Founga ʻE Ngata Ai ʻa e Faingataʻaʻia Fakasinó

SIOLOTO atu ki he mata ʻo e kuí ʻoku sio, ko e telinga ʻo e tulí ʻoku fanongo ki he leʻo kotoa pē, ko e ʻelelo ʻo e noá ʻoku hiva fiefia, pea kaumālohi mo malava ke lue takai holo ʻa e vaʻe ʻo e heké! ʻOku tau talanoá, ʻo ʻikai ki he ngaahi lavameʻa ʻi he ʻilo fakafaitoʻó, ka ki he ola ʻo e kau tonu mai ʻa e ʻOtuá maʻá e faʻahinga ʻo e tangatá. ʻOku tomuʻa tala ʻe he Tohitapú: “ʻE toki fakaava ʻa e mata ʻo e kui, pea toʻo ʻa e telinga ʻo e tuli. Toki hopo ʻa e heke hange ha tia, pea hiki mavava ʻa e ʻelelo ʻo e noa.” (Aisea 35:​5, 6) Ka ʻe lava fēfē ke tau fakapapauʻi ko e kikite fakaofo moʻoni ko ení ʻe fakahoko ia?

Ke kamataʻakí, ʻi he ʻi māmani ʻa Sīsū Kalaisí, naʻá ne fakamoʻui moʻoni ʻa e kakai ʻo e faʻahinga mahaki mo e faingataʻaʻia fakasino kotoa. ʻIkai ngata aí, ko e lahi taha ʻo ʻene ngaahi maná naʻe mātā ia ʻe he kau fakamoʻoni tokolahi—naʻa mo hono ngaahi filí. Ko hono moʻoní, ʻi ha tuʻunga ʻe taha, naʻe fakatotoloʻi fakaʻāuliliki ai ʻe he kau fakafepaki lotolotouá ha fakamoʻui naʻe fai koeʻuhi ke fakaongoongokoviʻi ai ʻa Sīsū. Ka ʻi heʻene fakamā fau kia kinautolú, ko e meʻa pē naʻa nau faí ko hono fakamoʻoniʻi ʻa ʻene maná. (Sione 9:​1, 5-​34) ʻI he hili ʻa hono fakahoko ʻe Sīsū ha mana taʻealafakaʻikaiʻi kehe ʻe taha, naʻa nau pehē ʻi he ongoʻi feifeitamaki: “Koeha oku tau fai? he oku fai e he tagata ni ae gaahi mana lahi.” (Sione 11:​47, PM) Kae kehe, ko e kakai lāuvalé naʻe ʻikai te nau ongongataʻa pehē, he naʻe kamata ke tui ʻa e tokolahi kia Sīsū.​—Sione 2:​23; 10:​41, 42; 12:​9-​11.

Ngaahi Mana ʻa Sīsuú​—Ko ha Fakaʻaliʻali ʻo e Fakamoʻui Fakaemāmani Lahi

Ko e ngaahi mana ʻa Sīsuú naʻe ʻikai ko hano fakamoʻoniʻi pē ko Sīsū ʻa e Mīsaiá mo e ʻAlo ʻo e ʻOtuá. Naʻá ne teuteu ha makatuʻunga ki he tui ki he ngaahi talaʻofa ʻa e Tohitapú ʻe fakamoʻui ʻa e faʻahinga talangofua ʻo e tangatá ʻi he kahaʻú. Ko e ngaahi talaʻofa ko ení ʻoku kau ai ʻa e kikite ʻi he ʻAisea vahe 35, naʻe lave ki ai ʻi he ʻuluaki palakalafí. ʻOku fakahā ʻe he Aisea 33:24 ʻo kau ki he tuʻunga moʻuilelei ʻi he kahaʻú ʻa e faʻahinga ʻo e tangata manavahē-ʻOtuá: “ʻOku ʻikai ha nofo ai te ne pehe, ʻOku ou mahaki.” ʻI he tuʻunga tatau, ʻoku talaʻofa ʻe he Fakahā 21:4: “[Ko e ʻOtuá] te ne holoholo ʻa e loʻimata kotoa pē mei honau mata; pea ʻe ʻikai toe ai ha mate, pea ʻe ʻikai toe ai ha mamahi, pe ha tangi, pe ha ongosia; kuo mole ʻa e ngaahi meʻa muʻa [ngaahi ʻahiʻahi mo e faingataʻaʻia ʻi he ʻaho ní].”

