Līpooti ʻa e Kau Fanongonongo ʻo e Puleʻangá

“Naʻá Ku Loto ke Tauhi ʻa e ʻOtuá”

“E HOKU kakai, haʻu meiate ia.” Ko ha ui fakaeʻāngelo ia naʻe fanongoa ʻe he ʻapositolo ko Sioné ʻi he ʻuluaki senituli T.S. ʻI hotau ʻahó, ʻoku laui miliona ʻa e faʻahinga loto-totonu kuo nau tali ia pea hola mei “Babilone koe lahi,” ʻa e ʻemipaea fakaemāmani ʻo e lotu loí. (Fakahā 18:​1-4, PM) ʻI honau lotolotongá ʻoku kau ai ʻa Wilner mei Haiti, ʻa ia ʻokú ne lave ki he meʻa naʻá ne hokosiá.

“Naʻe fāʻeleʻi au ʻi he 1956 ʻi ha fāmili Katolika līʻoa ʻi he kiʻi kolo ko St. Marc ʻi Haiti. Sioloto atu ki he fiefia ʻa hoku fāmilí ʻi hono fili au fakataha mo ha toko ua kehe mei homau koló, ke ʻalu ki ha seminālio ʻi St. Michel de l’Atalaye, Haiti. ʻI he 1980 leva, naʻe ʻave ai kimautolu ki Stavelot, Pelisiume, ki hano akoʻi lahi ange. ʻI aí, naʻa mau toe ʻalu ai ki ha ʻunivēsiti Katolika.

“ʻI he ʻuluaki taimí, naʻá ku vēkeveke ʻaupito ʻi he kau atu ki he tuʻunga fakapātelé. ʻI ha ʻaho ʻe taha, ʻi he loki maʻu meʻatokoni hoʻataá, naʻe kole mai ai ʻe he pātele naʻá ne tokangaʻi ʻa ʻemau kulupú ke u nofo hifo ʻi ha ngaahi miniti siʻi he ʻoku ʻi ai ʻa e meʻa ʻokú ne fie fakahā mai kiate au. Fakaʻuta atu ki heʻeku fuʻu ʻohovalé ʻi heʻene fakahaaʻi hangatonu mai ʻoku manako ʻiate aú! Naʻá ku talitekeʻi ʻa ʻene ngaahi feingá ka naʻe hoko ai ʻo siva fakaʻaufuli ʻa ʻeku ʻamanakí. Naʻá ku tohi ki hoku fāmilí ʻo fekauʻaki mo e meʻa naʻe hokó peá u mavahe leva mei he seminālió ʻi ha ngaahi māhina siʻi mei ai, neongo ʻenau taʻefiemālie ki aí. Naʻá ku maʻu ha nofoʻanga ʻi he koló pea hokohoko atu ʻa e akó ʻi ha ngāue kehe ia.

“ʻI heʻeku toe foki ki St. Marc, naʻe ʻikai ʻaupito ke toe ʻi ai haʻaku falala ki he Siasi Katoliká. Neongo ia, naʻá ku loto ke tauhi ʻa e ʻOtuá, ka naʻe ʻikai te u ʻilo ʻa e meʻa ke faí. Naʻá ku ʻalu ki he siasi ʻAho Fitú, siasi ʻEpenisá pea mo e siasi Māmongá. Naʻá ku ʻauhia fakalaumālie.

“Naʻá ku manatuʻi leva ʻa e taimi naʻá ku ako ai ʻi he seminālio ʻi Pelisiumé ʻa ʻeku faʻa lau ʻa e Tohitapu Crampon. ʻI aí, naʻá ku ʻiloʻi ai ʻoku ʻi ai ha huafa ʻo e ʻOtuá. Ko ia ʻi hono ngāueʻaki ʻa hono huafá, naʻá ku lotu faivelenga ai ki he ʻOtuá ke tokoni mai ke u maʻu ʻa e lotu moʻoní.

“Taimi nounou mei ai, naʻe hiki mai ha toko ua ʻo e Kau Fakamoʻoni ʻa Sihová ki hoku kaungāʻapí. Naʻá na nonga, anga-ʻaʻapa mo anga-molumalu. Ko ʻena founga moʻuí naʻe maongo ia kiate au. ʻI he ʻaho ʻe taha, ko e taha ʻi he ongo Fakamoʻoni ko ení naʻá ne fakaafeʻi au ke u maʻu ʻa e Fakamanatu fakataʻu ʻo e pekia ʻa Kalaisí. Naʻá ku fiefia lahi ʻaupito ʻi he fakatahá peá u loto ai ki ha ako Tohitapu tuʻumaʻu mo e Kau Fakamoʻoní. ʻI he māhina nai ʻe ono, naʻá ku tui fakapapau kuó u maʻu ʻa e founga totonu ke tauhi ai ʻa e ʻOtuá. Naʻá ku fakatapui ʻa ʻeku moʻuí kia Sihova peá u papitaiso ai ʻi Nōvema 20, 1988.”

ʻI he faai mai ʻa e taimí, naʻe kau atu ai ʻa Wilner ki he ngāue taimi-kakató. ʻI he ʻahó ni, ʻokú ne ngāue ko ha tokotaha mātuʻa ʻi he fakatahaʻangá. Ko ia mo hono uaifí, fakataha mo ʻena ongo tamaikí, ʻoku nau ngāue fiefia ʻi he fakatahaʻangá.

[Fakatātā ʻi he peesi 9]

ʻI hono lau ʻa e Tohitapú, naʻe ʻiloʻi ai ʻe Wilner ko e huafa ʻo e ʻOtuá ko Sihova