ʻOku Moʻoni ʻa e Tuʻunga-Taki ʻa Kalaisí Kiate Koe?
ʻOku Moʻoni ʻa e Tuʻunga-Taki ʻa Kalaisí Kiate Koe?
“Kaeʻumaʻā ʻoua naʻa ui kimoutolu ko e kau takimuʻa: he ʻoku taha homou Takimuʻa, ko Kalaisi.”—MĀTIU 23:10.
1. Ko hai pē ʻa e Takimuʻa ʻo e kau Kalisitiane moʻoní?
KO E Tūsite ia, ʻo Nīsani 11. ʻI he ʻaho ʻe tolu ki mui aí, ʻe tāmateʻi ai ʻa Sīsū Kalaisi. Ko ʻene ʻaʻahi fakaʻosi ʻeni ki he temipalé. ʻI he ʻaho ko ʻení, naʻe ʻoatu ai ʻe Sīsū ha akonaki mahuʻinga ki he fuʻu kakai ko ia naʻa nau fakatahataha aí pea ki heʻene kau ākongá. Naʻá ne pehē: “Ko kimoutolu ʻoua naʻa ui ko Lapai: he ʻoku taha pe hoʻomou Faiako, ka ko kimoutolu ko e ngāhi tokoua kotoa pe. Pea ʻoua naʻa ui ha toko taha ʻi mamani ko hoʻomou tamai: he ʻoku taha pe hoʻomou Tamai, ko e Tamai Fakalangi. Kaeʻumaʻā ʻoua naʻa ui kimoutolu ko e kau takimuʻa: he ʻoku taha homou Takimuʻa, ko Kalaisi.” (Mātiu 23:8-10) ʻOku hā mahino, ko Sīsū Kalaisi ʻa e Takimuʻa ʻo e kau Kalisitiane moʻoní.
2, 3. Ko e hā ʻe hoko ki heʻetau moʻuí ʻi he fanongo kia Sihova pea tali ʻa e Takimuʻa kuó ne fakanofó?
2 He ngaahi ola ʻaonga lahi ē ʻo e tuʻunga-taki ʻa Sīsuú ʻi heʻetau moʻuí ʻi heʻetau tali iá! ʻI hono tomuʻa tala ʻo e hoko mai ʻa e Takimuʻa ko ʻení, naʻe fanongonongo ʻe Sihova ko e ʻOtuá ʻo fakafou ʻi he palōfita ko ʻAiseá: “Vakai mai, akimoutolu kotoabe oku fieinu, haʻu ki he gaahi vai, bea mo ia oku ikai haa ne baaga; mou haʻu, o fakatau, bea kai; io, haʻu, o fakatau uaine, moe hua huhu tae ha baaga bea tae ha totogi. . . . fanogo o tokaga kiate au, bea mou kai aia oku lelei, bea tuku ke fiefia ho mou laumalie i he mea kai lelei lahi. . . . Vakai, kuou foaki ia koe fakamooni ki he kakai, koe takimua moe bule ki he kakai.”—Aisea 55:1-4, PM.
3 Naʻe ngāueʻaki ʻe ʻAisea ʻa e ngaahi huhuʻa anga-mahení—ʻa e vaí, huʻakaú, mo e uainé—ko e ngaahi metafoa ke fakahaaʻi ʻa e anga ʻo hono ueʻi ʻetau moʻui fakafoʻituituí ʻi he taimi ʻoku tau fanongo ai kia Sihová pea muimui ʻi he Takimuʻa mo e Pule kuó ne tuku mai kiate kitautolú. ʻOku fakaivifoʻou ʻa e olá. ʻOku hangē ia ko hano inu ʻo ha ipu vai momoko ʻi ha ʻaho velá. ʻOku fakahauhauʻi ʻetau fieinua ki he moʻoní mo e māʻoniʻoní. Hangē pē ko hono fakaivimālohiʻi ʻe he huʻakaú ʻa e fanga kiʻi pēpeé mo tokoniʻi kinautolu ke nau tupú, ʻoku hanga ʻe he ‘huʻakau ʻo e folofolá’ ʻo fakaivimālohiʻi kitautolu mo pouaki ʻa e tupu fakalaumālie ʻi hotau vahaʻangatae mo e ʻOtuá. (1 Pita 2:1-3, NW) Pea ko hai ia te ne lava ke fakaʻikaiʻi ʻa e tokoni ʻa e uainé ki he fiefiá ʻi he ngaahi taimi fakafiefiá? ʻI ha founga meimei tatau, ko e lotu ki he ʻOtua moʻoní pea muimui ʻi he topuvaʻe ʻo ʻene Takimuʻa kuo fakanofó ʻokú ne ʻai ai ʻa e moʻuí “ke fiefia.” (Teutalonome 16:15) Ko ia ai, ʻoku mātuʻaki mahuʻinga kiate kitautolu hono kotoa—ʻa e kei siʻi mo e taʻumotuʻa, tangata, mo e fefine—ke fakahāhā ko e tuʻunga-taki ʻa Kalaisí ʻoku moʻoni kiate kitautolu. ʻE anga-fēfē leva ʻetau fakahāhā ʻi heʻetau moʻui fakaʻahó ko e Mīsaiá ʻa hotau Takimuʻá?
