Talanoa ki he Moʻuí

Fakapaleʻi ʻi he Anga-Līʻoa Fakaʻotuá

FAKAMATALA FAI ʻE WILLIAM AIHINORIA

Naʻá ku ʻā hake he tuʻuapoó ʻi he fanongo ki he toʻe anga-maheni ʻa e tangataʻeikí. Naʻá ne teka holo he falikí mo puke ʻa hono keté. Ko e fineʻeikí, ko hoku tuofefine lahí, mo au naʻa mau haʻohaʻo takai ʻiate ia. ʻI he hā ngali holo ʻa e langá, naʻá ne tangutu hangatonu hake, ʻo māpuhoi, mo ne pehē: “Ko e Kau Fakamoʻoni ʻa Sihová pē ʻoku nau maʻu ʻa e nonga ʻi he māmani ko ení.” Naʻe fakapuputuʻu ʻa e leá ni, ka naʻe maongo loloto ia kiate au koeʻuhí ne teʻeki ai ʻaupito ke u fanongo ʻi he Kau Fakamoʻoni ʻa Sihová ki muʻa. Naʻá ku fifili ki he meʻa naʻá ne ʻuhinga ki aí.

NAʻE hoko ʻa e meʻa ko iá ʻi he 1953 ʻi heʻeku taʻu onó. Naʻá ku hoko ko e konga ʻo ha fāmili ʻi ha mali tokolahi ʻi Ewossa, ko ha kolo ngoue ʻi he hihifo-lotoloto ʻo Naisīliá. Ko e kiʻi leka au hono uá, ka ko e ʻuluaki foha ʻi ha fāmili naʻe tupu ki mui ʻo kau ki ai ʻa e uaifi ʻe 3 ʻo e tangataʻeikí mo e fānau ʻe toko 13. Naʻa mau nofo fakataha ʻi he fale ʻumea ʻato saafa, loki fā ʻa e kui-tangatá. Naʻe toe kau mai ki he nofó ʻa e kui-fefiné mo e fanga tokoua ʻe toko tolu ʻo e tangataʻeikí, pea pehē ki honau ngaahi fāmilí.

Naʻe fakamamahi ʻa ʻeku tupu haké. Naʻe tautefito ʻa e tānaki atu ki he meʻá ni ʻa e ʻikai moʻui lelei ʻa e tangataʻeikí. Naʻá ne mahaki tauhi ʻaki ʻa e langa keté ʻa ia naʻe hokohoko ʻo aʻu ai pē ki heʻene toki mate ʻi he ngaahi taʻu lahi ki mui ai. Ko hono mahaki taʻeʻiloá naʻe ʻikai sai ia ki ha faʻahinga faitoʻo pē naʻe ala maʻu ki ha fāmili ʻAfilika māʻulalo—fakatouʻosi ʻi he faitoʻo lauʻiʻakaú pea mo e faitoʻo tukufakaholó. Naʻa mau tangi ʻi ha ngaahi pō lahi ʻi he tafaʻaki ʻo e tangataʻeikí ʻi heʻene teka holo he falikí ʻi he langá ʻo aʻu ai pē ki he ʻuʻua ʻa e moá ʻi he pongipongi hono hokó. ʻI he fekumi ki ha faitoʻo ki hono mahakí, naʻá ne  faʻa fononga ai mo e fineʻeikí, kau nofo pē mo hoku fanga tokouá ʻo tokangaʻi ʻe heʻemau kui-fefiné.

Naʻe moʻui ʻa homau fāmilí ʻi hono tō mo fakatau atu ʻa e ʻufí, manioké, mo e kola nut. Naʻa mau toe kiʻi fakatafe ʻa e ʻakau lapá ke tānaki atu ki heʻemau paʻanga hū mai siʻisiʻí. Ko ʻemau meʻakai tuʻumaʻú ko e ʻufí. Naʻa mau kai ʻufi ʻi he pongipongí, ʻufi kuo tuki ʻi he efiafí, pea toe kai ʻufi ʻi he poʻulí. ʻI he taimi ʻe niʻihi naʻa mau maʻu ai ha meʻa ʻoku kiʻi kehe ʻi heʻemau kai ha hopa tunu.

