Tataki Hoʻo Laká ʻAki ʻa e Ngaahi Tefitoʻi Moʻoni Fakaʻotuá
Tataki Hoʻo Laká ʻAki ʻa e Ngaahi Tefitoʻi Moʻoni Fakaʻotuá
“[Ko Sihova ʻokú ne] ako koe ke fai meʻa ʻaonga.”—Aisea 48:17.
1. ʻOku anga-fēfē hono tataki ʻe he Tokotaha-Fakatupú ʻa e faʻahinga ʻo e tangatá?
ʻI HE ngāue mālohi ʻa e kau saienisí ke tatala ʻa e ngaahi meʻa fufū ʻo e ʻunivēsí, ʻoku nau ofo ai ʻi he lahi fakaʻulia ʻo e ivi ʻoku faʻo ʻi he ʻuniveesi takatakai ʻia kitautolú. Ko hotau laʻaá—ko ha foʻi fetuʻu lahi lotoloto—ʻokú ne faʻu ʻa e ivi lahi tatau mo e “ngaahi foʻi pomu haitolosini ʻe 100 piliona ʻoku pā ʻi he sekoni kotoa pē.” Ko e Tokotaha-Fakatupú ʻoku lava ke ne puleʻi mo tataki ʻa e ngaahi naunau fakahēvani kāfakafa peheé ʻaki hono mālohi taʻefakangatangatá. (Siope 38:32; Aisea 40:26) Fēfē kitautolu faʻahinga ʻo e tangatá, ʻa ia ʻoku fakakoloaʻaki ʻa e tauʻatāina ke filí, mafai ke ʻilo ʻa e tonú mo e halá, fakaʻuhinga, mo e malava ke mahinoʻi ʻa e meʻa fakalaumālié? Ko e hā ʻa e founga kuo vakai ki ai hotau Tokotaha-Ngaohí ʻoku feʻunga ke tatakiʻaki kitautolú? ʻOkú ne tataki anga-ʻofa kitautolu ʻaki ʻene ngaahi lao haohaoá mo e ngaahi tefitoʻi moʻoni māʻolungá, ʻo fakatahaʻi ia mo hotau konisēnisi kuo akoʻi leleí.—2 Samiuela 22:31; Loma 2:14, 15.
2, 3. Ko e hā ʻa e faʻahinga talangofua ʻoku fiefia ai ʻa e ʻOtuá?
2 ʻOku fiefia ʻa e ʻOtuá ʻi he ngaahi meʻa fakatupu ʻatamai poto ʻoku nau fili ke talangofua kiate iá. (Palovepi 27:11) ʻI he ʻikai fakapolokalamaʻi kitautolu ke fakamoʻulaloa taʻefakakaukau ʻo hangē ko e ngaahi lōpoti taʻeʻatamaí, kuo fakanāunauʻiʻaki kitautolu ʻe Sihova ʻa e tauʻatāina ke fili, koeʻuhi ke tau lava ai ʻo fai ha ngaahi fili makatuʻunga he ʻilo ke fai ʻa e meʻa ʻoku tonú.—Hepelu 5:14.
3 Ko Sīsū, ʻa ia naʻá ne tapua haohaoa mai ʻa ʻene Tamaí, naʻá ne pehē ki heʻene kau ākongá: “Ko hoku ngaahi kaumeʻa ʻakimoutolu ʻo kapau ʻoku mou fai ʻa e ngaahi meʻa ʻoku ou tuʻutuʻuni atu. ʻOku ʻikai te u kei lau kimoutolu ko e kau tamaioʻeiki.” (Sione 15:14, 15) ʻI he kuonga muʻá, ʻoku siʻi ha fili ʻa ha tamaioʻeiki ka ko e talangofua pē ki he ngaahi tuʻutuʻuni ʻa hono pulé. ʻI he tafaʻaki ʻe tahá, ʻoku faʻu ʻa e kaumeʻá ʻaki ʻa e fakahāhā ʻo e ngaahi ʻulungaanga ʻoku fakamānako ki he lotó. ʻE lava ke tau hoko ko e ngaahi kaumeʻa ʻo Sihova. (Semisi 2:23) Ko e kaumeʻa ko ení ʻoku ʻai ia ke mālohi ʻe he feʻofaʻakí. Naʻe fakafehokotaki ʻe Sīsū ʻa e talangofua ki he ʻOtuá mo e ʻofá ʻi heʻene pehē: “Kapau ʻoku ʻofa ha taha kiate au, te ne tauhi ʻeku lea: pea ʻe ʻofa kiate ia ʻa ʻeku Tamai.” (Sione 14:23) Ke aʻusia iá—pea ke tataki malu kitautolu—ʻoku fakaafeʻi kitautolu ʻe Sihova ke moʻuiʻaki ʻene ngaahi tefitoʻi moʻoní.
