke toe maʻu mai ʻa e fiefia kuo molé. Anga-fēfē?

Fakalau Ho Ngaahi Tāpuakí

ʻUluakí, fakalaulauloto ki he ngaahi tāpuaki fakaʻaho ʻokú ke maʻu mei he ʻOtuá. Fakakaukau ʻo fekauʻaki mo e ngaahi meʻaʻofa lelei ʻa Sihová: ʻa ʻene ngāue lahi fau ʻo e fakatupú​—ʻoku ala aʻusia ʻe he tokotaha kotoa neongo pe ko e hā ʻa e tuʻunga fakasōsiale pe fakaʻekonōmika​—ʻa ʻene ngaahi tokonaki fakanatula ʻo e meʻakaí mo e meʻainú, ko e lahi ʻo e moʻuilelei ʻokú ke fiefia aí, ko hoʻo ʻiloʻi ʻo e moʻoni faka-Tohitapú, pea mo e meʻa tefito tahá, ko e meʻaʻofa ʻa hono ʻAló. Naʻe teuteu ʻe heʻene pekiá ʻa e hala kiate koe ke ke tauhi ai ki he ʻOtuá ʻaki ha konisēnisi maʻa. (Sione 3:​16; Semisi 1:​17) Ko e lahi ange ʻa hoʻo fakalaulauloto ki he anga-lelei ʻa e ʻOtuá, ko e lahi ange ia ʻa e tupulaki ʻa hoʻo houngaʻia ʻiate iá. ʻE ueʻi leva ai koe ʻe ho lotó ke tauhi ia mei he fakamālōʻia ki he meʻa kotoa kuó ne faí. ʻOku ʻikai ha veiveiua te ke kamata ke toe ongoʻi ʻo hangē ko e tokotaha-tohi-sāme ko ia naʻá ne tohi: “ʻE Sihova ko hoku ʻOtua, kuo ke fakalahi hoʻo ngaahi ngaue mana, mo hoʻo ngaahi fakakaukau maʻa homau faʻahinga: ʻoku ʻikai lava hono faʻu hokohoko atu; . . . ʻoku nau hulu ʻi heʻeku mafai ke lau.”—Sāme 40:5.

Ko e ngaahi leá ni naʻe hiki ia ʻe Tēvita, ko ha tangata naʻe ʻikai hao ʻene moʻuí mei he faingataʻá. ʻI he tuʻunga ko ha talavoú, naʻe fakamoleki ʻe Tēvita ʻa e konga lahi ʻo hono taimí ʻi he hola takai holo ʻi hono kumi ia ʻe Tuʻi Saula fulikivanu mo ʻene kau sōtia maluʻí ke tāmateʻi iá. (1 Samiuela 23:​7, 8, 19-​23) Naʻe toe ʻi ai foki mo e ngaahi vaivaiʻanga fakafoʻituitui ʻo Tēvita ʻa ia naʻe pau ke fāinga mo ia. Naʻá ne fakahaaʻi ʻa e meʻá ni ʻi he Sāme hono 40: “ʻOku kapui au ʻe he ngaahi kovi ʻoku ʻikai lava hono lau, ʻoku loki au ʻe heʻeku ngaahi hia, ʻo ʻikai te u masio atu; ʻoku hulu ʻi hoku tuʻoni louʻulu hono lau.” (Sāme 40:12) ʻIo, naʻe ʻi ai ʻa e ngaahi faingataʻaʻia ʻa Tēvita, ka naʻe ʻikai ke lōmekina fakaʻaufuli ia ʻe he ngaahi meʻa ko iá. Naʻá ne tokangataha ki he ngaahi founga naʻe tāpuakiʻi ai ia ʻe Sihová, neongo ʻa ʻene ngaahi palopalemá, pea naʻá ne ʻilo ko e ngaahi tāpuaki ko iá naʻe laka mamaʻo ange ia ʻi heʻene ngaahi mamahí.

ʻI he taimi ʻokú ke ongoʻi taulōfuʻu ai ʻi he ngaahi palopalema fakafoʻituituí pe ʻi he ngaahi ongoʻi taʻefeʻungá, ʻoku lelei ke ke tuʻu ʻo fakalau ho ngaahi tāpuakí, ʻo hangē ko ia naʻe fai ʻe Tēvitá. ʻOku ʻikai ha veiveiua, ko e houngaʻia ʻi he ngaahi tāpuaki peheé naʻá ne ueʻi ai koe tonu ke ke fakatapui  kia Sihova; ko e ngaahi fakakaukau peheé ʻoku toe lava ke ne tokoniʻi koe ke toe langaʻi ʻa e fiefia ne molé pea tokoniʻi koe ke tauhi ki he ʻOtuá mei ha loto houngaʻia.

ʻOku Lava ke Tokoni ʻa e Ngaahi Fakataha ʻa e Fakatahaʻangá

ʻI he tānaki atu ki he fakalaulauloto fakafoʻituitui ki he anga-lelei ʻa Sihová, ʻoku fiemaʻu ke tau feohi mo e kaungā Kalisitiané. ʻOku fakalototoʻa ke fakataha maʻu pē mo e kau tangata, kau fefine, mo e fānau ʻoku nau ʻofa ki he ʻOtuá pea ʻoku nau fakapapauʻi ke tauhi kiate iá. ʻOku lava ke ueʻi kitautolu ʻe heʻenau faʻifaʻitakiʻangá ke ngāue ʻaufuatō ʻi he ngāue ʻa Sihová. Ko ʻetau ʻi ai ʻi he Fale Fakatahaʻangá ʻoku lava ke ne fakalototoʻaʻi kinautolu foki.

