Kuo Mou Maʻu ʻa e “Laumālie ʻo e Moʻoni”?
Kuo Mou Maʻu ʻa e “Laumālie ʻo e Moʻoni”?
“[Ko e] Tamai . . . te ne foaki kiate kimoutolu ha Taukapo [“tokoni,” NW] ʻe toko taha, koeʻuhi ke ne ʻiate kimoutolu ʻo taʻengata; ʻio, ko e Laumālie ʻo e Moʻoni.”—SIONE 14:16.
1. Ko e hā ʻa e fakamatala mahuʻinga naʻe ʻoange ʻe Sīsū ki heʻene kau ākongá ʻi he lolotonga ʻa hono ngaahi houa fakaʻosi mo kinautolu ʻi he loki ʻi ʻolungá?
“ʻEIKI, ko hoʻo meʻa ki fe?” Ko e taha ia ʻo e ngaahi fehuʻi naʻe ʻeke ʻe he kau ʻapositolo ʻa Sīsuú kiate ia ʻi he lolotonga ʻo e ngaahi houa fakaʻosi naʻá ne nofo ai mo kinautolu ʻi ha loki ʻi ʻolunga ʻi Selusalemá. (Sione 13:36) ʻI he faai atu ʻa e fakatahá, naʻe fakahā ange ʻe Sīsū kiate kinautolu kuo hoko mai ʻa e taimi ke ne mavahe ai meiate kinautolu ke foki ki heʻene Tamaí. (Sione 14:28; 16:28) Heʻikai te ne kei ʻiate kinautolu ai pē ʻi he sino ke fakahinohinoʻi kinautolu mo tali ʻenau ngaahi fehuʻí. Kae kehe, naʻá ne fakapapauʻi kiate kinautolu ʻo pehē: “Te u tala ki he Tamai, pea te ne foaki kiate kimoutolu ha Taukapo [“tokoni,” NW] ʻe toko taha, koeʻuhi ke ne ʻiate kimoutolu ʻo taʻengata.”—Sione 14:16.
2. Ko e hā naʻe talaʻofa ʻe Sīsū ke ʻohifo ki he kau ākongá ʻi he hili ʻo ʻene ʻalú?
2 Naʻe fakahā fakapapauʻi ʻe Sīsū ʻa e tokoni ko iá pea fakamatalaʻi ʻa e founga te ne tokoniʻi ai ʻene kau ākongá. Naʻá ne tala kiate kinautolu: “Ka naʻe ʻikai te u tala atu ʻa e ngaahi meʻa ko ia mei he kamataʻanga, koeʻuhi naʻa ku ʻiate kimoutolu. Ka ko eni ʻoku ou ʻalu atu kiate ia naʻa ne fekau mai au . . . Ko hono lelei kiate kimoutolu ʻa e hiki aʻaku: pea kapau ʻe ʻikai te u hiki, pea ʻe ʻikai haʻu ʻa e Taukapo [“tokoni,” NW] kiate kimoutolu; ka ʻo kapau te u ʻalu, te u fekau ia kiate kimoutolu. . . . ʻOka hoko mai ʻa e Toko Taha ko ia, ʻa e Laumālie ʻo e Moʻoni, te ne tataki kimoutolu ki he moʻoni, hono kotoa.”—Sione 16:4, 5, 7, 13.
3. (a) Ko fē ʻa e taimi naʻe ʻohifo ai ʻa e “Laumālie ʻo e Moʻoni” ki he muʻaki kau Kalisitiané? (e) Ko e hā ʻa e founga mahuʻinga ʻe taha naʻe hoko ai ʻa e laumālié ko ha “tokoni” kiate kinautolú?
