Ngaahi Fehuʻi mei he Kau Lautohí

ʻOku fiemaʻu ʻa e fakauku kakato ʻi he vaí kapau ʻoku loto ha taha ke papitaiso ka ʻokú ne faingataʻaʻia lahi fakaesino pe ʻi ha tuʻunga mātuʻaki kovi fakaemoʻuilelei, ʻa ia ʻe ʻai ai ke faingataʻa ʻa e fakaukú?

Ko e foʻi lea “papitaisó” ʻoku haʻu ia mei he foʻi veape faka-Kalisi ko e baʹpto, ko hono ʻuhingá “ke fakaunu ki loto.” (Sione 13:26) ʻI he Tohitapú, “ke papitaiso” ʻoku tatau ia mo e pehē “ke fakauku.” ʻI he fekauʻaki mo e papitaiso ʻa e ʻiunoke ʻItiopea naʻe fakahoko ʻe Filipé, ʻoku pehē ʻe he The Emphasised Bible, ʻa Rotherham: “Naʻá na ʻalu hifo fakatouʻosi ki he vaí, fakatouʻosi ʻa Filipe pea mo e ʻiunoké,​—pea naʻá ne fakauku ia.” (Ngāue 8:​38) Ko ia ai, ko e tokotaha ʻoku papitaisó ʻoku fakaunu moʻoni ia ki lalo ʻi he vaí.​—Mātiu 3:​16; Maake 1:​10.

Naʻe fakahinohino ʻe Sīsū ʻa ʻene kau ākongá: “Ko ia ke mou ō, ʻo ngaohi ʻa e ngāhi kakai kotoa pe ko ʻeku kau ako, ʻi he papitaiso kinautolu.” (Mātiu 28:​19, 20) Fakatatau ki ai, ʻoku fokotuʻutuʻu ʻe he Kau Fakamoʻoni ʻa Sihová ke fai ʻa e ngaahi papitaiso ʻi he ngaahi vai kaukau, ngaahi anovai, ngaahi vaitafe, pe ko ha ngaahi feituʻu kehe ʻa ia ʻoku ʻi ai ʻa e vai feʻunga ki he fakauku kakató. Koeʻuhi ko e papitaiso ʻaki ʻa e fakauku kakató ko ha fiemaʻu Fakatohitapu ia, ʻoku ʻikai ha mafai ʻo e tangatá ke fakaʻatā ha taha mei he papitaisó. Ko ia ai, ʻoku totonu ke papitaiso ha taha neongo ʻoku ʻi ai ha ngaahi sitepu ngalikehe ʻoku fiemaʻu koeʻuhi ko hono tuʻungá. Ko e fakatātaá, ko e ngaahi papitaiso ʻi he ngaahi fuʻu topu kaukau lalahí kuo tokoni lahi ia ki he faʻahinga taʻumotuʻá pe ko e faʻahinga ʻoku ʻi ha tuʻunga mātuʻaki vaivai fakaemoʻuí. Ko e vai ʻi he topú ʻe lava ke fakamāfana ia, ʻe lava ke tuku hifo lelei mo māmālie ki he vaí ʻa e tokotaha teu papitaisó pea ʻi heʻene alāanga pē ki aí, ʻe lava leva ke fakahoko moʻoni ʻa e papitaisó.

Naʻa mo e kakai ʻoku nau faingataʻaʻia lahi fakaesinó kuo nau papitaiso. Hangē ko ení, ko e faʻahinga tāutaha kuo fai hanau tafa ʻi he kiá pea ko hono ikuʻangá ʻoku ʻi ai ha foʻi ava tuʻumaʻu ʻi he mongá, pe ko e faʻahinga ʻoku fiemaʻu ke nau ngāueʻaki ha meʻa mānava fakamīsiní kuo fakauku kinautolu. Ko e moʻoni, ki he papitaiso kotoa ko iá ʻe fiemaʻu ai ke fai ʻa e ngaahi teuteu fakaʻāuliliki. ʻE fakapotopoto ke ʻi ai ha neesi hoko, pe ko ha toketā ʻo kapau ʻe lava ke maʻu. Kae kehe, ʻi he taimi ʻoku fai ai ʻa e tokanga makehe pe ngāue ki muʻá, ʻi he meimei kotoa ʻo e ngaahi tuʻungá, ʻe lava ke fakahoko ʻa e ngaahi papitaisó. Ko ia ai, ʻoku totonu ke fai ha ngāue ʻo fakatatau ki he fakakaukau leleí ke papitaiso ha tokotaha ʻi he vaí kapau ko e holi loto-moʻoni ia ʻa e tokotahá pea kapau ʻokú ne loto ke tali ʻa e ngaahi tuʻunga fakatuʻutāmaki ʻoku kau ki aí.