Fakatolongá—ʻOku Feʻunga Ia ki he Kau Kalisitiané?

ʻI heʻene ofi ke maté, naʻe fai ai ʻe he pēteliake loto-tōnunga ko Sēkopé ʻa e kole fakaʻosi ko ení: “Ke mou tanu au mo ʻeku matuʻa ʻi he ʻana ʻoku ʻi he ʻapi ʻo Efiloni ko e Heti; ʻi he ʻana ʻoku ʻi he ʻapi ko Makipila, ʻa ia ʻoku tuʻu ki he hahake ʻo Mamili ʻi he fonua ko Kenani.”​—Senesi 49:​29-31.

NAʻE fakaʻapaʻapaʻi ʻe Siosifa ʻa e kole ʻa ʻene tamaí ʻaki hono ngāueʻaki ha tōʻonga naʻe failahia ʻi ʻIsipite ʻi he taimi ko iá. Naʻá ne fekauʻi ʻene “kau tamaioʻeiki naʻe faitoʻo ke nau fakatolonga ʻene tamai.” Fakatatau ki he fakamatala ʻoku maʻu ʻi he Senesi vahe 50, naʻe ngāueʻaki ʻe he kau faitoʻó ʻa e ʻaho ʻe 40 naʻe angaʻakí ke teuteuʻi ai ʻa e ʻangaʻangá. Ko hono fakatolonga ʻo Sēkopé naʻe fakaʻatā ai ʻa e fuʻu fononga kāmeli ngaʻunu māmālie ʻa e ngaahi mēmipa ʻo e fāmilí mo e kau māʻolunga ʻo ʻIsipité ke nau fononga ʻi he kilomita nai ʻe 400 ke ʻave ʻa e ʻangaʻanga ʻo Sēkopé ki Hepeloni ki hono tanú.​​—Senesi 50:​1-​14.

ʻE malava nai ke ʻiloʻi ʻi ha ʻaho ʻa e sino fakatolonga ʻo Sēkopé? Ko e ngaahi faingamālie ki hono maʻú, ʻi he malumalu ʻo e tuʻunga lelei tahá, ʻoku siʻi ʻaupito. Ko ʻIsilelí ko ha feituʻu vaiʻia, ʻa ia ʻoku fakangatangata ai ʻa e faʻahinga koloa fakaʻāsioloki ʻoku ʻiloʻi aí. (Ekisoto 3:8) ʻOku tolonga ʻa e ngaahi naunau mētale mo e maka motuʻá, ka ko e lahi taha ʻo e ngaahi koloa ʻoku pelepelengesi angé, hangē ko e tupenú, letá, mo e ngaahi sino fakatolongá, kuo ʻikai te nau matuʻuaki ʻa e hauhau mo e liliu fakanatulá ʻi he faai mai ʻa e taimí.

Ko e hā koā ʻa e faifakatolonga? Ko e hā ne fai ai iá? ʻOku feʻunga ia ki he kau Kalisitiané?

Naʻe Kamata ʻi Fē ʻa e Tōʻonga ko Iá?

Ko e faifakatolongá ʻe lava ke fakamatalaʻi lelei ia ko hono ʻai ke tolonga ha ʻangaʻanga ʻo ha tangata pe ko ha monumanu. ʻOku hehema ʻa e kau faihisitōliá ke nau felotoi ko e faifakatolongá naʻe kamata ia ʻi ʻIsipite ka naʻe toe ngāueʻaki ia ʻe he muʻaki kau ʻAsīliá, kau Pēsiá mo e kau Sitiá. Mahalo ko e muʻaki mahuʻingaʻia ʻi hono ʻahiʻahiʻi ʻa e faifakatolongá naʻe tupu ia mei hono ʻiloʻi ʻa e ngaahi sino ne tanumia ʻi he toafa ʻoneʻoné pea naʻe tolonga fakanatulá. Ko ha tanumia pehē naʻe taʻofi nai ai ʻa e hauhaú mo e ʻeá mei he aʻu ki he ʻangaʻangá, ʻo taʻofi ai ʻa ʻene ʻauʻaungá. ʻOku fakamahalo ʻa e niʻihi ko e faifakatolongá naʻe kamata ia ʻi he taimi naʻe maʻu ai ʻa e ngaahi sino ne fakatolonga ʻi he netiloni (sōtiume kāponeiti), ko ha ʻalakalai ʻa ia ʻoku lahi pea takatakai ʻi ʻIsipite.

