Ko e Ngaahi Lao Fakaʻotuá ko e Lelei Pē Maʻa Kitautolu

“ʻOi ʻeku ʻofa ki hoʻo lao na!”​—Sāme 119:97.

1. Ko e hā ʻa e fakakaukau lahi ki he talangofua ki he ngaahi lao fakaʻotuá?

 KO E talangofua ki he ngaahi lao fakaʻotuá ʻoku ʻikai ke manakoa ia ʻi he ʻahó ni. Ki he tokolahi, ko e moʻulaloa ki ha mafai māʻolunga taʻehāmai ʻoku hā ngali taʻeʻuhinga ia. ʻOku tau moʻui ʻi ha kuonga ʻo e tui ki he feliliuaki fakaeʻulungāngá, ko e hā nenefu ʻa e ngataʻanga ʻo e tonú mo e halá, pea mo e ngaahi tuʻunga hā taʻemahino ʻaupito. (Palovepi 17:15; Aisea 5:20) ʻI he tapua atu ha founga fakakaukau ʻoku anga-maheniʻaki ʻi he ngaahi sōsaieti taʻefakalotu lahi, naʻe pehē ai ʻi ha savea naʻe toki fai ko e “tokolahi taha ʻo e kau ʻAmeliká ʻoku nau loto ke nau fili pē maʻa kinautolu ʻa e meʻa ʻoku tonu, lelei mo mohu ʻuhingá.” ʻOku nau fili ke “ʻikai ha ʻOtua fefeka. ʻIkai ha ngaahi lao fefeka. ʻIkai ha kau pule māʻolunga fefeka, tuʻunga fakaeʻulungaanga fefeka pe ko ha toe meʻa pehē. Naʻe pehē ʻe ha tangata fakatotolo fakasōsiale ko e ʻahó ni “ʻoku ʻamanekina ai ʻa e niʻihi fakatāutahá ke nau fakapapauʻi pē ʻia kinautolu ʻa e meʻa ko ia ʻoku ʻuhinga ko hono tataki ha moʻui ʻoku lelei mo maʻá.” Naʻá ne hoko atu: “Ko ha faʻahinga founga pē ʻo e mafai māʻolungá kuo pau ke fengaʻunuʻaki ʻene ngaahi tuʻutuʻuní ki he ngaahi fiemaʻu ʻa e kakai moʻoní.”

2. ʻOku anga-fēfē ʻa e felāveʻi vāofi ʻa e fuofua lave ʻi he Tohitapú ki he laó mo e tāpuaki pea mo e hōifua fakaʻotuá?

² Koeʻuhi ʻoku fehuʻia ʻe he fuʻu tokolahi ʻa e mahuʻinga ʻo e ngaahi lao ʻa Sihová, ʻoku fiemaʻu ai ke tau fakafefekaʻi ʻetau tuipau ko ia ko e ngaahi tuʻunga fakaʻotuá ko e lelei pē maʻa kitautolu. ʻOku mahuʻinga ke fakakaukau ki he fakamatala ʻa ia ʻoku fuofua lave ai ki he laó ʻi he Tohitapú. ʻI he Senesi 26:​5, ʻoku tau lau ai ʻa e folofola ʻa e ʻOtuá: “Naʻe tuitala [“talangofua,” NW] ʻa Epalahame . . . mo ne tauhi ʻeku ngaahi fekau, ʻa ʻeku ngaahi tuʻutuʻuni, mo ʻeku ngaahi fono, pea mo ʻeku ngaahi lao.” Naʻe leaʻaki ʻa e ngaahi foʻi lea ko iá ʻi he laui senituli ia ki muʻa ʻi hono ʻoange ʻe Sihova ha sisitemi lao fakaikiiki ki he ngaahi hako ʻo ʻĒpalahamé. Naʻe anga-fēfē hono fakapaleʻi ʻe he ʻOtuá ʻa e talangofua ʻa ʻĒpalahamé, ʻo kau ai ʻa e talangofua ki Heʻene ngaahi laó? Naʻe palōmesi ange ʻa Sihova ko e ʻOtuá kiate ia: “Ko ho hako ʻe monuʻia ai ʻa e ngaahi puleʻanga ʻo mamani.” (Senesi 22:18) Ko e talangofua ki he ngaahi lao fakaʻotuá ʻoku fehokotaki vāofi ia mo e tāpuaki pea mo e hōifua fakaʻotuá.

