ʻOku Mahuʻinga Fēfē ʻa e Maʻá?

ʻOKU ʻuhinga kehekehe ʻa e maʻá ki he kakai kehekehe. Hangē ko ení, ʻi hono tala ki ha kiʻi tamasiʻi ʻe heʻene faʻeé ke fufulu hono nimá mo e matá, te ne fakakaukau nai ʻoku ʻosi feʻunga pē ʻa hono pukepuke hono louhiʻi nimá ʻi ha lalo paipa ʻoku lele mo hono fakaviviku hono loungutú. Ka ʻoku lelei ange ʻa e ʻilo ʻa e faʻeé. ʻOkú ne fakafoki ia ki he fale kaukaú ʻo fufulu hono nimá mo e matá ʻaki ha koa mo ha vai—neongo ʻa e longoaʻa ʻene taʻeloto ki aí!

ʻOku moʻoni, ko e ngaahi tuʻunga ki he maʻá ʻoku ʻikai ke tatau ia takatakai ʻi he māmaní, pea ʻoku tupu hake ʻa e kakaí mo e ngaahi fakakaukau kehekehe ki he maʻá. ʻI he ngaahi taimi ʻo e kuohilí, ko ha ʻātakai maʻa mo maau ʻo ha ʻapiako ʻi he ngaahi fonua ʻe niʻihi naʻe tokoni ia ki he fānau akó ke nau fakatupulekina ha ngaahi tōʻonga lelei ki he maʻá. ʻI he ʻahó ni, ko e ʻēlia ʻo e ngaahi ʻapiako ʻe niʻihi ʻoku fonu ʻaupito ia ʻi he vevé mo e toetoenga vevé ʻo nau hangē ai ha lingiʻanga vevé kae ʻikai ko ha feituʻu ke vaʻinga pe fakamālohisino ai. Pea fēfē ʻa e loki akó? Ko Darren, ko ha leʻo ia ʻi ha akoʻanga māʻolunga ʻi ʻAositelēlia naʻá ne pehē: “Ko e fuʻu fakaveve lahi ko ení kuo fakaʻau ke kovi ange. Ko eni kuo mau sio foki ki he ʻulí ʻi he loki akó.” ʻOku vakai ʻa e fānau ako ʻe niʻihi ki he fakahinohino, “Toʻo ia ki ʻolunga” pe “Fakamaʻa iá” ʻoku ʻuhinga ia ko hono tauteaʻi kinautolu. Ko e palopalemá he ʻoku ngāueʻaki ʻe he kau faiako ʻe niʻihi ʻa e fakamaʻá ko ha ngaahi founga ia ki he tauteá.

ʻI he tafaʻaki ʻe tahá, ʻoku ʻikai hoko maʻu pē ʻa e kakai lalahí ko ha faʻifaʻitakiʻanga lelei ʻo e maʻá, ʻo tatau pē ʻi he moʻui fakaʻahó pe ʻi he māmani pisinisí. Ko e fakatātaá, ko e ngaahi feituʻu fakapuleʻanga lahi ʻoku tuku taʻetokangaʻi pē mo palakū. ʻOku ʻuliʻi ʻe he ngaahi ngāueʻanga ʻe niʻihi ʻa e ʻātakaí. Kae kehe, ko e ʻulí ʻoku ʻikai fakatupunga ia ʻe he ngaahi ngāueʻanga mo e ngaahi pisinisi taʻemoʻuí, ko e kakaí. Lolotonga ʻoku hoko nai ʻa e mānumanú ko e tupuʻanga tefito ia ʻo e palopalema fakaemāmani lahi ki he ʻulí pea mo hono ngaahi ola koví, ko e konga ʻo e palopalemá ko e ola ia ʻo e ngaahi tōʻonga taʻemaʻa fakafoʻituituí. Ko ha talēkita pule ki muʻa ʻo e Komoniueli ʻo ʻAositelēliá naʻá ne taukapoʻi ʻa e fakamulituku ko ení ʻi heʻene pehē: “Ko e ngaahi ʻīsiu kotoa pē ʻi he moʻuilelei ʻa e kakaí ʻoku fakamāʻopoʻopo ia ki hano tokangaʻi ʻo e maʻá ʻe he tokotaha tāutaha kotoa pē.”

