Hanganaki Fakahāhā ʻa e Anga-Leleí

“Ko e fua ʻo e māmá ʻoku ʻi ai ʻa e faʻahinga kotoa pē ʻo e anga-leleí mo e māʻoniʻoní mo e moʻoní.”—EFESO 5:​9, NW.

1. ʻOku anga-fēfē hono fakahāhā ʻe he laui miliona he taimí ni ʻoku nau loto-tatau mo e Sāme 31:19?

 KO E meʻa lelei lahi taha ʻoku malava ke fai ʻe ha tangata ko hono ʻoatu ʻa e lāngilangí kia Sihova. ʻI he ʻahó ni, ʻoku fai ʻeni ʻe he laui miliona ʻaki hono fakahīkihikiʻi ʻa e ʻOtuá ʻi heʻene anga-leleí. ʻI he tuʻunga ko e Kau Fakamoʻoni mateaki ʻa Sihová, ʻoku tau loto-tatau ʻaufuatō fakataha mo e tokotaha-tohi-saame ko ia naʻe hiva: “Hono ʻikai lahi fau hoʻo anga-leleí, ʻa ia kuó ke tuku tauhi maʻá e faʻahinga ʻoku manavahē kiate koé!”—Sāme 31:​19, NW.

2, 3. Ko e hā ʻe lava ke hoko kapau ko ʻetau ngāue ngaohi-ākongá naʻe ʻikai ke poupouʻi ʻaki ha ʻulungaanga leleí?

² Ko e manavahē anga-ʻapasia kia Sihová ʻokú ne ueʻi kitautolu ke tau fakahīkihikiʻi ia ʻi heʻene anga-leleí. ʻOkú ne toe ueʻi kitautolu ke ‘fakamālō kia Sihova, fakafetaʻi kiate ia, mo ʻai ke ʻiloa ʻa e lāngilangi ʻo hono tuʻunga-tuʻí.’ (Sāme 145:​10-13, NW) Ko e ʻuhinga ia ʻoku tau kau faivelenga ai ʻi he ngāue fakamalanga ʻo e Puleʻangá mo e ngaohi-ākongá. (Mātiu 24:14; 28:​19, 20) Ko hono moʻoní, ko ʻetau ngāue fakamalangá kuo pau ke poupouʻi ia ʻe he ʻulungaanga leleí. He ka ʻikai ia, ʻe malava ke tau ʻomai ʻa e luma ki he huafa māʻoniʻoni ʻo Sihová.

³ ʻOku taukaveʻi ʻe he kakai tokolahi ʻoku nau lotu ki he ʻOtuá, ka ʻoku ʻikai fehoanaki honau ʻulungāngá mo e ngaahi tuʻunga ʻoku fokotuʻu mai ʻi heʻene Folofola fakamānavaʻí. ʻI he fekauʻaki mo e niʻihi ʻa ia naʻe ʻikai te nau ngāue ʻo fakatatau ki heʻenau ngaahi taukaveʻi ʻo e faileleí, naʻe tohi ʻe he ʻapositolo ko Paulá: “Ko koe oku ke akonakiʻi ae taha kehe, oku ikai te ke akonakiʻi koe? ko koe oku ke malaga ke oua naa kaihaa, oku ke kaihaa ekoe? Ko koe oku ke behe, oua naa tono fefine, oku ke tono fefine ekoe? . . . He koe mea iate kimoutolu oku lauikovi ae huafa oe Otua i he kakai Jenitaile, o hage koia kuo tohi.”—Loma 2:​21, 22, 24, PM.

4. Ko hotau ʻulungaanga leleí ʻokú ne maʻu ʻa e ola ko e hā?

⁴ ʻI he ʻikai ko hono ʻomai ʻa e luma ki he huafa ʻo Sihová, ʻoku tau feinga ke fakalāngilangiʻi ia ʻaki hotau ʻulungaanga leleí. Kuo ʻi ai ha ola lelei ʻo e meʻá ni ʻi he faʻahinga ʻi tuʻa mei he fakatahaʻanga Kalisitiané. Ko e meʻa ʻe tahá, ʻoku tokoni ia kiate kitautolu ki hono fakasīlongoʻi hotau kau fakafepakí. (1 Pita 2:15) Ko e meʻa ʻoku mahuʻinga angé, ko e tohoaki ʻe hotau ʻulungaanga leleí ʻa e kakaí ki he kautaha ʻa Sihová, ʻo fakaʻatā ai ʻa e hala kiate kinautolu ke nau ʻomai kiate ia ʻa e lāngilangí pea ke maʻu ʻa e moʻui taʻengatá.—Ngāue 13:48.