3. (a) Ko e hā ʻa e ongoʻi ki he lao ʻa Sihová naʻe fakahāhā ʻe ha tokotaha-tohi-saame ʻe taha? (e) Ko e hā ʻa e ngaahi fehuʻi ʻoku tuha mo ʻetau tokangá?

³ Ko e taha ʻo e kau-tohi-sāmé—ngalingali ko ha pilinisi ʻo Siuta mo ha tuʻi ʻi he kahaʻú—naʻá ne fakahaaʻi ha ongoʻi ʻa ia naʻe ʻikai ke faʻa fekauʻaki ia mo e laó. Naʻá ne kalanga ki he ʻOtuá: “ʻOi ʻeku ʻofa ki hoʻo lao na!” (Sāme 119:​97, fakaʻītali ʻamautolu.) Naʻe ʻikai ko ha mapuna fakafokifā fakaeongo pē eni. Ko ha fakahāhā ia ʻo e ʻofa ki he finangalo ʻo e ʻOtuá hangē ko ia ʻoku fokotuʻu mai ʻi heʻene laó. Ko Sīsū Kalaisi, ʻa e ʻAlo haohaoa ʻo e ʻOtuá, naʻá ne maʻu ʻa e ngaahi ongoʻi meimei tatau. Naʻe fakamatalaʻi fakaekikite ʻa Sīsū ʻokú ne pehē: “ʻE hoku ʻOtua, ʻoku ou manako ke u fai hoʻou finangalo; pea ʻoku ʻi hoku loto fatu hoʻo lao.” (Sāme 40:8;  Hepelu 10:9) Fēfē kitautolu? ʻOku tau fiefia ʻi hono fai ʻa e finangalo ʻo e ʻOtuá? ʻOku tau tuipau ki he ʻaonga mo e lelei ʻo e ngaahi lao ʻa Sihová? Ko e hā ʻa e tuʻunga ʻo e talangofua ki he ngaahi lao ʻa e ʻOtuá ʻi heʻetau lotú, ʻi heʻetau moʻui fakaʻahó, ʻi heʻetau fili ʻoku faí, pea ʻi hotau ngaahi vā mo e niʻihi kehé? Ke ʻofa ki he lao fakaʻotuá, ʻoku lelei ke tau mahinoʻi ʻa e ʻuhinga ʻoku maʻu ai ʻe he ʻOtuá ʻa e totonu ke faʻu mo fakahoko mai ʻa e ngaahi laó.

Sihova​—Ko e Tokotaha Foaki-Lao Totonú

4. Ko e hā ʻoku hoko ai ʻa Sihova ko e tokotaha Foaki-Lao aoniu mo totonú ia?

⁴ ʻI he tuʻunga ko e Tokotaha-Fakatupú, ko Sihova ʻa e tokotaha Foaki-Lao aoniu mo totonu ia ʻi he ʻunivēsí. (Fakahā 4:​11) Naʻe fakamatala ʻa e palōfita ko ʻAiseá: “Ko Sihova ʻa hotau tokotaha Foaki-Laó.” (Aisea 33:​22, NW) Kuó ne fokotuʻu ʻa e ngaahi lao fakamatelie ʻokú ne puleʻi ʻa e meʻa fakatupu ʻoku moʻuí mo ʻikai ke moʻuí. (Siope 38:​4-​38; 39:​1-​12; Sāme 104:​5-​19) ʻI he tuʻunga ko ha fakatupu ʻa e ʻOtuá, ʻoku moʻulaloa ai ʻa e tangatá ki he ngaahi lao fakamatelie ʻa Sihová. Pea neongo ko e tangatá ʻoku tauʻatāina ke fili ke fai lelei pe kovi, ʻo malava ke fakaʻuhinga ʻiate ia pē, ʻokú ne toki fiefia pē ʻi he taimi ʻokú ne fakamoʻulaloaʻi ai ia ki he ngaahi lao fakaeʻulungaanga mo fakalaumālie ʻa e ʻOtuá.​—Loma 12:1; 1 Kolinito 2:​14-​16.

5. ʻOku anga-fēfē hono fakamoʻoniʻi ʻoku moʻoni ʻa e tefitoʻi moʻoni ʻi he Kaletia 6:7 ʻi he fekauʻaki mo e ngaahi lao fakaʻotuá?