3 Naʻe fakahoko ʻa e talaʻofa ko ʻení ʻi he Penitekosi 33 T.S., ʻi he fakamoʻoni ki ai ʻa e ʻapositolo ko Pitá: “Bea koe Jisu ni kuo fokotuu e he Otua, bea koe kau fakamooni ki ai akimautolu kotoabe. Koia, i hono hakeakiʻi e he nima toomatau oe Otua, bea i he ene maʻu mei he Tamai ae talaofa oe Laumalie Maonioni, kuo ne huai hifo eni, aia oku mou mamata mo fanogo ki ai ni.” (Ngāue 2:32, 33, PM) Hangē ko ia te tau vakai ki ai ʻamuí, naʻe fakahoko ʻa e ngaahi meʻa lahi maʻá e muʻaki kau Kalisitiané ʻi he huaʻi hifo ʻo e laumālie māʻoniʻoní ʻi he Penitekosí. Ka naʻe talaʻofa ʻa Sīsū ʻo pehē ko e “Laumālie ʻo e Moʻoni” te ne ‘fakamanatu kiate kinautolu ʻa e meʻa kotoa pē kuó ne lea ʻaki kiate kinautolú.’ (Sione 14:26) Te ne fakaivia kinautolu ke nau manatuʻi ʻa e ngāue fakafaifekau mo e ngaahi akonaki ʻa Sīsuú, naʻa mo ʻene ngaahi leá tonu pea mo e tohi ʻo e ngaahi meʻá ni. ʻE mātuʻaki tokoni ʻa e meʻá ni ki he ʻapositolo taʻumotuʻa ko Sioné ʻi he ngataʻanga ʻo e ʻuluaki senituli T.S., ʻi heʻene kamata ke tohi ʻa ʻene Kōsipelí. ʻOku kau ʻi he fakamatala ko iá ʻa e akonaki mahuʻinga naʻe fai ʻe Sīsū ʻi he taimi naʻá ne fokotuʻu ai ʻa e Fakamanatu ʻo ʻene pekiá.—Sione, vahe 13-17.
4. Naʻe anga-fēfē ʻa e tokoni ʻa e “Laumālie ʻo e Moʻoni” ki he muʻaki kau Kalisitiane paní?
4 Naʻe toe talaʻofa ʻa Sīsū ki he muʻaki kau ākonga ko iá ʻe hanga ʻe he laumālié ʻo ‘akoʻi kiate kinautolu ʻa e meʻa kotoa pē’ mo ‘tataki kinautolu ki he moʻoní, hono kotoa.’ ʻE tokoniʻi kinautolu ʻe he laumālié ke nau mahinoʻi ʻa e ngaahi meʻa loloto ange ʻo e ngaahi Konga Tohitapú pea tauhi maʻu ʻenau fāʻūtaha ʻi he fakakaukaú, mahinó mo e taumuʻá. (1 Kolinito 2:10; Efeso 4:3) Naʻe fakaivia ai ʻe he laumālie māʻoniʻoní ʻa e muʻaki kau Kalisitiane ko iá ke nau ngāue ko ha “tamaioeiki agatonu mo boto” fakatahataha ke tokonaki ai ki he kau Kalisitiane pani tāutaha ʻa e “mea kai [fakalaumālie] i hono taimi totonu.”—Mātiu 24:45, PM.
Fakamoʻoni ʻa e Laumālié
5. (a) Ko e hā ʻa e fakahā foʻou naʻe fakahaaʻi ʻe Sīsū ki heʻene kau ākongá ʻi he poʻuli hifo ʻo Nīsani 14, 33 T.S.? (e) Ko e hā ʻa e ngafa ʻe fai ʻe he laumālie māʻoniʻoní ʻi hono fakahoko ʻa e talaʻofa ʻa Sīsuú?
5 ʻI he poʻuli hifo ʻo Nīsani 14, 33 T.S., naʻe fakahā ange ai ʻe Sīsū ki heʻene kau ākongá te ne talitali kinautolu ʻamui pea nofo mo ia mo ʻene Tamaí ʻi hēvani. Naʻá ne tala kiate kinautolu: “ʻI he ʻapi o ʻeku Tamai ʻoku lahi ʻa e ngaahi nofoʻanga: ka ne ʻikai, pehē kuo u tala kiate kimoutolu, he ko ʻeku ʻalu ʻeni ke teuteu ha potu moʻomoutolu. Pea neongo te u ʻalu ʻo teuteu ha potu moʻomoutolu, ka ʻoku ou toe haʻu pe, pea te u maʻu kimoutolu kiate au; koeʻuhi ko e potu ʻoku ou ʻi ai, ke mou ʻi ai foki.” (Sione 13:36; 14:2, 3) Te nau pule fakataha mo ia ʻi hono Puleʻangá. (Luke 22:28-30) Ke nau maʻu ʻa e ʻamanaki fakahēvani ko ʻení, naʻe pau ke nau hoko ʻo “fanauʻi mei he Laumālie” ko e ngaahi foha fakalaumālie ʻo e ʻOtuá pea hoko ʻo pani ke ngāue ko e ngaahi tuʻi mo e kau taulaʻeiki fakataha mo Kalaisi ʻi hēvani.—Sione 3:5-8; 2 Kolinito 1:21, 22; Taitusi 3:5-7; 1 Pita 1:3, 4; Fakahā 20:6.
