“Naʻa Nau ʻAlu Hifo”

“ʻOku ʻufiʻufi kinautolu ʻe he ngaahi moana: naʻa nau ʻalu hifo ki he kilisitahi ʻo hange ha maka.”

ʻI HE ngaahi lea ko iá, naʻe kātoangaʻi ai ʻe Mōsese pea mo e kau ʻIsilelí ʻaki ha hiva ʻa honau fakahaofi mei he Tahi Kulokulá pea mo hono fakaʻauhamālie ʻa honau fili ʻIsipite naʻe tulimui maí—ʻa Felo pea mo ʻene kau tau mālohí.​—Ekisoto 15:​4, 5.

ʻI he sio tonu ha taha pē ʻi he meʻa fakaholomamata ko iá, naʻe faingofua ke mahino ʻa e lēsoní. ʻOku ʻikai ha taha ʻe lava ke ne poleʻi pe talitekeʻi lavameʻa ʻa e tuʻunga mafai ʻo Sihová pea moʻui. Kae kehe, ʻi ha ngaahi māhina siʻi pē ki mui ai, naʻe poleʻi fakahāhā ai ʻe he kau ʻIsileli tuʻu-ki-muʻa—ko Kola, Tētani, ʻApilami, mo e kau poupou ʻe toko 250—ʻa e tuʻunga mafai kuo foaki ʻe he ʻOtuá kia Mōsese mo ʻĒloné.​—Nomipa 16:​1-3.

ʻI he tataki ʻa Sihová, naʻe fakatokanga ai ʻa Mōsese ki he kau ʻIsilelí ke nau fakamamaʻo mei he ngaahi tēniti ʻo e kau angatuʻú. Ko Tētani mo ʻApilami, fakataha mo e ngaahi mēmipa ʻo honau fāmilí ʻi hona tafaʻakí, naʻa nau fakafisi ke liliu ʻenau fakakaukaú. Naʻe fanongonongo leva ʻe Mōsese ʻo pehē ʻi Heʻene founga pē ʻaʻaná, ʻe fakamahinoʻi ai ʻe Sihova ki he kakaí ko e kau tangata ko ʻení naʻa nau “taʻefakaʻapaʻapa kia Sihova.” ʻI he tuʻunga ko iá, naʻe fakaava ai ʻe Sihova ʻa e kelekele naʻa nau tuʻu aí. “ʻIo ko kinautolu mo ia kotoa pe naʻe kau kiate kinautolu naʻa nau ʻalu hifo moʻui ki lolofonua, pea naʻe mapuni ʻa e fonua kiate kinautolu.” Kae fēfē ʻa Kola mo e kau angatuʻu kehé? “Pea pa atu ha afi mei a Sihova, ʻo keina ʻa e toko uangeau-ma-nimangofuluʻi tangata naʻe toʻo inisenisi.”—Nomipa 16:​23-​35; 26:10.

Ko Felo mo ʻene kau taú, pehē ki he faʻahinga angatuʻu ʻi he toafá, naʻe fakaʻauha kotoa ia koeʻuhí he naʻe ʻikai te nau lāuʻilo ki he tuʻunga mafai ʻo Sihová pea mo ʻene mahuʻingaʻia ʻi he ngaahi meʻa ʻa hono kakaí. Ko ia ai, ʻoku fakavavevave ki he faʻahinga kotoa ʻa ia te nau sio ki he maluʻi ʻa Sihova ʻi he ngaahi ʻaho faingataʻá ni ke nau ako ʻo kau ki ai pea talangofua kia Sihova ʻi hono tuʻunga ko e “Fungani Māʻolunga” mo e “Tokotaha Māfimafi-Aoniu.” ʻI he fai peheé, ʻe lava ke nau tokanga ai ki he ngaahi lea fakapapau ʻa Sihová: “E to ae toko afe i ho tafaaki, bea koe toko mano i ho nima toomatau; ka e ikai hoko ia o ofi kiate koe. Ka te ke vakai o mamata aki ho mata ki he totogi oe agahala. Koeuhi kuo ke fili a Jihova aia ko hoku hufaga, io, koe fugani maoluga ko ho nofoaga.”​—Sāme 91:​1, 7-9, PM.