Ko ha konga mahuʻinga ʻo ʻemau moʻuí ko e lotu ki he fanga kuí. Naʻe ʻoatu ʻe he fāmilí ʻa e meʻakai ki he fanga kuí ʻo tuku ʻi muʻa ʻi ha ngaahi vaʻakau ʻoku haʻihaʻi ki ai ʻa e ngaahi ngeʻesi fingota lanu kehekehe. Naʻe toe lotu ʻa e tangataʻeikí ki ha ʻaitoli ke seʻe ʻaki ʻa e ngaahi laumālie ʻulí mo e kau fefine taula-faʻahikehé.

ʻI heʻeku taʻu nimá, naʻa mau hiki fakataimi ai mei homau koló ki ha ʻapitanga faama naʻe kilomita ʻe 11 nai ʻa hono mamaʻó. Naʻe maʻu ai ʻe he tangataʻeikí ʻa e mahaki ponú, ʻa ia naʻe toe tānaki atu ai ʻa e mamahi lahi ki hono mahaki keté. Naʻe ʻikai lava ke ne ngāue lolotonga ʻa e ʻahó, pea ko ʻene langa keté naʻá ne fakamamahiʻi ia ʻi he poʻulí. Naʻá ku maʻu ʻa e mahaki ʻi he kutu fisí, pe kutu ʻi he kilí, ko ha faʻahinga ʻo e taifusí. Ko hono ikuʻangá, naʻa mau moʻui ai ʻi he ngaahi tokoni mei homau fāmili fakalahí. Koeʻuhi ke ʻoua ʻe mate ʻi he masivá, naʻa mau toe foki ki homau koló ʻa Ewossa. Naʻe fiemaʻu au ʻe he tangataʻeikí, ʻa hono foha ʻuluakí, ke u hoko ki ha tuʻunga māʻolunga ange ʻi he hoko ko ha tokotaha faama pē. Naʻá ne ongoʻi ko ha ako lelei te ne ʻai ai au ke u malava ʻo ʻohake ai ʻa e tuʻunga moʻui ʻa e fāmilí pea tokoniʻi au ke u tauhi ʻa hoku fanga tokouá.

Fetuʻutaki mo e Ngaahi Lotu Kehé

Naʻe malava ke kamata ʻa ʻeku akó ʻi homau koló. Naʻe taki atu ʻe he meʻá ni ke u fetuʻutaki ai mo e ngaahi lotu ʻa e Puleʻanga-Haʻa-Kalisitiané. ʻI he 1950 tupú, naʻe felāveʻi ofi ʻaupito ai ʻa e ako ʻa e Hihifó mo e lotu ʻa e kau pule fakakoloniá. Koeʻuhí naʻá ku ako ʻi ha lautohi siʻi ʻa e Katoliká, naʻe ʻuhinga iá kuo pau ke u hoko ai ko ha tokotaha Katolika Loma.

ʻI he 1966, ʻa e taʻu naʻá ku taʻu 19 aí, naʻe fakahū ai au ki he Ako Lotoloto ʻa e Pilikimi Papitaisó ʻi he kolo ko Ewohinmi, ʻoku kilomita nai ʻe 8 mei Ewossa. Naʻe liliu ai ʻa ʻeku ako fakalotú. Koeʻuhi naʻá ku ako he taimi ko ení ʻi ha akoʻanga Palotisani, naʻe taʻofi ai au ʻe he kau pātele Katoliká mei heʻeku kau ki he Misa he Sāpaté.

Ko e lolotonga ʻa hoku taimi ʻi he akoʻanga siasi Papitaiso ko ení naʻá ku ʻuluaki fetuʻutaki ai mo e Tohitapú. Neongo naʻá ku kei ʻalu pē ki he siasi Katoliká, naʻá ku lau ʻiate au pē ʻa e Tohitapú ʻi he Sāpate kotoa hili ʻa e ouau ʻa e siasi Katoliká. Naʻá ku toʻoa ʻi he ngaahi akonaki ʻa Sīsū Kalaisí, ʻo langaʻi ai ʻiate au ʻa e holi ke moʻuiʻaki ha moʻui mohu ʻuhinga ʻo e anga-līʻoa fakaʻotuá. Ko e lahi ange ʻa ʻeku lau ʻa e Tohitapú, ko e lahi ange ia ʻeku fakaliliʻa ʻi he mālualoi ʻa e niʻihi ʻo e kau taki lotú pea mo e founga moʻui taʻetaau ʻa e tokolahi ʻo e haʻa faifekaú. Ko e meʻa naʻá ku sio ai ʻi he lotolotonga ʻo e faʻahinga naʻa nau taku ko e kau Kalisitiané naʻe kehe ʻaupito ia mei he meʻa naʻe akoʻi mo fai ʻe Sīsū mo ʻene kau ākongá.

