Ko ha Kolo ʻOku Tuʻu ʻi ha Moʻunga

“KO E māma o mamani akimoutolu. Koe kolo oku tuu i ha mouga, oku ikai faa fakabuli ia,” ko e tala ange ia ʻe Sīsū ki heʻene kau ākongá ʻi heʻene Malanga ʻiloa he Moʻungá.—Mātiu 5:​14, PM.

Ko e ngaahi kolo lahi ʻi Siutea mo Kāleli naʻe tuʻu ia ʻi he ngaahi moʻungá kae ʻikai ʻi he ngaahi teleʻa ʻi laló. Ko e ʻuhinga tefito ki hono fili ʻa e ngaahi tuʻuʻanga māʻolunga ʻi he funga moʻungá ko e maluʻangá. Tuku kehe ʻa e ngaahi kau tau fakatūʻutá, naʻe faʻa haveki ʻe he kau kumi koloa veté ʻa e ngaahi nofoʻanga ʻIsilelí. (2 Tuʻi 5:2; 24:2) Naʻe faingofua lahi ange ki he kau tangataʻifonua toʻá ke nau maluʻi ha ngaahi fale fepikipikiʻi tuʻu fakapupupupu ʻi ha funga moʻunga ʻi ha kolo māʻulalo tokalelei, ʻa ia ʻoku fiemaʻu ki ai ha fuʻu ʻā lahi ange ki ha maluʻanga.

Koeʻuhi ko e holisi ʻo e ngaahi fale faka-Siú naʻe faʻa palasitā ʻaki ʻa e lahé, ko ha foʻi pupunga kakato ʻo e ngaahi fale lanu hinehina ko eni naʻe tuʻu fakataha ʻi ha funga moʻungá naʻe lava ke faingofua ʻa e sio ki aí ʻi he laui maile takatakai. (Ngāue 23:3) ʻI he ngingila ʻa e ulo ʻa e laʻā ʻi Pālesitainé, naʻe ulo ai ʻa e fanga kiʻi kolo tuʻu moʻunga ko ení ʻo hangē ha maama fakaʻilongá, hangē tofu pē ko e kei pehē ʻi hotau ʻahó ni ʻa e fanga kiʻi kolo Metiteleniane meimei tatau.

Naʻe ngāueʻaki ʻe Sīsū ʻa e tafaʻaki mataʻāʻā ko eni ʻo e tafa fonua Kāleli mo Siuteá ke akoʻi ki hono kau muimuí ʻa e ngafa ʻo ha Kalisitiane moʻoni. “Pehē foki, ke ulo atu hoʻomou māma ke hā ki he kakai,” ko ʻene tala ange ia kiate kinautolú, “ke nau mamata ki hoʻomou ngāhi ngaue lelei, pea fakamāloʻia ʻa hoʻomou Tamai ʻoku ʻi Hevani.” (Mātiu 5:16) Lolotonga ʻoku ʻikai ke fakahoko ʻe he kau Kalisitiané ʻa e ngaahi ngāue leleí ke fakahīkihikiʻi ai ʻe he tangatá, ko honau ʻulungaanga leleí ʻoku ʻikai ke taʻefakatokangaʻi ia.​—Mātiu 6:1.

Ko e ʻulungaanga lelei peheé ʻoku fakatokangaʻi ia tautefito ʻi he lolotonga ʻa e ngaahi fakataha-lahi fakavahe ʻa e Kau Fakamoʻoni ʻa Sihová. Ko e nusipepa ʻe taha ʻi Sipeini, ʻi heʻene lave ki ha fakataha-lahi ki muí ni, naʻe pehē ai: “Lolotonga ʻoku tamatemate atu ʻa e mahuʻingaʻia ʻi he ngaahi kaveinga fakalotú ʻi he ngaahi kautaha lotu kehé, ʻoku ʻikai ko e tuʻunga eni ia ʻi he Kau Fakamoʻoni ʻa Sihová. Koeʻuhi ʻoku ʻikai te nau loto ke mole ʻa e ʻaonga ʻo e Tohitapú, ʻoku nau ngāueʻaki ʻa e Folofola ʻa e ʻOtuá.”

Ko Thomas, ʻa e tauhi ʻo ha sitētiume ʻi he tokelau-hihifo ʻo Sipeiní ʻa ia naʻe faʻa ngāueʻaki maʻu pē ʻe he Kau Fakamoʻoní, naʻá ne fiefia ʻi heʻene nofo mo ha kakai ʻa ia ʻoku nau ngāueʻaki ʻa e Folofola ʻa e ʻOtuá. Naʻá ne toloiʻi ʻa ʻene mālōloó ʻi ha ngaahi uike koeʻuhi kae lava ke ne kau ʻi ha fakataha-lahi fakavahe ʻa e Kau Fakamoʻoni ʻa Sihová. ʻI he taimi naʻe fakaofiofi atu ai kiate ia ʻa e kau fakafofonga tokolahi, ʻo kau ai ʻa e fānau īkí, ʻi he hili ʻa e fakataha-lahí ke fakamālō kiate ia ʻi heʻene ngāue fāitaha mo kinautolu ʻi he lolotonga ʻa e ngaahi taʻu kuo maliu atú pea ke talamonū kiate ia ke ne maʻu ha taimi mālōlō leleí, naʻá ne fakatōloʻimata. “Ko e hoko ʻo ʻiloʻi ʻa e kakai ko kimoutolú ko e taha ia ʻo e ngaahi meʻa lelei taha kuo hokosia ʻi heʻeku moʻuí,” ko ʻene leá ia.