6. (a) Naʻe kamata ʻanefē ʻa e ui fakahēvaní, pea ko e toko fiha ʻoku nau maʻu ʻa e ui ko ʻení? (e) Naʻe papitaiso ki he hā ʻa e faʻahinga naʻe ui ko iá?
6 Ko e “ui mei langi” ko ʻení naʻe kamata ia ʻi he Penitekosi 33 T.S., pea ʻi hono tefitó, ʻoku hā ne ngata ia ʻi he lotolotonga ʻo e 1930 tupú. (Hepelu 3:1) Ko e tokolahi ʻo e faʻahinga naʻe silaʻi ʻe he laumālie māʻoniʻoní ke hoko ko e konga ʻo e ʻIsileli fakalaumālié ko e toko 144,000, “naʻe fakatau mei he kakai.” (Fakahā 7:4; 14:1-4) Ko e faʻahingá ni naʻe papitaiso ki he sino fakalaumālie ʻo Kalaisí, ki heʻene fakatahaʻangá, pea ki heʻene pekiá. (Loma 6:3; 1 Kolinito 12:12, 13, 27; Efeso 1:22, 23) ʻI he hili honau papitaiso ʻi he vaí pea paniʻaki ʻa e laumālie māʻoniʻoní, naʻa nau hū ai ki ha ʻalunga fakaefeilaulau, ko ha moʻui ʻo e anga-tonu ʻo aʻu ki heʻenau maté.—Loma 6:4, 5.
7. Ko e hā ko e kau Kalisitiane paní ai pē ʻoku totonu ʻenau maʻu ʻinasi ʻi he mā mo e uaine ʻi he Fakamanatú?
7 ʻI he tuʻunga ko e kau ʻIsileli fakalaumālié, naʻe kau ʻa e kau Kalisitiane pani ko ʻení ʻi he fuakava foʻou naʻe fai ʻi he vahaʻa ʻo Sihova mo e “Isileli oe Otua.” (Kaletia 6:16, PM; Selemaia 31:31-34) Naʻe fakapapauʻi ʻa e fuakava foʻou ko ʻení ʻaki ʻa e taʻataʻa ʻo Kalaisi naʻe lilingí. Naʻe lave ʻa Sīsū ki he meʻá ni ʻi he taimi naʻá ne fokotuʻu ai ʻa e Fakamanatu ʻo ʻene pekiá. ʻOku lēkooti ʻe Luke: “Naʻa ne toʻo . . . ha foʻi ma, ʻo ne fakafetaʻi, mo ne pakipaki ʻo ʻange kiate kinautolu, ʻo ne pehē, Ko hoku sino ʻeni, ʻa ia ʻoku foaki koeʻuhi ko kimoutolu: mou fai ʻeni mōku fakamanatu. Naʻa ne toʻo pehē foki ʻa e ipu, hili ʻa e ʻohomohe, ʻo ne pehē, Ko e ipu ni ko e fuakava foʻou ia ʻoku faiʻaki hoku toto, ʻa ia ʻoku lilingi koeʻuhi ko kimoutolu.” (Luke 22:19, 20) Ko e toenga pē ʻo e kau mēmipa ʻo e toko 144,000 ʻoku nau kei ʻi he māmaní, ko e faʻahinga ia ʻoku totonu ʻenau maʻu ʻinasi ʻi he mā mo e uaine tuʻu fakaefakatātā ʻi he Fakamanatu ʻo e pekia ʻa Kalaisí.
8. ʻOku ʻilo fēfē ʻe he kau paní kuo nau maʻu ʻa e ui fakahēvaní?
