Faingataʻaʻia Fakasinó ʻIkai Hano Fakangatangata

KO Christian, ʻa ia ʻoku nofo ʻi ha fonua ʻAfilika, naʻe ʻave fakamālohiʻi ia ʻe ha kau sōtia ʻa ia naʻa nau feinga ke fakamālohiʻi ke kau ʻi he kau taú, ka naʻá ne fakafisi ke tali koeʻuhi ko hono konisēnisi kuo akoʻi ʻe he Tohitapú. Naʻe ʻave leva ia ʻe he kau sōtiá ki ha ʻapitanga tau, ʻa ia naʻe fanaʻi ai ʻe ha tokotaha ʻia kinautolu hono vaʻé ʻi he hili ia hano tā ʻi he ʻaho ʻe fā. Naʻe lava ke feinga ʻa Christian ki ha falemahaki, ka naʻe pau ke tuʻusi hono vaʻé ʻi lalo hifo ʻi hono tuí. ʻI ha fonua ʻAfilika ʻe taha, kuo aʻu ki he fānau īkí ʻa hono tuʻusi ʻa honau nimá pe vaʻé ʻi he ngaahi angatuʻu fakakautaú. Pea mei Kemipōtia ki he ʻOtu Palakaná, mei ʻAfikānisitani ki ʻEngikola, ʻoku hokohoko atu ai hono maumauʻi mo fakalaveaʻi ʻe he maina ʻutá ʻa e talavou mo e taʻumotuʻa fakatouʻosi.

ʻOku toe kau ʻi he totongi fakamamahí ʻa e ngaahi fakatuʻutāmaki fakatuʻupakeé mo e mahaki ʻo hangē ko e suká. Naʻa mo e ngaahi kona ʻi he ʻātakaí ʻe lava ke iku ia ki he faingataʻaʻia fakasinó. Ko e fakatātaá, ʻi he ngaahi kaungāʻapi vāofi ʻi ha kolo lahi ʻi ʻIulope Hahake, kuo fanauʻi mai ai ʻa e fānau tokolahi ʻoku mutu honau nima ʻe taha. Ko ha konga siʻi pē mei honau tuiʻinimá ʻoku kei toé. ʻOku tuhu ʻa e fakamoʻoní ki he mele fakakēnisí ko e tupu ia mei he ʻuliʻi ʻoku fai ʻe he kemikalé. ʻOku taʻefaʻalaua ʻa e kakai kehe ʻoku nau kei maʻu kotoa pē honau nimá mo e vaʻé ka neongo ia, ʻoku nau faingataʻaʻia koeʻuhi ko e mamateá pe ko ha palopalema kehe. Ko e moʻoni, ʻoku ʻikai hano fakangatangata ʻo e faingataʻaʻia fakasinó.

Pe ko e hā pē ʻa e tupuʻangá, ʻoku lava ke fakatupu lōmekina ʻa e faingataʻaʻia fakasinó. Naʻe mutu ʻa e vaʻe toʻohema ʻo Junior ʻi heʻene taʻu 20. Naʻá ne pehē ki mui ai: “Naʻe lahi ʻa hoku ngaahi palopalema fakaeongó. Naʻá ku tangi lahi ʻi he moʻoniʻi meʻa ko ia ʻe ʻikai ʻaupito ke toe maʻu mai hoku vaʻé. Naʻe ʻikai te u ʻilo ʻa e meʻa ke faí. Naʻá ku puputuʻu.” Kae kehe, ʻi he faai mai ʻa e taimí, naʻe ʻilonga ha liliu ʻi he fakakaukau ʻa Junior. Naʻe kamata ke ne ako ʻa e Tohitapú peá ne ʻilo ai ʻa e ngaahi meʻa naʻe ʻikai ke ngata pē ʻi heʻene tokoniʻi ia ke fekuki mo hono tuʻungá kae toe ʻoange ai kiate ia ha ʻamanaki fakaofo ki ha kahaʻu fakafiefia ʻi heni tonu ʻi he māmaní. Kapau ko ha tokotaha faingataʻaʻia fakasino koe, te ke fie ʻinasi ʻi he ʻamanaki ko iá?

Kapau ko ia, kātaki leva ʻo lau ʻa e kupu hoko maí. ʻOku mau poupouʻi atu ke ke sio ki he ngaahi Konga Tohitapu ʻoku lave ki aí ʻi hoʻo Tohitapú tonu koeʻuhi ke ke fakamoʻoniʻi tonu ai ʻa e meʻa kuo tuku tauhi mai ʻe he Tokotaha-Fakatupú maʻá e faʻahinga ʻoku nau ako ki heʻene taumuʻá pea feʻunuʻaki ki ai ʻenau moʻuí.