Kau Talavou—Hokohoko ‘Lalaka Atu ʻi he Potó’
4. (a) Ko e hā naʻe hoko ʻi he taimi naʻe ʻaʻahi ai ʻa e taʻu 12 ko Sīsuú ki Selusalema ʻi he taimi ʻo e Laka-Atú? (e) Naʻe ʻilo lahi fēfē ʻa Sīsū ʻi he heʻene taʻu 12 pē?
4 Fakakaukau ki he faʻifaʻitakiʻanga naʻe fokotuʻu ʻe hotau Takimuʻá maʻá e toʻutupú. Neongo e siʻi ʻa e ʻilo ki he kei siʻi ʻa Sīsuú, ʻoku ʻi ai ʻa e meʻa ʻe taha ʻoku mātuʻaki hā mai. ʻI he taimi naʻe taʻu 12 ai ʻa Sīsuú, naʻe ʻave ia ʻe heʻene ongo mātuʻá ʻi heʻenau ʻaʻahi fakataʻu ki Selusalema ki he Laka-Atú. ʻI he taimi ko ʻení naʻá ne hoko ai ʻo moʻumoʻua ʻi ha fetalanoaʻaki Fakatohitapu, pea naʻe mavahe fāinoa atu ai hono fāmilí ʻo ʻikai ke ne kau ai. ʻI he ʻaho ʻe tolu ki mui aí, ne maʻu ai ia ʻi he temipalé ʻe heʻene ongo mātuʻa loto-moʻuá, ʻa Siosefa mo Mele, “ʻoku ne lotolotoi ʻi he kau akonaki, ʻo ne fakafanongo kiate kinautolu mo fakafehuʻi kiate kinautolu.” ʻIkai ngata aí, “ko kinautolu kotoa pē naʻe fanongo kiate ia, naʻa nau fakatumutumu ʻi he anga ʻo ʻene fakakaukau mo ʻene ngaahi tali.” Sioloto atu, ʻi hono taʻu 12 pē, naʻe ʻikai ngata pē ʻi he malava ʻe Sīsū ke ʻeke ha ngaahi fehuʻi fakatupu fakakaukau, mo hehema fakalaumālié ka naʻá ne toe fai foki ʻa e ngaahi tali pōtoʻi! ʻOku ʻikai ha veiveiua, naʻe tokoniʻi ia ʻe he akoʻi fakaemātuʻá.—Luke 2:41-50.
5. ʻE anga-fēfē nai hano fakamahuʻingaʻi ʻe he toʻutupú ʻenau fakakaukau atu ki he ako Tohitapu fakafāmilí?
5 Mahalo pē ko ha tokotaha kei siʻi koe. Kapau ko hoʻo ongo mātuʻá ko ha ongo sevāniti līʻoa ʻa e ʻOtuá, ngalingali ʻoku ʻi ai ha polokalama ako Tohitapu fakafāmili tuʻumaʻu ʻi ho ʻapí. Ko e hā hoʻo fakakaukau ki he ako fakafāmilí? Fēfē ke ke fakakaukau atu ki he ngaahi fehuʻi hangē ko ení: ‘ʻOku ou poupou ʻaufuatō ki he fokotuʻutuʻu ki he ako Tohitapu ʻi hoku fāmilí? ʻOku ou ngāue fāitaha mo ia, ʻo ʻoua ʻe fai ha meʻa ke uesia ai ʻa e founga-tuʻumaʻu ko iá?’ (Filipai 3:16) ‘Ko ha tokotaha kau longomoʻui au ʻi he akó? ʻI heʻene feʻungamālié, ʻoku ou ʻeke ha ngaahi fehuʻi fekauʻaki mo e meʻa ʻoku fai ai ʻa e akó pea fakamatala ki hono ngāueʻakí? ʻI heʻeku fakalakalaka fakalaumālié, ʻoku ou fakatupu ha ifoʻia ki he “meʻakai malohi [ʻa ia] ʻoku ʻanautolu ʻoku matuʻotuʻa”?’—Hepelu 5:13, 14.