5. Ko e hā ʻa e ongo fehuʻi ʻoku totonu ke tau fakakaukau ki ai he taimi ní?

⁵ Koeʻuhi ʻoku tau taʻehaohaoa, ʻe malava fēfē ke tau fakaʻehiʻehi mei he ʻulungaanga ʻoku malava ke ne fakaongoongokoviʻi ʻa Sihova pea fakatūkiaʻi ʻa e kau kumi ki he moʻoní? Ko hono moʻoní, ʻe malava fēfē ke tau lavameʻa ʻi hono fakahāhā ʻa e anga-leleí?

Ko ha Fua ʻo e Māmá

6. Ko e hā ʻa e niʻihi ʻo e “ngaahi ngaue taʻefua ʻo e fakapoʻuli,” ka ko e hā ʻa e fua ia ʻoku totonu ke hā mahino ʻi he lotolotonga ʻo e kau Kalisitiané?

⁶ ʻI he tuʻunga ko e kau Kalisitiane ʻosi fakatapuí, ʻoku tau maʻu ha meʻa te ne tokoniʻi kitautolu ke tau fakaʻehiʻehi ai mei he “ngaahi ngaue taʻefua ʻo e fakapoʻuli.” ʻOku kau ki he ngaahi meʻá ni  ʻa e ngaahi ngāue fakaongoongokoviʻi ʻOtua hangē ko e loí, kaihaʻá, lea koví, talanoa kovi fekauʻaki mo e fehokotaki fakasinó, ʻulungaanga fakamaá, tūkuhua fakalieliá, mo e konaá. (Efeso 4:​25, 28, 31; 5:​3, 4, 11, 12, 18) ʻI he ʻikai ke fakakau atu kitautolu ʻi he ngaahi ngāue peheé, ʻoku tau “laka ʻo tāu mo e fanau ʻa maama.” ʻOku pehē ʻe he ʻapositolo ko Paulá “ko e fua ʻo e māmá ʻoku ʻi ai ʻa e faʻahinga kotoa pē ʻo e anga-leleí mo e māʻoniʻoní mo e moʻoní.” (Efeso 5:​8, 9, NW) Ko ia ai, ko e ʻaʻeva ʻi he māmá ʻoku tau malava ai ke hanganaki fakahāhā ʻa e anga-leleí. Ka ko e faʻahinga maama fēfē ʻeni?

7. Ko e hā kuo pau ke tau fai ke hokohoko fakahāhā atu ai ʻa e fua ʻo e anga-leleí?

⁷ Neongo ʻetau ngaahi taʻehaohaoá, ʻe malava ke tau fakahāhā ʻa e anga-leleí kapau ʻoku tau ʻaʻeva ʻi he maama fakalaumālié. “Ko hoʻo folofola ko e tuhulu ki heʻeku laka, mo e maama ki hoku hala,” ko e hiva ia ʻa e tokotaha-tohi-sāmé. (Sāme 119:105) Kapau ʻoku tau fiemaʻu ke tau hanganaki fakahāhā ʻa e “fua ʻo e māmá” fakafou ʻi he “faʻahinga kotoa pē ʻo e anga-leleí,” kuo pau ke tau hokohoko fakaʻaongaʻi ʻa e maama fakalaumālie ʻoku maʻu ʻi he Folofola ʻa e ʻOtuá, ʻoku sivisiviʻi fakalelei mai ʻi he ngaahi tohi faka-Kalisitiané, pea ʻoku lāulea tuʻumaʻu ki ai ʻi heʻetau ngaahi fakataha ki he lotú. (Luke 12:42; Loma 15:4; Hepelu 10:​24, 25) ʻOku toe fiemaʻu ke tau fai ha tokanga makehe ki he faʻifaʻitakiʻanga mo e ngaahi akonaki ʻa Sīsū Kalaisí, “ko e maama ʻo māmani” pea ko “ia ko e ulo atu ʻo [e] langilangi [ʻo Sihová].”—Sione 8:12; Hepelu 1:​1-3.

Ko ha Fua ʻo e Laumālié

8. Ko e hā ʻe malava ai ke tau fakahāhā ʻa e anga-leleí?

⁸ ʻOku ʻikai toe fehuʻia ʻa hono tokoniʻi kitautolu ʻe he maama fakalaumālié ke tau fakahāhā ʻa e anga-leleí. Tānaki atu ki ai, ʻoku tau malava ke fakahāhā ʻa e ʻulungaanga ko ʻení koeʻuhi ʻoku tataki kitautolu ʻe he laumālie māʻoniʻoni ʻo e ʻOtuá, pe ivi ngāué. Ko e anga-leleí ko e konga ia ʻo e “fua ʻo e laumālié.” (Kaletia 5:​22, 23, NW) Kapau te tau fakamoʻulaloa ki he tataki ʻa e laumālie māʻoniʻoni ʻo Sihová, te ne fakatupu ʻiate kitautolu hono fua fakaofo ko e anga-leleí.

