Maʻu ʻa e Fiefia ʻi he Māʻoniʻoni ʻa Sihová

“Ko ia oku tulituli bau ki he maonioni moe aloofa te ne maʻu ae moui, moe maonioni, bea moe ogolelei.”—Palovepi 21:​21, PM.

1. Ko e hā ʻa e ngaahi hala ʻo e kakai ʻi he ʻaho ní kuo taki atu ki he ngaahi nunuʻa fakatuʻutāmakí?

 “ʻOKU ai ha hala ʻoku matamata totonu ki he tangata, ka ʻoku tuʻulu atu ki he ngaahi hala ʻoku fakatau ki he mate.” (Palovepi 16:25) He tonu moʻoni ē ko hono fakamatalaʻi ʻe he palōveepi faka-Tohitapu ko ʻení ʻa e ngaahi hala ʻo e kakai tokolahi taha ʻi he ʻaho ní! ʻI he tuʻunga fakalūkufuá, ʻoku tokanga pē ʻa e kakaí ia ki hono fai ʻa e meʻa ʻoku tonu ʻi heʻenau vakai ʻanautolú, ʻo tukunoaʻi ai naʻa mo e ngaahi fiemaʻu tefito lahi taha ʻa e niʻihi kehé. (Palovepi 21:2) ʻOku nau taukaveʻi ʻoku nau tokaʻi ʻa e ngaahi lao mo e ngaahi tuʻunga ʻa e fonuá ka ʻoku nau feinga ke kalo takai holo ʻi he faingamālie kotoa pē. Ko e olá ko ha sōsaieti ʻoku mavahevahe, puputuʻu, mo fakatupu fifili.—2 Timote 3:​1-5.

2. Ko e hā ʻoku fiemaʻu fakavavevave ki he lelei maʻá e faʻahinga ʻo e tangatá?

² Ki he lelei pē maʻatautolu—pea ki he melino mo e maluʻanga ʻa e fāmili fakaetangatá fakakātoa—ʻoku fiemaʻu fakavavevave ai kiate kitautolu ha lao pe tuʻunga ʻoku totonu mo tonú, ʻa e taha ko ia ʻoku loto-lelei ʻa e kakai kotoa ke nau tali mo talangofua ki aí. ʻOku hā mahino, ʻoku ʻikai ha lao pe tuʻunga naʻe fokotuʻu ʻe ha tangata, tatau ai pē ʻa hono lahi ʻo e poto mo e loto-moʻoni ʻa e tokotaha ko iá, ʻe lava ke ne fakalato ʻa e fiemaʻu ko iá. (Selemaia 10:23; Loma 3:​10, 23) Kapau ʻoku ʻi ai ha tuʻunga pehē, ʻe malava ke maʻu ia ʻi fē pea ʻe fēfē ia? Mahalo ko e fehuʻi ʻoku mahuʻinga angé, Kapau ʻoku ʻi ai ha tuʻunga pehē, te ke fiefia ai mo tali lelei ia?

Ko Hono Maʻu ʻa e Tuʻunga Māʻoniʻoní

3. Ko hai ʻoku taau lahi taha ke ne tokonaki mai ha tuʻunga ʻa ia ʻoku ala tali mo ʻaonga ki he kakaí kotoa, pea ko e hā hono ʻuhingá?

³ Ke maʻu ha tuʻunga ʻoku ala tali mo ʻaonga ki he tokotaha kotoa, ʻe pau ke tau ʻalu ki he tokotaha ʻa ia ʻokú ne lakasi ʻa e ngaahi fakangatangata fakaefaʻahinga, fakaesivilaise, mo e fakapolitikale kotoa pē pea ʻoku ʻikai ke fakafeʻātungiaʻi ia ʻe he sio nounou mo e ngaahi taʻemalava fakaetangatá. ʻOku ʻikai ha toe veiveiua, ko e tokotaha pē ʻoku tāú ko e Tokotaha-Fakatupu māfimafi-aoniú, ko Sihova ko e ʻOtuá, ʻa ia ʻokú ne fanongonongo: “Hange ʻoku maʻolunga ʻa e langi ʻi mamani, pehe  ʻoku maʻolunga hoku ngaahi ʻalunga ʻi he ngaahi ʻalunga ʻomoutolu, mo ʻeku ngaahi fakakaukau ʻi he ngaahi fakakaukau ʻamoutolu.” (Aisea 55:9) ʻIkai ko ia pē, ʻoku fakamatalaʻi ʻe he Tohitapú ʻa Sihova “ko e ʻOtua ʻo e loto-tōnunga, ʻa ia ʻoku ʻikai ha fakamaau taʻetotonu ʻiate ia; ʻokú ne māʻoniʻoni mo faitotonu.” (Teutalonome 32:​4, NW) ʻI he kotoa ʻo e Tohitapú, ʻoku tau maʻu ai ʻa e kupuʻi lea “oku maonioni a Jihova.” (Ekisoto 9:​27, PM; 2 Kalonikali 12:​6, NW; Sāme 11:​7, PM; Sāme 129:4; Tangilaulau 1:​18, PM; Fakahā 19:​2, NW) ʻIo, ʻoku malava ke tau hanga kia Sihova ki he tuʻunga māʻolunga angé koeʻuhi ʻokú ne faitōnunga, faitotonu, mo māʻoniʻoni.