Ngaahi Tefitoʻi Moʻoni Fakaʻotuá
4. ʻE anga-fēfē haʻo fakamatalaʻi ʻa e ngaahi tefitoʻi moʻoní?
4 Ko e hā ʻa e ngaahi tefitoʻi moʻoni? Ko ha tefitoʻi moʻoni ʻoku fakamatalaʻi ia “ko ha moʻoni fakalūkufua pe tefito: ko ha lao, tokāteline, pe fakakaukau kakato mo tefito ʻa ia ʻoku makatuʻunga mei ai ʻa e ngaahi lao mo e tokāteline kehé pe ko ia ʻoku tupu mei ai ʻa e ngaahi lao mo e tokāteline kehé.” (Webster’s Third New International Dictionary) Ko ha ako fakalelei ʻo e Tohitapú ʻoku fakahaaʻi ai ʻoku tokonaki mai ʻe heʻetau Tamai fakahēvaní ʻa e ngaahi fakahinohino tefito ʻokú ne kāpui ʻa e ngaahi tuʻunga mo e ngaahi tafaʻaki kehekehe ʻo e moʻuí. ʻOkú ne fai eni fakataha mo e vakai atu ki ha ʻaonga taʻengata maʻa kitautolu. ʻOku fehoanaki ia mo e meʻa naʻe tohi ʻe he tuʻi poto ko Solomoné. “Fanongo mai, tama, ʻo tali ʻeku ngaahi lea; pea fakalahi ai ʻa e ngaahi taʻu ʻo hoʻo moʻui. Kuo u ako koe ʻi he hala ki he poto; kuo u taki koe ʻi he ngaahi ʻalunga ʻo e totonu.” (Palovepi 4:10, 11) Ko e ngaahi tefitoʻi moʻoni tefito ʻoku tokonaki mai ʻe Sihová ʻoku kaunga ia ki hotau vahaʻangatae mo iá pea mo e kaungā faʻahinga ʻo e tangatá, ko ʻetau lotú, mo ʻetau moʻui fakaʻahó. (Sāme 1:1) Tau lāulea angé ki he niʻihi ʻo e ngaahi tefitoʻi moʻoni tefito ko iá.
5. ʻOmai ha fakatātā ʻo e ngaahi tefitoʻi moʻoni tefito ʻe niʻihi.
5 Fekauʻaki mo hotau vahaʻangatae mo Sihová, naʻe pehē ʻe Sīsū: “Te ke ʻofa ki he ʻEiki ko ho ʻOtua, ʻo fai ʻaki ʻa e kotoa ʻo ho loto, mo e kotoa ʻo ho laumalie, mo e kotoa ʻo ho ʻatamai.” (Mātiu 22:37) Tānaki atu ki ai, ʻoku tokonaki mai ʻe he ʻOtuá ʻa e ngaahi tefitoʻi moʻoni ʻoku felāveʻi mo ʻetau ngaahi feangainga mo e kaungā faʻahinga ʻo e tangatá, hangē ko e Lao Koulá: “Ko ia ʻilonga ha meʻa ʻoku mou loto ke fai ʻe he kakai kiate kimoutolu, fai pehe foki kiate kinautolu.” (Mātiu 7:12; Kaletia 6:10; Taitusi 3:2) ʻI he fekauʻaki mo e lotú, ʻoku naʻinaʻi mai kia kitautolu: “Ke tau fetokangaʻaki, ke fefakaʻaiʻaiʻaki ʻa kitautolu ki he feʻofaʻaki mo e ngaue lelei: ʻo ʻoua naʻa tau liʻaki ʻetau ngaahi fakataha.” (Hepelu 10:24, 25) Ki he ngaahi tafaʻaki fakaʻaho ʻo ʻetau moʻuí, ʻoku pehē ʻe he ʻapositolo ko Paulá: “Ko ia, pe ko hoʻomou kai, pe ko hoʻomou inu, pe ko hoʻomou fai ha meʻa, mou fai kotoa pe ke ongoongolelei ai ʻa e ʻOtua.” (1 Kolinito 10:31) ʻOku ʻi ai ʻa e ngaahi tefitoʻi moʻoni kehe taʻefaʻalaua ʻi he Folofola ʻa e ʻOtuá.
6. ʻOku anga-fēfē ʻa e kehe ʻa e ngaahi tefitoʻi moʻoní mei he ngaahi laó?