⁵ Hangē ko ia ʻoku tau ʻiló, ko e ngaahi lao fakamatelie ʻa Sihová ʻoku ʻikai ala maumauʻi ia. (Selemaia 33:​20, 21) Kapau ʻoku fakafepaki ha taha ki ha ngaahi lao fakamatelie ʻe niʻihi, hangē ko e lao ʻo e kalāvité, ʻokú ne tofanga ʻi hono ngaahi nunuʻá. ʻI he founga meimei tatau, ko e ngaahi lao fakaeʻulungaanga ʻa e ʻOtuá ʻoku taʻealatāmateʻi ia pea ʻikai lava ke taʻofi pe maumauʻi ʻaki ʻa e taʻetauteá. ʻOku fakahoko pau kinautolu ʻo hangē pē ko ʻene ngaahi lao fakanatulá, neongo ʻe ʻikai nai ke vave tatau hono nunuʻá. “Talaʻehai ʻoku ala pāʻusiʻi ʻa e ʻOtua; he ʻilonga pe meʻa ʻoku to ʻe ha tangata, ko ia ia te ne utu foki.”—Kaletia 6:7; 1 Timote 5:24.

Ko e Ngataʻanga ʻo e Lao ʻa Sihová

6. ʻOku lahi fēfē ʻa e ngaahi lao fakaʻotuá?

⁶ Ko ha fakahāhā tuʻu-ki-muʻa ʻo e lao fakaʻotuá ko e Lao ʻa Mōsesé. (Loma 7:​12) ʻI he tukuʻau mai ʻa e taimí, naʻe fetongi ʻe Sihova ko e ʻOtuá ʻa e Lao ʻa Mōsesé ʻaki “ʻa e lao ʻa Kalaisi.” a (Kaletia 6:2; 1 Kolinito 9:21) ʻI he tuʻunga ko e kau Kalisitiane ʻi he malumalu ʻo e “lao haohaoa, ʻa e lao tauʻataina,” ʻoku tau mahinoʻi ʻoku ʻikai ke fakangatangata pē ʻe he ʻOtuá ʻene ngaahi fakahinohinó ki he ngaahi tafaʻaki pau ʻo ʻetau moʻuí, hangē ko e ngaahi tui fakatokāteliné pe ko e ngaahi ouau kātoangá. Ko ʻene ngaahi tuʻungá ʻokú ne kāpui ʻa e tafaʻaki kotoa ʻo e moʻuí, ʻo kau ai ʻa e ngaahi meʻa fakafāmilí, ngaahi alea fakapisinisí, ʻulungaanga ke fai ki he tangatá pe fefiné, fakakaukau ki he kaungā Kalisitiané, mo e kau ʻi he lotu moʻoní.—Semisi 1:​25, 27.

7. ʻOmai ha ngaahi fakatātā ʻo e ngaahi lao mahuʻinga fakaʻotuá.

⁷ Ko e fakatātaá, ʻoku pehē ʻe he Tohitapú: “ʻOku ʻikai ha feʻauaki, pe ha lotu ki he aitoli, pe ha tono ʻunoho, pe ha moʻui fakapelepele, pe ha fai faka-Sotoma, pe ha kaihaʻa, pe ha manumanu, pe ha faʻa kona, pe ha kapekape, pe ha fai fakamalohi, te ne maʻu tofiʻa ʻi he Puleʻanga ʻo e ʻOtua.” (1 Kolinito 6:​9, 10) ʻIo, ko e tonó mo e feʻauakí ʻoku ʻikai ko ha “tōʻonga feʻofaʻaki” pē ia. Ko e ngaahi tōʻonga faka-Sōtomá ʻoku ʻikai ko ha “fetongi pē ia ʻo e founga-moʻuí.” Ko e maumauʻi ia ʻo e lao ʻa e ʻOtuá. Pea ʻoku pehē pē mo e ngaahi meʻa hangē ko e kaihaʻá, loí mo e lauʻikovi loí. (Sāme 101:5; Kolose 3:9; 1 Pita 4:​15) Naʻe fakahalaiaʻi ʻe Sēmisi ʻa e pōlepolé, lolotonga ia ʻoku fakahinohinoʻi kitautolu ʻe Paula ke fakaʻehiʻehi mei he talanoa fakaseselé pea mo e hua fakalieliá. ([Efeso 5: 3, 4, PM]; Semisi 4:​16) Ki he kau Kalisitiané, ko e ngaahi tuʻutuʻuni kotoa ko eni ki he ʻulungāngá ko e konga ia ʻo e lao haohaoa ʻa e ʻOtuá.​—Sāme 19:7.

8. (a) Ko e hā ʻa e natula ʻo e lao ʻa Sihová? (e) Ko e hā ʻa e ʻuhinga tefito ʻoku tuʻu mei mui ʻi he foʻi lea faka-Hepelū ki he “lao”?

