Tokoniʻi ʻa e Niʻihi Kehé Ke Nau ʻAʻeva Taau mo Sihova

“Ko kimaua . . . kuo ʻikai tuku ʻema lotu maʻa kimoutolú ʻo kole ke mou lava . . . ʻo ʻaʻeva taau mo Sihova ki he tuʻunga ko hono fakahōifuaʻi kakato ia ʻi hoʻomou hokohoko atu ʻa hono fakatupu fua ʻi he ngāue lelei kotoa pē.”​—KOLOSE 1:​9, 10, NW.

1, 2. Ko e hā ʻa e meʻa tefito ʻe lava ke hoko ko ha matavai ʻo e fiefiá mo e fiemālié?

 “ʻOKÚ MA nofo ʻi ha taulani ʻi ha faama. ʻI hono tauhi ke faingofua ʻema moʻuí, ʻokú ma maʻu ai ʻa e taimi lahi ange ke aʻu ki he kakaí mo e ongoongo leleí. Kuo tāpuakiʻi lahi kimaua ʻaki ʻa e monū ko hono tokoniʻi ʻa e tokolahi ke fakatapui ʻenau moʻuí kia Sihova.”​—Ko ha ongo meʻa mali, ko e ongo faifekau taimi-kakato ʻi ʻAfilika Tonga.

² ʻIkai te ke loto-tatau ʻoku ʻomai ʻa e fiefia ʻi hono tokoniʻi ʻa e niʻihi kehé? ʻOku feinga tuʻumaʻu ʻa e niʻihi ke tokoniʻi ʻa e kau puké, liʻekiná, pe taʻelatá​—ʻo maʻu ʻa e fiemālie ʻi he fai peheé. Ko e kau Kalisitiane moʻoní ʻoku nau fakapapauʻi ko ʻenau vahevahe mo e niʻihi kehé ha ʻilo fekauʻaki mo Sihova ko e ʻOtuá pea mo Sīsū Kalaisí ʻoku fokotuʻu ai ʻa e tokoni lahi taha ʻoku lava ke nau foakí. Ko e meʻá ni pē taha ʻe lava ke ne tataki ʻa e niʻihi kehé ke nau tali ʻa e huhuʻi ʻa Sīsuú, fakatupulekina ha vahaʻangatae lelei mo e ʻOtuá, pea hoko ai ʻo ʻi ha tuʻunga ke maʻu ʻa e moʻui taʻengatá.​—Ngāue 3:​19-​21; 13:48.

3. Ko e hā ʻa e faʻahinga tokoni ʻoku tuha mo ʻetau tokangá?

³ Kae kehe, fēfē ʻa hono tokoniʻi ʻa e faʻahinga ko ia ʻoku nau ʻosi tauhi ki he ʻOtuá, ʻa ē ʻoku nau muimui ki he “hala”? (Ngāue 19:​9, PM) Ko hoʻo mahuʻingaʻia ʻiate kinautolú ʻoku ʻikai ha veiveiua ʻa ʻene lahi ai peé, ka ʻoku ʻikai nai te ke sio ki he founga ʻe lava ke ke fai ai ha meʻa lahi ange pe fakalahi ʻa e tokoni ʻoku faí. Pe ko ho tuʻungá ʻe hā ngali fakangatangata nai kiate koe ʻi he fekauʻaki mo hono tokoniʻi kinautolú, ʻo fakangatangata ai ʻa e fiemālie ʻe lava ke ke maʻú. (Ngāue 20:35) Fekauʻaki mo e ongo tafaʻakí fakatouʻosi, ʻoku lava ke tau ako mei he tohi ʻa Kolosé.

4. (a) Ko e malumalu ʻo e ngaahi tuʻunga ko e hā naʻe tohi ai ʻa Paula ki he kau Kolosé? (e) Naʻe anga-fēfē ʻa e kau ki ai ʻa ʻEpafasí?