6 Ko e ngaahi tefitoʻi moʻoní ko e ngaahi moʻoni tefito ia ʻoku moʻui pea ʻoku ako ʻa e kau Kalisitiane fakapotopotó ke ʻofa ai. Naʻe fakamānavaʻi ʻe Sihova ʻa Solomone ke ne tohi: “Tokanga ki heʻeku ngaahi lea; fokotuʻu telinga mai ki he meʻa ʻoku ou lau. ʻOua naʻa puli ia mei ho mata; tauhi ia ʻi ho lotoʻi loto. He ko e moʻuiʻanga ʻo kinautolu kuo nau maʻu ia, ʻio, ko e meʻa faitoʻo te ne falute hoto sino kotoa.” (Palovepi 4:20-22) ʻOku anga-fēfē ʻa e kehe ʻa e ngaahi tefitoʻi moʻoní mei he ngaahi laó? ʻOku tokonaki mai ʻi he ngaahi tefitoʻi moʻoní ʻa e makatuʻunga ki he ngaahi laó. Ko e ngaahi tuʻutuʻuní, ʻa ia ʻoku hehema ke fakahangatonú, ʻe ngāueʻaki nai ia ʻi he taimi pe tuʻunga tefito, ka ko e ngaahi tefitoʻi moʻoní ʻoku ʻikai lau taimi ia. (Sāme 119:111) Ko e ngaahi tefitoʻi moʻoni fakaʻotuá ʻoku ʻikai ke hoko ia ʻo motuʻa pe mole atu. Ko e ngaahi lea fakamānavaʻi ʻa e palōfita ko ʻAiseá ʻoku fakamoʻoniʻi ʻa ʻene moʻoní: “ʻOku mae ʻa e mohuku, ʻoku maheikau ʻa e fisi: ka ko e folofola ʻa hotau ʻOtua ʻe tuʻu ʻo taʻengata.”—Aisea 40:8.
Fakakaukau mo Ngāue Makatuʻunga ʻi he Ngaahi Tefitoʻi Moʻoní
7. ʻOku anga-fēfē hono fakalotolahiʻi kitautolu ʻe he Folofola ʻa e ʻOtuá ke fakakaukau mo ngāue ʻo makatuʻunga ʻi he ngaahi tefitoʻi moʻoní?
7 ʻOku toutou fakalotolahiʻi kitautolu ʻe he “folofola ʻa hotau ʻOtua” ke fakakaukau mo ngāue ʻo makatuʻunga ʻi he ngaahi tefitoʻi moʻoní. ʻI he taimi naʻe kole ai kia Sīsū ke ne fakanounouʻi ʻa e Laó, naʻá ne fai ʻa e fakamatala nounou ʻe ua—ko e taha ʻoku fakamamafaʻi ai ʻa e ʻofa kia Sihová, ko e taha ʻoku fakamamafaʻi ai ʻa e ʻofa ki he kaungā faʻahinga ʻo e tangatá. (Mātiu 22:37-40) ʻI hono fai iá, naʻe lea fakakonga ai ʻa Sīsū mei ha fakanounou ki muʻa ʻo e ngaahi tokāteline tefito ʻo e Lao ʻa Mōsesé, ʻoku fakamatalaʻi ʻi he Teutalonome 6:4, 5: “Ko Sihova ko hotau ʻOtua ko e tahaʻi Sihova ia: pea te ke ʻofa ki he ʻEiki ko ho ʻOtua ʻaki ʻa e kotoa ʻo ho loto, mo e kotoa ʻo ho laumalie, mo e kotoa ʻo ho ivi.” ʻOku hā mahino, naʻe toe ʻi he fakakaukau foki ʻa Sīsuú ʻa e fakahinohino ʻa e ʻOtuá ʻoku maʻu ʻi he Livitiko 19:18. ʻI he ngataʻanga mahino, nounou mo mālohi ʻo e tohi ʻa Koheletí, ʻoku fakamatalaʻi nounou ai ʻe Tuʻi Solomone ha ngaahi lao fakaʻotua: “Ko e ngataʻanga ʻeni ʻo e meʻa: kuo aʻau hono kotoa. Ke ke ʻapasia kia Elohimi, ʻo tauhi ʻene ngahi fekau; he ko e kotoa ʻo e tangata ia. He omi ʻe Elohimi ʻa e ngaue kotoa ki he fakamaau, kaeʻumaʻa ʻa e meʻa kotoa ʻoku fufū, pe ʻoku lelei ia pe kovi.”—Koheleti 12:13, 14; Maika 6:8.
8. Ko e hā ʻoku hoko ai ko ha maluʻi ʻa e mahinoʻi kakato ʻo e ngaahi tefitoʻi moʻoni tefito faka-Tohitapú?
8 ʻI hono mahinoʻi kakato ʻa e ngaahi tefitoʻi moʻoni tefito peheé ʻe lava ke ne tokoniʻi kitautolu ke mahinoʻi mo ngāueʻaki ʻa e ngaahi fakahinohino papau lahi ange. ʻIkai ko ia pē, kapau ʻoku ʻikai te tau mahinoʻi fakaʻāuliliki mo tali ʻa e ngaahi tefitoʻi moʻoni tefitó, ʻe ʻikai nai te tau malava ke fai ha ngaahi fili lelei pea ʻe ngaue ngofua nai ai ʻetau tuí. (Efeso 4:14) Kapau te tau fokotuʻu maʻu ʻa e ngaahi tefitoʻi moʻoni ko iá ʻi hotau ʻatamaí mo hotau lotó, te tau mateuteu ai ke ngāueʻaki kinautolu ʻi hono fai ʻetau ngaahi filí. ʻI he taimi ʻoku tau ngāueʻaki ai kinautolu fakataha mo e mahinó, ʻoku nau ʻomai ai ʻa e lavameʻa.—Siosiua 1:8; Palovepi 4:1-9.