⁸ Ko e ngaahi tuʻutuʻuni tefito pehē ʻi he Folofola ʻa Sihová ʻoku fakaeʻa ai ko ʻene laó ʻoku hulu atu ia ʻi ha lisi pē ʻo ha ngaahi tuʻutuʻuni taʻeongoʻi ke pīkitai ki ai. ʻOkú ne faʻu ʻa e makatuʻunga ki ha moʻui palanisi, mo fua lelei, fakataha mo e ngaahi tafaʻaki kotoa ʻo e ʻulungaanga ʻoku tākiekina ki he leleí. Ko e lao fakaʻotuá ʻoku fakatupu langa hake, fakatupu ʻulungaanga lelei pea mo fakamaama. (Sāme 119:72) Ko e foʻi lea “lao” hangē ko ia ʻoku ngāueʻaki ʻe he tokotaha-tohi-sāmé ko e liliu ia mei he foʻi lea faka-Hepelū ko e toh·rahʹ. ʻOku pehē  ʻe ha mataotao Tohitapu ʻe taha: “Ko e foʻi leá ni ʻoku faʻu ia mei ha foʻi veape ʻa ia ʻoku ʻuhingá ke fakahinohino, ke tataki, ke fakataumuʻa, ke fanaʻi ki muʻa. Ko . . . hono ʻuhingá leva ko ha tuʻutuʻuni fakaeʻulungaanga.” Ki he tokotaha-tohi-sāmé ko e laó ko ha meʻaʻofa ia mei he ʻOtuá. ʻIkai ʻoku totonu ke tau hakeakiʻi ia ʻi he founga tatau, ʻo fakaʻatā ia ke ne fakafuo ʻetau sīpinga moʻuí?

9, 10. (a) Ko e hā ʻoku tau fiemaʻu ai ha fakahinohino alafalalaʻangá? (e) ʻE toki malava fēfē ke tau maʻu ha moʻui fiefia mo lavameʻa?

⁹ Ko e meʻamoʻui kotoa pē ʻoku nau fiemaʻu ha fakahinohino alafalalaʻanga pea mo ha tataki alafalalaʻanga. ʻOku moʻoni eni ʻia Sīsū mo e kau ʻāngelo kehé, ʻa ia ʻoku nau māʻolunga ange ʻi he tangatá. (Sāme 8:5; Sione 5:30; 6:38; Hepelu 2:​7; Fakahā 22:​8, 9) Kapau ʻoku lava ke maʻu ʻaonga ʻa e ngaahi meʻamoʻui haohaoa ko ení mei he tataki fakaʻotuá, huanoa hake ai ʻa ʻene pehē ki he faʻahinga taʻehaohaoa ʻo e tangatá! Ko e hisitōlia ʻo e tangatá mo e meʻa ʻoku tau hokosia fakafoʻituituí kuó ne fakamoʻoniʻi ʻa e totonu ʻo e fakamatala ʻa e palōfita ko Selemaiá: “ʻOku ou ʻilo, ʻe Sihova, ʻoku ʻikai ʻi he tangata hono hala: ʻoku ʻikai ʻi he tangata ʻoku haʻele ke fakaʻuli ʻene ʻalu.”—Selemaia 10:23.

¹⁰ Kapau ʻoku tau holi ke maʻu ha moʻui fiefia mo lavameʻa, kuo pau ke tau hanga ki he ʻOtuá ki ha tataki. Ko Tuʻi Solomone naʻá ne ʻiloʻi ʻa e fakatuʻutāmaki ʻo e moʻui ʻo fakatatau ki he ngaahi tuʻunga fakafoʻituituí, ʻo tauʻatāina mei he tataki fakaʻotuá: “ʻOku ai ha hala ʻoku ha matamata totonu ki he tangata: ka ʻoku tuʻulu atu ki he ngaahi hala ʻoku fakatau ki he mate.”—Palovepi 14:12.