4. Ko e hā ʻa e ʻuhinga ʻo e foʻi lea “māʻoniʻoni”?

⁴ Ko e moʻoni, ko e foʻi lea “māʻoniʻoni” ʻoku ʻikai fuʻu manakoa ia ʻi he ʻahó ni. Ko hono moʻoní, ko e tokolahi taha ʻo e kakaí ʻoku nau fai ha vakai koviʻia ki ai, naʻa mo hono fakamaʻamaʻaʻi, ʻo fakatatau ia ki he fakangalingalilotu, pe fakahaaʻi ʻa e līʻoa mo e faʻa lotu mālualoi. Kae kehe, fakatatau ki he tikisinale ʻe taha, ko e “māʻoniʻoni” ʻoku ʻuhinga iá ki he “totonu, anga-tonu, anga-lelei; taʻehalaia, taʻehaangahala; liliu ki he ngaahi tefitoʻi moʻoni ʻo e lao fakaʻotuá pe ngaahi tuʻunga ʻo e ʻulungāngá ʻoku talí; ngāue tonu pe totonu.” ʻIkai te ke fiefia ʻi ha lao pe tuʻunga ʻokú ne kātoi ʻa e ngaahi ʻulungaanga lelei peheé?

5. Fakamatalaʻi ʻa e anga ʻo e māʻoniʻoní hangē ko ia ʻoku fakahaaʻi ʻi he Tohitapú.

⁵ ʻI he fekauʻaki mo e anga ʻo e māʻoniʻoní, ʻoku pehē ʻe he Encyclopaedia Judaica: “Ko e māʻoniʻoní ʻoku ʻikai ko ha foʻi anga pē ʻo e fakakaukaú ka ʻoku makatuʻunga moʻoni ia ʻi hono fai ʻo e meʻa ʻoku totonu mo tonu ʻi he ngaahi vahaʻangatae kotoa pē.” Ko e fakatātaá, ko e māʻoniʻoni ʻa e ʻOtuá ʻoku ʻikai ko ha anga pē ia ʻi loto pe anga fakafoʻituitui ʻokú ne maʻu, ʻo hangē ko hono tuʻunga toputapú mo e maʻá. ʻI hono kehé, ko ha fakahāhā ia ʻo hono natulá ʻi he ngaahi founga ʻoku tonu mo totonú. ʻE leaʻaki nai ʻo pehē koeʻuhi ko Sihová ʻoku toputapu mo maʻa, ko e meʻa kotoa pē ʻokú ne faí mo e meʻa kotoa pē ʻoku haʻu meiate iá ʻoku māʻoniʻoni. Hangē ko ia ʻoku pehē ʻe he Tohitapú, “ʻoku māʻoniʻoni ʻa Sihova ʻi heʻene ngaahi founga kotoa mo mateaki ʻi heʻene ngaahi ngāué kotoa.”​—Sāme 145:​17, NW.