Naʻe ʻi ai ʻa e ngaahi meʻa pau ʻe niʻihi naʻe hoko naʻá ku ʻohovale ai. ʻI he taimi ʻe taha ʻi heʻeku ʻalu ki he falekoloa ʻo e faiako fakalotú ke fakatau mai ha losalió, naʻá ku sio ai ki ha kahoa fakafaimana ʻomi monū ʻoku tautau ʻi he kaumatapā ʻo e falekoloá. ʻI he taimi ʻe taha, naʻe feinga ai ʻa e pule ako ʻo e ako Papitaisó ke pāʻusiʻi fakaefehokotaki fakasino au. Naʻá ku toki ʻilo ki mui ko ha tokotaha faka-Sōtoma ia pea naʻá ne pāʻusiʻi ʻa e niʻihi kehé. Naʻá ku fakalaulauloto ki he ngaahi meʻá ni, ʻo ʻeke hifo kiate au, ‘ʻOku hōifua ʻa e ʻOtuá ki he ngaahi lotu ʻa ia ko honau kau mēmipá pea naʻa mo honau kau takí ʻoku ʻikai fiemaʻu ke nau fai ha fakamatala ki heʻenau ngaahi angahala mamafá?’

 Ko ha Liliu ʻo e Lotú

Kae kehe, naʻá ku saiʻia ʻi he meʻa naʻá ku lau ʻi he Tohitapú pea fakapapauʻi ke hokohoko atu hono lau iá. Ko e taimi ia naʻe kamata ai ke u fakakaukau ki he fakamatala ʻa e tangataʻeikí ʻi he taʻu nai ʻe 15 ki muʻá: “Ko e Kau Fakamoʻoni ʻa Sihová pē ʻoku nau maʻu ʻa e nonga ʻi he māmani ko ení.” Ka naʻá ku manavasiʻi koeʻuhí ko e kau talavou Fakamoʻoni ʻi hoku ʻapiakó naʻe manukiʻi pea naʻe tautea he taimi ʻe niʻihi ʻi he ʻikai te nau kau ʻi heʻemau lotu pongipongí. Pea ko e niʻihi ʻo ʻenau ngaahi tuí naʻe hā ngali faikehe. Ko e fakatātaá, naʻe hoko ʻo faingataʻa ke u tui ko e toko 144,000 pē ʻoku ʻalu ki hēvaní. (Fakahā 14:3) Koeʻuhi ko ʻeku holí ia ke ʻalu ki hēvani, naʻá ku fifili ai pe kuo ʻosi kakato nai ʻa e fika ia ko ení ki muʻa ʻi hoku fāʻeleʻí.

Naʻe hā mahino naʻe kehe ʻa e Kau Fakamoʻoní ia ʻi honau ʻulungāngá mo e fakakaukaú. Naʻe ʻikai te nau kau ʻi he ngaahi ngāue taʻetotonu mo fakamālohi ʻa e kau talavou kehe ʻi he ʻapiakó. Kiate au, naʻa nau mavahe moʻoni mei he māmaní, ʻo hangē ko ia ko ʻeku lau ʻi he Tohitapú ʻoku totonu ke pehē ʻa e faʻahinga ʻoku nau tōʻongaʻaki ʻa e lotu moʻoní.​—Sione 17:​14-​16; Semisi 1:​27.