⁴ ʻI he taimi naʻe tohi ai ʻa e ʻapositolo ko Paulá ki he kau Kalisitiane ʻi Kolosé, naʻá ne ʻi Loma ʻi he malumalu ʻo ha tukufaleʻi fakapōpula, neongo naʻe lava ke ʻi ai haʻane kau ʻaʻahi. Hangē ko ia te ke ʻamanekiná, naʻe ngāueʻaki ʻe Paula ʻa ʻene tauʻatāina fakangatangatá ke malanga ʻo fekauʻaki mo e Puleʻanga ʻo e ʻOtuá. (Ngāue 28:​16-​31) Naʻe lava ʻa e kaungā Kalisitiané ke ʻaʻahi kia Paula, mahalo ne aʻu ʻo tuku pōpula ʻa e niʻihi fakataha mo ia ʻi ha ngaahi taimi. (Kolose 1:​7, 8; 4:​10) Ko e tokotaha ko e ʻevangeliō faivelenga ko ʻEpafasi mei he kolo ko Kolose ʻi Filisiá, ʻi he fonua tokalelei he hahake ʻo ʻEfesoó ʻi ʻĒsia Maina (ko Toake ia ʻi onopōní). Naʻe ngāue ʻa ʻEpafasi ʻi hono fokotuʻu ha fakatahaʻanga ʻi Kolose, pea naʻá ne ngāue mālohi maʻá e ngaahi fakatahaʻanga ʻi Leotisia mo Hailapoli naʻe ofi maí. (Kolose 4:​12, 13) Ko e hā naʻe fononga ai ʻa ʻEpafasi ke sio kia Paula ʻi Lomá, pea ko e hā ʻoku lava ke tau ako mei he tali ʻa Paulá?

Tokoni ʻAonga ki he Kau Kolosé

5. Ko e hā naʻe tohi ai ʻe Paula ʻa e meʻa naʻá ne tohi ki he kau Kolosé?

⁵ Koeʻuhi ke alea mo Paula fekauʻaki mo e ngaahi tuʻunga ʻi he fakatahaʻanga Kolosé, naʻe fai ai ʻe ʻEpafasi ha fononga faingataʻa ki Loma. Naʻá ne līpooti ʻa e tui, ʻofa, mo e ngaahi ngāue fakaʻevangeliō ʻa e kau Kalisitiane ko iá. (Kolose 1:​4-8) Neongo ia, kuo pau pē naʻá ne toe kau ʻi heʻene hohaʻa fekauʻaki mo e ngaahi tākiekina kovi naʻá ne fakamanaʻi ʻa e tuʻunga fakalaumālie ʻo e kau Kolosé. Naʻe tali ʻe Paula ʻaki ha tohi fakamānavaʻi naʻe fakafepakiʻi ai ʻa e niʻihi ʻo e ngaahi fakakaukau ko ia naʻe fakamafola ʻe he kau faiako loí. Naʻá ne mātuʻaki hangataha ki he ngafa tefito ʻoku totonu ke fakahoko ʻe Sīsū Kalaisí. a Naʻe fakangatangata ʻa ʻene tokoní ki hono fakamamafaʻi ʻa e ngaahi moʻoni faka-Tohitapu tefitó? Ko e hā mo ha toe founga naʻe lava ke ne tokoniʻi ai ʻa e kau Kolosé, pea ko e hā ʻa e ngaahi lēsoni ʻoku lava ke tau ako fekauʻaki  mo hono tokoniʻi ʻa e niʻihi kehé?

6. Ko e hā naʻe fai ki ai ʻa e fakamamafa ʻa Paula ʻi heʻene tohi ki he kau Kolosé?

⁶ Ki muʻa ʻi heʻene tohí, naʻe tokonaki ai ʻe Paula ʻa e fakamaama ki ha faʻunga ʻo e tokoní te tau tukunoaʻi nai. Ko ha founga ia ʻo hono fai ha tokoni naʻe ʻaonga mei he mamaʻó, ʻi he hoko ʻo mamaʻo ʻaupito ʻa Paula mo ʻEpafasi mei Kolosé. Naʻe fakahaaʻi ʻe Paula: “Ko e fakafetaʻi pe kuo ma fai ki he ʻOtua, ko e Tamai ʻa hotau ʻEiki ko Sisu Kalaisi, mo e hufia maʻu pe kimoutolu.” ʻIo, naʻe ʻi ai ʻa e ngaahi lotu fakahangatonu maʻá e kau Kalisitiane ʻi Kolosé. Naʻe tānaki mai ʻe Paula: “Ko ia ko kimaua foki, talu e ʻaho naʻa ma fanongo ki ai, ʻoku ʻikai tuku ʻema hufia kimoutolu, mo ʻema kolenga ke mou potopotoʻi ʻi he ʻilo ki hono finangalo, ko e meʻa ʻi he poto kehekehe mo e ʻilo kehekehe ʻoku mei he Laumalie.”—Kolose 1:​3, 9.

7, 8. Ko ʻetau ngaahi lotu fakafoʻituituí mo fakaefakatahaʻangá ʻoku faʻa fakakau ai ʻa e hā?

⁷ ʻOku tau ʻiloʻi ko Sihova ʻa e “tali lotu,” ko ia ʻoku lava ke tau falala ki heʻene mateuteu ke fanongo mai ki heʻetau ngaahi lotu ʻoku fai ʻo feongoongoi mo hono finangaló. (Sāme 65:2; 86:6; Palovepi 15:​8, 29; 1 Sione 5:​14) Ko ia ai, ʻi he taimi ʻoku hoko mai ai ki heʻetau lotu maʻá e niʻihi kehé, ʻoku fēfē ʻetau ngaahi lotú?