6. Ko e hā naʻe leaʻaki ʻe Paula ʻo fekauʻaki mo e kau Siu taʻetui ʻe niʻihi ʻi hono ʻahó, pea ko e hā hono ʻuhingá?

⁶ Naʻe fakamamafaʻi ʻe he ʻapositolo ko Paulá ʻa e poini ko ʻení ʻi heʻene tohi ki he kau Kalisitiane ʻi Lomá. ʻI he fekauʻaki mo e kau Siu taʻetui ʻe niʻihi, naʻá ne tohi: “Ko e meʻa ʻi he ʻikai te nau ʻilo ki he maʻoniʻoni ʻoku mei he ʻOtua, ka nau feinga pe ke tuʻu ʻa e maʻoniʻoni fakaekinautolu, ko ia naʻe ʻikai ai te nau fakavaivai ki he maʻoniʻoni ʻoku mei he ʻOtua.” (Loma 10:3) Ko e hā naʻe lave ai ʻa Paula ki he faʻahinga ko iá naʻe “ʻikai te nau ʻilo ki he maʻoniʻoni ʻoku mei he ʻOtua”? Meʻa ní naʻe ʻikai fakahinohinoʻi kinautolu ʻi he Laó, ʻa e ngaahi tuʻunga māʻoniʻoni ʻa e ʻOtuá? Ko hono moʻoní, naʻe akoʻi ai kinautolu. Kae kehe, ko e tokolahi ʻo kinautolu naʻa nau vakai ki he māʻoniʻoní ko ha angalelei fakafoʻituitui pē, ke aʻusia ʻaki hono tauhi fakamātoato mo fakamākukanga ʻa e ngaahi tuʻutuʻuni fakalotú, kae ʻikai vakai ki ai ko ha tuʻunga ke ne tataki kinautolu ʻi heʻenau ngaahi feangainga mo e kaungā faʻahinga ʻo e tangatá. Hangē pē ko e kau taki lotu ʻi he ʻaho ʻo Sīsuú, naʻe ʻikai te nau mahinoʻi ʻa e ʻuhinga moʻoni ʻo e fakamaau totonú mo e māʻoniʻoní.​—Mātiu 23:​23-​28.

7. ʻOku anga-fēfē hono fakahaaʻi ʻa e māʻoniʻoni ʻa Sihová?

⁷ ʻI hono kehe ʻaupitó, ʻoku fakahaaʻi mo mātā mahino ʻa e māʻoniʻoni ia ʻa Sihová ʻi he kotoa ʻo ʻene ngaahi feangaingá. Neongo ko ʻene māʻoniʻoní ʻoku fiemaʻu ai ke ʻoua te ne tukunoaʻi pē ʻa e ngaahi angahala loto-lelei ʻa e kau faihalá, ʻoku ʻikai ke ʻai ia ʻo ne hoko ko ha ʻOtua taʻeongoʻi mo fai fakakouna, ke manavahēʻia pea ʻikai ke fai ha fakaofiofi ki ai. ʻI hono kehé, ko ʻene ngaahi ngāue māʻoniʻoní kuo tokonaki mai ai ha makatuʻunga ʻa ia ʻe malava ai ʻa e faʻahinga ʻo e tangatá ke fakaofiofi kiate ia pea ke fakahaofi ai mei he ngaahi nunuʻa fakalilifu ʻo e angahalá. Ko ia ai, ʻoku feʻunga fakaʻaufuli ʻa hono fakamatalaʻi ʻo Sihova “ko ha ʻOtua māʻoniʻoni mo ha Fakamoʻui.”​—Aisea 45:​21, NW.

Māʻoniʻoni mo e Fakamoʻui

8, 9. ʻI he ngaahi founga fē naʻe fakahaaʻi ai ʻe he Laó ʻa e māʻoniʻoni ʻa e ʻOtuá?

⁸ Ke mahinoʻi ʻa e fekauʻaki ʻa e māʻoniʻoni ʻa e ʻOtuá mo ʻene ngāue anga-ʻofa ʻo e fakamoʻuí, fakakaukau atu ki he Lao naʻá ne foaki ki he puleʻanga ʻo ʻIsilelí fakafou ʻia Mōsesé. ʻOku ʻikai ha veiveiua ko e Laó naʻe māʻoniʻoni. ʻI heʻene ngaahi lea fakaʻosí, naʻe fakamanatu ai ʻe Mōsese ki he kau ʻIsilelí: “Koefe ha kakai oku behe ni hono lahi aia kuo maʻu ae gaahi tuutuuni moe gaahi fakamāu maonioni, o tatau moe [laó] ni kotoabe, aia oku ou fokotuu  i ho mou ao he aho ni?” (Teutalonome 4:​8, PM) ʻI he laui senituli ki mui ai, naʻe fanongonongo ʻe Tuʻi Tēvita ʻo ʻIsilelí: “Koe gaahi fakamau a Jihova oku mooni mo maonioni kotoabe.”—Sāme 19:​9, PM.