9. Ko e hā ʻoku ʻikai faingofua maʻu pē ai ke ʻiloʻi mo ngāueʻaki ʻa e ngaahi tefitoʻi moʻoni faka-Tohitapú?
9 Ko hono ʻiloʻi mo hono ngāueʻaki ko ia ʻa e ngaahi tefitoʻi moʻoni faka-Tohitapú ʻoku ʻikai ke faingofua ia ʻo hangē ko e muimui ko ia ʻi ha fakahokohoko ʻo ha ngaahi laó. ʻI he tuʻunga ko e faʻahinga taʻehaohaoa ʻo e tangatá ʻoku tau fakaʻehiʻehi nai ai mei he feinga ʻoku fiemaʻu ke fakaʻuhinga ai ʻi he ngaahi tefitoʻi moʻoní. Te tau saiʻia ange nai ʻi ha lao pau kuo fokotuʻu ʻi he taimi ʻoku tau fehangahangai ai mo ha fili ke fai pe ko ha tuʻunga ʻoku filifilingaua. ʻOku tau kumi nai ʻi he taimi ʻe niʻihi ki ha tataki mei ha Kalisitiane matuʻotuʻa—ko ha tokotaha mātuʻa Kalisitiane nai—ʻo ʻamanekina ke maʻu ha tuʻutuʻuni pau ʻoku kaunga ki hotau tuʻungá. Neongo ia, ko e Tohitapú pe ko e ngaahi tohi makatuʻunga ʻi he Tohitapú ʻoku ʻikai nai ke ʻomai ai ha tuʻutuʻuni pau ia, pea naʻa mo e taimi ʻoku ʻomai ai kia kitautolu ha tuʻutuʻuní, ʻe ʻikai nai ko ha tataki fakalūkufua ia ki he taimi kotoa pē mo e malumalu ʻo e ngaahi tuʻunga kotoa pē. Te ke manatuʻi nai naʻe kole ha tangata ʻe taha kia Sīsū: “Tangataʻeiki, ke ke tala ki hoku tokoua, ke ne vaeua mo au ʻa e tofiʻa.” ʻI he ʻikai ke ʻoatu fakavave ha tuʻutuʻuni ke fakaleleiʻi ʻaki ʻa e fekīhiaki ʻi he vahaʻa ʻo e ongo tautehiná, naʻe ʻoange ʻe Sīsū kiate ia ha tefitoʻi moʻoni ʻoku fakalūkufua ange: “Mou ʻā, ʻo leʻohi kimoutolu telia ʻa e ngaahi manumanu.” Ko ia ai, naʻe ʻomai ʻe Sīsū ha tataki naʻe ʻaonga ʻi he taimi ko iá pea ʻoku kei pehē ia ʻo aʻu mai ki he taimí ni.—Luke 12:13-15.
10. ʻOku anga-fēfē hono fakaeʻa ʻa e ngaahi meʻa ʻokú ne ueʻi hotau lotó ʻi heʻetau ngāue ko ia ʻo fehoanaki mo e ngaahi tefitoʻi moʻoní?
10 Ngalingali kuó ke sio ʻi he kakai ʻoku nau hehema ke talangofua taʻeloto ki he ngaahi laó, tuʻunga pē ʻi he manavahē ki he tauteá. Ko e fakaʻapaʻapa ki he ngaahi tefitoʻi moʻoní ʻoku taʻofi ai ha faʻahinga fakakaukau pehē. Ko e natula tonu ʻo e ngaahi tefitoʻi moʻoní ʻokú ne ueʻi ʻa e faʻahinga ʻokú ne puleʻí ke nau tali ia mei he lotó. Ko hono moʻoní, ko e lahi taha ʻo e ngaahi tefitoʻi moʻoní ʻoku ʻikai ke kau ai ha tautea vave ki he faʻahinga ʻoku ʻikai te nau fai ki aí. ʻOku ʻomai ʻe he meʻá ni kia kitautolu ʻa e faingamālie ke fakahaaʻi ai ʻa e ʻuhinga ʻoku tau talangofua ai kia Sihová, ʻa e meʻa ʻokú ne ueʻi hotau lotó. ʻOku tau maʻu ha fakatātā ʻi hono fakaʻikaiʻi ko ia ʻe Siosifa ʻa e ngaahi feinga ange ʻa e uaifi ʻo Pōtifá ki ha ʻulungaanga taʻetāú. Neongo naʻe teʻeki ai ʻoange ʻe Sihova ha lao kuo hiki fekauʻaki mo e tonó pea ʻikai ha tautea fakaʻotua naʻe tuʻutuʻuni fekauʻaki mo e fehokotaki fakasino mo ha uaifi ʻo ha tangata kehe, naʻe lāuʻilo ʻa Siosifa ia ki he ngaahi tefitoʻi moʻoni ʻo e faitōnunga ʻi he nofo malí kuo fokotuʻu faka-ʻOtuá. (Senesi 2:24; 12:18-20) ʻOku lava ke tau sio mei heʻene talí naʻe ueʻi mālohi ia ʻe he ngaahi tefitoʻi moʻoni ko iá: “Fefe ai haʻaku fai ʻa e fuʻu angahala lahi ni, ʻo te hia ai ki he ʻOtua?”—Senesi 39:9.