⁸ ʻOku tau faʻa fakakaukau nai mo lotu fekauʻaki mo e ‘feohiʻanga kotoa ʻo hotau fanga tokoua ʻi he māmaní.’ (1 Pita 5:​9, NW) Pe te tau fakaofiofi nai kia Sihova fekauʻaki mo e kau Kalisitiané pea mo e niʻihi kehe ʻi ha feituʻu ʻoku haveki ʻe ha fakatamaki pe fakamamahi. ʻI he taimi naʻe fanongo ai ʻa e kau ākonga ʻi he ʻuluaki senitulí ʻi he feituʻu kehé ki he honge ʻi Siuteá, kuo pau pē naʻa nau fai ha lotu lahi maʻa honau fanga tokouá naʻa mo e ki muʻa ke ʻoatu ʻa e ngaahi koloa tokoní. (Ngāue 11:​27-​30) ʻI hotau taimí, ʻoku faʻa fanongoa ai ʻa e ngaahi lotu fekauʻaki mo e fetokouaʻakí fakakātoa pe fekauʻaki mo ha fuʻu kulupu ʻo e fanga tokouá ʻi he ngaahi fakataha faka-Kalisitiané, ʻa ia ʻoku fiemaʻu ai ke mahinoʻi ʻe he tokolahi pea malava ke nau lea “Emeni.”—1 Kolinito 14:16.

Fakahangatonu ʻi he Lotú

9, 10. (a) Ko e hā ʻa e ngaahi faʻifaʻitakiʻanga ʻoku fakahaaʻi ai ʻoku feʻungamālie ʻa e lotu fekauʻaki mo e faʻahinga tāutaha fakahangatonú? (e) Naʻe anga-fēfē ʻa e hoko ʻa Paula ko e kaveinga ia ʻo ha lotu fakahangatonu?

⁹ Neongo ia, ʻoku tokonaki mai ʻe he Tohitapú kiate kitautolu ʻa e ngaahi faʻifaʻitakiʻanga ʻo e ngaahi lotu maʻá e niʻihi kehé ʻa ia naʻe toe fakahangatonu ange, ʻo fakatāutaha. Fakakaukauloto atu ki he fakamatala ʻa Sīsū naʻe lēkooti ʻi he Luke 22:​31, 32. Naʻe takatakaiʻi ia ʻe he kau ʻapositolo loto-tōnunga ʻe toko 11. Ko kinautolu kotoa ne nau fiemaʻu ʻa e tokoni ʻa e ʻOtuá ʻi he ngaahi taimi faingataʻa naʻe tuʻu mei muʻá, pea naʻe lotu ʻa Sīsū maʻa kinautolu. (Sione 17:​9-​14) Ka, naʻe filiʻi ʻe Sīsū ʻa Pita, ʻo fai ha hū makehe maʻá e ākonga ʻe tokotaha ko iá. Ko e toe ngaahi faʻifaʻitakiʻanga kehé: Naʻe lotu ʻa ʻIlaisa ke tokoniʻi ʻe he ʻOtuá ha tangata makehe ʻe taha, ko hono tauhí. (2 Tuʻi 6:​15-​17) Naʻe lotu ʻa e ʻapositolo ko Sioné ke hokohoko atu ʻa e lelei fakasino mo fakalaumālie ʻa Keió. (3 Sione 1, 2) Pea naʻe fakahangataha ʻa e ngaahi lotu kehé ki he ngaahi kulupu fakangatangata.​—Siope 42:​7, 8; Luke 6:​28; Ngāue 7:​60; 1 Timote 2:​1, 2.

¹⁰ Naʻe fakaeʻa ʻi he ngaahi tohi ʻa Paulá ʻa e meʻa fekauʻaki mo e ngaahi lotu mātuʻaki fakahangatonu. Naʻá ne kole ke fai ange ha lotu maʻana, pe maʻana mo hono ngaahi kaungāmeʻá. ʻOku pehē ʻe he Kolose 4:​2, 3 (PM): “Fai mau be ae lotu, bea leo i ai mo fakafetai; Bea lotua akimautolu foki, koeuhi ke too kiate kimautolu e he Otua ae mataba oe lea, ke lea aki ae mea fakalilolilo a Kalaisi, aia kuo haʻijia ai au.” Fakakaukau atu foki, ki he ngaahi faʻifaʻitakiʻanga kehe ko ení: Loma 15:30; 1 Tesalonaika 5:​25; 2 Tesalonaika 3:1; Hepelu 13:18.

11. ʻI heʻene ʻi Lomá, naʻe lotu ʻa ʻEpafasí maʻa hai?