⁹ Fakafou ʻi he Laó, naʻe fakahā mahino ai ʻe Sihova ʻene ngaahi tuʻunga haohaoa ʻo e tonú mo e halá. Naʻe fakahaaʻi fakaikiiki fakaʻāuliliki ʻe he Laó ʻa e founga ke tōʻongaʻaki ʻe he kau ʻIsilelí ʻo ʻikai ngata pē ʻi he ngaahi meʻa fakalotú kae toe pehē foki ʻi he ngaahi feangainga fakapisinisí, ngaahi vā fakaemalí, ngaahi tuʻunga fekauʻaki mo e kaí mo e fakamaʻá, pea mo e ngaahi tuʻutuʻuni fakaefakamāú foki. Naʻe toe fakahoko ʻe he Laó ha ngaahi tuʻutuʻuni fefeka ki he kau maumau-laó, naʻa mo hono hilifaki ʻa e tautea mate ʻi he ngaahi tuʻunga ʻe niʻihi. a Ka naʻe hoko ai ʻa e ngaahi fiemaʻu māʻoniʻoni ʻa e ʻOtuá, hangē ko ia naʻe fakahaaʻi ʻi he Laó, ko ha kavenga fefeka mo fakaongosia ki he kakaí, ʻo toʻo atu ai meiate kinautolu ʻenau tauʻatāiná mo e fiefiá, ʻo hangē ko ia ʻoku taukaveʻi ʻe he kakai tokolahi he ʻaho ní?

10. Naʻe anga-fēfē ʻa e ongoʻi ʻa e faʻahinga naʻe ʻofa kia Sihová fekauʻaki mo ʻene ngaahi laó?

¹⁰ Ko e faʻahinga naʻa nau ʻofa kia Sihová naʻa nau maʻu ʻa e fiefia lahi ʻi heʻene ngaahi laó mo e ngaahi tuʻutuʻuni māʻoniʻoní. Ko e fakatātaá, ko Tuʻi Tēvita, naʻe ʻikai ngata pē ʻi heʻene lāuʻilo ko e ngaahi tuʻutuʻuni fakaefakamaau ʻa Sihová ʻoku moʻoni mo māʻoniʻoní, hangē ko ia kuo tau mātaá, ka naʻá ne toe maʻu foki ha ʻofa mo e houngaʻia moʻoni kiate kinautolu. ʻI he fekauʻaki mo e ngaahi lao mo e ngaahi tuʻutuʻuni fakaefakamaau ʻa Sihová, naʻá ne tohi: “Meʻa mahuʻinga ange ia ʻi he koula, ʻio ha koula lelei mo lahi; meʻa melie ange ʻi he honi, ʻio ʻa e honi ʻoku toʻi noa mai. Kaeʻumaʻa ʻoku hinoiʻi ai hoʻo tamaioʻeiki, pea ʻi hono tauhi ʻoku iku ai ki ha fuʻu totongi.”​—Sāme 19:​7, 10, 11.

11. Naʻe anga-fēfē hono fakamoʻoniʻi ko e Laó naʻe hoko ko ha “tokotaha fakahinohino ʻo taki atu ai kia Kalaisi”?

¹¹ ʻI he laui senituli ki mui ai, naʻe fakahaaʻi ai ʻe Paula ha toe tuʻunga mahuʻinga lahi ange ʻo e Laó. ʻI heʻene tohi ki he kau Kalētiá, naʻá ne tohi: “Kuo hoko ʻa e Laó ko hotau tokotaha fakahinohino ʻo taki atu ai kia Kalaisi, ko ia ai, ʻe lava ke fakahaaʻi ʻoku tau māʻoniʻoni tuʻunga ʻi he tuí.” (Kaletia 3:​24, NW) ʻI he ʻaho ʻo Paulá, ko ha tokotaha fakahinohino (“faiako,” Kingdom Interlinear) ko ha sevāniti pe pōpula ia ʻi ha ʻapi lahi. Ko hono ngafá ia ke maluʻi ʻa e fānaú pea ke fakafeʻao kinautolu ki he ʻapiakó. ʻI he tuʻunga tatau, naʻe maluʻi ʻe he Laó ʻa e kau ʻIsilelí mei he ʻulungaanga ololaló mo e ngaahi tōʻonga fakalotu ʻa e ngaahi puleʻanga takatakai aí. (Teutalonome 18:​9-13; Kaletia 3:​23) Tānaki atu ki ai, naʻe hanga ʻe he Laó ʻo ʻai ʻa e kau ʻIsilelí ke nau lāuʻilo ki honau tuʻunga angahalaʻiá pea ki he fiemaʻu kiate kinautolu ʻa e fakamolemolé mo e fakamoʻuí. (Kaletia 3:​19) Ko e ngaahi fokotuʻutuʻu fakaefeilaulaú naʻe tuhu ia ki he fiemaʻu ko ia ʻo ha feilaulau huhuʻí pea naʻe tokonaki mai ai ha sīpinga fakaekikite ʻa ia ʻe malava ke ʻiloʻi pau ai ʻa e Mīsaia moʻoní. (Hepelu 10:​1, 11, 12) Ko ia ai, neongo naʻe fakahaaʻi ʻe Sihova ʻene māʻoniʻoní fakafou ʻi he Laó, naʻá ne fai ia ki ha lelei maʻá e kakaí mo e fakakaukau atu ki he fakamoʻui taʻengatá.