Naʻá ku fakapapauʻi ai ke fai ha sivisiviʻi lahi ange. ʻI Sepitema 1969, naʻe malava ai ke u maʻu ʻa e tohi “Ko e Moʻoni ʻA Ia ʻOku Fakatau ki he Moʻui Taʻengata.” ʻI he māhina hono hokó, ko ha tāimuʻa hangē ko ia ʻoku uiʻaki ʻa e faifekau taimi-kakato ʻa e Kau Fakamoʻoni ʻa Sihová, naʻá ne kamata ako mo au. ʻI he ueʻi ʻe heʻeku ʻuluaki akó, naʻá ku kamata lau ai ʻa e tohi Moʻoni ʻi ha pō Tokonaki pea fakaʻosi ia ʻi he hoʻatā efiafi ʻo e ʻaho hokó. ʻI he taimi pē ko iá, naʻá ku kamata tala ai ki hoku ngaahi kaungāakó ʻa e ngaahi meʻa fakaofo naʻá ku laú. Ko e kau akó mo e kau faiakó naʻa nau fakakaukau kuo ʻai au ʻe heʻeku tui toki maʻu foʻoú ke u fakasesele. Ka naʻá ku ʻiloʻi naʻe ʻikai te u hoko ʻo fakasesele.​—Ngāue 26:24.

Ko e ongoongo ʻo ʻeku malangaʻi ha lotu foʻoú naʻe tala ia ki heʻeku ongo mātuʻá. Naʻá na kole mai ke u foki ange ki ʻapi he taimi pē ko iá koeʻuhi ke lava ke na ʻiloʻi pe ko e hā ʻa ʻeku palopalemá. Naʻe ʻikai ha taha naʻe lava ke u hanga ki ai ki ha faleʻi, he naʻe ʻalu ʻa e Kau Fakamoʻoní kotoa ki he taha ʻo ʻenau ngaahi fakataha-lahi fakavahé ʻi Ilesha. ʻI heʻeku foki ki ʻapí naʻe nafui ʻaki au ʻa e ngaahi fehuʻi mo e fakaanga mei heʻeku faʻeé mo e ngaahi kāinga kehé. Naʻá ku feinga ʻaki ʻeku lelei tahá ke taukapoʻi ʻa e meʻa naʻá ku ako mei he Tohitapú.​—1 Pita 3:​15.

 Hili ʻa e feinga ʻikai lavameʻa ke fakamoʻoniʻi ko e kau faiako loi ʻa e Kau Fakamoʻoni ʻa Sihová, naʻe ʻahiʻahiʻi ʻe he tokoua ʻo ʻeku tamaí ha founga kehe. Naʻá ne kōlenga mai kiate au: “Manatuʻi naʻá ke ʻalu ki he akó ke maʻu ha tuʻunga fakaako. Kapau te ke tukuange hoʻo akó pea ʻalu ʻo malanga, ʻe ʻikai ʻaupito ke ʻosi hoʻo akó. Ko ia ko e hā ʻoku ʻikai ai te ke tatali kae ʻoua ke ʻosi hoʻo akó ki muʻa peá ke kau ʻi he lotu foʻou ko ení.” Naʻe hā ngali totonu ia he taimi ko iá, ko ia naʻe tuku ai ʻa ʻeku ako mo e Kau Fakamoʻoní.

ʻI Tīsema 1970, ʻi he hili pē ʻa ʻeku maʻu tohi fakamoʻoni akó, naʻá ku hangatonu ai ki he Fale Fakatahaʻangá, pea kuó u ʻalu maʻu pē ki he ngaahi fakataha ʻa e Kau Fakamoʻoni ʻa Sihová talu mei ai. ʻI ʻAokosi 30, 1971, naʻá ku papitaiso ai ʻi he fakahāhā ʻa ʻeku fakatapui ki he ʻOtuá. Naʻe fakahohaʻasi ʻe he meʻa ko iá ʻo ʻikai ngata pē ʻi heʻeku ongo mātuʻá kae toe pehē foki ki he koló kotoa. Naʻa nau pehē kuó u fakalotomamahiʻi kinautolu koeʻuhi ko au ʻa e ʻuluaki tokotaha ʻi Ewossa pe ʻi he feituʻú kuó u maʻu ha sikolasipi mei he puleʻangá. Naʻe ʻamanaki lahi mai kiate au ʻa e tokolahi. Naʻa nau ʻamanaki te u ngāueʻaki ʻa hoku tuʻunga fakaakó ke ʻai ke fakalakalaka ʻa e koló.