8 ʻOku anga-fēfē hono ʻiloʻi ʻe he kau paní kuo nau maʻu ʻa e ui fakahēvaní? ʻOku nau maʻu mātuʻaki hā mahino ʻa e fakamoʻoni ʻa e laumālie māʻoniʻoní. Naʻe tohi ʻa e ʻapositolo ko Paulá ki he faʻahinga peheé: “ʻIlonga kinautolu ʻoku takiekina ʻe he Laumalie ʻo e ʻOtua, ko kinautolu ia ʻa e ngaahi foha ʻo e ʻOtua. . . . Ko e Laumalie ʻoku ne kaungā-fakamoʻoni ʻe ia mo hotau laumalie, ʻo pehe, Ko e fanau ʻa e ʻOtua ʻa kitautolu. Pea kapau ko e fanau, ta ko e ngaahi ea foki, ko e ngaahi ea ʻo e ʻOtua, pea kaungā-ea mo Kalaisi; ʻo kapauā ʻoku tau kaungā-mamahi mo ia, ka tau kaungā-hakeakiʻi foki mo ia.” (Loma 8:14-17) Ko e fakamoʻoni ko ʻeni ʻa e laumālié ʻoku mātuʻaki mālohi ia ʻo malava ai ʻa e faʻahinga ʻoku nau maʻu ha kiʻi veiveiua fekauʻaki mo hono maʻu ʻa e ui fakahēvaní ke nau fakaʻosi ʻuhinga totonu ʻaki kuo ʻikai te nau maʻu ia, pea ʻe ʻikai ai te nau maʻu ʻinasi ʻi he mā mo e uaine ʻi he Fakamanatú.
Ko e Laumālié mo e Fanga Sipi Kehé
9. Ko e hā ʻa e ongo kulupu kehekehe ʻe ua ʻoku lave ki ai ʻi he ngaahi Kōsipelí pea ʻi he tohi ʻa Fakahaá?
9 ʻI he fakakaukau atu ki he tokolahi fakangatangata ʻo e kau Kalisitiane ʻoku ui ki hono faʻuʻaki ʻa e ʻIsileli fakalaumālié, naʻe lave ʻa Sīsū kiate kinautolu ko e “fanga sipi toko siʻi.” ʻOku nau hū atu ki he “lotoʻā” ʻo e fuakava foʻoú, ʻo kehe ia mei he “fanga sipi kehe” taʻefaʻalaua ko ia naʻe pehē ʻe Sīsū kuo pau ke ne toe fakatahatahaʻí. (Luke 12:32; Sione 10:16) Ko e faʻahinga ko ia ʻo e fanga sipi kehe kuo fakatahatahaʻi ʻi he taimi ʻo e ngataʻangá ʻe faʻuʻaki ia ʻa e “fuʻu kakai lahi” ko ia kuo pau ke nau hao atu ʻi he fuʻu “mamahi lahi,” fakataha mo e ʻamanaki ko e moʻui taʻengata ʻi ha māmani palataisi. Ko e meʻa ʻoku fakatupu tokangá, ko e vīsone ko ia naʻe maʻu ʻe Sione ʻi he ngataʻanga ʻo e ʻuluaki senituli T.S. ʻokú ne fakafaikehekeheʻi ai ʻa e fuʻu kakai lahi ko ʻení pea mo e kau mēmipa ʻe toko 144,000 ʻo e ʻIsileli fakalaumālié. (Fakahā 7:4, 9, 14) ʻOku toe maʻu ʻe he fanga sipi kehé ʻa e laumālie māʻoniʻoní, pea kapau ʻoku pehē, ʻoku anga-fēfē ʻene kaunga ki heʻenau moʻuí?
10. ʻOku anga-fēfē ʻa e papitaiso ʻa e fanga sipi kehé ʻi he “Huafa ʻo e Tamai mo e ʻAlo mo e Laumalie Maʻoniʻoni”?
10 ʻOku fakahoko moʻoni ʻe he laumālie māʻoniʻoní ha ngafa mahuʻinga ʻi he moʻui ʻa e fanga sipi kehé. ʻOku nau fakaʻilongaʻi ʻenau fakatapui kia Sihová ʻaki ʻa e hoko ʻo papitaiso ʻi he “Huafa ʻo e Tamai mo e ʻAlo mo e Laumalie Maʻoniʻoni.” (Mātiu 28:19) ʻOku nau lāuʻilo ki he tuʻunga-hau ʻo Sihová, ʻo anganofo kia Kalaisi ʻi he tuʻunga ko honau Tuʻi mo e Tokotaha-Huhuʻi, pea moʻulaloa ki he ngāue ʻa e laumālie pe ivi ngāue ʻo e ʻOtuá, ʻi heʻenau moʻuí. ʻI he ʻaho ki he ʻaho, ʻoku nau feinga ai ʻi heʻenau moʻuí ke fakatupu ʻa e “fua ʻo e laumālié,” ʻa ia ko e “ʻofa, fiefia, melino, kātaki-fuoloa, anga-ʻofa, anga-lelei, tui, anga-malū mo e mapuleʻi-kita.”—Kaletia 5:22, 23, NW.
