ʻOkú Ke Manatuʻi?

Kuó ke fiefia ʻi hono lau ʻa e ngaahi ʻīsiu fakamuimui ʻo e Taua Leʻo? Sai, sio angé pe ʻe lava ke ke tali ʻa e ngaahi fehuʻi hokó:

• Ko e hā ʻa e polokalama fakafoʻituitui fekauʻaki mo e Malanga ʻi he Moʻungá te ke ngāueʻaki nai ke fakasiʻisiʻi ʻa e loto-mafasiá?

ʻI he ʻaho taki taha, ʻe lava ke ke lau ai ʻa e taha ʻo e ngaahi akonaki tefito ʻa Sīsū ʻoku ʻomai ʻi he malanga ko iá pe ʻi ha toe feituʻu kehe pē ʻi he ngaahi Kōsipelí. ʻI he fakalaulauloto ki he akonaki ko iá pea feinga ke ngāueʻaki fakafoʻituituí, ngalingali te ke maʻu ai ʻa e fiefia lahi ange pea holo ai ʻa e loto-mafasiá.​—12/15, peesi 12-​14.

• Ko e hā ʻa e ʻuhinga lelei ʻe tolu ke akoʻi ai ʻe he kau mātuʻa ʻi he fakatahaʻangá ʻa e kau sevāniti fakafaifekaú ke nau fakahoko ʻa e ngaahi fatongia lahi angé?

Koeʻuhi ko e tupulaki ʻi he tokolahi ʻo e Kau Fakamoʻoni ʻa Sihová, ʻoku fiemaʻu ʻa e kau tangata fua fatongia tokolahi ange ke nau tokoniʻi ʻa e faʻahinga toki papitaiso foʻoú ke nau fakalakalaka. Ko e ngaahi palopalema ʻi he taʻumotuʻá pe moʻui leleí ʻokú ne fakangatangata he taimí ni ʻa e meʻa ʻe lava ke fai ʻe he kau mātuʻa fuoloá. Pea ʻoku fua ʻe he kau mātuʻa lavameʻa ʻe niʻihi ʻa e ngaahi fatongia ʻoku fakalaka atu ia ʻi he fakatahaʻanga fakalotofonuá, ʻo ʻikai ai te nau malava ke fai ʻa e meʻa lahi ʻi heʻenau fakatahaʻangá hangē ko ia ʻi muʻá.​—1/1, peesi 29.

• ʻOku anga-fēfē ʻa e falala ʻa e kakaí ki he ngaahi ʻotua ʻoku ʻikai ke moʻoní?

ʻOku lotu ʻa e tokolahi ki he ngaahi ʻotua ʻo ʻenau lotú, ka ko e ngaahi ʻotuá ni ko e ngaahi ʻotua ʻikai ke moʻui ʻo ʻikai lava ke nau fai ha fakamoʻui ʻo hangē pē ko Pēalí ʻi he ʻaho ʻo ʻIlaisiaá. (1 Tuʻi 18:​26, 29; Sāme 135:​15-​17) ʻOku fakalāngilangiʻi ʻe he niʻihi ʻa e faʻahinga ʻoku nau fai ʻa e fakafiefiá pe faʻahinga ʻiloa ʻi he ngaahi sipotí, ʻa ia ʻoku ʻikai lava ke nau tokonaki mai ha ʻamanaki moʻoni ki he kahaʻú. ʻI hono kehé, ʻoku ʻi ai moʻoni ʻa Sihova pea ʻokú ne fakahoko ʻene ngaahi taumuʻá.​—1/15, peesi 3-5.

• Ko e hā ʻoku lava ke tau ako mei he tali ʻa Keini ki he fakatokanga ʻa e ʻOtuá?

Kuo ʻomai ʻe he ʻOtuá kia kitautolu ʻa e tauʻatāina ke fili, pea ʻe lava ke tau fili ke fai ʻa e meʻa ʻoku totonú kae ʻikai ke tafoki mei he fai ʻa e meʻa ʻoku leleí, ʻa ia naʻe pehē ʻa e tali ʻa Keiní. ʻOku toe fakahaaʻi ʻi he fakamatala ʻi he Tohitapú ʻoku fakahoko ʻe Sihova ʻa ʻene ngaahi fakamāú ki he kau taʻefakatomalá.​—1/15, peesi 22-3.

• Ko e hā ʻoku tautefito ai ki he taimí ni ʻa e mahuʻinga ʻo e tuʻunga maʻá?

ʻI he feliliuaki ʻa e ngaahi founga moʻui fakasōsialé, ʻoku fakamoleki ai ʻe he tokolahi ʻa e taimi siʻi ʻi hono fakamaʻa honau ʻapí ʻi he tuʻunga anga-mahení. Ko hono tukunoaʻi ʻa e tuʻunga maʻá ʻi he meʻakaí mo e vaí ʻe lava ke ne ʻomai ha ngaahi fakatuʻutāmaki ki he moʻuí. ʻI he tānaki atu ki he maʻa fakaesinó, ʻoku fakamamafaʻi ʻe he Tohitapú ʻa e fai ʻo e tokanga ki he tuʻunga maʻa fakalaumālié, fakaʻulungāngá mo e fakaʻatamaí.​—2/1, peesi 3-6.