11. Ko fē ʻa e ngaahi tafaʻaki ʻoku loto ʻa e kau Kalisitiané ke tataki ai kinautolu ʻe he ngaahi tefitoʻi moʻoni ʻa Sihová?
11 ʻI he ʻahó ni, ʻoku loto ʻa e kau Kalisitiané ke tataki kinautolu ʻe he ngaahi tefitoʻi moʻoni ʻa Sihová ʻi he taimi ʻoku hoko mai ai ki he ngaahi meʻa fakafoʻituituí, hangē ko e fili ʻo e ngaahi kaumeʻá, fakafiefiá, fasí mo e tohi ke laú. (1 Kolinito 15:33; Filipai 4:8) ʻI heʻetau tupulaki ʻi he ʻiló, mahinó, mo e houngaʻia ʻia Sihova mo ʻene ngaahi tuʻungá, ko hotau konisēnisí, ʻa hotau ongoʻanga ki he tonú mo e halá, te ne tokoniʻi kitautolu ke ngāueʻaki ʻa e ngaahi tefitoʻi moʻoni fakaʻotuá ʻi he malumalu ʻo ha ngaahi tuʻunga pē ʻoku tau fehangahangai mo ia, naʻa mo e ʻi he ngaahi meʻa fakatāutahá. ʻI hono tataki ʻe he ngaahi tefitoʻi moʻoni faka-Tohitapú, ʻe ʻikai te tau fakasio ha ngaahi matāmama ʻi he ngaahi lao ʻa e ʻOtuá; pea ʻe ʻikai te tau faʻifaʻitaki ki he faʻahinga ko ia ʻoku nau feinga ke sio pe ko e hā e lahi ʻe lava ke nau aʻu ki ai ʻo ʻikai maumauʻi moʻoni ai ha lao pau. ʻOku tau ʻiloʻi ko e fakakaukau peheé ʻoku fakafoʻi kia kita mo fakatupu maumau.—Semisi 1:22-25.
12. Ko e hā ʻa e kī ki he hoko ʻo tataki ʻe he ngaahi tefitoʻi moʻoni fakaʻotuá?
12 ʻOku ʻiloʻi ʻe he kau Kalisitiane matuʻotuʻá ko ha kī ki he muimui ʻi he ngaahi tefitoʻi moʻoni fakaʻotuá ko e loto ke ʻiloʻi ʻa e anga ʻo e ongoʻi ʻa Sihova ʻo fekauʻaki mo ha meʻá. “ʻAkimoutolu ʻoku ʻofa kia Sihova” ko e enginaki ia ʻa e tokotaha-tohi-sāmé, “fehiʻa ki he kovi.” (Sāme 97:10) ʻI hono fakahokohoko ʻa e niʻihi ʻo e ngaahi meʻa ʻe fakakalasi ʻe he ʻOtuá ʻoku koví, ʻoku pehē ʻe he Palovepi 6:16-19: “ʻOku ai ha onoʻi meʻa ʻoku fehiʻa ki ai ʻa Sihova—ʻisa! ko e fitu ʻoku fakaliliʻa ki ai hono finangalo: ko e matahihiki, ko e ʻelelo loi, mo e nima ʻoku lingi toto taʻehalaia; ko e loto ʻoku faʻu fakakaukau kovi, ko e vaʻe ʻoku lele fakavave ki he faikovi, ko e fakamoʻoni kākā ʻoku hoʻaki loi; mo ia ʻoku humaki kē ke maumau ʻa e va ʻo e kainga.” ʻI he taimi ʻoku puleʻi ai ʻetau moʻuí ʻe ha holi ke tapua atu ʻa e anga ʻo e ongoʻi ʻa Sihova ki he ngaahi meʻa tefito peheé, ko e moʻui ʻo fakatatau ki he ngaahi tefitoʻi moʻoní ʻoku hoko ia ko ha tōʻonga tuʻumaʻu.—Selemaia 22:16.