¹¹ Naʻe hoko moʻoni ʻa e meʻa tatau ʻo fekauʻaki mo e kaumeʻa ʻo Paula ʻi Lomá. “Ko ʻEpafasi, ʻa ia ʻoku mei homou lotolotongá, . . . ʻokú ne ʻoatu kiate kimoutolu ʻene ngaahi talamonū, ʻo ne fakafitefitaʻa maʻu pē maʻa kimoutolu ʻi heʻene ngaahi lotú.” (Kolose 4:​12, NW) Ko e foʻi lea ʻoku fakalea ko e “fakafitefitaʻá” ʻoku lava ke pehē ko e “fāinga,” hangē ko ia ʻoku fai ʻe ha tokotaha fakamālohi-sino ʻi he ngaahi vaʻinga he kuohilí. Naʻe lotu tōtōivi pē ʻa ʻEpafasi fekauʻaki mo e kulupu ʻo e kau tui ʻi māmani lahí pe naʻa mo e kau lotu moʻoni ʻi ʻĒsia Mainá kotoa? Naʻe fakahaaʻi ʻe Paula naʻe lotu fakahangatonu ʻa ʻEpafasi maʻá e faʻahinga ʻi Kolosé. Naʻe ʻiloʻi ʻe ʻEpafasi honau tuʻungá. ʻOku ʻikai ke tau ʻiloʻi kotoa kinautolu ʻi honau hingoá, pea ʻoku ʻikai te tau ʻiloʻi ʻa e ngaahi palopalema naʻa nau fehangahangai mo iá, kae fakaʻuta atu ki he ngaahi tuʻunga ʻe niʻihi naʻe ala lavá. Mahalo pē  naʻe faitau ʻa e talavou ko Lainó mo e tākiekina ʻo e ngaahi filōsofia naʻe ʻi aí, pea ko Lūfusi naʻá ne fiemaʻu nai ʻa e mālohi ke talitekeʻiʻaki ʻa e fakamānako ʻa ʻene ngaahi tōʻongafai ki muʻa ʻi he lotu faka-Siú. ʻI hono maʻu ha husepāniti taʻetuí, naʻe fiemaʻu ʻe Pēsisi ha kātaki mo e poto ke ʻohake ʻa ʻene fānaú ʻi he ʻEikí, pea ko ʻAsinikalaito, ʻa ia naʻá ne faingataʻaʻia ʻi ha mahaki fakatupu maté, naʻá ne fiemaʻu ha fakafiemālie lahi? ʻIo, naʻe ʻiloʻi ʻe ʻEpafasi ʻa e faʻahinga ko ia ʻi he fakatahaʻanga ʻi hono feituʻú, pea naʻá ne lotu fakamātoato fekauʻaki mo kinautolu koeʻuhi ko ia fakatouʻosi mo Paula naʻá na fiemaʻu ʻa e faʻahinga līʻoa peheé ke nau ʻaʻeva taau mo Sihova.

12. ʻE anga-fēfē nai ʻetau hoko ʻo toe fakahangatonu ange ʻi heʻetau ngaahi lotu tāutahá?

¹² ʻOkú ke sio ki he sīpinga maʻakitautolú​—ko ha founga kiate kitautolu ke tokoniʻiʻaki ʻa e niʻihi kehé? Hangē ko ia naʻe lave ki aí, ko e ngaahi lotu fakahāhā ʻi he ngaahi fakataha faka-Kalisitiané ʻoku ʻikai ke faʻa fakahangatonu ia, ʻi he vakai atu ki he kehekehe ʻa e kau fanongó. Ka ko ʻetau ngaahi lotu fakafoʻituituí pe fakafāmilí ʻoku lava ke mātuʻaki fakahangatonu ia. Lolotonga te tau kole nai ʻi he taimi ʻe niʻihi ki he ʻOtuá ke ne tataki mo tāpuakiʻi ʻa e kotoa ʻo e kau ʻovasia fefonongaʻakí pe kau tauhi-sipi fakalaumālié, ʻikai ʻoku lava ʻi he taimi ʻe niʻihi ke tau fakahangatonu? Hangē ko ení, ko e hā ʻoku ʻikai fakakau ai he lotú ʻa e hingoa ʻo e ʻovasia fakafeituʻu ʻoku ʻaʻahi atu ki hoʻo fakatahaʻangá pe ko e tokotaha faiako ʻi hoʻo Ako Tohi Fakaefakatahaʻangá? ʻOku fakahaaʻi ʻi he Filipai 2:​25-​28 mo e 1 Timote 5:​23 ʻa e hohaʻa fakafoʻituitui ʻa Paula fekauʻaki mo e tuʻunga moʻuilelei ʻa Tīmote mo ʻEpafalotaitó. ʻE lava ke tau tapua atu ʻa e mahuʻingaʻia pehē meimei tatau ʻi he faʻahinga ʻoku puke ʻa ē ʻoku tau ʻiloʻi honau hingoá?