6, 7. ʻE lava ke mahuʻinga fēfē ha polokalama ʻo e lau Tohitapu fakaʻahó ki he kau talavoú?
6 ʻOku toe mahuʻinga foki ha polokalama ʻo e lau Tohitapu fakaʻahó. Naʻe hiva ʻa e tokotaha-tohi-sāmé: “Monuʻiaa, ka ko e tangata ko ē kuo ʻikai fou ʻi he fakakaukau ʻa e fakaʻotuamate . . . ka ko e Lao ʻo Sihova ʻa ʻene manako, ʻio ʻi he lao oʻona ʻoku ne fakalaulauloto [“lau leʻo-siʻi,” NW] ʻaho mo e po.” (Sāme 1:1, 2) Ko e fetongi ʻo Mōsesé, ʻa Siosiua, naʻá ne ‘lau leʻo-siʻi ʻa e tohi ʻo e laó ʻi he ʻaho mo e pō.’ Naʻe fakamafeia ia ʻe he meʻá ni ke ne ngāue fakapotopoto pea lavameʻa ʻi hono fakahoko ʻene ngāue naʻe vaheʻi ange ʻe he ʻOtuá. (Siosiua 1:8, NW) Ko hotau Takimuʻá, ʻa Sīsū Kalaisi, naʻá ne pehē: “Kuo tohi, Oku ikai moʻui ʻa e tangata ʻi he ma pe, ka ʻi he ngāhi folofola kotoa pe ʻoku ʻalu atu mei he fofonga ʻo e ʻOtua.” (Mātiu 4:4) Kapau ʻoku fiemaʻu kiate kitautolu ʻa e meʻakai fakamatelié ʻi he ʻaho kotoa pē, huanoa hake ai hono fiemaʻu kiate kitautolu ʻa e meʻakai fakalaumālié ʻi ha tuʻunga tuʻumaʻu!
7 ʻI hono ʻiloʻi ʻa ʻene fiemaʻu fakalaumālié, naʻe kamata ai ʻa Nicole taʻu 13 ke lau ʻa e Tohitapú ʻi he ʻaho kotoa pē. a ʻI he taimi ní, ʻi hono taʻu 16, kuó ne lau ai ʻa e Tohitapú fakakātoa ʻo tuʻo taha pea ʻoku meimei vaeua eni ʻa ʻene lau ʻi hono tuʻo uá. ʻOku faingofua ʻene foungá. “ʻOku ou fakapapauʻi ke lau ʻo ʻoua ʻe toe siʻi hifo ʻi he vahe ʻe tahá ʻi he ʻaho,” ko ʻene leá ia. Kuo anga-fēfē ʻa e tokoni ʻa ʻene lau Tohitapu fakaʻahó kiate iá? ʻOkú ne tali: “ʻOku lahi fau ʻa e ngaahi tākiekina koví he ʻahó ni. ʻOku ou fetaulaki fakaʻaho mo e ngaahi tenge ʻi he ʻapiakó mo e feituʻu kehe pē ʻoku poleʻi ai ʻeku tuí. Ko hono lau ʻa e Tohitapú ʻi he ʻaho kotoa peé ʻoku tokoni vave ia kiate au ke u manatuʻi ai ʻa e ngaahi fekau mo e ngaahi tefitoʻi moʻoni ʻa e Tohitapú ʻokú ne fakalototoʻaʻi au ke u talitekeʻi ʻaki ʻa e ngaahi tenge ko ʻení. Ko hono olá, ʻoku ou ongoʻi ofi ange ai kia Sihova mo Sīsū.”