9. ʻE malava fēfē ke tau ngāue ʻo fehoanaki mo e ngaahi lea ʻa Sīsū ʻoku lēkooti ʻi he Luke 11:​9-13?

⁹ Ko ʻetau holi loto-vēkeveke ke fakahōifuaʻi ʻa Sihova ʻaki hono fakahāhā ʻa e fua ʻo e laumālié ko e anga-leleí ʻoku totonu ke ne ueʻi kitautolu ke tau ngāue ʻo fehoanaki mo e ngaahi lea ʻa Sīsuú: “Kole, pea ʻe foaki kiate kimoutolu; kumi, pea te mou ʻilo; tukituki, pea ʻe toʻo kiate kimoutolu. He ʻilonga ʻa ia ʻoku ne kole ʻoku ne maʻu; pea ko ia ʻoku kumi ʻoku ne ʻilo; pea ko ia ʻoku tukituki ʻe toʻo kiate ia. Pea tau lau ko ha taha ʻiate kimoutolu ʻoku maʻu fanau, pea kole ki ai ʻe hono foha ha foʻi ma, te ne ʻange koa ha foʻi maka? pea ka ko ha ika, te ne ʻange koa ha ngata ko e fetongi ʻo e ika? Pea kapau te ne kole ha foʻi moa, te ne ʻange koa ha sikapio? Pea kapau ʻoku mou ʻilo ke foaki meʻaʻofa lelei ki hoʻomou fanau, neongo ko e faʻahinga [taʻehaohaoa mo mātuʻaki] kovi kimoutolu: huanoa ʻa e Tamai ʻi he langi ʻene foaki ʻa e Laumālie Māʻoniʻoni kiate kinautolu ʻoku kole kiate ia.” (Luke 11:​9-13) Tau muimui ʻi he akonaki ʻa Sīsuú ʻaki ʻa e lotu ʻo kole ʻa e laumālie ʻo Sihová koeʻuhi ke tau malava ke hanganaki fakahāhā ʻa hono fua ko e anga-leleí.

“Hanganaki Failelei”

10. Ko e hā ʻa e ngaahi tafaʻaki ʻo e anga-lelei ʻa Sihová ʻoku lave ki ai ʻi he Ekisoto 34:​6, 7?

¹⁰ ʻAki ʻa e maama fakalaumālie mei he Folofola ʻa e ʻOtuá pea mo e tokoni ʻa e laumālie māʻoniʻoni ʻo e ʻOtuá, ʻe malava ai ke tau “hanganaki failelei.” (Loma 13:​3, NW) Fakafou ʻi he ako Tohitapu tuʻumaʻú, ʻoku tau ako ai ʻo toe lahi ange fekauʻaki mo e founga ʻe lava ke tau faʻifaʻitaki ai ki he anga-lelei ʻa Sihová. Naʻe lāulea ʻa e kupu ki muʻá ki he ngaahi tafaʻaki ʻo e anga-lelei ʻa e ʻOtuá ʻoku lave ki ai ʻi he fanongonongo kia Mōsese ʻoku lēkooti ʻi he Ekisoto 34:​6, 7 (NW), ʻa ia ʻoku tau lau ai: “Ko Sihova, Sihova, ko ha ʻOtua mohu meesi mo anga-ʻofa, tuai ki he houhau, pea fonu ʻi he ʻaloʻofa mo e moʻoni, ʻokú ne tauhi ʻa e ʻaloʻofá ki he toko afe, fakamolemoleʻi ʻa e faihalá mo e maumau-laó pea mo e angahalá, ka ʻe ʻikai ʻaupito te ne taʻofi ʻa e tauteá.”  Ko ha vakai ofi ange ki he ngaahi fakahāhā ko ʻeni ʻo e anga-lelei ʻa Sihová ʻe tokoni ia kiate kitautolu ke tau “hanganaki failelei.”

11. ʻOku totonu ke fēfē hono ueʻi kitautolu ʻe he ʻilo ko Sihová ʻoku mohu meesi mo anga-ʻofá?