ʻOku lotu maʻu pē ʻa e kakaí ki hono fakahoko ʻo e ngaahi kikité ni ʻi heʻenau toutou lau ʻa e sīpinga lotu ʻa Sīsuú, ʻa ia ʻoku pehē ʻi hano konga: “Ke hoko mai ho Puleʻangá. Ke fai ho finangaló ʻi māmani, ʻo hangē ko ia ʻi he langí.” (Mātiu 6:​10,  King James Version) ʻIo, ko e finangalo ʻo e ʻOtuá ʻoku kau ki ai ʻa e māmaní mo e faʻahinga ʻo e tangatá. Ko e mahakí mo e faingataʻaʻia fakasinó, neongo ʻoku fakaʻatā ʻi ha ʻuhinga, ʻe vavé ni ke ʻikai toe ʻi ai; ʻe ʻikai te nau fakameleʻi taʻengata ʻa e “tuʻungavaʻe” ʻo e ʻOtuá.—Aisea 66:1. a

Fakamoʻui ʻo ʻIkai ha Mamahi pe Totongi

Neongo pe ko e hā ʻa e faingataʻa naʻe moʻua ai ʻa e kakaí, naʻe fakamoʻui ia ʻe Sīsū ʻo ʻikai ha mamahi, ʻikai toe toloi pea taʻetotongi. ʻI he taʻealamataʻofí, ko e leaʻaki ʻo e meʻá ni naʻe mafola ia hangē ha afi fakaʻauhá, pea vave ai ke “ʻalu atu kiate ia ha ngāhi fuʻu kakai, ʻo nau omi mo kinautolu ha niʻihi naʻe heke, mo e niʻihi naʻe kui, mo e niʻihi naʻe noa, mo e niʻihi naʻe pai, pea mo ha tokolahi naʻe puke kehe: ʻo nau laku kinautolu ki he vaʻe ʻo Sisu, pea ne fakamoʻui kinautolu.” Naʻe anga-fēfē ʻa e tali ʻa e kakaí? ʻOku hoko atu ʻe he fakamatala sio tonu ʻa Mātiú: “Pea ofo ai ʻa e kakai, heʻenau sio ki he noa ʻoku lea . . . mo e heke ʻoku ʻeveʻeva, mo e kui ʻoku ʻa: pea nau fakamaloʻia ʻa e ʻOtua ʻo Isileli.”​—Mātiu 15:​30, 31.

Fakatokangaʻi ko e faʻahinga naʻe fakamoʻui ʻe Sīsuú naʻe ʻikai ke filifili lelei kinautolu mei he kakaí​—ko ha kākā ʻoku ngāueʻaki ʻe he kau tuʻuaki kākaá. ʻI hono kehé, ko e ngaahi kāinga mo e ngaahi kaumeʻa tokolahi ʻo e faʻahinga naʻe mahakí naʻa “nau laku kinautolu ki he vaʻe ʻo Sisu, pea ne fakamoʻui kinautolu.” Tau toe vakai angé he taimí ni ki he niʻihi ʻo e ngaahi fakatātā pau ʻo e malava ʻa Sīsū ke faifakamoʻuí.