8. Ko e hā naʻe angaʻaki ʻe Sīsū ʻi he fekauʻaki mo e sinakoké, pea ʻe lava fēfē ke faʻifaʻitaki kiate ia ʻa e toʻutupú?
8 Naʻe angaʻaki ʻe Sīsū ke fanongo mo kau ʻi hono lau ʻa e Konga Tohitapú ʻi he sinakoké. (Luke 4:16; Ngāue 15:21) He lelei lahi ē ki he toʻutupú ke nau muimui ʻi he faʻifaʻitakiʻanga ko iá ʻaki hono maʻu tuʻumaʻu ʻa e ngaahi fakataha faka-Kalisitiané, ʻa ia ʻoku lau mo ako ai ʻa e Tohitapú! ʻI hono fakahaaʻi ʻa e houngaʻia ki he ngaahi fakataha peheé, ʻoku pehē ai ʻe Richard taʻu 14: “ʻOku mahuʻinga ʻa e ngaahi fakatahá kiate au. ʻOku toutou fakamanatu mai ai kiate au ʻa e meʻa ʻoku leleí mo ia ʻoku koví, meʻa ʻoku tāú mo ia ʻoku taʻetāú, meʻa ʻoku faka-Kalaisí mo e meʻa ʻoku ʻikai peheé. ʻOku ʻikai pau ke u fai ʻe au ha feinga faingataʻa ke ʻilo ki ai—ʻaki hono hokosia.” ʻIo, “ko e fakamanatu ʻa Sihová ʻoku alafalalaʻanga, ʻoku fakapotoʻi ai ʻa e taʻetaukeí.” (Sāme 19:7, NW) ʻOku toe fakapapauʻi ʻe Nicole ke maʻu ʻa e ngaahi fakataha kotoa ʻe nima ʻa e fakatahaʻangá ʻi he uike kotoa. ʻOkú ne toe fakamoleki ʻa e houa ʻe ua ki he tolu ʻi he teuteu ki aí.—Efeso 5:15, 16.
9. ʻE lava fēfē ʻa e toʻutupú ke nau ‘lalaka atu ʻi he potó’?
9 Ko e tuʻunga talavoú ko ha taimi lelei ia ke maʻu ai ʻa e ‘ʻilo ki he ʻOtua moʻonia pē tahá, pea mo ia naʻá ne fekau maí, ʻa Sīsū Kalaisi.’ (Sione 17:3, NW) ʻOkú ke ʻilo nai ha kau talavou ʻoku nau fakamoleki ha taimi lahi ʻi hono lau ʻo e ʻū kōmikí, mamata televīsoné, vaʻinga ʻi he ngaahi keimi vitioó, pe nōfoʻi ʻi he ʻInitanetí. Ko e hā te ke faʻifaʻitaki ai kiate kinautolu lolotonga iá ʻoku malava ke ke faʻifaʻitaki ki he faʻifaʻitakiʻanga haohaoa ʻa hotau Takimuʻá? ʻI he tuʻunga ko ha tamasiʻí, naʻá ne fiefia ʻi he ako fekauʻaki mo Sihová. Pea ko e hā hono olá? Koeʻuhi ko ʻene ʻofa ki he ngaahi meʻa fakalaumālié, “naʻe lalaka atu ʻa Sīsū ʻi he poto.” (Luke 2:52) Ko ia te ke lava pē mo koe.
“Mou Feanganofoʻaki”
10. Ko e hā ʻe tokoni ki he moʻui fakafāmilí ke hoko ko ha matavai ʻo e melinó mo e fiefiá?
10 ʻOku malava ke hoko ʻa e ʻapí ko ha taulangaū ia ʻo e melino mo e fiemālie pe ko ha malaʻe tau ʻo e fekeʻikeʻí mo e fekīhiakí. (Palovepi 21:19; 26:21) Ko ʻetau tali ʻa e tuʻunga-taki ʻa Kalaisí ʻoku tokoni ia ki he tupulekina ʻa e melino mo e fiefia ʻi he fāmilí. Ko hono moʻoní, ko e faʻifaʻitakiʻanga ʻa Sīsuú ko e sīpinga ia ki he ngaahi vā ʻi he fāmilí. ʻOku fakahā mai ʻe he ngaahi Konga Tohitapú: “Mo mou feanganofoʻaki ʻi he ʻapasia kia Kalaisi. ʻA e kau fefine, mou anganofo ki siʻomou ngaahi husepaniti, ʻo hange ki he ʻEiki. He ko e husepaniti ko e ʻulu ʻo e uaifi, ʻo hange foki ko Kalaisi ko e ʻulu ʻo e Siasi; ʻio ko ia ia ko e fakamoʻui ʻo e sino. . . . ʻA e kau tangata, mou ʻofa ki homou ngaahi uaifi, ʻo hange foki ko Kalaisi ne ne ofaʻi ʻa e Siasi, ʻo ne liʻoa ʻa ʻEne ʻAfio koeʻuhi ko ia.” (Efeso 5:21-25) Naʻe tohi ʻa e ʻapositolo ko Paulá ki he fakatahaʻanga ʻi Kolosé: “Ae fanau, fai talagofua ki hoo mou matua i he mea kotoabe: he oku lelei lahi ia ki he Eiki.”—Kolose 3:18-20, PM.
11. ʻE lava fēfē ʻe ha husepāniti ʻo fakahāhā ko e tuʻunga-taki ʻa Kalaisí ʻoku moʻoni kiate ia?