¹¹ Ko e fanongonongo fakaʻotua ko ʻení ʻokú ne fakatokangaʻi kitautolu ki he fiemaʻu ke faʻifaʻitaki kia Sihova ʻaki ʻa e hoko ʻo mohu meesi mo anga-ʻofa. “Fiefiaā ka ko kinautolu ʻoku mohu mēsí,” ko e lea ia ʻa Sīsuú, “koeʻuhi ʻe fakahaaʻi kiate kinautolu ʻa e mēsí.” (Mātiu 5:​7, NW; Luke 6:36) ʻI he lāuʻilo ko Sihova ʻoku anga-ʻofá, ʻoku ueʻi ai kitautolu ke tau anga-ʻofa mo fiefia ʻi heʻetau ngaahi feangainga mo e niʻihi kehé, ʻo kau ai ʻa e faʻahinga ko ia ʻoku tau malanga ki aí. ʻOku fehoanaki ʻeni mo e akonaki ʻa Paulá: “Ke kelesiʻia [“anga-ʻofa,” NW] ai pe hoʻomou lea ki ai, mo fakaifo ʻaki ha masima, ʻo mou ʻilo ʻa e anga ʻo e tali ʻoku totonu ke fai kiate kinautolu taki taha.”—Kolose 4:6.

12. (a) Koeʻuhi ʻoku tuai ki he houhau ʻa e ʻOtuá, ʻoku totonu ke fēfē ʻetau fakafeangai ki he niʻihi kehé? (e) ʻOku ueʻi kitautolu ʻe he ʻaloʻofa ʻa Sihová ke tau fai ʻa e hā?

¹² Koeʻuhi ko e ʻOtuá ʻoku tuai ki he houhau, ko ʻetau holi ke “hanganaki failelei” ʻokú ne ueʻi ai kitautolu ke tau kātakiʻi ʻa e fanga kiʻi tōnounou iiki ʻa e kaungātuí pea ke tokangataha ki honau ngaahi ʻulungaanga leleí. (Mātiu 7:5; Semisi 1:19) Ko e ʻaloʻofa ʻa Sihová ʻokú ne ueʻi kitautolu ke tau fakahāhā ʻa e ʻofa mateakí, neongo ʻa e ʻi he malumalu ʻo e ngaahi tuʻunga faingataʻa lahi tahá. Ko hono moʻoní, ʻoku mātuʻaki manakoa ʻeni.—Palovepi 19:22.

13. ʻOku totonu ke fēfē ʻetau ngāue ke tapua atu ko Sihová ʻoku ‘fonu ʻi he moʻoní’?

¹³ Koeʻuhi ko ʻetau Tamai fakahēvaní ʻoku ‘fonu ʻi he moʻoní,’ ʻoku tau feinga ke ‘fakaogolelei atu kitautolu o tāu moe kau faifekau ae Otua i he lea oe mooní.’ (2 Kolinito 6:​3-7, PM) ʻI he lotolotonga ʻo e ngaahi meʻa ʻe fitu ʻoku fakaliliʻa ki ai ʻa Sihová ʻoku kau ai ʻa e “ʻelelo loi” mo e “fakamoʻoni kākā ʻoku hoʻaki loi.” (Palovepi 6:​16-19) Ko ia ko ʻetau holi ke fakahōifuaʻi ʻa e ʻOtuá kuó ne ueʻi kitautolu ke ‘tuku ʻa e loí kae lea moʻoni.’ (Efeso 4:25) ʻOfa ke ʻoua ʻaupito naʻa tau tō mei hono fakahāhā ʻa e anga-leleí ʻi he founga mātuʻaki mahuʻinga ko ʻení.

14. Ko e hā ʻoku totonu ai ke tau faʻa fakamolemolé?

¹⁴ Ko e fanongonongo ʻa e ʻOtuá kia Mōsesé ʻoku totonu ke ne toe ueʻi kitautolu ke tau hoko ai ʻo faʻa fakamolemole, he ko Sihová ʻoku mateuteu ke fakamolemole. (Mātiu 6:​14, 15) Ko hono moʻoní, ʻoku ʻomai moʻoni ʻe Sihova ʻa e tautea ki he kau faiangahala taʻefakatomalá. Ko ia ai, kuo pau ke tau pouaki ʻene ngaahi tuʻunga ʻo e anga-leleí ʻi he taimi ʻoku hoko mai ai ki hono tauhi maʻu ʻa e tuʻunga maʻa fakalaumālie ʻo e fakatahaʻangá.—Livitiko 5:1; 1 Kolinito 5:​11, 12; 1 Timote 5:22.

“Hanganaki Tokanga”

15, 16. ʻE malava fēfē ke tokoniʻi kitautolu ʻe he akonaki ʻa Paula ʻoku lēkooti ʻi he Efeso 5:​15-19 ke hokohoko atu ʻetau ngāueʻaki ʻa e anga-leleí?

