Ko e Hā Hoʻo Fakakaukau ki he Maté?

ʻOKU ʻi ai ʻa e ola fakalotosiʻi ʻo e maté ʻia kitautolu ʻi heʻetau fakahoko ʻetau ngaahi ngāue fakaʻahó, ʻo tatau ai pē pe ko e hā nai hono lahi ʻo ʻetau moʻui leleí pe koloaʻiá. ʻE lava ke hoko mai ia ʻi he taimi hono hoko te tau kolosi ai ʻi ha hala pe tokoto ʻi he mohengá. Ko e ngaahi fakatamaki hangē ko ia ko e ongo ʻohofi fakaetautoitoi ʻi Sepitema 11, 2001, ʻi he Kolo Niu ʻIoké mo Uāsingatoni, D.C., ʻokú ne ʻai ai ke tau ʻiloʻi ko e “fili fakamui,” ʻa e maté, ʻokú ne toʻo ʻa e moʻuí mei he kakai ʻi he tuʻunga kotoa pē pea mei he faʻahinga taʻumotuʻa kotoa, ʻo toʻo ʻi he taimi ʻe niʻihi ʻa e moʻui ʻe laui afe ʻi ha ngaahi miniti siʻi pē.​—1 Kolinito 15:26.

Neongo ia, ʻoku hā ngali fusiakiʻi ʻe he maté ʻa e tokanga ʻa e kakaí. ʻOku ʻikai ha meʻa ʻe hā ngali lahi ange ai ʻa hono fakatau atu ʻo e ngaahi nusipepá pe tohoakiʻi ha kakai tokolahi ange ki he ongoongo ʻi he televīsoné ka ko e ngaahi fakamatala fekauʻaki mo e maté, tautefito ki he mate fakatokolahi ʻa e kakaí ʻi he ngaahi tuʻunga fakalilifú. ʻOku ʻikai hā ngali pāhia ai ʻa e kakaí, tatau ai pē pe ko e mate ʻi he taú, fakatamaki fakanatulá, faihiá pe ko e mahakí. Ko e nōfoʻi ko eni ʻi he maté ʻoku fakamatalaʻi ia ʻi he tuʻunga fakatupu puputuʻu tahá ʻi he lahi fau ʻa e felīngiaki ʻo e ngaahi ongoʻi ʻoku fakahāhā ʻi he mate ʻa e faʻahinga māʻolunga fakapuleʻangá mo e kakai ongoongoá.

Ko e kotoa ʻo e ngaahi meʻá ni ʻoku ʻikai ke ala fakaʻikaiʻi. ʻOku hokohoko atu pē ʻa e tokanga ʻa e kakaí ki he maté—ʻa e mate ʻa e niʻihi kehé. Kae kehe, ʻi he fehangahangai mo ʻenau maté tonu, ʻoku nau fakaʻehiʻehi mei ai. Ko ʻetau maté tonu ʻa e tuʻunga-lea ʻe taha ʻoku ʻikai loto ʻa e tokolahi taha ʻo kitautolú ke fakakaukau ki ai.

Fakapuputuʻuʻi ʻe he Maté?

Ko e fakakaukau atu ki heʻetau maté tonu ʻoku ʻikai maʻu pē ke fakamānako pea ʻe pehē maʻu ai pē ia. Ko e hā ʻoku pehē aí? Koeʻuhí he kuo fokotuʻu ʻe he ʻOtuá kia kitautolu ʻa e holi lahi ke moʻui taʻengatá. “Kae ʻumaʻa kuo ne ʻai ʻa itaniti ki honau loto,” ko e lau ia ʻa e Koheleti 3:​11. Ko ia ai, ko e taʻealaleʻei ʻa e maté, kuó ne fakatupu ha faitau ʻi loto ʻi he tangatá, ko ha fepaki hokohoko. Ke fakaleleiʻi ʻa e faitau ʻi loto ko ení pea ke fakatōliʻa ʻa e holi fakanatula ke hokohoko atu ʻa e moʻuí, kuo faʻu ai ʻe he tangatá ʻa e faʻahinga kehekehe ʻo e tuí, mei he tokāteline ʻo e taʻefaʻamate ʻa e soulú ki he tui ki he toe fanauʻi sino foʻoú.

ʻI ha tuʻunga pē, ko ha meʻa fakatupu hohaʻa mo fakailifia ʻa e maté, pea ko e manavahē ki he maté ʻoku ʻi he feituʻu kotoa pē. Ko ia ai, ʻoku ʻikai totonu ke tau ʻohovale ʻi he ʻiloʻi ʻe he sōsaieti fakalūkufua ʻo e tangatá ko ha ʻamanaki fakalotosiʻi ʻa e maté. Ko e meʻa ʻe taha, ʻoku fakaeʻa ʻe he maté ʻa e taʻeʻaonga lahi ʻa ha moʻui ʻoku līʻoa he tuli ki he koloá mo e tuʻunga mafaí.

Fakamavaheʻi ʻe he Maté?