11 Ko e muimui ʻi he akonaki ko ʻení ʻoku ʻuhinga iá ke takimuʻa ʻa e husepānití ʻi he fāmilí, ko hono uaifí ke poupou mateaki kiate ia, pea ko e fānaú ke talangofua ki heʻenau ongo mātuʻá. Ka, ko e tuʻunga-ʻulu ʻo e tangatá, ʻoku toki hoko pē ʻo fakafiefiá ʻi he taimi ʻoku fakahoko totonu ai iá. Kuo pau ki ha husepāniti poto ke ne ako ki he founga ke ngāueʻaki ai ʻa e tuʻunga-ʻulú ʻaki ʻa e faʻifaʻitaki ki hono ʻUlú mo e Takimuʻá, ko Kalaisi Sīsū. (1 Kolinito 11:3) Neongo naʻe hoko ki mui ʻa Sīsū ko e “ʻulu ki he siasi ʻi he meʻa kotoa pe,” naʻá ne haʻu ki he māmaní, ʻo “ʻikai . . . ke maʻu sevaniti, ka ke sevaniti pe ʻe ia.” (Efeso 1:22; Mātiu 20:28) ʻI ha founga meimei tatau, ʻoku ngāueʻi ʻe ha husepāniti Kalisitiane ʻa hono tuʻunga-ʻulú, ʻo ʻikai ki ha lelei siokita, ka ke tokanga ki he ngaahi meʻa mahuʻinga ki hono uaifí mo e fānaú—ʻio, ki he fāmilí fakakātoa. (1 Kolinito 13:4, 5) ʻOkú ne feinga ke faʻifaʻitaki ki he ngaahi ʻulungaanga fakaʻotua ʻo hono ʻulú, ʻa Sīsū Kalaisi. ʻI he hangē ko Sīsuú, ʻokú ne anga-mokomoko mo anga-fakatōkilalo. (Mātiu 11:28-30) Ko e ngaahi lea hangē ko e “kātaki fakamolemole” pe “ʻokú ke tonu koe” ʻoku ʻikai faingataʻa ia kiate ia ke ne leaʻaki ʻi he taimi ʻokú ne hala aí. ʻOku hanga ʻe heʻene faʻifaʻitakiʻanga leleí ʻo ʻai ke faingofua ange ai ki ha uaifi ke hoko ko ha “tokoni,” ko ha “fakakakato,” pea mo ha “hoa” ki ha tangata pehē, ʻo ako meiate ia pea ngāue uouangataha mo ia.—Senesi 2:20, NW; Malakai 2:14, NW.
12. Ko e hā te ne tokoniʻi ha uaifi ke ne tali ʻa e tefitoʻi moʻoni ʻo e tuʻunga-ʻulú?
12 Ko e uaifí, ki heʻene tafaʻakí, ke ne anganofo ki hono husepānití. Kae kehe, kapau ʻoku uesia ia ʻe he laumālie ʻo e māmaní, ʻe kamata nai ʻe he meʻá ni ke ne fakavaivaiʻi ʻene vakai ki he tefitoʻi moʻoni ʻo e tuʻunga-ʻulú, pea ʻe ʻikai ke fakamānako kiate ia ʻa e foʻi fakakaukau ko ia ʻo e hoko ʻo anganofo ki ha tangatá. ʻOku ʻikai ke fokotuʻu mai ʻe he ngaahi Konga Tohitapú ia ʻoku totonu ki he tangatá ke hoko ʻo pule fakaaoao, ka ʻoku nau fiemaʻu mai ʻa e ngaahi uaifí ke nau anganofo ki honau ngaahi husepānití. (Efeso 5:24) ʻOku toe fiemaʻu mai ʻe he Tohitapú ʻa e husepānití pe tamaí ke ne fua ʻa e fatongia ʻi he fāmilí, pea ʻi he taimi ʻoku ngāueʻaki ai ʻa ʻene akonakí, ʻoku tokoni ʻeni ki he melino mo e maau ʻi he fāmilí.—Filipai 2:5.
13. Ko e hā ʻa e faʻifaʻitakiʻanga ʻo e anganofó kuo tokonaki ʻe Sīsū ki he fānaú?
13 Ko e fānaú ke nau talangofua ki heʻenau ngaahi mātuʻá. ʻI he fekauʻaki mo e meʻá ni, naʻe fokotuʻu ai ʻe Sīsū ha faʻifaʻitakiʻanga lelei ʻaupito. ʻI he hili ʻa e meʻa naʻe hoko ʻi he temipalé ʻi hono liʻaki ai ʻa e taʻu 12 ko Sīsuú ʻi he ʻaho ʻe tolú, naʻá ne “ʻalu hifo ia mo [ʻene ongo mātuʻá], ʻo hoko ki Nasaleti; pea naʻa ne ʻi ai ʻo anganofo kiate kinaua.” (Luke 2:51) Ko e anganofo ʻa e fānaú ki heʻenau mātuʻá ʻoku tokoni ia ki he melino mo e feongoongoi ʻi he fāmilí. ʻI he anganofo ʻa e tokotaha kotoa ʻi he fāmilí ki he tuʻunga-taki ʻa Kalaisí, ko e olá ko ha fāmili fiefia.