Kui: ʻI he ʻi Selusalema ʻa Sīsuú, naʻá ne mamata ai ki ha tangata kuó ne “kui, ʻa ia naʻe fanauʻi ʻoku pehē.” Ko e tangatá ni naʻe ʻiloa ia ʻi he koló ko ha kui kolekole. Ko ia, ʻe lava ke ke fakaʻuta atu ki he fiefia mo e vālau tuʻu ʻi he sio ʻa e kakaí kiate ia ʻokú ne lue holo ʻoku sió! Neongo ia, naʻe ʻikai ke fiefia ʻa e tokotaha kotoa pē. ʻI he loto-mamahi ʻi hono fakaeʻa ki muʻa ʻe Sīsū ʻa ʻenau fulikivanú, naʻe holiholivale ai ha kau mēmipa ʻe niʻihi ʻo ha kulupu Siu tuʻu-ki-muʻa mo tākiekina lahi naʻe ui ko e kau Fālesí ke maʻu ha fakamoʻoni ʻo ha kākā ʻi he tafaʻaki ʻa Sīsuú. (Sione 8:​13, 42-​44; 9:​1, 6-​31) Ko ia, naʻa nau fakaʻeke ai ʻa e tangata naʻe fakamoʻuí, hoko atu ki heʻene ongo mātuʻá pea toe hoko ki he tangatá. Ka ko e ngaahi fakaʻekeʻeke ʻa e kau Fālesí naʻá ne fakamoʻoniʻi tonu ʻe ia ʻa e mana ʻa Sīsuú, ʻa ia naʻe fakaʻitaʻi ai kinautolu. ʻI he puputuʻu ʻi he mioʻi ʻa e kau mālualoi lotu ko ení, naʻe pehē tonu ai ʻe he tangata naʻe fakamoʻuí: “Talu mei muʻa ʻi muʻa kuo teʻeki ke talanoaʻia ʻo pehē, kuo fakaʻā ʻe ha taha ʻa e mata ʻo ha toko taha ne fanauʻi kui. Ka ne ʻikai ko e toko taha ia mei he ʻOtua, ne ʻikai te ne lava ha momoʻi meʻa.” (Sione 9:​32, 33) ʻI hono fakahaaʻi totonu mo pōtoʻi ko ia ʻo e tuí, naʻe “kapusi ia kituaʻā” ʻe he kau Fālesí, ʻa ia ʻoku fakahuʻunga mai ai naʻa nau tuli ʻa e tangata naʻe kui ko ení mei he sinakoké.​—Sione 9:​22, 34.

Tuli: Lolotonga ʻa e ʻi he Tikapōlusí ʻa Sīsuú, ko ha feituʻu fakahahake ʻo e Vaitafe Sioataní, ko e kakai aí naʻa nau “ʻomi kiate ia ha tangata naʻe tuli mo leʻovale.” (Maake 7:​31, 32) Naʻe ʻikai ke ngata pē ʻi hono fakamoʻui ʻe Sīsū ʻa e tokotahá ni ka naʻá ne toe fakahaaʻi ʻa e vavanga loloto ki he ongoʻi ʻa e tulí, ʻa ia naʻá ne mei mā nai ʻi he kakaí. ʻOku tala mai ʻe he Tohitapú kia kitautolu naʻe ʻave ʻe Sīsū ʻa e tangata tulí “mei he kakai ʻo fakaekinaua pe” ʻo ne fakamoʻui ia. Naʻe toe “matuaki toʻoa fakamanavahē” ʻa e kau fakamoʻoni sio tonú ʻo nau pehē: “Hono ʻikai tuʻutai ʻene ngaue kotoa pe! kuo ne ngaohi ʻa e tuli ke ongo, mo e noa ke lea.”​—Maake 7:​33-​37.

Mamatea: ʻI he ʻi Kāpaneume ʻa Sīsuú, naʻe fakaofiofi atu ai ʻa e kakaí kiate ia mo ha tangata mamatea ʻokú ne tokoto ʻi ha mohenga. (Mātiu 9:2) ʻOku fakamatala ʻa e Mātiu 9 veesi 6 ki he 8 ki he meʻa naʻe hokó. Naʻe “lea [ʻa Sīsū] ki he tangata mamatea, Tuʻu, pea toʻo ho mohenga, pea mole ki ho ʻapi. Pea ne tuʻu, ʻo ʻalu ki hono ʻapi. Pea ʻi he sio ki ai ʻa e kakai naʻa nau manavahe; pea nau fakamalo ki he Otua, heʻene tuku ha fuʻu mafai pehe ki he tangata.” Ko e mana foki ko ení naʻe fakahoko ia ʻi he lotolotonga ʻo e kau ākonga ʻa Sīsuú mo hono ngaahi filí. Fakatokangaʻi ko e kau ākongá, ʻi he ʻikai fakakuihi ʻe he tāufehiʻá mo e tomuʻa fehiʻá, naʻa nau “fakamalo ki he Otua” ʻi he meʻa ne nau mamata ki aí.