¹⁵ Ke tuli ki ha ʻalunga ʻo e anga-leleí neongo ʻa e kovi ʻoku takatakai kiate kitautolú, ʻoku fiemaʻu ke fakafonu ʻaki kitautolu ʻa e laumālie ʻo e ʻOtuá pea tau tokanga ki he anga ʻo ʻetau laká. Fakatatau ki ai, naʻe enginaki ʻa Paula ki he kau Kalisitiane ʻi ʻEfesoó: “Mou hanganaki tokanga lahi ki he anga hoʻomou laká ke ʻoua te mou taʻefakapotopoto ai ka ke mou hoko ko e faʻahinga ʻoku fakapotopoto, ʻo fakatau mai ʻa e taimi faingamālié maʻamoutolu, koeʻuhi ʻoku kovi ʻa e ngaahi ʻahó. ʻI he meʻá ni ʻoua te mou hoko ʻo taʻefaituʻunga, kae hokohoko atu ʻi hono ʻiloʻi ʻa e finangalo ʻo Sihová. Pehē foki,  ʻoua ʻe hoko ʻo konā ʻi he uainé, ʻa ia ʻoku ʻi ai ʻa e anga-mousaʻa, kae hanganaki fakafonu ʻaki ʻa e laumālié, ʻo fealēleaʻaki ʻi he ngaahi sāmé mo e ngaahi fakahīkihiki ki he ʻOtuá pea mo e ngaahi hiva fakalaumālié, ʻo mou hiva fakataha mo e ngaahi fasi ʻi homou lotó kia Sihova.” (Efeso 5:​15-19, NW) ʻOku feʻungamālie moʻoni ʻa e akonaki ko ʻení kiate kitautolu ʻi he ngaahi ʻaho fakaʻosi faingataʻa ko ʻení.—2 Timote 3:1.

¹⁶ Ke tau hokohoko atu ʻi hono ngāueʻaki ʻa e anga-leleí, kuo pau ke tau hanganaki tokanga lahi ke tau laka ʻi he tuʻunga ko e faʻahinga ʻoku nau ngāueʻi ʻa e poto fakaʻotuá. (Semisi 3:17) Kuo pau ke tau fakaʻehiʻehi mei he ngaahi angahala mamafá pea kuo pau ke fakafonu ʻaki kitautolu ʻa e laumālie māʻoniʻoní, ʻo fakaʻatā kitautolu ke ne tataki. (Kaletia 5:​19-25) ʻI hono ngāueʻaki ʻa e fakahinohino fakalaumālie ʻoku ʻomai ʻi he ngaahi fakataha faka-Kalisitiané, ngaahi ʻasemipilií, mo e ngaahi fakataha-lahí, ʻe malava ai ke tau hanganaki fai ʻa e meʻa ʻoku leleí. Ko e ngaahi lea ʻa Paula ki he kau ʻEfesoó ʻokú ne toe fakamanatu mai nai kiate kitautolu ʻi he lahi taha ʻo ʻetau ngaahi fakatahataha ki he lotú, ʻoku tau maʻu ʻaonga mei heʻetau hiva ongoʻi loloto ʻa e “ngaahi hiva fakalaumālié”—ko e konga lahi ʻo kinautolu ʻoku fakahanga ki he ngaahi ʻulungaanga fakalaumālié, hangē ko e anga-leleí.

17. Kapau ʻoku taʻofi kinautolu ʻe honau ngaahi tuʻungá mei hono maʻu tuʻumaʻu ʻa e ngaahi fakatahá, ko e hā nai ʻe lava ke fakapapauʻi ʻe he kau Kalisitiane ʻoku puke lahí?

¹⁷ Fēfē hotau ngaahi kaungātui ko ia ʻoku ʻikai malava ke nau maʻu tuʻumaʻu ʻa e ngaahi fakataha faka-Kalisitiané koeʻuhi ko ha mahaki tauhi ʻoku puke lahi ai? ʻOku nau ongoʻi loto-mafesi nai koeʻuhi ko e ʻikai malava ke nau lotu maʻu pē kia Sihova ʻi he feohi fakahangatonu mo honau fanga tokoua mo e fanga tuofāfine fakalaumālié. Ka ʻe malava ke nau fakapapauʻi ʻoku mahino kia Sihova honau ngaahi tuʻungá, ʻe tauhi ai pē kinautolu ʻi he māmá, ʻe ʻoange kiate kinautolu hono laumālie māʻoniʻoní, pea te ne tokoniʻi kinautolu ke nau hanganaki fai ʻa e meʻa ʻoku leleí.—Aisea 57:15.

