Ko Hai ke Tukuakiʻí—Ko Koe pe ko Ho Ngaahi Kēnisí?

ʻOKU ngāue mālohi ʻa e kau saienisí ʻi he feinga ke maʻu ʻa e ngaahi tupuʻanga fakakēnisi ki he ʻolokahōliká, faka-Sōtomá, fakaʻaluʻalú, fakamālohí, tōʻonga taʻengali kehé, pea naʻa mo e maté tonu. ʻIkai ʻe hoko ko ha fakafiemālie ia ke ʻiloʻi ʻoku ʻikai tupu meiate kitautolu ʻetau ngaahi tōʻongá ka ko e kau maʻukovia pē ʻe he paiolosií? Ko e natula fakaetangatá ia ke tukuakiʻi ha taha pe ko ha meʻa kehe ki heʻetau ngaahi fehālaakí.

Kapau ko e ngaahi kēnisí ʻe tukuakiʻí, tā ʻe ala malava leva ki he kau saienisí ke liliu kinautolu ʻo fakangata ʻa e ngaahi fasi-ʻa-anga ʻoku ʻikai fiemaʻú fakafou ʻi he ʻenisinia fakakēnisí. Ko e lavameʻa ki muí ni ʻi hono mapeʻi ʻa e kēnome fakakātoa ʻo e tangatá kuó ne ʻomai ki he ngaahi ʻamanaki peheé ha fakaʻaiʻai mālohi foʻou.

Kae kehe, ko e malava ko ení, ʻoku makatuʻunga ia ʻi he lau ko ia ko hotau tufakanga fakakēnisí ʻoku moʻoni ko e meʻa ia ke tukuakiʻi ʻoku tupu mei ai ʻa e kotoa ʻo ʻetau angahalá mo ʻetau ngaahi fehālaakí. Kuo maʻu ʻe he ngaahi fakatotolo fakasaienisí ha fakamoʻoni feʻunga ke tukuakiʻi ʻaki hotau kēnisí? ʻOku hā mahino, ko e talí te ne mātuʻaki uesia lahi ʻa e anga ʻo ʻetau sio kia kitautolu mo hotau kahaʻú. Neongo ia, ki muʻa ke sivisiviʻi ʻa e fakamoʻoní, ko ha vakai ki he tupuʻanga ʻo e faʻahinga ʻo e tangatá ʻe hoko ia ko ha fakamaama.

Founga Naʻe Kamata Aí

ʻOku tokolahi ʻa e kakai ʻoku nau maheni, pe fanongo pē fekauʻaki mo e fakamatala ʻo kau ki he tō ʻa e ʻuluaki ongo meʻa fakaetangatá, ʻa ʻĀtama mo ʻIvi, ʻi he ngoue ko ʻĪtení. Naʻe ngaohi kinaua fakataha mo ha fehālaaki ʻi loto ʻi he kēnisí mei he kamatá, ko ha faʻahinga mele ʻi he faʻú naʻá ne tomuʻa ʻai ai kinaua ke na hehema ki he angahalá mo e talangataʻá?

Ko hona Tokotaha-Fakatupú, ʻa Sihova ko e ʻOtuá, ʻa ia ko ʻene ngaahi ngāué ʻoku haohaoa kotoa, naʻá ne fanongonongo ko ʻene meʻa fakatupu fakaemāmani māʻolunga tahá naʻe “lelei ʻaupito.” (Senesi 1:​31; Teutalonome 32:4) Ke toe fakamoʻoniʻi lahi ange ʻa ʻene fiemālie ki heʻene ngāué, naʻá ne tuku ki he ʻuluaki ongo meʻá ʻa ʻene tāpuakí pea fakahinohino kinaua ke na fakatokolahi, ke fakafonu ʻa e māmaní ʻaki ʻa e ngaahi meʻamoʻui fakaetangatá, pea ke pule ki heʻene meʻa fakatupu fakaemāmaní—ʻo ʻikai ʻaupito ko ha ngaahi tōʻonga ia ʻa ha taha ʻoku veiveiua ʻi he ngāue ʻa hono nimá.​—Senesi 1:​28.