Mahaki: “Pea haʻu kia [Sīsū] ha kilia, ʻo ne kole mo tuʻulutui kiate ia, mo ne pehe, Ka ne ke loto ke fai, te ke lava ke fakamaʻa au. Pea langa ʻa e fatu ʻo Sisū ʻi he ʻofa, ʻo ne mafao atu hono nima ʻo ala kiate ia, mo ne pehe, ʻOku ou loto pe; ke ke maʻa koe. Pea ʻi heʻene folofola, naʻe matafi leva  ʻa e kilia meiate ia.” (Maake 1:​40-​42) Fakatokangaʻi naʻe ʻikai ke mamae ʻa Sīsū ʻi heʻene fakamoʻui ʻa e tokotahá ni ka naʻá ne fai ʻi he manavaʻofa moʻoni. Fakaʻuta atu ko ha kilia koe. ʻE fēfē hoʻo ongoʻí kapau naʻe fakamoʻui koe ʻo ʻikai toe tatali mo ʻikai ha langa mei ha mahaki fakalilifu ʻa ia kuó ne fakameleʻi māmālie ho sinó peá ke hoko ai ko ha tokotaha liʻekina ʻe he sōsaietí? ʻOku ʻikai ha veiveiua ʻe lava ke ke mahinoʻi ʻa e ʻuhinga naʻe hoko ai ha tokotaha kilia ʻe taha naʻe fakamoʻui fakaemana ʻo “foʻohifo ʻi he vaʻe ʻo Sīsū, ʻo ne fakafetaʻi kiate ia.”​—Luke 17:​12-​16.

Lavea: Ko e mana fakamuimui ʻa Sīsū ki muʻa pea puke pōpula mo tutuki iá ko ha faifakamoʻui. ʻI ha ʻoho fakavave ki he faʻahinga naʻe ʻamanaki ke nau ʻave ʻa Sīsuú, ko e ʻapositolo ko Pitá, “ʻa ia kuo maʻu heletā, naʻa ne unuhi ia, ʻo ne tāʻi ʻa e tamaioʻeiki ʻa e Taulaʻeiki-lahi, ʻo ne tuʻusi hono lauʻi telinga toʻomataʻu.” (Sione 18:​3-5, 10) Ko e fakamatala tatau ʻi he tohi Luké ʻokú ne tala mai ai kia kitautolu naʻe “ala [ʻa Sīsū] ki he lauʻi telinga, ʻo ne fakamoʻui ia.” (Luke 22:​50, 51) Ko e tōʻonga manavaʻofa ko ení naʻe toe fakahoko ia ʻi he ʻao ʻo e ngaahi kaumeʻa pea pehē ki he ngaahi fili ʻo Sīsuú—ʻi he tuʻunga ko ení, ko hono kau puke pōpulá.