11, 12. (a) ʻOku anga-fēfē hono fakamāʻoniʻoniʻi ʻo e kau paní ʻi ha founga mātuʻaki kehé? (e) ʻI he founga fē ʻoku fakamāʻoniʻoniʻi ai mo ʻai ke toputapu ʻa e fanga sipi kehé?
11 Kuo pau foki ke fakaʻatā ʻe he fanga sipi kehé ʻa e Folofola ʻa e ʻOtuá mo hono laumālie māʻoniʻoní ke ne fakamaʻa, pe fakamāʻoniʻoniʻi kinautolu. ʻOku ʻosi fakamāʻoniʻoniʻi ʻa e kau paní ia ʻi ha founga mātuʻaki makehe, ʻo lau kinautolu ʻoku māʻoniʻoni mo toputapu ʻi he tuʻunga ko e taʻahine mali ʻa Kalaisi. (Sione 17:17; 1 Kolinito 6:11; Efeso 5:23-27) ʻOku lea ʻa e palōfita ko Tanielá ʻo kau kiate kinautolu ko e “kau maonioni ae Fugani Maoluga,” ʻa ia ʻoku nau maʻu ʻa e Puleʻangá ʻi he malumalu ʻo e “foha oe tagata,” ko Kalaisi Sīsū. (Taniela 7:13, 14, 18, 27, PM) Ki muʻa ange hení, fakafou ʻia Mōsese mo ʻĒlone, naʻe tala ai ʻe Sihova ki he puleʻanga ʻo ʻIsilelí: “Ko au ko Jihova ko ho mou Otua: koia te mou fakamaonioniʻi akimoutolu, bea te mou maonioni; he oku ou maonioni.”—Livitiko 11:44, PM.
12 Ko e foʻi lea “fakamāʻoniʻoniʻi” ʻoku ʻuhinga tefito ia ki he “foʻi ngāue pe angafai ʻo hono ʻai ke toputapu, ko hono fakamavaheʻi, pe ko hono vaheʻi ki he ngāue pe ngāueʻaki ʻe Sihova ko e ʻOtuá; ko e tuʻunga ʻo e hoko ʻo toputapu, māʻoniʻoni, pe maʻa.” ʻI he 1938, naʻe fakahā ai ʻe he Watchtower ʻo pehē ko e kau Sionatapí, pe fanga sipi kehé, “kuo pau ke nau ʻilo ko e fakatoputapuʻi [“fakatapuí,” NW] mo e fakamāʻoniʻoniʻí ʻoku fiemaʻu ia mei he tokotaha taki taha ko ia ʻe hoko ko ha konga ʻo e fuʻu kakai tokolahí pea moʻui ʻi he māmaní.” ʻI he vīsone fekauʻaki mo e fuʻu kakai lahi, ʻoku lēkooti ʻi he tohi ʻa Fakahaá, ʻoku lave ai kiate kinautolu kuo nau ʻosi “fō honau kofú ʻo fakahinehina ʻi he taʻataʻa ʻo e Lamí” pea ʻoku nau fai kia Sihova ʻa e “ngāue toputapu ʻi he ʻaho mo e pō ʻi hono temipalé.” (Fakahā 7:9, 14, 15, NW) ʻI he tokoni ʻa e laumālie māʻoniʻoní, ʻoku fai ai ʻe he fanga sipi kehé honau lelei tahá ke aʻusia ʻa e ngaahi fiemaʻu ʻa Sihova ki he tuʻunga toputapú.—2 Kolinito 6:19 (2 Kolinito 7:1, PM).
Failelei ki he Ngaahi Tokoua ʻo Kalaisí
13, 14. (a) Fakatatau ki he pealapeli ʻa Sīsū ki he fanga sipí mo e fanga kosí, ʻoku fakatuʻunga ʻi he hā ʻa e fakamoʻui ʻo e fanga sipí? (e) ʻI he taimi ko ʻeni ʻo e ngataʻangá, kuo anga-fēfē ʻa e failelei ʻa e fanga sipi kehé ki he fanga tokoua ʻo Kalaisí?