ʻOku Fiemaʻu ʻa e Fakaueʻiloto Lelei
13. Ko e hā ʻa e faʻahinga fakakaukau naʻe fakamamafaʻi ʻe Sīsū ʻi heʻene Malanga he Moʻungá?
13 Ko hono ʻiloʻi mo hono ngāueʻaki ʻa e ngaahi tefitoʻi moʻoní ʻokú ne toe maluʻi ai kitautolu mei he tauhele ʻo e lotu ngeʻesi mo fakamamata peé. ʻOku ʻi ai ha faikehekehe ʻi he vahaʻa ʻo e muimui ʻi he ngaahi tefitoʻi moʻoní pea mo e talangofua tōtuʻa ki he ngaahi tuʻutuʻuní. Naʻe fakahaaʻi mahino eni ʻe Sīsū ʻi he Malanga he Moʻungá. (Mātiu 5:17-48) Manatuʻi ko e kau fanongo kia Sīsuú ko e kau Siu, ko ia ko ʻenau tōʻongá naʻe totonu ke puleʻi ia ʻe he Lao ʻa Mōsesé. Ka ko hono moʻoní naʻa nau maʻu ha fakakaukau kehe fekauʻaki mo e Laó. Naʻa nau hoko ʻo fakamamafaʻi ʻa e lea ʻo e Laó kae ʻikai ko hono laumālié. Pea naʻa nau fakamamafaʻi ʻenau ngaahi talatukufakaholó, ʻo fokotuʻu ia ʻo māʻolunga ange ʻi he akonaki ʻa e ʻOtuá. (Mātiu 12:9-12; 15:1-9) Ko hono ikuʻangá, naʻe ʻikai ke akoʻi ai ʻa e kakaí fakalūkufua ke nau fakakaukau ʻo fakatatau ki he ngaahi tefitoʻi moʻoní.
14. Naʻe anga-fēfē hono tokoniʻi ʻe Sīsū ʻa ʻene kau fanongó ke nau fakakaukau ʻo makatuʻunga ʻi he ngaahi tefitoʻi moʻoní?
14 ʻI hono kehé, naʻe fakakau ʻe Sīsū ʻi he Malanga he Moʻungá ʻa e ngaahi tefitoʻi moʻoni ʻi he tafaʻaki ʻe nima ʻo e tuʻunga fakaʻulungāngá: ko e ʻitá, nofo malí mo e veté, ngaahi palōmesí, sāuní mo e ʻofá mo e fehiʻá. ʻI he tuʻunga taki taha, naʻe fakahaaʻi ai ʻe Sīsū ʻa e ʻaonga ʻo e muimui ki ha tefitoʻi moʻoní. Ko ia naʻe hakeakiʻi ai ʻe Sīsū ʻa e tuʻunga fakaeʻulungaanga ki hono kau muimuí. Ko e fakatātaá, ʻi he meʻa fekauʻaki mo e tonó, naʻá ne ʻomai kia kitautolu ha tefitoʻi moʻoni ʻokú ne maluʻi ʻo ʻikai ngata pē ʻi heʻetau ngaahi ngāué kae toe pehē foki ki heʻetau fakakaukaú mo e holí: “ʻIlonga ʻa ia te ne fakasio ki ha fefine ke tafunaki ʻene holi ki ai, kuo ne tonoʻi ia ʻi hono loto.”—Mātiu 5:28.
15. ʻE lava fēfē ke tau fakaʻehiʻehi mei ha hehema ke hoko ʻo fuʻu tōtuʻa?
15 ʻOku fakatātaaʻi ʻe he fakatātā ko ení ʻoku ʻikai ʻaupito totonu ke mole meiate kitautolu ʻetau vakai atu ki he taumuʻa mo e laumālie ʻo e ngaahi tefitoʻi moʻoni ʻa Sihová. ʻOku ʻikai ʻaupito totonu ke tau feinga ke maʻu ʻa e hōifua ʻa e ʻOtuá fakafou ʻi he tōʻonga fakamamata peé. Naʻe fakaeʻa ʻe Sīsū ʻa e hala ʻo e fakakaukau peheé ʻaki ʻene fakahaaʻi ʻa e meesi mo e ʻofa ʻa e ʻOtuá. (Mātiu 12:7; Luke 6:1-11) ʻI he muimui ki he ngaahi tefitoʻi moʻoni faka-Tohitapú, te tau fakaʻehiʻehi ai mei ha feinga ke moʻui (pe fekauʻi ʻa e niʻihi kehé ke moʻui) ʻo fakatatau ki ha ngaahi tuʻutuʻuni lahi mo fefeka ʻa ia ʻoku fakalaka ia ʻi he ngaahi akonaki ʻa e Tohitapú. Te tau tokanga lahi ange kitautolu fekauʻaki mo e ngaahi tefitoʻi moʻoni ʻo e ʻofá mo e talangofua ki he ʻOtuá ʻi he fekauʻaki mo e fōtunga hā ki tuʻa ʻo e lotú.—Luke 11:42.