Faʻahinga Naʻe Lau ʻe he ʻOtuá ʻOku Māʻoniʻoní

12. Ko e hā naʻe mei malava ke maʻu ʻe he kau ʻIsilelí ʻi hono tauhi fakalelei ʻa e Laó?

¹² Koeʻuhi ko e Lao naʻe foaki ʻe Sihová naʻe māʻoniʻoni ʻi he founga kotoa pē, ʻi he talangofua ki aí naʻe mei malava ai ki he kau ʻIsilelí ke nau maʻu ha tuʻunga māʻoniʻoni ʻi he ʻao ʻo e ʻOtuá. Naʻe  fakamanatu ʻe Mōsese ki he kau ʻIsilelí ʻi heʻenau teuteu hū ki he Fonua ʻo e Talaʻofá: “ʻE tuʻu ia maʻatau maʻoniʻoni, ʻo kapau te tau tokanga ke fai hono kotoa ʻo e fekau ni ʻi he ʻao ʻo Sihova ko hotau ʻOtua, ʻo hange ko ʻene tuʻutuʻuni mai.” (Teutalonome 6:​25) Tānaki atu ki ai, naʻe ʻosi talaʻofa ʻe Sihova: “Te mou tauhi ʻeku ngaahi tuʻutuʻuni mo ʻeku ngaahi konisitutone, ʻa ia ka fai ʻe ha tangata, te ne moʻui ai: ko Sihova au.”​—Livitiko 18:5; Loma 10:5.

13. Naʻe fakamaau taʻetotonu ʻa Sihova ʻi hono fiemaʻu ʻene kakaí ke nau tauhi ʻa e Lao māʻoniʻoní? Fakamatalaʻi.

¹³ Ko e meʻa fakamamahí, ʻi he tuʻunga ko ha puleʻangá, naʻe taʻemalava ai ʻa e kau ʻIsilelí “ke fai hono kotoa ʻo e fekau ni ʻi he ʻao ʻo Sihova” pea ʻikai ai te nau malava ke maʻu ʻa e ngaahi tāpuaki naʻe talaʻofaʻaki maí. Naʻe ʻikai te nau malava ke tauhi ʻa e kotoa ʻo e ngaahi fekau ʻa e ʻOtuá koeʻuhi ko e Lao ʻa e ʻOtuá naʻe haohaoa ka ko kinautolú naʻe ʻikai. ʻOku ʻuhinga ʻení ʻoku ʻikai fakamaau totonu pe māʻoniʻoni ʻa e ʻOtuá? Ko hono moʻoní, ʻoku ʻikai. Naʻe tohi ʻe Paula: “Bea ka koia, bea tau behe koeha? Oku i he Otua ae taeagatonu? Ikai aubito.” (Loma 9:​14, PM) Ko hono moʻoní, ko e faʻahinga tāutaha, fakatouʻosi ʻi he ki muʻa pea mo e hili hono foaki ʻo e Laó, ne ʻosi lau ʻe he ʻOtuá ʻoku nau māʻoniʻoni neongo naʻa nau taʻehaohaoa mo angahalaʻia. Ko e fakahokohoko ʻo e kakai manavahē-ʻOtua peheé ʻoku kau ai ʻa Noa, ʻĒpalahame, Siope, Lēhapi, mo Taniela. (Senesi 7:1; 15:6; Siope 1:1; Isikeli 14:14; Semisi 2:​25) Ko e fehuʻí leva: Naʻe makatuʻunga ʻi he hā ʻa hono lau ʻe he ʻOtuá ʻoku māʻoniʻoni ʻa e faʻahinga tāutaha ko iá?