Ko e taumuʻa ʻa e tokotaha faifakatolongá ke taʻofi pē ʻa e ngāue fakaepekitīlia fakanatula ʻoku kamata ʻi loto ʻi ha ngaahi houa ʻo e maté, ʻo fakatupunga ke ʻi he tuʻunga taʻefeʻunga ai ʻa e movete ʻa e ʻangaʻangá. Kapau ʻe lava ke kalofi ʻa e  founga ko ení ke ʻoua ʻe hoko, ʻe ngata ai ʻa e ʻauʻaungá pe ʻe māmālie ʻaupito ia ʻi ha tuʻunga. ʻOku fiemaʻu ki ai ʻa e meʻa ʻe tolu: ko hono fakatolonga ʻa e ʻangaʻangá ʻi ha tuʻunga hangē ʻoku moʻuí, ko hono taʻofi ʻa e ʻauʻaungá, mo hono ʻoange ki he ʻangaʻangá ha meʻa talitekeʻi ʻo e maumau ʻa e fanga kiʻi ʻinisēkité.

Naʻe fakatolonga ʻe he kau ʻIsipite ʻo e kuonga muʻá ʻenau kau maté ʻo fakatefito ia ʻi he ngaahi ʻuhinga fakalotu. Ko ʻenau tui ki ha moʻui he hili ʻa e maté naʻe fehokotaki ia mo ha holi ʻa e kau maté ke kei fetuʻutaki mo e māmani matelié. Naʻa nau tui ko honau sinó ʻe ngāueʻaki ia ʻi he kotoa ʻo ʻitānití pea ʻe toe fakaivia ia ʻaki ʻa e moʻuí. Neongo hono failahia ʻa e fakatolongá, kuo ʻikai ke maʻu ha fakamatala faka-ʻIsipite ʻo aʻu mai ki he ʻahó ni ki he founga ʻo hono faí. Ko e lēkooti lelei tahá ko e lēkooti ko ia ʻa e faihisitōlia Kalisi ko Helotōtasí ʻi he senituli hono nima K.M. Kae kehe, kuo līpooti ʻo pehē, ko e feinga ke toe fakatupu ʻa e fakahoko ʻo e fakatolongá ʻaki hono ngāueʻaki ʻa e ngaahi fakahinohino ne ʻomai ʻe Helotōtasí kuo ʻikai ke mātuʻaki lavameʻa ia.

ʻOku Feʻunga Ia ki he Kau Kalisitiané?

Naʻe fakatolonga ʻa Sēkope ʻe he faʻahinga ʻa ia ko ʻenau ngaahi tui fakalotú naʻe ʻikai ke tatau ia mo haʻaná. Neongo ia, ʻoku faingataʻa ke tau fakaʻuta atu ko e taimi ko ē ne ʻave ai ʻe Siosifa ʻa e sino ʻo ʻene tamaí ki he kau fai faitoʻó, naʻá ne kole ke fai ʻa e ngaahi lotu mo e ouau naʻe fai fakataha nai mo e lahi taha ʻo e faifakatolonga naʻe fai ʻi ʻIsipite ʻi he taimi ko iá. Fakatouʻosi ʻa Sēkope mo Siosifa ko e ongo tangata tui mālohi kinaua. (Hepelu 11:​21, 22) Neongo ʻoku hā mahino naʻe ʻikai ke fekauʻi ia ʻe Sihova, ko e fakatolonga ʻo e ʻangaʻanga ʻo Sēkopé ʻoku ʻikai ke lave ki ai ʻa e ngaahi Konga Tohitapú ʻi ha tuʻunga ʻoku ʻikai lelei. Ko hono fakatolonga ʻo Sēkopé naʻe ʻikai ʻuhinga iá ko ha fokotuʻutuʻu ia ki he puleʻanga ʻIsilelí pe ki he fakatahaʻanga Kalisitiané. Ko hono moʻoní, ʻoku ʻikai ha ngaahi fakahinohino hangatonu ki he tuʻunga-leá ʻi he Folofola ʻa e ʻOtuá. Hili hono fakatolonga ʻo Siosifa tonu ʻi ʻIsipité, ʻoku ʻikai ha toe lave Fakatohitapu lahi ange ki he tōʻongá ni.​​—Senesi 50:26.