Ko e moʻoni, ʻi he taimi ʻoku tau foki ai ki ʻapi hili ha ʻaho ngāue lahí pe ʻi he taimi ʻoku tau loto-siʻi ai koeʻuhi ko ha palopalema pe vaivaiʻanga, ʻe ʻikai nai faingofua ke fakakaukau fekauʻaki mo hono maʻu ha fakataha ʻi he Fale Fakatahaʻangá. ʻI he ngaahi taimi peheé, ʻoku pau nai ke tau fakamālohiʻi kitautolu, ʻo ‘tokeia hotau sinó,’ hangē ko e laú, koeʻuhi ke tau talangofua ki he fekau ke fakatahataha mo e kaungā Kalisitiané.​—1 Kolinito 9:​26, 27; Hepelu 10:​23-​25.

Kapau ʻoku hoko ʻo fiemaʻu ʻa e meʻa ko iá, ʻe lava ke tau fakaʻosiʻaki ʻoku ʻikai ke tau ʻofa moʻoni kia Sihova? ʻIkai ʻaupito. Ko e kau Kalisitiane matuʻotuʻa ʻo e kuohilí ʻa ia naʻe ʻikai ke fehuʻia ʻenau ʻofa ki he ʻOtuá naʻe pau ke nau fai ha feinga mālohi ke fai ʻa e finangalo ʻo e ʻOtuá. (Luke 13:24) Ko e ʻapositolo ko Paulá ko ha Kalisitiane pehē ia ʻe taha. Naʻá ne fakamatalaʻi fakahāhā ʻene ngaahi ongoʻí ʻi he foungá ni: “Kuo u ʻilo, ko e meʻa kiate au, ʻa ia ko e pehe ki hoku kakano, ʻoku ʻikai ke fale ai ha lelei ʻe taha: he ʻoku tolotui mai ʻa e fie fai lelei, ka ko hono fai, ʻoku ʻikai. ʻIo, ko e lelei ʻoku ou fie fai ʻoku ʻikai te u fai; kaekehe, ko e kovi, ʻa ia ʻoku ʻikai te u fie fai, ko ia ia ʻoku ou feia.” (Loma 7:​18, 19) Pea naʻá ne tala ki he kau Kolinitoó: “He neongo ʻeku malangaʻaki ʻa e Kosipeli, talaʻehai ʻoku ou maʻu ai ha polepoleʻanga: he ko ha fatongia ia kuo hilifaki mai; . . . He kapau ʻoku ou fai ia ko ʻeku faʻiteliha, ʻe ai haʻaku totongi: ka ʻo kapau ʻoku ʻikai ko ʻeku faʻiteliha, ta ko ha lakanga ia kuo hilifaki kiate au.”—1 Kolinito 9:​16, 17.

ʻI he hangē ko e tokolahi ʻo kitautolú, naʻe ʻi ai ʻa e ngaahi hehema angahalaʻia ʻa Paula naʻá ne taʻofi ʻa ʻene holi ke fai ʻa e meʻa naʻe totonú. Kae kehe, naʻá ne fai ha faitau mālohi mo e ngaahi hehema ko iá, pea ko e lahi taha ʻo e taimí, naʻá ne lavameʻa ai. Ko e moʻoni, naʻe ʻikai ke fakahoko ʻe Paula ʻa e meʻá ni ʻi hono mālohi pē ʻoʻoná. Naʻá ne tohi: “ʻOku ou mafeia ʻa e meʻa kotoa pe ʻiate ia ʻoku ne fakakaukaua au.” (Filipai 4:13) Ko Sihova, ʻa e tokotaha naʻá ne tuku ʻa e mālohi kia Paulá, te ne toe fakaivia foki koe ke fai ʻa e meʻa ʻoku totonú kapau te ke kole kiate ia ki heʻene tokoní. (Filipai 4:​6, 7) Ko ia, fai ha “fekuki fakamatoato koeuhi koe tui,” pea ʻe tāpuakiʻi koe ʻe Sihova.—Siutasi 3, PM.

ʻOku ʻikai fiemaʻu ke ke fai ʻa e tau ko ení ʻiate koe pē. ʻI he ngaahi fakatahaʻanga ʻa e Kau Fakamoʻoni ʻa Sihová, ko e kau mātuʻa Kalisitiane matuʻotuʻá, ʻa ia ʻoku nau kītaki tonu ʻi he “fekuki fakamatoato koeuhi koe tui,” ʻoku nau loto-lelei ke tokoniʻi koe. Kapau te ke fakaofiofi ki ha mātuʻa ki ha tokoni, te ne feinga ke “lea fakafiemālie” kiate koe. (1 Tesalonaika 5:​14, NW) Ko ʻene taumuʻá ke ngāue ʻo “hage koe toitoiaga mei he matagi, moe hufaga mei he afā.”—Aisea 32:​2, PM.

“Ko e ʻOtua ko e ʻofa,” pea ʻokú ne fiemaʻu ʻa ʻene kau sevānití ke tauhi kiate ia ʻi he ʻofa. (1 Sione 4:8) Kapau ʻoku fiemaʻu ke toe langaʻi ʻa hoʻo ʻofa ki he ʻOtuá, fou ʻi ha ngaahi sitepu feʻungamālie ke fai ia, hangē ko ia ʻoku fokotuʻu ʻi ʻolungá. Te ke fiefia ʻi hoʻo fai peheé.