14. Ko e hā ʻoku ʻuhinga ki ai ʻa e Tohitapú ʻi heʻene lea ʻo kau ki ha tangata ʻo pehē ʻoku “maʻoniʻoni”?

¹⁴ ʻI he taimi ʻoku lea ai ʻa e Tohitapú ʻo kau ki ha tangata ʻo pehē ʻoku “maʻoniʻoni,” ʻoku ʻikai ke fakahuʻunga ia ai ʻoku taʻeʻiai haʻane angahala pe ʻoku haohaoa. ʻI hono kehé, ʻoku ʻuhinga iá ki hono fakahoko ʻe he tokotahá ʻa hono ngaahi ngafa ʻi he ʻao ʻo e ʻOtuá mo e tangatá. Ko e fakatātaá, naʻe ui ʻa Noa “ko e tangata angatonu [“māʻoniʻoni,” NW]” pea “haohaoa pe ʻi he ngaahi toʻutangata naʻe feʻunga mo ia” koeʻuhi naʻá ne ‘fai ʻa e meʻa naʻe tuʻutuʻuni kiate ia ʻe he ʻOtuá, naʻá ne fai ia.’ (Senesi 6:​9, 22; Malakai 3:​18) Ko Sākalaia mo ʻIlisapesi, ʻa e ongo mātuʻa ʻa Sione Papitaisó, “naʻá na māʻoniʻoni ʻi he ʻao ʻo e ʻOtuá koeʻuhi ko ʻena ʻaʻeva haohaoa ʻo fakatatau ki he ngaahi fekau mo e ngaahi fiemaʻu fakalao kotoa pē ʻa Sihová.” (Luke 1:​6, NW) Pea ko e tokotaha ʻikai ko ha ʻIsileli, ko ha ʻōfisa fakakautau ʻĪtali, ko hono hingoá ko Koliniusi, naʻe fakamatalaʻi “koe tangata agatonu [“māʻoniʻoni,” NW], bea manavahe ki he Otua.”​—Ngāue 10:​22, PM.

15. Ko e hā ʻoku fekauʻaki vāofi mo e māʻoniʻoní?

¹⁵ ʻIkai ngata aí, ko e māʻoniʻoni ʻi he faʻahinga ʻo e tangatá ʻoku fekauʻaki ʻaupito ia mo e meʻa ʻoku ʻi hoto lotó—ʻa ʻete tui mo e houngaʻia mo e ʻofa kia Sihova mo ʻene ngaahi talaʻofá—ʻo ʻikai ngata pē ʻi heʻete fai ʻa e meʻa ʻoku fiemaʻu mai ʻe he ʻOtuá. ʻOku pehē ʻe he ngaahi Konga Tohitapú ko ʻĒpalahamé naʻe “tui kia Sihova: pea ne lau ia maʻane  maʻoniʻoni.” (Senesi 15:6) Naʻe maʻu ʻe ʻĒpalahame ʻa e tui ʻo ʻikai ngata pē ʻi he ʻi ai ʻa e ʻOtuá kae toe pehē foki ki heʻene talaʻofa fekauʻaki mo e “hako.” (Senesi 3:​15; 12:2; 15:5; 22:18) Makatuʻunga ʻi he tui peheé pea mo e ngaahi ngāue ʻo fehoanaki mo e tuí, naʻe malava ai ke feangainga ʻa Sihova mo tāpuakiʻi ʻa ʻĒpalahame mo e faʻahinga faitōnunga kehé neongo naʻa nau taʻehaohaoa.​—Sāme 36:10; Loma 4:​20-​22.

16. Ko e hā kuo iku ki ai ʻa e tui ki he huhuʻí?

¹⁶ Fakaʻosí, ko e māʻoniʻoni ʻi he faʻahinga ʻo e tangatá ʻoku fakatuʻunga ia ʻi he tui ki he feilaulau huhuʻi ʻa Sīsū Kalaisí. ʻI he fekauʻaki mo e kau Kalisitiane ʻi he ʻuluaki senitulí, naʻe tohi ʻe Paula: “ʻOku hoko ia ko ha meʻaʻofa taʻetotongi ʻa hono fakahā [ʻe he ʻOtuá] ʻoku nau māʻoniʻoni ʻi heʻene ʻofa maʻataʻatā ʻo fakafou he fakatauʻatāina ʻe he huhuʻi naʻe totongi ʻe Kalaisi Sīsuú.” (Loma 3:​24, NW) Naʻe lea ai ʻa Paula ʻo fekauʻaki mo e faʻahinga ko ia naʻe fili ke hoko ko e ngaahi kaungāʻea mo Kalaisi ʻi he Puleʻanga fakahēvaní. Ka naʻe hanga ʻe he feilaulau huhuʻi ʻa Sīsuú ʻo toe fakaʻatā ʻa e faingamālie ki ha toe laui miliona kehe ke nau maʻu ai ha tuʻunga māʻoniʻoni ʻi he ʻao ʻo e ʻOtuá. Naʻe sio ʻa e ʻapositolo ko Sioné ʻi ha vīsone ki ha “fuʻu kakai lahi, ʻa ia ʻe ʻikai lava ʻe ha taha hano lau, . . . naʻa nau tutuʻu ʻi he ʻao ʻo e taloni pea ʻi he ʻao ʻo e Lami, kuo nau kofu ʻaki ʻa e ngaahi kofu hinehina tōtōlofa.” ʻOku fakatātaaʻi ʻe he ngaahi kofu hinehina tōtōlofá honau tuʻunga maʻa mo māʻoniʻoni ʻi he ʻao ʻo e ʻOtuá koeʻuhi “naʻa nau fō honau kofu, ʻo fakahinehina ʻi he taʻataʻa ʻo e Lami.”​—Fakahā 7:​9, 14.