ʻI he fekauʻaki mo hono fakatupu ʻo e ʻuluaki ongo meʻa fakaetangatá, ʻoku tala mai ʻe he Tohitapú kia kitautolu: “Naʻe fakatupu ʻe he ʻOtua ʻa e tangata ʻi he imisi oʻona, ʻio i he imisi ʻo e ʻOtua naʻa ne fakatupu ia; naʻa ne fakatupu ʻakinaua ko e tangata mo e fefine.” (Senesi 1:​27) ʻOku ʻikai ʻuhinga eni iá naʻe ngaohi ʻa e tangatá ke nau tatau mo e ʻOtuá ʻi he fōtunga fakaesinó, he “ko e ʻOtua ko e laumālie.” (Sione 4:​24) Ka, ʻoku ʻuhinga iá naʻe  tuku ki he ngaahi meʻamoʻui fakaetangatá ʻa e ngaahi ʻulungaanga fakaʻotuá mo ha ongoʻi ʻo e halá mo e tonú, ʻa ia ko ha konisēnisi. (Loma 2:​14, 15) Naʻa nau toe tauʻatāina ke fili, ʻo malava ke fakafuofua ha meʻa pea fili ki he meʻa ke faí.

Kae kehe, naʻe ʻikai ke tuku mai ʻa ʻetau ʻuluaki ongo mātuʻá ʻo ʻikai ha ngaahi tataki. ʻI hono kehé, naʻe fai ha fakatokanga kia kinaua ʻo fekauʻaki mo e ngaahi nunuʻa ʻo e faihalá. (Senesi 2:​17) Ko ia ai, ʻoku fakahaaʻi ʻi he fakamoʻoní ʻi he taimi naʻe fehangahangai ai ʻa ʻĀtama mo ha fili ki he tonú mo e halá, naʻá ne fili ʻe ia ke fai ʻa e meʻa naʻe hā ngali lelei pe ʻaonga ʻi he taimi ko iá. Naʻá ne muimui ʻi hono uaifí ʻi heʻene faihalá kae ʻikai fakakaukau ki hono vahaʻangatae mo hono Tokotaha-Fakatupú pe ko e ngaahi nunuʻa lele lōloa ʻo ʻene tōʻongá. Naʻá ne toe feinga ki mui ke leʻei ʻa e tukuakiʻí kia Sihova, ʻi heʻene pehē ko e uaifi naʻá Ne ʻomai kiate iá naʻá ne takihalaʻi iá.​—Senesi 3:​6, 12; 1 Timote 2:​14.

Ko e tali ʻa e ʻOtuá ki he angahala ʻa ʻĀtama mo ʻIví ʻoku fakamaama. Naʻe ʻikai te ne feinga ke fakatonutonu ha ‘mele fakaefaʻu’ ʻi hona ngaahi kēnisí. ʻI hono kehé, naʻá ne fakahoko ʻa e meʻa naʻá ne tala kia kinaua ʻe hoko ko e ngaahi nunuʻa ʻo ʻena tōʻongá, ʻa ia naʻe iku ai ʻo faifai pē peá na mate. (Senesi 3:​17-​19) Ko e muʻaki hisitōlia ko ení ʻokú ne fakamaama lahi ange ʻa e natula ʻo e tōʻonga fakaetangatá. a

Ko e Fakamoʻoni Fakafepaki ki he Paiolosií

ʻI ha taimi fuoloa, kuo fetakai ai ʻa e kau saienisí mo e ngāue lahi ʻo hono kumi ʻa e ngaahi tupuʻanga fakakēnisi mo e ngaahi faitoʻo ki he natula ʻo e mahakí pea mo e tōʻonga ʻa e tangatá. Hili e taʻu ʻe hongofulu ʻo e ngāue ʻa e timi ʻe ono ʻo e kau fakatotoló, naʻe ʻiloʻi ai ʻa e kēnisi ʻoku fehokotaki mo e mahaki Huntington, neongo ko e kau fekumí naʻe ʻikai haʻanau ʻiloʻi pe naʻe anga-fēfē ʻa e fakatupunga ʻe he kēnisí ʻa e mahakí. Kae kehe, ʻi he līpooti fekauʻaki mo e fekumi ko ení, naʻe hiki ai ʻe he Scientific American ʻa e lea ʻa e faipaiolosī ʻa Harvard ko Evan Balaban, ʻa ia naʻá ne pehē ʻe “faingataʻa lahi ange ke ʻiloʻi ʻa e ngaahi kēnisi ki he ngaahi uesia fakaetōʻongá.”