Ngaahi Ola Fakafiefia
16. ʻOmai ha ngaahi fakatātā ʻo e ngaahi tefitoʻi moʻoni ʻoku tuʻu mei mui ʻi he ngaahi fakahinohino faka-Tohitapu ʻe niʻihi.
16 ʻI heʻetau feinga ke talangofua kia Sihová, ʻoku mahuʻinga ke ʻiloʻi ko ʻene ngaahi laó ʻoku makatuʻunga ia ʻi he ngaahi tefitoʻi moʻoni tefito. Ko e fakatātaá, ko e kau Kalisitiané kuo pau ke nau fakaʻehiʻehi mei he tauhi ʻaitolí, ʻulungaanga taʻetaau fakaefehokotaki fakasinó, mo e ngāuehalaʻaki ʻa e totó. (Ngāue 15:28, 29) Ko e hā ʻoku fakatefito ai ʻa e tuʻu faka-Kalisitiané ʻi he fekauʻaki mo e ngaahi ʻīsiu ko iá? ʻOku tuha ʻa e ʻOtuá mo ʻetau anga-līʻoa maʻataʻataá; ʻoku totonu ke tau faitōnunga ki hotau hoá; pea ko Sihova ʻa e Tokotaha Foaki-Moʻuí. (Senesi 2:24; Ekisoto 20:5; Sāme 36:9) Ko hono mahinoʻi ʻa e ngaahi tefitoʻi moʻoni tefito ko ení ʻoku ʻai ai ke faingofua ange ke tali mo muimui ʻi he ngaahi lao felāveʻi mo iá.
17. Ko e hā ʻa e ngaahi ola lelei ʻe lava ke hoko mai mei hono ʻiloʻi mo ngāueʻaki ʻa e ngaahi tefitoʻi moʻoni faka-Tohitapú?
17 ʻI heʻetau ʻiloʻi ʻa e ngaahi tefitoʻi moʻoni tefitó pea ngāueʻaki iá, ʻoku tau ʻiloʻi ai ʻoku ʻomai ia ki he lelei pē maʻa kitautolu. Ko e ngaahi tāpuaki fakalaumālie ʻoku maʻu ʻe he kakai ʻa e ʻOtuá ʻoku faʻa ō fakataha ia mo e ngaahi ʻaonga moʻoni. Ko e fakatātaá, ko e faʻahinga ʻoku nau fakaʻehiʻehi mei he ifí, ʻa ia ʻoku nau moʻuiʻaki ha moʻui ʻulungaanga tāú, pea ʻoku nau fakaʻapaʻapa ki he tuʻunga toputapu ʻo e totó ʻoku nau hao mei he tō ʻo maʻukovia ʻe he ngaahi mahaki ʻe niʻihi. ʻI he tuʻunga meimei tatau, ko e moʻui ʻo fehoanaki mo e moʻoni fakaʻotuá ʻe ʻaonga nai kia kitautolu ʻi he ngaahi tuʻunga fakaʻekonōmiká, fakasōsialé, pe fakaʻapí. Ko ha ngaahi ʻaonga moʻoni peheé ʻoku fakamoʻoniʻi ai ʻa e mahuʻinga ʻo e ngaahi tuʻunga ʻa Sihová, ʻoku nau ʻaonga moʻoni. Ka ko hono maʻu ʻa e ngaahi tuʻunga ʻaonga peheé ʻoku ʻikai ko e ʻuhinga tefito ʻataʻatā pē ia ki hono ngāueʻaki ʻa e ngaahi tefitoʻi moʻoni ʻa e ʻOtuá. Ko e kau Kalisitiane moʻoní ʻoku nau talangofua kia Sihova koeʻuhi ʻoku nau ʻofa kiate ia, koeʻuhi ʻoku tuha ia mo ʻenau lotú, pea koeʻuhi ko e meʻa totonu ia ke faí.—Fakahā 4:11.
18. Kapau ʻoku tau loto ke hoko ko e kau Kalisitiane lavameʻa, ko e hā ʻoku totonu ke ne tataki ʻetau moʻuí?
18 Ko hono tuku ʻetau moʻuí ke tataki ʻe he ngaahi tefitoʻi moʻoni faka-Tohitapú ʻoku taki atu ai ki ha founga māʻolunga ange ʻo e moʻuí, ʻa ia te ne tohoakiʻi nai ʻiate ia pē ʻa e niʻihi kehé ki he founga ʻa e ʻOtuá. Ko e meʻa mahuʻinga tahá, ko ʻetau ʻalunga moʻuí ʻoku fakalāngilangiʻi ai ʻa Sihova. ʻOku tau ʻiloʻi ko Sihová ko ha ʻOtua ʻofa moʻoni ia ʻoku finangalo ke tau maʻu ʻa e lelei tahá. ʻI he taimi ʻoku tau fai ai ʻetau ngaahi filí ʻo fakatatau ki he ngaahi tefitoʻi moʻoni faka-Tohitapú pea sio ki he founga ʻo hono tāpuakiʻi kitautolu ʻe Sihová, ʻoku tau hoko ai ʻo toe ongoʻi ofi ange kiate ia. ʻIo, ʻoku tau fakatupu lahi ange ai ha vahaʻangatae ʻofa mo ʻetau Tamai fakahēvaní.