Ngaahi ʻUhinga ki Hono Fakamahuʻingaʻi ʻa e Lao ʻa Sihová

11. Ko e hā ʻoku totonu ai ke tau holi ke mahinoʻi ʻa e lao ʻa e ʻOtuá?

¹¹ ʻOku lelei ke tau fakatupu ha holi loloto ke mahinoʻi ʻa e lao ʻa Sihová. Naʻe fakahāhā ʻe he tokotaha-tohi-sāmé ha holi pehē ʻi heʻene lea: “Fakaʻa muʻa hoku mata, kau sio meʻa fakaofo ʻi hoʻo lao na.” (Sāme 119:18) Ko e lahi ange ʻetau hoko ʻo ʻiloʻi ʻa e ʻOtuá mo ʻene ngaahi foungá, ko e loloto ange ia ʻetau mahinoʻi ʻa e moʻoni ʻo e ngaahi lea ʻa ʻAiseá: “Ko au Sihova ko ho ʻOtua, ʻoku ou ako koe ke fai meʻa ʻaonga, ʻoku ou tataki koe ʻi he hala ʻoku totonu ke ke fou ai. Taumaiā naʻa ke tokanga ki heʻeku ngaahi tuʻutuʻuni!” (Aisea 48:​17, 18) Ko e holi fakamātoato ia ʻa Sihová ke fakaʻehiʻehi ʻa hono kakaí mei he fakatuʻutāmakí pea fiefia ʻi he moʻuí ʻi he tokanga ki heʻene ngaahi tuʻutuʻuní. Tau sivisiviʻi angé ʻa e ngaahi ʻuhinga lalahi ʻe niʻihi ʻoku totonu ai ke tau fakamahuʻingaʻi ʻa e lao ʻa e ʻOtuá.

12. ʻOku anga-fēfē hono ʻai ʻe he ʻafioʻi ko ia ʻe Sihova kitautolú ke ne hoko ai ko e Tokotaha Foaki-Lao lelei tahá?

¹² Ko e lao fakaʻotuá ʻoku haʻu ia mei he Tokotaha ʻokú ne ʻafioʻi lelei taha kitautolú. Koeʻuhi ko Sihova ʻa hotau Tokotaha-Fakatupú, ʻoku ʻuhinga lelei ke ne ʻafioʻi fakaʻāuliliki ʻa e tangatá. (Sāme 139:​1, 2; Ngāue 17:​24-​28) Ko e ngaahi kaumeʻa ofí, ngaahi kāingá, naʻa mo e ngaahi mātuʻá ʻoku ʻikai lava ke nau ʻiloʻi lelei kitautolu ʻo hangē ko Sihová. He ko ē, ʻoku ʻafioʻi ʻe he ʻOtuá kitautolu ʻo lelei ange ʻaupito ia ʻi heʻetau ʻiloʻi kitautolú! ʻOku maʻu ʻe hotau Tokotaha-Ngaohí  ʻa e mahino taʻehanotatau ki heʻetau ngaahi fiemaʻu fakalaumālié, fakaeongó, fakaʻatamaí mo fakaesinó. ʻI heʻene fakahanga mai ʻene tokangá kia kitautolú, ʻokú ne fakahaaʻi ai ʻa e mahinoʻi fakaʻāuliliki ʻo hotau faʻungá, ko ʻetau ngaahi holí mo ʻetau ngaahi taumuʻá. ʻOku mahinoʻi ʻe Sihova hotau ngaahi ngataʻangá, ka ʻokú ne toe ʻafioʻi foki mo ʻetau malava ke faileleí. ʻOku pehē ʻe he tokotaha-tohi-sāmé: “ʻOku ne ʻilo ʻe ia hota anga; ʻoku ne manatu ai pe ko e efu pe kitaua.” (Sāme 103:14) Ko ia ai, ʻoku lava ke tau maʻu ha ongoʻi malu fakalaumālie ʻi heʻetau kumi ko ia ke ʻaʻeva ʻi heʻene laó, ʻo fakamoʻulaloaʻi loto-lelei kitautolu ki he tataki fakaʻotuá.​—Palovepi 3:​19-​26.