13. Ko e hā ʻa e faʻahinga tuʻunga ko e ngaahi meʻa feʻungamālie ia kiate kitautolu ke fakakau ʻi he ngaahi lotu fakafoʻituituí?

¹³ Fakatatau ki ai, kuo pau ke tau fakaʻehiʻehi mei he kaunoa ʻi he ngaahi meʻa fakatāutaha ʻa e niʻihi kehé, ka ʻoku totonu ke fakahaaʻi ʻi heʻetau ngaahi lotú ʻa e mahuʻingaʻia moʻoni ʻi he faʻahinga ʻoku tau ʻiloʻi mo tokangaʻí. (1 Timote 5:​13; 1 Pita 4:​15) ʻE mole nai ha ngāue ʻa ha tokoua, pea ʻoku ʻikai lava ke tau ʻoange kiate ia ha ngāue ʻe taha. Ka, ʻe lava ke tau lave kiate ia ʻi hono hingoá pea fakahangataha ki heʻene faingataʻaʻiá ʻi heʻetau ngaahi lotu fakafoʻituituí. (Sāme 37:25; Palovepi 10:3) ʻOku tau lāuʻilo ki ha tuofefine taʻemali kuó ne tupu ʻo motuʻa ange ʻo ʻikai hano husepāniti mo e fānau koeʻuhi ʻokú ne fakapapauʻi ke mali “i he Eiki be”? (1 Kolinito 7:​39, PM) ʻI hoʻo ngaahi lotu tāutahá, ko e hā ʻoku ʻikai ai te ke kole kia Sihova ke tāpuakiʻi ia pea ke tokoniʻi ia ke ne hokohoko atu ʻi heʻene ngāue mateakí? Ko ha toe fakatātā ʻe taha, kuo fai nai ʻe ha ongo mātuʻa ʻe toko ua ha akonaki ki ha tokoua naʻe faihala. Ko e hā ʻoku ʻikai lava ai kiate kinaua taki taha ke lave kiate ia ʻi hono hingoá ʻi heʻena ngaahi lotu tāutahá ʻi he taimi ki he taimi?

14. ʻOku anga-fēfē ʻa e felāveʻi ʻa e ngaahi lotu fakahangatonú mo hono tokoniʻi ʻa e niʻihi kehé?

¹⁴ ʻOku lahi ʻa e ngaahi faingamālie kiate koe ke fakakau ʻi hoʻo ngaahi lotu fakafoʻituituí ʻa e faʻahinga tāutaha ʻokú ke ʻiloʻi ʻoku nau fiemaʻu ʻa e poupou, fakafiemālie, poto, mo e laumālie māʻoniʻoni ʻo Sihová, pe ko ha taha pē ʻo hono ngaahi fua ʻoku maʻú. Koeʻuhi ko e mamaʻó pe ko ha ngaahi tuʻunga kehe, te ke ongoʻi fakangatangata nai ʻi ha meʻa fakamatelie pe tokoni hangatonu ʻe lava ke ke tokonakí. Kae ʻoua naʻa ngalo ke lotu maʻa ho fanga tokouá mo e fanga tuofāfiné. ʻOkú ke ʻiloʻi ʻoku nau loto ke ʻaʻeva taau mo Sihova, ka te nau fiemaʻu moʻoni nai ʻa e tokoni ke fai tuʻuloa ia. Ko ha kī ki he tokoní ʻa hoʻo ngaahi lotú​—Sāme 18:2; 20:​1, 2; 34:15; 46:1; 121:​1-3.

Ngāue ke Fakaivimālohiʻi ʻa e Niʻihi Kehé

15. Ko e hā ʻoku totonu ai ke tau mahuʻingaʻia ʻi he konga fakaʻosi ʻo e Kolosé?

¹⁵ Ko e moʻoni, ko e lotu tōtōivi, mo fakahangatonú, ʻoku ʻikai ko e founga pē ia ʻe taha ke tokoniʻi ai ʻa e niʻihi kehé, tautefito ki he faʻahinga ʻoku ofí pea mo ia ʻokú ke ʻofa aí. ʻOku ʻai ʻe he tohi Kolosé ke mahino ʻa e meʻa ko iá. ʻOku fakahaaʻi ʻe he kau mataotao  tokolahi ʻi he hili hono ʻomai ʻe Paula ʻa e tataki fakatokāteline mo e akonaki ʻaongá, naʻá ne tānaki mai ki ai ʻa e ngaahi fetapa pe ngaahi talamonū fakafoʻituitui pē. (Kolose 4:​7-​18) ʻI hono kehé, kuo tau ʻosi ʻilo ko e konga fakaʻosi ko eni ʻo e tohí ʻoku ʻi ai ʻa e akonaki ʻaonga, pea ʻoku lahi ange ʻa e meʻa ke ako mei he konga ko ení.