Ko ha kolo ʻi ha moʻunga ʻokú ne maʻu ʻa e tokanga ʻa ha tokotaha mamata koeʻuhi he ʻoku tuʻu ia ʻo maeʻeeʻa ʻi he tafatafaʻaki langí pea koeʻuhi ko ha ngaahi fale hinehina pē ai ʻokú ne tapua mai ʻa e maama ʻo e laʻaá. ʻI he founga tatau, ʻoku tuʻu maeʻeeʻa ʻa e kau Kalisitiane moʻoní ʻo kehe koeʻuhi ʻoku nau feinga ke muimui ʻi he ngaahi tuʻunga Fakatohitapu māʻolunga ʻo e faitotonú, ʻulungaanga tāú mo e manavaʻofá.

Tānaki atu ki ai, ʻoku tapua atu ʻe he kau Kalisitiané ʻa e maama ʻo e moʻoní fakafou ʻi heʻenau ngāue fakamalangá. Naʻe pehē ʻe he ʻapositolo ko Paulá fekauʻaki mo e kau Kalisitiane ʻo e ʻuluaki senitulí: “Koia i he e tau maʻu ae gaue ni, bea i he e tau maʻu ae ofa, oku ikai ai te mau vaivai . . . ka i he fakaha atu ae mooni, oku mau fakaogolelei atu akimautolu ki he loto [“konisēnisi,” NW] oe tagata  taki taha kotoabe, i he ao oe Otua.” (2 Kolinito 4:​1, 2, PM) Neongo naʻá nau fetaulaki mo e fakafepaki ʻi he feituʻu kotoa pē naʻa nau malanga aí, naʻe tāpuakiʻi ʻe Sihova ʻenau ngāue fakafaifekaú, ko ia ai, ʻi he taʻu 60 T.S. nai, naʻe lava ke tohi ai ʻa Paula ʻo pehē naʻe malangaʻi ʻa e ongoongo leleí “ki he meʻa moʻui kotoa pe ʻi he lalo langi.”—Kolose 1:23.

ʻI he ʻahó ni, ʻoku toe fai fakamātoato ʻe he Kau Fakamoʻoni ʻa Sihová ʻa honau fatongiá ke ‘ulo atu ʻenau māmá ke hā ki he kakaí,’ ʻo hangē ko ia naʻe fekauʻi ʻe Sīsuú. ʻI he lea ʻo e ngutú pea ʻi he fakamatala kuo pulusí, ʻoku fakamafola atu ai ʻe he Kau Fakamoʻoni ʻa Sihová ʻa e ongoongo lelei ʻo e Puleʻangá ʻi he fonua ʻe 235 takatakai ʻi he māmaní. Ke lava ʻo aʻu nai ʻa e maama ʻo e moʻoni faka-Tohitapú ki he kakai tokolahi taha ʻe ala lavá, kuo nau ʻai ʻenau ngaahi tohi faka-Tohitapú ke ala maʻu ia ʻi he ngaahi lea nai ʻe 370.​—Mātiu 24:14; Fakahā 14:​6, 7.

ʻI he ngaahi feituʻu lahi, kuo fua ai ʻe he Kau Fakamoʻoní ʻa e pole ko hono ako ʻa e ngaahi lea ʻa e kakai ʻa ia kuo nau hiki mai mei he ngaahi fonua ko ē ʻoku taʻofi, pe kuo fakangatangata ai ʻa e ngāue fakamalangá. Ko e fakatātaá, ʻi ha ngaahi kolo lalahi ange ʻi ʻAmelika Tokelau, kuo ʻi ai ha fuʻu ʻaukolo mai ʻa e kakai mei Siaina mo Lūsia. Kuo feinga ʻa e Kau Fakamoʻoni fakalotofonuá ke ako ʻa e lea faka-Siainá, faka-Lūsiá pea mo e ngaahi lea kehe koeʻuhi ke malangaʻi ʻa e ongoongo leleí ki he kau haʻu foʻoú. Ko hono moʻoní, ʻoku lolotonga fai ha ngaahi koosi fakalakalaka ʻi ha ngaahi lea lahi koeʻuhi ke lava nai ai ʻo malangaʻi ʻa e ongoongo leleí ki ha toe niʻihi kehe lolotonga ko e ngoué ʻoku “fisi hina ia ki he ututaʻu.”—Sione 4:35.

Ko e palōfita ko ʻAiseá naʻá ne tomuʻa tala: “ʻE hoko ʻo pehe ʻi he kuonga ʻamui, ʻe fokotuʻu ʻa e moʻunga ʻo e fale ʻo Sihova ko e ʻulu ʻo e ngaahi moʻunga, pea ʻe mahiki hake ʻi he ngaahi foʻi maʻolunga; pea ʻe tafe ki ai ʻa e ngaahi kakai kotoa pe.” Fakatouʻosi ʻi honau ʻulungāngá pea ʻi heʻenau ngāue fakafaifekaú, ʻoku tokoniʻi ai ʻe he Kau Fakamoʻoni ʻa Sihová ʻa e kakai ʻi he feituʻu kotoa pē ke nau haʻu ki he “moʻunga ʻo e fale ʻo Sihova” ke fakahinohinoʻi ai kinautolu ʻo fekauʻaki mo e ngaahi founga ʻa e ʻOtuá pea ke ako ke ʻaʻeva ʻi he hala ʻo e ʻOtuá. (Aisea 2:​2, 3) Ko e ola fakafiefiá, hangē ko ia naʻe fakahaaʻi ʻe Sīsuú, ʻoku nau ‘fakamāloʻia [fakataha ai] ʻa ʻenau Tamai fakahēvaní,’ ʻa Sihova ko e ʻOtuá.​—Mātiu 5:​16; 1 Pita 2:​12.