13 Naʻe fakaeʻa ʻe Sīsū ʻa e haʻi vāofi ʻi he vahaʻa ʻo e fanga sipi kehé mo e fanga sipi tokosiʻí ʻi heʻene pealapeli fekauʻaki mo e fanga sipi mo e fanga kosi, ʻa ia ʻoku fakakau ʻi heʻene kikite ki he “fakaʻosiʻosi ʻo e fokotuʻutuʻu ʻo e ngaahi meʻá.” ʻI he pealapeli ko iá, naʻe fakahaaʻi mahino ai ʻe Kalaisi ko e fakamoʻui ʻo e fanga sipi kehé ʻoku fekauʻaki vāofi ia mo honau ʻulungaanga ki he kau paní, ʻa ia naʻá ne ui ko “hoku ngāhi tokoua.” Naʻá ne fakahā: “ʻE toki folofola ʻe he Tuʻi kiate kinautolu ʻi hono toʻomataʻu, Omi kimoutolu, ʻa e faʻahinga kuo fakamonuʻia ʻe heʻeku Tamai, ʻo mou hoko ki he puleʻanga kuo toka teuteu moʻomoutolu talu e tanu pou ʻo mamani: . . . Ko au e, ʻoku ou talaatu, ʻI hoʻomou fai pehe ki ha taha ʻo hoku ngāhi tokoua mamaʻo ni, naʻa mou fai ia kiate au.”—Mātiu 24:3, NW; Mātiu 25:31-34, 40.
14 Ko e kupuʻi lea “ʻi hoʻomou fai pehe” ʻoku ʻuhinga ia ki he ngaahi ngāue ʻo e poupou anga-ʻofa ʻoku fai ki he fanga tokoua fanauʻi fakalaumālie ʻo Kalaisí, ʻa ia kuo ngaohi ʻe he māmani ʻo Sētané ko e kau sola, naʻa mo hono lī honau niʻihi ki he pilīsoné. Naʻa nau fiemaʻu ʻa e meʻakai, vala feʻunga, mo e tokanga ki heʻenau moʻuileleí. (Mātiu 25:35, 36) ʻI he taimi ko ʻeni ʻo e ngataʻangá, talu mei he 1914, kuo ʻi he ngaahi tuʻunga ai ko iá ʻa e tokolahi ʻo e kau paní. Ko e hisitōlia ʻi onopooni ʻo e Kau Fakamoʻoni ʻa Sihová ʻokú ne fakamoʻoniʻi kuo poupouʻi kinautolu ʻe honau ngaahi takanga mateakí, ʻa e fanga sipi kehé, ʻi hono ueʻi ʻa e faʻahingá ni ʻe he laumālié.
15, 16. (a) ʻI he ngāue fē kuo tautefito ʻa e tokoni ai ʻa e fanga sipi kehé ki he fanga tokoua pani ʻo Kalaisi ʻi he māmaní? (e) Kuo anga-fēfē hono fakahaaʻi ʻe he kau paní ʻenau houngaʻia ki he fanga sipi kehé?
15 Ko e fanga tokoua pani ʻo Kalaisi ʻi he māmaní ʻi he taimi ko ʻeni ʻo e ngataʻangá kuo nau maʻu tautefito ʻa e poupou longomoʻui ʻa e fanga sipi kehé ʻi hono fakahoko ʻa e fekau kuo foaki mai ʻe he ʻOtuá ke ‘malaga aki i mamani kotoabe ʻa e ogoogoleleí ni oe buleagá koe mea fakamooni ki he buleaga kotoabe.’ (Mātiu 24:14, PM; Sione 14:12) Lolotonga kuo tautuku atu ʻa e tokolahi ʻo e kau paní ʻi he māmaní ʻi he faai mai ʻa e ngaahi taʻú, ko e tokolahi ko ia ʻo e fanga sipi kehé kuo tupulaki ia ʻo kau ki ai ʻa e laui miliona. Ko e laui afe ʻo e faʻahingá ni kuo nau ngāue ko e kau ʻevangeliō taimi-kakato—kau tāimuʻa mo e kau misinale—ʻo fakamafola atu ʻa e ongoongo lelei ʻo e Puleʻangá ki he “konga mamaʻo taha ʻo e māmaní.” (Ngāue 1:8, NW) ʻOku kau ʻa e niʻihi ʻi he ngāue fakaefakamoʻoní ʻi he lahi taha ʻo ʻenau malavá pea poupou fakapaʻanga fiefia ki he ngāue mahuʻingá ni.