Fiefia ʻi he Māʻoniʻoni ʻa Sihová

17. Ko e hā ʻa e ngaahi sitepu kuo pau ke laka ai ʻi he tuli ki he māʻoniʻoní?

¹⁷ Lolotonga kuo tokonaki anga-ʻofa mai ʻe Sihova hono ʻAló, ʻa Sīsū Kalaisi, ko e founga ia ke maʻu ai ʻe he faʻahinga ʻo e tangatá ha tuʻunga māʻoniʻoni ʻi hono ʻaó, ʻoku ʻikai hoko noa mai ai pē ʻa e tuʻunga māʻoniʻoní ia. Kuo pau ke te ngāueʻi ʻe kita ʻa e tui ki he huhuʻí, ʻomai ʻete moʻuí ke fehoanaki mo e finangalo ʻo e ʻOtuá, fai ha fakatapui kia Sihova, pea fakahāhaaʻi ia ʻaki ʻa e papitaiso ʻi he vaí. Hili iá, kuo pau leva ke te hokohoko atu ke tuli ki he māʻoniʻoní, pea pehē ki he ngaahi ʻulungaanga fakalaumālie kehé. Ko Tīmote, ko ha Kalisitiane ʻosi papitaiso fakataha mo e ui fakahēvaní, naʻe enginaki ki ai ʻa Paula: “Tuli ki he maonioni, moe aga faka-Otua, moe tui, moe ofa, moe faa kataki, moe agavaivai.” (1 Timote 6:​11, PM; 2 Timote 2:22) Naʻe toe fakamamafaʻi ʻe Sīsū ʻa e fiemaʻu ke feinga hokohokó ʻi heʻene pehē: “Ko ia, hanganaki fuofua kumi ʻa e puleʻangá pea mo ʻene māʻoniʻoní.” Mahalo pē ʻoku tau ngāue mālohi ʻaupito ke kumi ki he ngaahi tāpuaki ʻa e Puleʻanga ʻo e ʻOtuá, ka ʻoku tau ngāue mālohi tatau ke tuli ki he ngaahi founga māʻoniʻoni ʻa Sihová?—Mātiu 6:​33, NW.

18. (a) Ko e hā ʻoku ʻikai faingofua ai ke tuli ki he māʻoniʻoní? (e) Ko e hā ʻoku malava ke tau ako mei he faʻifaʻitakiʻanga ʻa Loté?

¹⁸ Ko e moʻoni, ʻoku ʻikai faingofua ke tuli ki he māʻoniʻoní. ʻOku peheé koeʻuhi ko kitautolu kotoa ʻoku tau taʻehaohaoa pea ko ʻetau hehema fakanatulá ʻoku huʻu ki he taʻemāʻoniʻoní. (Aisea 64:6) ʻIkai ngata aí, ʻoku takatakai kiate kitautolu ʻa e kakai ʻa ia ʻoku ʻikai te nau loko tokanga fekauʻaki mo e ngaahi founga māʻoniʻoni ʻa Sihová. Ko hotau ngaahi tuʻungá ʻoku mātuʻaki meimei hangē ia ko e ngaahi tuʻunga ʻo Loté, ʻa ia naʻá ne moʻui ʻi he kolo ongoongoa he fulikivanú ko Sōtoma. Naʻe fakamatalaʻi ʻe he ʻapositolo ko Pitá ʻa e ʻuhinga naʻe vakai ai ʻa Sihova ʻoku feʻungamālie ke fakahaofi ʻa Lote mei he fakaʻauha naʻe tuʻunuku atú. Naʻe pehē ʻe Pita: “Ko siʻi maʻoniʻoni ko ia, ko e meʻa ʻi heʻene nofo ʻi honau lotolotonga, ʻo sio mo fanongo ki heʻenau meʻa, naʻa ne fakahohaʻa tuʻu hono laumalie maʻoniʻoni ʻi he ʻaho kotoa pe ʻaki ʻenau ngaahi ngaue maumau lao.” (2 Pita 2:​7, 8) Ko ia, ʻoku lelei ke tau taki taha ʻeke hifo kia kitautolu: ‘ʻOku ou tali loto-lelei ʻi loto ʻa e ngaahi tōʻonga taʻetaau ʻoku tau sio ʻoku takatakai ʻiate kitautolú? ʻOku ou ʻilo ko e fakafiefia pe sipoti manakoa ka ʻoku fakamālohí ʻoku ʻikai lelei? Pe ʻoku ou ongoʻi hohaʻa tuʻu ʻo hangē ko Loté koeʻuhi ko e ngaahi tōʻonga peheé?’