Ngaahi Ola ʻo ʻEku Liliú

Ko hoku fāmilí mo e kau tangata taʻumotuʻa ʻo e koló naʻa nau fekauʻi mai ha kau fakafofonga ke nau feinga ke fakalotoʻi au ke u tukuange ʻa ʻeku tuí. Ko ʻenau ngaahi feingá naʻe kau ai mo e ngaahi talatuki. “Kapau ʻe ʻikai te ke liʻaki ʻa e lotu ko ení,” ko ʻenau leá ia, “ʻe malaʻia ho kahaʻú. ʻE ʻikai te ke maʻu ha ngāue. ʻE ʻikai lava ke ke langa hao fale. ʻE ʻikai malava ke ke mali pea tauhi ha fāmili.”

ʻI he kehe mei heʻenau ngaahi tomuʻa fakaʻamanakikoví, ʻi ha māhina ʻe hongofulu mei he ʻosi ʻa ʻeku akó, naʻá ku maʻu ai ha ngāue ko ha faiako. ʻI ʻOkatopa 1972, naʻá ku mali ai mo hoku uaifi ʻofeiná, ko Veronica. Ki mui ai, naʻe akoʻi au ʻe he puleʻangá ko ha fakafofonga ngoue fakalahi. Naʻá ku fakatau mai ʻa ʻeku ʻuluaki kaá, peá u kamata langa homa falé. ʻI Nōvema 5, 1973, naʻe fāʻeleʻi ai ʻa ʻema ʻuluaki taʻahiné, ko Victory, pea ʻi he ngaahi taʻu hoko mai aí naʻá ma toe maʻu ai ʻa Lydia, Wilfred mo Joan. ʻI he 1986 naʻe fāʻeleʻi ai ʻema leka fakamuimuí ko Micah. Kuo nau fakamoʻoniʻi ʻenau hoko kotoa ko e fānau mahuʻinga, ko ha tofiʻa meia Sihova.​—Sāme 127:3.

ʻI he fakakaukau atu ki heʻeku moʻuí, ʻoku lava ke u pehē ko e ngaahi fakaʻamu kovi ʻa e koló naʻe iku kotoa pē ia ki he ngaahi tāpuaki. Ko e ʻuhinga ia naʻá ku fakahingoa ai ʻa hoku ʻuluaki ʻofefiné ko Victory. Ki muí ni mai, naʻe tohi mai ai ʻa e koló kiate au ʻo pehē: “Kātaki, ʻoku mau loto ke ke foki mai ʻo kau ʻi hono langa fakalakalaka hake hotau koló he ko ē kuo tāpuakiʻi koe ʻe he ʻOtuá.”

Ko Hono ʻOhake ʻa e Fānaú ʻi he Ngaahi Founga Fakaʻotuá

Ko au mo hoku uaifí naʻá ma ʻiloʻi ʻe ʻikai lava ke ma fakatahaʻi ʻa homa fatongia fakaʻotua ʻo hono ʻohake ʻa e fānaú mo e tuli ki he ngaahi koloa fakamatelié. Ko ia ai, kuó ma ako ke fiemālie pē ʻi ha moʻui faingofua. ʻOkú ma saiʻia ke moʻui ʻi he foungá ni kae ʻikai ko e fehangahangai mo e ngaahi nunuʻa ʻe ala hoko ʻi he fili ha founga moʻui kehé.

ʻOku anga-maheni ʻaki ʻi he konga ko eni ʻo e māmaní ʻa ē ʻoku mau ʻi aí ke nofo fakataha ʻi ha fale mo e ngaahi fāmili kehé, ʻo ngāueʻaki ʻa e fale kaukau tatau, ngaahi naunau ʻi he peitó, mo e hā fua. Naʻá ma fiefia ʻi he malava ke totongi ha ngaahi nofoʻanga mavahe pē ʻi ha kolo pē naʻe ʻave au ki ai ʻi he tuʻunga ko ha tokotaha ngāue fakapuleʻangá. Ko e moʻoni, ko e ngaahi nofoʻanga peheé naʻe mamafa ange ia, ka ko hono maʻu iá naʻe fakasiʻisiʻi ai ʻa e tuku atu ʻema fānaú ki he ngaahi tākiekina ʻoku ʻikai leleí. ʻOku ou fakamālō kia Sihova he ʻi he faai mai ʻa e ngaahi taʻú, naʻá ma malava ai ke tauhi hake ʻema fānaú ʻi ha ʻātakai lelei fakalaumālie.