14, 15. Ko e hā te ne tokoniʻi kitautolu ke tau lavameʻa ʻi he taimi ʻo e fehangahangai mo ha tuʻunga faingataʻa ʻi ʻapí? ʻOmai ha fakatātā.
14 Naʻa mo e taimi ʻoku malanga hake ai ha ngaahi tuʻunga faingataʻa ʻi he ʻapí, ko e kī ke lavameʻa aí ko e faʻifaʻitaki kia Sīsū pea tali ʻa ʻene tatakí. Ko e fakatātaá, ko e mali ʻa Jerry taʻu 35 kia Lana, ko e faʻē ʻa ha taʻahine taʻu hongofulu tupu, naʻe tupu ai ha palopalema ʻa ia naʻe ʻikai ha taha ʻo kinaua ʻe sioloto atu ki ai. ʻOku fakamatala ʻa Jerry: “Naʻá ku ʻilo, ke hoko ko ha ʻulu leleí, naʻe fiemaʻu ke u ngāueʻaki ʻa e ngaahi tefitoʻi moʻoni tatau mei he Tohitapú ʻokú ne ʻomai ʻa e lavameʻa ki he ngaahi fāmili kehé. Ka naʻe vave ʻeku ʻiloʻi naʻe pau ke u ngāueʻaki kinautolu ʻi ha poto mo e ʻiloʻilo lahi ange.” Naʻe vakai ange kiate ia ʻa e taʻahine ʻa hono malí ʻi he tuʻunga ko e tokotaha naʻe hoko ʻo ʻi he vahaʻa ʻoʻona mo ʻene faʻeé pea naʻá ne loto-mamahi lahi ʻaupito ai. Naʻe fiemaʻu kia Jerry ʻa e ʻiloʻilo ke ne sio ko e fakakaukaú ni naʻe kaunga ia ki he meʻa naʻe leaʻaki mo fai ʻe he taʻahiné. Naʻe anga-fēfē ʻene ngāue ki he tuʻungá ni? ʻOku tali ʻe Jerry: “Naʻá ku felotoi mo Lana ʻi ha tuʻunga ʻi he taimi ko ʻení, ʻe tokangaʻi ʻe Lana ʻa e tafaʻaki ʻo e akonekina fakaemātuʻá kau tokangataha au ki hono langa hake ha vahaʻangatae lelei mo e taʻahine ko ʻeni ʻa Laná. ʻI he faai mai ʻa e taimí, naʻe ʻomai ʻe he meʻá ni ha ngaahi ola lelei.”
15 ʻI he taimi ʻoku tau fehangahangai ai mo e ngaahi tuʻunga faingataʻa ʻi ʻapí, ʻoku fiemaʻu kiate kitautolu ʻa e ʻiloʻiló ke maʻu ai ʻa e ʻuhinga ʻoku fai pehē ai ʻa e ngaahi mēmipa ʻo e fāmilí ʻi he leá mo e ngāué. ʻOku toe fiemaʻu kiate kitautolu ʻa e potó ke ngāueʻaki totonu ai ʻa e ngaahi tefitoʻi moʻoni fakaʻotuá. Ko e fakatātaá, naʻe ʻilo lelei ʻa Sīsū ki he ʻuhinga naʻe ala ange ai kiate ia ʻa e fefine naʻe faingataʻaʻia mei ha ʻaú, pea naʻá ne feangai fakapotopoto mo manavaʻofa kiate ia. (Livitiko 15:25-27; Maake 5:30-34) Ko e potó mo e ʻiloʻiló ko e ongo ʻulungaanga ia ʻo hotau Takimuʻá. (Palovepi 8:12) ʻOku tau fiefia kapau ʻoku tau ngāue ʻi he founga ko ia naʻá ne mei faí.
‘Hanganaki Fuofua Kumi ʻa e Puleʻangá’
16. Ko e hā ʻoku totonu ke fakatefito ai ʻa ʻetau moʻuí, pea naʻe anga-fēfē hono fakahāhaaʻi ʻe Sīsū ʻa e meʻá ni ʻaki ʻene faʻifaʻitakiʻangá?