Ko hono moʻoní, ko e fekumi ʻi he feinga ke fakafehokotaki ʻa e ngaahi kēnisi pau ki he tōʻonga fakaetangatá kuo taʻelavameʻa ia. Hangē ko ení, ʻi he Psychology Today, ko ha līpooti fekauʻaki mo e ngaahi feinga ke ʻilo ʻa e ngaahi tupuʻanga fakakēnisi ki he loto-mafasiá ʻoku pehē ai: “Ko e fakamatala moʻoni ki he saienisi ki hono mapuleʻi ʻo e mahakí ʻi he ngaahi puke lalahi fakaʻatamaí ʻoku fakahaaʻi mahino ai ʻe ʻikai lava ke fakangatangata ia ki ha ngaahi tupuʻanga fakakēnisi ʻataʻatā pē.” ʻOku ʻomai ʻe he līpōtí ha fakatātā: “Ko e kau ʻAmelika naʻe fāʻeleʻi ki muʻa ʻi he 1905 naʻa nau maʻu ha tuʻunga ko e peseti ʻe 1 ʻo e loto-mafasiá ʻi he aʻu ki he taʻu 75. ʻI he kau ʻAmelika naʻe fāʻeleʻi ʻi he vaeua senituli ki mui aí, ko e peseti ʻe 6 ai ʻoku nau hoko ʻo loto-mafasia ʻi he aʻu ki he taʻu 24!” ʻOku fakaʻosiʻaki ai ko e ngaahi moʻoniʻi meʻa ʻi tuʻa pe ngaahi meʻa fakasōsialé ʻe lava ke ne fakatupunga ha ngaahi liliu fakafokifā pehē ʻi ha taimi nounou pehē.

 Ko e hā ʻoku tala mai kia kitautolu ʻe he ngaahi meʻá ni mo e ngaahi fakatotolo lahi kehé? Lolotonga ʻe fakahoko nai ʻe he ngaahi kēnisí ha ngafa ʻi hono fakafuo ʻa hotau ngaahi angaʻitangatá, ʻoku ʻi ai mahino ʻa e ngaahi tākiekina kehe. Ko ha meʻa tefito ko hotau ʻātakaí, ʻa ia kuo tofanga ʻi he ngaahi liliu lahi ʻi onopooni. ʻI he fekauʻaki mo e meʻa ʻoku fakaeʻa ki he toʻutupu ʻo e ʻaho ní ʻi he fakafiefia manakoá, ko e tohi Boys Will Be Boys ʻoku fakamatala ai ʻoku ʻikai hangehangē ʻe fakatupulekina ʻe he fānaú ha ngaahi tefitoʻi moʻoni fakaeʻulungaanga lelei ʻi heʻenau “tupu hake ʻo mamata ʻi he ngaahi houa ʻe laui mano ʻo e ngaahi faiva he TV mo e ngaahi filimi ʻa ia ʻoku ngaohikoviʻi ai ʻa e kakaí, fanaʻi, hokaʻi, toʻo honau ngākaú, fahifahi, hae honau kilí, pe tuʻutuʻu ha ngaahi konga, ʻi he tupu hake ʻa e fānaú ʻo fanongo ki he ngaahi fasi ʻoku fakavīkivikiʻi ai ʻa e tohotohó, taonakitá, ngaahi faitoʻo kona tapú, ʻolokaholó mo e fusifusilotó.”

ʻOku hā mahino, ko Sētane, “ʻa e ʻeiki ʻo e maama ko eni,” kuó ne fakafuo ha ʻātakai ʻoku tokoni ki he ngaahi holi ololalo ange ʻa e tangatá. Pea ko hai ia ʻe lava ke ne fakaʻikaiʻi ʻa e tākiekina mālohi ʻoku ʻomai ʻe he ʻātakai peheé ki he kotoa ʻo kitautolú?​—Sione 12:31; Efeso 6:​12; Fakahā 12:​9, 12.