18. Ko e hā te ne tokoniʻi kitautolu ke tau tuli ki ha ʻalunga ʻo e anga-leleí?

¹⁸ Ko e tuli ki ha ʻalunga ʻo e anga-leleí ʻoku fiemaʻu ai ke tau maluʻi ʻetau ngaahi feohí pea fulituʻa mei he faʻahinga ko ia ʻoku “taʻeʻofa ki he [anga] lelei.” (2 Timote 3:​2-5; 1 Kolinito 15:33) Ko hono ngāueʻaki ʻa e akonaki ko iá ʻoku tokoniʻi ai kitautolu ke tau fakaʻehiʻehi mei hono “ʻai ke mamahi ʻa e Laumalie Maʻoniʻoni ko ia ʻo e ʻOtua” ʻaki ʻa e ngāue ʻo kehe ia mei heʻene ngaahi tatakí. (Efeso 4:30) ʻIkai ngata aí, ʻoku tokoniʻi kitautolu ke tau fai ʻa e meʻa ʻoku leleí kapau ʻoku tau fakatupu ha ngaahi haʻi vāofi mo e faʻahinga ʻa ia ko ʻenau moʻuí ʻokú ne ʻomai ʻa e fakamoʻoni ko e kau ʻofa kinautolu ki he anga-leleí pea ʻoku tataki kinautolu ʻe he laumālie māʻoniʻoni ʻo Sihová.—Emosi 5:15; Loma 8:14; Kaletia 5:18.

ʻOku ʻOmai ʻe he Anga-Leleí ʻa e Ngaahi Ola Lelei

19-21. Lave ki he ongo meʻa naʻe hokosia ʻoku hā ai ʻa e ola ʻo hono fakahāhā ʻa e ongoongo leleí.

¹⁹ Ko e ʻaʻeva ʻi he maama fakalaumālié, ko e ʻulutukua ki he tataki ʻa e laumālie ʻo e ʻOtuá, pea mo e tokanga ki he anga ʻo ʻetau laká te ne tokoniʻi kitautolu ke tau fakaʻehiʻehi mei he meʻa ʻoku koví pea ke “hanganaki fai lelei.” Ko hono olá, ʻe lava ke fakatupu mai ʻe he meʻá ni ha ngaahi ola lelei. Fakakaukau ange ki he meʻa naʻe hokosia ʻe Zongezile, ko e taha ʻo e Kau Fakamoʻoni ʻa Sihova ʻi ʻAfilika Tongá. ʻI heʻene fononga ki he akó ʻi he pongipongi ʻe taha, naʻá ne vakaiʻi ai ʻa e lahi ʻo ʻene kiʻi fakahū paʻanga ʻi he pangikeé. Ko e lauʻipepa mei he mīsini tela ʻotomētikí naʻe fakahaaʻi hala mai ai ha paʻanga hulu he meʻa totonú ko e R42,000 ($6,000, U.S.). Naʻe fakalotoʻi ia ʻe he tokotaha leʻo ʻi he pangikeé pea mo e niʻihi kehe ke ne toho ʻa e paʻangá pea fakahū ia maʻana ʻi ha pangikē ʻe taha. Ko e ongo meʻa Fakamoʻoni pē ʻa ia naʻá ne nofo aí naʻá na fakaongoongoleleiʻi ia ʻi he ʻikai te ne toho ha konga ʻo e paʻangá.

²⁰ ʻI he ʻaho ngāue hono hokó, naʻe līpooti ai ʻe Zongezile ʻa e fehālaakí ki he pangikeé. Naʻe ʻilo ai naʻá ne maʻu ʻe ia ha fika ʻakauni naʻe meimei tatau mo e fika ʻa ha tangata pisinisi tuʻumālie ʻa ia naʻá ne fakahū fehālaaki ʻa e paʻangá ʻi he ʻakauni halá. ʻI he fakatumutumu ʻi he ʻikai ke ngāueʻaki ʻe Zongezile ha konga ʻo e paʻanga ko ʻení, naʻe ʻeke ange ʻe he tangata pisinisí kiate ia: “Ko e hā ʻa e lotu ʻokú ke kau ki aí?” Naʻe fakamatala ange ʻa Zongezile ko e taha ia ʻo e Kau Fakamoʻoni ʻa Sihová. Naʻe fakaongoongoleleiʻi loto-māfana ia ʻe he kau ʻōfisa pangikeé, ʻa ia naʻa nau pehē: “ʻOku mau fakaʻamu ange naʻe faitotonu ʻa e kakai kotoa pē ʻo hangē ko e Kau Fakamoʻoni ʻa Sihová.” Ko e moʻoni, ko e ngaahi ngāue ʻo e faitotonú mo e anga-leleí ʻoku malava ke ne ʻai ʻa e niʻihi kehé ke nau fakalāngilangiʻi ʻa Sihova.—Hepelu 13:18.