16, 17. Ko e hā ʻoku lava ke tau leaʻaki fekauʻaki mo e fanga tokoua naʻe lave ki ai ʻi he Kolose 4:​10, 11?

¹⁶ Naʻe tohi ʻa Paula: “ʻOku ʻofa atu ʻa Alisitako, ʻa ia ʻoku nofo pilisone mo au, pea mo Maʻake, ko e tama-ʻa-mehekitanga ʻo Panepasa: ʻa ia kuo mou maʻu tuʻutuʻuni ki ai; (kapau te ne aʻu atu kiate kimoutolu, mou tali lelei ia:) kaeʻumaʻā ʻa Sisu ʻa ia ʻoku hingoa ko Siusitasa. Ko kinautolu pe ʻo e haʻa kamu ʻoku kau mo au ʻi he ngaue maʻa e Puleʻanga ʻo e ʻOtua: ko e tuʻungameʻa ia kuo [“hoko ko ha tokoni fakaivimālohi,” NW] kiate au.”—Kolose 4:​10, 11.

¹⁷ Naʻe fakahaaʻi ai ʻe Paula ʻa e fanga tokoua pau ʻa ia naʻa nau taau ke fai hano tokangaʻi makehe. Naʻá ne pehē naʻa nau ʻi he lotolotonga ʻo e faʻahinga kamú, ʻo e ʻātakai faka-Siú. Naʻe tokolahi ʻa e kau Siu kamu ʻi Lomá, pea naʻe Kalisitiane ʻa e niʻihi he taimi ko iá. Neongo ia, ko e faʻahinga naʻe lave ki ai ʻa Paulá naʻa nau tokoniʻi ia. Ngalingali, naʻe ʻikai te nau toumoua ke feohi mo e kau Kalisitiane mei he ʻātakai Senitailé, pea kuo pau naʻa nau kau fiefia mo Paula ʻi he malanga ki he kau Senitailé.​—Loma 11:13; Kaletia 1:​16; 2:​11-​14.

18. Naʻe anga-fēfē hono fakaongoongoleleiʻi ʻe Paula ʻa e niʻihi ʻa ia naʻa nau ʻiate iá?

¹⁸ Fakatokangaʻi ʻa e fakamatala ʻa Paulá: “Ko e tuʻungameʻa ia kuo nau hoko ko ha tokoni fakaivimālohi kiate au.” Naʻá ne ngāueʻaki ha foʻi lea faka-Kalisi ʻoku hā tuʻo taha pē ʻi he Tohitapú. ʻOku fakalea ia ʻe he kau liliu lea tokolahi ko e “fakafiemālie.” Kae kehe, ʻoku ʻi ai ʻa e foʻi lea faka-Kalisi ʻe taha ko e (pa·ra·ka·le’o) ʻoku fakalea anga-maheni ko e “fakafiemālie.” Naʻe ngāueʻaki ia ʻe Paula ʻi ha feituʻu kehe ʻi heʻene tohi tonu ko ení kae ʻikai ʻi he Kolose 4:​11.​—Mātiu 5:4; Ngāue 4:​36; 9:​31; 2 Kolinito 1:4; Kolose 2:2; 4:8.

19, 20. (a) Ko e hā ʻa e ʻuhinga ʻo e kupuʻi lea naʻe ngāueʻaki ʻe Paula ki he fanga tokoua naʻa nau tokoniʻi ia ʻi Lomá? (e) ʻI he ngaahi founga fē naʻe tokoniʻi nai ai ʻe he fanga tokoua ko iá ʻa Paulá?

 ¹⁹ Ko e faʻahinga ko ia naʻe lave ʻa Paula ki honau hingoá kuo pau naʻa nau fai ʻa e meʻa lahi ange ia ʻi hono fai pē ha fakafiemālie ʻi he leá. Ko e kupuʻi lea faka-Kalisi ʻoku fakalea ko e “tokoni fakaivimālohi” ʻi he Kolose 4:​11 naʻe ngāueʻaki ia ʻi he taimi ʻe niʻihi ʻi he ngaahi konga tohi fakamāmaní ki ha faitoʻo ke fakanongaʻaki ʻa e mamahí. ʻOku pehē ʻi he New Life Version: “Ko ha tokoni ē ko kinautolu kiate au!” ʻOku ngāueʻaki ʻe he Today’s English Version ʻa e kupuʻi lea: “Kuo nau hoko ko ha tokoni lahi kiate au.” Ko e hā nai ne fai ʻe he fanga tokoua Kalisitiane ko ia naʻe nofo ofi kia Paulá ke tokoni kiate iá?