Ko e Tupuʻanga ʻo e Faingataʻaʻia ʻa e Faʻahinga ʻo e Tangatá

Hangē ko ia kuo tau sio ki aí, naʻe kamata ʻa e ngaahi palopalema ʻa e faʻahinga ʻo e tangatá ʻi he taimi naʻe faiangahala ai ʻa e ʻuluaki ongo meʻa fakaetangatá. Ko e ikuʻangá? Lolotonga ʻoku ʻikai ha kaunga ia ʻa e ngaahi toʻutangata ʻo e fānau ʻa ʻĀtamá ki he angahala ʻa ʻĀtamá, ka ʻoku fanauʻi kotoa mai kinautolu fakataha mo e angahala, taʻehaohaoa, mo e mate ko honau tofiʻa tukufakaholo ia ʻi he moʻuí. ʻOku fakamatala ʻa e Tohitapú: “Ko ia, ko e hoko ʻa e fakamoʻui naʻe tatau mo e hoko ʻa e angahala ki mamani, ʻi he tangata pe taha; mo e hoko ʻa e mate ʻi he angahala; mo ʻene aʻusia pehe ʻa e kakai kotoa pe ʻe he mate, koeʻuhi ne angahala kotoa pe.”​—Loma 5:​12.

Ko e taʻehaohaoa ʻa e tangatá ʻokú ne fokotuʻu ai ia ʻi ha tuʻunga kovi pau. Ka ʻoku ʻikai fakaʻatā ai ia ʻe he meʻa ko iá mei he fatongia fakaeʻulungāngá kotoa. ʻOku fakahaaʻi ʻe he Tohitapú ko e faʻahinga ʻoku nau tui ki he tokonaki ʻa Sihova ki he moʻuí, pea liliu ʻenau moʻuí ki he ngaahi tuʻunga ʻa e ʻOtuá te nau maʻu ʻa ʻene hōifuá. ʻI heʻene ʻaloʻofá, naʻe fai ai ʻe Sihova ʻa e tokonaki mohu meesi ke huhuʻi ʻa e faʻahinga ʻo e tangatá, ke fakatau mai, hangē ko e laú, ʻa e meʻa naʻe fakamoleki ʻe ʻĀtamá. Ko e tokonaki ko iá ko e feilaulau huhuʻi ʻa hono ʻAlo haohaoa, ko Sīsū Kalaisí, ʻa ia naʻá ne pehē: “Naʻe ʻofa pehe ʻa e ʻOtua ki māmāni, ko ia naʻa ne foaki hono ʻAlo tofu-pe-taha-ne-fakatupu, koeʻuhi ko ia kotoa pe ʻoku tui pikitai kiate ia ke ʻoua naʻa ʻauha, kae maʻu ʻa e moʻui taʻengata.”​—Sione 3:​16; 1 Kolinito 15:​21, 22.

Naʻe fakahaaʻi ʻe he ʻapositolo ko Paulá ʻa ʻene houngaʻia loloto ki he tokonaki ko ení. Naʻá ne kalanga: “Siʻi toki malaʻia kita! ko hai tū te ne hamusi au mei he sino ʻoku mei ai ʻa e mate ni? Fakafetaʻi ki he ʻOtua, ʻa ia kuo ne fai ʻia Sisu Kalaisi ko hotau ʻEiki!” (Loma 7:​24, 25) Naʻe ʻiloʻi ʻe Paula kapau te ne tō ki he angahalá ʻi ha vaivai, ʻe lava ke ne kole ki he fakamolemole ʻa e ʻOtuá ʻo makatuʻunga ʻi he feilaulau huhuʻi ʻa Sīsū Kalaisí. b

Hangē ko ia ʻi he ʻuluaki senitulí, ʻi he ʻahó ni ko e tokolahi naʻa nau tataki ki muʻa ha ngaahi moʻui mātuʻaki koví pe ko honau tuʻungá ne hā ngali taʻeʻiai ha ʻamanakí kuo nau hoko ki ha ʻilo totonu ʻo e moʻoni faka-Tohitapú, fai ʻa e ngaahi liliu ʻoku fiemaʻú, pea nau ʻi ha tuʻunga ai ke maʻu ʻa e tāpuaki ʻa e ʻOtuá. Ko e ngaahi liliu naʻe pau ke nau faí naʻe ʻikai ke faingofua, pea ko e tokolahi ʻoku kei pau pē ke nau fāinga mo e ngaahi hehema fakatupu maumaú. Ka ʻi he tokoni ʻa e ʻOtuá, ʻoku nau malava ai ke tauhi maʻu ʻa e anga-tonú pea maʻu ʻa e fiefia ʻi he tauhi kiate iá. (Filipai 4:​13) Fakakaukau ki ha fakatātā ʻe taha pē ʻo ha taha kuó ne fai ha ngaahi liliu lahi koeʻuhí ke fakahōifuaʻi ʻa e ʻOtuá.