13. Ko e hā ʻe lava ai ke tau falala ʻoku tokanga ʻa Sihova ki he meʻa ʻe lelei taha kia kitautolú?

¹³ ʻOku haʻu ʻa e lao fakaʻotuá mei he Tokotaha ʻokú ne ʻofaʻi kitautolú. ʻOku tokanga lahi ʻa e ʻOtuá fekauʻaki mo ʻetau lelei tuʻuloá. ʻIkai naʻá ne foaki ʻa hono ʻAló ʻi ha mole lahi kiate ia tonu “ke huhuʻiʻaki ha tokolahi, heʻene fetongi kinautolu”? (Mātiu 20:28) ʻIkai kuo palōmesi mai ʻa Sihova ‘ʻe ʻikai te ne fakangofua ke ʻahiʻahiʻi kitautolu ʻo makehe atu ʻi heʻetau mafaí’? (1 Kolinito 10:13) ʻIkai ʻoku fakapapauʻi mai ʻe he Tohitapú ʻokú ne ‘mamahiʻi kitautolu’? (1 Pita 5:7) ʻOku ʻikai ha taha ʻe toe mahuʻingaʻia anga-ʻofa ange ʻi hono tokonaki mai ʻa e ngaahi tataki ʻaonga ki he fakatupu fakaetangatá ʻia Sihova. ʻOkú ne ʻafioʻi ʻa e meʻa ʻoku lelei kia kitautolú pea mo e laine ngataʻanga ki he fiefiá pea mo e mamahí. Neongo ʻoku tau taʻehaohaoa pea fai mo e ngaahi fehālaaki, kapau ʻoku tau tuli ki he māʻoniʻoní, ʻokú ne fakahaaʻi ʻene ʻofá kia kitautolu ʻi he ngaahi founga ʻa ia ʻe iku ai ki he moʻuí pea mo e ngaahi tāpuaki.​—Isikeli 33:11.

14. ʻI he founga mahuʻinga fē ʻoku kehe ai ʻa e lao ʻa e ʻOtuá mei he ngaahi fakakaukau fakaetangatá?

¹⁴ Ko e lao ʻa e ʻOtuá ʻoku fakafiemālie ʻene taʻemaliliú. ʻI he ngaahi taimi taʻemanonga ʻa ia ʻoku tau moʻui aí, ko Sihová ko ha maka ia ʻoku tuʻumaʻu, ʻo ʻi ai ia ʻo taʻengata pea taʻengata. (Sāme 90:2) Naʻá ne folofola fekauʻaki mo ia tonu: “Ko Sihova au, ʻoku ʻikai te u liliu.” (Malakai 3:6) Ko e ngaahi tuʻunga ʻa e ʻOtuá, hangē ko ia ʻoku lēkooti ʻi he Tohitapú, ʻoku mātuʻaki alafalalaʻanga—ʻo ʻikai hangē ko e ʻoneʻone holo ʻo e ngaahi fakakaukau feliliuaki hokohoko ʻa e tangatá. (Semisi 1:​17) Ko e fakatātaá, naʻe poupouʻi ʻe he kau toketā fakaʻatamaí ʻi he ngaahi taʻu lahi ʻa e fakangofua tavale ʻi hono ʻohake ʻa e fānaú, ka ki mui mai naʻe liliu ʻa e fakakaukau ʻa e niʻihi pea fakahaaʻi ai ko ʻenau faleʻí naʻe fehālaaki. Ko e ngaahi tuʻunga mo e ngaahi tataki fakamāmani fekauʻaki mo e meʻá ni, ʻoku femalēleaki holo ia ʻo hangē ʻoku puhi holo ʻe he matangí. Kae kehe, ko e Folofola ʻa Sihová ʻoku ʻikai femaliliuaki. Kuo tokonaki mai ʻe he Tohitapú ʻi he laui senituli ʻa e faleʻi ki he founga ke ʻohake ai ʻa e fānaú ʻaki ʻa e ʻofá. Naʻe tohi ʻa e ʻapositolo ko Paulá: “ʻA e ngaahi tamai, ʻoua te mou fakaʻitaʻi hoʻomou fānaú, kae hanganaki tauhi hake kinautolu ʻi he akonaki mo e fakatonutonu-fakaʻatamai ʻa Sihová.” (Efeso 6:​4, NW) He meʻa fakafiemālie moʻoni ke ʻiloʻi ʻe lava ke tau falala ki he ngaahi tuʻunga ʻa Sihová; ʻe ʻikai ke liliu ia!

Ngaahi Tāpuaki ki he Faʻahinga ʻOku Talangofua ki he Ngaahi Lao ʻa e ʻOtuá

15, 16. (a) Ko e hā ʻe iku ki aí kapau ʻoku tau ngāueʻaki ʻa e ngaahi tuʻunga ʻa Sihová? (e) ʻE lava fēfē ke fakamoʻoniʻi ko e ngaahi lao ʻa e ʻOtuá ko ha tataki lelei ia ki he nofo malí?

¹⁵ Fakafou ʻi heʻene palōfita ko ʻAiseá, naʻe folofola ʻa e ʻOtuá: Ko “ʻeku lea ʻoku ʻalu atu mei hoku ngutu: ʻe . . . fakaaʻu.” (Aisea 55:11) ʻO tatau tofu pē mo ia, ʻi he taimi ʻoku tau feinga fakamātoato ai ke muimui ʻi he ngaahi tuʻunga ʻoku maʻu ʻi heʻene Folofolá, te tau lavameʻa ai, ʻo fakahoko ʻa e meʻa lelei, pea maʻu ai ʻa e fiefiá.