• Fekauʻaki mo e kau fakamoʻoni ki muʻa ʻi he Kalisitiané, naʻe pehē ʻe Paula ʻe “ʻoua naʻa fakahaohaoa ʻa kinautolu taʻe te tau kau ai.” ʻO anga-fēfē? (Hepelu 11:40)

Lolotonga ʻa e mileniume ka hoko maí, ko Kalaisi mo hono fanga tokoua pani ʻi hēvaní, ʻi heʻenau ngāue ko e ngaahi tuʻi mo e kau taulaʻeikí, te nau ʻomai ʻa e ngaahi ʻaonga ʻo e huhuʻí ki he faʻahinga toetuʻú. Ko e faʻahinga loto-tōnunga pehē hangē ko e faʻahinga ko ia ʻoku hiki ʻi he Hepelu vahe 11 ʻe “fakahaohaoa” ai.​—2/1, peesi 23.

• Ko e hā ʻa e poini ʻa Paulá ʻi heʻene tala ki he kau Hepeluú: “Kuo teʻeki ke mou talituʻu ke toto”? (Hepelu 12:4)

Naʻá ne ʻuhingá ko e talituʻu ʻo aʻu ki he tuʻunga ʻo e maté. Naʻe ʻi ai ʻa e ngaahi faʻifaʻitakiʻanga fakahisitōlia ʻo e faʻahinga naʻa nau faitōnunga ʻo aʻu ki he maté. Neongo ko e kau Hepelū naʻe tohi ki ai ʻa Paulá naʻe ʻikai ke ʻahiʻahiʻi ʻo aʻu ki he tuʻunga ko iá, naʻe fiemaʻu ke nau fakalakalaka ki he matuʻotuʻá, ʻo langa hake ʻenau tuí ke nau kātekina ha meʻa pē nai ʻe hoko mai.​—2/15, peesi 29.

• Ko e hā ʻoku lelei ai ke fakaʻehiʻehi mei he pehē ʻoku fakavaivaiʻi ʻe Sihova ʻa ʻene fakamaau totonú ʻaki ʻa e mēsí?

ʻI he ngaahi lea ʻe niʻihi, ko e “fakavaivaiʻí” ʻe lava ke ʻuhinga ia ki he fakanānā pe taʻotaʻofi. Ko Sihová ko ha ʻOtua fakatouʻosi ʻo e fakamaau totonu mo e meesi, pea ʻi heʻene fakahāhā ʻa e ongo ʻulungaanga ko iá, ʻoku ngāue fehoanakimālie ai ʻa e uá ni. (Ekisoto 34:​6, 7; Teutalonome 32:4; Sāme 116:5; 145:9) Ko e fakamaau totonu ʻa Sihová ʻoku ʻikai fiemaʻu ia ke fakamoluuʻi pe fakavaivaiʻi ʻaki ʻa e mēsí.​—3/1, peesi 30.

• ʻOku totonu ki ha Kalisitiane ke ne fakatolonga ʻa e sino ʻo ha tokotaha ʻoku ʻofa ai kuo mate?

Ko e faifakatolongá ko ha founga ia ki hono ʻai ke tolonga ha ʻangaʻanga. Ko e niʻihi ʻi he kuonga muʻá naʻa nau muimui ʻi he tōʻongá ni ʻi ha ngaahi ʻuhinga fakalotu. ʻE ʻikai ke pehē ia ʻi he kau lotu moʻoní. (Koheleti 9:5; Ngāue 24:15) Ko e fakatolongá te ne toloiʻi pē ʻa e meʻa ʻe ʻikai ala kalofí, ko e foki ʻa ha sino ki he efú. (Senesi 3:​19) Ka ʻe ʻikai fiemaʻu ke fai ha hohaʻa kapau naʻe fiemaʻu ʻe he laó ʻa e faifakatolongá, fiemaʻu ia ʻe ha ngaahi mēmipa ʻe niʻihi ʻi he fāmilí, pe naʻe fiemaʻú koeʻuhi ko e pau ke fononga mamaʻo mai ʻa e niʻihi ki ha putu.​—3/15, peesi 29-​31.

• Ko e hā ʻa e faʻifaʻitakiʻanga faka-Tohitapu ʻoku akoʻi mai ai kia kitautolu ʻoku talitali lelei ʻe he ʻOtuá ʻa e kakai ʻo e ngaahi puleʻanga kotoa pē?

Naʻe fekauʻi ʻe Sihova ʻa e palōfita ko Sioná ke ne fai ha fakatokanga ki he kakai Ninivé, pea naʻe fakaʻaiʻai ʻe he ʻOtuá ʻa Siona ke ne tali ʻenau fakatomalá. ʻI he leá mo e faʻifaʻitakiʻangá, naʻe fakaʻaiʻai ai ʻe Sīsū ʻa hono fakahaaʻi ʻo e ʻofá ki he kau Samēliá. Naʻe maʻu fakatouʻosi ʻe he ʻapositolo ko Pitá mo e ʻapositolo ko Paulá ha ngafa ʻi hono ʻoatu ʻa e ongoongo leleí ki he faʻahinga ʻikai ko e Siú. Mei he ngaahi faʻifaʻitakiʻanga ko iá, ʻoku lava ke tau sio ai ki he fiemaʻu ke feinga ke tokoniʻi ʻa e kakai ʻo e ʻātakai kotoa pē.​—4/1, peesi 21-4.