Ko ha Meʻa Fakalototoʻa Naʻe Hokosia

“ʻI heʻeku kei tamasiʻí ʻi ha ʻapiako nofo maʻu, naʻá ku kau ai ʻi he ngaahi tōʻonga faka-Sōtomá, neongo ia naʻe ʻikai ʻaupito te u fakakaukau kiate au ko ha tokotaha faka-Sōtoma. Naʻe vete ʻa ʻeku ongo  mātuʻá, pea naʻá ku fiemaʻu lahi ʻa e ʻofa fakaemātuʻa naʻe ʻikai ʻaupito te u maʻú. ʻI he ʻosi ʻa ʻeku akó, naʻá ku fai ai ʻa e ngāue fakakautau kuo tuʻutuʻuni pau. Naʻe ʻi ai ha kulupu ʻo e kau faka-Sōtomá ʻi he ngaahi nofoʻanga sōtia hoko mai kiate aú. Naʻá ku hoko ʻo fakaʻamu ki heʻenau founga moʻuí, ko ia naʻá ku kamata ai ke feohi mo kinautolu. Hili ʻa e feohi mo kinautolu ʻi ha taʻu, naʻá ku kamata leva ke fakakaukau kiate au ko ha tokotaha faka-Sōtoma. ‘Ko e tuʻunga ia ʻoku ou ʻi aí,’ ko ʻeku fakaʻuhingá ia, ‘pea ʻe ʻikai lava ke toe fai ha meʻa ki ai.’

“Naʻá ku kamata ako ʻa e lea faka-Sōtomá pea ʻalu ki he ngaahi kalapu ʻa e kau faka-Sōtomá, ʻa ia naʻe maʻu tauʻatāina ai ʻa e ngaahi faitoʻo kona tapú mo e ʻolokaholó. Neongo ʻi tuʻá ne hā ngali mātuʻaki fakafiefia ia mo fakamānako, naʻe palakū moʻoni ia. ʻI hoku lotó naʻá ku ongoʻi ko e faʻahinga vahaʻangatae ko ení naʻe taʻefakanatula pea naʻe ʻikai hano kahaʻu.

“ʻI ha kiʻi kolo siʻisiʻi, naʻá ku fou mai ai ʻi ha Fale Fakatahaʻanga ʻo e Kau Fakamoʻoni ʻa Sihová ʻoku lolotonga fai ai ʻa e fakataha. Naʻá ku hū ai ki loto ʻo fanongo ki he malangá, ʻa ia naʻe lave ai ki he ngaahi tuʻunga ʻi he Palataisi he kahaʻú. Hili iá naʻá ku feʻiloaki ai mo e niʻihi ʻo e Kau Fakamoʻoní pea naʻe fakaafeʻi ai au ki ha ʻasemipilī. Naʻá ku ʻalu ki ai, pea naʻe hoko ia ko ha meʻa fakahā kiate au—ʻi he sio ki he ngaahi fāmili fiefia ʻoku nau lotu fakatahá. Naʻá ku kamata ke ako Tohitapu mo e Kau Fakamoʻoní.

“Neongo ko ha fāinga ia kiate au, naʻá ku kamata ke ngāueʻaki ʻa e meʻa naʻá ku ako mei he Tohitapú. Naʻá ku malava ai ke mavahe mei he kotoa ʻo ʻeku ngaahi tōʻonga taʻemaʻá. Hili ʻa e ako ʻi he māhina ʻe 14, naʻá ku fakatapui ai ʻeku moʻuí kia Sihova pea papitaiso. Ko e ʻuluaki taimi ia ʻi heʻeku moʻuí naʻá ku maʻu ai ʻa e ngaahi kaumeʻa moʻoní. Kuó u malava ke tokoniʻi ʻa e niʻihi kehé ke nau ako ʻa e moʻoni mei he Tohitapú, pea ʻoku ou ngāue he taimí ni ko ha sevāniti fakafaifekau ʻi he fakatahaʻanga Kalisitiané. Kuo tāpuakiʻi moʻoni au ʻe Sihova.”