ʻOkú Ke Manatuʻi?
• Ko e hā ʻa e tefitoʻi moʻoni?
• ʻOku anga-fēfē ʻa e faikehekehe ʻa e ngaahi tefitoʻi moʻoní mei he ngaahi laó?
• Ko e hā ʻoku ʻaonga ai kia kitautolu ke fakakaukau mo ngāue ʻo makatuʻunga ʻi he ngaahi tefitoʻi moʻoní?
[Fehuʻi ki he Ako]
[Puha ʻi he peesi 20]
Ko Wilson, ko ha Kalisitiane mei Kana, naʻe fakahaaʻi ange kiate ia ʻi ha ngaahi ʻaho siʻi mei ai ʻe fakanofo ia mei heʻene ngāué. ʻI hono ʻaho fakaʻosi ʻi he ngāué, naʻe vaheʻi ai ia ke ne fufulu ʻa e kā tonu ʻa e talēkita pule ʻo e kautahá. ʻI hono maʻu ʻe Wilson ha paʻanga ʻi he kaá, naʻe tala ange ʻe hono pulé kuo ʻomai ʻe he ʻOtuá ʻa e paʻangá koeʻuhi ko e teu ke fakanofo ʻa Wilson he ʻaho ko iá. Kae kehe, ʻi hono ngāueʻaki ʻa e ngaahi tefitoʻi moʻoni faka-Tohitapú fekauʻaki mo e faitotonú, naʻe fakafoki ʻe Wilson ʻa e paʻangá ki he talēkitá. ʻI heʻene ʻohovale mo e maongo kiate iá, naʻe ʻikai ngata pē ʻi hono ʻoange ʻe he talēkitá ʻa e ngāue tuʻumaʻu kia Wilson he taimi pē ko iá ka naʻe toe hiki hake ia ke ne hoko ko ha mēmipa māʻolunga ʻi he kau ngāue ʻa e kautahá.—Efeso 4:28.
[Puha ʻi he peesi 21]
Ko Rukia ko ha fefine ʻAlipēnia ia ʻi hono taʻu 60 tupú. Koeʻuhi ko ha taʻefelotoi ʻi he fāmilí, naʻe ʻikai te ne lea ai ki hono tuongaʻané ʻo laka hake ʻi he taʻu ʻe 17. Naʻá ne kamata ako ʻa e Tohitapú mo e Kau Fakamoʻoni ʻa Sihová peá ne ʻiloʻi ai ko e kau Kalisitiane moʻoní kuo pau ke nau melino mo e niʻihi kehé, ʻo ʻikai tauhi ʻa e loto-ʻitá. Naʻá ne lotu ʻi he poó kotoa, pea naʻe tā vave pē hono mafú mo ne lue atu ki he fale ʻo hono tuongaʻané. Naʻe fakaava mai ʻe hono fakafotú ʻa e matapaá. ʻI heʻene ʻohovalé, naʻá ne ʻeke ange kia Rukia: “Ko hai kuo maté? Ko e hā hoʻo meʻa ʻoku fai hení?” Naʻe kole ange ʻe Rukia ke sio ki hono tuongaʻané. Naʻá ne fakamatala anga-mokomoko ange ko e ako fekauʻaki mo e ngaahi tefitoʻi moʻoni faka-Tohitapú pea fekauʻaki mo Sihová kuo ueʻi ai ia ke ne fakamelino mo hono tuongaʻané. Hili ha ngaahi tō loʻimata mo e fāʻofua, naʻá na fakafiefiaʻi ʻa e toe fāʻūtaha makehe ko ení!—Loma 12:17, 18.
[Fakatātā ʻi he peesi 23]
[Fakatātā ʻi he peesi 23]
[Fakatātā ʻi he peesi 23]
[Fakatātā ʻi he peesi 23]
“ʻI heʻene sio ki he ngāhi fuʻu kakai, naʻa ne ʻalu hake ki he moʻunga, pea ʻi heʻene nofo hifo ke malanga naʻe ʻunuʻunu atu kiate ia ʻene kau ako: pea ne ōfaʻaki ʻene lea, ʻo ne akoʻi kinautolu.”—Mātiu 5:1, 2