²¹ ʻOku ʻikai pau ke ʻai ʻa e ngaahi ngāue ia ʻo e anga-leleí ke tuʻu-ki-muʻa koeʻuhi kae toki maʻu ha ola lelei. Ke fakatātaaʻi: Ko ha kiʻi Fakamoʻoni kei siʻi ʻa ia ʻoku ngāue ko ha tokotaha ʻevangeliō  taimi-kakato ʻi he taha ʻo e ʻotu motu ʻo Haʻamoá naʻe pau ke ne ʻalu ki he falemahaki fakalotofonuá. Naʻe tatali ai ʻa e kakaí ke sio ki he toketaá, pea naʻe fakatokangaʻi ʻe he tokotaha Fakamoʻoní ko e fineʻeiki vaivai naʻe hoko mai ki aí naʻe fuʻu puke lahi. Naʻá ne fokotuʻutuʻu ke ʻalu ʻa e fineʻeikí ia ʻi he taimi ʻoʻoná koeʻuhi ke vave ange hono fai ha tokanga fakafaitoʻo kiate ia. ʻI ha taimi ki mui ai, naʻe fetaulaki ai ʻa e tokotaha Fakamoʻoní mo e fineʻeiki vaivaí ni ʻi he māketí. Naʻá ne manatuʻi ia pea mo ʻene ngāue lelei ʻi he falemahakí. “Kuó u ʻilo eni he taimí ni ʻoku ʻofa moʻoni ʻa e Kau Fakamoʻoni ʻa Sihová ʻi honau kaungāʻapí,” ko ʻene leá ia. Neongo naʻá ne taʻetali ki muʻa ʻa e pōpoaki ʻo e Puleʻangá, ko e anga-lelei naʻe fakahaaʻi kiate ia ʻe he tokotaha Fakamoʻoní naʻe maʻu ai ha ola lelei. Naʻá ne tali ʻa hono tuʻuaki ange ha ako Tohitapu pea kamata ke ne maʻu ʻa e ʻilo ʻo e Folofola ʻa e ʻOtuá.

22. Ko e hā ʻa e founga ʻe taha ʻoku mahuʻinga tautefito ki he “hanganaki failelei”?

²² ʻI he tuʻunga meimei tatau ʻaupito, ʻe lava ke ke lave ai ki ha ngaahi meʻa naʻe hokosia ʻoku fakahaaʻi ai ʻa e mahuʻinga ʻo hono fakahāhā ʻo e anga-leleí. Ko e founga ʻe taha ʻoku mahuʻinga tautefito ki he “hanganaki failelei” ko e kau maʻu pē ki hono fanongonongo ʻa e ongoongo lelei ʻo e Puleʻanga ʻo e ʻOtuá. (Mātiu 24:14) ʻOfa ke tau hanganaki kau faivelenga ʻi he monū ko ʻeni ʻo e ngāué, ʻi hono ʻiloʻi ko e founga ʻeni ʻe taha ke failelei aí, tautefito ki he faʻahinga ʻoku nau tali leleí. Ko e meʻa ʻoku mahuʻinga lahi tahá, ko hono hanga ʻe heʻetau ngāue fakafaifekaú mo e ʻulungaanga leleí ʻo fakalāngilangiʻi ʻa Sihova, ko e matavai tefito ʻo e anga-leleí.—Mātiu 19:​16, 17.

Hokohoko Atu ke “Ngāue ki he Meʻa ʻOku Leleí”