Ko Kitautolu Pē ʻOku Tupu mei Aí

Ko e feinga ke tuku ki hotau ngaahi kēnisí ʻa e tukuakiʻi kotoa ki hotau ʻulungaanga halá ʻoku ʻikai pē ko ha fakaleleiʻanga ia. ʻI he ʻikai tokoniʻi kitautolu ke solova pe ikuʻi ʻetau ngaahi palopalemá, ko e fakamatala ia ʻa e Psychology Today, ko e tukuakiʻi hotau kēnisí “ʻokú ne akoʻi mai nai ai kia kitautolu ha tuʻunga taʻealatokoniʻi ʻoku ʻi he tupuʻanga ʻo ʻetau ngaahi palopalema lahi. ʻI he ʻikai fakasiʻisiʻi ʻa e hoko ʻa e ngaahi palopalema ko ení, ʻoku hā ngali fakalahi ʻe he meʻá ni ʻenau tupú.”

Ko e moʻoni kuo pau ke tau fāinga mo e ngaahi mālohi fakafili lahi, ʻo kau ai ʻetau ngaahi hehema angahalaʻiá mo e ngaahi feinga ʻa Sētane ke fakaleluʻi kitautolu mei he talangofua ki he ʻOtuá. (1 Pita 5:8) ʻOku toe moʻoni ʻe tākiekina nai ʻe hotau ngaahi kēnisí kitautolu ʻi he ngaahi founga kehekehe. Ka ʻoku ʻikai moʻoni ke taʻealatokoniʻi kitautolu. Ko e kau Kalisitiane moʻoní ʻoku ʻi ai ʻenau ngaahi faʻahi mālohi—ko Sihova, Sīsū Kalaisi, laumālie māʻoniʻoni ʻo e ʻOtuá, ko ʻene Folofolá ʻa e Tohitapú, pea mo e fakatahaʻanga Kalisitiané.​—1 Timote 6:​11, 12; 1 Sione 2:1.

Ki muʻa ke hū ʻa e puleʻanga ʻo ʻIsilelí ki he Fonua ʻo e Talaʻofá, naʻe fakamanatu ʻe Mōsese ki he kakaí honau fatongia ʻi he ʻao ʻo e ʻOtuá, ʻi heʻene pehē: “Kuo u fokotuʻu ʻi ho ʻao ʻa e moʻui mo e mate, ʻa e monu mo e mala: ko ia ke ke fili ki he moʻui ka ke moʻui, ʻa koe mo ho hako, ke ʻofa kia Sihova ko ho ʻOtua, ke fakaongo ki hono leʻo, pea ke pikitai kiate ia.” (Teutalonome 30:​19, 20, fakaʻītali ʻamautolu.) Tatau pē ʻi he ʻahó ni, ko e tokotaha taki taha ʻoku kaunga ki aí ʻoku fakafatongiaʻi ia ke ne fai ha fili fakafoʻituitui fekauʻaki mo e tauhi ʻo e ʻOtuá pea ke aʻusia ʻa ʻene ngaahi fiemaʻú. Ko e filí ʻoku ʻaʻau ia.​—Kaletia 6:​7, 8.

[Fakamatala ʻi lalo]

[Fakatātā ʻi he peesi 9]

Naʻe ʻosi ʻai pē ki muʻa ʻa ʻĀtama mo ʻIvi ke na hehema ki he angahalá ʻe ha fehālaaki ʻi hona ngaahi kēnisí?

[Fakatātā ʻi he peesi 10]

ʻOku totonu ke tali ʻe he tokotaha taki taha ke fua ʻa e ola ʻo ʻene ngaahi filí?

[Maʻuʻanga]

Tokotaha ʻoku maʻu faitoʻo kona tapu: Godo-Foto

[Fakatātā ʻi he peesi 11]

Ko e feinga ke maʻu ʻa e tupuʻanga fakakēnisi ki he tōʻonga fakaetangatá kuo ʻikai ke lavameʻa

[Fakatātā ʻi he peesi 12]

Ko hono ngāueʻaki ʻa e meʻa ʻoku leaʻaki ʻe he Tohitapú ʻe lava ke ne tokoniʻi ʻa e faʻahinga loto-moʻoní ke nau liliu