Ko e tuʻunga ʻauʻaunga ʻo e ʻangaʻanga ʻo e tangatá naʻe maʻu ʻi he ngaahi fonualoto ʻi Pālesitainé ʻoku fakahaaʻi ai naʻe ʻikai ko ha tōʻonga faka-Hepelū ke fakatolonga ʻa e maté, ko ha fakatolonga ʻi ha tuʻunga ki ha taimi lōloa. Hangē ko ení, ko Lāsalosi, naʻe ʻikai ke fakatolonga ia. Neongo ne takatakaiʻi ia ʻaki ʻa e tupenu, naʻe hohaʻa ʻa e kau mamatá ʻi he taimi naʻe ʻai ai ke tekaʻi ʻa e fuʻu maka naʻe tāpuniʻi ʻaki ʻa hono fonualotó. Koeʻuhi ne mate ʻa Lāsalosi ʻi he ʻaho ʻe fā ki muʻá, naʻe fakapapauʻi ʻe hono tuofefiné ʻe ʻi ai ha nanamu ʻi he taimi naʻe fakaava ai ʻa e fonualotó.​​—Sione 11:​38-​44.

Naʻe fakatolonga ʻa Sīsū Kalaisi? ʻOku ʻikai ke poupouʻi ʻe he ngaahi fakamatala Kōsipelí ʻa e fakamulituku ko ení. ʻI he taimi ko iá, ko e tōʻonga faka-Siú ia ke teuteuʻi ʻa e sinó ʻaki ʻa e ngaahi sipaisi mo e ngaahi lolo namu kakala ki muʻa ke tanu iá. Hangē ko ení, koeʻuhi ke teuteuʻi ʻa e sino ʻo Sīsuú, naʻe ʻomai ai ʻe Nikotīmasi ha sipaisi lahi ʻaupito ki he taumuʻa ko ení. (Sione 19:​38-​42) Ko e hā ne lahi fau ai ʻa e sipaisí? Ko e ʻofa ongoʻi loloto mo e ʻapasia kia Sīsuú naʻá ne ueʻi nai ia ki he nima-homo ko iá. ʻOku ʻikai fiemaʻu ke tau fakaʻosiʻaki ko e ngāueʻaki ko eni ʻo e sipaisí naʻe fakataumuʻa iá ke fakatolongaʻaki ʻa e sinó.

ʻE fakafepaki nai ha Kalisitiane ki he tōʻonga ʻo e faifakatolongá? Mei ha tuʻunga totonu ʻo e fakakaukaú, ko e faifakatolongá ko hano toloiʻi pē ia ʻo e meʻa ʻe ʻikai ala kalofi. Naʻa tau haʻu mei he efú, pea ko e efú te tau toe foki ki ai ʻi he maté. (Senesi 3:​19) Ka ko e hā hono fuoloa mei he taimi ʻo e maté ʻo aʻu ki he taimi ʻo e putú? Kapau ko e ngaahi mēmipa ʻo e fāmilí mo e ngaahi kaungāmeʻá ʻoku nau haʻu mei ha feituʻu mamaʻo pea ʻoku ʻi ai ha fakaʻamu ke sio ki he sinó, ʻoku ʻikai ha veiveiua ʻe pau ke fakatolonga ʻa e ʻangaʻangá ʻi ha tuʻunga.

 ʻI he tuʻunga Fakatohitapú leva, ʻoku ʻikai fiemaʻu ke fai ha hohaʻa kapau ʻoku tuʻutuʻuni ʻi he ngaahi fiemaʻu ʻa e feituʻú ke fakatolonga ʻa e sinó pe ʻoku loto ʻa e ngaahi mēmipa ʻi he fāmilí ke fakahoko ʻa e meʻá ni. Ko e kau maté ʻoku “ʻikai te nau ʻilo ha momoʻi meʻa.” (Koheleti 9:5) Kapau ʻoku nau ʻi he manatu ʻa e ʻOtuá, ʻe fokotuʻu hake kinautolu ki he moʻuí ʻi heʻene māmani foʻou ne talaʻofá.​​—Siope 14:​13-​15; Ngāue 24:15; 2 Pita 3:​13.