16 Ko ha houngaʻia lahi ē ʻa e fanga tokoua pani ʻo Kalaisí ki he poupou mateaki ko ʻeni ʻoku fai ʻe honau ngaahi takanga ko e fanga sipi kehé! Naʻe fakahaaʻi lelei ʻenau ngaahi ongoʻí ʻi he tohi Worldwide Security Under the “Prince of Peace,” naʻe tokonaki ʻe he kalasi tamaioʻeikí ʻi he 1986. ʻOkú ne pehē: “Talu mei he Tau II ʻa Māmaní, ko e fakahoko ʻo e kikite ʻa Sīsū ki he ‘fakaʻosiʻosi ʻo e fokotuʻutuʻu ʻo e ngaahi meʻá’ ʻoku fakatuʻunga lahi ia ʻi he ngafa ʻoku fakahoko ʻe he ‘fuʻu kakai lahi’ ʻo e ‘fanga sipi kehé’ . . . Ko ia ai, ko ha fakamālō lahi fau ki he ‘fuʻu kakai lahi’ fakavahaʻapuleʻanga mo lea kehekehé ki he ngafa lahi fakaʻulia kuo nau fai ʻi hono fakahoko ʻo e kikite [ʻa Sīsū] ʻi he Mātiu 24:14!”
‘ʻOua Naʻa Fakahaohaoa Taʻe Te Tau Kau Ai’
17. ʻI he founga fē ʻe hoko ai ʻa e faʻahinga loto-tōnunga ʻo e kuohilí ʻa ia ʻe fokotuʻu mai ki he māmaní ʻo ʻikai ‘fakahaohaoa taʻe kau ai’ ʻa e kau paní?
17 ʻI he lea ʻi he tuʻunga ko e taha ʻo e kau paní pea lave ki he kau tangata mo e kau fefine loto-tōnunga ʻa ia naʻa nau moʻui ki muʻa ʻia Kalaisí, naʻe tohi ʻe he ʻapositolo ko Paulá: “Ko kinautolu ni, neongo naʻa nau maʻu kotoa pe ha ongoongolelei ʻi heʻenau tui, ka naʻe ʻikai te nau lavaʻi ʻa e Talaʻofa: koeʻuhi kuo tokonaki ʻe he ʻOtua ha meʻa lelei hake maʻatautolu [ko e kau paní], pea koeʻuhi ke ʻoua naʻa fakahaohaoa ʻa kinautolu taʻe te tau kau ai.” (Hepelu 11:35, 39, 40) ʻI he lolotonga ʻa e Taʻu ʻe Taha Afé, ko Kalaisi mo hono fanga tokoua pani ʻe toko 144,000 ʻi hēvaní te nau ngāue ko e ngaahi tuʻi mo e kau taulaʻeiki pea fakahoko mai ʻa e ngaahi ʻaonga ʻo e feilaulau huhuʻi ʻa Kalaisí ki he māmaní. ʻE “fakahaohaoa” ai ʻa e fanga sipi kehé ʻi he sino mo e ʻatamai.—Fakahā 22:1, 2.
18. (a) Ko e hā ʻoku totonu ke tokoniʻi ʻe he ngaahi moʻoni faka-Tohitapú ʻa e fanga sipi kehé ke nau mahinoʻí? (e) ʻI he ʻamanaki fē ʻoku nofoʻaki tali ai ʻa e fanga sipi kehé ki he “fakaeʻa ʻo e ngaahi foha ʻo e ʻOtua”?
18 ʻOku totonu ke hanga ʻe he meʻá ni kotoa ʻo ʻai ke maongo ki he ʻatamai ʻo e fanga sipi kehé ʻa e ʻuhinga ʻoku fakahangataha ai ʻe he Ngaahi Konga Tohitapu Faka-Kalisi Kalisitiané ʻa e tokanga lahi kia Kalaisi mo hono fanga tokoua paní pea mo honau ngafa tefito ʻi hono fakahoko ʻo e ngaahi taumuʻa ʻa Sihová. Ko ia ai, ʻoku lau ʻe he fanga sipi kehé ko ha monū lahi ia ke poupou ʻi he founga kotoa pē ʻe malavá ki he kalasi tamaioʻeiki paní lolotonga ʻa e nofoʻaki tali ki he “fakaeʻa ʻo e ngaahi foha ʻo e ʻOtua” ʻi ʻĀmaketone pea ʻi he lolotonga ʻo e Taʻu ʻe Taha Afé. ʻOku malava ke nau fakatuʻotuʻa atu ki he hoko ʻo “fakaʻataʻatā mei heʻene popula ki he ʻauha, kae fakahoko ia ki he tauʻataina fakalangi ʻa e fanau ʻa e ʻOtua.”—Loma 8:19-21.