¹⁶ Fakakaukau ki he founga ʻoku hoko ai ʻa e ngaahi lao ʻa e ʻOtuá ko ha tataki lelei ki ha nofo mali lavameʻá. “Ke lauʻi lelei ʻa e mali ʻe he kakai kotoa pe” ko e tohi ia ʻa Paulá, “pea ke taʻeʻuliʻi ʻa e mohenga: he ko e kau feʻauaki, mo e tonoʻunoho ʻe fakamāu kinautolu ʻe he ʻOtua.” (Hepelu 13:4) Ko e ngaahi hoa malí ke nau fefakaʻapaʻapaʻaki mo feʻofaʻaki: “Ke taki taha ʻofa ki siʻono uaifi ʻo hange ko ʻene ʻofa kiate ia; pea ko e uaifi ke ne fakaʻapaʻapa ki hono husepaniti.” (Efeso 5:33) Ko e faʻahinga  ʻofa ʻoku fiemaʻú ʻoku fakamatalaʻi ia ʻi he 1 Kolinito 13:​4-8: “Ko ʻOfa ʻoku ne angamokomoko, mo angalelei. Ko ʻOfa ʻoku ʻikai, te ne meheka, ʻoku ʻikai te ne fai pe ke ongoongoa, ʻoku ʻikai te ne fakafuofuolahi, ʻoku ʻikai te ne fai taʻetāu, ʻoku ʻikai te ne kumi ʻene lelei aʻana, ʻoku ʻikai te ne fakaʻita, ʻoku ʻikai te ne lau ʻa e kovi, ʻoku ʻikai te ne fiefia ʻi he taʻetotonu, ka ʻoku ne kaungā-fiefia mo e Moʻoni. ʻOku ne ʻukuma ʻi he meʻa kotoa pe, ʻoku ne tui ʻi he meʻa kotoa pe, ʻoku ne ʻamanaki ʻi he meʻa kotoa pe, ʻoku ne kataki ʻi he meʻa kotoa pe. Ko ʻOfa ʻoku ʻikai ke kaʻanga ia ʻi ha taimi.” Ko ha nofo mali ʻoku fakaʻilongaʻi ʻe he faʻahinga ʻofa ko ení ʻe ʻikai ke kaʻanga ia.

17. Ko e hā ʻa e ngaahi ʻaonga ʻoku maʻu mei he muimui ko ia ki he ngaahi tuʻunga ʻa Sihova ki hono ngāueʻaki ʻo e ʻolokaholó?

¹⁷ Ko ha toe fakamoʻoni ʻe taha ʻoku ʻaonga ʻa e ngaahi tuʻunga ʻa Sihová, ko e moʻoniʻi meʻa ko ia ʻo ʻene fakahalaiaʻi ʻa e konaá. ʻOku ʻikai foki te ne hōifua ki he ‘inu kava lahí.’ (1 Timote 3:​3, 8, Loma 13:13) Ko e tokolahi ko ia ʻoku nau tukunoaʻi ʻa e ngaahi tuʻunga ʻa e ʻOtuá ʻi he meʻa ko ení ʻoku nau tofanga ʻi he ngaahi mahaki ko e fakatupunga, pe ʻai ke kovi ange ʻe he inu tōtuʻá. Ko hono tukunoaʻi ʻa e faleʻi ʻa e Tohitapú ki he maʻu fakafuofuá, kuo hoko ai ʻa e niʻihi ki he tōʻonga ʻo e inu lahí ke “tokoniʻi kinautolu ke nau fiemālie.” Ko e ngaahi palopalema ʻoku hoko mei he inu ʻo fuʻu hulú ʻoku lahi ia, ʻo kau ai ʻa e mole ʻo e fakaʻapaʻapá, mafasia ʻa e ngaahi vā fakafāmilí pe ko e movete ʻa e fāmilí, fakamoleki noaʻia ʻa e paʻanga hū maí, mo e mole ʻa e ngāué. (Palovepi 23:​19-​21, 29-​35) ʻIkai ko e ngaahi tuʻunga ʻa Sihova fekauʻaki mo hono ngāueʻaki ʻo e ʻolokaholó ko ha maluʻi?

