Ko e Tetakalamatoni ʻi he Septuagint
Ko e Tetakalamatoni ʻi he Septuagint
KO E huafa fakaʻotua ko e Sihová, ʻoku fakafofongaʻi ia ʻe he Tetakalamatoní, ʻa ia, ko e ngaahi foʻi mataʻitohi faka-Hepelū ʻe fā ko e יהוה (YHWH). Naʻe ʻi ai ʻa e tui fuoloa ko e Tetakalamatoní naʻe ʻikai ke hā ia ʻi he ngaahi tatau ʻo e Septuagint. Ko ia ai, naʻe fakakikihiʻi ʻo pehē, ʻi he taimi naʻe lave ai ʻa e kau hiki tohi ʻo e Ngaahi Konga Tohitapu Faka-Kalisi Kalisitiané ki he Ngaahi Konga Tohitapu Faka-Hepeluú, naʻe ʻikai te nau ngāueʻaki ʻa e huafa fakaʻotuá ʻi heʻenau tohí.
Ko ha ngaahi ʻotu ʻilo foʻou naʻe maʻu ʻi he taʻu ʻe teau pe lahi hake kuo mahili atú naʻe fakahaaʻi ai naʻe hā ʻa e huafa ʻo e ʻOtuá ʻi he Septuagint. ʻOku pehē ʻe ha matavai ʻe taha: “ʻI he mātuʻaki holi lahi ko ia ke fakatolonga totonu ʻa e huafa toputapu ʻo e ʻOtuá, naʻe hanga ai ʻe he kau Siu naʻa nau ohi ʻa e anga faka-Kalisí, ʻi hono liliu ʻa e Tohitapu faka-Hepeluú ki he faka-Kalisí, ʻo hiki tatau ʻa e ngaahi foʻi mataʻitohi tofu pē ko ia ʻo e Tetakalamatoní ʻi he lotolotonga ʻo e potutohi faka-Kalisí.”
Ko e konga pepailo ʻoku hā ʻi he toʻohemá ko e taha pē ia ʻi ha ngaahi sīpinga kuo tolonga mai. ʻI hono maʻu ʻi Oxyrhynchus, ʻIsipite, pea fakafika ʻaki ʻa e fika 3522, naʻe faʻu ʻa e konga ko ení ʻi he ʻuluaki senituli T.S. a ʻOku feʻunga nai hono lahí mo e senitimita ʻe 7 mo e 10.5 pea ʻoku ʻi ai ha konga mei he Siope 42:11, 12. Ko e Tetakalamatoni ʻoku siakaleʻí, ʻoku hā ia ʻi he ngaahi foʻi mataʻitohi faka-Hepelū motuʻá. b
Ko ia leva, naʻe hā ʻa e huafa fakaʻotuá ʻi he muʻaki ngaahi tatau ʻo e Ngaahi Konga Tohitapu Faka-Kalisi Kalisitiané? ʻOku pehē ʻe he mataotao ko George Howard: “Koeʻuhi naʻe kei hiki pē ʻa e Tetakalamatoní ʻi he ngaahi tatau ʻo e Tohitapu faka-Kalisí [ʻa e Septuagint] ʻa ia naʻe faʻuʻaki ʻa e ngaahi Konga Tohitapu ʻo e muʻaki siasí, ʻoku ʻuhinga lelei ai ke tui ko e kau hiki ʻo e F[uakava] F[oʻoú], ʻi heʻenau lave ki ha Konga Tohitapu, naʻa nau tauhi maʻu ʻa e Tetakalamatoní ʻi he potutohi faka-Tohitapú.” ʻOku hā mai, ʻi he taimi nounou mei ai naʻe fetongi ʻe he kau hiki tataú ʻa e huafa fakaʻotuá ʻaki ʻa hono ongo fetongi, ʻo hangē ko e Kyʹri·os (ʻEiki) mo e The·osʹ (ʻOtua).
[Fakamatala ʻi lalo]
a Ki ha fakamatala lahi ange fekauʻaki mo e ngaahi pepailo naʻe maʻu ʻi Oxyrhynchus, sio ki he The Watchtower ʻo Fepueli 15, 1992, peesi 26-8.
b Ki ha ngaahi sīpinga kehe ʻo e huafa fakaʻotuá ʻi he ngaahi liliu faka-Kalisi motuʻá, sio ki he New World Translation of the Holy Scriptures−With References, ʻapenitiki 1C.
[Maʻuʻanga ʻo Tā ʻi he peesi 30]
Courtesy of the Egypt Exploration Society