ʻI he ngaahi taimi he kuohilí, ko ha tokotaha ʻoku puke ʻo ʻikai ha toe ʻamanaki pe moʻua ʻi ha kafo fakatupu mate naʻe faʻa tuku ia ke mate ʻi he ngaahi ʻātakai maheni mo ʻofeina ʻo hono ʻapí  tonu. Ko e meʻa ia naʻe faʻa hoko ʻi he taimi ʻo e Tohitapú, pea ʻoku kei hoko ia ʻi he ngaahi sivilaise ʻe niʻihi. (Senesi 49:​1, 2, 33) ʻI he ngaahi tuʻunga peheé, ʻoku fakatahataha ai ʻa e fāmilí, pea ʻoku fakakau ʻa e fānaú ʻi he fetalanoaʻakí. ʻOku ʻoange ʻe he meʻá ni ki he mēmipa taki taha ʻi he fāmilí ʻa e ongoʻi ʻoku ʻikai te ne mamahi tokotaha pea ʻoku ʻomai ai ʻa e fakafiemālie ʻo e kau fakataha ʻi he fatongiá pea kau fakataha ʻi he tengihiá.

ʻOku kehe ʻaupito eni ia mo e meʻa ʻoku hoko ʻi ha sōsaieti ʻa ia ʻoku tapui ai ʻa e lāulea ia fekauʻaki mo e maté, ʻi he vakai ki ai ʻoku ʻikai lelei, pea ʻoku ʻikai fakakau ai ʻa e fānaú ʻi he pehē tokua ʻe hoko ia ʻo “fuʻu fakamafasia” kia kinautolu. Ko e maté ʻi he ngaahi ʻahó ni ʻoku kehe ia ʻi he ngaahi founga lahi, pea ʻoku faʻa lahi ange ai ʻa e tuēnoá. Neongo ʻe saiʻia ʻa e tokolahi tahá ke nau mate ʻi ʻapi, ʻi he nonga mo tokangaʻi lelei ʻe he fāmilí, ki he tokolahi ko e foʻi moʻoni fakamamahí ʻoku nau mate ʻi ha falemahaki, ʻo faʻa tuku mavahe pea ʻi he langa, ʻo tau ki ai ha ngaahi fuʻu ʻotu meʻangāue fakaeonopooni fakailifia. ʻI he tafaʻaki ʻe tahá, ʻoku mate pē ai ʻa e laui miliona ʻo ʻikai ʻilo​—ʻi he tuʻunga ko e faʻahinga ʻoku maʻukovia ʻo ʻikai ʻiloʻi ʻe he fakaʻauha fakamatakalí, hongé, ʻeitisí, tau fakalotofonuá, pe ko e masiva ʻangoʻangó pē.

Ko ha Tuʻunga-Lea ke Fakalaulauloto ki Ai

ʻOku ʻikai ke fakalotosiʻi ʻe he Tohitapú ʻa e fakakaukau ki he maté. Ko hono moʻoní, ʻoku tala mai kia kitautolu ʻe he Koheleti 7:2: “ʻOku lelei hake ke ʻalu ki ha fale ʻoku ʻi ai ha tangi, ʻi he ʻalu ki he fale ʻoku fai ai ha inu kava: he ko e meʻa ko é ko e ngataʻanga ʻo e tangata kotoa pe.” ʻI he fehangahangai mo e tuʻunga moʻoni ʻo e maté, te tau tafoki nai ai mei heʻetau ngaahi hohaʻá pe ngaahi ngāue tuʻumaʻú ʻo tokangataha ki he tuʻunga nounou ʻo e moʻuí. ʻE lava ke tokoniʻi kitautolu ʻe he meʻá ni ke tau moʻui ai ʻi ha founga mohu ʻuhinga ange kae ʻikai ke nofo taumuʻavalea pē pe moʻui taʻeʻaonga.

Ko e hā hoʻo fakakaukau ki he maté? Kuó ke sivisiviʻi hoʻo ongoʻí, tuí, ʻamanakí mo e manavahē fekauʻaki mo e ngataʻanga ʻo hoʻo moʻuí?

Hangē ko ia ko e natula ʻo e moʻuí, ko e natula ʻo e maté ʻoku mahulu atu ia ʻi he malava ʻa e tangatá ke fakamatalaʻí mo mahinoʻí. Ko e tokotaha pē ʻa ia ko e tuʻunga mafai alafalalaʻanga ia ʻi he meʻá ni ko hotau Tokotaha-Fakatupú. Ko ia ʻa e “matavai ʻo e moʻui” pea ʻoku ʻiate ia ʻa e “moui mei he mate.” (Sāme 36:9; 68:​20, PM) Neongo ʻe hā ngali fakaʻohovale, ko hano sivisiviʻi ʻo e ngaahi tui manakoa ʻe niʻihi fekauʻaki mo e maté ʻi he vakai ki he Folofola ʻa e ʻOtuá ʻe fakamoʻoniʻi ai ʻoku fakatou fakafiemālie mo fakalototoʻa ia. ʻE fakahaaʻi ai ko e maté ʻoku ʻikai ʻaupito ko e ngataʻanga ia ʻo e meʻa kotoa pē.

[Fakatātā ʻi he peesi 4]

Ko e malava ko ia ke hoko ʻa e maté ʻoku tokoniʻi ai kitautolu ke tau moʻui ʻi ha founga mohu ʻuhinga ange