19. Ko e hā ʻa e ngaahi tāpuaki ʻe lava ke ʻatautolu kapau te tau maʻu ʻa e fiefia ʻi he māʻoniʻoni ʻa e ʻOtuá?

 ¹⁹ ʻI he ngaahi ʻaho fakatuʻutāmaki mo taʻepau ko ʻení, ko e fiefia ʻi he māʻoniʻoni ʻa Sihová ko ha matavai ia ʻo e maluʻanga mo e maluʻi. Ki he fehuʻi: “E Jihova, kohai te ne nofo i ho fale fehikitaki? kohai te ne nofo mau i ho mouga [tapu]?” Naʻe tali ʻe Tuʻi Tēvita: “Ko ia ia oku eveeva i he agatonu, bea gaue i he maonioni.” (Sāme 15:​1, 2, PM) ʻI he tuli ki he māʻoniʻoni ʻa e ʻOtuá pea maʻu ʻa e fiefia ʻi aí, ʻe malava ke tau tauhi maʻu ai ha vahaʻangatae lelei mo ia pea hokohoko atu ke fiefia ʻi heʻene hōifuá mo ʻene tāpuakí. Ko ia, ko ʻetau moʻuí ko ha moʻui ʻo e fiemālie, tokaʻi-kita, mo e nonga ʻo e ʻatamaí. “Ko ia oku tulituli bau ki he maonioni moe aloofa te ne maʻu ae moui, moe maonioni, bea moe ogolelei,” ko e lau ia ʻa e Folofola ʻa e ʻOtuá. (Palovepi 21:21) ʻIkai ngata aí, ko e feinga ʻaki ʻetau lelei tahá ke fai ʻa e meʻa ʻoku totonu mo tonu ʻi he kotoa ʻo ʻetau ngaahi feingá ʻoku ʻuhinga iá ko e ngaahi vahaʻangatae fakafoʻituitui fiefia pea mo ha tuʻunga lelei ange ʻo e moʻuí—fakaeʻulungaanga mo e fakalaumālie. Naʻe fanongonongo ʻe he tokotaha-tohi-sāmé: “ʻOku fiefia ʻa e faʻahinga ʻoku nau tauhi ʻa e fakamaau totonú, ʻo fai māʻoniʻoni ʻi he taimi kotoa pē.”—Sāme 106:​3, NW.

[Fakamatala ʻi lalo]

ʻE Lava Ke Ke Fakamatalaʻi?

• Ko e hā ʻa e māʻoniʻoní?

• ʻOku anga-fēfē ʻa e fekauʻaki ʻa e fakamoʻuí mo e māʻoniʻoni ʻa e ʻOtuá?

• ʻOku makatuʻunga ʻi he hā ʻa hono lau ʻe he ʻOtuá ʻoku māʻoniʻoni ʻa e faʻahinga ʻo e tangatá?

• ʻE lava fēfē ke tau maʻu ʻa e fiefiá ʻi he māʻoniʻoni ʻa Sihová?

[Fehuʻi ki he Ako]

[Fakatātā ʻi he peesi 15]

Naʻe fakahaaʻi ʻe Tuʻi Tēvita ʻa e ʻofa moʻoni ki he ngaahi lao ʻa e ʻOtuá

[Fakatātā ʻi he peesi 16]

Ko Noa, ʻĒpalahame, Sākalaia mo ʻIlisapesi, pea mo Koliniusi naʻe lau ʻe he ʻOtuá ʻoku nau māʻoniʻoni. ʻOkú ke ʻilo hono ʻuhingá?