[Puha/Fakatātā ʻi he peesi 31]

FAKATOLONGÁ​—ʻI HE KUOHILÍ MO E LOLOTONGÁ

ʻI ʻIsipite ʻo e kuonga muʻá, ko e founga fakatolonga naʻe fakahoko nai ki ha ʻangaʻanga naʻe fakatuʻunga ia ʻi he tuʻunga ʻo ha fāmili. Ngalingali ko ha fāmili tuʻumālie naʻa nau fili ʻa e founga ko ení:

Naʻe toʻo ki tuʻa ʻa e ʻutó fakafou ʻi he avaʻi ihú ʻaki ha meʻangāue mētale. Hili iá, naʻe fai ha faitoʻo ki he ngeʻesi ʻulú ʻaki ʻa e ngaahi faitoʻo totonú. Ko e sitepu hokó naʻe kau ki ai ʻa hono toʻo ʻa e toʻotoʻonga kotoa pē tuku kehe ʻa e mafú mo e ongo kofuuá. Ke lava ʻo aʻu ki he loto keté, naʻe pau ke fai ha tafa ʻo e sinó, ka naʻe vakai ki he meʻá ni ko ha tuʻunga angahalaʻia. Ke kalofi ʻa e ʻīsiu fakatupunga fekīhiaki ko ení, naʻe fakanofo ai ʻe he kau faifakatolonga ʻIsipité ha tokotaha naʻe ui ko ha faitafa ke ne fai ʻa e tafá. Naʻá ne hola ʻi he ʻosi pē hono fai ení, he ko e ngaahi talatukí mo e tolomakaʻí ʻa e tautea ki he meʻa ko eni naʻe taku ko e faihiá.

Hili hono fakamaha ʻa e lotoʻi keté kotoa, naʻe fufulu fakaʻāuliliki ia. Naʻe tohi ʻa e faihisitōlia ko Helotōtasí: “Naʻa nau fakafonu ʻa loto ʻaki ʻa e mula mātuʻaki haohaoa kuo laiki, fakataha mo e kāsia, mo e faʻahinga sipaisi kehe kotoa pē tuku kehe ʻa e laipenó, pea tuitui leva ʻa e avá.”

Hokó, naʻe fakamaha leva ʻa e vai mei he sinó ʻaki hono fakavai ia ʻi he netiloní feʻunga mo e ʻaho ʻe 70. Hili iá, naʻe fufulu ʻa e ʻangaʻangá pea takaiʻi ia ʻi ha tuʻunga pōtoʻi ʻaki ʻa e līneni. Naʻe vali leva ʻa e līnení ʻaki ha lesini pe faʻahinga meʻa pikipiki naʻe ngāueʻaki ko ha kulū, pea naʻe tuku leva ʻa e sino kuo fakatolongá ʻi ha puha papa naʻe teuteuʻi fakaʻofoʻofa ʻa ia naʻe fakafuo ke hao ai ʻa e sino ʻo e tangatá.

ʻI he ʻahó ni, ko e faifakatolongá ʻe lava ke fakahoko ia ʻi ha taimi nounou. ʻOku faʻa fai ia ʻaki hono tuku ha tuʻunga feʻunga ʻo e huhuʻa faifakatolongá ki he ngaahi kālava-fokí mo e kālava-tufá pea pehē ki he loto keté mo e fatafatá. ʻI he faai mai ʻa e ngaahi taʻú, kuo faʻu ai ha huʻi kehekehe ʻo ngāueʻaki. Kae kehe, koeʻuhi ko e fakamolé mo e tuʻunga malú ko e fōmolotihaití ʻa e huʻi faifakatolonga ʻoku faʻa ngāueʻaki lahi tahá.

[Fakatātā]

Ko e puha mate koula ʻo Tuʻi Tutenikamení