18. ʻOku ʻaonga ʻa e ngaahi lao ʻa e ʻOtuá ʻi he ngaahi meʻa fakapaʻangá? Fakamatalaʻi.

¹⁸ Kuo toe fakamoʻoniʻi ʻoku ʻaonga ʻa e ngaahi tuʻunga ʻa e ʻOtuá ʻi he ngaahi meʻa fakapaʻangá.  ʻOku enginaki ʻa e Tohitapú ki he kau Kalisitiané ke nau faitotonu mo ngāue mālohi. (Luke 16:10; Efeso 4:​28; Kolose 3:​23) Koeʻuhi ko ʻenau muimui ʻi he faleʻi ko ení, kuo hiki lakanga ai ʻa e kau Kalisitiane tokolahi pe kuo nau tauhi maʻu pē ʻenau ngāué lolotonga ia ʻoku fakanofo ʻa e faʻahinga kehé ia. ʻOku toe iku ki ha ngaahi ʻaonga fakapaʻanga ʻi he taimi ʻoku fakaʻehiʻehi ai ha tokotaha mei he ngaahi tōʻonga taʻefakatohitapu mo fakatupu maʻunimā ko ia hangē ko e pele paʻangá, ifí, mo e ngāuekoviʻaki ʻa e faitoʻo kona tapú. ʻOku ʻikai ha veiveiua ʻe lava ke ke fakakaukau ki ha ngaahi fakatātā kehe ʻo e ʻaonga fakaʻekonōmika ʻo e ngaahi tuʻunga ʻa e ʻOtuá.

19, 20. Ko e hā ʻoku hoko ai ko e ʻalunga ia ʻo e potó ke tali mo piki ki he ngaahi lao fakaʻotuá?

¹⁹ ʻOku faingofua ki he faʻahinga taʻehaohaoa ʻo e tangatá ke nau hē mei he ngaahi lao mo e ngaahi tuʻunga ʻa e ʻOtuá. Fakakaukau atu fekauʻaki mo e kau ʻIsileli ʻi Moʻunga Sainaí. Naʻe folofola ʻa e ʻOtuá kia kinautolu: “Kapau te mou matuʻaki tokanga [“talangofua,” NW] ki hoku leʻo, mo tauhi ʻeku fuakava, te mou toki hoko ko ʻeku koloa kanokato ʻi he kakai kotoa.” Naʻa nau tali: “Ko e meʻa kotoa kuo folofolaʻaki mai ʻe Sihova te mau fai.” Neongo ia, he ʻalu kehe moʻoni ko e ʻalunga naʻa nau fili ke fou aí! (Ekisoto 19:​5, 8; Sāme 106:​12-​43) ʻI hono kehé, tau tali pea piki ki he ngaahi tuʻunga ʻa e ʻOtuá.

²⁰ Ko e ʻalunga ʻo e potó mo e fiefiá ko e pipiki ofi ki he ngaahi lao taʻealafakatataua kuo tokonaki mai ʻe Sihova ke ne tataki ʻetau moʻuí. (Sāme 19:​7-​11) Ke lavameʻa ʻi hono fai ení, ʻoku toe fiemaʻu ke tau ʻiloʻi ʻa e mahuʻinga ʻo e ngaahi tefitoʻi moʻoni fakaʻotuá. Ko e kaveinga eni ʻo e kupu hoko maí.

[Fakamatala ʻi lalo]

ʻOkú Ke Manatuʻi?

• Ko e hā ʻoku lava ai ke tau falala ko e ngaahi lao ʻa e ʻOtuá ko e lelei pē maʻatautolú?

• Ko e hā ʻa e ngaahi ʻuhinga ʻoku totonu ai ke tau tauhi ʻa e lao ʻa Sihová?

• ʻI he ngaahi founga fē ʻoku ʻaonga ai ʻa e ngaahi lao ʻa e ʻOtuá?

[Fehuʻi ki he Ako]

[Fakatātā ʻi he peesi 13]

Naʻe tāpuakiʻi lahi ʻa ʻĒpalahame ʻi heʻene talangofua ki he lao ʻa Sihová

[Fakatātā ʻi he peesi 15]

Ko e ngaahi loto-moʻua ki he moʻui femoʻuekina ʻo e ʻaho ní ʻoku afeʻi ai ʻa e tokolahi mei he lao fakaʻotuá

[Fakatātā ʻi he peesi 17]

ʻI he hangē ha fale maama ʻi ha makatuʻú, ko e lao fakaʻotuá ʻoku tuʻumaʻu mo taʻemaliliu