Neongo ia, ʻoku ongoʻi ʻe he niʻihi ko e maʻá ko ha meʻa fakafoʻituitui ia pea ʻoku ʻikai totonu ke ʻi ai haʻane kaunga ki ha tokotaha kehe. Ko e tuʻungá moʻoni ia?

ʻOku mātuʻaki mahuʻinga ʻaupito ʻa e maʻá ʻi heʻene hoko mai ki heʻetau meʻakaí—pe ʻoku tau fakatau mai ia ʻi ha māketi, kai ia  ʻi ha falekai pe maʻu meʻatokoni ʻi ha ʻapi ʻo ha kaumeʻa. Ko ha tuʻunga māʻolunga ʻo e maʻá ʻoku ʻamanekina ia mei he faʻahinga ʻoku nau tokangaʻi pe ʻomai ʻa e meʻakai ʻoku tau kaí. Ko e nima ʻuli—ʻonautolu pe ʻotautolú—ʻe malava ke hoko ia ko e tupuʻanga ʻo e ngaahi puke lahi. Fēfē ʻa e ngaahi falemahakí—laka hake ʻi ha toe feituʻu pē, ko e feituʻu eni ʻoku tau ʻamanekina mei ai ʻa e maʻá? Naʻe līpooti ʻe he The New England Journal of Medicine ko e nima taʻefanofano ʻo e kau toketaá mo e kau nēsí ʻe tokoni nai ia ki hono fakamatalaʻi ʻa e ʻuhinga ʻoku maʻu ai ʻe he kau mahaki ʻi he falemahakí ʻa e ngaahi mahaki pipihi ʻa ia ʻoku aʻu ki he paʻanga ʻAmelika ʻe hongofulu pilioná ʻi he taʻu ʻa hono totongi ke faitoʻó. ʻOku tau ʻamanekina totonu ʻe ʻikai ha taha te ne fakatupunga ha tuʻunga fakatuʻutāmaki ki heʻetau moʻuileleí ʻaki ʻene ngaahi tōʻonga taʻemaʻá.

ʻOku toe hoko foki ko ha meʻa mafatukituki ʻa hono ʻuliʻi ʻe ha taha—fakakaukauʻi pe taʻefakakaukauʻi—ʻa ʻetau ngaahi maʻuʻanga vaí. Pea ʻoku malu fēfē ke luelue laʻivaʻe ʻi ha matātahi ʻa ē ʻoku sio nai ai ha taha ki ha ʻotu meʻa-huhu ʻosi ngāueʻaki kuo laku ai ʻe he kau maʻu faitoʻo kona tapú pea mo e niʻihi kehé? Mahalo ko e fehuʻi ʻoku mahuʻinga fakafoʻituitui angé: ʻOku tōʻongaʻaki ʻa e maʻá ʻi hotau ʻapí tonu?

Ko Suellen Hoy, ʻi heʻene tohi ko e Chasing Dirt, ʻokú ne ʻeke: “ʻOku tau ʻi he tuʻunga maʻa ne tau ʻi aí?” ʻOkú ne tali: “Mahalo pē ʻikai.” ʻOkú ne lave ki he liliu ʻa e ngaahi tuʻunga mahuʻinga fakasōsialé ko e ʻuhinga tefitó ia. ʻI he fakaʻau ke siʻi ange ʻa e taimi ʻoku fakamoleki ʻe he kakaí ʻi ʻapí, ʻoku nau totongi leva ai ha taha kehe ke ne fai ʻa e fakamaʻá maʻa kinautolu. Ko hono olá, ko e tauhi ʻo ha ʻātakai maʻá ʻoku ʻikai kei hoko ia ko ha meʻa mahuʻinga fakafoʻituitui. “ʻOku ʻikai te u fufulu ʻa e saoá—ko au ʻoku ou fufulú,” ko e lau ia ʻa ha tangata ʻe taha. “Kehe pē ʻoku ou maʻa au, neongo ʻoku ʻuli hoku ʻapí.”

Kae kehe, ko e maʻá ʻoku ʻikai ko e fōtunga hā mai pē ki tuʻá. Ko ha tefitoʻi moʻoni fakalūkufua ia ʻo e moʻuileleí. Ko ha tuʻunga foki ia ʻo e ʻatamaí mo e lotó ʻa ia ʻoku kau ai hotau ʻulungāngá mo e lotú. Tau sio angé ki he founga ʻoku pehē ai ení.