ʻIo, ko e ofi ange ʻetau vakaiʻi ʻa e ngaahi mana ʻa Sīsuú, ko e lahi ange ia ʻetau ʻiloʻi ʻa e ngaahi fakaʻilonga mahino ʻo ʻene alafalalaʻangá. (2 Timote 3:​16) Pea hangē ko ia naʻe muʻaki lave ki aí, ko e sivisiviʻi peheé ʻoku totonu ke ne fakaivimālohiʻi ʻetau tui ki he talaʻofa ʻa e ʻOtuá ke fakamoʻui ʻa e faʻahinga talangofua ʻo e tangatá. ʻOku fakamatalaʻi ʻe he Tohitapú ʻa e tui faka-Kalisitiané ko e “fakatuʻotuʻa ʻosi fakapapauʻi ki he ngaahi meʻa ʻoku ʻamanekiná, ko e fakahāhā mahino ʻo e ngaahi meʻa moʻoní neongo ʻoku ʻikai sio ki ai.” (Hepelu 11:​1, NW, fakaʻītali ʻamautolu) ʻOku hā mahino, ʻoku ʻikai fakalototoʻaʻi ʻe he ʻOtuá ʻa e mātuʻaki tuingofuá pe fakaʻamú, ka ko e tui fefeka ʻoku makatuʻunga ʻi he fakamoʻoni. (1 Sione 4:1) ʻI heʻetau maʻu ʻa e tui peheé, ʻoku tau hoko ai ʻo mālohi, moʻuilelei mo fiefia fakalaumālie lahi ange.​—Mātiu 5:3; Loma 10:17.

Fakamoʻui Fakalaumālié Kuo Pau ke Muʻomuʻa Ia!

Ko e kakai moʻuilelei fakaesino tokolahi ʻoku ʻikai te nau fiefia. ʻOku aʻu ʻo feinga taonakita ʻa e niʻihi koeʻuhi ko e ʻikai haʻanau ʻamanaki ki he kahaʻú pe koeʻuhi ko ʻenau ongoʻi lōmekina ʻi he ngaahi palopalemá. Ko hono moʻoní, ʻoku nau faingataʻaʻia fakalaumālie—ko ha tuʻunga ʻoku mafatukituki lahi ange ʻi he ʻafio ʻa e ʻOtuá ʻi ha faingataʻaʻia fakasino. (Sione 9:​41) ʻI he tafaʻaki ʻe tahá, ko e tokolahi ʻoku nau faingataʻaʻia fakasino, ʻo hangē ko Christian mo Junior naʻe lave ki ai ʻi he kupu ki muʻá, ʻoku nau moʻui fiefia mo fiemālie. Ko e hā hono ʻuhingá? Koeʻuhi ʻoku nau moʻuilelei fakalaumālie pea nau longomoʻui ʻi ha ʻamanaki papau ʻoku makatuʻunga ʻi he Tohitapú.

ʻI he lave ki heʻetau fiemaʻu makehe ʻi he tuʻunga ko e faʻahinga ʻo e tangatá, naʻe pehē ʻe Sīsū: “Oku ikai moʻui ʻa e tangata ʻi he ma pe, ka ʻi he ngāhi folofola kotoa pe ʻoku ʻalu atu mei he fofonga ʻo e ʻOtua.” (Mātiu 4:4) ʻIo, ʻi he ʻikai tatau mo e fakatupu ʻo e fanga manú, ʻoku fiemaʻu ki he faʻahinga ʻo e tangatá ʻa e meʻa lahi ange ʻi he tokonaki fakamatelié. ʻI hono fakatupu ʻi he “imisi” ʻo e ʻOtuá, ʻoku tau fiemaʻu ʻa e meʻakai fakalaumālie—ko e ʻiloʻi ʻo e ʻOtuá pea mo e anga ʻo ʻetau kaunga ki heʻene taumuʻá pea pehē ki hono fai ʻa hono finangaló. (Senesi 1:​27; Sione 4:​34) Ko e ʻiloʻi ʻo e ʻOtuá ʻokú ne fakafonu ʻetau moʻuí ʻaki ʻa e taumuʻa mo e longomoʻui fakalaumālie. ʻOkú ne toe fakatoka ʻa e makatuʻunga ki he moʻui taʻengata ʻi ha māmani palataisí. “Ko eni ae moui taegata,” ko e lea ia ʻa Sīsuú “koʻe nau ilo koe koe Otua moonia be taha, mo Jisu Kalaisi, aia naa ke fekau.”​—Sione 17:​3, PM.