²⁰ Naʻe lava ke maʻu ʻe Paula ha kau ʻaʻahi, ka naʻe lahi ʻa e ngaahi meʻa naʻe ʻikai lava ke ne faí, hangē ko hono fakatau mai ʻa ʻene ngaahi fiemaʻu tefitó​—ʻa e meʻakai mo e vala ki he faʻahitaʻu momokó. ʻE anga-fēfē ʻene maʻu mai ha ngaahi takainga tohi ki he akó pe fakatau mai ʻene ngaahi naunau fakaetohí? (2 Timote 4:​13) ʻIkai ʻoku lava ke ke fakaʻuta atu ki he fanga tokoua ko ia naʻa nau tokoniʻi ʻa Paula ʻi heʻene ngaahi fiemaʻú, ʻi hono fai ʻa e ngaahi meʻa tefito pehē hangē ko e fakatau pe fai ʻa ʻene ngaahi fekaú? Naʻá ne loto nai ke vakaiʻi mo langa hake ha fakatahaʻanga pau. ʻI hono tukufaleʻi fakapōpulá, naʻe ʻikai te ne lava ia, ko ia kuo pau pē nai naʻe fai ʻe he fanga tokoua ko iá ha ngaahi ʻaʻahi maʻa Paula, ʻo ʻave ʻa e ngaahi pōpoaki, mo ʻomai ʻa e ngaahi līpooti. He fakaivimālohi moʻoni ē!

21, 22. (a) Ko e hā ʻoku totonu ai ke tau mahuʻingaʻia ʻi he ngaahi lea ʻi he Kolose 4:​11? (e) Ko e hā ʻa e ngaahi founga ʻoku lava ke tau ngāueʻaki ai ʻa e faʻifaʻitakiʻanga ʻa e faʻahinga naʻe ʻia Paulá?

²¹ Ko e meʻa naʻe tohi ʻe Paula fekauʻaki mo e hoko “ko ha tokoni fakaivimālohí” ʻoku tokonaki mai ai ʻa e fakamaama ki he founga te tau tokoniʻi nai ai ʻa e niʻihi kehé. ʻOku nau ʻaʻeva taau nai mo Sihova ʻi he fekauʻaki mo ʻene ngaahi tuʻunga fakaeʻulungāngá, maʻu ʻa e ngaahi fakataha faka-Kalisitiané, pea kau ʻi he ngāue fakamalangá. ʻI he meʻa ko iá ʻoku nau tuha mo ʻetau ngaahi lea houngaʻiá. Neongo ia, ʻe lava ke tau fai ʻa e meʻa lahi ange, ʻi he hoko ko e ‘ngaahi tokoni fakaivimālohi’ ʻo hangē ko e faʻahinga ko ia naʻe ʻia Paulá?

²² Kapau ʻokú ke ʻiloʻi ha tuofefine ʻokú ne piki fakapotopoto ki he 1 Kolinito 7:​37 ka ʻoku ʻikai ha fāmili ʻe ofi he taimí ni kiate ia, ʻe lava ke ke fakakau ia ʻi he niʻihi ʻo e ngaahi fakafiefia fakafāmilí, ʻi hano fakaafeʻi nai ia  ke kau ʻi ha houa kai pe ke kau ki ha kiʻi fakatahataha ʻa e ngaahi kaumeʻá pe ngaahi kāingá? Fēfē ke fakaafeʻi ia ke fononga fakataha mo ho fāmilí ki ha fakataha-lahi pe ʻi ha folau ʻeveʻeva? Pe ʻeke ange pe ʻe fie kau fakataha mo koe ʻi ha taimi faingamālie ʻi hoʻo fakatau meʻakaí. ʻE lava ke tau fai ha meʻa pehē ki he kau uitou fefiné pe uitou tangatá, pe mahalo ki he faʻahinga ʻoku ʻikai lava ke nau fakaʻuli he taimi ní. ʻE lava ke ke ʻilo ʻoku fakafiemālie ke fanongo ki heʻenau ngaahi meʻa naʻe hokosiá pe maʻu ʻa e fakahinohino ʻi heʻenau ʻilo ʻa e ngaahi meʻa tuʻumaʻú hangē ko hono filifili ʻa e fuaʻiʻakaú pe ko hono fili ʻa e vala ʻo e fānaú. (Livitiko 19:32; Palovepi 16:31) Ko ha ola fakanatula nai ʻe hokó ko e tupulaki ʻa e vāofí. Ko ia, te nau ongoʻi tauʻatāina ange ai ke kole ki hoʻo tokoní kapau ʻoku nau fiemaʻu ha faitoʻo mei he fale tala-vaí, pe feituʻu hangē ko iá. Ko e fanga tokoua naʻa nau ʻia Paula ʻi Lomá kuo pau pē naʻe ʻoange kiate kinautolu ʻa e tokoni ʻaonga, mo fakaivimālohi, ʻo hangē ko ia ʻoku lava ke hoko kiate koé. Fakatouʻosi ʻi he taimi ko iá mo e taimí ni ko ha toe tāpuaki ʻoku tānaki mai ki ai ko e fakaivimālohiʻi ʻa e ngaahi haʻi ʻo e ʻofá, pea tau fakapapauʻi mālohi ke tauhi fakataha ʻa Sihova ʻi he mateaki.