23. Ko e hā ko ha ngāue lelei ai ʻa e ngāue fakafaifekau faka-Kalisitiané?

²³ ʻOku ʻikai toe fehuʻia ko ʻetau ngāue fakafaifekaú ko ha ngāue lelei. ʻOku malava ke iku atu ia ki he fakamoʻui kiate kitautolu pea ki he faʻahinga ko ia ʻoku fanongo ki he pōpoaki ʻa e Tohitapú pea ʻalu atu ai ʻi he hala ʻoku taki atu ki he moʻui taʻengatá. (Mātiu 7:​13, 14; 1 Timote 4:16) ʻI he taimi leva ʻoku tau fehangahangai ai mo ha ngaahi fili ke fai, ngalingali ʻe ʻai nai kitautolu ʻe he holi ke fai ʻa e meʻa ʻoku leleí ke tau ʻeke hifo kiate kitautolu: ‘ʻE uesia fēfē ʻe he fili ko ʻení ʻeku ngāue fakamalanga ʻo e Puleʻangá? ʻOku fakapotopoto moʻoni ʻa e ʻalunga ʻoku ou fakakaukau ki aí? Te ne tokoniʻi au ke u tokoni ki he niʻihi kehé ke nau tali ʻa e “ogoogolelei taegata” pea hoko ai ʻo ʻi ha vahaʻangatae vāofi mo Sihova ko e ʻOtuá?’ (Fakahā 14:​6, PM) ʻE tupu ha fiefia lahi mei ha fili ʻoku fai ʻokú ne poupouʻi ʻa e ngaahi meʻa mahuʻinga ʻo e Puleʻangá.—Mātiu 6:33; Ngāue 20:35.

24, 25. Ko e hā ʻa e ngaahi founga ʻe niʻihi ke failelei ai ʻi he fakatahaʻangá, pea ko e hā ʻoku malava ke tau fakapapauʻí kapau ʻoku tau hanganaki fakahāhā ʻa e anga-leleí?

²⁴ ʻAi ke ʻoua ʻaupito naʻa tau fakasiʻisiʻi ʻa e ngaahi ola ʻaonga ʻo e anga-leleí. ʻE malava ke tau hanganaki fakahāhā ʻa e ʻulungaanga ko ʻení ʻaki hono poupouʻi ʻa e fakatahaʻanga Kalisitiané pea mo hono fai ʻa e meʻa te tau malavá ke tokangaʻi ai ʻa ʻene ngaahi meʻa mahuʻingá mo hono tuʻunga leleí. Ko hono moʻoní, ʻoku tau failelei ʻi heʻetau maʻu maʻu pē mo kau ki he ngaahi fakataha faka-Kalisitiané. Ko ʻetau ʻi aí tonu ʻoku fakalototoʻaʻi ai ʻa e kaungālotú, pea ko ʻetau ngaahi tali kuo teuteuʻi leleí ʻoku langa hake fakalaumālie ai kinautolu. ʻOku tau toe failelei ʻi heʻetau ngāueʻaki ʻetau ngaahi koloá ke tauhi maʻu ʻaki ʻa e Fale Fakatahaʻangá pea ʻi he taimi ʻoku tau tokoni ai ki hono tokangaʻi iá. (2 Tuʻi 22:​3-7; 2 Kolinito 9:​6, 7) Ko hono moʻoní, “lolotonga leva ʻoku tau maʻu ʻa e taimi lelei ki aí, tau ngāue ki he meʻa ʻoku leleí ki he kakai kotoa pē, kae tautefito ki he faʻahinga ko ia ʻoku felāveʻi mo kitautolu ʻi he tuí.”—Kaletia 6:​10, NW.

²⁵ ʻOku ʻikai malava ke tau tomuʻa fakakaukau atu ki he tuʻunga kotoa pē ʻe fiemaʻu ai ha fakahāhaaʻi ʻo e anga-leleí. ʻI heʻetau fehangahangai leva mo ha ngaahi pole foʻou, tau kumi ki ha fakamaama mei he ngaahi Konga Tohitapú, lotu ʻo kole ʻa e laumālie māʻoniʻoni ʻo Sihová, pea fai hotau lelei tahá ke fakahoko hono finangalo lelei mo haohaoá. (Loma 2:​9, 10; 12:2) ʻOku malava ke tau loto-maʻu ʻe tāpuakiʻi kitautolu ʻe Sihova ʻo lahi fau ʻi heʻetau hanganaki fakahāhā ʻa e anga-leleí.

ʻE Anga-Fēfē Haʻo Tali?

• ʻE malava fēfē ke tau fakahoko ʻa e meʻa lelei lahi tahá?

• Ko e hā ʻoku ui ai ʻa e anga-leleí ko ha ‘fua ʻo e māmá’?

• Ko e hā ʻoku ui ai ʻa e anga-leleí ko ha ‘fua ʻo e laumālié’?

• Ko e hā ʻa e ola ʻo ʻetau ʻulungaanga leleí?

[Fehuʻi ki he Ako]

[Fakatātā ʻi he peesi 17]

ʻOku hanga ʻe he Folofola ʻa e ʻOtuá mo hono laumālie māʻoniʻoní ʻo tokoniʻi kitautolu ke fakahāhā ʻa e anga-leleí

[Fakatātā ʻi he peesi 18]

Ko e fakahāhā ʻo e anga-leleí ʻoku ʻomai ai ha ngaahi ola lelei