Tānaki atu ki ai, naʻe nofo maʻu ʻa hoku uaifí ʻi ʻapi koeʻuhí ke ne feohi mo tokangaʻi ʻa ʻema fānaú. ʻI he ʻosi ʻeku ngāué, naʻa mau feinga ke fai fakataha ʻa e ngaahi meʻá fakafāmili. ʻI ha meʻa pē ʻoku mau fai, ʻoku mau fai ia ʻi he tuʻunga ko ha timi. ʻOku kau heni ʻa e ako Tohitapu fakafāmilí, teuteu mo e kau ki he ngaahi fakataha ʻa e fakatahaʻangá, kau ʻi he ngāue fakafaifekau faka-Kalisitiané, pea pehē ki he kau ʻi he ngaahi ngāue fakasōsialé.

Kuó ma feinga ke muimui ʻi he akonaki ʻa e Teutalonome 6:​6, 7, ʻa ia ʻoku uki ai ʻa e ngaahi mātuʻá ke akoʻi ʻenau fānaú ʻo ʻikai ʻi ʻapi pē ka ʻi he faingamālie kotoa pē. Kuo fakatupunga ʻe he meʻá ni ʻa e fānaú ke nau kumi ke feohi pē ʻi loto kae ʻikai ki tuʻa. Kuo nau ako mei heʻema  faʻifaʻitakiʻangá ke sivisiviʻi ʻenau ngaahi feohí koeʻuhi ko au mo Veronica ʻoku ʻikai te ma fakamoleki ha taimi lahi ʻi he feohi mo e faʻahinga ʻoku ʻikai te nau kau ʻi heʻema tuí.​—Palovepi 13:20; 1 Kolinito 15:33.

Ko e moʻoni, ko ʻema tatakí mo e akonakí kuo ʻikai ko e tākiekina lelei pē ia ʻi he moʻui ʻa ʻema fānaú. Kuo hoko pea ʻoku kei hoko ʻo ʻatā ʻa homa ʻapí ki he kau Kalisitiane faivelengá, ko e tokolahi ʻo e faʻahingá ni ko e kau faifekau fefonongaʻaki ʻa e Kau Fakamoʻoni ʻa Sihová. Ko e taimi kuo fakamoleki ʻe he kau Kalisitiane matuʻotuʻa ko ení mo homa fāmilí kuo ʻoange ai ki heʻema fānaú ʻa e faingamālie ke nau siofi ai mo ako mei heʻenau founga moʻui feilaulauʻi-kitá. Kuo ʻai ʻe he meá ni ke mālohi ai ʻema akonakí, pea kuo ʻai ʻe he fānaú ʻa e moʻoni faka-Tohitapú ko ʻenau meʻa tonu.

Fakapaleʻi ʻi he Anga-Līʻoa Fakaʻotuá

ʻI he ʻahó ni ko au mo hoku uaifí, fakataha mo e toko fā ʻo ʻema fānaú, ʻoku mau kau ʻi he ngāue fakafaifekau taimi-kakató. Naʻá ku ʻuluaki kamata tāimuʻa ʻi he 1973. ʻI he faai mai ʻa e ngaahi taʻú, naʻe pau ai ke u taʻofi ʻa ʻeku ngāue fakafaifekau taimi-kakató ʻi ha taimi koeʻuhi ko e ngaahi tuʻunga fakaʻekonōmiká. ʻI he taimi ʻe taha, naʻe toe hoko foki ai ko hoku monū ia ke kau ʻi he faiako ʻi he Akoʻanga Ako Fakafaifekaú, ʻa ia ʻoku ʻomai ai ʻa e ako ki he kau ʻovasia Kalisitiane ʻa e Kau Fakamoʻoni ʻa Sihová. ʻOku ou lolotonga fiefia ʻi he monū ʻo e ngāue ʻi ha Kōmiti Fetuʻutaki Faka-Falemahaki, pea pehē ki he hoko ko e ʻovasia ʻo e kolo ko Uhonmora.