23. ʻE lelei kiate kitautolu taki taha ke fakamoleki ʻa e taimí ʻi hono fai ʻa e hā?

²³ Ko kitautolu taki taha ʻoku lava ke tau fakakaukauloto atu ki he ngaahi tuʻunga naʻe lave ki ai ʻi he kupu ko ení. Ko e ngaahi faʻifaʻitakiʻanga pē kinautolu, ka ʻe lava ʻe he ngaahi meʻá ni ʻo fakamanatu mai kiate kitautolu ʻa e ngaahi tuʻunga moʻoni ʻa ia te tau lava ke hoko lahi ange ai “ko ha tokoni fakaivimālohi” ki hotau fanga tokouá mo e fanga tuofāfiné. Ko e poiní ʻoku ʻikai ko ʻetau faʻifaʻitaki ki he ngaahi fakakaukau ʻa e faʻahinga ʻoku nau pouaki ʻa e lelei maʻá e tangatá. Naʻe ʻikai ko e taumuʻa ia ʻa e fanga tokoua naʻe lave ki ai ʻi he Kolose 4:​10, 11. Naʻa nau ‘kau ʻi he ngaue maʻá e Puleʻanga ʻo e ʻOtuá.’ Ko e ola fakaivimālohí naʻe felāveʻi hangatonu ia mo e meʻa ko iá. ʻOfa ke hoko ʻa e meʻa tatau ʻi hotau tuʻungá.

24. Ko e hā ʻa e ʻuhinga tefito ʻo ʻetau lotu mo e feinga ke fakaivimālohiʻi ʻa e niʻihi kehé?

²⁴ ʻOku tau lave ki he niʻihi kehé ʻi honau hingoá ʻi heʻetau ngaahi lotu tāutahá pea fai ʻa e ngaahi feinga ke fakaivimālohiʻi kinautolu koeʻuhi ko e meʻá ni: ʻOku tau tui ʻoku loto hotau fanga tokouá mo e fanga tuofāfiné ke “ʻaʻeva taau mo Sihova ki he tuʻunga ko hono fakahōifuaʻi kakato ia.” (Kolose 1:​10, NW) Ko e foʻi moʻoni ko iá ʻoku fakafehokotaki ia ki ha meʻa kehe naʻe lave ki ai ʻa Paula ʻi he taimi naʻá ne tohi ai ʻo kau ki he ngaahi lotu ʻa ʻEpafasi ʻo fekauʻaki mo e kau Kolosé, ke lava nai ke nau “tuʻu kakato fakataha mo e tuipau mālohi ki he finangalo kotoa ʻo e Otuá.” (Kolose 4:​12, NW) ʻOku lava fēfē ke tau lavaʻi fakafoʻituitui ia? Tau sio angé.

[Fakamatala ʻi lalo]

Naʻá Ke Fakatokangaʻi?

• ʻE anga-fēfē nai ʻetau hoko ʻo toe tokoni lahi ange ʻi heʻetau ngaahi lotu tāutahá?

• ʻI he ʻuhinga fē naʻe hoko ai ʻa e kau Kalisitiane ʻe niʻihi ko e ‘ngaahi tokoni fakaivimālohi’ kia Paulá?

• Ko e ngaahi faʻahinga tuʻunga fē ʻoku lava ke tau hoko ai ko e ‘ngaahi tokoni fakaivimālohí’?

• Ko e hā ʻa e taumuʻa ʻoku tuʻu mei mui ʻi heʻetau lotu mo e feinga ke fakaivimālohiʻi hotau fanga tokouá mo e fanga tuofāfiné?

[Fehuʻi ki he Ako]

[Fakatātā ʻi he peesi 18]

ʻE lava ke ke fakakau ha toe Kalisitiane ʻe taha ʻi hoʻo ngaahi ʻeva fakafāmilí?

[Maʻuʻanga ʻo e Tā]

Courtesy of Green Chimney’s Farm