16 Naʻe fakamahinoʻi ʻe Sīsū ʻa e meʻa ʻoku totonu ke fakatefito ai ʻa e moʻui ʻa e faʻahinga ko ia ʻoku nau tali ʻene tuʻunga-takí. Naʻá ne pehē: “Ko ia, hanganaki fuofua kumi ʻa e puleʻangá pea mo ʻene māʻoniʻoní [ʻa e ʻOtuá].” (Mātiu 6:33, NW) Pea ʻi heʻene faʻifaʻitakiʻangá, naʻá ne fakahaaʻi mai ai kiate kitautolu ʻa e anga hono fai ʻení. ʻI he ngataʻanga ʻo e vahaʻa taimi ko e ʻaho ʻe 40 ʻo e ʻaukai, fakalaulauloto, mo e lotu ʻi he hili hono papitaisó, naʻe fetaulaki ai ʻa Sīsū mo ha ʻahiʻahi. Naʻe tuʻuaki ange kiate ia ʻe Sētane ko e Tēvoló ʻa e tuʻunga-pule ki he “ngāhi puleʻanga kotoa pe ʻo e mamani.” Sioloto atu ki he moʻui naʻe mei maʻu ʻe Sīsū kapau naʻá ne tali ʻa e tuʻuaki ʻa e Tēvoló! Kae kehe, naʻe tokangataha ʻa Kalaisi ia ki hono fai ʻa e finangalo ʻo ʻene Tamaí. Naʻá ne toe ʻiloʻi foki, ko ha moʻui pehē ʻi he māmani ʻo Sētané ʻe fuonounou ia. Naʻá ne talitekeʻi leva ʻa e tuʻuaki ʻa e Tēvoló, ʻo ne pehē: “Kuo tohi, ‘Ko Sihova ko ho ʻOtuá kuo pau ke ke lotu ki aí, pea ko ia pē tokotaha kuo pau ke ke fai ki ai hoʻo ngāue toputapú.’” ʻI he hili pē iá, naʻe “kamata ke malanga [ʻa Sīsū] ʻo pehē: ‘Fakatomala, ʻa e kakai ko kimoutolú, he ko e puleʻanga ʻo hēvaní kuo ofi.’” (Mātiu 4:2, 8-10, 17, NW) ʻI he toenga ʻo ʻene moʻui fakaemāmaní, naʻe hoko ai ʻa Kalaisi ko ha tokotaha fanongonongo taimi-kakato ʻo e Puleʻanga ʻo e ʻOtuá.
17. ʻE lava fēfē ke tau fakahaaʻi ʻoku muʻomuʻa ʻi heʻetau moʻuí ʻa e ngaahi meʻa ʻo e Puleʻangá?
17 ʻOku totonu ke tau faʻifaʻitaki ki hotau Takimuʻá pea ʻoua naʻa fakaʻatā ʻa e māmani ʻo Sētané ke ne tauheleʻi kitautolu ki hono ʻai ʻa e ngāue totongi leleí mo e ngāue tuʻumaʻú ko ʻetau taumuʻa tefito ia ʻi he moʻuí. (Maake 1:17-21) He fakavalevale ē ko kitautolu ke hoko ʻo fihia ʻi ha tauhele ʻo e ngaahi ngāue fakamāmaní ʻo hoko pē ʻo fika ua ai ʻa e ngaahi meʻa ʻo e Puleʻangá! Kuo tuku mai ʻe Sīsū kiate kitautolu ʻa e ngāue ko hono malangaʻi ʻo e Puleʻangá mo e ngaohi-ākongá. (Mātiu 24:14; 28:19, 20) ʻIo, ʻoku tau maʻu nai ha fāmili pe ngaahi fatongia kehe ke tokangaʻi, ka ʻoku ʻikai ke tau fiefia ke ngāueʻaki ʻa e ngaahi efiafi poʻulí mo e ngaahi fakaʻosinga ʻo e uiké ke fakahoko ai hotau fatongia faka-Kalisitiane ke malanga mo faiakó? Pea he fakalototoʻa lahi ē ko e lolotonga ʻo e taʻu fakangāue 2001, ko e toko 780,000 nai naʻe malava ke nau ngāue ko e kau faifekau pe kau tāimuʻa taimi-kakató!