Ko hoku ʻuluaki ongo ʻofefiné, ʻa Victory mo Lydia, ʻokú na mali fiefia mo e ongo Kalisitiane lelei ʻi he kau mātuʻá. Ko kinaua mo hona ongo husepānití ʻoku nau ngāue ko e kau mēmipa ʻo e ʻōfisi vaʻa ʻo e Kau Fakamoʻoni ʻa Sihová ʻi Igieduma, Naisīlia. Ko homa foha lahi tahá, ʻa Wilfred, ʻoku ngāue ia ko ha sevāniti fakafaifekau, pea ko ʻema siʻisiʻi tahá, ʻa Micah, ʻoku ngāue ʻi he taimi ki he taimi ʻi he tuʻunga ko ha tāimuʻa tokoni. ʻI he 1997, naʻe ʻosi ai ʻa e ako ʻa Joan ʻi he kolisí peá ne kamata ngāue tāimuʻa tuʻumaʻu.

ʻOku ʻi he lotolotonga ʻo e ngaahi meʻa fakafiemālie taha kuo hokosia ʻi heʻeku moʻuí ʻa hono tokoniʻi ʻa e niʻihi kehé ke nau tauhi ʻa Sihova ko e ʻOtuá. Ko e faʻahinga ko iá ʻoku kau ai ʻa e niʻihi ʻo e kau mēmipa ʻi hoku fāmili fakalahí. Naʻe fai ʻe heʻeku tamaí ʻa e ngaahi feinga ke tauhi kia Sihova, ka ko e tōʻongaʻaki ʻa e mali tokolahí naʻá ne taʻofi ia. Mei heʻeku kei talavoú ʻo faai mai ai, naʻá ku ʻofa ki he kakaí. ʻI heʻeku sio ki he faingataʻaʻia ʻa e niʻihi kehé, ʻoku ou ongoʻi ai ʻo hangē ia ʻoku ʻikai loko mahuʻinga ʻa ʻeku ngaahi palopalemá. ʻOku ou tui ʻoku nau sio ʻoku ou holi loto-moʻoni ke tokoniʻi kinautolu, pea ʻoku ʻai ʻe he meʻá ni ke faingofua ange ai kia kinautolu ke mau talanoa.

Ko e taha ʻo e faʻahinga kuó u tokoniʻi ke ʻilo ʻa e ngaahi taumuʻa ʻa e ʻOtuá ko ha talavou ʻoku toka mohenga. Ko ha tokotaha ia naʻe ngāue ʻi ha kautaha ʻuhila ʻa ia naʻe maʻu lahi ia ʻe he ʻuhilá ʻi he ngāué ʻo ne mamatea ai mei he fatafatá ki lalo. Naʻá ne tali ha ako Tohitapu pea faifai pē ʻo ne tali ʻa e meʻa naʻá ne akó. Ko ʻene papitaiso ʻi ʻOkatopa 14, 1995, ʻi ha vaitafe ofi ki homau ʻapí, ko e ʻuluaki taimi ia ʻi he taʻu ʻe 15 kuó ne mavahe ai mei hono mohengá. Naʻá ne pehē ko e ʻaho fakafiefia taha ia ʻo ʻene moʻuí. Ko ha sevāniti fakafaifekau ia he taimí ni ʻi he fakatahaʻangá.

Kuo pau ke u leaʻaki ʻoku ʻikai haʻaku fakaʻiseʻisa ʻi heʻeku fili he taʻu nai ʻe 30 kuo maliu atú ke tauhi kia Sihova fakataha mo ʻene kakai fāʻūtaha mo fakatapuí. Kuó u mātā ʻa e ngāue ʻa e ʻofa moʻoní ʻi honau haʻohaʻongá. Neongo kapau naʻe ʻikai fakakau ʻa e ʻamanaki ʻo e moʻui taʻengatá ia ʻi he pale ʻa Sihova ki heʻene kau sevāniti loto-tōnungá, te u kei holi pē ki ha moʻui anga-līʻoa fakaʻotua. (1 Timote 6:6; Hepelu 11:6) Ko e meʻa ia kuó ne tataki mo ʻai ke tuʻumaʻu ʻa ʻeku moʻuí, ʻo ʻomai ai ʻa e fiefia, fiemālie mo e nēkeneka kiate au mo hoku fāmilí.

[Fakatātā ʻi he peesi 25]

Mo hoku uaifí mo e fānaú ʻi he 1990

[Fakatātā ʻi he peesi 26]

Mo hoku uaifí mo e fānaú mo e ongo foha-ʻi-he-fonó