ʻOku taau ke fakatokangaʻi ko e toʻutangata ʻo Sīsuú naʻe ʻikai te nau ui ia ko ha “Faifakamoʻui” ka ko e “Faiako.” (Luke 3:​12; 7:​40, NW) Ko e hā hono ʻuhingá? Koeʻuhi naʻe akoʻi ʻe Sīsū ʻa e kakaí ʻo fekauʻaki mo e fakaleleiʻanga tuʻuloa ki he ngaahi palopalema ʻa e faʻahinga ʻo e tangatá—ko e Puleʻanga ʻo e ʻOtuá. (Luke 4:​43; Sione 6:​26, 27) Ko e founga-pule fakahēvani ko eni ʻi he ʻaofinima ʻo Sīsū Kalaisí te ne puleʻi ʻa e māmaní kotoa pea fakahoko ʻa e ngaahi talaʻofa faka-Tohitapu kotoa pē ʻo kau ki hono toe fakafoki kakato mai mo tuʻuloa ʻa e faʻahinga anga-tonu ʻo e tangatá pea mo honau ʻapi fakaemāmaní. (Fakahā 11:15) Ko e ʻuhinga ia naʻe fakatahaʻi ai ʻe Sīsū, ʻi heʻene sīpinga lotú, ʻa e hoko mai ʻa e Puleʻangá mo hono fakahoko ʻa e finangalo ʻo e ʻOtuá ʻi he māmaní.​—Mātiu 6:​10.

 Ki he kau faingataʻaʻia tāutaha tokolahi, ko e ʻilo ki he ʻamanaki fakalotomāfana ko ení kuó ne ʻai honau ngaahi loʻimata ʻo e mamahí ke hoko ko e ngaahi loʻimata fiefia. (Luke 6:​21) Ko hono moʻoní, ʻe fai ʻe he ʻOtuá ʻo hulu atu ʻi hono toʻo pē ʻa e mahakí mo e faingataʻaʻiá; te ne tāmateʻi ʻa e tupuʻanga tefito ʻo e faingataʻaʻia ʻa e tangatá​—ko e angahalá tonu. ʻOku moʻoni, ko e Aisea 33:24 mo e Mātiu 9:​2-7, naʻe lave ki ai ki muʻá, ʻokú ne fakafehokotaki ʻa e puké ki hotau tuʻunga angahalaʻiá. (Loma 5:12) Ko ia ai, ʻi hono ikuʻi ʻa e angahalá, ʻe toki fiefia ai ʻa e faʻahinga ʻo e tangatá ʻi he “tauʻataina fakalangi ʻa e fanau ʻa e ʻOtua,” ko ha tauʻatāina ʻoku kau ki ai ʻa e haohaoa ʻo e ʻatamaí mo e sinó.​—Loma 8:​21.

ʻE faingofua ki he faʻahinga ʻoku nau maʻu ha moʻuilelei feʻungá ke nau taʻehoungaʻia ʻi honau tuʻungá. Ka ʻoku ʻikai ke hoko ia ʻi he faʻahinga ʻoku nau fuesia ʻa e tuʻunga fakamamahi ʻo e faingataʻaʻia fakasinó. ʻOku nau ʻilo ʻa e mātuʻaki mahuʻinga tofu pē ko ia ʻa e moʻuileleí mo e moʻuí pea mo e malava ke liliu fakafokifā mo taʻeʻamanekina ʻa e ngaahi meʻá. (Koheleti 9:​11) Ko ia, ko ʻetau ʻamanakí ia ʻe fai ʻe he kau faingataʻaʻia fakasino ʻi heʻetau kau lautohí ha fakakaukau makehe ki he ngaahi talaʻofa fakaofo ʻa e ʻOtuá ʻa ia ʻoku hiki ʻi he Tohitapú. Naʻe foaki ʻe Sīsū ʻa ʻene moʻuí koeʻuhi ke fakapapauʻiʻaki ʻa hono fakahokó. Ko e hā ha toe fakapapau lelei hake ai ʻe lava ke tau maʻu?​—Mātiu 8:​16, 17; Sione 3:​16.

[Fakamatala ʻi lalo]