18. Ko e hā ʻe tokoni kiate kitautolu ke tau maʻu ai ʻa e fiefia ʻi he ngāue fakafaifekaú?
18 ʻOku fakahaaʻi mai ʻe he ngaahi fakamatala Kōsipelí ʻa Sīsū ko ha tangata ngāue pea pehē foki ko ha tokotaha ʻokú ne maʻu ʻa e ngaahi ongoʻi manavaʻofa. ʻI he vakai atu ki he ngaahi fiemaʻu fakalaumālie ʻa e faʻahinga takatakai ʻiate iá, naʻá ne ongoʻi fakaʻofaʻia ʻiate kinautolu pea foaki vēkeveke kiate kinautolu ha tokoni. (Maake 6:31-34) ʻOku hoko ʻetau ngāue fakafaifekaú ʻo fakafiefia ʻi heʻetau kau atu ki ai ʻi he ʻofa ki he niʻihi kehé pea mo ha holi loto-moʻoni ke tokoni kiate kinautolú. Ka te tau maʻu fēfē nai ha holi pehē? “ʻI he taimi naʻá ku taʻu hongofulu tupu aí,” ko e lau ia ʻa ha kiʻi talavou ko hono hingoá ko Jayson, “naʻe ʻikai te u loko fiefia he ngāue fakafaifekaú.” Ko e hā naʻá ne tokoniʻi ia ke ne fakatupu ʻa e ʻofa ki he ngāué ni? ʻOku tali ʻe Jayson: “ʻI hoku fāmilí, naʻe vaheʻi maʻu pē ʻa e ngaahi pongipongi Tokonakí ki he malaʻe ngāué. Naʻe lelei ʻeni kiate au koeʻuhi ko e lahi ange ʻeku ʻalu ʻi he ngāue fakafaifekaú, ko e lahi ange ia ʻeku sio ki he lelei ʻoku fakahoko aí pea ko e lahi ange ai pē ia ʻeku fiefia aí.” ʻOku totonu mo kitautolu foki ke tau kau tuʻumaʻu mo tōtōivi ʻi he ngāue fakafaifekaú.
19. Ko e hā ʻoku totonu ko ʻetau fakapapaú ia ʻi he fekauʻaki mo e tuʻunga-taki ʻa Kalaisí?
19 Ko e moʻoni ʻoku fakaivifoʻou mo fakafiemālie ʻa hono tali ʻa e tuʻunga-taki ʻa Kalaisí. ʻI heʻetau fai iá, ʻoku hoko leva ai ʻa e tuʻunga talavoú ko ha taimi ia ki he fakalakalaka ʻi he ʻiló mo e potó. ʻOku hoko ai ʻa e moʻui fakafāmilí ko ha matavai ʻo e melino mo e fiefia, pea ko e ngāue fakafaifekaú ko ha ngāue ia ʻokú ne ʻomai ʻa e fiefia mo e fiemālie. Ko ia ai, ʻai ke tau fakapapauʻi leva ke fakahāhā ʻi heʻetau moʻui fakaʻahó pea ʻi he ngaahi fili ʻoku tau faí ʻoku moʻoni kiate kitautolu ʻa e tuʻunga-taki ʻa Kalaisí. (Kolose 3:23, 24) Neongo ia, kuo tokonaki mai ʻe Sīsū Kalaisi ʻa e tuʻunga-takí ʻi ha toe tafaʻaki ʻe taha—ko e fakatahaʻanga Kalisitiané. Ko e kupu hoko maí ʻe lāulea ai ki he founga ʻe lava ke tau maʻu ai ha ʻaonga mei he tokonaki ko ʻení.
[Fakamatala ʻi lalo]
a Kuo liliu ʻa e ngaahi hingoa ʻe niʻihi.
ʻOkú Ke Manatuʻi?
• ʻOku anga-fēfē ʻa e ʻaonga kiate kitautolu ʻa e muimui ki hotau Takimuʻa kuo fakanofo ʻe he ʻOtuá?
• ʻE lava fēfē ʻe he kau talavoú ke fakahāhā ʻoku nau loto ke muimui ʻi he tuʻunga-taki ʻa Sīsuú?
• Ko e hā ʻa e kaunga ʻo e tuʻunga-taki ʻa Kalaisí ki he moʻui fakafāmili ʻa e faʻahinga ko ia ʻoku anganofo ki aí?
• ʻE lava fēfē ke fakahaaʻi ʻe heʻetau ngāue fakafaifekaú ʻoku moʻoni kiate kitautolu ʻa e tuʻunga-taki ʻa Kalaisí?
[Fehuʻi ki he Ako]
[Fakatātā ʻi he peesi 9]
Ko e tuʻunga talavoú ko ha taimi lelei ia ke maʻu ai ʻa e ʻiloʻi ʻo e ʻOtuá pea mo hotau Takimuʻa kuo fakanofó
[Fakatātā ʻi he peesi 10]
Ko e anganofo ki he tuʻunga-taki ʻa Kalaisí ʻoku pouaki ai ʻa e fiefia ʻa e fāmilí
[Fakatātā ʻi he peesi 12]
Naʻe fuofua kumi ʻa Sīsū ki he Puleʻangá. ʻOkú ke pehē?