Fāʻūtaha ʻi he Laumālie ʻi he Fakamanatú
19. Ko e hā kuo fai ʻe he “Laumālie ʻo e Moʻoni” ki he kau paní mo honau ngaahi takangá, pea ʻe anga-fēfē ʻenau fāʻūtahá tautefito ʻi he efiafi poʻuli ʻo Maʻasi 28?
19 ʻI heʻene lotu tuku ʻi he poʻuli hifo ʻo Nīsani 14, 33 T.S., naʻe pehē ai ʻe Sīsū: “Ko ʻeku kole ke nau taha pe ʻakinautolu kotoa pē; hangeā ʻoku ke ʻiate au, ʻalā Tamai, mo au ʻiate koe, ke pehē foki ʻenau ʻiate kitaua: koeʻuhi ā ke tui ʻe māmani naʻe fekau mai au ʻe hoʻo ʻAfio.” (Sione 17:21) ʻI he ʻofá, naʻe fekau mai ai ʻe he ʻOtuá hono ʻAló ke foaki ʻene moʻuí maʻá e fakamoʻui ʻo e kau paní pea mo e māmani ʻo e faʻahinga talangofua ʻo e tangatá. (1 Sione 2:2) “Ko e Laumālie ʻo e Moʻoni” kuó ne fakafāʻūtahaʻi ʻa e fanga tokoua ʻo Kalaisí mo honau ngaahi takangá. ʻI he efiafi poʻuli ʻo Maʻasi 28, hili ʻa e tō hifo ʻa e laʻaá, ʻe fakataha fakatahataha ai ʻa e ongo kalasí fakatouʻosi ke fakamanatu ʻa e pekia ʻa Kalaisí mo manatua ʻa e meʻa kotoa pē kuo fai ʻe Sihova maʻanautolu fakafou ʻi he feilaulau ʻa hono ʻAlo pelé, ʻa Kalaisi Sīsū. ʻOfa ke hanga ʻe heʻenau ʻi ai ʻi he kātoanga mahuʻinga ko iá ʻo fakaivimālohiʻi ʻenau fāʻūtahá mo fakafoʻou ʻenau fakapapau ke hanganaki fai ʻa e finangalo ʻo e ʻOtuá, ʻo ʻoatu ai ʻa e fakamoʻoni ʻoku nau fiefia ke ʻi he lotolotonga ʻo e faʻahinga ʻa ia ʻoku ʻofa ai ʻa Sihová.
Ko e Fakamanatu
• Ko fē taimi naʻe ʻohifo ai ʻa e “Laumālie ʻo e Moʻoni” ki he muʻaki kau Kalisitiané, pea naʻe anga-fēfē hono fakamoʻoniʻi ko ha “tokoni” iá?
• ʻOku anga-fēfē hono ʻiloʻi ʻe he kau paní kuo nau maʻu ʻa e ui fakahēvaní?
• ʻI he ngaahi founga fē ʻoku ngāue ai ʻa e laumālie ʻo e ʻOtuá ʻi he fanga sipi kehé?
• Kuo anga-fēfē ʻa e failelei ʻa e fanga sipi kehé ki he fanga tokoua ʻo Kalaisí, pea ko e hā ʻe ‘ʻikai fakahaohaoa ai kinautolu taʻekau ai’ ʻa e kau paní?
[Fehuʻi ki he Ako]
[Fakatātā ʻi he peesi 21]
Naʻe huaʻi hifo ʻa e “Laumālie ʻo e Moʻoni” ki he kau ākongá ʻi he Penitekosi 33 T.S.
[Fakatātā ʻi he peesi 23]
Kuo failelei ʻa e fanga sipi kehé ki he fanga tokoua ʻo Kalaisí ʻaki hono poupouʻi kinautolu ʻi hono fakahoko ʻa e fekau fakaʻotua ke malangá